رواية غموض الحب الفصل التاسع 9 بقلم لولا
رواية غموض الحب الجزء التاسع
رواية غموض الحب البارت التاسع
رواية غموض الحب الحلقة التاسعة
الراجل بحده ياك علشان انت خدت البت وربيتها منبقاش احنا اهلها ولينا حق فيها ولا ايه ؟؟؟؟؟
عز الدين بحده وكنتوا فين انتوا يا اهلها وهي حته لحمه حمرا ومش معتبرينها منكم دلوقتي احلوت ياسمين
الراجل بعصبيه والله دي حاجه متخصكش لينا فيها وعايزين نشوفها دي دمنا ولحمنا
عز الدين بحده انسى مبقتش تخصكم خلاص وانا اللي هيقرب لبنتي هنهي حياته ياسمين بنتي انا وهتفضل معايا انا وشايله اسمي ومحدش منكم هيشوفها
الراجل بسخريه تفتكر رده فعل بنتك حبيبتك ايه لما تعرف الحقيقه وانك معيشها في وهم كبير
عز الدين اتوتر واكمل بحده قولتلك ميخصكش دي مشاكلي انا محدش قالك فكر فيها بدالي
الراجل بسخريه لا يا جدع .. طيب هيجي يوم وساعه هتعرف فيها وابقى قابلني لو سامحتك على اللي انت عملتوا فيها
عز الدين بعصبيه عملت ايه انت عبيط انا معيشها احسن عيشه وبعلمها وبحبها وهي بتحبني اخرج انت بس براها وملكش دعوه يا صالح
صالح بضحك ايوه مننكرش بس كل ده وهم وكدب وهي لما تعرف مش هتسامحك لانها بسببك شافت وسمعت كلام كتير اوي صعب
عز الدين الدموع اتجمعت في عنيه واكمل بحده وقتك خلص مشوفش اسمك في تليفوني تاني وانسى انك تشوفها السر ده هيموت معانا ومحدش هيعرفه وهي مش هتقف على انها تشوفكم هي متعرفش بيكم اصلا
صالح الكدب بيأجل انكشاف الحقيقه يا عز بس مش بيخفيها .. سلام
وقفل وعز الدين كان مضايق جدا وعمال يفكر هيعمل ايه وخايف صالح يعرف عنوان بيته ويجي يعرف ياسمين كل حاجه فاكمل بتوتر لالا ياسمين مينفعش تعرف الحقيقه هتتعب انا ماصدقت رضيت وقبلت بحياتها الجديده
———————————————–
عند مازن وياسمين
مازن بتنهيده طب ايه هتفضلي ساكته وبتهري في نفسك كده كتير .. اتكلمي وسمعينا الكلمتين اللي محشورين في زورك ونخلص
ياسمين بغيره مازن اسكت علشان والله العظيم نفسي اجيبها من شعرها انت وهي معصبني
مازن بدهشه: انا معصبك ??? ليه هببت ايه انا انتي هتلبسيني مصيبه وخلاص هو اي نكد
ياسمين بحده اه اصل انت شايف انه عادي تحرجني وتقولها وتابعت بسخريه معلقتين سكر ياا رغددد وتبقى ماحرجتنيش ومهببتش حاجه مش كده
مازن بص حواليه يشوف حد بص عليهم من صوتها ولالا بعدين بصلها ومسك دراعها جامد واكمل بحده قسما بالله لولا في الشارع كنت وريتك هعمل فيكي ايه صوتك ده ميعلاش تاني .. انتي عبيطه يابت انتي ولا ايه انا مال اهلي مش هي اللي خدت الزفت منك وقالت هتعمل ودي بنت خالتي ومفيش بينا حاجه فيها ايه لما تعملوا يعني هقولها ايه اناااا
ياسمين الدموع اتجمعت في عينيها واكملت زعق كمان زعق يلا اقولك اضربني قلمين علشان ست زفته بنت خالتك اللي عادي تعملك الشاي
مازن بحده ينعل ام الشاي في الارض هو في ايه ؟؟ مكانتش كوبايه سم عامله عليها كل الحوار ده انا مالي هو انتي كل ما هتغيري هتنكدي عليااا انا مانتي عارفه اني متنيل بحبك انتي ومش شايف غيرك ليه كل شويه النكد ده
ياسمين بحده ودموع وانت عارف ان رغد بتحبك وعايزاك وجايتها هي وامها دي مش بلساهل الهانم حاطه عينيها ترجع وهي ضمناك
مازن بعصبيه ده على اساس ايه بنت بنوت انا وهيجبروني عليهااا ????? هو انتي عايزه تخلقي مشاكل وخلاص يا ياسمين عرفيني ??? بتزعلي طيب لما نكون كويسين مع بعض ???
ياسمين بدموع انا بغير عليك انت مبتفهمش ليه والله العظيم بتحبك وعايزه تتلزق فيك مفروض انت كنت قولتلها انا متعود اشربه من ياسمين ده انا حبيبتك هونت عليك تسيبني بولع منهااا كده وتطاوعها
مازن غمض عينيه بعصبيه واتنفس بصوت عالي واكمل عارف الصعيد كلهااا اتفرجت علينا ولو عرفوا السبب نظرتهم ليا كا كبير عيله الرفاعي هتتهز علشان واحده مش باينه من الارض موقفاني انا كبير عيلتي راجل طول بعرض وبتتخانق معااياا على كوبايه شاااي يا شيخه ينعل ام الشاي على اللي كان عايز يشربه .. هو معلش يعني ياحبيبتي مين يعرف في القاعده دي كلهااا انك حبيبتي غير حساام انا كابن عمك وابن خااالتها مينفعش افرق بينكم ما اللي يعمل يعمل مش هتفرق مين فيكم انما لو مراتي كنت قولتلها بحبه من مراتي ورديت عادي محدش ليه حاجه عندي بس انتي نظرتك سطحيه وهتفضل سطحيه بتغيري قبل مابتفكري وبدليل طريقتك معاها اللي خلت حسام بصلك علشان تفهمي اكبري يا ياسمين واعقلي انا لو وقفولي طوابير مش شايف غيرك وانتي عارفه كده كويس
ياسمين بدموع كبيره وعاقله وفاهمه كل كلامك بس انا تعبت من احساس اني بحبك وبتحبني ومش من حقي قدامهم هفضل لحد امتى مستحمله كلام تيته عن العرايس اللي بتجبهالك وخالتك اللي كل ماتيجي زياره طمعانه فيك لبنتها هو انا ليه محدش بيقدر مشاعري
مازن تنهد بحزن ومسح دموعها واكمل حقك عليا والله العظيم تلاته لو بايدي اكتب عليكي من بكره بس الموضوع مش بلسهوله دي لسه عايز افاتحهم وشقتي مش خلصانه وجهاز وعفش وفستان وليله اصبري شويه
ياسمين بصتله بحب واكملت بدموع انا موافقه ابدء معاك من الصفر بس خد خطوه قدامهم على الاقل خطوبه وانا موافقه اعيش معاك في اي وضع عادي
مازن بحب حاضر ياست البنات وارجوكي خدي بالك من كلامك وطريقتك بعد كده حاسس جدك كاشفنا
ياسمين بتوتر كاشفنا ازاي يعني انت بتهزر ???
مازن بتنهيده لا مبهزرش بتكلم جد بلاحظ انه فاهم حاجات كتير حتى دلوقتي لما قال امشيكي شويه حسيته فهم اللي فيها بس متخافيش دي حاجه حلوه معناها انه في صفنا
ياسمين بقلق يارب يا مازن انا بجد بتوتر لوحدي اصلا
مازن بضحك لا هي دي غلطتي انا اني قولتلك حاجه انتي بتوتري من غير سبب اصلا
حسام جيه عليهم واكمل بضحك مش يلا يا روميو عصرك انت وهي عيب ده انتوا حتى في الصعيد
مازن بضحك انت لسه فاكر ده القوصيه كلها سمعتنا علشان كوبايه شاي
حسام بضحك منا حرقتلكم دمها اهو يخش يطمر
مازن بضحك اه لاحظت جدع ياض ياحسام وربنا
حسام بضحك علشان تعرف بس ليك ضهر وبص لياسمين وتابع سمسمه هاتي رقم امنيه علشان محتاجه ابعتلها الشبكه اللي هتختارها
ياسمين ابتسمت بحب ومسكت فونه كتبت الرقم واكملت بغمز ايوه ياعم حسام محدش قدك
حسام بضحك اهدي انتي بس كده وبطلي نبر
مازن داس على رجله فتأوه بوجع واكمل بضحك اااه حرام عليك وانا اللي بقولك ليك ضهر تعمل كده في ضهرك يا مازن ??
مازن بضحك اه علشان تقول على سمسمتي بتنبر كويس
حسام بضحك يا جدع اقسم بالله ماليك مبدأ مش دي اللي علت ضغطك وسمعت صوتك للقوصيه كلها من شويه دلوقتي بتدافع عنها
ياسمين بضحك ده حبيبي ده متدخلش انت
حسام بضحك يا داخل بين البصله وقشرتها ياستي
مازن بضحك اعمل ايه طيب الناس بتعتزل ما يؤذيها وانا ماسك فيه بايدي وسناني
حسام فضل يضحك على شكل ياسمين لما اتصدمت واكمل بضحك ادي حبيبك اهو ياست ياسمين سامعه
ياسمين بصدمه تصدق بقى متكلمنيش تاني
مازن بضحك بذمتك ههون عليكي ده بيوقع بينا السوسه ده
حسام ضحك فاكملت ياسمين وربعت ايديها قدامها اه تهون
مازن بغمز لحسام خلاص انا هروح اشرب كوبايه قهوه من ايد رغد ابلع بيها وجعي منك اني اهون ده
حسام فضل يضحك ومازن رايح يمشي مسكته ياسمين واكملت بغيره مازن بجد متعصبنيش علشان مروحش امسك البابور اكسره على نفوخها
مازن بدهشه وهو بيضحك اكمل تعملي ايييه ??? تكسري البابور على نفوخها !!!!!! هو البابور هيتكسر من الضربه للدرجه دي ???
حسام بضحك مجرمه وبتعترف قدام ظابط كمان يبجحتها يا جدع
مازن بضحك لالا صدمتيني من امتى ياسمين الرقيقه بتاعتي عنيفه كده وبص لحسام واكمل بضحك لو عملت حاجه لبنت خالتي حبيبتي اقبض عليها انت حالف قسم مفيهاش تطبيل علشان قريبتك انا اللي بقولك اهو
حسام بضحك من عيني
ياسمين مسكته من لياقه القميص واكملت بغيره يا شيخ حبك بورص وعشره خرص مين دي اللي حبيبتك هااا ???
مازن بضحك بهزر يا مجنونه بهزر يخربيت اهلك في ايه
ياسمين بغيره ده انا هنطف شعرها اللي فرحانه بيه ده زي مابنعمل في البط بص يا مازن انا مبهزرش والله هقلب عليهاا كل ده كنت بهزر بس فعليااا رغد هتيجي جمبك تاني متلومش الا نفسها انت ملگ لياسمين وبس
مازن بصلها بحب واكمل وانا قلبي مش مع حد غير ياسمين اقسم بالله
فياسمين ابتسمت بحب وبصتله فا صَفر حسام بصوته وغمز واكمل بضحك عليا الطلاق برنس وثبتها في ثانيه
مازن بضحك عيب عليك دي لعبتي متعود
ياسمين بضحك مازن انا بجد مبهزرش ملهاش دعوه بيك
مازن بحب اصبري عليا شويه وهنتجوز وساعتها براحتك انما دلوقتي تلاشيها خالص حاولي اعتبريها مش موجوده وتاكدي اني فعلا مش شايف ولا هشوف غيرك فتعمل اللي تعملوا
ياسمين بتنهيده حاضر يا مازن وهوت بايديها وتابعت..يلا بقى علشان الناموس هيبتدي يتسلى علينا
حسام بضحك مالازم واقفالي جمب الزرع عايزه ايه انتي
ياسمين بضحك اصل لقينا التجمع وقولنا لا بلا مرار هطلع انا علشان بتحسس من قرص الناموس بجد
مازن بضحك بسكوته والله العظيم بتتحسس من الناموس وعايزه تفتح نافوخ البت
ياسمين بضحك كل شئ مسموح في الحب والحرب فعادي توقع مني اي حاجه لما الموضوع يتعلق بيك وحوطت ايديها علي كتفاها واكملت لالا انا همشي هبرد كمان
حسام بضحك طب ماتطلعوا ياختي بدل مانتي عايشه دور بنات التجمع كده ومش مستحمله الناموس ولا الهوى
ياسمين بضحك انا واقفه لاجل الهوى بس مش اللي يخليني ابرد ده لا هوى المشاعر يعديم الاحساس
حسام بضحك شوف البت بتعاكس الراجل عيني عينك
مازن فضل يضحك واكمل طب يلا تعالي بعيد عن الناموس علشان متتحسسيش وهوى المشاعر قدامك علطول تعالي ومسك ايديها ومشيوا وهما بيضحكوا ويهزروا مع حسام
ووصلوا عند البرنده
صافيه بابتسامه ربنا يديم ضحكتكم ويحميكم من العين وافرح بيكم كلكم يارب
مازن بحب يارب يا صفصف ويديمك لينا يا غاليه .. اومال فين الواد احمد
عايده بحب طلع لشهد عايزاه يشرحلها حاجه
منصور بابتسامه بقيتي احسن يا ياسمين
ياسمين ابتسمت وباست ايده واكملت بحب احسن متشغلش بالك يا غالي انا بخير علشان حسك في الدنيا
منصور بضحك بكاشه طول عمرك بس بحبك انتي وكلامك والله يا ياسمين
ياسمين ضحكت واكملت بحب لا والله ده ربنا يعلم غلاوتك يا حج
حسام بحب طب استاذنكم انا اطلع انام
مازن بضحك وغمز تنام بردو
حسام فضل يضحك واكمل يعني قفشتني خليها في سرك انما تفضحني مش عيب كده
نرمين ضحكت بفرح واكملت بحب يانورعين امك كبرت وبقيت بتحب وعايز تزوغ علشان تكلمها
حسام بضحك شايف بسببك يا عم مازن امي بقيت قدامها شحط طول بعرض وظابط بوقف الناس على رجل واحده وبتعاملني كاني عيل عنده 6 سنين وتقولك كبرت وبتحب
مازن فضل يضحك واكملت نرمين بضحك ياك هتكبر عليااا يا حيوان هتفضل عيل صغير بنسبالي وبصت لمعتز وتابعت بضحك بذمتك حركاته دي بتفكرك بمين
معتز فضل يضحك واكمل اه طالعلي في الحته دي حماس البدايات ده انا عارفه
حسام بغمز وضحك الحقي بيقولك بدايات يا نيرو
نرمين لوت بوقها واكملت ماهو مكدبش بلا مرار
نور بضحك ولعتها يا حقنه
حسام بضحك لالا اقسم بالله هو اللي قاال انا بلفت نظرها بس
معتز بضحك مالك يا نرمين محسساني واكل ورثك ليه كده
نرمين بتنهيده مش واكل ورثي بس فعلا الدنيا غريبه اوي بنبقى هنموت ونملك الحاجه ولما تبقى بين ايدينا تحس قيمتها بتقل
مازن بضحك الله يحرقك يا حسام كبرت الدنيا
حسام بضحك لالا يا ماما في ايه يحبيبتي مش كده
نرمين ابتسمت بحب واكملت يحبيبي انا مش على ابوك انا بحبه وهو بيحبني وواثقه من ده بس تحس فعلا ان بمرور الوقت شغفنا قل ومعتش زي زمان لحد ما بقينا عادي وده مع كل الناس انا بس بستغربه
معتز بحب بس مهما العمر مر انتي بنفسك اهو قولتي بحبك طبيعي بقيتي مراتي وقدامي غير نرمين اللي كانت ساكنه في مركز تاني وكنت اروح اقفلها تحت بلكونه اوضتها علشان اشوفها فا هنا كان في حماس لانك بعيده انما لما قربتي اطمنت انك معايا وهتفضلي معايا انما عمره شغفي قل ناحيتك بلعكس انا لحد انهارده مبسوط لاني اتجوزتك ومتفهمين وزعلنا مش بيطول وده علشان بنحب بعض فكله بيهون متبقيش نكديه كده اومال … ده انتي ام الغالين وباس راسها وطبطب على كتفها
نرمين بحب ربنا يديمك ليا يارب يا معتز
حسام كان حاطط ايديه على خده واكمل امممم وايه كمان شجره واتنين لمون لعمك ومراته يا ياسمين
ياسمين بضحك ااه منا ملاحظه
كلهم فضلوا يضحكوا فاكمل معتز بضحك انت مالك يا ابن الكلب انت هو مش انت اللي شعللتها من الاول
حسام بضحك لالا سيبك من كل ده يعني ايه بقى بتروحلها مركز تاني وتقفلها تحت البلكونه ايه الشقاوه اللي كنت بتعلمها دي يا معتز ده انا مبعملهاش
معتز بضحك لا وايه مركز ابو تيج كمان بعيد شويه عن القوصيه هنا وكنت بروح ياض يا حسام والله لاجل اشوف ام الغالين
حسام بضحك لا ده احنا اللي مش عايشين اه والله العظيم
نرمين بضحك هيغير مننا اهو
حسام بضحك لا ياست الكل ربنا يديمكم لبعض عيب عليكي وبص لصافيه وتابع الا صحيح يا صفصف مش جوزك امبارح الشاشه كانت شغاله على مسلسل وعاكس الممثله
صافيه بصدمه نعم !!!! وبصت لمنصور واكملت ايه الكلام ده يا حج !!!!
منصور بضحك يا ابن الكلب انت انا بقولك مين الممثله دي علشان مش مركز خلتها عجبتني
حسام بضحك الله انت هتخاف منها ولا ايه ياحج. من امتى بنخاف اه عجبتك وكنت مركز وعاكستها تقدر تنكر
كلهم فضلوا يضحكوا فاكمل منصور بضحك وهي بيبص لصافيه اللي مصدومه يا صافيه سيبك منه ده عايز يوقع بينا الحقنه كل الحكايه بقوله مين البت العسوله دي مش شايفها طلعت بتمثل جديد بس وقد احفادك والله ميبقاش مخك صغير
حسام بضحك اهوووو اهووو اعترف قال عسوووله
كلهم ضحكوا فاكملت صافيه قد احفادي اه فعلا الله يرحمك يا حماتي صدقتي ياختي لما قولتيلي ابني ده مهما يكبر مهيملاش عينيه غير التراب
كلهم ضحكوا بشده فاكمل حسام وعينيه بتدمع من الضحك كلنا ياستي والله مش جدي بس احنا ربنا خالقنا كده
ياسمين وهي بتضحك ده انا هخليها تظبطك امنيه الصبر بس
حسام بضحك الله مش بقول الحقيقه
منصور بضحك عجبك كده يا ابن الكلب بقى بعد العمر ده كله يرجع يتنكد عليا بسببك
كلهم ضحكوا فاكمل حسام بضحك ياخرابي دي ولعت بجد انا بهزر انتوا لسه بتغيروا ياجدي !!! فين الشغف لللي مات عندكم على راي امي
مازن بضحك كله منك يا بوتجاز
حسام بضحك يا جماعه انا عملت ايه الله ماهو صح عاكسها انا بحكي مش اكتر
صافيه يعاكس ولا ميعاكسش انا مالي ياخويا كل واحد هيشيل قفته وربك يحاسب
كلهم فضلوا يضحكوا فاكمل حسام بضحك ايه القسوه دي يا صفصف بدل ماتخدي بايديه للجنه تقولي يشيل قفته
صافيه ياك يعاكس بنات قد احفاده واشد ايديه بعد كل ده
منصور بضحك يا صافيه ده واد ابن كلب انا بقول عسوله علشان كانت غلباويه في الفيلم وبتغلب الكبير والصغير في الكلام ومكنتش لسه شوفتها وبدقق وبقوله مين العسوله دي يعني نظرتي ليها زي ياسمين وشهد ونور وزينب
صافيه بتنهيده طيب ياحج حصل خير
حسام بغمز في الحمام بقى مينامش جمبك
صافيه ضحكت واكملت شوف الواد لا يخويا ميهونش عليا
حسام بضحك وغمز رضيت عليك اهو يا عم منصور محدش قدك مهونتش عليها خربتها وصلحتها اهو علشان تعرف
منصور ضربه بلعصايه اللي بيسند عليها واكمل بضحك ده انا هربيك بس الصبر
نور بضحك ده حقنه والله العظيم
حسام تأوه واكمل بضحك اااه تسلم يا حج حبيبي… واسكتي انتي يا نور علشان قاسم ده عينيه زايغه والواحد ساكت وبيداري عليه
مازن بضحك يخربييت اهلك انت سبتهم كلهم خلاص عايز تخرب بيت اختي من قبل مايتعمر
نور بجد يا حسام ولا بتهزر عاكس حد قدامك قولي ومش هقول انك قولت
حسام بتمثيل جديه بصراحه ??
نور بقلق ودموع عاكس صح ??
حسام بتنهيده مكنتش حابب اقولك بس للاسف
نور بدموع ااه بص لواحده غيري خلاص انا عرفت انا هتصل بيه يجي ياخد شبكته
ومسكت الفون واتصلت وكلهم فضلوا يضحكوا فاكمل حسام وهو بيمسك الفون بضحك انا لسه مكملتش يابنت المجنونه اقصد للاسف معرفتش امسك عليه غلطه بايعه الراجل اوي كده
نور ضربته في كتفه واكملت بدموع ياشيخ جتك الارف خضتني ولقيت صوت قاسم رد: ايه يحبيبتي
حسام بضحك ده رد يخربيتك انتي اتصلتي بجد فمسكت نور الفون منه واكملت وهي بتمسح دموعها مفيش يحبيبي ظلمتك كعادتي منه لله حسام قالي عليك حاجات محصلتش
فرد عليها قاسم فضحكت وطلعت وهي بتتكلم معاه واكملت لا طبعا يعمري مصدقتش انت فكرتك عن نورك كده
كلهم فضلوا يضحكوا عليها فاكمل حسام بضحك لا بس مصدقتش صح
ايمن بضحك مجنونه والله العظيم ربنا يعينه
عز الدين بضحك كله من ابن اخوك وقع الكل في بعضه انهارده
حسام وهو بيشاور على نفسه اكمل انااا! !!!! يا حول الله يارب دايما كده تيجوا عليا حكم انا غلبان
كلهم ضحكوا فاكملت عايده بضحك غلبان طبعا ياقلب مرات عمك الله ده هما اللي مبيفهموش
مازن بضحك اه طبلي حكم انتي وابويا اللي فلتوا من القاعده دي
حسام بضحك وغمز لمازن اخرج انت براهااا يا ميزو وملكش دعوه بينا عايوده دي حبيبتي وهي عارفه
عايده بضحك والله سكر
مازن بضحك بقى كددده طيب يا حسام اللي ميزعلش
ياسمين بضحك ده انا اللي هخلي امنيه تجيب حقنا كلنا و تنيمك في الحمام
حسام بضحك ده عند امك انتي وهي انا اه ربنا ابتلاني بواحده مستفزه ممكن تخليني اروح مشوار لبيتها بس علشان ارنها علقه وارجع بس متقدرش تعمل كده
ياسمين بضحك انا لسه قاعده يا حسااام ترن مين علقه اتصل اقولهااا
حسام بضحك طز فيكي وفيهاا يا ياسمين
نواره لتكون عنيده يا واد يا حسام
حسام بضحك من ناحيه عنيده فاهي عنيده جداا بس بعلي صوتي عليها بتتخرص
ياسمين بضحك ايوه امنيه بتخاف واتلم متزعقش لصاحبتي
حسام بتنهيده صدقيني مش حب في النكد بس صاحبتك اللي مستفزه اوي وبتتعمد تناقشني في حاجات تعصبني
منصور بحب معلش بلهداوه كله بيتحل
ياسمين بحب اه اصل مش بلخناق اسمعها وشوف رايها وحاولوا حلوا مشاكلكم بهدوء
نواره عين العقل يا حج بس عنده حق حسام بردو معندناش واحده تمشي رايها على جوزها يعني ايه يسمعها يا ياسمين هي كلمه الراجل تمشي معروفه لازم تغيري وجهه نظرك شويه ما اهي بنتي رغد مش هتقول غير حاضر ونعم انا مربياها على كده
حسام بتنهيده مع احترامي ليكي يا طنط بس انا مع ياسمين واسمع امنيه قبل اي حاجه لان دي انسانه وليها تفكيرها وقرارتها وفي النهايه لو مقتنعتش كلامي بيمشي عادي
نواره اتحرجت من كلامه واكملت ياسمين برفعه حاجب ومعلش لما رغد تقول حاضر ونعم بس كرامتها وشخصتيها فين ???
نواره بحده انتي قصدك ايه يابت انتي
ياسمين بحده اسمي ياسمين مش بت ومقصدش حاجه انتي اللي بتقولي ومش معنى انك عايزه تعدمي شخصيه بنتك ان كلنا نبقى زيها ولا انتي قاااصده تحليهاا هي بلعافيه
نواره بحده شوف البت وقله ادبها مش كفايه مربينك وسط عيالهم كمان تقومي تعلي صوتك فيا ومتعمليش احترام لكبير ولا صغيرر
ياسمين الدموع اتجمعت في عينيها ورايحه تتكلم فاكمل عز الدين بعصبيه انتي مين سمحلك تتكلمي مع بنتي بلاسلوب ده هو انا بربيها من جيب ابوكي يا نواره
عايده بتوتر معلش يا عز حقك عليا انا انت عارف نواره على نيتها ومتقصدش
منصور بحده مع احترامي لضيوفك يا عايده بس ده بيت ياسمين وانا حفيدتي اتجرحت في بيتها ولاننا بنكرم ضيوفنا محدش هيرد عليها ويجرحها زي ما عملت بس عقلي اختك وخليها تتلم بعيد عن احفادي خالص وكلهم مش ياسمين بس
عايده بحرج حاضر يابويا حقك عليا
نواره بحده يعني انتي مش شايفه ياسمين غلطت يا عايده
عايده بحرج هشش وطي صوتك كفاياكي لا ياسمين مغلطتش هي بتتكلم ويا ابن عمها على صاحبتها اللي هتبقى مراته مالك انتي بكل ده يا نواره
نواره رايحه تتكلم فاكمل منصور بحده خلاص خلص الكلام كفاياكم رغي يلا علشان نطلع
مازن بتنهيده انا بعزك اوي يا خالتي بس فعلا مفيش حاجه تديكي الحق انك تقولي كده محدش بياخد من جيبك ويربيها ودي بنت عمي وحفيده عيله الرفاعي غصب عن اي حد
ياسمين ابتسمت لمازن بحب بس عينيها كانت مليانه دموع
فبصلها مازن وغمض عينيه باسف وهمس حقك عليا فابتسمتله وهزت راسها بتمام فشاورلها تمسح دموعها فمسحتها واكملت عن اذنكم هطلع انام
صافيه بتنهيده نوم العوافي يا قلب ستك
—————————————-
عند شهد في البلكونه قاعده بتذاكر واحمد كان قاعد بيشرحلها وقام عملها قهوه
احمد بحب وهو بيحطها قدامها اكمل احلى قهوه لاحلى دكتورة
شهد ابتسمت بحب واكملت تسلملي يارب تعبتك اوي
احمد بحب تعبك راحه يا شوش المهم فهمتي
شهد بحب اه الحمدلله وسابت الكتاب والقلم ورجعت ضهرها لورا واكملت عايزه اطلب منك طلب
احمد بحب اؤمريني بس مش عايز اكون زعلتك لما زعقتلك الصبح حقك عليا انا خايف عليكي كان فيه شاب واقف ومركز معاكي و مينفعش اصلا وقفتك في الشارع دي انا مقولتش متتكلميش بس اطلعي فوق
شهد بحب انا زعلت بس في ساعتها من زعيقك ليا انما انا عارفه انك خايف عليا فخلاص حصل خير
احمد بحب طب الحمدلله قولي طلبك بقى
شهد بص انا ليا صاحبتي اسمها فرح ساكنه قريب من هنا في نفس المركز عادي بس بمشيلها شويه حلوين المهم هي تعبت الصبح وانا قلقانه عليها وخايفه تكون فيها حاجه او مش بتذاكر كويس فهي طلبت مني اروح بكره اشجعها لان معندناش دروس فنذاكر سوا فانا عايزاك تقنع بابا ويونس لان فكره اروح عند حد دي مرفوضه
احمد فرح دي عندها اخوات ??
شهد بتوتر اه فيها ايه ??
احمد سنهم قد ايه ??
شهد كانت حاسه انه مش هيرضي زيهم بس مينفعش تكدب فاكملت بتوتر ولدين 23 و 20 ليه بردو ??
احمد انسي بقى كل الكلام ده فرح عايزه تيجي تنور وتذاكر معاكي في البلكونه اديها كبيره وشايله تربيزه وكراسي والجو حلو والعيله كلها هتبقى برا انما انتي تروحي لواحده اخواتها شباب انسي ومتفتحيش الموضوع ده تاني
شهد بحزن يا احمد يعني تبقى تعبانه واقولها تعالي انتي هو ده اسمه كلام
احمد بحده لا روحي انتي اقعدي معاها واخواتها شباب شهد متعصبيناش عليكي
شهد بتنهيده خلاص فكرت هتخليهم يوافقوا طلعت زيهم نفس الدماغ والتقفيله الصعيدي بتاعتكم
احمد بحده لا هي مش تقفيله صعيدي هي اصول واللي انتي بتحكي فيه مينفعش فعلاا هي محبتش تيجي براحتها بقى انما انتي مفيش مرواح وخلصنا
شهد بضيق تمام يا احمد خلاص
احمد اصلا خطوبه ابن عمك بكره يعني مش هتفضي تروحي في حته يادوبك الخطوبه وتيجي تكملي مذاكره
شهد بستغراب ابن عمي مين ده اللي هيخطب
احمد بضحك حسام انتي متعرفيش هيخطب صاحبه ياسمين امنيه
شهد بفرح بتتكلم جد
احمد بحب اه والله
شهد بضحك يا عسل مش يقولولي طيب علشان اجهز هلبس ايه ده انا لسه مدخلتش في العميق واخبار العيله بعرفها بلصدفه بسم الله مشاء الله عليا
احمد بضحك انا موجود اهو هقولك الجديد اول باول
شهد بضحك ايوه كده تابعني
احمد بحب من عيوني …. الا صحيح لو مدخلتيش طب ناويه على ايه
شهد والله يااحمد مش عارفه بفكر في بدايل بردو علشان لو حصل اي حاجه اكون محضره البديل
احمد بحب ربنا ينولك سؤل قلبك يارب وياسمين اخر سنه حقوق صح
شهد اه الحمدلله خلاص هتخلص
احمد بضحك ونفرح بيها بقي بعدين بيكي
شهد بضحك انا كده كده هتجوز في كليتي لان مشوارها طويل
احمد بحب تيجي بس بعدين نشوف حوار السنين ده كله بيعدي
شهد بحب بس عارف لما بنتسند في الطريق بيعدي اسهل رغم انه نفس الصعاب بس لو لوحدنا هنتعب الضعف
احمد بحب ده حقيقي
وداقت القهوه واكملت بحب تسلم ايدك جميله
احمد بحب الف هنا يا دكتورتنا وتابع بضحك بس حاسبي تدخلي بيطري علشان هتبقى عيب في حقنا كلنا لان كلنا مستنينك تكشفي علينا
شهد فضلت تضحك واكملت لالا متقلقش مش في بالي خالص الكليه دي
احمد مع ان عارفه يابت يا شهد بتشتغل نار هنا في الصعيد
شهد بضحك قصدك ايه يالهويي وفضلت تضحك
احمد بضحك لا يجاموسه فهمتي ايه اهل الصعيد كلهم فوق راسي طبعا انتي عبيطه انا اقصد ان المواشي هنا والناس اللي بتربي كتير فبتشتغل حلو في الارياف والصعيد
شهد بضحك اااه كده فهمتك بس عارف انا بشوف اللي بيدخلها ده حاله من الحالتين اما هو شخص محب للحيوانات ودي فطره فيه ربنا خالقه بيهاة فدخل المجال لان حته انه يرجع حيوان تعبان بصحته تاني بتفرحه في ناس كده فعلا وضحكت وتابعت اما كان نفسه يبقى دكتور فدخل طمع في اللقب انما مفيش سبب تاني يخليك تستحمل المرار ده
احمد فضل يضحك واكمل يخربيت فقرك بجد
———————————————–
في اوضه حسام غير هدومه وخد شاور ولبس بنطلون بيتي وتيشرت نص كم وراح نام على سريره وحط ايديه ورا رقابته ومسك الفون ورن على امنيه
امنيه شافت رقم غريب فردت واكملت بتردد الو
حسام بابتسامه مساء الورد
امنيه بستغراب افندم !!! مين معايا ??
حسام اتفاجئ انها معرفتش صوته فحب يعمل فيها مقلب فاكمل حضرتك امنيه محمد مش كده
امنيه بقلق اه انا مين
حسام كتم ضحكه واكمل بجديه انا واحد معجب بيكي وعايز اتقدملك
امنيه بحده معجب بمين انت عبيط طب روح شوفلك حاجه تعملها انا مش فضيالك سلام
حسام لالا استني بس حقيقي هتندمي لو موافقتيش اصلا انتي رفضاني ليه علشان حسام اللي كان عندك انهارده طب ده بيخونك على الاقل انا بحبك بجد وبعرفك اللي مداري عنك
امنيه بصدمه يا نهار ابوك اسود انت بتراقبنييي وبعدين وانت مال اهلك بحسام وتعرفه منين وكل كلامك ده انا مصدقهوش اصلا فريح دماغك وشوفلك حاجه مفيده تعملها
حسام ضحك وكتم ضحكه واكمل بجديه مصتنعه مبهزرش ومعايا اللي يثبتلك انه خاين انا صورته مره
امنيه بوجع انت بتقول ايه انت اكيد بتستعبط انا مستحيل اصدق
حسام طب ولو وريتك الصوره وهو في حضن بنت هتصدقي ??
امنيه بوجع اه هصدق بس وريني لو صادق في كلامك
حسام بضحك اه يحيوانه يامهزقه تصدقي صوره عادي
امنيه بستغراب نعممم انت بتقول ايه
حسام بضحك بقول ايه في ايه بس ده انتي بياعه جداا معرفتيش صوتي واي حد يكلمك كده يقولك حسام بيخونك تصدقي ده انا ربنا يعيني على اختياراتي اللي زي الفل
امنيه بضحك لا متهزرش حسام ده انت ???? بجد حرام عليك كنت هتعيطني تاااني وفضلت تضحك
حسام بضحك اعيطك تاااني وبلنسبه لانك صدقتي اني في حضن بنت دي عاااادي
امنيه فضلت تضحك واكملت اه طبعا حقي اصدق بيقولي صوره هو صح لو بعت صوره هيتبلى عليك ليه
حسام بضحك شوف البت اللي اي حد يضحك عليها بكلمتين هو انتي متسمعيش عن الفوتشوب يا دكتوره امنيه
امنيه بغيره اااه قول كده انت بتمهد عايز تخوني وتلبسها للفوتشوب
حسام بضحك عليا النعمه انتي دماغك شمال انا بتكلم في مبدأ انك عارفه انا معملش كده فيبقى الحيل كتير اللي توقعنا في بعض بس انتي مفروض متصديقهاش
امنيه بحب والله بثق فيك في الاول قولت مستحيل
حسام بضحك منا عارف هو انتي هتقوليلي … المهم ايه مصحيكي لغايه دلوقتي
امنيه بحب بخلص شيتات عليا علشان افضى لبكره
حسام بحب فرحانه ?
امنيه ضحكت بفرح واكملت هطير والله يا حسام …. وصحيح حقك عليا مقصدش اعاندك واعلي صوتي عليك انهارده انا اسفه حقك عليا
حسام بحب اهو انا كنت هكلمك في الموضوع ده مخصوص بس الكلمتين الحلوين دول لخصوا الكلام خلاص يحبيبتي محصلش حاجه المهم اللي جاي متعتذريش
امنيه بحب ربنا ميحرمنيش منك يارب
حسام بحب ولا منك يحبيبتي يارب .. المهم انا كلمتك علشان هبعتلك الطقمه اللي نزلت عند الراجل اللي بنتعامل معاه في الدهب وشوفيلي انهي عجبك علشان بكره
امنيه فتحت الواتس واكملت تمام ابعت
حسام بعتهم واكمل ها وانتي معايا على الخط قوليلي
امنيه شافتهم واكملت بدهشه: حسام دول باينين غالين اوي
حسام بضحك وانتي مالك انتي بسعرهم اخلصي بس واختاري
امنيه برفض لالا طبعا غالين اوفر ده ايه كل ده … اقولك حاجه هات دبله ومحبس وشكرا على كده مش لازم الطقم الكامل ده
حسام الله وانتي مالك يا امنيه دي هديه العريس لعروسته وانا عايز اجبلك منهم سالت ابوكي اجيب بكام مرضيش يقولي قالي اللي تجيبه وتقدر عليه فاختاري واسكتي
امنيه لالا يا حسااام لا متهزرش انا اصلا مش من محبين الدهب متكلفش نفسك يحبيبي ووفر لتوضيب الشقه
سميه دخلت واكملت مالك يابت بتتخانقي مع مين
امنيه ده حسام يا ماما
سميه بتنهيده تاااني يا امنيه تاااني
امنيه بضحك لالا ده علشان عايزني اختار من الدهب ده وانا شيفاه كتير
سميه وريني بعتلك ايه
امنيه بصي اهم
سميه بدهشه : ايه صح كل ده يابني لا كتير هو بسم الله مشاء الله حلوين بس غالين اوي مامنوش لازمه كل ده
حسام بحب ياست الكل ماهي هتبقى مراتي وكله في بيتي بعد كده بس دلوقتي الفلوس حاضره يعالم بعدين ايه فانا عايز افرحها واهاديها بواحد منهم فابالله عليكي خليها تختار
امنيه لا يا حسام انا بنسبالي دبلتك هديه لوحدها فكك من كل ده
سميه بحب خلاص يابني ريحها ووفرهم لشقتكم انتوا واحد مش مستاهله كل ده احنا بنشتري راجل وكفايه اوي انك من نفسك قولتلها تجيبلها كده
حسام بحب ووالله ياست الكل انتوا ناس محترمين واصيله بس انا بردو مصمم وبما انها مش عايزه تقول فانا هسأل ياسمين واخد رايها واجيب انا خلاص
امنيه بتنهيده بردو يا حسام ???
حسام بضحك انتي مالك انتي خلاص اخرجي براها بقي
سميه بضحك ربنا يسعدكم يابني وطبطبت علي كتف امنيه وخرجت
امنيه بحب طب سيبك من الدهب هتلبس ايه بكره
حسام بحب انتي عايزاني البس ايه
امنيه ربعت رجليها على السرير واكملت بحماس بصي بقى عايزاك تلبس بنطلون كلاسيك اسود وكوتش ابيض وقميص ابيض وتخليه من برا كده
حسام بضحك اي احلام تانيه ??
امنيه بحب لا كده زي الفل وانا هلبس دريس سماوي لسه طلباه اون لاين جامد اوي
حسام بتحذير اعملي حساب انك محجبه هاا
امنيه بضحك متقلقش والله مفيهاش نكد بكره على ضمنتي
حسام بضحك ياريت والله اتمنى
امنيه ضحكت واكملت بحب قولي بقى اهلك كلهم جايين ولا حد هينقص عايزه اشوفهم واتعرف عليهم كلهم
حسام بتنهيده كلنا معادا سيف اخويا
امنيه بضحك لا ده من كلامك ربنا يعنيه انا هتعود اني مشفهوش علطول
حسام بضحك اه والله على رايك وفضلوا يتكلموا لحد ماحسوا انهم عايزين يناموا وقفلوا
———————————————–
تاني يوم الصبح في المستشفى
عمر صحي لقي زينب قاعده على الكرسي وحاطه راسها جمبه على السرير فابتسم بحب وحط ايديه على راسها واكمل زوزا. .. انتي يابت وقرب منها شويه واكمل بحب يا زينب
زينب بتعب اممم وفتحت عينيها بتثاقل ورفعت راسها واكملت بابتسامه مرهقه صباح الخير انت كويس ??
عمر ابتسم بتعب واكمل بحب اه كويس بس مش حرام عليكي ضهرك كده
زينب بارهاق والله ياعمر لما انت نمت فضلت اشتغل رايحه جايه اتهديت محستش بنفسي غير وانا قاعده نمت كده
عمر يحبيبتي حقك عليا وحط ايديه على خدها واكمل طب وشغلك عملتي ايه
زينب بابتسامه قولت للمدير احسبه نص يوم وهنام انا اول مره يحصل معايا كده بس علشان منمتش فتره الصبح ونزلت شوفت سيف
عمر بحب المهم شوفتيه كان واحشك انا عارف
زينب بابتسامه حب اه اوي بجد ربنا يحفظه ويحفظك يارب
عمر بحب اللهم امين يحبيبتي
زينب بحب طب هقوم اجبلك تفطر علشان الدوا
عمر سيبك بس انتي مكالتيش ليه من امبارح
زينب مليش نفس والله ياعمر
عمر منا ملاحظ عماله تاكلي فيا وقاعده كده واتهديتي في الشغل لا مينفعش الكلام ده اقعدي وهتصل اخلي حد يجبلنا انا وانتي زينب رايحه تتكلم فاكمل انا مش هاكل لوحدي فمتفضليش تناقشيني ودراعي اليمين في ذمه الله مؤقتا فانتي هتاكليني ممكن مرضاش اكل منك انتي حره
زينب بضحك بتلوي دراعي يعني اكل علشان حضرتك تاكل
عمر بضحك مانتي مش هتيجي الا بكده مش عارف مستنيه ايه انتي ضعيفه جداا عايزه تختفي مثلا وغمز واكمل بضحك لا انا مينفعنيش الكلام ده
زينب ضحكت وضربته في صدره واكملت يا عمر اتلم بجدد
عمر تأوه بوجع واكمل بضحك اااه يخربيت ايدك دي عارفه لو بصحتي كنت وريتك ده انا هدخل اخيطها تاني من كتر الضرب ياللي منك لله
زينب بضحك لا يعمري لو عوزت تخيطها انا موجوده متقلقش
عمر بحب بالله ده احنا نعوز لو مش هنعوز
زينب بضحك اممم انت شكلك عايز يتصلك بسيف
عمر بضحك لالالا خلاص وحياه امك مش ناقص انا اللي فيا مكفيني
زينب تصدق صح انا مقولتش لسيف انك في المستشفى
عمر هشش ولا تقولي حاجه سيبه في اللي هو فيه متقلقيهوش انا بخير كده كده مديني اجازه طويله
زينب بقلق ليه هو فيه ايه يا عمر ??
عمر بابتسامه حط ايديه على خدها واكمل بحب مفيش يحبيبتي ظابط جيش طبيعي حياته صعبه شويتين ايه الجديد فمش ناقص هم فوق همه كفايه قلقان عليا لوحده
زينب بقلق متاكد ولا في مهمه خطيره هيدخلها وبتكدب عليا
عمر ابتسم واكمل بكدب متأكد طبعاا متقلقيش يحبيبتي مفيش حاجه وحاول يتوه فتابع و هاتي الفون بقي نطلب ناكل انا جعان وعندي ادويه ولا انتي نيرس فاشله ولا ايه حكايتك
زينب بضحك لا طبعا شاطره وهوريك بس حبيبي فون ايه هنزل انا اجيب الاكل مين هيجيب اكل صحي لحد هنا ده مش بيتباع
عمر برفعه حاجب شكلك لسه متعرفيش اللي هيبقى جوزك مين يابت يازوزا
زينب بضحك لا عارفه ياخويا بس مفيش محلاات بتبيع الاكل ده انا كنت هجيبه وهعملوا انا في بيت صاحبتي جمب المستشفى
عمر بضحك اخوكي في عينك ياشيخه بس انا بثير الجدل وخلاص معرفش حد اصلا بيبع الكلام ده فعلا ده انا هتصل باسماء
زينب بغيره اسماء في عينك ده انا اطفح السم ولا اكولش من ايديها ريح يا عمر
عمر فضل يضحك واكمل والله العظيم انتي مخك تعبان بقولك اختي
زينب بغيره اعتبر بقى واصلا ..
ولقيو الباب بيخبط فسكتوا وعمر قال اتفضل
دخل ظابط شرطه واكمل الف سلامه عليك يا حضره الظابط
عمر بابتسامه الله يسلمك
الظابط قعد قدامه واكمل ايه اخبار صحتك دلوقتي
عمر بابتسامه بخير الحمدلله على كل حال
الظابط بص لزينب بعدين بص لعمر واكمل ممكن عايزك في كلمتين لوحدنا
زينب بحرج طب استأذن انا
ورايحه تقوم مسك ايديها عمر واكمل للظابط خطيبتي مش حد غريب قول قدامها اللي عايز تقوله وبص لزينب انها تقعد مكانها فقعدت وابتسمتله بحب
الظابط بحرج انا اسف مكنتش اعرف
عمر لا ولا يهمك قول اللي عندك
الظابط بتنهيده تقدر تفتكر الحادثه دي حصلت ازاي
عمر بتنهيده ابدا انا كنت نازل اتمشى عادي ولما لقيت مكان مناسب اقف فيه حاولت اوقفها ملقتش فرامل وبعدين فقدت السيطره عليها من الرهبه والصدمه اللي حصلتلي وعملت حادثه بس الحمدلله يعني عدت على خير نشكر ربنا
الظابط بتنهيده طب يؤسفني اقولك انها مش مجرد فرامل هربت وقضاء وقدر دي خطه لقتلك ومقصوده
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية غموض الحب)
