رواية انكسار الياسمين الفصل الخامس عشر 15 بقلم أمل مهدي

رواية انكسار الياسمين الجزء الخامس عشر

رواية انكسار الياسمين البارت الخامس عشر

رواية انكسار الياسمين الحلقة الخامسة عشر

استقر لا تبقى تحلم محد يوصلك
ياهو الگالك شبعان لو جوعان
منو الفكر بحالك منو تنغصلك
خامك خام عادي ومايميزك لون
***************
ياسمين _
وگفت مذهوله وارجف
وهو يخزر بيه والدم يسيل بغزاره على قميصه وصدره
سحب الكلينكس شگ الباكيت وطلع الصفطه كلها لزم بيها صفحة رگبته
ورفع ايده الثانيه ضربني بيها راشدي فرني فر
سلوان _ تسوين روحج شريفه براسي گالها وختل توازنه
ووگع
ياسمين _ ركضت اريد اطلع باوعتله بوعيه عبرته وفتحت الباب وركضت للشارع
سيارة المعمل بالباب السايق والفراش كاعدين بيها ويسولفون
من شافوني
السايق _ اوصلح…..؟؟؟؟
_ ما جاوبته طلعت اركض للشارع العام المسافه بين المعمل والشارع حوالي. خمسين متر
التفتت اشوفهم نزلو من السياره و دخلو جوه
اجرت تكسي وصعدت حتى ما عاملته
افرك باديه والأفكار اخذتني خايفه سؤال واحد حشر براسي
اذا مات راح تنسجنين ياسمين….!!!!
وكأنه متأكده راح يموت…
فززني السايق _ يباوعلى بالمرايه
_ خويه بيج شي…….!!!!!
_ لا اااا
_ لعد ليش ماتسمعيني كم مره سالتج وين توصلين
_ اسفه فكري مو يمك وصلني المنطقه+++
_ بعيوني
وصلت البيت دخلت مثل التايهه رحت كبل العلي حضنته وابجي
بصوت مسموع كنت منهاره وخايفه
راجحه _ كاعدين بالهول ودخلت ياسمين مو طبيعيه حتى ما سلمت رحت وراها
لكيتها اموته روحه بالبجي
اسم الله عليج يمه اجرالج
_ التفتت كلهم يمي رافع وايمان ورضى وخالتي بصفي
حضنت خالتي وابجي خاله يمكن مات ضربته ……!!!!
راجحه _ عزا العزاني منو ابو المعمل………؟؟؟
رافع _ اسوالج احجيييي
ياسمين _ تحرش بيه وضربته
والله ما قصدت أأذي بس هو جبرني اضربه ردت اخلص روحي
راجحه _ اني صوجي من حجيتي لو مانعتج تروحين
رافع _ يعني انتي تعرفين وسكتي اشلون ما حجيتيلي…..!!!
ولتفتلي…
ليش بويه ما ادري اني هيج بعيد عنج
ياسمين _ وگفت ما اريد أحملك هموم كافي البيك
رافع _ وهسه زين الصار
ياسمين _ اخاف يموت ويسجنوني…..؟؟؟
إيمان _ هسه خفتي يسجنوج يوميه ضاربتلج واحد ومطلعه
مخه وصيح خايفه لو تخافين ما ضربتي
رافع _ ايماننننن. اكرمينه بسكوتج
ياسمين _ تفاجأت من حجت عليه عبالي انصلح حالها بس ذيل الجلب شيعدله… اعوج….
راجحه _ لا والله عاشت ايدها ترديها تطي روحها
إيمان _ واذا مات
راجحه _يطبه مرض جلب ومات
ياسمين _ حاضنه ابني وبس دمعتي بعيني واسمعهم
صدك كلامها
اذا مات منو يصدك اتحرش بيه الف سبب يطلعلي حتى انسجن
صاح رافع
امشي رضى جيبلي رصيد من ابو زين
راجحه _ اشراح اسوي يمه
رافع _ اتصل على ام رغد ما عدنه غيرها
رجع رضه بيده الرصيد نزلته بالموبايل
واتصلت مترد مره مرتين
سديت الخط شأكدر اسوي غير انتظر رحمة الله
فركت راسي الراح ينفجر من الهم والتفكير بقلة حيله وحجيت
روحي ارتاحي ومنا الباجر يحلها ربج
اني كان لازم ابطلج من المعمل من باعته ام رغد
ياسمين _ خلصت يومي تفكير ما ادري مات لو عايش لو يشتكي عليه
لو تعدي سلامات
كان تفكيري العيشه هسه بمصيري الما اعرف شنو راح يكون
حضنت ابني بخوف وقلق ونمت من التعب
راجحه _ ثاني يوم واني احضر بالتنور
اندكت الباب.. طلعت اشوف سيارة شرطه
الشرطي _ هذا بيت ياسمين اكرم
راجحه _ شتردون منه
الشرطي _ بيده ورقه فتحها سلوان فاظل مشتكي عليها ضاربته
بقصد تسرقه لازم تجي ويانه
راجحه _ والله مسكينه هو التعدى عليها انوب مشكي
الشرطي _ حجيه صيحيها تمشي ويانه تسجل افادته والقاضي يقرر
ابو زين من شاف سيارة الشرطه اجه يركض
خير يابه المن رايدين
الشرطي _ انتم ليش أطولو ها خلتجي ياسمين وهناك يصير الحجي
طلع رافع يدفع الكرسي
_ اني أخوها حاجيني الي
الشرطي _ لازم تجي ويانه ياسمين تنطي افادته
ابو زين _ زين روحو واني اجيبها بسيارتي زحمه بنيه وتطلع
بسيارة شرطه
رافع
من بعد جدال وحجي وافق المفوض تطلع بسيارة ابو زين
وسيارة الشرطه ورانه
ياسمين _ گوه نمت ودمعتي بعيني وابني علاوي بحضني كلما
اباوعله دموعي تنزل
ما ريد اعوفه ويتعذب مثلي
صحيت على صوت إيمان وهيه تندهني
إيمان _ اكعدي خاتون الشرطه بالباب يردوج
ياسمين _ بسرعه گمزت صدك تحجين….؟؟؟
إيمان _ لعد كذب تخزينه ونفضحنه بين الناس
راجحه _ دخلت الغرفه لكيت ياسمين خايفه وترجف
اسم الله عليج لا تخافين اني واخوج نمشي وياج وابو زين
يكولون يسالوها كم سؤال وترجع
ياسمين _ الله عليج خاله مات سلوان…..؟؟؟
راجحه _ لا والله بس هو النذل مشتكي عليج دمشي وحجيلهم كلشي شنو بكيفه
طلع ابو زين وويا ياسمين واني وخالتي
وسيارة الشرطه ورانه
رافع _ اول شي ما ريدج تبجين و كل شي احجي انتي صاحبة الحق
وصاحب الحق يصير قوي اني مراح اعوفج لو اعرف انام بالمركز فهمتي
ياسمين _ اي فتهمت…..!!!
وصلنه للمركز
ما قبلو احد يدخل ويايه بس رافع تعارك وصوته عله
مصر الا يدخل وياي للضابط
طلع المقدم ولد بعمر رافع بالبدايه جان عصبي بس من شاف رافع مثل التأثر من الموقف وسمحله يدخل
ونبهه ابد ما يحجي.
وبدو يسألوني ليش وشلون ضربته….
حجيتله للمقدم كلشي من البدايه إلى أن ضربته بالگتر مال ورق
المقدم _ يعني مو بالسجين ضاربته
ياسمين _ امنيلي سجين والله ايدي اجت على الگتر وضربته ما كنت ناويه أأذي ردت يفكني بس
المقدم _ يعني ما جنتي رايده تبوگين فلوس منه
ياسمين _ شأبوگ شوف اليوم شكد بالشهر وحتى ما منطيني راتبي
كذاب يريد يرتكب عليه
المقدم _ التفت الرافع اليوم لازم تبات بالتوقيف وباجر تنعرض على القاضي نصيحه اتفاهم ويه سلوان افضل
رافع _ مستحيل اعوف ياسمين هنا
المقدم _ والله لو بيدي ما خليها ساعه بس هاي الاجرائات
لاتخاف عليها راح اخليها بالغرفه البصفي واقفله عليها
ياسمين _ اخذوني للغرفه مكتب فارغ مدري مخزن
من دخلت التفتت الرافع وخالتي
نزلت دموعي خايفه ديرو بالكم على علاوي
راجحه _ ما على شي اصبري يمه بس الليله ونطلعج
المفوض _ يله فضوها تره بايته بنص المركز شكو عليها
قفل عليه الباب اباو ع حواليه غرفه بيها فايلات
وغراض يمكن مخزن كل هذا مو مهم
المهم مصيري شنو…….!!!
كعدت بالكاع ونزلت دموعي…….
وها انا أواجه انكسار جديدا في خضم رحلة الحياة المستمره وما هي الا صدمات الزمن التي تكسر فينا شيئاً لم نكن نعلم بوجوده. تلك الانكسارات التي تعصف بقلوبنا، وتحطم أحلامنا، تجعلنا نعيد ترتيب أنفسنا من جديد. هي لحظات قاسية لكنها تصقلنا، تجعلنا أقوى مما كنا عليه، وتعلمنا أن الزمن لا يرحم، لكنه يمنحنا دروساً ثمينة. صدمات الزمن ليست إلا امتحانات، وكل كسرة في قلوبنا هي شهادة على أننا قد اجتزنا درساً جديداً في مدرسة الحياة.
تكسر خواطرنا وتترك جرح لا يلتئم انها لحظه انكسار ثقتك بمن تحب
لتجد نفسك وحيدا مع خيبة الامل
الصعوبات والصدمات تبدو كجرح مضاعف إذ ياتي ليزيد من ثقل الايام وقسوة اللحظات وقد تكون أكثر ايلاما من الجروح الجسديه
فهيه تترك اثرها في القلب على مر الزمان
رافع طلعنه اني وخالتي ووكفت يم الحرس
_ طلعت الموبايل وادك على ام رغد اختفت يدك ومحد يشيله
اني ما اروح وياسمين هنا مستحيل
ابو زين _ يعني شسويلها انته رجال مريض امشي ارجعك
وباجر نجي من الصبح
رافع _ ابد ارجع لعيالك وانتي خاله ارجعي واني باقي هنا ما اعوف اختي
ابو زين _ حاولت توسلت ما رضه يرجع اضطريت ابقى ويا
كل اشويه بيده الموبايل ويتصل على ام رغد
صار الليل واحنه مرابطين يم الحرس
المقدم _ طلعت اتمشه واشوف هذا الولد المعوق بعده ما رايح حيل انقهرت أشكد خايف على اختته
دزيتله شرطي يكله يروح ما كو فايده من بقيته ما قبل
عفته ووصيت الحرس عليه
ابو زين مل مني يريدني ارجع للبيت واني قفلت ابقى هنا تالي عافنه اني وخالتي ورجع
نوم ما غمضت عيونه اني خايف يصير الصبح وتنحبس ياسمين لازم احصل ام رغد…
اذنت الجوامع اذان الفجر واني على الكرسي والموبايل بيدي الحرس كلش اتعاطفو ويانه وخصوصا من حجيتلهم ليش اختي متوقفه
جابولي مي توضيت وتوجهت للقبله اول ما صدت عيني للفجر نزلت دمعتي ورفعت أيدي وناجيت ربي
ودعيته بگلب خاشع مستسلم راضي بقضائه وقدره
ربي اني ما اگدر احميها ولا اخلصه من هاي المصيبه
بس انته تگدر
خلصه ورجعها النه مستوره مرفوعة الراس
خلصت صلاه طلعت الموبايل و دكيت على ام رغد
راجحه _ الوكت فجر تاني تكعد وخابرها
رافع _ هسه عدهم عصر غير أمريكا عكسنه
راجحه _ يا سبحانك يربي دايخه وتحجي لان ما نايمه
ألسايق والفراش
من شايفيني طلعت بهاي الحاله داخلين على سلوان لاكي كاعد بالكاع ومحتار بالدم اشلون يوكفه
أخذو بسرعه للمستشفى والجرح احتاج عمليه لان يبعد سانتيم واحد عن المنطقه الخطره في الرقبه الا وهيه الشريان المغذي للدماغ
سلوان _ صحيت من البنج لكيت ثنين شرطه والسايق والفراش مالتي يسولفون
سألني الشرطي عن سبب ضربها اليه
ماكان گدامي غير اهمها حتى تجيني تتوسل لوما ستر الله جان ذبحتني الفگريه بت الفگر
اتهمته حاولت تبوكني وضربتني من عرفت كشفتها
والحارس والسايق شهدو انو بس اني وهيه الوحيدين بقينه بالمعمل
ياسمين _
كاعده ببهذا المكان الاسمه توقيف وحدي ما ادري شنو المصير الينتظرني شككت بروحي ان تصرفي غلط لازم ما اضربه جان ما وصلت لهذا المكان….
ورجعت جاوبت نفسي
يعني لو ما ضاربته جان يعوفني…. مستحيل
نيته يعتدي عليه والا ليش خلاني لاخر الدوام وسد الباب
نفس ما سوه بيه محمد
بين كل هاي الافكار
انفتحت الباب من خوفي وگفت….
الشرطي _ باوعلي انتي ياسمين…..؟؟؟
ياسمين _ اي اني ياسمين
الشرطي _ هاج تغدي… اهلج دزولج هذا الاكل
_ شنو اخويه بعده ما رايح
_ مركز بيا ويحجي لا ما يقبل يروح
أخذت الاكل من ايده بحذر ما رتاحيت النظراته گصني من راسي الجعب رجلي
_ معقوله وحده مثلج تنام بالتوقيف ياحيف
دنگ عليه يحجي همس
اعذرينه الغرفه مو بمقامج…. غمز وعض شفته
لوبيدي غير….. افرشها الج حرير
ياسمين _ لميت نفسي بخوف وباوعتله بنظراتي الغاضبه
طلع وسمعته قفل الباب ياله تطمنت
كعدت وفتحت العلاكه لفتين فلافل اكلت وحده والثانيه عفته وشربت مي
فكرت خطيه رافع ولو احس بأمان من دامه موجود. قريب عليه
بس اشلون حاله هسه
وذكرت علي
نزلت دموعي واحس اللگمه حشرت بلعومي متنزل
يارب انته تعلم اني بريئه خلصني من هاي المصيبه ورجعني لابني
رافع _ طلع علينه الصبح واني اباب المركز على الكرسي تعبت جسمي كله يوجعني
و كلبي مشتعل نار
وبديت أشك ام رغد عمدا ما تجاوب والا ليش ما ترد علينه
اجه القاضي وعرضو ياسمين عليه وحضر من طرف سلوان محامي
من عرف القاضي سلوان بعده بالمستشفى
أمر يجدد حبسها
احس دمرني هذا القرار دفعت الكرسي بأيدي وفتت للقاضي الشرطي
منعني بس بصياحي اضطر يدخلني
حجيت ويا وترجيته يفرج عنها كفاله الخاطر طفلها محتاجها
جان كاعد المقدم يمه هم تعاطف ويانه
بس ما قبل ابد وكال ضاربته بسجين يعني شروع بالقتل
كلتله وين السجين هذا يكذب يريد يغطي على جريمة التحرش
مالته
كال بكل الاحوال لازم يحظر يالله نفرج عنها
ونصيحه
ما گدامك غير تتفاهم ويا حتى يتنازل
طلبت اشوفها سمحلي المقدم
فتح الشرطي الباب ودخلنه اني وخالتي
ياسمين _ ركضت حضنته واناشغ احس الأمان كله من اشوفه
ابا وعله امبين عليه تعبان ما نايم گوه يحجي
رافع _ مسح عيني لا تبجين ديري بالج على روحج اني طالع منا
اروحله للمستشفى بلكت يتنازل
ياسمين _ على.. شلونه
راجحه _ لا تشيلين همه إيمان يمه
دخل علينه الشرطي ووكف بالباب
_ يله يابه خلصت زيارتكم
رافع _ ما وصيك على اختك…
الشرطي _ هههه كلهن خواتنه لعد اشلون
رافع _ باوعتله ما رتاحيت الاسلوبه ولتفتت الياسمين
وبگلبي احجي
منين احميج من عيون البره لو من عيون الجوه لمحاوطتينج
طلعنه ونقفلت الباب مشيت الكرسي ما اگدر احرك عجلاته مهدود حيلي نفسي ما تطاوعني اعوفها بس مضطر
واحنه طالعين لاگاني ابو زين
_ ها بشر
_ اخذني للنذل بالمستشفى بلكت تطلع عنده غيره ويتنازل
_ يله امشي رحنه للمستشفى لكينى طالع الصبح
اخذنه عنوان بيته ورحناله
بعدنه بالطريق ودگ المبايل بجيبي
رافع _ باوعت الاسم ام رغد انخبصت وصحت لابو زين
هاي ام رغد وگف السياره
ابو زين _ما اجاوب السياره شعليها
بس اصبرلي لا نندعم
رافع _ فتحت خط
ام رغد _ الو ياسمين
جاوبت بلهفه ما مصدك…….
رافع _ مرحبا ام رغد اني رافع…. احجي صوتي عالي مسموع
ام رغد _ هله ابو حسن جنت مسافره وهذا موبايلي……
رافع _ قاطعتها من رخصتج ياسمين محتاجتج….
ام رغد _ سكتت متفاجأه شكو شبيها ياسمين قلقتني
وحجيتله كل الصار بين ياسمين وسلوان بختصار لان رصيد والاتصال دولي
ام رغد _ هسه ياسمين بالمركز……؟؟؟
رافع _ متوقفه واحتمال تنحبس
ام رغد _ اطمئن راح اخلي يسقط الدعوه واليوم اعتبر ياسمين بالبيت
رافع _ اريدها منج اخيتي
ماعدنه غير الله وانتي تدرين هسه شنو حالها وخايف عليها
ياسمين _
انفتحت الباب نفس الشرطي بيده ماعون سفري
اقترب مني هاج تغدي
_ مديت ايدي أخذه لزم أيدي…..
قشعر جسمي نشغت بصوت
و بسرعه هديته للماعون ووكع بالكاع وطشر التمن واللحم
رجعت ليوره جسمي كله يرجف
الشرطي _ شبيج ايدج فاهيه ظلي كاتلج الجوع
عافني وطلع
كعدت بالكاع بجيت على حالي ورجعت الم منه الما توصخ
وارجعه بالعلبه
حتى نفسي انسدت هذا ثالث يوم الي هنا يبين هواي راح اشوف من أشكال سلوان
صار العصر وماكو خبر من رافع ولا احد وصلني
المغرب انفتحت الباب
الشرطي _ تفضلي يابه يريدج المقدم
رحت والشرطي وياي دخلت غرفة المقدم لكيت
كاعد و يا واحد بيده جنطه يبين محامي والثاني ابو زين
المقدم _ تعالي بابا اكعدي
ياسمين _ كعدت مقابيله ما فاهمه شي
المقدم _ وقعي على ذني الأوراق سلوان تنازل
ياسمين _ ما ادري اصاربيه حيل فرحت وقعت عليهن
ولتفتت على ابو زين
اشو رافع ماكو
ابو زين _ صعد عنده السكر ورجعته للبيت
المقدم _ الله يساعده يومين ما فارك المركز الله يحفظه الج
ياسمين _ اشكرك
المحامي _ هذا التنازل بعد اكو شي يخص سلوان
المقدم _لا روح انته بعد خلصت مهمتك
المحامي _ ياسمين يابه هذا راتبج بعد تطلبينه السلوان شي
المقدم _ كان عندي شك بكلام ياسمين بس هسه صدكت
شگد ناقص صاحبك يستغل بنيه محتاجه ويتحرش بيها
لا وفوگها مشتكي عليها
ويألف ضربتني بسجين وتريد اتبوگني…..
ابو زين _ الله ياخذ حقها منه
طلعنه اني وابو زين للبيت ملهوفه اشوف رافع وعلي
وصلني للبيت
ياسمين _ تعبناك ويانه اشكرك
ابو زين _ لا خويه احنه اهل الحمد لله من مرت سلامات
ياسمين _ الحمد لله
دخلت البيت ليل صارت
تلكاني علاوي مما… مما
حضنته فرحانه ياعيون مما شتاقيتلك ياگلبي
خالتي حضنتني ورضى فرحانين تلگوني
ياسمين _ وين رافع ظل بالي يمه اشلون..
إيمان _ يعني اشلون…….!!!!
صعد عنده السكر من وراج زين ما مات
راجحه _ أمونه كافي هيه بياحال وتلگيتيها
إيمان _ واني شگلت جذب ذاك اخوج امدد البارحه سكره ٦٠٠ لوما الرجال الطيب الحاير بينه
يامستشفى يامركز
ياسمين _ عفتها تحجي ورحت على رافع لكيته نايم
حضنته وبوست ايده
فتح عيونه وبتسملي
سلامتك بيه السكر ولا بيك
رافع _ الحمد لله على سلامتج
والله وفت بوعدها ام رغد
ياسمين _ ليش انته حصلتها
رافع _ هيه اتصلت عليه تگول قلقت من شفت هلكد متصلين عليه
وعدتني
گالت اليوم ياسمين تبات ابيتها
ياسمين _ الله يوفقها حتى وهيه بعيده ما تعوفنه
الإنسان المؤمن الله يختبره بس دائما يخلي بدربه الناس الطيبه
حتى يمته ما وگع اديهم تتلاحگه
مثل ما اكو ناس ظالمه مرت بحياتنه كذلك مقابيلهم اكو ناس محبه وطيبه الله زرعهم بطريقه مثل ابوزين وام رغد
وهاي الدنيا كلها دروس نتعلم منها
كعدت بالبيت شهر وخلص الراتب وبدت معاناتي من الحاجه
اريد اشتغل ورافع ما يقبل
ومحتاره خالتي خطيه هم كبرت وشايله الحمل مسواك البيت ونواقصه كلها عليه
رافع استلم الراتب مالته وهو راتب رعايه كلش قليل
انطاني منه مصرف
اسمع إيمان تتعارك ويا بغرفتهم وتگول حتى على الراتب لاحگتني ياسمين
وسمعتها تعيره بالفگر والمرض محملته منيه ان هيه عايشه ويا ومتحمله
والله وكت وصلت تبوس بايده حتى يرضه ويرجعون مثل قبل
وهسه من رجعو ورضى عليها
عادت حليمه لعادتها القديمه
انقهرت حيل صحيح الراتب قليل بس هو ما قصر انطاها الباقي كله
وهم ما رضت
إيمان مزوهرتني بعيشتي تمشي ورايه وتحجي
خلص المسواك وخلص المصرف
ابنج يريد اطلعي دوري شغل
حتى براتبنه شاركتينه
واذا أگلها رافع ما يقبل
تكول هو بكيفه لشوكت اني وامي محتارين بعيشتكم
ذلتني خلتني اضطريت اطلع للسوگ بلكت الكه شغل…
افتريت اتفرج على المحلات هوسه لفت انتباهي محل مال قماش
دخلته كانت مره تبيع بي
افتريت اتلمس بالاقمشه وذكرت سيد علي من كلي عوفي القماش وصيري دكتوره
ابتسمت أشكد كان يخاف عليه ويتمنه اكمل دراسه
بس لو اعرف هو وين وليش قاطع رافع…..
صافنه على الاقمشه بين افكاري وذكرياتي
ام حسين _ ها يعيني عجبج القماش
ياسمين _ ها لا بس اشوف
ام حسين _ يمه اذا ماعندك اخذي وبعدين وديلي
ما يضيع شي
ياسمين _ خاله اني محتاجه شغل متردين عامله ووياج
ام حسين _ لا والله اني مكفيه
ياسمين _ متعرفين احد يشغلني
ام حسين _ شتعرفين تشتغلين
ياسمين _ كلشي بياعه بمحل خياطه
ام حسين _ اي تذكرت الخياط ابو زيد رايد خياطه
اذا تردين ادزج عليه
ياسمين _ تذكرت سلوان والصاربيه من ورى
لا خاله اذا ويه مره اشتغل ويه رجال ما أكدر اخويه ما يقبل
ام حسين _ ها لعد مريلي غير وكت بلكت الكالج غيره
ياسمين _ رجعت للبيت روحي زهگانه
الحاجه صعبه
خالتي تصفط بالخبز واصيح على حسن ورضى محد يعاونها
ياسمين _ عوفيهم خاله اني اعاونج
راجحه _ ما الحك كم بيت يردون مني خبز وهاي الرعنه بس فاكه حلگها وتصيح لو بيها خير جان عاونتني
ياسمين _اني اعاونج خاله
راجحه _ مالكيتي شغل…..؟؟؟؟
ياسمين _ لا والله مالكيت
راجحه _ اليوم يردون مني ٣٠٠ گرصه فاتحه بالشارع الورانه
اعجني ونخبزهن وانطيج هالله قاسمه
باوعت اشبي الخبز اقلها شغل ابيتي وابني گبال عيني
ياسمين _ اي ليش لا ابدل هدومي واجيج
راجحه _ بيج حيل توگفين وياي الصبح والعصر
ياسمين _ اي احسب روحي اشتغل بمخبز اقلها اطلع مصرف ابني
راجحه _ لعد بسرعه ايدج وياي
ياسمين _ وبدت رحلة تعب جديده اعيشها اكعد من الغبشه
اشنك وحضر التنور ونبلش ثلاث ساعات علما تكعد الناس
اليجي ياخذ بنفسه والما يجي خالتي تجيسه وتودي
يوميه تنطيني خالتي المقسوم والباقي تسوك بي
كاعده بالحوش اجيس بالخبز وابني بحضني…
اندكت الباب
ياسمين _ منو
اندفعت الباب ودخل علينه
ياسمين……..!!!!
محمد…