رواية نصف جثة مجهولة الفصل السابع 7 بقلم عادل عبدالله
رواية نصف جثة مجهولة الجزء السابع
رواية نصف جثة مجهولة البارت السابع
رواية نصف جثة مجهولة الحلقة السابعة
عمار : أنا نفسي أعرف انت بتعمل ايه عندك في فرنسا ؟؟؟ انت شكلك كده مش في قضية هناك ولا حاجة !!!
أنور : مش هينفع أقولك دلوقتي بعمل ايه ؟؟
عمار : ليه ؟؟ هو سر ؟؟
أنور : أيوه سر .
عمار : أتكلم يا انور وقول فيه ايه كفاية المصيبة اللي احنا فيها .
أنور : هقولك لكن يفضل سر بيني وبينك مفيش حد يعرفه الا أنا وانت بس ؟؟
عمار : قول يا أنور .
أنور : بصراحة أنا أتجوزت .
عمار : يخربيتك !!! بتتكلم جد ؟؟
أنور : ايوه ، بس أوعي تقول لمايسة مراتي .
عمار : دي مراتك لوعرفت هتمو.تك !! دي مراتك مجنونة رسمي !!!
أنور : علشان كده مش عايز حد يعرف ألا انت وممكن عاطف اخوك واوعي واحدة من مراتتكم تعرف لتقولها وساعتها قول عليا يا رحمن يا رحيم .
عمار : وطبعا بتقضي شهر العسل دلوقتي .
أنور ” يضحك ” : أيوه ، عقبالك .
عمار : واتجوزت أزاي ؟؟ احكيلي اتجوزت مين ؟ أعرفها ولا معرفهاش ؟
أنور : لااا هتعرفها منين !! دي مش من مصر أصلا .
عمار : ايه ده بجد ؟!! احكيلي هي منين وأنت عرفتها ازاي وأمتي ؟؟
أنور : دي موكلة سورية عندي في المكتب كانت رافعة قضية طلاق .
عمار : ولحقت تحبها ؟!!
أنور : أيوه ، المهم أوعي تقول لحد لمراتي تعرف وتبقي مصيبببة .
عمار : خلاص اطمن محدش هيعرف ، المهم ترجع بسرعة علشان الميراث وعلشان تشوف معانا هنعمل ايه في بقية جث.ة امك اللي مش لقينها !!!
أنور : حاضر يا عمار ، هرجع وأمري لله .
وبعد أيام عاد أنور وتقابل مع أخوته ….
عمار : حمدلله ع السلامة يا عريس .
أنور : الله يسلمك ، انت قولت لعاطف .
عاطف : أيوه طبعا ، مش عيب لما تتجوز كده من ورانا !!
أنور : ما أنت عارف ان مايسة لو عرفت هتخر.ب الدنيا علشان كده خوفت اقول لتعرف .
عاطف : الف مبروك ياابو الأناور ، وكان لازم تسافر فرنسا يعني ؟؟
أنور : يا عم من نفسي ، خلي الواحد يعيش يومين حلوين ، المهم اوعي حد يعؤف !! ولا حتي ستاتكم !! أنتوا عارفين الستات مش بيتبل في بوقها فوله ، لو واحد فيكم قال لمراته بعد نص ساعة كل الناس هيكونوا عرفوا واولهم مايسة .
عاطف : خلاص يا أنور متخافش مش هنقول لحد ، المهم قولي أنت جيبت فلوس الجواز والسفر منين ؟؟
أنور : يعني ايه منين ؟؟
عاطف : يعني فجأة كده تظهر معاك فلوس كتير لدرجة تتجوز وتسافر تقضي شهر العسل في اوروبا وكمان كنت مش عايز ترجع !!! غريية دي !!!!
أنور : قول تقصد ايه علطول من غير لف ودوران .
عاطف : يعني لما فتحنا الاوضة اللي أمك كانت عايشة فيها كان صندوق الدهب مش موجود يعني اتسرق !!!
أنور : وصندوق الفلوس كمان أتسرق ؟؟
عاطف : لأ ، علشان الصندوق ضخم وتقيل .
أنور : صندوق الدهب قيمته أكبر من صندوق الفلوس .
عاطف : ما أنا عارف ، وعلشان كده بسألك عليه !!
أنور : بتسألني أنا ؟؟؟ وأنا هعرف منين ؟
عاطف : يمكن تكون روحت لأمك وأخدته منها علشان تتجوز !!!
أنور : أنت فاهم أنت بتقول ايه ؟؟
عاطف : أيوه فاهم واقصد كل كلمة ، أنا مش ناسي يا أنور من فترة قريبة لما أنا طلبت منك فلوس وانت قولتلي أن ظروفك مش كويسة الفترة دي !! منين جاتلك فلوس تتجوز وتسافر وتعمل كل ده ؟؟؟!!
أنور : أنت تقصد أن أنا اللي قت.لت أمي ؟؟؟
عاطف : وليه لأ ؟ أنت كده كده مكنتش بتحبها وبتستعر منها يعني موتها فايدة لك من كل النواحي بس كنت طمعان تاخد كل حاجة لوحدك ولما فشلت تفتح صندوق الفلوس أخدت صندوق الدهب وروحت أتجوزت وسافرت وفي نفس الوقت تهرب وقت التحقيقات .
أنور : ياااه ده أنت رتبت كل حاجة وخلتني كمان قت.لت امي وسر.قتها !!!! وليه مش أنت يا بشمهندس اللي تكون سر.قتها وقت.لتها كمان ؟؟
عمار : أنتوا أتجننتوا أنتوا الاتنين ولا ايه ؟؟ أنتوا بتتهموا بعض ازاي بالتهم دي !!! أنتوا نسيتوا انكم أخوات ولا ايه ؟؟!!
أنور : البشمهندس عاطف هو اللي بدأ وأتهمني بالاتهام ده وأكيد أكيد هو بيتهمني علشان يداري عن الفاعل الحقيقي !!
عاطف : قصدك ايه ؟؟
أنور : قصدي أنك الوحيد يا عاطف اللي كان عندك ضائقة مادية واكيد أتهمتني بالاتهام ده علشان تبعد الشبهة عن نفسك .
عمار : كفاية بقي أنتوا أتجننتوا انتوا الأتنين !! ازاي تتهموا بعض بالأتهامات دي ؟؟!! أوعوا تقولوا الكلام ده تاني !! أحنا لازم نروح للظابط اللي ماسك القضية لأنه كان طالبنا كلنا .
عاطف : انا مش هروح ولااتحرك ولا هغير كلامي الا لما اعرف هو جاب الفلوس اللي ظهرت عليه فجأة دي منين ؟؟
عمار : قول يا أنور أنت جيبت الفلوس دي منين ؟؟
أنور : يا جماعة الصراحة أن أنا مراتي اللي أتجوزتها دي غنية ومعاها فلوس كتير وصاحبة مطاعم كبيرة .
عاطف : وايه الدليل علي كلامك ده ؟
أنور : مفيش دليل ومن الأخر اللي عايز يتهمني بحاجة يقول الكلام اللي عنده للشرطة وهما بس اللي من حقهم يحققوا معايا .
وفي اليوم التالي ذهبوا جميعا الي الضابط معتز .
الضابط معتز : حمدلله ع السلامة يا استاذ أنور .
أنور : الله يسلمك يا فندم .
الضابط : معقول كل الوقت ده كنت بتترافع في قضية ؟؟
أنور : ما أنا أخدتها فرصة وكنت بتفسح كام يوم هناك .
الضابط : تتفسح !!! بتتفسح يا أستاذ أنور ووالدتك اتقت.لت و مش لقيين باقي جث.تها ؟؟ غريبة دي !!!
أرتبك أنور ولم يرد !!!
الضابط : أنت متأكد يا أستاذ أنور أنك كنت في شغل ولاااا ….
عمار : الصراحة يا فندم اخويا انور اتجوز وكان بيقضي شهر العسل هناك .
الضابط : أتجوز !!! ألف مبروك يا بشمهندس ، علي العموم كله هيبان اذا كان اتجوز او حاجة تانية .
انور : حاجة تانية زي ايه يا فندم ؟؟
الضابط : قولتلك كله هيبان يا استاذ ، المهم دلوقتي هتروحوا تعملوا تحليل الد.م ده في المستشفي المكتوبة دي .
عاطف : تحليل د.م !! ليه ؟؟
الضابط : مطلوب في القضية يا بشمهندس عاطف .
عمار : مااحنا عملنا قبل كده ، لزومه ايه تحليل تاني ؟؟
الضابط : الأول كان تحليل DNA انما ده تحليل غيره .
عمار : وده ضروري ؟؟
الضابط : ايوه بعد أذنكم بالكتير نص ساعة وتكونوا في المستشفي .
ذهبوا جميعا الي المستشفي وقاموا بعمل التحليلات المطلوبة وبعدها بساعات قليلة كانت نتيجة التحليلات أمام الضابط معتز في مكتبه حيث كان يجلس مع معاونيه حمزة وعبد الرحمن .
نظر الضابط معتز الي تقرير المستشفي وظهرت علي ملامحه معالم الغض.ب !!
الضابط حمزة : خير يا فندم التقرير مكتوب فيه ايه ؟؟
الضابط معتز : التقرير بيقول ان العينات الثلاثة لأولادها الثلاثة مختلفة عن الد.م الغريب الموجود علي ملابس المجني عليها !!!
الضابط حمزة : سيادتك كنت بتشك فيهم ؟؟
الضابط معتز : أنا فعلا شكيت في ابنها أنور لكن دلوقتي أصبحوا الثلاثة خارج دايرة الشك ، ده غير ان تحليل الحاج حامد بردو برأه من الأتهام ده .
الضابط عبد الرحمن : ومين يا فندم اللي لسه داخل دايرة الشك بعد براءة دول كلهم ؟؟؟
الضابط معتز : للأسف مفيش قدامنا الا أننا ندخل جيران المجني عليها وكل الناس اللي كانت بتتعامل معاهم من بداية خروجها من البيت الصبح لغاية رجوعها للبيت اخر اليوم ، ودول بالتأكيد هيكون عددهم كبير جدا ولازم نبدأ التحقيق معاهم فورا .
الضابط حمزة : ودلوقتي هنعمل ايه ؟؟
#رواية_نصف_جثة_مجهولة_للكاتب_عادل_عبد_الله
الضابط معتز : أنت يا حمزة هتنزل انت ورجالتك تعرفوا كل واحد في الشارع كانت بتتعامل معاه وتعمله طلب حضور للقسم ، أما أنت يا عبد الرحمن هتجيب كل الجيران اللي وهنبدأ بالجيران الموجودين معاها في نفس البيت وبعدها هنشوف باقي الجيران !!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية نصف جثة مجهولة)
