رواية انكسار الياسمين الفصل الثالث عشر 13 بقلم أمل مهدي
رواية انكسار الياسمين الجزء الثالث عشر
رواية انكسار الياسمين البارت الثالث عشر
رواية انكسار الياسمين الحلقة الثالثة عشر
تعبنه هواي ويه المايوافي
نذوره أشكثر شدينه جفافي
طشينه العمر مو خلص شبيك
رد خابط خلگنه الجان صافي
زرعنه الجان سنبل للحواصيد
صفه عاگول للممشا ه حافي
***************
ياسمين _
منظر الشرطه وهمه يدخلون البيت بسرعه حتى ملحكت ادخل غرفتي
كان الضابط بيده جهاز ودخل ويايه مفاجأه ما كدرت حتى انطق
محمد _ فزيت على الهوسه
هاي شكو……….!!!!
الضابط _ انته محمد…..؟؟
محمد _ شتردون مني
جان نايم بالشورت
الضابط _ اتقدم عليه وهو على السرير البس بجامتك بسرعه بدون حجي
محمد _ شمسو يييييي ….
لبس البجامه مال التراك والجاكيت قبل ما يسد السحاب سحبو ادي ورى ظهرا ولبسو الكلبجات
وسحبو للسياره گدامنه
خالتي جلبت بالضابط فدوه اروحلك. لا تأذو
ما مسوي شي
جاوبها الضابط حجيه مسوي مصيبه اشلون ما مسوي شي….
من اخذو وطلعو باوعت إيمان تبجي وولدها
واكفين يمها
وخالتي تلطم يمه ابني وين ماخذينه
وتصيح هذا الجنت خايفه منه
ما كدرت افسر احساسي بهلحظه كلشي حسيته
خوف على رهبه على أسف على شماته خليط من
الاحاسيس عشتها بلحظه وحده واني واگفه متسمره بمكاني
بس الاحساس الوحيد الجنت متأكده منه هو الفرح فرحه بخلاصي منه
ما نقهرت عليه ابد
انقهرت بس على خالتي المسكينه تبجي وحتارت بمصيبته
باوعتلي إيمان وكأنه قرت شكو بداخلي
_ هسه برد گلبج اشمتي هن اسبوعين
من حطيتي رجلج بالبيت هجمبتي جبتي وياج الهم والفگر
راجحه _ وين أولى ياهو اودي ورى …. ولج أمونه خابري ابوج الشفيه يمشيله
ابتسام _ دخلت البيت وتمنيت السمتعه من الناس صحيح
مرحبا…..
إيمان من شافتني دخلت جوه وياسمين ركضت عليه
شنو صدك الشرطه اخذت محمد
راجحه _ اكعدي دادا صدك هجمو علينه من الصبح وخذو وهسه خابرنه ابو راح يشوفه
ابتسام _ حضنت ياسمين والعبره بصدري ما ادري افرح لو ابجي
ماكالولج ليش اخذو
راجحه _ ما ادري بس امبين الشغله جايده
اطين راسي وراسه
ابتسام _ على كيفج لا تموتين روحج محد يستاهل
إيمان _ باوعتلي تخزر بيه
دك الموبايل
ايمان_ هذا ابويه…. الو
ظلت تسمعله شويه واحنه كلنه مركزين وياها ننتظر شتگول…… سدت الخط ولتفتت علينه
متفاجأه
ابو فهد تاهمه حارك المخزن مالته لان….. وسكتت تباوعلي
راجحه _ يمه ليش يحرگه اشعنده ويا
ابتسام _ گلت بكلبي اللهم كلي شماته
تمهل ولا تهمل
لبست عباتي اريد اطلع وياسمين طلعت من غرفتها
اخذيني وياج يمه
راجحه _ بجت يا ويل گلبي عليك يامحمد ليش يمه
هيج عملت بروحك
إيمان _ بسرعه صدكتي هو حرك المخزن
راجحه _ البارحه طلع بالليل ورجع وجه الصبح جنت كاعده اصلي من مر من يمي شميت بي ريحة دخان
ياسمين _ اي البارحه ما نام بالغرفه ولكيت اهدومه
على الميز يعني طالع بليل
راجحه _ عزا العزاني شعنده ويه الرجال صار سنين عايش بخيره ليش يحرك حلاله
ولكم المن اروح وياهو اليخلصه
لا اني ما ارتاح الا اشوفه واسمع منه باجر من غبشة الله بالمركز
حتى لو ابوس اديهم الشرطه بس كون يطلعو
ابتسام _ يا ايد التبوسيها راجحه ليش بكيفهم الشغله بيد التاجر ابو المخزن…
رجعت للبيت ووياي ياسمين
لكيت رافع بالباب ينتظرني وجها مبتشر من وصلنه
فتح ايديا ثنينهن الياسمين
_ تعالي يا گلب أخوج وعافيته حضنتها
وباوع ابوجها مبتسم افرحي خلصتي من محمد
الله اخذ حقج منه
ابتسام _
الله ما يضرب بحجار وهاي حوبتج وحوبت اخوج لعب بحالنه مايدري النه رب الياخذ حقنه
رافع _ خالتي اشلونها……؟؟؟؟
ابتسام _ حال الضيم حالها المسكينه الله يعينها على هلخلفه….
ياسمين _
مر اليوم الأول واني ادعي ربي تثبت عليه وينسجن
ومر الاسبوع وهذا الثاني ومحمد اعترف بحرگ المخزن
حتى لا تنكشف بوگاته وشهد عليه الحارس وعزيز سايق سيارة الحمل
خالتي راجحه انطت الفهد فلوس والسياره وهم بعد ه يطلب البضاعه الحتركت ويا الانباكت هوايه
ما قبل يتنازل عنه فهد
على اثرها انحكم محمد ثلاث سنوات
زارته إيمان وخالتي بالسجن وطلبني اروحله ما قبلت
وبلغتهم يگولوله اريد اطلك منه
كنت ناويه ارجع المدرستي
خالتي راجحه گالت بكيفج
من بعد شهر رفعت دعوى طلاق وتحددت جلسة المحكمه
وقبل الجلسه بيومين اكتشفت اني حامل كانت بالنسبه الي صدمه حطمتني مره ثانيه
وحطمت حلمي بالخلاص من محمد إلى الابد
دخلت بحاله من اليأس من سنين كلشي بالحياة
يمشي ضدي عكس ما أحلم واريد
تقريبا قطعت الاكل… تمرضت أصبت بالضعف إلى درجه ما عندي قوه اوگف وحدي
كنت رافضه الحمل وراضيه اموت ولا ارتبط بطفل بالغتصبني ودمر مستقبلي
امي ورافع تعبو وياييه وما عرفو شنو الوصلني الهاي الحاله ومن تحاول امي تاخذني للطبيب
اظل اصرخ وابجي حتى تتركني
هواي فكرت وشفت ماكو خلاص غير انتحر واخلص….
وانقذ روح تنولد بوسط عازه وفقر واب بالسجن وام
مغلوبه على امرها
جنت خايفه من الموت بس لكيته الأمان الي وللبطني……
حياتي عباره عن اخفاقات خسارات تعبت واني بعدني ما شفت
من الحياة شي ولا عشتها
طلعت اشوف محد موجود امي بالمعمل ورافع
يروح يم ابو زين اصبحيه
وشفت هذا انسب وقت
ربطت شالي بالبنكه وشديته من الجهه الثانيه على رگبتي
جنت واكفه على الكرسي بللحظه الاخيره نزلت دموعي انقهرت على روحي واجه على بالي سيد علي وينه هسه هو رسملي
حياتي طريق حلو امشي بي اني ويا
ماكنت حاسبه اتعثر باول خطواتي ويتركني القدري ياخذني
الطريق مسدود
من يوم عافني حياتي انگلبت
اكيد هسه عايش ومرتاح ويه زينب واكيد يحبها
زاد يأسي وكأنه أخذت جرعة يأس تعبرني للاخره
بجيت بشهگه… تشاهدت وضربت الكرسي برجلي
وگع
ضغط الشال على رگبتي وخنگني ورغم اصراري
بس عزت عليه روحي و اني اشوف الضوه يطفى بعيني
شويه شويه
ما ادري ميته لو بعدني بالدنيه من وصلي صوته خايف يرجف
ياسمين ولج غبيه تنتحرين
منو يستاهل…. ياسمين تسمعيني
رافع _
رجعت من ابو زين دخلت البيت جان وياي رضى
باوعت الساعه ظهر شلون بياسمين الهسه ما أكلت
مشيت الكرسي للغرفه دگيت الباب
ماكو رد بس ونين اسمع
فتحت الباب والكاها معلگه تتلوه باخر انفاسها
صدمتي بالمنظر حسيت روحي طفرت الها وسبقت
الكرسي
حركت الكرسي بسرعه رفعتها بحضني رضى لازمها وياي وافتح الشال من رگبتها
حسيت النفس رجع الصدرها
غسلت وجها صارت احسن
رافع _ شنو ممكن يخليج تنتحرين معقوله حبيتي محمد…..؟؟؟
احجي ياسمين ليش تضمين عليه صح اني مشلول
بس اخوج لو شما صار ابقى بظهرج
تعرفين الينتحر يخسر دنيا واخرته لو لا……؟؟؟
ياسمين _ هزيت راسي ودموعي تنزل
رافع _ يعني تخسرينه وتخسرين رضى رب العالمين
ليش فهميني تردين تموتين
جنتي فرحانه من انسجن محمد لان الله نصفج واخذ حقج
واني ماسعيت للمحكمه بطلاگج الا بموافقتج
شنو التغير احجيلي….
ابتسام _ اليوم تعبانه ورجعلي الوجع واني اشتغل
ام رغد _ يراد تراجعين دكتور لا تهملين روحج
ابتسام _ الله كريم
ترخصت من منها ورجعت للبيت صار لازم اراجع دكتور احس روحي تطلع مني من اتوجع
دخلت البيت هدوئ رحت على الغرفه البيها ياسمين
اشوفها بالكاع وراسها بحضن رافع وشالها موبوط
بالبنكه
ابتسام _ خير صاير شي…..؟؟
رافع _ التفتت على امي…
تعالي شوفي بنتج شبيها…. شنو الوصلها تنتحر
ابتسام _ شمرت عباتي وكعدت بصفها…. اشوف الدموع بعيونها يمه تنتحرين لويش
ياسمين شبيج يمه احجيلي
ياسمين _ نزلت راسي والدمعه بعيني بعد ما أكدر اضمه لازم اكلهم بلكت يخلصوني
اني حامل…….!!!!!
ابتسام _ شنو حامل مستحيل انتي مو كلتيلي….
ياسمين _ اي كلتلج من هاي المره….
ولزمت ايدها اتوسلها
ماريده سويلي حل وموتى ماريد شي يربطني بمحمد
رافع _ تعجبت لارادة رب العالمين كل ما نريد نخلص منه
نرجعله
يعني تنتحرين هم تقتلين نفسج وتقتلين روح ثانيه وياج
ما خفتي من الله
ياسمين _ ما أريده وضربت على بطني ماريده خلصوني
رافع _ اذا الله كاتبله يموت خلي يموت بدون ما تقتلي
ما اله ذنب هذا الطفل بابو والسوى
يمه اخذيها غسليلها و وكليها واياج تفكرين بالانتحار
تردين تموتين كافره
واذا على الطفل الله يدبر عيشته
وهذا قدرج ارضى بي…..
سيد علي_
رجعت من أحمد مقهور ألوم بنفسي وفكرت ياسمين
المفروض بالاعداديه هاي السنه أروح اشوف ياعداديه قريبه على السوك
لكيت وحده قريبه ووحده بعيده ورحتلهن الاثنين
والاداره تعاونوا وياي مالكو اسمها بالسجل ولا جاييهم هيج اسم
رجعت افتر بالسياره فرع فرع محد يعرفهم اصلا اسم رافع غريب عليهم
عبالك فص ملح وذابو بين الناس
رجعت للبيت مقهور وگفت بالطرمه واباوع على شجرة الياسمين خضره تزهي بورودها البيضه
شامخه بأغصانها ماليه المكان بعطرها
ام علي _ اشبيك سيد من اجيت ولهسه مگابل الشجره وكاعد أحوالك ما عاجبتني منو غاثك
سيد علي _ يمه تذكرين صديقي رافع
_ اي بمنطقتنه القديمه غير…..!!!!
_ جريت حصره وغرغرت الدمعه بعيني
اي هو…..
اليوم عرفت واكع من السكله ومشلول….
ام علي _ لاااا سوده عليه بعده شباب ياعيني
شنو جنت يمه….
_ يا ريت اندله وين صار واروحله حتى لو مشي
ام علي _ ليش وين صار….
_ شايلين من المنطقه ومحد يعرف وين راحو
ام علي _ خطيه… وهاي اخته الزغيره هسه تلكيه كبرت يا عيني هيه شسمها
_ لزمت الورد بيدي اتلمسه وطفرت من عيني دمعه
ياسمين……!!!
اسمها ياسمين
ام علي _ استغربت الحاله معقوله متأثر الوضع صاحبه
شو يمه باوعلي
انته مو خالي ما شايفتك بهل حاله گبل
احجيلي ليش هيج متاذي
_ شحجي مراح تفهمين عليه لان البيه ما ينحجي
البيه عمر بكامله مضيعه
ام علي _ اسم الله عليك يمه شدتحجي شنو مضيع
فهمني اشبي رافع ليش هيج كلب حالك
_ مو اگلج مراح تفهمين عليه…..
وگفت مهدود حيلي ودخلت جوه تلكتني ياسمين
واخوها
زينب قبل اسبوع ولدت ونايمه بغرفة امي
رحت گبل الغرفتي تمددت على السرير
ام علي دخلت ورى لكيته متمدد على السرير صافن وعيونه بالسگف بيش يفكر ما ادري
بس لا…. ما اصدك…. معقوله السيد يحب اخت رافع
ليش لا هاي نظرته مال عاشگ…
من بعد شهرين خالتي عرفت اني حامل فرحت
مسكينه رغم جان مأذيها محمد بس تبقى ام وتحب
ابنها
ومن راحت زياره لمحمد گايلتله وطاير من الفرح
بيومها جابتلي رساله منه
راجحه _ متدرين اشلون فرح وكتبلج هذا المكتوب وگال سلمي بديها
ياسمين _ اعذريني خاله ما أخذه محمد حطمني
بس اجيب هذا الطفل انطيج يا وارجع ارفع دعوة طلاك
راجحه _ والله يا يمه ندمان ويعض بصابيعه
هذا المكتوب اقري ما خسرانه شي وانتي بكيفج
ياسمين _
طلعت خالتي…
وشگد حاولت افتح واقرا شكاتبلي ما كدرت
شمرت الورقه ودخلت الغرفتي مو بيدي ما
اريده…..
اخذ رافع الرساله وقراها بكل سطر يعتذر
ويوصف حاله وندمه
ويوعد من يطلع يتغير ويعيشني احلى عيشه بس اصبر عليه
ابتسام _
اليوم رحت للطبيب ماكلت الرافع ولا الياسمين ما اريد اقلقهم كافي الهموم العدهم
رحت ياريتني ما رحت لو ظاله ما ادري ولا دريت
وتعبت اكثر
طلع عندي صمامين تعبانات وحياتي على شفير الموت
ولازم استعجل على عمليه بالهند ما تنجح عدنه
بالعراق
اخذت الدوه ورجعت وطول الطريق افكر بحجي الطبيب
اذا اكعد بالبيت منين انعيش
خليها على الله ووين ما. توصل خلها توصل
من بعد ما عرفت ايامي بالدنيا معدوده
گمت افكر برافع وياسمين
ثنينهم محتاجيني وخصوصا ياسمين
ويوم عن يوم نفسيتها تتعب كل ما تشوف بطنها تكبر
ما تقبل تباوع البطنها تگول اكرها واكره البداخلها
ابتسام _ حرام يمه الطفل ماله ذنب وهاي قسمتج
ارضى بيها
ياسمين _الله يعلم شكد تحملت ورضيت بنصيبي
بس يجي نفر ثاني يعاني وياي ما كادره اتحمل
على هذا وضعها لو عرفت بمرضي شسوي ومن بعد ما شفتها تريد تنتحر گمت اخاف عليها
تمشيت الراجحه
دفعت الباب ودخلت
بابها دومه مفتوح حتى تجي الناس تاخذ خبز منها
مرحبا…
راجحه _ التفتت عليه هله ومرحبا دادا اكعدي ارتاحي اشلونج
ابتسام _ مالي لون تعبت وتعبتني دنياي
راجحه _ اشبيج بوجهج حجي
ابتسام _ اي عبنه ثنينه الضيم ماضي بينه نفهم على بعضنه
راجحه _ احجي قلقتيني….
ابتسام _ كعدت وسحبت نفس الحسره متحجره ونايمه على أفادي
تذكرين من ماتت أمنه واحنه زغار ابونه ما تزوج خاف يزوج ومرته تأذينه تذكرين اشلون
جان حنين علينه
راجحه _ اي كون يطلع من گبره ويشوف حالنه
ما ظلت طركاعه ما دگت على روسنه
انتي شنو اليوم ذاكره الموته وجايتني
تهيجين قهري
ابتسام _ لا جايه اذكرج اني لو متت لا تأذين روحج
الأحسن مني ماتو وراحو
راجحه _ نزلت دموعي شبيج اليوم اشسامعه
انتي مريضه…..؟؟؟
تره ماظل بيه حيل يتحمل مصيبه جديده
ابتسام _ اني ادري انتي الوحيده الأئمنه على ياسمين ورافع
وانتي الوحيده الواثقه لو تعوفين ولدج ما تعوفيهم
اني گلبي تعبان وعلى ساعه يوگف
وصيتي ياسمين ورافع لاتعوفيهم
راجحه _ لا تحجيها اسم الله عليج انت أخيتي وصاحبتي. يجعل يومي گبل يومج
ابتسام _ هذا الحجي لا يقدم ولا يأخر
ياسمين بالسابع عينج عليها وبيدج تاخذينها للدكتوره ورافع تعرفين اشبي
دخلت علينه إيمان مو ذيج إيمان مكسوره
اني ماشايفتها من اخذو محمد لليوم
هواي متغيره
ما ادري ليش گلبي حن ونقهرت عليها
واني كاعده دخلو من بره حسن ورضى بيدهم علاليگ
رضى اجه سلم عليه بس حسن حتى ما باوعلي
صحت عليه
حسن _ ها شتردين
ابتسام _ احجي عدل وياي امك ما علمتك الاحترام
شنو هاي العلاليك البيدكم
حسن _ ابيعهن مصرف النه
ابتسام _ مو كل شهر يوديلكم ابوكم راتبه
حسن _ لا يودي اني اشتغل ونعيش ما ريد منكم
ابتسام _ وينج يأيمان ليش ولدج يشتغلون وراتب ابوهم
إيمان _خاله الراتب ما يكفي
جان محمد ينطيني واصرف هسه اني ما عندي
وهمه كلشي يردون
ابتسام _ ولج اعيش اشلون ما جان ولا اتيه ولدي بالسوگ ويضيعون دراستهم
يامه مرت علينه ايام عازه وفقر جبناها گوه بگوه
وعدت وراحت
إيمان _ اني احجي ما يسمعون مني
حسن ماينحمل عاشر واحد كسلان صار مثله وبطل والنهار كله يفتر بالسوگ يبيع علاليگ على الالف والالفين
رجعت اعصابي نار اني ادري بحسن وكح وجسر طالع الايمان بكلشي
بس يبطل ويشتغل…..!!! هاي ما حاسبتلها حساب
وصلت البيت وگلتله الرافع انجن وراد يروح يتعارك ويه إيمان اشلون متيهتهم بالسوگ
رافع _ راح أخذهم منها وارجعهم گبال عيني
ابتسام _ ما يرجعون
رافع _ غصبن عليهم يرجعولي
ابتسام _ ماكو حل غير ترجع امهم وتخليهم تحت اجناحك
رافع _ صدك تحجين بعد كل الصار ارجع ايمان
مستحيل ارجعه هاي مرض مو مره شوفي شلون خربت تربيتهم بطلتهم ومسيبتهم بالسوگ اني متأكد هيه الراضيتلهم طماعه ما تشبع عينها
وحسن ما يطيقني سلام ما يجي يسلم ويسال عني
ابتسام _ انته تريد ولدك رجع امهم…….!!!!
قبل محمد جان يصرف عليهم هسه
كلشي ما عدهم والبيت ايجار
وراتبك قليل رجعهم ويانه بالبيت
حسن ما تعجبني أخلاقه خلي تحت عينك حتى تربي وتعلمه
رافع _ اني حلفت يمين إيمان ما تصيرلي مره
اشلون ترديني ارجعها
وياسمين……!!!!
ابتسام _ عوف ياسمين عليه اني احجي وياها
رافع _ ابد يمه ديري بالج تحاجيها هيه بدون شي نفسيته تعبانه وحالها مخربط
عوفيني افكر اشلون اجيب حسن بصفي وارجعه
ابتسام _
يوم عن يوم حالي يتعب محد يدري بمرضي غير
راجحه
الصارت كل يوم تجيني مسكينه حملتها هم فوك اهمومها
ياسمين ما بقالها غير شهرين على الولاده
والله ينطي ام رغد هاي المرأه العظيمه الما تفرق بين مسلم ومسيحي
اي انسان محتاج مساعده تقدمها اله بكل ممنونيه
ماتقبل اشتغل من تشوفني اتعب
من غير المساعدات التقدمها النه
رغد تزوجت بفرنسا وبعد ما رجعت بيناتنه اتصال بين فتره والثانيه
بديت احضر الجهاز للطفل راجحه من تتمكن تشتري حاجه واني هم
وجيبهن الياسمين بلكت تحب الطفل وتحن عليه
بالعكس ما تقبل تلمسهن وتشمرهن
اليوم واني اخيط بالمعمل اجاني وجع قوي
بحيث تشنج صدري حاولت امشي واوصل اشرب مي ما گدرت
شالوني البنات للغرفه مال الاستراحه
التمن عليه فركن صدري شربني مي
شويه ارتاحيت
بس ظل الوجع كل اشويه يجيني وجهي يصفر
وشفافي تزرك
واحس روحي تطلع
رجعت للبيت لكيت ياسمين بالمطبخ تسوي الغده
ياسمين _ من شافتني ابتسمت يمه تاكلين ويانه من يكمل الاكل
ابتسام _ باوعتلها فرحانه صار هوايه ما داخله المطبخ
اي اليوم الاكل من ايدج لازم اتغده راح ارتاح شويه
وكعديني من تجهزين الاكل
ياسمين _ ابتسمتلها وهزيت راسي
كملت الاكل وجهزت الصينيه وحطيته على الطبله
واجيت اكعدها
كعدت بصفها لزمت ايدها بستها
شكد متغيره تتعب هوايه
امي حلوه وجها مدور وبيضه ومربوعه وجسمها حلو
بس من وگعة رافع ولهسه هواي تغيرت كأنه كبرت ٢٠ سنه فوگ عمرها
ابتسام _ حسيت بلمسة اديها فتحت عيني…. بتسمتلي
اي يا عيون امج دايما ابتسمي ماكو حمل يبقى مطروح ما دام الله موجود
ياسمين _ يله تعالي تغدي رافع ينتظرنه
ابتسام _ گوه گمت وايدي بايد ياسمين
كعدت على القنفذه گدامي الطبله عليها الصينيه ورافع مقابيلي
اكلنه وحنه نسولف ونضحك يمكن من سنين ما نجمعنه واحنه هيج مرتاحين
كانت عيونها فرحانه وتباوعلنه
رافع _ الحمد لله الله يزيدها من نعمه
وحرك الكرسي بايده يدفع بالتاير للمغسله
ابتسام _ انتبهت رافع يدفع بالتيارات بايده…..
شنو عاطل الكرسي ليش ما تشغله….؟؟؟
رافع _ البطاريه خلصانه عادي بأيدي ادفعه
ابتسام _ ردت ارد مكدرت حسيت بوجع كأنه سجين ونغرست بصدري
من شدة الوجع فتحت عيوني وحلكي وسكت
كل الوجود من حولي تشخصت عيوني عليهم ووكفت
نفسي نبضي كل شي توقف
لحظات كنت واعيه اشوفهم بس ما اسمعهم
وكأنه شويه شويه تختفي الصوره من امامي……
رافع _ جنت اغسل أيدي
من صاحت ياسمين بعلو صوتها يمهههههه……..!!!!
التفتت افر بالكرسي واقترب منها
تباعلى وشويه شويه غمضت عينها ونزلت اديها
بهدوء…
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية انكسار الياسمين)
