رواية حب من طرف قهوة الفصل التاسع 9 بقلم شهد محمد جادالله
رواية حب من طرف قهوة البارت التاسع
رواية حب من طرف قهوة الجزء التاسع
رواية حب من طرف قهوة الحلقة التاسعة
في يوم التاني بيقابلني قبل ما اروح شغلي عشان ياخد مني سهيلة أخته ومش بديه فرصه أنه يتكلم بحجة إني متأخره
وبروح شغلي بنشغل في ضغط الشغل ووقت البريك بحكي لميار صاحبتي عنه وعن حكايتنا
_وبس كدا ياستي أنا بقى حساني تايها
_انتي غبيه يا لقاء
_ده ليه بقى؟
_ربنا بيوريكي الفرق بينه وبين محمد يعني محمد ده مكنش سوي نفسيًا انتي اللي كنتي بتتحايلي عليه عشان يكلمك كان معندوش هدف في حياته عايش في الحياة حلاوة روح ونور ده كاتب ومثقف عنده شغله ولعيب كوره وبيحبك هتعوزي إيه تاني؟
_مبتتحسبش كدا يا ميار
_امال بتتحسب إيه؟ انتي مشاعرك ناحيته إيه أصلا ؟
_مش عارفه بس بفرح وانا معاه بحب وقتي معاه بحب الحجج اللي بيخترعها عشان يكلمني وبشوف نفسي حلوه في عينيه
_طب وده ملفتش نظرك لحاجه خالص؟؟؟
–إيه مثلاً ؟
_الحب مثلاً ؟؟
كنت لسه هرد عليها بس بلاقي مسدچ منه
_ده بعت بعت
_شوفي بعت إيه
بفتح المسدچ بيكون باعت فيها:
_هنتقابل انهارده بعد شغلك وهنخرج وهنتكلم ومش هتقولي لأ أنا انهارده عيد ميلادي ومش هسمح متكونيش معايا اليوم ده ابدا
بقراها بصوت عالي عشان ميار تسمع بترد عليا وبتقول:
_لازم تكوني معاه وادي فرصه لنفسك ولقلبك وقلبه مش ذنبكم حاجه إن الاختيار الأول كان غلط
_يعني ارد اقول إيه؟
_ردي قولي ماشي هستناك
بعت زي ما قالت وقفلت موبايلي وبصيت ليها وقولت:
_يلا نكمل شغل
_شغل إيه يا حبيبتي انتي مش هتقابليه بعد الشغل ؟
_اه
_طيب وهنقعد هنا نعمل إيه قومي خليني اشوفلك دريس حلو وهديه حلوه تديهالو
_طب والشغل؟
_الشغل يستنى لكن الحب ميستناش قومي معايا
بتقولها وبتاخدني وبننزل بنروح على بيتي وبندخل اوضتي سوا وبتفضل تدور في دولابي على حاجه تعجبها عشان ألبسها
ووقت ما هي بتدور بفتح موبايلي أنا وبلاقيه منزل استوري كانت اغنية ل توو ليت
|..وساعات بنطق كلام وأقصد كلام تاني بس معاها كل اللي الجوايا على لساني من بين ١٠٠ مليون مفيش غيرها اللي عجباني مسيره يجي اليوم تكون ليا وتقول ماشي ..|
بوريه لميار بتبتسم وبتقول:
_قولي ماشي بقى وخلصينا
_انا مش فاهمه حماسك ده عايزكي تفهمي إن أنا وهو متفتفتين من جوانا
_صلحه بعض يا حبيبتي ويلا قومي البسي الدريس ده
بتقولها وبتديني دريس كافيه كان طالع تريند اللي هو فيه رباط من ورا ده
بلبسه وبقف اعمل الميكب وبحط مناكير وبلبس الهيلز
_كدا زي القمر مش هيقدر يقاوم اول ما يشوفك هيقولك أنا بحبك يا لقاء
_مش للدرجه يا اوڤر
_طب هتشوفي ، دلوقتي بقى هو عمل ليكي حاجات حلوه كتير تحبي تردي الحاجات الحلوه دي ي إيه؟
_مش عارفه إيه ممكن يتعمل ويفرح الراجل؟
_قوليله بحبك
_يا ميار مش بهزر
_انتي حاسه من جواكي عايزه تفرحيه ولا فاكس؟
_لا عايزه
_تمام ده دلوقتي نور الجميل اللي جابلك ماسكرا من الأصلي واللي حاول يفرحك كتير عايزه تردي ليه كل الحاجات الحلوه دي إزاي؟
_كنت بفكر اعمل بيكنك لطيف بس مفيش وقت
_ومفيش وقت ليه يا حبيبتي؟ فيه ونص تعالي معايا
_يا ميار اسمعي
_تعالي بس خلينا نلحق
بتقولها وبتاخدني وبننزل سوا بنجيب ميني تورته تكفي لفردين وشوية تسالي كوكيز ودونتس و شيبسي ومشروبات مش مقاطعه
وبنعدي على محل بيرفيوم بنشتري برفيوم بيعجبني ومعاه ساعه شيك وبنحطهم في شنطه شيك
وبنشتري مفرش مربعات احمر في ابيض وبنروح على اقرب حديقه
بنفرش الحاجه وبنرتبها سوا وبحس إنه هيفرح كل حاجه اتعملت بسرعه لكنها حلوه !
_طب وهجيبه هنا إزاي؟
_هيرن عليكي عشان ياخدك من الشغل ابعتيله اللوكيشن
_بجد خايفه اوي يا ميار
_مفيش خوف ولا حاجه حد يلاقي الحب الحقيقي ويضيعه يا عبيطه ؟
_مش عارفه اقولك يا ميار بجد ولا عارفه ارد ليكي اللي عملتيه ده إزاي
_انا عارفه .. بعد ما تتخطبي ليه إن شاء الله قوليلو يشوفلي الولا يوسف صاحبه
_انتي بتهزري صح؟
_والله أبدا خدت لفه في الاكونت عنده وحسيت إن يوسف ده هو العوض أنا خير ليه خلي بالك وهو مش مرتبط على فكره
_وكمان عرفتي حالته الاجتماعية
_مبضيعش وقت
_المحقق زومبا
بنضحك سوا وبنقعد ندردش شوية لحد ما بيرن يعرفني أنه جاي وببعت ليه اللوكيشن وميار بتمشي قبل ما بيجي
كنت متوتره مكسوفه خايفه وبشوفه بيدور عليا بعنيه لحد ما بيلاقيني بيبتسم وبيجي ناحيتي
_انهارده اخر يوم في عمري ولا إيه؟
_اخص عليك ليه بتقول كدا
_يمكن عشان كل الاماني هتتحقق انهارده
ببتسم بكسوف بيبص على كل الحاجات اللي على المفرش وبيقول:
_لحقتي تعملي كل ده؟
_شفت الشطاره؟
_لا شفت حلاوة عينيكي
ببتسم وبنقعد سوا كان بيحكيلي عن يومه وعن العقد الجديد اللي كان بيمضيه انهارده
_وبس كدا حبيت انهي اليوم بقى مع اكتر حد بحبه
مبعرفش ارد اقول إيه وبقول:
_كل سنه وانت طيب
بقولها وبطلع شنطة الهدايا بديهالو
_لا يا حلوه أنا هديتي قراية الفاتحه اجيلكم أنا والاسره الكريمه ونقراها كلنا سوا حفظاها؟
_نور بطل كلامك ده
_لا مش هبطل كلامي ده أنا عايزك وخلاص عرفت مشاعري وفهمتها
_عايزني إزاي يعني؟
_يعني عايزك في بيتي ارجع من الشغل الاقيكي عامله مكرونة بالبشاميل وهاخدك وننزل نتمشى بليل وهجبلك حاجات حلوه
_واخر الحياة الورديه دي إيه ؟
_لقاء متقنعنيش إن مفيش مشاعر من ناحيتك ليا ده باين في عينيكي
_ماشي يا نور فيه مشاعر بس انا خايفه اعذرني أنا اللي حصلي مش قليل
_عارف يا حبيبي وعشان كدا بقولك عايزين نكون سوا نصلح حياة بعض
_يابابا افهم مش يمكن المشاعر دي تحت تأثير الاحتياج عشان بس نموڤ اون؟
_ليه ياقلب بابا يا حته من كبدة بابا
بضحك من تعبيراته وييفضل باصص ليا بغرام وبيقول:
_بحب ضحكتك اوي بحسها بتفرحني
_وبعدين معاك؟
_وبعدين معاكي انتي
_طيب اديني فرصه افهم مشاعري ناحيتك إيه بالظبط أنا خايفه علينا صدقني
_ماشي يا لقاء هديكي الفرصة عشان ده حقك بس وحياتي عندك متظلميش قلب كل مناه يكون ليكي ومعاكي
ببتسم ليه وبقول:
_اطمن ويلا بقى مش هنطفي الشمع ولا إيه
بيبتسم ليا وبيولع الشمعه وبنغني سوا وبينفخ فيها
وبناكل سوا من التورته وباقي الحاجات اللي موجوده وبنرغي في اي حاجه لحد ما مره واحده النور بيقطع
ييشغل فلاش الموبايل الجو بيكون غرامي بشكل مبالغ فيه
بيبص ليا وبيقول:
_بتخافي من الضلمه؟
_لاء
_طب بتخافي مني؟
بيقولها وهو بيمد ليا إيديه ببتسم ليه وبحط إيديه في إيده وبقول:
_بردوا لأ
بنقوم نقف سوا وبيشغل اغنيه على موبايله وبنرقص في وسط الليل على ضوء الفلاش
||.. لو تطلب نجمه هجبهالك من حضن الليل هعملك كل اللي في بالك وده رد جميل للحب اللي انت ادتهولي وقوفك جنبي وانا بطولي هيشيلك شيل ..||
عارفين اكل الفراشات؟
أنا حسيت إني بغطس في بحر كله فراشات وشوية كمان وهطير وسط الصحاب
|..أنا عايزك ترتاح يا حبيبي ومتشيلش الهم أنا عايزك تعرف إن انت في حياتي اهم من الدم اللي بيجري في جسمي تستاهل بكرا تشيل اسمي أنا ليك يا حبيبي وطول عمري انا هفضل ليك..|
بنخلص رقصتنا ومبنتكلمش عنينا بتقول كل الكلام
ومخبيش عليكم أنا وقعت في حبه وقعت من الدور العشرين ههه بضحك عليكم وقعت من الدور العشروميه
بنخلص سهرتنا وبيوصلني للبيت
وبيمشي
بطلع بيتي وانا الفرحه مش سيعاني بدخل وانا بغني وبدندن
بدخل اوضتي بشوف نفسي في المرايا كنت عايزه هو كان شايفني إزاي
بمسك فرشة البلاشر وبغني كإني في مشهد سينمائي
|..أنا نفسي اطير فرحانه جدآ ودايبه وبغير حاسه بسعاده وده إحساس خطير مجنونه بيك نفسي افضل قصادك واقولك بحبك كتير..|
بخلص حالة جنون الفراشات اللي عندي وبغير هدومي وبرن على ميار احكيلها على اللي حصل
_وبس كدا وصلني للبيت بقى
_حلو جدآ اول ما يفتح معاكي الموضوع ده تاني تقوليله إنك موافقه بقى خلينا نفرح عايزه البس فستان
_كنت عايزه اقولو كنسل الفرصه اللي هفكر فيها ويلا تعالى كلم بابا بس الكاريزما منعتني
_بجد فرحانه بيكم اوي يا لولو أخيراً ربنا عوض صبرك خير ، متصورتوش؟
_لا اتصورنا استني هبعتلك واتس
_اتفقنا يلا
بقفل معاها وببعتلها الصور وبخرج اتعشى مع بابا وماما وبخلص وبعمل لنفسي آيس كوفي وبدخل اوضتي بمسك موبايلي وبلاقيه منزل استوري
كاتب فيه
قبلك حبيت
كُنت بفكر ان انا حبيت
بس قابلتك بعدها ولقيت
الحُب بشكل جديد خالص.
ببتسم وباخده اسكرين وبقفل موبايلي وبنام وبصحى في معاد شغلي بلبس وبجهز وبنزل للشغل
وبستغرب إن مفيش منه مسدچ ولا حتى ميار رنت عليا تشوفني اتأخرت ليه زي كل يوم
مش بهتم وبروح للشغل كان فيه حاجه غريبه أنا حاسه بيها بس مش فاهمها الشركة هاديه مفيش زحمه ولا دوشة !
بكمل وبطلع واول ما بفتح الباب بيشتغل فيديو على شاشه كبيره في وسط الحيطه
كان فيديو مجمع فيه كل صوري مع نور وفيديوهات عشؤيات لينا سوا على قصيدة عمرو حسن “كان لازم احبك”
شرفتي حياتي
ونورتي وحجزتي مكان ..
ودخلتي الدنيا وغيرتي في عيني الالوان ..
بالظبط اللي انا عاوزه لاقيته واحده تكون للواحد بيته .. وقابلني جنانك حبيته ودي مش شخصيتي ولا طباعي .. سميت ايامي بلا وجودك ايام متعاده وبلا داعي
حبيتك ليه وده برضه كلام
يانصيبي الحلو يافرحي الخام
وفي آخر الفيديو بيظهر فيديو ل نور وهو في بيتنا ومعاه أهله وبابا وماما موجودين وبيقراه الفاتحه
كان جوايا إحساس غريب معرفتش اعبر عنه غير بالدموع ولما لفيت لقيته واقف ومعاه بوكيه ورد وفي إيديه علبه فيها خاتم بيبتسم ليا وبيقول:
_انا خدت القرار عنك وقرارت إني هديني فرصه وهدواي جرحي بحنانك وكل حاجه موافقه على وجودي في حياتك حتى عيونك بتقول إنها موافقه
بهز راسي وانا عيوني مدمعه بمعنى موافقة وبمد ليه إيدي بيبلبسني الخاتم وكلهم بيسقفوا كل صحابي موجودين وبيصورونا
بيبتسم ليا وبيبوس راسي وبيقول:
_كان لازم احبك من ساعة ما قابلتك
بمسح دموعي وببص ليه بهيام وبقول:
_كنت فين من زمان يا نور؟
_كنت تايه بس خلاص لقيت عيونك
تمت ..
لقراءة الرواية كاملة اضغط على : (رواية حب من طرف قهوة)
