رواية النصيب الفصل العاشر 10 بقلم رحاب القاضي
رواية النصيب الجزء العاشر
رواية النصيب البارت العاشر
رواية النصيب الحلقة العاشرة
#النصيب
_الحلقه العاشره
ــــــــــــــــــــــــــــــــــــــــ
_الحياه قامت بدور القسوة كاملاً.. فلا تكن أنت مثلها يا عزيزي🙏
_بعد ما سمعت هاله كل الحكاية اللي قالتها شهد، مسكت ايديها بحزن وقالت..
هاله
وانتي بقي فاكره إني ممكن أنا كمان أشوفك بطريقة
مش كويسة عشان سيبتي بيت أهلك ومشيتي، بالعكس أنا شوفتك عملتي الصح حتي لما سيبتي الدكتور ابن أمه ده كمان انتي كده عملتي الصح..
شهد بدموع
بس أنا والله مش هتقل عليكم أنا همشي وهحاول ألاقي شغل واقعد في اي مكان..
هاله بأبتسامة بسيطة
الدنيا بره مش ساهله زي ما انتي فاكرة كده، انك تلاقي شغل وسكن بسهولة، انتي شوفتى حاجات بسيطة من واقع عيشاه بلدنا من الشباب اللي عقولها اتدمرت بسبب الادمان والحاجات الممنوعة اللي منتشرة وسط الناس، كل مكان ما بقاش امان وانك تمشي وتلاقي الناس تقف جنبك بره وتساعدك صعب، واحد في الميه اللي ممكن يساعدوكي إنما الباقي بيجي علي الضعيف ما حدش بقي بيقدر وجع وحزن حد يا شهد..
شهد بدموع وخوف
طيب أنا أعمل ايه دلوقتي ارجع تاني لاهلي وأتحمل اللي يعملوه فيا حتي لو هيرجعوني غصب عني لسعيد..
هاله بهدوء
لا لو رجعتي الله واعلم هيحصل فيكي ايه، انتي هتفضلي هنا لحد ما نتصرف ونحاول احنا نحل الموضوع مع أهلك، فؤاد جوزي يقدر يساعدك ويحل المشاكل اللي بينك وبين اهلك..
شهد بقلق
طيب انتو هتعملو معايا كده ليه؟..
هاله بهدوء
عشان نساعدك عشان لو اتحطينا في موقف صعب نلاقي احنا كمان اللي يساعدنا، هما مش بيقولو الدنيا دي خد وهاات…
شهد بقلق
طيب وأخوكي يعني انا مش هقدر اقعد معاه في مكان واحد بعد اللي حصل الصبح ده…
هاله
بصي انا هخليكي تقعدي مع داده صباح وتالا في البيت الصغير اللي هناك ده، علي فكره دي كانت مضيفة زمان بابا بيقابل فيها ضيوفه بس عشان ابعد تالا عن اخويا خليتها تقعد هي وصباح هنا..
بصت شهد للشغاله اللي شكلها حلو جدا وقالت
هي البنت دي مش مصريه صح؟..
ردت عليها هاله وقالت
ايطاليه بنت الشغاله القديمه اللي كانت عندنا مامتها مصريه اسمها يوستينا وباباها ايطالي بس انا بحبها جدا، اسر عشان يستفزني حاول يدايقها كتير قبل كده فقررت اعمل المضيفة دي نظام اوض واخليها ليهم، وانتي هتقعدي معاهم..
وقامت هاله وقالت
تعالي بقي اوريكي الاوضة اللي هتقعدي فيها، علي فكره انا مبسوطة اووي انك هتقعدي معايا تعرفي ان دي اول مرة اتكلم مع حد غير فؤاد في حاجه مديقاني وافتح قلبي وافضفض كده..
شهد
هو حضرتك ما عندكيش صحاب؟.
هاله بحزن وهي ماشيه جنبيها
لا للأسف انا عضو في جمعية حقوق المرأه ورئيسة جمعية كوني قوية في النادي، فاللي بتحاول تصاحبني بتكون حاطة عينها علي منصب معين ليها مصلحة، حاجه زي كده..
تابعت بتذكر
استني صح انا ممكن اعرض مشكلتك دي في الجمعية وهتلاقي اللي يساعدك بجد.، بس انا من رأيي نستني نشوف فؤاد هيعرف يصلح الوضع بينك وبين اهلك ولا لا..
شهد
ان شاء الله خير..
_ودخلو البيت الصغير اللي قالت عليه هاله وكان مترتب ومنظم بشكل حلو اووي، وقالتلها هاله وهي بتفتح باب اوضه مقفوله..
هاله
دي هتبقي اوضتك هخلي تالا تروقهالك مؤقتاً وتقعدي فيها لحد ما نشوف هنعمل ايه، والشباك ده هتشوفي منه الفيلا والجنينه كلها عشان ما تخافيش يعني..
شهد
لا كده تمام اووي بجد شكراً جداً..
_ وسابتها هاله وخرجت وجات فعلا تالا وروقتلها الاوضه وبصتلها بسخريه وقالت..
تالا
لو فاكره انك كده بعيد عنه تبقي غلطانة..
شهد بعدم فهم
قصدك ايه؟..
تالا بنبره حزينه
مسيرك تعرفي، الاوضه متروقة اهي وده المفتاح بتاعها انا هروح اشوف شغلي..
_ وبالليل كانت شهد قاعده في اوضتها ساكتة وبتفكر في كل اللي بيحصل ومش عارفه تاخد اي قرار، حتي المكان هنا مخوفها برغم كل الامان اللي بتحس بيه من كلام هاله، الا انها لسه خايفه منه وجداً كمان..
_وفجأه الباب بتاع اوضتها خبط فقامت بسرعه مفزوعه وقالت بنبره مهزوزه..
شهد
مين؟..
ردت عليها صباح وقالت
انا صباح يا شهد تعالي عشان هاله هانم وفؤاد بيه عايزينك..
خافت شهد اكتر ليخلوها تمشي في الوقت ده ولبست حجابها بصعوبه بسبب ايدها اللي لسه مش قادره تحركها، وطلعت مع صباح وراحو الفيلا وكان قاعد فؤاد وهاله وهما بيشربو شاي ومشغالين التلفزيون قدامهم علي قنوات الاخبار وقالت صباح بهدوء..
صباح
شهد اهي يا ست هانم..
رد عليها فؤاد وقال
طيب روحي انتي يا صباح، وانتي يا شهد تعالي اقعدي..
مشيت صباح وراحت شهد قعدت جنب هاله وقالت
نعم..
هاله
ما تخافيش يا بنتي الموضوع بسيط..
فؤاد
لا هو مش بسبط. يا شهد، انا هاله الصبح قالتلي علي كل حاجه حصلت معاكي فانا بعت حد من رجالتي عشان يجيب باباكي واتكلم معاه بس اا..
شهد بقلق
بس ايه ماله بابا، اهلي كويسين يا أستاذ فؤاد؟..
فؤاد
هما كويسين بس اللي وصلني ان أبوكي قايل إنك ميته وكمان راح البلد وأخد عزاكي..
نزلت دموع شهد وقالت
مستحيل اكيد في حاجه غلط في الموضوع..
فؤاد
لا يا شهد هو ده اللي حصل وانتي مش هينفع ترجعي لأنهم أكيد مش هيخلوكي عايشة، فانتي عندنا هنا في أمان لفترة الموضوع بس يبقي قديم وهاله هتساعدك هي والجمعية بتاعتها انك تبدأي من جديد…
مسكت هاله ايدها وقالت
مش عايزاكي تخافي خالص انا وفؤاد معاكي وهنساعدك، وانتي اهو قاعده معانا وما فيش حاجه حصلت…
فؤاد
روحي ارتاحي يا شهد وما تخافيش من حاجه خالص احنا معاكي وهنساعدك وهنا ما حدش هيقدر يأذيكي…
_سابتهم شهد ورجعت تاني للاوضه اللي كانت قاعده فيها وهي بتحاول تستوعب كلام فؤاد، وان اهلها خلاص اعتبروها ميته ومش موجوده..
ــــــــــ #بقلم_الكاتبه_رحاب_القاضي ــــــــ
_وعدي كام يوم وشهد كانت لسه قاعدة في بيت الفيومي، وما بتخرجش من اوضتها خالص، وفي اليوم ده دخلت عندها هاله وقالت..
هاله
بقي كده ابعتلك عشان تقعدي معايا وتقولي انك تعبانه..
قعدت شهد علي السرير وقالت بدموع
انا اسفه بس بجد تعبانه شويه..
هاله
حاولي تنسي يا شهد ما تفكريش غير في اللي جاي عشان تقدري تكملي وانتي قوية، ما فيش حد. مسك في الماضي والحاجات اللي وجعته واتقدم..
شهد
ان شاء الله خير..
هاله
طيب امسكي بقي الحاجات دي، كام بيجامه علي ديرس هما من بتوعي ممكن يبقو واسعين عليكي شويه عشان انتي اقصر وارفع مني بس مشي بيهم حالك لحد ما الفتره دي تعدي.
شهد بأحراج
مالوش لزوم بجد انا تمام كده..
هاله
لا ليه لأني هطلب منك خدمه صغيره وانتي هتنفذيها.
شهد
خير انا تحت امرك..
هاله
تيام ابني اجازه الفتره دي وانا عندي شوية شغل ومش هقدر اكون معاه في البيت النهار كله فأيه رأيك تقعدي معاه لحد ما أرجع وعلي فكره ده. مش شغل ولا هديكي فلوس ولا حاجه ده. انا هجيب اختي تقعد مع ابني..
ابتسمت شهد وقالتلها
حضرتك طيبه اووي علي فكره…
هاله بهدوء
وانتي تستاهلي كل خير يا شهد ، ها موافقة ولا ايه؟..
شهد
طبعا موافقه..
هاله
يبقي ارتاحي النهارده وبكره الصبح تصحي بدري وتيجي تقعدي معاه هو عنده 9 سنين وهادي جدا مش هيتعبك..
شهد
حاضر..
_وبعد نص الليل طلعت شهد من الحمام اللي في البيت اللي قاعده فيه وهي لابسه بجامه واسعه جداً من بتوع هاله وكان لونها ازرق لايق جدا علي بشرتها ولما شافتها صباح قالت..
صباح
الحمد لله يا شهد وشك خف شويه اهو..
تالا
هو انتي ايه اللي عمل فيكي كده؟..
سكتت شهد وما ردتش عليها فقالت تالا بغيظ
ما تردي ولا القطة اكلت لسانك دلوقتي؟..
شهد بهدوء
هو انتي ازاي ايطالية وبتتكلمي عربي وبلهجه مصرية كمان..
قامت تالا وقالت بحده
وانتي مالك؟..
شهد. ببرود
وده برضو نفس ردي علي سؤالك..
_اتعصبت تالا وسابتهم ودخلت اوضتها وضحكت صباح بصوت عالي وقالت..
صباح
هههههههه جدعة ما تخليش حد يقولك كلمة مش عايزها وتسكتي خدي حقك في وقتها…
شهد بجمود
ما بقاش ينفع اسكت اصلا، انا هدخل انام عشان هصحي الصبح بدري مع تيام ابن مدام هاله..
صباح
ماشي يا بنتي وانا كمان هدخل انام عشان شغلي، تصبحي علي خير…
_سابتهم شهد ودخلت اوضتها وسرحت شعرها الطويل وسابته مفرود وراحت وقفت عند الشباك واتملت عيونها دموع وهي بتفكر في اخواتها واهلها، وفجأه اتنفضت بخوف اول ما سمعت صوت حاجه بتتكسر وعملت صوت عالي، وبصت لمصدر الصوت ولقيت ان في كوبايه مكسوره وبصت تلقايياً لفوق لقيت اسر واقف في بلكونة اوضته ومولع سيجارته كالعاده وبيبصلها بخبث، واول ما بصتله غمزلها بطريقة مشاغبة، فدخلت بسرعه وقغلت الشباك وراحت قعدت علي السرير واتنهدت بضيق وقالت…
شهد
كنت ناقصه ده كمان انا..
_وراحت نامت علي طول، وتاني يوم بعد ما راحت هاله شغلها راحت شهد قعدت مع تيام ابنها وماسكين ورق الرسم بتاعه وشهد قالتله بهدوء..
شهد
ها يا تيام هنعمل الفراشه لونها ايه؟..
تيام
اصفر ولا احمر..
شهد
انت عايزها ايه يا ابني ما تحيرنيش..
تيام
امم اخضر زي عيونك..
ضحكت شهد وقالتله
انت بتعاكسني يا ولد انت ولا ايه؟..
قال اسر في الوقت ده وهو نازل علي السلم
طالع لخالو بالظبط..
_بصتله شهد لقيته نازل وهو بيقغل في زراير قميصه فقعدت علي الكنبة بطريقة كويسة جنب تيام، وهو نزل وقعد قدامها علي الكنبة وطلع سيجارة وولعها بكل هدوء وعيونه ما نزلتش من عليها..
تيام
ها يا شهد هنعمل الفراشه لونها ايه؟…
شهد بتوتر من نظرات اسر ليها
تعالي نكمل رسم في الجنينه بره..
تيام
ماشي يلاا بينا..
واول ما قامت قال اسر بجمود
عايز قهوة يا شهد..
ردت عليه من غير ما تبصله
تالا والست صباح جوه في المطبخ..
رد عليها بنفس طريقته وقال
وانا طلبتها منك انتي مش من تالا ولا من داده صباح..
شهد بضيق
خليك هنا يا تياام وانا دقيقه وجايه..
_ ودخلت شهد المطبخ عشان تعمل قهوه لأسر تجنباً لاي مشكله او حتي نقااش معاه..
صباح
عايزه ايه يا شهد وانا اعملهولك..
شهد بضيق
مش انا اللي عايزه ده الاستاذ أسر عايز قهوه..
قالت تالا بسرعه
خلاص انا هعملها واطلعهاله شوفي انتي هتروحي فين؟..
شهد
لا انا هطلعها يعني هو طلبها مني وانا مش عايزه اعمل مشكله معاه..
بصتلها تالا بغيظ وصباح قالت
خلاص يا تالا كملي اللي بتعمليه وانا هعمل القهوة وشهد تطلعها وخلينا احنا في تجهيز الغدا..
_ما ردتش عليها تالا وكانت عماله تبص لشهد بغيظ وحقد وشهد كانت متجاهله النظر ليها خالص، وبعد شويه اخدت شهد القهوة وطلعت بره ولقيت أسر قاعد لوحده فسألته..
شهد
هو فين تيام؟..
قام وقف قدامها وقال بخبث
طلع يلعب في الجنينه هاتي القهوة بقي..
مدتله القهوه وهي بتحاول تداري خوفها وقلقها منه، بس هو صدمها لما دلق القهوه علي ايدها السليمه فبعدت عنه بسرعه وهي بتبص لايدها بألم وقالت..
شهد بدموع
حرام عليك انت ايه اللي عملته ده؟..
قرب منها اكتر وقال
قاصد اعمل كده عشام لما اعمل كده. ما تمنعنيش..
قال كلامه وبحركة سريعة منه شال الحجاب من علي شعرها ورماه علي الارض، وهي شهقت بخوف وجات تبعد من قدامه بس مسكها من دراعها جامد وقربها منه بطريقه مش كويسه وقال بخبث..
أسر
اهدي ما تخافيش مش هاكلك..
شهد بحده وجسمها كله بقي يتنفض بخوف
ابعد عني والا هصوت والم عليك كل اللي هنا..
ضحك بخبث وقالها
كل اللي هنا شغالين عندي حتي انتي، وما حدش يقدر يمنعني من حاجه عايزها..
نزلت دموعها بخوف وقالتله
انت عايز مني ايه؟..
بص لدموعها بهدوء وقال
انتي عايزه ايه؟..
قبل ما ترد عليه جات هاله من بره في الوقت ده ولما شافته قريب من شهد بالشكل ده زعقت فيه وقالتله..
هاله
أسر…
_بصلها أسر بضيق وساب شهد وبعد عنها وطلع اوضته تاني، وشهد بصت لايدها المحروقه وفضلت تعيط بأنهيار وخوف شديد، قربت منها هاله بسرعه وقالت..
هاله
انا أسفه والله ما كنت اعرف أنه هيصحي قبل ما اجي اصلا..
شهد ببكاء
انا همشي ولو سمحتي ما تمنعنيش، انا مش هينفع اقعد هنا لأن اخوكي زيه زي اللي في الشارع..
هاله بحزن
طيب هتمشي تروحي فين دلوقتي بس؟..
شهد ببكاء
بيت اهلي واللي يحصل يحصل بقي، وجودي عندهم من هناك ما فرقش كتير…
_ وسابتها ومشبت وهاله قعدت مدايقة جداً، وطلعت عندها صباح وقالت..
صباح
حمدلله علي السلامه يا هانم..
هاله بحده
هو انا مش قولتلك يا صباح تخلي بالك من شهد طول ما أسر في البيت..
صباح بقلق
ما هو انا كنت في المطبخ وشهد جات وعملتله قهوة وما حصلش حاجه..
هاله
لا حصل ودايقها وهي عايزه تمشي..
صباح
لامؤخذه يا ست هانم ما تسبيها تمشي، انتي ساعدتيها كتير كفاية بقي..
دخل في الوقت ده تيام وقال بدموع
ماما مالها شهد انا روحتلها عشان نكمل رسم ما رضيتش تيجي معايا وبتعيط..
ردت عليه صباح وقالت
معلش يا حبيبي بس ماما هتجيبلك واحدة غيرها تقعد معاك وترسمو وتلعبو وتعمل كل حاجه..
هاله بضيق
لا مش هجيب غيرها وشهد مش هتمشي هو انا مش هعرف امشي كلامي عليكم ولا ايه، خلي تيام معاكي لحد ما اجي..
_ وسابتهم وطلعت فوق لأوضة أسر اللي كان واقف في البلكونة بتاعت اوضته وبيبص لاوضة شهد بجمود، وقفت هاله وراه وقالتله بحده..
هاله
انت ليه بتعمل كده دي ما كانتش أخلاقك؟..
بصلها أسر وقال بهدوء
ايه السؤال الغريب ده؟..
هاله
شهد مش زي اي بنت شوفتها، دي لسه بريئه عندها 18 سنه واهلها طلعو عينها تخيل هما بيقولو عليها ميته دلوقتي..
قعد أسر علي سريره وقال
الله يرحمها نعم؟..
هاله بحده
ما تهزرش يا أسر البنت محتاجة حد يساعدها اللي انت بتعمله ده ما ينفعش اصلا، سيبها في حالها مالكش دعوة بيها..
أسر
انتي عايزه ايه يا هاله؟..
هاله
بطل تستغبي انت فاهم انا عايزه، ابعد عن شهد سيب البنت في حالها اليومين دول لحد ما اظبطلها حياة كويسة بره البيت ده..
أسر بفضول
هي مين البنت دي اصلاً، انتي تعرفي عنها ايه؟..
هاله
انا وفؤاد عرفنا عنها كل حاجه وفعلا محتاجة للمساعدة ومالهاش حد دلوقتي غيرنا، فطلعها من دماغك..
أسر
حصلها ايه يعني؟..
هاله بحده
وانت مالك انت خليك بعيد عنها وبطل تدايقها وبس..
أسر
اممم وبعدين؟..
هاله
تعتذرلها قدامي وتقولها انك مش هتدايقها تاني عشان خاطري انا موافق..
ابتسم بخبث وقال
موافق يا قلب اخوكي..
هاله بسعاده
اقسم بالله انا ديماً بقول عنك جدع ولسه فيك حته نضيفه..
وقف أسر قدامها وقال
عايز 100 الف جنيه امشي بيهم الشهر ده لحد ما جوزك يعطف عليا ويديني مصروف الشهر الجاي..
هاله بغيظ
انت حقيقي واطي واستغلالي انت اا..
أسر ببرود. قاطعها وقال
هاله حبيبتي خلاصة الكلام هتديني الفلوس هروح اعتذرلها واقنعها تقعد كمان، مش هتديني الفلوس ما تزعليش من اللي هعمله..
هاله وهي علي وشك البكاء
انت ليه بتعمل فيا كده هو مش انا اختك ده انت حتي الخير مش مخليني اعملو..
أسر
اخلصي يا هاله هااا قررتي ايه؟..
هاله بضيق
موافقه بس ما تجيبش سيره لفؤاد والا كده هتبقي بتخرب عليا كمان..
أسر بمرح
اطلقي منه وانا اجوزك سيد سيده…
ضربته بالمخده وقالت
انا جوزي سيد الرجالة ولم نفسك، وتعالي معايا يلا وتتكلم بأدب وبذوق مع البنت فاهم..
أسر
مين هي البنت اللي شاغلة دماغك دي اوووي؟..
هاله بحده
أسر احنا اتفقنا الله..
أسر وهو يتصنع الخوف
خلاص يا حجه خلااااص..
_ ونزل أسر معاها وكانت شهد غيرت هدومها ولبست الهدوم بتاعتها القديمه ولما دخلت عندها هاله قالتلها شهد بدموع..
شهد
كويس وحضرتك جيتي انا عايزه الاوراق بتاعتي اللي حضرتك اخدتيها عشان خلاص همشي..
هاله
مش هتمشي يا شهد واللي حصل مش هيتكرر تاني..
شهد ببكاء
لا هيتكرر لأن حضرتك قولتيلي كده المرة اللي فاتت وبرضو اتكرر..
هاله
طيب ممكن تهدي وتيجي معايا بره عشان خاطري ده لو ليا خاطر عندك…
_ سمعت شهد كلامها وطلعت معاها بره ولما شافت أسر قاعد علي الكنبه وحاطط رجل علي رجل اتنفضت بخوف وتلقائياً مسكت في هاله اللي قالتلها..
هاله
ما تخافيش يا حبيبتي هو جاي يعتذرلك ويقولك انه مش هيعمل كده تاني ولا ايه يا أسر..
رد عليها أسر وقال
انا اسف مش هدايقك تاني وما تمشيش عشان هاله هتزعل لو مشيتي..
ما بصتلوش اصلا شهد وما ردتش عليه فقال بحده
بكلمك انا يا سكر..
هاله
خلاص بقي يا أسر انا هتكلم معاها..
أسر
طيب هاتي الفلوس بقي مش عملتلك اللي عايزااه..
هاله بغيظ
الله يفضحك اتنيل غور وهحطهم في حسابك..
أسر
طيب بسرعة عشان عايزهم ضروري..
قال كلامه وطلع وشهد قالتلها بسخريه
انتي دفعتيله فلوس عشان يتأسفلي مش كده؟.
هاله بتوتر
لا لا ده اخويا وعادي بياخد مني فلوس، المهم اهدي وما تحطيش في دماغك اللي حصل ده خالص ويلا تعالي عشان تقعدي مع تيام، وكمان انا كنت جايه بدري عشان عندي ليكي خبر حلو اووي..
شهد بحماس
قابلتو اهلي وابويا هيسامحني مش كده؟..
هاله بحزن
ان شاء الله يا شهد قريب، بس مش ده الخبر انا اخدت الورق بتاعك وقدمته للجمعية وهما قبلو يساعدوكي وهيدخلوكي جامعة خاصة بمنحة كمان..
شهد بعدم تصديق
جامعة ايه انا مش فاهمه انا دبلوم تجاره ازاي يعني ادخل الجامعة..
هاله
بصي هي مش جامعة اووي ده معهد علوم ادارية خاص بيبقبل من الدبلوم بتاعك ده، وانتي جايبة فيه مجموع كبير جدا واحنا في الجمعية تواصلنا معاهم انهم يضفوكي في المنحة بتاعت السنه دي وكان كل همنا انك تكملي تعليمك بطريقه صح وهما وافقو..
ابتسمت شهد بسعاده وقالتلها
والله انا حاسه نفسي بحلم، يعني اليوم اللي شوفت حضرتك فيه انا قبل ما الكلب بتاع اخوكي يهجم عليا كنت خلاص شوفت كل حاجه اتقفلت في وشي ولما دخلت المستشفي برضو بس طلع ترتيب ربنا احسن بكتير من اللي كنت متخيلاه..
هاله بهدوء
انتي طيبه وتستاهلي كل خير، انا بشوفك وانتي بتصلي علي الكرسي برغم تعبك وكمان وانتي بتبقي ماسكة المصحف وبتقرأي فيه، تعرفي ان ما فيش حد في عيلتي بيصلي بعد ماما الله يرحمها، وعايزاكي تعلمي ابني الصلاه وانا ان شاء الله افضي وانتظم بس انا حابه وجودك هنا ومش عايزاكي تمشي حتي لو لفتره قليلة لحد. ما اجيبلك سكن وشغل زي ما طلبتي بس عايزاكي تحت عيني ممكن..
شهد بهدوء
حاضر يا مدام هاله، انا هروح اشوف تيام بقي بعد اذنك…
هاله
يلا بينا انا كمان طالعه معاكي..
_وبالليل كان قاعد فؤاد هو وهاله بيتعشو وفؤاد قالها بضيق.
فؤاد
هو انتي سحبتي 100 الف من حسابك ليه النهارده؟.
هاله بتوتر
ااا كنت عايزه اجيب شوية حاجات ضروري ومش هسحب تاني الشهر كله..
فؤاد بجمود
دي فلوسك يا هاله انا مش بحاسبك علي حاجه، بس لما تاخديهم وتديهم لأسر يبقي ازعل..
هاله بتوتر
حقك عليا يا فؤاد بس المره دي كنت موتره اعمل كده..
فؤاد بضيق
ما ابقاش انا بلم من ناحيه وانتي تخربيها من ناحية تانية يا هاله، اخوكي كان يومين تلاته وغصب عنه هيجي يشتغل معايا، انما لما اخد الفلوس دقني اهي لو شوفت وشه..
هاله
قولتلك غصب عني عملت كده، ومش هتتكرر تاني..
فؤاد
فين تيام؟..
هاله
صمم انه يتعشي مع شهد..
فؤاد
قولتيلها علي موضوع انها تكمل دراستها؟..
هاله
ايوه بس قولتلها ان الجمعية اللي هتعمل كده مش احنا عشان خوفت ترفض بصراحه وانا نفسي اساعدها..
ابتسم فؤاد بهدوء وقال
ده يبختها انها وقعت في طريقك…
ــــــــــ #بقلم_الكاتبه_رحاب_القاضي ــــــــ
_وفي بيت اهل سعيد وبالأخص في شقة اخوه محمد، كان قاعد هو ومراته قدام التلفزيون وقالتله..
نعمه
بقولك ايه يا محمد هو اخوك هيفضل كده عاذب علي طول بعد بت صابر اللي طفشت..
محمد بضيق
مش عارف انا حاولت اصلح الوضع بينهم وارجعله مراته بس هو عيل اووي واحسنله يقعد كده..
نعمه
لا لا الكلام ده ما يرضيش ربنا وبعدين هو برضو راجل ولسه في عز شبابه ولا انت عايز تسيبه كده وفي الاخر يطلعلنا بمصيبة ويفضحنا واحنا عندنا عيال وسمعتهم من سمعة عمهم..
محمد اتنهد بضيق وقال
طيب اعمل ايه يا نعمه بس امي وعايزه تقعده جنبيها وتتحكم فيه وهو خايف يقولها لا يبقي الحل ايه؟..
نعمه
الحل عند نسمه اختي..
محمد بسخريه
طيب ما احنا قولنا من الأول ان نسمه تبقي لسعيد وزيتنا يبقي في دقيقنا انتي رفضتي وقولتي مش هجيب اختي عند امك..
نعمه
ده كان الاول لما كان اخوك يشتغل يوم وينام عشرة انما لما ربنا كرمه لا ده بقي راجل ملوي هدومه واذا كان علي امك فانا اختي قدها وقدود..
محمد
طيب علي بركة الله انا هبقي اكلم الواد سعيد واخده ونروح لابوكي ونفتح معاه الموضوع..
نعمه بابتسامه واسعه
ربنا يتمم بخير يارب..
_تفتكرو اللي حصل في شهد هيتكرر تاني مع نسمه ولا هتيجي اللي لا هترحم سعيد ولا امه وهتاخد بحق شهد؟..
ــــــــــ #بقلم_الكاتبه_رحاب_القاضي ــــــــ
_وعند اكرم عامل الديلفري…
وصلت هناك رحمه صاحبة شهد علي السطوح ووقفت وهي بتاخد نفسها بالعافيه وشافت كوثر قاعده بتخيط في هدوم..
رحمه
سلام عليكم يا حجه؟..
كوثر
انتي مين؟..
رحمه.
انا رحمه صاحبة شهد اللي قاعده عندكم هنا..
كوثر
ااه طيب تعالي اقعدي جنبي..
راحت رحمه قعدت جنبيها وقالت
هي فين شهد؟..
كوثر
انتي لسه فاكره تسألي عليها دلوقتي، قوليلي المهم ايه رئيك في البلوزه دي لصلاح..
رحمه
صلاح ايه ومسي ايه دلوقتي فين البت يا حجه الله يسترك..
جه اكرم في الوقت ده ولما شاف رحمه قال
نعم انتي مين؟..
رحمه
انا رحمه صاحبة شهد، هي كلمتني وقالتلي اجيلها هنا..
اكرم بسخريه
والله وانتي لسه فتكره تيجيلها دلوقتي؟..
رحمه
جرا ايه يا جماعة هو انتو ما تعرفوش حاجة اسمها ظروف، اكيد كنت هجيلها لولا ان حصلت معايا ظروف منعتني..
اكرم
طيب اتفضلي من هنا عشان صحبتك مشيت لما انتي ما جيتيش تاخديها..
رحمه بحده
جرا ايه يا اسطا ما تبلع ريقك كده وتتكلم كويس هو انا جايه اشحت منك…
اكرم
هو انتي مش جايه تسألي علي صحبتك وانا قولتلك مش موجودة يبقي اتفضلي بقي من هنا..
رحمه بقلق
طيب ما تعرفش هي راحت فين البنت دي غلبانة ومالهاش حد وابوها حالف لو لقاها هيقتلها..
كوثر بحزن
يا قلبي يا بنتي، اكرم اتصرف انت لازم تلاقي البت عشان انت اللي خليتها تمشي بالليل وانت السبب لو كانت حصلتلها حاجه..
مسكته رحمه من هدومه وقالت بغضب
انت عملت ايه في البت يالاااااا..
اكرم بقلق
يا حجه اوعي انا هفهمك انا مش عايز مشاكل فخوفت بصراحه وطلبت منها تمشي..
رحمه بحده
طيب اتفضل قدامي نسأل عليها..
اكرم
ما تسألي عليها لوحدك وانا مالي؟..
رحمه
مالك علي جنابك اتنيل قدامي كان فيها ايه لو سيبتها هنا يومين تلاته يلااااااااا..
كوثر
روح معاها يا اكرم اسأل الناس تحت اخر مره شافوها تحت راحت فين وكده..
اكرم بغيظ
ماشي يا كوثر كله بسببك اصلا..
وبص لرحمه وقال
اتفضلي يا مدام قدامي..
رحمه بحده
انسه يا عديم النظر..
_تفتكرو هيوصلو لشهد ولا لا؟
ــــــــــ #بقلم_الكاتبه_رحاب_القاضي ــــــــ
_وبالليل في الفيلا بتاعت الفيومي، نزلت شهد من اوضة تيام اللي كان مصمم انها تنام جنبه وبعد ما نام سابته ونزلت، وكانت هتمشي تروح البيت اللي قاعده فيه مع تالا وصباح، بس رجعت ودخلت المطبخ وطلعت لبن من التلاجه وموز وبدأت تعمل مشروبها المفضل “الموز باللبن’❤🫰
وبعد ما عملته وقفت وكانت بتشرف فيه وهي بتتفرج علي الجنينة من الشباك وفي الوقت ده دخل أسر المطبخ عشان يتعشي ولما شافها واقفه ومدياه ضهرها ابتسم بخبث وقال..
أسر
انتي اللي بتظهري قدامي اهو مش انا اللي بجيلك..
اتنفضت بخوف وبصتله بسرعه وهو ضحك وقال
هههه هو انا بخوف اووي كده؟..
حطت الكوبايه علي الترابيزه قدامها وقالت
انا كنت طالعة من هنا اصلا..
_وجات فعلا تمشي من قدامه بس رجهت بسرعه واتخبت ورااه اول ما شافت الكلب اللي هجم عليها داخل المطبخ…
شهد بخوف
الكلب.. الكلب جه تاني هنا…
أسر بقلق
اهدي اهداالي دي توتا..
شهد بخوف شديد
ده الكلب اللي عضني..
ابتسم أسر غصب عنه وقال
لا دي. كلبه انثي بتاعتي وعلي فكره هي مش وحشه بس انتي اللي خوفتهيا المره اللي فاتت عشان كده هجمت عليكي..
وبص للكلبه اللي واقفه عند الباب وقال
تعالي يا توتا سلمي علي شهد ضيفتنا الجديده..
شهد بخوف
لا لا انت امسكها بس عشان اعدي..
أسر بهدوء
لا انا كده. هزعل خايفه مني وكمان خايفه من توتا صحبتي…
شهد بغيظ
ما انا لو كنت شوفت منك ومن صاحبتك خير ما كنتش هخاف منكم..
_وبسرعه طلعت من عندهم وهو بصلها بهدوء وبعدين قال للكلبه بكل برود..
أسر
كده. يا توتا زعلتيها مننا….
_وقام بعدين مسك كوباية العصير بتاعتها واخد عصير تاني من اللي هي عملته ووقف عند الشباك متابعها وهي ماشيه وبعدين دخلت البيت اللي هتبات فيه وابتسم بخبث، وشرب باقي العصير وبعدين طلع اوضته..
ـ وتاني يوم الصبح صحي بدري علي صوت المنبه لكن كان الصوت الاقوي صوت ضحك ابن اخته اللي جاي من الجنينة، فقام وراح بص من البلكونة ولقي شهد بتلعب معاه بالكوره، ابتسم تلقائياً لضحكتها اللي اول مره يشوفها، وبعدين رجع اوضته واخد شاور وغير هدومه ونزل تحت قعد مع فؤاد وهاله علي السفره وقال بهدوء..
أسر
هو انا اعمل ايه عشان اخد ورثي؟..
بصو هاله وفؤاد لبعض بتوتر وقالت
انت تقصد ايه بسؤالك ده؟..
أسر
سؤالي واضح يا هاله انتو عايزيني اعمل ايه عشان اخد حقي..
فؤاد بهدوء
ولا حاجه غير انك تبقي بني ادم..
أسر بغيظ
هو انت شايفني ايه يعني ما انا زيي زيك اهو..
هاله
اتكلم مع فؤاد كويس يا أسر هو كل همه مصلحتك..
أسر بحده
ما تشوفي هو بيتكلم ازاي معايا وكأني بشحت منه، مع ان اللي بطلبه ده حقي..
فؤاد ساب الاكل وبصله بهدوء وقال
لو عايز ورثك يبقي تسمع كلامي اول حاجه سهر بره البيت لا، انك تشارك في اي سباق غير قانوني لا، مش همنعك تعمل الحاجه اللي بتحبها بس يبقي بشكل كويس ومنظم، والمهم كل يوم تيجي معاية الشغل وتشتغل مش تقعد وخلاص وتعرف فلوسك انت واختك جايه منين ورايحه فين..
أسر
يعني انت معترف انها فلوسي انا واختي وانت مالكش فيها وواخده مننا بلطجه..
هاله بحده
أسر احترم نفسك..
فؤاد
انا ما انكرتش ابداً انها فلوسكم وانا طول عمري شغال عندكم يا أسر، بس انا اللي بعمله دلوقتي هي اني بنفذ وصية عمي..
أسر بجمود
تمام وانا موافق..
ابتسمت هاله وقالت
انت بتتكلم جد يا أسر؟!…
فؤاد
استني يا هاله، في حاجه تاني يا أستاذ أسر..
أسر ببرود
خير؟..
فؤاد بجمود
هتتجوز هجيبلك عروسة بنت نااس ومحترمة واختك معاك تعمل فترة خطوبه الاول وتلتزم بأتفاقك مع الناس اللي هنتقدم ليهم..
هاله
لا يا فؤاد افرض ما عجبتوش العروسة هنجوزه غصب عنه..
فؤاد
اهو معاكي اختاري ليه العروسة اللي تعجبه وانتي ما فيش اكتر من معارفك وكلهم بنات ناس ومن عائلات محترمه..
بصله أسر بخبث وقال
مدام عايزني اتجوز يبقي انا اختار البنت اللي عايز اتجوزها من غير انت ومراتك ما تنقولي..
فؤاد بسخريه
وانت بقي هتتجوز مين رقاصة ولا بنت ليل ما هي دي الأشكال اللي انت تعرفها..
_بص أسر للشباك اللي ورا فؤاد وباينه من خلاله شهد وهي بتلعب مع تيام وقال ببرود لفؤاد..
أسر
هتجوز اللي ورااك دي..
بص فؤاد وهاله لشهد بصدمه وفؤاد قاله بعصبيه
انت بتتمهزأ بينا يعني ولا ايه؟..
_تفتكرو بقي هيحصل ايه؟..
ــــــــــــــــــــــــــــــــــــــــــــــــــــــــ
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية النصيب)
