رواية الأميرة والمغترب الفصل الثمانون 80 بقلم آلاء اسماعيل البشري
رواية الأميرة والمغترب الجزء الثمانون
رواية الأميرة والمغترب البارت الثمانون
رواية الأميرة والمغترب الحلقة الثمانون
هز المعلم سيد رأسه بإستسلام بينما يغادر بدر بثقة لكنه فجأة تذكر شيئا فإلتفت و قال
اه قبل ما انسى يا معلم …أنا عارف بنتك و حافظ الاعيبها كويس …قلها اوعة تحاول تاني او تفكر تن”تقم..
و كمان البيت ده يبقى بيتي و هي مجرد وحدة قاعدة فيه بتربيلي بناتها اللي هوما بناتي لو فكرت تشيل كرسي حتى من مكانه و تطلعه برة البيت أو تعمل حاجة تضرني ساعتها هأنسى كل اللي انا قلته ده و هيبقى عداني العيب في اللي هأعمله فيها صدقني ..
خرج بدر من المكان وسط صمت رهيب
كان علاء سيتكلم بغضب و هو يقول لابيه :يابا انت ازااا…
قاطعه سيد بصفعة اسقطته أرضا و هو يقول : اختك عاملة مصيبة توديها ورا الشمس و انت بدل ما تلم الموضوع رايح تصب بنزين عالنار !! بتقوله افرض انت غدرت بينا يا ابن الگلب !!
كإنك ما تعرفش طول السنين دي اخلاق جوز اختك اللي كل البلد بتحلف بيها و ان كلمته سيف فوق رقبته !! ده احنا الناس بقت تحترمنا من لما ناسبناه بس !!
فتحي بتذمر -لا يا معلم احنا كل الناس كانت بتعملنا ألف حساب من قبل ما نجوزه اختنا 😤
-خوف ..مش احترام يا فتحي …فيه فرق كبير بين المرجلة و البلطجة .. فهم ده لأخوك
قالها و هو ينظر الى علاء بإح”تقار
علاء بتذمر:يا ابوي انا ..😰
-انت ايه !!! انت كان مفروض اسميك غباااء بدل علاااء-
نظر إليهم بغضب فأطرق الجميع خوفا
-و انتوووو !! بعد ما شفتو بعينيكم المصيبة اللي اختكم وقعتنا فيها جايين تقفوا جنب الغب’ي ده بدل ما توقفوه عند حده ؟؟😡
صرخ بأعلى صوته
…. محموووود !!
-اؤمرني يابااا
-خذ الصايع ده مش وشي الساعة دي خليني افكر أعمل ايه مع اختك اللي هتتطلق بأربع بلاوي دي 😤 …و انت يا مصطفى أفتح القهوة خلينا نسترزق و هاتلي قهوة سادة و انتم..كل واحد على محله يالا
كان خالد في طريقه الى القصر حين رن هاتفه و كان محامي ياسين
-مرحبا سيد خالد
-سيد مارتن طاب يومك
-اتصل بي محامي السيد ايهاب المنصور يقول أنه يريد منا ان نقرأ الوصية بحضور رئيس هيئة التجمع الإسلامي
و قد حددوا يوم الغد من أجل ذلك …
تردد قليلا ثم قال بإحراج : فهل تعتقد أن السيدة جاهزة لذلك ؟
خالد : أجل سيد مارتن أعتقد انها كذلك … سننتظرهم غدا عند الساعة العاشرة صباحا .
وصل الى القصر و كانت سحر مع أم أحمد في الردهة
-سلام عليكم
-و عليكم السلام يا ابني نورت
-اهلا يا خالد اتأخرت
-معلش يا سحورة على ما خلصت شوية معاملات ..بقولك ايه
سحر : ايه ؟؟
خالد : هي أميرة فين عايز اكلمها
-في الجنينة..
-طب انا رايح لها
كان سيتوجه نحو الحديقة حين ناداه صالح
-خالد …استني يا ابني عايزك
توقف خالد بترقب بينما يقترب صالح منهم و من خلفه فاتن المتذمرة..و هم يحملون حقائبهم
-خير يا عمي عايز حاجة ؟ و ايه الشنط دي؟
-أيوة يا ابني …انا بقول كفاية لحد كدة احنا هنرجع بيتنا
-معقولة عايزين تمشو في الظروف دي يا عمي؟؟
فاتن : قلتله..بس هو مصر يمشي و بيقول اهلها معاها 🙄
نظر إليها صالح بغضب ثم قال لخالد : لا يا ابني اساسا الوضع متلخبط و احنا مش عايزين نتدخل في حاجات عائلية ما تخصناش …لو تحجز لنا طيارة النهاردة يبقى كثر خيرك
خالد : طيب حاضر بس ان كان و لا بد خلوها بكرة
صالح بتوجس: ايش معنى؟؟
خالد : بكرة جاي محامي الوا’طي مع المحامي بتاعنا عشان يقروا وصية ياسين …و عايز الكل موجود
لمعت عينا فاتن بفرحة فسيتسنى لها قضاء يوم آخر علها تظفر بما تريد
صالح : سايب وصية !! ليه؟ هو كان عارف مثلا أنه هيمو”ت
خالد : لا يا عمي ..بس في الغربة كلنا بنعمل كدة …و ما تدري نفس ماذا تكسب غدا ..و ما تدري نفس بأي ارض تموت ” صدق الله العظيم
سحر : صدق الله العظيم ..هو أكيد مكانش عايز املاكه تتقسم وفق قانون كندا لو حصله حاجة مش كدة يا خالد؟
خالد بتصديق: ايوة كدة يا سحر
توجه خالد للحديقة الخلفية و قالت فاتن لصالح : خلاص انت سمعت قال ايه يا صالح …يالا بقى رد الشنط دي
-يعني انتي ما صدقتي !!
سحر : أم أحمد انا كنت محتاجاكي في موضوع
ام أحمد : اتفضلي يا بنتي ..انا كنت داخلة المطبخ
سحر و انا اصلا محتاجاكي في طبق حلو أميرة بتحبه مادامت مش عايزة تاكل اي حاجة و خلاص
ام أحمد : طب يالا قدامي انا اصلا غلبت احضرلها ايه عشان تاكله
توجهت سحر و ام أحمد للمطبخ و نظر صالح لفاتن بشك و قال
-بقولك ايه يا فاتن
-اي تاني ؟؟😏😕
-هو فين ايه بيتك و بين سحر ؟؟
-هو انت ايه حكايتك يا صالح ؟؟ كل شوية تنط لي بحاجة ؟ هيكون فيه ايه بيني و بين بنتي يعني 🤨 ؟؟
-انتي فاكراني اعمى يا فاتن ؟ انا شايف و حاسس بتنافر غريب ما بيتكم اليومين اللي فاتوا دول بس مش عارف ليه
-لا يا اخوي مفيش حاجة انت اللي بقيت شكاك زيادة و بعدين انا و سحر دايما ما بيننا تنافر .. مش هي دلوعتك انت !!🙄
نظر اليها مطولا فقالت : اييييه !!! عايز تاخذ لي صورة !! يالا شيل الشنط عايزة اغير هدومي و اشيل الهدوم الثقيلة دي مادام مش رايحين لمكان
امسك صالح الحقائب بإستسلام و كانت فاتن تهم بحمل الاخرى المتبقية حين رن هاتفها
نظرت لصالح و قالت : دي مرات اخوك شاهين! أكيد عندها خبر ماهي بومة مش بترن الا لما يكون فيه حاجة
امسكت هاتفها و إجابت: أهلا يا مديحة ازيكم يا حبيبتي …
-الحمد لله احنا كلنا بخير ها ايه الاخبار ؟
سقطت الحقيبة من يدها و شهقت بصدمة: بتقولي ايه يا مديحة !!! بنتي !!!!! 😱
وقع الهاتف من يدها و هي تصرخ ؛ الحق يا صاااالح !! حاااولوا يق”تلوا بنتي !!! 😱😱
كانت تجلس في الحديقة بشرود حين اتى خالد من خلفها
-ما لحقتش اعزيكي يا مدام أميرة ..البقية في حياتك
-حياتك الباقية يا خالد ..شكرا على وقفتك معانا
-ده واجبي…انا مستحيل اسيبك في الظروف دي.. المرحوم كان اخوي مش صاحبي بس
-تسلم يا خالد 😔
-المحامي أتصل بيقول عايزين يجوا بكرة الصبح يقروا الوصية اللي كاتبها ..
تردد قليلا ثم قال :و ايهاب هيبقى موجود .. لو مش مستعدة انا ممكن اطلب منه يأجل..
-لا يا خالد …أنا جاهزة ..يتفضلوا ف أي وقت
خالد : طب انا عندي خبر تاني …
-خير يا خالد
كان سيتكلم حين سمع الجميع صرخة فاتن من الداخل فهرع كل من خالد و أميرة من الحديقة و خرجت نحوهما سحر و ام أحمد من المطبخ فوجدها الجميع على تلك الحال واقعة على الارض و تلطم بذعر
سحر: خير يا بابااااا !!! هي ماما مالها بتصرخ كدة ليه !؟؟
صالح بقلق : مش عارف …اتصلت بيها ام جابر بتقول حاولوا يقت”لوا حنان ! بس ما فهمتش حاجة !
أخذها صالح الى الاريكة القريبة بينما نظرت سحر بسرعة بديهة الى الارض و امسكت الهاتف و كانت لا تزال على الخط..
نظر صالح إليها بترقب ينتظر تفسيرا لما سمع
-ألو خالتي مديحة .. ازيك يا مرات عمي
-الحمد لله يا بنتي .. الف مبروك الخطوبة و كتب الكتاب
-الله يبارك فيكي ..قوليلي يا خالتي ايه الكلام اللي قلتيه لماما ده
حكت أم جابر ما حدث بإختصار لسحر
-طيب يا خالتي هي عاملة ايه دلوقت ؟
-منهارة و الدكتورة بتقول محتاجة تنام عشان ما تفكرش في حاجة و اضطرت تديها مهديء
-طب ارجوكي طمينينا عنها لما تصحى
-حاضر
اقفلت سحر الخط و هي مصابة بالهلع بقدر فاتن
صالح بقلق: هاا طمنيني يا سحر مرات عمك قالت ايه ؟!
-ضرايرها حاولوا يس”مموها بس من حظها جات في القطة المسكينة
عادت فاتن للصراخ ثانية
-قلتلك يا صالح …قلتلك بلاش ترمي بنتي الرمية المهببة دي !!! ما سمعتش كلااااامي !!! البنت هتروح في شربة مية بسببك !! 😭😭
نظر الجميع لبعضهم و لم يدرو ماذا يقولون
خالد : معلش يا عمي خذها اوضتها ترتاح الظاهر اعصابها تعبانة
صالح : مش وقت الكلام ده يا فاتن ..تعالي هاخذك على اوضتك
اوصلها الى غرفتها فقالت بضيق
-أنا عايزة اسافر لها يا صالح 😰
-تسافري ايه بس انتي اتجننتي !!😒
-بنتي ف خطر ..هيمو”توها و انا هنا مش عارفة اعمل حاجة
-يعني لما تروحي هناك هتحميها!! ماهو جوزها معاها هو هيتصرف!!
-كان أتصرف قبل ما يحاولوا يس”مموها!! 😭
-يوووه ..انا هأطلع أتصل بمرسي أشوف بدر عمل ايه ف الموضوع ده
فردوس :و بعدين يا ممدوح !! هنفضل كدة لحد امتى؟؟
-لحد ما ربنا يفرجها يا فردوس
فردوس بضيق: انت بس لو كنت قلتلها ان الفلوس اللي كانت معاها و حتى مرتباتنا دفعناها في العملية ..هنكمل الشهر ازاي ؟؟
ممدوح -يعني انت مش شايفة الست وضعها عامل ازاي ؟؟ المخلوقة هتمو”ت من قهر”تها و انا هقولها قاعدين نصرف عليكي من فلوسنا ؟؟ شايفاني بالنذ”الة دي ؟؟ ولا انتي فاكراني ابنها الوا’طي يا فردوس ؟؟
فردوس بتذمر: بس يا ممدوو….
قاطعها ممدوح بتذمر: و بعدين بنصرف ايه يعني ؟ ماهي زي ما نوديلها الاكل بنرجعه و بنطفحه احنا بقى بتتلككي على ايه حضرتك ؟؟
– يا ممدوووح انا مش قصدي عالاكل … انا بس كنت..
-سدي على السيييرة دي يا فردوس ..انا طالع الشغل ..يالا ادخلي هاتي العشاء احطهولها في طريقي على الله بس تاكل المرة دي
دخلت فردوس بتذمر للمطبخ و في تلك اللحظة رن جرس الباب
فتح ممدوح ليجد ابن الجيران إياد ذو العشر سنوات يحمل ظرفا كبيرا
-خير يا اياد مامتك عايزة حاجة من طنط فردوس؟؟
-لا يا عمو .. واحد اداني الظرف ده بيقول فيه امانة للحاجة مفيدة و طلب مني اديهالك توصلها لها بإيدك
ممدوح بتساؤل : انت تعرفه ؟؟
-لا يا عمو ممدوح انا عمري ما شفته
-طب يا حبيبي يالا روح على بيتكم
أمسك الظرف و اقفل الباب بينما تخرج فردوس بحافظة الطعام
-الأكل اهو …هو مين اللي كان عالباب ؟؟
نظرت لما في يده و أكملت : و ايه الظرف ده !!
ممدوح بتساؤل: مش عارف اياد بيقول ان حد اداله الظرف و طلب منه يديهولي
نظر إليها بدهشة و كمل: بيقول امانة للحجة مفيدة!! 🤔
-طب مستني ايه …أفتح نشوف فيه اي!!
فتحه ممدوح بتوجس فصدم الاثنان معا !!
-اي ده !! كل دي فلوس !!
عدها ممدوح بتعجب ثم قال : دي عشرين ألف جنيه !
فردوس: يعني تغطي ثمن العملية و زيادة خمس الاف ! يا ما انت كريم يا رب !
ممدوح بدهشة: تفتكري مين اللي باعثهم !! مش معقول يكون المرحوم …!!
فردوس: ايه الكلام ده يا ممدوح ؟ و هو المرحوم ابن خالتك كان هيعرف منين انها عملت قسطرة بعد مو”ته ب 15 الف و اننا هندفع المبلغ اللي باعثه كله؟!
-مش عارف…المهم ..خليني اروح دلوقت اتأخرت يالا سلام عليكم
-و عليكم السلام
عاد بدر الى المنزل بعد يوم طويل و شاق و كان مرهقا للغاية لكنه كان يحمد الله أنه وفق و مر موضوع سنية و أهلها على خير بل أن الجميع قد استغرب هدوءهم و موافقتهم على الطلاق بتلك الشرووط الغريبة و لكن أحد لم يجرؤ على التساؤل خوفا من بطش عائلة سنية .
لكن ما كان جليا للجميع هو أن هناط شيئا خطيرا جعله يتخذ تلك الخطوة فالكل يعرف شيم بدر و عدله و إنه لم يكن ليطلقها لو لم يكن الأمر بهذه الخطورة.
عاد الى المنزل مع المغرب و كان والداه بإنتظاره برفقة جدته
-سلام عليكم
-و عليكم السلام
الجدة حسنات: عليكم السلام يا ولدي .. تعال ريح جنبي شكلك بهتان كنك طول اليوم واقف على حيلك
-لا انا رايح أشوف حنان
هنادي -حنان نايمة في اوضتها تعال اقعد و قل لنا حصل ايه
مرسي: خير يا بدر عملت ايه مع الحر”باية مراتك !!
تنهد بدر و جلس بحزن قائلا
-طلقتها بالثلاثة يابا..
ضربت هنادي على صدرها ؛ يا مصيبتي! و تفتكر انها هتسكت بعد عملتك دي !! ده انت ولعتها اكثر يا بدر ! طب و المؤخر و الذهب اللي لهفته مننا ده كله!!
-انا مضيتهم على تنازل بكل حاجة…و سنية ما تقدرش تعمل حاجة
-طب اهلها وافقوا ؟؟
بدر : هوما كمان ميقدروش يعملوا حاجة يمة… الأدلة اللي عندي تدخل بنتهم السجن المؤبد ده ان مكانش اعد”ام …انتي ناسية ان الشروع في القت”ل حكمه هو نفس حكم الق”تل لوجود النية؟
مرسي : طب و شغلك هناك؟
بدر – انا اجرت الأرض لباقي الموسم يابا لحد ما أشوف لي بيت تاني هناك
هنادي : بس انت كدة هتخسر كثير يا ولدي !! موسم الغلة قرب و كل تعبك فيها ضيعته على أجرة ب ملاليم !
بدر بإستسلام -اعمل ايه يمة… هأبقى أشوف لي مشروع تاني هنا بالفلوس اللي اخذتها من الراجل
صالح بندم-انا آسف يا ولدي ..اتغصبت عالجوازة المطينة دي بسببي و انا عارف انهم ناس مش من ثوبنا
-ما تقولش كدة يابا ..مقدر و مكتوب.. اومال اسيبهم يأذوك؟
الجدة: مرسي معاه حق … العيلة العرة دي مكانتش هتفكر تناسبنا و تاخذ ولدنا زينة الشباب كلها لولا المشكلة اللي كانت بينه و بين ابوها على ارض الزرقا ..الحمد لله ان ربنا خلصك منها و بانت الح”ية على حقيقتها … حقك تفرح مش تزعل
بدر بحزن انا مش شايل غير هم البنات يا ستي … كنت يحاول اصلح الغلط اللي كانت بتزرعه فيهم دايما ..لكن دلوك هتستفرد بيهم و تكبرهم عالحقد و الشر
هنادي -ما تخافش يا ولدي …اصلهم و منبتهم طيب…ما تقدرش تعمل معاهم حاجة …مهما طال الزمن هيرجعو لأصلهم الطيب … أهي حنان قدامك …مش تربية فاتن؟! و مع اكدة اتغيرت مئة و ثمانين درجة و ظهر معدنها الحقيقي لما بعدت عن س”موم أمها و كرهها لكل حاجة حواليها
ابتسم تلقائيا لدى ذكر اسمها قائلا بشرود : معاكي حق يمة
حسنات: ايه جاب سيرة الحر”باية دي دلوك يا هنادي!
أخرجه صوت جدته من شروده فقال بإحراج : ألا صحيح هي الدكتورة قالت ايه يمة؟؟
-قالت انها مش بتاخذ الأدوية بتاعتها و كمان محتاجة راحة نفسية و انها تبعد عن اي ضغط و توتر و ادتها مهديء و من ساعتها و هي نايمة
بدر بقلق : يعني ما اكلتش حاجة من الصبح يمة!
هنادي: نعمل ايه يا ولدي ! خفنا نصحيها تترعب تاني
قام بدر و هو يقول :طب يا ريت تحضرلينا لقمة و انا هروح اصحيها و نتعشى سوا …بالإذن
مرسي-اذنك معاك يا ولدي
كان يهم بالتوجه الى غرفته حين اوقفه صوت هناء الباكي
-بدر 🥺
الوقت إليها بغضب -عاوزة ايه تااااني !!
هناء بندم : سنية وقعتني يا بدر ..ضحكت عليا عشان تخلص منا احنا الإثنين .. ارجوك يا بدر تسامحني😭😭
-اساااامحك !!! أسامحك على ايه !!! هو انتي كس”رتي فازة ولا زودتي ملح في الاكل !!هاااا !! أسامحك على ايه ؟؟؟ 😡😤
هناء ببكاء : عارفة ان غلطتي كبيرة …بس انت قلبك كببر يا بدر !! 😭
– قلتي غلطة!! دي جريمة ق”تل يا هناء …انتي كنتي عاوزة تقت”لي مراتي و ابني عارفة يعني ايه الكلام ده!! يعني كنتي عاوزة تطفئ فرحتي قبل ما تتولد …. انتي كنتي عاوزة تحرميني من حبي و تقت”ليني بالحيا يا هنااااء !!
هناء: قتلك سنية ضحكت عليا ليه مش عاوز تصدقني 😭😭
-و انتي كنتي عيلة عاااد !! بتسمعي كلام سنية ليه؟ مش كفاية اني راضي بيكي و انتي مش قادرة تجيبيلي حتة عيل !! لا و كمان عايزة تق”تلي العيل اللي ربنا رزقني بيه!
ثار و جلجل صوته كل المنزل وسط بكائها و نحيبها المتواصل بينما أكمل بدر بغضب جحيمي
-بس خلاص لحد هنا و كفاية !!! مش مضطر اتحمل أكثر
انتي طالق يا هنااااء …طااا…..
-لااااااا يا بدر !!! لاااااا اوعااااا يا ولدي !!
-انتي طالق يا هنااااء …طااا…..
-لااااااا يا بدر !!! لاااااا اوعااااا يا ولدي !!
كان ذلك صوت هنادي المذعورة من بعيد
إقتربت منه برجاء و هي تكمل: اوعة تطلقها بالثلاثة با بدر البت يتيمة و مالهاش غيرنا 😥
-مليش دعوة يامة…انا اتقيت ربنا فيها و سترتها كرمة ليكي و لخالتي الله يرحمها بس من النهاردة كل واحد فينا من طريق ..مش عايزها على ذمتي دقيقة وحدة بعد العملة السودة الي عملتها و تحمد رينا اني ما رميتهاش في السجن هي و الوا’طية التانية 😤
هنادي بتوسل -خلاص سبب الامور تهدى بس اوعة تتسرع و تنطق الطلقة الثالثة عشان خاطري … يمكن ربنا يصلح الاحوال بعد كدة ما بينكم 🥺
نظر إليها بدر بضيق و قال : يصلح اي بس يمة!! دي ضيعت كل ذرة عز كنت بأعزهالها !! هي من النهاردة مبقتش مراتي خليها ترجع بيت اخواتها
-بس انت عارف اخواتها و نسوانهم يا بدر! 😥
-مليش فيه يمة…مش عاوز أشوفها هنا و كمان مش عايزها قريبة من مراتي و ابني انا مبقتش اثق فيها ..من كثر ما بتسمع كلام سنية خلتها بقت نسخة عنها 😤
ثك نظر إليها بإحت”قار و قال :ابقي عدي عالبيت خذي هدومك و حاجتك لأنه بقى بيت سنية و البنات ..وحاولي معاها يمكن تسمحلك تعيشي معاهم هناك ما انتي ح”ية زيها .
دخل الى غرفته و تركها تبكي بحرقة و هي تقول
-ارجوك يا خالتي خليه يسامحني انا كنت ضحية زي حنان 😭
ارجوكي يا خالتي انا مش زي سنية انا مستعدة أعيش خدامة تحت رجليهم هوما الاثنين ولا هافتح بوقي بكلمة ولا أقول ثلث الثلاثة كام!! المهم افضل مراته 😭😭
نظرت إليها هنادي و قالت بحزن ممتزج مع الغضب
-للأسف انتي ما سبتليش سكة تخليني استعطفه و أترجاه يرجعك …بدر كان معاه حق …احنا قلوبنا متشحتفة على حتة ولد يشيب إسمه …انتي كنتي عاوزة تحر”قي قلوبنا كلنا مش قلبه هو و بس و لولا ستر ربنا كانت حصلت الكارثة ..كل اللي قدرت عليه أمنعه يطلقك بالثلاث زي ما عمل مع سنية …مش عارفين بكرة يكون ايه …يمكن القلوب تصفى تاني انتي بس توبي لربنا و استغفري دي جريمة قت”ل
-بس هي ما ماتتش اهو و كويسة 😔😭
هنادي بغضب: بس بوسي مااااتت! ولا دي مش روووح !!😡
يالا انتي سمعتي بدر قال ايه …تقضي الليلة بس و الصبح عالنجمة تمشي تلمي هدومك من بيته و تروحي لبيتكم
انصرفت و تركتها هناك واقعة أرضا يتآكلها الندم.
دخل الى غرفته فوجدها نائمة بعمق
غير ملابسه و ما أن لبث حتى طرقت والدته الباب
-الأكل يا ولدي
-غلبتك معانا يامة
-غلبة ايه يا ولدي أهم حاجة نتطمن عليها..تصبح على خير
-و انتي من اهل الخير
في بيت بدر
كانت سنية تطوي المنزل ذهابا و إيابا لا تدري ماذا تفعل و لم تعلم اي خبر..آلاف التساؤلات تشغل بالها
ترى هل انجزت هناء المهمة!! و ماذا حدث هناك ؟ هل ماتت حنان أم كشف امر الخطة ؟
بدر لا يرد على اتصالاتها و هناء هاتفها مغلق..
هل هذا يعني انه قد ألقي القبض عليها !!
فجأة رن جرس البيت فتوجهت مسرعة و هي تقول :بدر !
سرعان ما تلاشت فرحتها و هي تقول بخيبة امل ممتزجة بدهشة: بابا ! ..اتفضل جوة خطوة عزيزة !
جلس سيد بصمت مخيف و هو ينظر إليها بتفحص
سنية بقلق : مالك يا بابا خير ؟! في حاجة ؟
سيد :ايوة فيه…انا جاي دلوقت من عند المأذون
نظرت إليه سنية بتوجس فأكمل : بدر طلقك بالثلاثة يا سنية
سنية بصدمة : انت بتقول ايه يا بابا؟
سيد : اللي سمعتيه 😏🙄
سنية بغضب: يعني ايه طلقني !!و انت ما عملتش حاجة!!
سيد بتهكم: عايزاني اعمل ايه ..اقوله يصقفلك يا خايبة!!
– لا مستحيل !! هو فاكر أنه هيقدر يخلص مني بالسهولة دي !! ده انا سنية ..ده انا هأخليه…
سيد بغضب:اخرسي بقى و اتهدي انتي اييييه !!! لسة بتتوعدي بعد كل اللي انتي هببتيه ده !! ده انتي تحمدي ربنا أنه ابن حلال و صان العشرة و لا بلغ عنك و لا خذ منك البنات !
-ياخذ مني بناتي ايه ده انا كنت اقطعهم بسناني كلهم هو و عيلته اللي مناخيرهم طالعة في السما دي !😡
سيد بغضب : أما انك بج”حة بصحيح!! و كمان لسة بتتوعدي و بتهددي !مقوية قلبك على ايه بس !! يعني عايزة تسم”مي مراته و اللي ف بطنها و يقعد يتفرج !! ده انا لو مكانه مش هيكفيني فيكي الاعد”ام!! جوزك ده مفيش منه اثنين و خسارة فيكي أصلا
حاولت الإنكار و قالت بتصنع الدهشة: مراته؟؟ مراته مين !!
دي اول ما عرف انها حامل خذها بيتهم … هألاقيها فين انا عشان اس”ممها ؟! دي أكيد كذبة حقي”رة منه عشان يخلص مني و يخلاله الجو معاها 😥
سيد بغضب: انتي عارفة ان بدر ما بيكذبش يا سنية..ضرتك الثانية اعترفت بكل حاجة و قالت انك ادتيها الس”م تحطهولها في الاكل…بس ستر ربنا و اكلته القطة بدالها و ما”تت
همست سنية مع نفسها بغل:يعني ما ماتتش!! الخا”طية عايشة!! 😱😡
ثم قالت بصراخ هستيري: لاااا ….كذاااابة !!!! كلهم كذاااابيييين يابا !! عايزة تخلص مني هي كمااان …عايزة ترميني بتهمة حقي”رة زي دي عشان بس تطلع هي منها !
تعلقت بملابسه تحاول استعطافه بدموع تماسيح قائلة
أنا مليش دعوة يا بابا ..اوعة تصدقهم !! 😭
انتفض بعيدا وهو يوزع يديها عن ثيابه و يدفعها عنه
-انا مصدق عينيا يا سنية …بدر معاه كل الأدلة اللي توديكي حبل الم”شنقة… يعني تبطلي تحوير و تعترفي لإن انا مش قاضي التحقيق ..ده انا ابوكي اللي مربيكي يعني خابزك و عاجنك يا بت
سنية بتوتر: أدلة ايه دي !! لو كان على اعتراف هناء تبله و تشرب ميته…مين هياخذ على كلام وحدة عب’يطة زيها!🙄😥 و ايه دليلها ان انا اللي قلتلها ؟
سيد بضيق: يا ريت جات على اعتراف ضرتك بس و احنا نقلب اللعبة عليهم هوما… بس الكاميرا سجلتك و انتي بتشتري ازازة السم با بنت الهب”لة
سنية بصدمة: كاميرا!! 😳
-ايوة يا غ’بية كاميرا ..مالك استغربتي ! ما احنا عندنا في القهوة و محل الحلويات و المطعم كمان!
سنية بذهول: و سيد العطار مركب كاميرا من امتى !! 🤔😳
سيد بتذمر: من اسبوعين بس…من لما حصلت عنده السرقة إياها…فهمتي ما قدرتش اعمل حاجة ليه ؟؟
هزت سنية رأسها بضياع و هي تهمس: لاااا مستحييييل 😱…أنا خطتي كانت مضمووووونة !! ازاااي ! انا محسبتش حساب دي ازاي ! 😳
سيد بغضب :انتي خليتي رقبتي بقت في الارض …إتحطيت في موقف ما اتمناهش لعدوي حتى …
أنا انهزمت لأول مرة يا سنية …رحت له برجليا و اخذت له تنازل عن كل حقوقك و انا موطي راسي …يا ريتني كنت مو”تت قبل النهاردة ولا اتحطيتش في الموقف المخزي ده !!
جز على اسنانه بغضب ثم نفخ بضيق مردفا
-دي الناس كلها كانت مفكرة ان الموضوع فيه خيانة و الا مكنتش أقبل شروطه المهينة و انا دماغي في الارض كدة! 😓
طب اقولهم ايه ؟؟ لا الموضوع مش زي ما انتو مفكرين يا جماعة أنا بنتي مش خاينة ! كل الحكاية انها قا”تلة!! حاولت تق”تل ست و معاها طفل بريء لسة ما اتولدش !! كنتي ساعتها تتبرئي من الخيانة و تدخلي السجن…و تتعد”مي 😤
عشان كدة انتي من النهاردة لوحدك … اتحملي نتيجة حقدك لوحدك و انسي ان ليكي أب اسمه سيد .
-لاااا يا بوي ما تقولش كدة !! اوعة تتخلى عني انا مليش غيرك
كان سينصرف لكنه تذكر شيئا
-نسيت حاجة كمان…بدر بيقولك لو حاولتي تقربي منهم تاني أو تتصرفي في حاجة من العفش هو هينسى انك أم بناته و هيسلم كل الأدلة للبوليس…و يكون في علمك !! لو هو عملها انا هأطلع قدام الناس كلها و أقول معنديش بنت اسمها سنية …معنديش غير ولاد و بس
و اه افتكرت حاجة كمان : هو يقدر يجي ياخذ البنات ف أي وقت لا فيه مرة في الأسبوع و لا غيرها انا اتفقت معاه على كدة قدام الناس كلها اوعي تلعبي عالنقطة دي و تمنعيه عنهم و توطي راسنا اكثر من كدة
غادر و تركها تشعر بالضياع و هي ترى كل ما بنته ينهار في رمشة عين!؟
عند بدر
اغلق الباب و توجه الى سريره و تمدد بجانبها يحاول أن يوقظها بحنان
لكنها فزعت فجأة و قامت تصرخ و هي تمسك في بطنها و كأنما ترى كابوسا مرعبا
-كانوا عايزين يمو”توني 😱
احتضنها بدر: هسس محدش هيقرب منك انتي بخير
-لاااا يا بدر !! ابني .. ابني ف خطر!! هيحااو….
-هسسسس …خاااالص اهدي محدش هيقدر يقرب منك أهدي يا روحي اهدي انا معاااكي اهوو
التفتت حولها لتجد نفسها بين احضانه
– انت هنا بجد يا بدر ؟؟
شدد من احتضانها اكثر و هو يقول : ايوة يا قلب يدر ..أهدي انا هنا و مش هسيبك أبدا ..يالا قومي ناكل لقمة انتي على لحم بطنك من الصبح
أغمضت حنان عينيها بذعر في احضانه قائلة -مش عايزة منهم حاجة. …لاااا مش عاااايزة 😓 يسيبوني ف حالي انا و ابني بس 😓😭
امسك بدر وجهها بين كفيه و نظر بداخل عينيها بينما ترتعش قائلا
-بصيلي يا حنان ..بصيلي هنا
نظرت إليه بحيرة فقال : عندك ثقة فيا ولا لأ
اومأت برأسها بإستسلام فقال : يبقى تجي نتعشى ان مكانش عشان خاطري فعشان خاطر ابننا..يالا يا قلبي 🥰
نظرت إليه بعيون خائفة و قالت : بس سنية هتح…🥺😥
-هسسس يا قلبي ..مبقاش فيه سنية …ولا هناء كمان
نظرت إليه بضياع : مش.. مش فاهمة! بلغت عنهم!!
-لا …طلقتهم ..
حنان بدهشة: انت بتقول ايه !! 😱
بدر: بقولك مبقاش عندي غيرك … أنا طلقت سنية بالثلاثة و سبتلها هي و البنات البيت .. هنفضل في بيت العيلة لحد ما تولدي بالسلامة و بعدها نبقى نشوف بيت تاني ..
-طب و شغلك !!
قبل جبينها بحب و هو يقول -ما تشغليش بالك انتي بحاجة دلوقت أهم حاجة تهتمي بصحتك و بابني ماشي؟!
-بس كدة تعب عليك كل يوم ! 😥
-فداكي روحي انتي و ابني
-و لو بنت؟😥
-يبقى فداكي كل حاجة انتي و بنتي حلو كدة !؟ يالا نتعشى دلوقت !! احسن انا واقع من الجوع
تذكرت حنان فقامت بفزع -لا أنا لازم أقوم اصلي الأول اصل انا نمت طول اليوم 😰
ما كادت تقف حتى وقعت فاسندها قائلا
-لا كدة هتدوخي …كلي لك لقمة بسرعة بعدين صلي براحتك و اقعدي ادعيلنا كثير
غمزها بعبث و أكمل: مش انتي دعيتي انك تصحي كل يوم الصبح على وشي ؟ اهو ربنا سمع منك و من النهاردة و رايح هأبقى لازق لك ليل نهار لحد ما تطرديني بنفسك برة الاوضة دي 😁
ضحكت حنان رغما عنها فقال بدر بحب
-ايوة كدة اضحكي خلي دنيتي تحلى 🥰
في الصباح
كان بدر يهم بالمغادرة حين سمع صوت سلمى من بعيد
-بدر !!
انتظر وصولها و قال بأسف: أنا آسف عاللي حصل لبوسي يا سلمى أنا هجيبلك غيرها وعد
سلمى بحزن: لا مش عايزة غيرها ..فداهم هوما الإثنين أهم حاجة ان حنان و اللي ف بطنها ما حصلهمش حاجة
-تسلمي يا حنينة..ها كنتي عايزة حاجة !؟
سلمى بتذكر: ايوة يا بدر …صحيح اللي انا سمعته ده !!
-و ايه اللي سمعتيه الاول ؟؟
-انت طلقت سنية و سبتلها البنات بجد!!
-ايوة
-ليه بس يا بدر ! ما انت ماسك عليهم ادلة و تقدر تاخذهم منها معقولة تسيبهم ليها تبخ س”مها و شرها فيهم ؟ دي هتطلعهم نسخة طبق الأصل عنها!!
بدر بهدوء: أولا احنا عملنا طلاق بالتراضي يعني ما قلتش لحد عن سبب طلاقنا و اتفقت مع ابوها أشوف بناتي ف أي وقت ويقعدوا عندي زي ما انا عاوز من غير تحديد مدة ولا شرط و هو وافق قدام الناس كلها و ما يقدرش يرجع ف كلامه يعني مش خايف عليهم لانهم هيبقوا تحت عيني طول الوقت
ثانيا و ده الأهم يا سلمى سنية دي مهما كان شرها فهي في الآخر أم… و اكبر وحدة في بناتها عندها عشر سنين يعني محتاجينلها هي و ما اقدرش ابعدهم عن حضنها ..
سلمى : بس يا بدر …
قاطعها بدر : على فكرة محدش حافظ سنية زي ما انا حافظها
هي دلوقت ممكن تكش و تستسلم و تعترف بغلطتها …بس لو أخذنا منها البنات هتتحول لوحش و هتشوفي الوش التاني لسنية اللي عمرها ما اظهرته لحد ..
سلمى : هتعمل ايه يعني !
بدر : هترفع عليا قضية حضانة و تكسبها لإن الحضانة من حقها و لإني ما عنديش أي سبب يخليني اطلقها
سلمى بإندفاع -بس انت ساعتها هتطلع الأدلة اللي عندك و مش بس هتبين للمحكمة انها مش أهل للحضانة …هيعرفوا انها مجر”مة !
-عشان اخسر سمعتي و كلمتي و بناتي في وقت واحد ؟
اومأت سلمى بتعجب فأكمل : اومال أنا ما سجنتهاش من الاول ليه بدل اللفة دي كلها يا سلمى؟؟
-مش فاهمة !!
-لإني بأفكر للبعيد اوي.. راجل بأخلاقي ما يرميش ام بناته في السجن مهما كانت غلطتها لا تغتفر.. دي عشرة عمر يا سلمى ..و بناتي مش هيسامحوني مهما بررتلهم لانك عارفة هوما متعلقين بيها قد ايه و هي كمان ! ما هي أصلا عملت كل ده عشانهم هوما …عشان تضمنلهم حقهم لو بقى عندي ولد
و فوق كدة ممكن يكرهوني و يكرهو اخوهم او اختهم اللي جاي لإنه السبب ف كل ده ! ما انتي عارفة ان علاقتهم مع حنان مش كويسة بسبب زن امهم طول الوقت !!
فركت سلمى رأسها بضياع : صح معاك حق
اكمل بدر
هي عارفة و متأكدة اني ما دمت وعدتهم ما اسلمهاش فأنا مستحيل أعملها و لو على رقبتي ..عشان كدة هي اول حاجة هتفكر تعملها لو اخذتهم منها انها ترفع قضية و تاخذهم مني و ساعتها مش بس هاخسر سمعتي بين الناس لاني مرمطت أم بناتي في المحاكم ..لا يا سلمى هاخسر بناتي بجد لان المحكمة مش هتسمحلي أشوف بناتي زي ما انا عاوز و لا هنقدر نغسل السموم اللي هتنشرها فيهم ..
سلمى : يا خبر !!
بدر : و على ما يبقى عندهم 18 و يبقى ليهم حق الاختيار ما بينا أكيد هيختاروها هي لان قلوبهم ساعتها هيكونوا اتملوا سواد من ناحيتنا احنا و حنان و اللي هيتولد ده…..فهمتي دلوقت ليه اخذت الطريق من قصيرها و سبتهم ليها!؟
قالت سلمى بتأكيد : عشان ما يبقاش ليها حجة و بعد كدة لو عملت اي حاجة تبقى هي الجانية على نفسها
بدر بإبتسامة: ايه دي اختي الذكية!
قبل جبينها و قال : يالا انا رايح مشوار بسرعة مش هاتاخر خلي بالك من حنان
-في عينيا يا بدوري ☺️
في القصر
-يا فاتن قلتلك للمرة الألف بنتك بخير و بدر معاها ايه حكاية السفر اللي طلعتيلي بيها دي دلوقت بس😏😓
-لو كان معاها مكانش حصل اللي حصل ..المرة دي جات في القطة المرة الجاية ف بنتي …انا كنت عارفة انهم ح”يات و هيعملو ا ف بنتي حاجة …أنا لازم اروح لها
صالح بتذمر-طب افرضي قدرت اخذ اجازة و سافرنا… هتعمليلها ايه مثلا ؟؟
فاتن بضيق : احنا هنطلقها منه يا صالح كفاية لحد كدة..انا مش هأستنى لحد ما يمو”توها 😓
-ايه الكلام الغب’ي ده يا فاتن نطلقها ايه هي كانت لعبة!! البنت حامل و جوزها و بيتها أولى بيها
-هو فين البيت ده !! هااا هو فين؟ رميتلي بنتي رمية سوووداااا منك لله ! 😭
-بقولك ايه ..خلينا نعدي اليوم ده على خير بعدها نبقى نتكلم في موضوع بنتك و احنا في بيتنا
في بيت منير
-يالا يا سما استعجلي شوية عايزين نلحق عالمحامي
عشان نروح سوا للجماعة
-مستعجل على ايه! عايزني ابقى زي الغفر اللي هناك يا بيبو …أنا عايزة اكون بكامل اناقتي و شياكتي…
ايهاب : ليه يعني . .احنا رايحين فرح! كل الموضوع ان المحامي هيقرأ الوصية و رئيس التجمع الإسلامي هيقسم لنا حسبها نصيبنا
-لا يا بيبو … لازم الح’قيرة اللي اسمها أميرة دي تعرف الفرق بين الهانم و الخدامة … لازم اوريها يعني ايه ست قصر قبل ما أطردها منه
في القصر
ام أحمد : الجماعة هيلحقوا بعد شوية …
أميرة -تمام يا ماما
-حاسة انك جاهزة يا بنتي؟!
تنهدت أميرة بعمق و قالت : جاهزة يا ماما .
-يالا يا بنتي ربنا ينصرك عليهم
بعد فترة
وقفت أم أحمد برفقة خالد امام الباب ينتظرون القادمين بينما جلس الجميع في الصالة ينتظرون بترقب
في تلك اللحظة وصل ايهاب و سما و محاميهما السيد كارسون
دخل المحامي أولا و سلم بإحترام و من خلفه ايهاب المختال بتكبر و معه سما بغرور و تعال كأنما تلامس السماء بشموخ
خالد: تفضلوا للداخل لم يصل محامينا بعد و لا الشيخ أحمد عاشور
دخلوا الى الصالة و سرعان ما تبادل الجميع نظرات مشحونة و لوهلة بدأ الجو يسوده التوتر لكن وصلت أميرة و هي ترحب بالجميع :مرحب بالجميع في قصر المرحوم ياسين المنشاوي …احنا هنا حسب رغبة المحامي لقراءة وصيته و أخذ رأي لجنة المواريث و مش عايزين تبادل كلمات جار”حة و لا نظرات مش مريحة …يا ريت كل الناس الي هنا تتحلى بآداب القصر الذي هي موجودة فيه و تحترم ذكرى صاحبه …و ارملته صاحبة القصر
صمت الجميع لوهلة و فجأة نطقت سما متصنعة الابتسامة
-ما اعتقدش تقدري تقولي عن نفسك صاحبة القصر دلوقت
أردف ايهاب من خلفها بخبث : مراتي قصدها عمليا لسة ما اتقسمتش الورثة و محدش عارف القصر من نصيب مين 🙂
أميرة بهدوء -عارفة طبعا …و لحد ما يحصل ده اعتبره ملكي 🙂
سما :قانونيا عشان يبقى ملكك يبقى لازم تكون عندك اقامة دايمة
اكمل ايهاب: و عشان تكون عندك إقامة دايما لازمك الجنسية الكندية
سما بإبتسامة خبيثة : بس يا خسارة المرحوم ما لحقش يطلعهالك لإنه ما”ت تاني يوم جواز ! يعني حاليا انتي في وضع غير شرعي و لو دايرة الهجرة اخذت خبر لا سمح الله ! هيحطوكي ف اول طيارة و يرجعوكي مصر 🙄😁
كانت أميرة تستشعر هدفهم و هو اثارة غضبها و حزنها في آن واحد و تحاول صد هجماتهم الما”كرة بحكمة
في الوقت الذي كانت سترد فيه عليهما تدخل خالد قائلا بصوت عال: مين قال كدة!! اومال ايه المشاوير اللي كنت بأعملها طول اليومين اللي فاتوا دول يا دكتور ايهاب!!
نظر اليه الجميع بتعجب بينما اكمل و هو يخرج اوراقا من جيبه و يعطيها إياها
-انا اخذت عقد الجواز و طلعتلك اقامة و جنسية ..ده اللي كنت هقولك عليه امبارح و ما جاتش فرصة
امسكت الظرف و هي تقول بإمتنان: متشكرة جدا يا بشمهندس خالد مش هأنسى وقفتك دي
خالد و هو ينظر الى ايهاب بتحد: ده أقل واجب اقدره اعمله لصاحبي و اخوي الله يرحمه …احنا هنفضل في ظهرك دايما ثقي ف كدة
أميرة بإبتسامة حزينة: معنديش شك ف كدة
في تلك اللحظة وصل بيتر و هو يقول : سيدتي لقد وصل السيد مارتن محامي العائلة و الشيخ أحمد
أميرة : فليتفضلوا ..
دخل الاثنان و بعد السلام و المقدماات فتح السيد مارتن ظرفا مختوما و اخرج الورقة وسط ترقب من الجميع و خاصة ايهاب و سما
سيد مارتن : كتب السيد هذه الوصية بتاريخ 18 فبراير
اي قبل ستة اشهر من الآن و كتب عليها “لا تفتح إلا بعد مماتي”
غلبت الدموع أميرة فإنهمرت رغما عنها و اطرقت برأسها بحزن شديد
ربتت أم أحمد على كتفها بثقة و هي تنظر الى عينيها قائلة : انتي قدها يا بنتي ..خليكي قوية
فمسحت دموعها و أومأت برأسها بمعنى انا بخير ما تخافيش عليا
مررها المحامي للجميع ليتأكدوا من انها مختومة ثم فتحها
المحامي و من امامه خالد يترجم كل كلمة للعربية :
بسم الله الرحمن الرحيم و الصلاة و السلام على اشرف المرسلين
أنا الممضي أسفله صاحب الوصية السيد ياسين المنشاوي
اكتب وصيتي و انا بكامل قواي الجسدية و العقلية
في حال أصابني مكروه و هلكت إثره اوصي بمايلي :
صمت المحامي بينما ينظر الجميع بانتباه شديد
كانت سما تنظر اليه بترقب وعيناها تكادان تخرجان من محجريهما وهي تمسك بإيهاب لدرجة أن اظافرها كادت تنغرس بيده من شده الإنفعال
نظر المحامي للجميع ثم أكمل كلامه
اولا اوصي بمصنع اوتاوا للخشب لأخي و صديقي خالد فهو من بناه من الصفر ولا احد يستحقه غيره
نظرت فاتن لصالح بفرحة و همست: الحمد لله طلعنا منه بحاجة 😁
نظر إليها صالح بغضب و لم يعقب بينما فهم خالد ما ترمي اليه لأنه كان يقف قبالتها
اكمل المحامي
ثانيا -أهب بيتنا القديم الموجود في اونتاريو كوقف لهيئة التجمع الإسلامي من أجل إقامة دار للأيتام فيه و كذا مصنع اونتاريو للورق الذي تتوجه جميع ارباحه للتكفل بكل مصاريف الدار
نظرت سما لإيهاب بتذمر و بادلها النظرات بمعنى لقد ضاع علينا مصنعين و فيلا كبيرة
ثم اكمل المحامي
-ثالثا …أوصي بتقسيم الباقي من أملاكي حسب ما تنص عليه شريعتنا الإسلامية السمحاء
و في الاخير أطلب من الجميع أن يدعو لي بالرحمة
ياسين المنشاوي
لم تستطع أميرة التحمل أكثر و انهارت بالبكاء و خرجت الى الردهة و خرجت وراءها ام أحمد و سحر و خالد و من وراءهم والديها
بقي صالح و فاتن يجلسان مع المحامين و ايهاب و سما الذان ارتسمت على وجهيهما الخبيثين ابتسامة شامتة
همست سما بشماتة: بيقول كتبها من ست اشهر …يعني مكانش عارف انه هيتجوز المحروسة و إلا كان غيرها 😁
همس ايهاب بخبث: اتصرفنا في الوقت المناسب ..لو كنا اتاخرنا يوم بس كان عملها..شفتي يا سما انهارت ازاي !! كانت فاكرة انها هتكوش على كل الخير ده بس كل خططها ضاعت في ثانية 🙄😂
همست فاتن : انا مش فاهمة حاجة معناه ايه ده يا صالح ؟
-معناها الوا’طي و مراته هياخذوا منها كل حاجة 😥
فاتن بلا مبالاة:ايه المشكلة ؟ مش هيفرق معاها حاجة ماهي مش متعودة عالغنى يعني 🙄 ! المهم انها طلعت منه بالجنسية
نظر إليها بخيبة أمل و التفت الى الناحية الاخرى
أم أحمد -و بعدين معاكي يا أميرة ؟ احنا قلنا لازم نكون اقويا ..
رجب :مش عايزينك تظهري ضعفك للس”فلة دول ..دلوقت هيش”متوا فيكي يا بنتي
خالد: ارجوكي يا مدام أميرة . …اتحملي لحد ما نسمع للآخر الشيخ هيقول ايه .. الجلسة ما خلصتش
وضعت أميرة كلتا يديها على رأسها و انهارت
-مش قادرة …مش عايزين تحسوا بيا لييييه !! 😭😭
سحر: لا هتقدري .. ده حقك
أميرة ببكاء :مش عايزة حاجة يا سحر…و الله العظيم ما عايزة دولار واحد حتى !! خليهم ياخذو كل حاااااجة بس ياسين يرجعلي ! 😭😭
أم أحمد : لا يا أميرة ..احنا مش هنفضل نقول و نعيد في نفس الكلام…قلنا الحزن ليه وقت .. بس مش هنهرب من واقعنا و نقنط من رحمة ربنا
انتي مؤمنة بالقضاء و القدر…مطلوب منك تحاربي عشان كل اللي جوزك سابه وراه مش تقعدي تلطمي لحد ما تحصليه !!
فاطمة: ام أحمد معاها حق يا بنتي يالا خلينا نرجع جوة الجماعة مستنيين
مسحت دموعها و كانت تهم بالوقوف بينما تسندها سحر لكن الباقين لحقوا بهم الى الردهة
المحامي مارتن: هل كل شيء بخير سيدتي؟
نظر ايهاب الى سما بمكر ينتظر انهيارها لكن تفاجأ بصوتها الهاديء
-أجل سيد مارتن يمكن أن نكمل
المحامي : وصية السيد تعني أن لجنة المواريث التابعة لهيئة التجمع الإسلامي منذ اللحظة ستتكفل بتقسيم أملاك السيد ياسين المنشاوي …تفضل شيخ أحمد لك الكلمة
بدأ الشيخ في الحديث قائلا :
بما أنها وصية المرحوم فأنا سأفتيكم في كيفية تقسيم التركة مبدئيا
لو كان للهالك فرع وارث ( ولد أو بنت او اكثر من ذلك) و زوجة و عمة فإن زوجته ترث الثمن و الباقي للفرع الوارث أو يقسم بين الفروع للذكر مثل حظ الأنثيين و لا ترث العمة شيئا
و لو لم يكن للهالك فرع وارث و له زوجة و عصبة فلهم حق الميراث بالتعصيب و العصبة هم الاخوة و اولاد الاخوة و الاعمام و ابناء الأعمام الذكور
لكن الهالك ليس له وارث بالفرع ولا بالتعصيب و له عمة فقط فهذا يعني أن لزوجته الربع و الباقي لعمته
قاطعه ايهاب بخبث و هو ينظر إليهم ؛ و ان كان المرحوم ما دخلش بالزوجة يا شيخ ؟
نظر إليهم الشيخ و قال بأسف:
للأسف يشترط ان يكون الزواج صحيحا و قائما عند الوفاة كي ترث الزوجة الحصة المذكورة
نظر الى أميرة و اكمل :في هذه الحالة سترث العمة كل شيء
ابتسمت سما و نظرت الى ايهاب الذي بادلها ابتسامة الشماتة و الانتصار و ما كاد ان يفرح حتى تلاشت ابتسامته و حلت محلها صدمة شديدة و هو يسمع ذلك الداخل عليهم رفقة شخص آخر و هو يقول بصوت عال
-و لو كان ليه ورثة بالتعصيب يا مولانا؟؟
الشيخ بتوجس-في هذه الحالة فالعمة لا ترث لوجود وارث ذكر ! لكن من انت ولدي ؟
-حسام يوسف المنشاوي و ده والدي يوسف المنشاوي : عم المرحوم
ايهاب بصدمة: عمه !! 😳
يتبع بقلمي آلاء إسماعيل البشري 🔥🔥
اللي قالوا بدر ما صدق البارت أصلا ما خلصش مستعجلين ليه قبل ما تفهموا الحكاية؟؟ 😂
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية الأميرة والمغترب)
