رواية جوازة صالونات الفصل الرابع 4 بقلم ندى علي حبيب
رواية جوازة صالونات الجزء الرابع
رواية جوازة صالونات البارت الرابع
رواية جوازة صالونات الحلقة الرابعة
” صباح يوم جديد ادهم صحي من النوم بدري جدا بص علي الشباك كان النهار طلع ”
ادهم بضيق : نايم بعد المغرب علشان صلاة الفجر متفوتنيش وبرضو فاتتني ” وسمع خبط علي الباب ”
غزل وهي بتخبط جامد : يا عمو افتح الاوكره طويله مش عارفه اطولها
ادهم ضحك وقام فتح الباب وشالها : دا ايه الصباح العسل دا
غزل ضحكت : بابا مش راضي يديني فلوس بيقولي مش معايا وجدو نايم مش راضي يرد عليا
ادهم بصلها بحب : طيب وغزالتي عايزه كام ؟
غزل بتفكير : انت معاك كام
ادهم باس خدها وهو فرحان انها ناصحه : طيب ايه رأيك اخدك الدكان وتختاري اللي انتي عيزاه
غزل سقفت : ماشي موافقه يلا هروح اقول لماما انا جايا معاك واجي ” ونزلت جري علي المطبخ تعرف امها ”
ادهم لسه مبتسم من كلام غزل سمع صوت زمارة عربيه وحد بيرن الجرس : اكيد الراجل بتاع المعرض بعت عربية العفش بس ابن النصابه كان بيقول العصر ” وبص في فونه ” باعتهم الساعه ٨ الصبح
سلوي لقت باب اوضة ادهم مفتوح دخلت : ادهم عربية العزال وصلت تحت
ادهم اخد محفظته وفونه وباس دماع امه : طالعلهم اهو يغاليه بس معلش هتعبك اعملي دور شاي ” وطلع من البيت ووراه سالم وصلاح ”
نوال طلعت وهي شايله غزل : في ايه يا ماما مين الناس اللي برا دي
سلوي : دا عربيه جايبه عزال ادهم من دمياط ادخلي اعملي دور شاي وتعالي ومتحطيش سكر هاتي برطمان السكر والمعلقه هما يحطو براحتهم ” وسابتها وطلعت تبص علي العزال من البرنده ”
نوال بصت عليه وهي رافعه حاجبها وقالت بهمس : رضينا بالهم والهم مش راضي بينا لا جوز بيريح ويقول كلمه حلوه وحما محسساني ان الخدامه اللي شغاله عند اهلها ” ودخلت علي المطبخ تعمل الشاي وهي حاسه انها هتتفجر ”
ادهم سلم علي الرجاله : طيب العزال دي هتدخل منين
صلاح بصله : هطلع افتح البوابه اللي بتطلع علي الشقق فوق وافتح شقتك علي ما الرجاله تطلع العزال
” ادهم هز راسه وصلاح طلع فتح البوابه والشقه والرجاله طلعو العزال علي الشقه برفقة ادهم اللي معاهم خطوه خطوه ، وسلوي اللي بتزغرط بفرحه ، والجيران كلهم طلعو يتفرجو وهما مستغربين امتي ادهم خطب علشان يجيب العزال ”
سالم جاب عصير وشاي ووزع علي الكل : عقبال عندكم جميعا
” نوال وقفت في البرنده وجنبها جميله وبيزغرطو بفرحه ”
جميله : انتي شوفتي العروسه ولا لسه يا نوال ؟
نوال بصتلها : لاء لسه بس امي سلوي بتقول العروسه زي فلقة القمر وبعدين بكرا نشوفها
” جميله بصت قدامها وفضلت ساكته وهي كلها حماس تشوف مرات ادهم شكلها ايه ، تقريبا كل البلد عندها نفس الحماس يشوفو مرات ادهم ”
………………………………….
” الساعه اصبحت ٥ المغرب نهال قاعده في اوضتها قدام المرايا بتفكر هل دي خطوه صح في حياتها ولا هي استعجلت ، هي شايفه ادهم كويس ومتفهم بس هل بعد الجواز هيبقي كدا ولا هيتغير ، قطع تفكيرها دخول تغريد وضحي اللي بيزغرطتو ”
تغريد ببتسامه : هشووفك عروسه اخيرا يا نوووله
” نهال بصتلها وهي مش فاهمه حاجه مش المفروض تكون زعلانه انها هتتجوز عريسها لكن هي العكس دي مبسوطه وداخله بتزغرط ”
نهال بصتلها بشك : تغريد انتي كويسه ؟
تغريد ببتسامه : كويسه اوي كمان انتي مالك حساكي مش مبسوطه كدا ليه
نهال اتنهدت وبصت للمرايا تاني : انا كويسه بس علشان صاحيه بدري حسه بدوخه شويه
ضحي فتحت دولاب نهال وقالت بحماس : هتلبسي ايه النهارده ؟
نهال : مش عارفه في اكتر من حاجه في بالي بسه محددتش بفكر البس البدله السودا والهيلز الوردي والطرحه الوردي
تغريد بتفكير : هي حلوه بس اسود ليه ؟
نهال بلا مبالاه : النهارده مش كتب الكتاب يا تغريد علشان البس ابيض النهارده مجرد هيتفقو لسه علي القايمه يعني عادي بعدين مش عايزه البس الوان
زينب دخلت عليهم الاوضه وفي ايدها صنيه عليها كوباية ينسون كبيره : خدي اشربي الينسون هيريح بطنك امك فين يا تغريد
تغريد : جايا ورانا قولنا نسبقها نسقف شويه لنهال بس الظاهر انها معدومه العافيه مالها كدا ؟
زينب : عندها مغص وتعبانه من الصبح بتعيط من وجع بطنها
تغريد : اوبس طيب خدت مسكن يريحها شويه
زينب : هي تشرب الينسون وهترتاح علطول هطلع انا اخلص اللي ورايا الوقت بيجري مني ” وطلعت برا الاوضه ”
تغريد بصت لنهال بشك : تغريد انتي تعبانه من المغص ولا في حاجه شغله تفكيرك ؟
نهال بصتلها وهي بتشرب الينسون : مش واخده بالك ان في حاجه غلط المفروض انتي اللي تكوني العروسه مش انا ازاي بقيت مكانك وازاي انتي مش زعلانه اصلا ؟
تغريد ببتسامه : ببساطه انا مكنتش موافقه عليه من الاول لكن انتي عارفه امي وتحكماتها انا مش جاهزه نفسيا لخطوة الجواز يا نهال ممكن محدش منهم يفهمني بس افهميني انتي انا حسه ان مش جاهزه بمعني الكلمه
نهال بصتلها بتركيز : ماشي انا فهماكي بس انتي مش جاهزه ليه قوليلي يمكن الخوف اللي عندك هو نفسه اللي عندي
تغريد اخدت نفس عميق : بصي يا ستي اولا انا معرفش اروح اعيش في عزبه ثانيا مش عايزه اتجوز في بيت عيله عايزه بيت بعيد عن حماتي اكون مستقله بنفسي بالعربي محدش يتحكم عليا ثالثا مش عايزه جوزي يكون بيسافر لو لقيت كل الحجات دي في حد انا هوافق لكن كل اللي جم مفيش منهم حاجه من اللي انا عيزاها فهمتي
نهال بصتلها كتير وشربت من الينسون : مخاوفك نفس مخاوفي بس ادهم عنده شقه لوحده يعني مش هعيش في بيت العيله لو عايزه اتقسم واقعد في شقتي منزلش براحتي يعني محلوله
” تغريد لسه هترد عليها دخلت عليهم زينب ”
زينب : نهال جدك لسه قافل معايا الجماعه كلها نص ساعه ويكونو عندنا قومي اجهزي يلا
نهال شربت اخر شويه في كوباية الينسون : حاضر هقوم البس اهو بس هاتيلي الطرحه الوردي من علي المنشر بالله
زينب : طيب يلا ” وبصت لتغريد ” تغريد رني علي امك تجيلي ” وطلعت من الاوضه ونهال بدأت تلبس وتفكيرها كله مشتت ، وتغريد كلمت امها تيجي ”
………………………………
” سالم وسلوي وصلاح ونوال واقفين تحت في الشارع قدام العربيه ”
سالم بضيق : الساعه داخله علي ٨ بليل والحاج راشد رن عليا فوق ال ٦ مرات اتأخرنا ليه ؟
” ادهم نزل وهو في كامل اناقته لابس بنطالون بدله اسود وقميص ابيض وحزام جلد اسود وجرمه سودا شكله جنتل وشيك اوي ”
ادهم نزل وفي ايده محفظته وفونه : ايه يجدعان يعني الواحد يجي بعرقه مش لابس اخد دش بعد الهده اللي اتهدته في نصب العزال انتو خلصتو امتي اصلا ولحقتو ازاي
سلوي ببتسامه : يحميك لشبابك يا زينة الشباب كلها اركب يلا
ادهم باس دماغ امه وباس دماغ ابوه : ربنا ميحرمني منكم يارب ” وراح ركب العربيه ركب جنبه سالم وسلوي وونوال وصلاح ورا وغزل علي رجلهم ”
نوال بهمس لصلاح : ابعد شويه الدنيا زنقه مش عارفه اقعد
صلاح بص لامه : معلش يما ادخلي شويه كدا نوال مش عارفه تقعد
سلوي بصتله برفع حاجب : يعني انت شايف ان فيه مكان وانا مبعدتش ؟
” ادهم غمز لابوه انه يفض الخناقه اللي علي وشك الدخول ”
سالم نزل : تعالي يا سلوي اقعدي جنب ادهم وانا هقعد ورا مع صلاح
” سلوي فتحت الباب ونزلت وهي متنرفزه بدون سبب ودا طبعها اصلا صعبيه جدا ركبت جنب ادهم وسابم ركب ورا الموضوع اتحل وادهم دور العربيه ومشي ”
……………………………..
” في اوضة نهال ، نهال لبست البدله السودا البنطالون مجسم والجاكت مظبوط وشكلها شيك اوي عليها ، بصت علي نفسها بتركيز في المرايا وفي ايدها صباع روج ”
زينب دخلت الاوضه عليها ببتسامه : بسم الله مشاء الله زي القمر
نهال ضحكت بسخريه وقفلت درج المكياج : لبست البدله كتير وقمرك ما قولتيلي كدا اشمعنا دلوقتي بقا
زينب ضحكت بفرحه : المره دي انتي لابساها وانتي عروسه ف مختلفه المهم يلا ادهم في الصالون والعيله كلها موجوده المره دي
نهال بستغراب : عيلة مين اللي موجوده المره دي ؟
زينب : اخوه ومرات اخوه وبنت اخوه بس يلا اطلعي اقعدي معاهم علشان امه سألت عليكي
نهال : تغريد وضحي فين ؟
زينب : قاعدين برا في الصالون معاهم ونجوي كمان برا
” نهال رشت برفان وخرجت مع امها دخلت علي الصالون سلمت عليهم كلهم وقعدت جنب ام ادهم ”
سلوي بغمزه : يعني تسلمي علينا كلنا وادهم لاء ؟
” نهال وشها احمر اوي ومعرفتش ترد وادهم ابتسم اوي علي شكلها بنسباله نهال ليها طله خجوله بس حلوه ”
نجوي بضحك : يا ام ادهم متحرجهاش بكرا يكتبو الكتاب ويسلم وياخد راحته ياستي
” كلام الستات مبيخلصش قالها راشد في عقل باله ”
راشد : طيب بما اننا اتجمعنا للمره التانيه وادهم ونهال في بينهم وفاق وادهم جاهز ونهال جاهزه يبقي مفيش داعي اننا نأجل الفرح اعرفكم بشيخ محمد هو اللي هيكتب القايمه بإذن الله
الشيخ محمد ايتسم ليهم جميعا : ربنا يتمم الجوازه علي خير ان شالله ويجعل منها المال والعيال نقول بسم الله ” وبدء يكتب القايمه ”
” وبعد وقت كبير عدي علي ادهم بالتوتر لتحصل مشكله او اختلاف علي سعر القايمه لكن عدت علي خير وادهم مضي وانتهت مهمة القايمه ”
سلوي زغرطت وحضنت نهال : الف مبروك ربنا يتمم عليكم بخير يارب
نهال بيتسامه رقيقه : الله يبارك فيكي يارب
سالم بعد ما بارك للكل وهو حاسس بفرحه كبيره : طيب بما ان القايمه اتمضت عايزين نحدد معاد لكتب الكتاب والفرح بقا
راشد ببتسامه : والله انا كدا بدأت مهمتي تخلص دي بداية مهمة ادهم يشوف المعاد اللي يناسبه هو ونهال ويعرفونا وبكرا ان شاء الله هنجيب العزال ونيجي عندكم
ادهم ابتسم :تشرفونا بإذن الله ” وبص المره دي لنهال ” والله انا شايف انكم تسبونا نتفاهم ونتناقش انا ونهال في معاد الفرح دا لو ١٠ دقايق
” نهال ابتسمت وبدء التوتر يروح لأنها فكرت انه من الشخصيات اللي ممكن تقرر عندها وتلغي شخصيتها ”
راشد لما شاف ابتسامة نهال قلبه ارتاح وقال : طيب نهال خدي ادهم علي البلكونه اتكلمو شويه مع بعض
نهال وقفت وقال بصوت هادي رقيق : اتفضل يا ادهم
” ادهم ابتسم ومشي قدامها عرفته مكان البلكونه راحو وقفو قدام السور ”
ادهم بصلها ببتسامه خفيفه : اظن التوتر بدء يخف عن المره اللي فاتت
نهال بخجل : يعني
ادهم بص قدامه وهو مبتسم : واحده واحده كل حاجه هتبقي تمام المهم انتي شايفه انك جاهزه ولا اي ؟
نهال بصتله وبدء الخوف يحتل قلبها : جاهزه لإيه للفرح ؟
ادهم بتنهيده : بصي احنا دلوقتي بنقرر حاجه مع بعض لو قولتي مش جاهزه مفيش حاجه هتحصل يبقي ليه الخوف اللي انا شايفه دا
نهال بصت في الارض وبدأت تفرك اديها في بعض : مش خوف ممكن بس قلق علشان هتنقل حياه جديده معرفش عنها حاجه مع ناس تانيه الله اعلم هعرف اتعامل معاهم ولا لاء يمكن دا قلقي بس
ادهم ببتسامه حنونه : وانا فين من كل دا الحياه الجديده دي زي ما هي جديده عليكي هي برضو جديده عليا هبقي معاكي خطوه خطوه لو قلقانه هطمنك خلي عندك فيا ثقه ومتقلقيش من حاجه طول ما انا موجود
” كلامه ونظرة عيونه طمنوها بشكل مفيش حد في الدنيا قدر يطمنها كدا الخوف اللي كان مالي قلبها اتشال واتبدل مكانه راحه وسكينه ”
ادهم لاقي منها صمت ف اتكلم : هاا ياست البنات اقول يوم الخميس الجايا وعلي بركة ربنا
نهال بصتله بدهشه : الخميس الجاي اللي زي النهارده ؟
ادهم : احنا قولنا ايه متقلقيش طول ما انا معاكي اديثني الثقه وانا اوعدك مش هخذلك ابدا قولتي اي ؟
نهال بقلة حيله : قولت خير اللي انت شايفه صح اعمله
ادهم ابتسم اوي : يبقي علي بركة الله بكرا بإذن الله عزالك هتيجي وهتتلهي في الفرش هحاول اخطفك ساعتين منهم ننزل نشوف قاعه مطابقه للمعاد
نهال ببتسامه : خلاص اتفقنا
” ادهم ونهال اتفقو علي معاد فرحهم اللي لسه عليه بالضبط اسبوع ، ادهم خرج وطلع قعد معاهم في الصالون ”
ادهم : بإذن الله الفرح يوم الخميس الجاي
” سلوي وزينب ونجوي زغرطو في صوت واحد ، والكل سلمى علي ادهم ونهال ”
ادهم ببتسامه : بس اسمحولي اخد نهال وننزل نشوف قاعه مطابقه للمعاد لان مفيش عندنا وقت خالص
راشد هز راسه بموافق : مش هوصيك متتأخرش
ادهم : ساعتين زمن ومش هتأخر والله
راشد بمرح : ابوك وامك هنخليهم هنا علي ما تيجي
ادهم برفع حاجب : واحده بواحده يعني
صلاح بضحك : او يمكن علشان يجيبك بدري
ادهم ضحك بعدين اتكلم بجديه : لاء والله مش هنتأخر هي قاعه واحده بس اللي هنشوفها ويارب يبقي المعاد متاح ونخلص
” ادهم اخد نهال ونزلو ركبو العربيه وهي متوتره اوي وبدون اي سبب ، ادهم حاسس بتوترها ومش فاهم سببه ايه ”
ادهم بصلها وهو سايق : انتي متوتره اوي كدا ليه ؟
نهال بتوتر واضح : لاء ابدا مفيش انا مش متوتره يمكن بس بطني وجعتني لان شربت بيبسي كتير
ادهم ببتسامه جذابه : شكلك من البنات اللي بتحب اكل برا والكلام دا
نهال ابتسم وبدء التوتر يخف : بحب كل الاكل من برا وومكن اكل اي حاجه من برا مع ان مش بحبها وهي في البيت ومستحيل احطها في بوقي بس لو هي برا اكل منها عادي
ادهم : طيب بتحبي اي من برا مثلا اكلتك المفضله اي ؟
نهال بتلقائيه : البقلويظ دا عشق ملووش نهايه بنسبالي
ادهم ضحك : بتحبي الفسفور بمعني اصح يعني بقلويظ جمبري اي اسماك مثلا
نهال : مبحبش الجمبري شكله بيقرفني ف مش من مفضلاتي ممكن الكابويا بحبها بس مش اوي برضو وانت اكلتك المفضله ايه ؟
ادهم بتفكير : بحب الكوارع وبحب لحمة الخروف تقريبا دول اللي ممكن افضل اكل منهم مشبعش غير كدا بنسبالي عادي المهم طلعينا من فقره الاكل اللي دخلنا فيها دي وقوليلي حابه القاعه مقفوله ولا مكشوفه
نهال ببتسامه : لو مكشوفه تبقي كويسه لكن لو مش متاح مكشوفه المقفوله حلوه برضو
” ادهم ابتسم ووقف قدام القاعه اللي هي عجباه ونزل وهي نزلت ، ومد ايده علشان يمسك ايدها في البدايه هي اتوترت وكانت هترفض لكن لقت نفسها بتمسك ايده ، ادهم ابتسم و صغط علي اديها ودخل بيها لجوا ”
مدير القاعه قابلهم : نورتونا يا فندم حابب تتفرج علي القاعه ؟
ادهم ابتسمله : بص انا معنديش وقت اضيعه ف حابب اشوف يوم الخميس الجاي القاعه فاضيه ولا مش فاضيه لو فاضيه نتفرج ونحجز لو مش فاضيه نمشي من غير ما نعلق نفسنا بيها
المدير بتقدير : تحت امرك يا فندم هشوفلك حالا ان كانت القاعه فاصيه ولا لاء ” ومشي يشوف المعاد فاضي ولا لاء ”
نهال بفرحه من جمال القاعه : يارب المعاد يبقي فاضي القاعه شبه القصر
ادهم : ايوا القاعه فعلا جميله بإذن الله المعاد يكون فاضي
نهال فتحت فونها واترددت تقوله ولا لاء : لو ممكن بس معلش ممكن تصورني هنا ؟
ادهم ابتسم واخد منها الفون وقال بمرح : دا شرف ليا يافندم روحي اقفي
” نهال وقفت وابتسمت ابتسامه خطفت قلب ادهم وصورها صوره جميله ”
المدير جيه عليهم وقال :
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية جوازة صالونات)
