رواية تحت أمر الحب الفصل الثامن عشر 18 بقلم شيماء صبحي
رواية تحت أمر الحب الجزء الثامن عشر
رواية تحت أمر الحب البارت الثامن عشر
رواية تحت أمر الحب الحلقة الثامنة عشر
اتجهت داليدا لمكتبها وهيا ماسكة إختبار الحمل في ايديها حطتة قدامها علي المكتب وهي بتبص عليه بتفكير، فضلت نص ساعه علي نفس الوضع لحدما تيلفونها رن وكان المنبه اللي بيعرفها ان دا وقت الرحيل..
انتبهت لنفسها وقامت غيرت هدومها وبعدها حطت إختبار الحمل في شنطتها وخرجت من المكتب..!
-انتي مروحة يا دكتورة؟
سألتها إحدي الممرضات وهيا بصالها بابتسامة.
داليدا هزت راسها وقالت:أيوا يا هنا بس انا عايزة منك خدمة صغيرة..
الممرضة قربت منها بإنصات وقالت :إتفضلي يا دكتورة أنا تحت أمرك..!
داليدا أخدت نفسها وقالت: انتي عارفة ان قسم النساء والتوليد مش شغال دلوقت ..!
الممرضة هزت راسها وقالت :ايوا!
داليدا بصتلها وهزت راسها وقالت:طيب في واحدة صاحبتي كانت شاكة انها حامل ولما جابت إختبار حمل لقت ان شكها طلع صح بس اتفجات من شوية ان جوزها جاي بكره الصبح من السفر وهيا بتسألني لو أعرف اي دكتور يكون فاتح دلوقت تروح تسأله لو ينفع جوزها يعني يقرب منها ولا لأ علشان كانت سمعت ان ممنوع في الشهور الأولي..!
الممرضة ضمت حاجبها بإستغراب وقالت: وهيا حبكت دلوقت تروح للدكتور متخليها بكره !
داليدا بصتلها وضحكت وهيا بتخبط علي كتفها بهزار وبتقول: تصدقي صح بس انا هقولها كده ازاي وبعدين انتي متجوزه وعارفه لما الراجل بيرجع من السفر بيبق عامل ازاي..
الممرضة هزت راسها وهيا بتقول: صحيح عندك حق يا دكتورة..؟
داليدا ابتسمت وهيا بتقول:طيب متعرفيش دكتور مين اللي يبق فاتح دلوقت..
الممرضه هزت راسها وقالت: مش عارفة بس انا برضوا بفكر اهو!
داليدا هزت راسها وهيا مركزه معاها لحدما الممرضة قالت:عرفت في دكتور هو مش بعيد اوي عن هنا بس زمانه فاتح لان العيادة بتاعته بتكون فاتحة علي مدار ال ٢٤ ساعه علشان حالات الطوارئ يعني!!
داليدا ابتسمت بفرحة وهيا بتقول:طيب قوليلي عنوانه بسرعه خليني اعرفها!
الممرضة هزت راسها وقالتلها علي العنوان وداليدا كتبته علي تيلفونها وبعدها قالت:شكرا اوي يا هنا ومتقلقيش ليكي الحلاوة بتاعتك !
هنا ابتسمت بخجل وبعدها داليدا ودعتها و مشيت من قدامها وهيا حاطة إيديها علي قلبها لانها عارفة ان حاجة زي دي لو حد عرف عنها هنا في المستشفي هتكون فضيحة بجلاجل!!
خرجت داليدا من المستشفي واتجهت علي العنوان اللي الممرضة هنا قالتلها عليه..
وصلت بعد وقت وكانت عيادة مش كبيرة ولاكنها فعلا فاتحة ومكتوب عليها مفتوح علي مدار ٢٤ ساعه..!
اخدت نفس طويل وهيا بتدخل واول ماشافتها الممرضة اللي موجودة هناك قالت بتساؤل:تحبي اساعد حضرتك في حاجة..!
داليدا قربت منها وادتلها مبلغ من المال وقالت:أنا عايزة اكشف !
الممرضة بصت للفلوس بابتسامة وقالت:اتفضلي يا مدام الدكتور موجود جوا..!
داليدا هزت راسها ومشيت وراها لحدما وصلوا عند مكتب في اخر الطرقة الممرضة فتحتلها الباب وقالت:اتفضلي يا مدام..
داليدا دخلت وهيا بتبص علي المكان بتوتر وأول مشافت الدكتور اللي قاعد علي المكتب وبيلعب في التليفون قلقت أكتر وقالت: مساء الخير يا دكتور..!
الدكتور انتبه عليها وقال بابتسامة:لمؤاخذة يا مدام اتفضلي مساء النور ..
داليدا هزت راسها وهيا بتقعد علي الكرسي الي قدامه وقالت:أنا حامل..!
الدكتور بفرحة:بجد ألف مبروك يا مدام..
داليدا بصتله باستغراب وقالت:قصدي يعني لسا عارفة من شوية اني حامل بس كنت عايزة أعرف انا في الشهر الكام..
الدكتور هز راسه وقال:طبعا اتفضلي نامي علي السرير هنا..
داليدا سابت شنطتها علي الطرابيزه وقامت وقفت وهيا بتقرب من السرير ونامت عليه..
الدكتور قرب منها ومسك جهاز وقربه من بطنها وقال :شهرين وزيادة يعني ممكن واسبوع كده .!
داليدا هزت راسها وقامت وبصتله وقالت:طيب انا عارفة اللي هقوله هيكون غريب بس انا دلوقت منفصلة من شهرين ونص وطليقي مسافر وانا عمتا مكنتش مستعده خالص ان يحصل حمل فكنت بسألك يعني في فرصة اني أنزل الحمل دا..!
الدكتور بصلها بصدمة وقال:لا حول ولا قوة الا بالله ليه بس كده يا مدام دا رزق وغيرك مش لاقيه فكري كويس دا في ناس بيقعدوا بالسنين يتمنوا بس ضفر عيل!!
داليدا هزت راسها بتفهم وقالت:انا فاهمة كل الكلام دا بس انا بقولك طليقي مسافر واحنا مستحيل نرجع تاني ..؟
الدكتور هز راسه بالرفض وقال:ومين يعلم يا مدام ما يمكن العيل دا اللي يرجع كل حاجة تاني بس انا برضوا هرد علي سؤالك وأقولك :مينفعش للاسف ينزل لانه عدي الشهرين يعني ثبت ودلوقت هو مستمر في النمو يعني لو نزل هيضرك جامد ؟
داليدا هزت راسها وقالت بحزن كبير :انا متشكرة علي تعبك معايا يا دكتور وانا هفكر كويس في كلامك بعد اذنك..
الدكتور كان لسا هيتكلم ولاكنها اخدت شنتطها وخرجت بسرعه وهيا بتعيط ومكنتش مصدقة انها دلوقت بقت شايله روح تانيه داخل بطنها ..؟
طلعت علي الطريق وهيا بتدور علي اي تاكسي يوصلها لبيتها ولاكنها ملقتش لان الساعه كانت داخلة علي ٢ ونص فقررت تمشي شويه لحدما توصل للطريق العام وهناك ممكن تلاقي اي تاكسي ..؟
بعد طريق اخد منها عشر دقايق وقفت وهيا بتاخد نفسها لان بطنها كانت وجعاها لقت عربية بتقرب منها شاورتلها تقف وهيا بتقول : تاكسي؟؟
صاحب العربية بصلها بإعجاب وقال:مش تاكسي بس ممكن أقلبه حالا لتاكسي !!
داليدا رجعت خطوة لورا وقالت:لا شكرا اتفضل..
السواق بص لجسمها بابتسامه وقال:لا اتفضل ايه دنا لازم أوصلك مينفعش واحدة زيك تقف كده لوحدها في الوقت دا..؟
داليدا اتعصبت أكتر من كلامه وزعقت فيه وقالت:قولتلك شكرا مش عايزة حاجة ممكن تمشي..
السواق قرب منها وهوا بيتكلم بنفس الاسلوب الجرئ وكانه شارب حاجة مخلياه مش في واعية وقال:دنا لو مشيت أبق غبي أوي !!
داليد بصت حواليها علشان تشاور لاي حد ينقدها ولاكن العربيات فجأة اختفت ومفيش ولا وحدة عدت داليدا صرخت وهيا بتقول:لو قربت أكتر هآذيك،.
السواق شدها من دراعها وقال:وأنا موافق لو ايدك الحلوة دي اللي هتضربني!!
داليدا استجمعت قوتها ولسا هتضربه راح مسك ايديها التانيه وقال: انتي شرسه ليه منا قولتلك هوصلك::
إبعد عني يا حيوان !! قالتها بغضب وهيا بتزقه جامد لدرجة انه وقع علي الارض..
السواق عينه لمعت بالغضب وقال :بق كده طيب !!
لسا هيشدها لقي ايد قوية بتضربة وبتوقعه علي الأرض بص لقي شاب بيبصله بغضب وبيقول: لو متحركتش دلوقت هكون مخلص عليك..
السواق سند نفسه بوجع وقام ركب عربيته وساقها بسرعه والشاب دا بص لداليدا اللي كانت حاطة ايديها علي راسها علشان تتفادي اي خطر!!
قال بتساؤل:إنتي كويسة يا أستاذة؟؟
داليدا نزلت إيديها وهيا بتبص حواليها لقت ان السواق مشي واول مشافت الشاب اللي قدامها ضمت حاجبها باستغراب وقالت:انت!!
حازم باستغراب هو كمان قال:هو انتي؟؟
داليدا مسكت شنتطها وهي بتقول بغضب:هي ايه السخافة اللي بتحصل دي .. فالت كلامه ومشت..!
حازم بصلها باستغراب لانها تقصدة بالسخافة وقال:انتي قليلة الزوق علي فكرة انا انقذتك منه..!
داليدا لفتله وقالت :شكرا علي انقاذك..؟
حازم بص عليها وهيا مكملة طريقها وكأن محصلش اي حاجة وقال: شكرا مش كفاية ، بس انتي رايحة فين!!
داليدا ردت عليه من بعيد وقالت: في داهية؟
حازم استغرب ردها فقرب من عربيته وساقها وهوا بيقرب عليها وبيقول :اركبي انا هوصلك..؟
-لا شكرا انا هتصرف’
صدقيني الوقت اتاخر ومفيش عربيات بتيجي هنا كتير..
داليدا وقفت وهيا بصاله وقالت: طيب وديني لاخر الشارع دا؟
حازم هز راسه بالموافقه وفتحلها الباب وقال:طيب اركبي..
داليدا ركبت جمبة وهيا بتحط ايديها علي بطنها لأنها بتوجعها وهو لما لاحظها قال باستغراب:شكلك حامل!
داليدا فتحت عينيها من الصدمة وهيا بتقول باستغراب:أفندم؟
حازم بصلها وقال:اي دا يعني مش حامل..
داليدا اخدت نفس طويل وهيا بتبصله وبتقول:ممكن متتكلمش معايا علشان انا مش طايقة اي حد خالص خصوصا لو كان راجل..؟
حازم بابتسامة:ياه دا شكل الموضوع كبير احكي احكي انا سامعك..
داليدا ضغطت علي ايديها بغيظ ولفت وشها وهيا بتبص علي الطريق وهوا ضحك علي حركتها وقال:خلاص متزعليش دنتي قفوشه اوي يا داليدا؟
داليدا بصتله باستغراب وقالت:انت عارف اسمي منين’ حازم هز راسه وقال:من وقت مكنتي عند شريهان وعرفتني عليكي!
داليدا هزت راسها وقالت:طيب متعرفهاش انك شوفتني بق!
حازم ضحك وقال:ليه خايفة تعرف انك حامل..
داليدا صرخت في وشه بضيق وقالت:حامل ايه انت كمان اسمع بق لو هتفضل تهزر كتير يبق تنزلني احسن..
حازم ضحك وهز راسه بمعني انه مش هيتكلم تاني وبعد شويه اتكلم و قال:طيب قوليلي عنوانك فين ومتقلقيش مش هقولها حاجة !
داليدا بلعت ريقها وقالت:طيب .
قالتله علي عنوان شقتها وسندت بضهرها علي الكرسي وهيا بتفكر هتعمل ايه في الكارثة اللي وقعت فيها ..
حازم كان متابعها طول الطريق واول ما وصلوا عند العماره قال:هي دي العمارة..
داليدا انتبهت ليه وبصت علي العمارة وهزت راسها وبعدها بصتله وقالت:شكرا !
حازم هز راسه وهيا اخدت شنطتها ونزلت وهو فضل مكانه لحدما هيا دخلت وبعدها اتحرك…’
تاني يوم الصبح صحيت داليدا وهيا حاسة بصداع شديد في دماغها قامت من علي السرير وهيا بتشجع نفسها علشان متكسلش وتروح للمستشفي ولاكنها وهيا ماشيه بتبص علي طريقتها لقت ان رجليها مفتوحة شويه عن العادة قالت باستغراب:يا حلاوة ابتدينا !!!
دخلت للحمام غسلت وشها ورقبتها وبعدها خرجت قعدت في الصالون وهيا بتبص علي التلفزيون مسكت الريموت وشغلته وهيا بتسند ضهرها وبتقول:هتعملي ايه يا بنت يوسف في المصيبه اللي وقعتي فيها ..؟
تيلفونها رن وهيا اول ما انتبهت للصوت قامت ودخلت اوضتها ومسكته وهيا بتبص علي اسم المتصل وبتقول بهمس دنيا .. فتحت عليها وقالت:صباح الخير يا دنيا !!
دنيا بابتسامة:صباح النور يا أحلي دكتورة قوليلي هتعملي ايه النهاردة..
داليدا باستغراب:هعمل ايه في ايه مش فاهمة..
دنيا ضحكت وهيا بتقول: مش احنا متفقين نخرج النهاردة ..
داليدا ضمت حاجبها وهيا بتبص في التاريخ وبتشوف النهاردة ايه قالت بعدما لقت انه الجمعه قالت :امممم طيب بقولك ايه انا تعبانة النهاردة ومش هعرف اخرج تعالي انتي عندي وخلاص..!
دنيا هزت راسها وقالت:ألف سلامه عليكي يا روحي .
داليدا ردت عليها وقالت:الله ي سلمك يا حبيبتي .
دنيا قالت بحماس :طيب ماشي انا هقوم اجهز واجيلك علشان نقضي اليوم كده من اولة وعلشان برضوا عندي كلام كتير عايزة أقولك عليه ..
داليدا هزت راسها بالموافقة وقالت: طيب ماشي بس ابقي هاتيلي اكل وانتي جايه علشان مكسلة اقوم اطبخ..”
دنيا:طيب متقلقيش انا هظبت الجو.
داليدا ابتسمت وقالت:طيب يلا اقفلي بق علشان انام شويه على ما تيجي..
دنيا ضحكت وهزت راسها وقفلت معاها..
داليدا حطت التيلفون علي السرير وهيا بتلم شعرها وقررت انها هتقعد ترتاح لحدما دنيا توصل وتعرفها بكل حاجة ويشوفوا حل مع بعض..!
وفي قصر الصاوي كان رشاد قاعد بيفطر وقاعد قدامه عمار اللي بياكل وهوا ساكت..
رشاد بتساؤل:قولت ايه!
عمار ضم حاجبة بإستغراب وقال:قولت ايه في ايه؟
رشاد ضحك وهو بيقول:دنتا تايه خالص هو انت لسا بتفكر فيها ولا ايه!
عمار بصله بغضب وهوا هز راسه وقال:طيب انا قصدي يعني قولت ايه في الكلام اللي قولتهولك امبارح بخصوص دنيا ..
عمار ضم عينيه بتذكر وقال: ايوا مالها دنيا..
رشاد كتم ضحكته وقال:كويسه بس انا كنت عايز اطلب ايديها وانت اخويا الكبير وطبعا لازم تيجي معايا..؟
عمار هز راسه وقال: امم طيب خليها تاخد ميعاد مع ابوها وانا معنديش مشكله !
رشاد هز راسه وقال:طيب انا هبق اكلمها النهاردة واقولها،
عمار هز راسه وبعدها وقف وهو بيقول:انا رايح المخزن عندنا عمليه كبيرة النهاردة..
رشاد بصله بانتباه وقال:طيب استني اجي معاك.
عمار هز راسه بالرفض وقال:لا خليك انا بس هأكد عليهم كل حاجة وهرجع تاني!
رشاد هز راسه وعمار مشي !
وعند دنيا كانت لبست وخرجت من البيت وهيا بتقول:ماما انا رايحة لداليدا وجميلة لما تصحي وتسال عليا عرفيها اني في مشوار !
مامتها هزت راسها وقالت:طيب يا حبيبي ابقي سلميلي عليها !
دنيا ابتسمت وهزت راسها وقالت:يوصل يلا مع السلامة. مامتها هزت راسها ودنيا خرجت من البيت..و قربت من مطعم قريب من بيتها وطلبت سندوتشات للفطار وبعدها راحت السوبر ماركت جابت منه شوية سناكس وعصاير وركبت تاكسي وراحت لبيت داليدا !!
في عربية عمار كان سايق وهو مش مركز لانه بقاله يومين منامش فوقف العربية وهو بيسند راسه علي الكرسي بتعب واول ما غمض عينيه صورة داليدا وهيا بتعيط ظهرت قدامة..
فتح عينيه بقلق وهو بيبص حواليه ولقي انه في شارع جانبي مسح علي وشه بضيق وبعدها شغل العربية واتحرك بيها للمخزن ..!
وفي بيت داليدا صحيت علي صوت رن الجرس قامت وهيا بتسند علي ضهرها بتعب وبتقرب من الباب علشان تفتحة..
دنيا اول ماشافتها وكان واضح عليها الارهاق قالت بقلق: دودو انتي كويسة!
داليدا هزت راسها ودنيا دخلت وقفلت الباب وراها.
دنيا بقلق:شكلك مش بخير خالص في ايه..
داليدا قعدت جمبها وهيا بتسند راسها علي كتفها وبتقول بحزن: قولي مفيش ايه انا في كارثة؟
دنيا بصتلها بإنتباه وقالت:كارثة ايه قولي وإن شاء الله متكونش كبيرة..
داليدا حركت راسها بلأ وقالت: لا كبيرة بس قبل ما هقولك عليها لازم توعديني ان مهما يحصل محدش يعرف بالكلام دا!
دنيا ازداد الشك في قلبها فقالت بجدية:أوعدك يا داليدا إن مهما يحصل الكلام اللي هتقوليه مش هيطلع لحد ابدا..!
داليدا ابتسمت وهيا بتبعد عنها وبتقول:أنا حامل من عمار ..
دنيا فضلت بصالها من غير ما تتحرك وداليدا من خوفها ضربتها بالقلم وقالت:دنيا انتي مُتي.
دنيا انتبهت ليها وقالت بصدمة:إنتي قولتي ايه..
داليدا بصتلها وهيا بتقول:لسا عارفة إمبارح طلعت حامل بقالي شهرين واسبوع..
دنيا ابتسمت وقالت:الف مبروك يا داليدا دا خبر كويس جدا..
داليدا هزت راسها بالرفض وقالت:بالعكس دا خبر سئ جدا انا بقولك من عمار فاهمة يعني ايه عمار..
دنيا سكتت وداليدا كملت كلامها وقالت: بعد كل اللي حكتهولك والتجربة اللي مريت بيها معاه وتقوليلي خبر حلو..
دنيا هزت راسها بحزن وقالت:انا اسفة يا داليدا مش قصدي بس انتي هتعملي ايه..
داليدا حركت راسها وهيا بتقول:مش عارفة يا دنيا الدكتور بيقول مينفعش ينزل علشان ثبت ولو نزل انا هتآذي ..
دنيا فتحت عينيها وقالت بتساؤل:يعني هتسيبيه..؟
داليدا هزت راسها وقالت:مفيش قدامي حل تاني بس مش عارفة هسيبة ازاي ومحدش يعرف اني كنت متجوزه أصلا..!
دنيا هزت راسها وهي بتفكر وقالت:بسيطة بما انك هتسيبيه وفي نفس الوقت مش عايزة عمار يعرف او اي حد عمتا يعني يبق الحل الوحيد انك تتجوزي..
داليدا هزت راسها بالرفض وقالت:مينفعش يا دنيا مينفعش وبعدين اتجوز مين انتي فاكراة ان حد هيصدقني اصلا لو قلتلهم اني كنت متجوزه قبل كدة وان اللي في بطني دا ابن جوزي وانا حتي معيش اللي يثبت ان كلامي حقيقي ..
دنيا بتفكير :طيب هتعملي ايه ..
داليدا قالت وهيا بتبص علي الارض بتفكير:هسيب القاهرة!!
دنيا شهقت بخضة وهيا بتقول: تسيبي القاهرة؟؟؟؟ هتسيبي القاهرة وتروحي فين ..!
داليدا بصتلها بتفكير وقالت: اي مكان الاسكندرية مثلا هروح هناك وابدأ حياة جديدة ولو ربنا كرمني وخلفت هربي ابني او بنتي زي ما يجي ونعيش هناك وننسي كل حاجة مريت بيها..!
دنيا هزت راسها برفض وقالت:لا يا داليدا انا شايفة انك تعرفي عمار انك حامل وهو يردك تاني وخلاص..
داليدا وقفت وهيا بتبصلها برفض وقالت:عمار مش لازم يعرف اني حامل ولا اي مخلوق علي وجه الارض لازم يعرف انا معايا قرشين محوشاهم من وقت ما اشتغلت في المستشفي اقدر اروح هناك وابدا بيهم حياة جديدة بس قبل ما همشي هسيب معاكي سري ودا هيكون مقابل حياتي يا دنيا..
تتوقعوا دنيا هتوافق علي كلام داليدا ولا هتخلف وعدها..؟
وهل عمار هيعرف الحقيقه ولا داليدا هتنفذ خطتها!!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية تحت أمر الحب)
