رواية انكسار الياسمين الفصل الرابع 4 بقلم أمل مهدي
رواية انكسار الياسمين الجزء الرابع
رواية انكسار الياسمين البارت الرابع
رواية انكسار الياسمين الحلقة الرابعة
منك انه شحصلت غير المرار
ودمعة اعيوني وسواد اجفونها
وحرگ اعصاب وسهر شتذكر اوف
طلعتها وياي من ماعونها
الشاعر يحيى العلاق
**************
سيد علي _
صعدت سيارتي وطلعت اسوق سريع
شبي ابويه…..!!!!
الف فكره وسؤال اجه على بالي ابويه يتعب هوايه الشغل بالشورجه وهم رايح جاي
على بيته الثاني بالنجف
وصلت المستشفى ركنت السياره وركضت جوه ادور بالوجوه
تلاكيت ويه واحد تاجر جيران محلنه هناك اسمه مالك
مالك _ اشرلي
اهنا سيد تعال…
_ اجيت بسرعه شبي ابويه
_ صعد الضغط عنده لا تخاف
_ اباوع ابويه نايم والجهاز على صدره
يابه شخيرج ليش هيج وكعت
سيد حسين _ لا تخاف علاوي بويه مابيه شي
الطبيب _ لا تعبو بالحجي
السيد _ دكتور ابويه شعنده
الطبيب _ ذبحه وتلاحكناله
يبين هواي يجهد روحه
السيد _ يعني عدت سلامات لو تأثر مستقبلا
الطبيب _ اني افضل تراجعون طبيب اختصاص
يفحص كلبه….!!!!
من ساعته تيقنت لازم استعد الحمل المسؤليه كاملا
ابويه تعب
رجعته للبيت تلكوني امي وخواتي
اميمه _ سوده عليه سيد بيه ولا بيك
سيد حسين _ ما بيه شي اشبيج خايفه خطيه البنات خوفتيهن
اميمه _ اشصارلك طلعت مثل الورد ونزلت دموعي
علي _ يمه كال الدكتور لا اتعبو خلي يرتاح وينام وباجر اشوفله طبيب اختصاص
رجعت للمحل المغرب
تحاسبت ويه سالم وعزلت المحل واني اقفل البيبان
رافع _ شلونك سيد خير اشبي الوالد
السيد _ هله رافع والله امبين موزين مشكلته بالقلب
رافع _ لااا ما يستاهل سيد حسين
انشالله عنده العافيه
السيد_ الله يعافيك…منو كلك…؟؟؟
ياسمين من جايه عليك سالم
كللها واجتني كالتلي
السيد _ ها والله كلشي نسيت
طلعت من المحل مثل المجنون
رافع _ الله يساعدك
عرضت ابويه على الطبيب
كال اذا تكررت تفقد ابوك ولازم ما يتعب راحه تامه
عنده تصلب وضيق بالشرايين انطاني علاج ورجعنه للبيت
سيد علي _ يابه من اليوم انته ارتاح اني ادير الشغل
سيد حسين _ وانته شصير
للكليه للمحل لو للبيت لو هناك بالشورجه
_ عادي يابه اتعلم ونحط عمال هم
_ الله كريم ابني اصير زين واشوف
من هذا اليوم بده الضغط عليه
اكعد الخمسه الصبح واباشر بالشورجه للثنعش ابقي العامل بمكاني واروح للكليه وارجع اشوف محلنه بالسوك
بحيث هوايه ايام اغفي بالقاعه أثناء دوامي بالكليه
ابويه تحسنت صحته بس شغلته بس يراقب وعنده بالمحل تلفون ارضي يتواصل ويه التجار
اني ذراعه اليمين والعمال
جوه ايده
صار اكثر من شهر ما شايف ياسمين اشتاقيتلها
عزلت المحل ومريت بحجة اشوف رافع
دكيت الباب….منو
رافع _ لك هلو هاي وين الغيبه
السيد _غركان بالشغل مو تدريني
رافع _ اشتاقيتلك يمعود كم مره اجيك للمحل ما الكاك
السيد _ شخبارك…!!!
كلته وعيني على باب الهول بلكت تطلع
رافع _ نفس الوضع ما عدى راح يجيني ولي العهد
السيد _ مبروك الله يتمملك
_ اشكرك شنو وين ياسمين
_ هسه تجي هنا أبيت خالتي
_ ها تمام
شويه كعدنه انسولف ودخلت ياسمين تتمشه حسيتها كبرانه
رغم ما عفته غير شهر
رافع _ هاي اجتك ياسمين
تعالي يم عمج اكوم اجيبلك جاي
ياسمين _ اشلونك عمو
السيد _ اشلوني ملعوب بحالي
يا ياسمينه
_ يوميه اجي للمحل ما الكاك
بس سالم
_ بعد لا تجين اني بس بليل اجي للمحل
_ مو اريد اشوفك….!!!
_ باوعتلها رغم زغيره بس كلامها يأثر بيه
اني اجيج للبيت وتشوفيني
_ اي عفيه عمو يوميه تعال
_ ياسمين انتي هم تشوفين محمد من ترحين أبيت خالتج…؟؟؟
_ اي بس اني معليه بي
_ اي عفيه والاحسن لا تروحين هناك
_ سكتت واني اباوعله لييييييش….!!!
_ اخاف عليج لا طلعين من البيت بس للمدرسه وارجعي كبل للبيت لا تحجين ويه ولد
_ هههه بس وياك احجي
_ اي عفيه..
رافع _ ياالله تفضل الجاي
السيد _ تسلم ايدك
رافع _ رغم مشاكل ايمان ماشيه حياتي من تكلب عليه أقنعها
بمحبس ذهب بفلوس تنزل ويه امي للسوك تشتري واخلص من مشاكلها مستخطي خالتي خطيه تحبني وما ترضالها مره تعبانه
وهذا محمد واحد صاقط
مابي خير الامه ابد يلم اليوميات مالته ويروح
ويه صحبانه يومين ثلاثه يصرفهن على سوالفه التعبانه
ويرجع جيبه فارغ يجدي الجكاير
ولدت ايمان ابني البكر حسن
كانت فرحتي ما سايعتني
طول عمري وحيد اجه السند والظهر اجه صاحبي وابني
ذبحت ذبيحه وعزمت الجيران
ومن ضمن العزمتهم سيد علي واحمد
رافع _ والله لو ما جاي جان زعلت عليك….
السيد _ اليوم فرغت روحي الك مشتاقلكم صار هواي ما
منجمعين سويه
احمد _ اي والله اخذنه الشغل
والحياة كمنه نركض وما نلحك
رافع _ هاي سنة الحياة بعد
ياسمين _ من سمعت السيد جاي كلبي رفرف اريد اشوفه واخاف رافع ميقبل يكول صرتي جبيره لا طلعين كدام صحباني
رافع اريد اسلم على السيد
_ اني مو كلت عيب بعد كبرتي ممنوع مطلعين…!!!
رجعت مقهوره كعدت على بايات الدرج ورافع ومحمد ينكلون بالمواعين مال الاكل للاستقبال
تدنيت يم الباب اشويه اباوع بين الزلم وشفته مدنك راسه ويسولف ويه احمد
ابتسام _ ارجعي ياسمين عليمن تباوعين ولج عيب يمه كلهم زلم
ياسمين _ اريد اشوف السيد
ابتسام _ عيب حبيبتي انتي كبرتي ما يصير تحجين ويه صحبان اخوج
_ كبرتي كبرتي شنو بعدني زغيرونه
رحت دخلت جوه ضايجه صار اشكد ما شايفته باوعت الروحي بالمرايه يمكن ميعرفني بعد صايره طويله
مو مثل قبل زقجه يكودني
يروح يشتريلي…
فضت العزيمه وكل واحد راح البيته
السيد _ ظليت كاعد اخر واحد انتظر بلكت تجيني تسلم عليه ماكو
واني ستحيت اگل الرافع
صيحلي ياسمين اشوفها
بعد سلمت وطلعت
سيد علي _ اني ادري السنه هيه سادس ابتدائي وتمتحن بكلوريا
كلبي ما نطاني ما اروحلها وذكرت من هيه زغيره تجيني تركض بالشهادة مالتها هسه صار هواي مشايفها
شغلي بعدني عنها
طبكت السياره اباب المدرسه
ووكفت يمها اشوف البنات بدن يطلعن وكلها تحل وتحجي بالامتحان
شفتها طلعت تتمشه بهدوء مغمضه عيونها من الشمس
وخدودها مصبوغه حمر من حرارتها
والكصيبه الشكره التتمايل ويه خطواتها
طولانه وشكلها كبران اشويه
مو ذيجه الطفله الزغيره
_ ياسميننننن ….
_ سمعت واحد صاح اسمي فزيت اعرفه هذا الصوت التفتت….السيد
ابتسمت واني اتمشه بتجاها
عمو السيييييد
_ هههه اي اني السيد اشلونج
_ غرغرت الدمعه بعيني ودنكت …زينه
_ شنو خجلانه تحجين وياي
_ صار هوايه ما شايفتك ليش جذبت عليه مو كلتلي يوميه
راح تشوفيني
_ اني ما جذبت والله مشغول
ومن اشوف رافع اسأله عليج ويكول انتي شاطره
ليش ما تطلعيني وتسلمين عليه من اجيكم
_ رافع يكول انتي كبرتي لا تطلعين يم صحباني
_ اي صح ما شاء الله صرتي مره
ياسمين_ باوعتله حتى انته هيج تكول
_ هههه اي لان كبرتي شعجب ما تتحجبين
_ كلي رافع بس اني ما احبه
_ واذا اني اكلج تتحجبين….؟؟؟
_ صفنت بوجهي ما ادري
_ اتحجبي لان حرام
_ بس لان حرام لو انته تريدني اتحجب
_ الاثنين لازم تعرفين ارضي الله أولا وبعدين يالله ترضيني لو ترضين رافع
_ سكتت…هم تجي بعد
_ ليش….ترديني اجي
_ ابتسمت اي اني ما عندي صديقات بس انته اعرفك
واحب احجي وياك
كالتها بخجل…
باوعت بده يفرغ الشارع
_ امشي اوصلج البيتكم
صعدت ويا واني بقمة السعاده
شعور بداخلي يفرحني من اشوفه احسه يحبني مثل رافع
ويخاف عليه
السيد _ لا تكولين الأحد اجيتج للمدرسه..
ياسمين _ تفاجأت من كال هيج….ليش
_ كولي تلاكينه على الشارع
وبس زين….!!!
_ ابتسمت زين
_ يله هاي وصلنه …
_ نزلت واني اباوعله
هم بعد تجيني….؟؟؟
_ ابتسمتلها اكيد اجيج
رفعت ايدي وسلمت عليها
_ اني هم رفعت ايدي وكلتله
الله وياك ….عمو
دخلت البيت تلكتني ايمان
_ الحكي شيلي حسن يبجي
علما اكمل الطبخ
رحت شلت حسن بيدي واضحكه
_ امي وينها اشو ماكو
_ كعدت من النوم امج ماكو
شمدريني وين مسيره وعافيتي غركانه بشغل البيت
_ ليش هيج تحجين على امي مو خالتج
_ اسكتي انتي
عوفيني بقهري اكرب بالبيت وارد ليوره
_ بيدي حسوني واباوعلها
مقهوره..
دخلت امي …
ابتسام _ ها يمه ياسمين اجيتي اشلونج بالامتحان
ياسمين _ يمه ايمان تكول انتي مسيره وعايفه الشغل عليها
ابتسام _ التفتت على ايمان
وين أسير يعني شايفتني عباتي على راسي وافتر بالبيوت انتي ماتوبين من اللسانج
ايمان _ خاله اصدكين هاي الجذابه
ياسمين _ لا والله انتي الجذابه مو حجيتي على امي
ايمان _ خل يجي رافع واشوف يعجبه انتي وبنتج عليه
ابتسام _ ولج احترمي اشويه مو ساكته ماريد رافع ينقهر وهو تعبان لشوكت اظل اضمضملج واسكت
ايمان _ بصوت عالي هسه اني صرت مو خوش شايله بيتج
وشايلتج انتي وبنتج وابنج لو مو اني جان حالكم بالضيم
ابتسام _ بعدني بعافيتي ليش بالضيم ولج وانتي شمسويتلي اني وبنتي..
ايمان تحجي وامي تحجي عله صوتهن
كان ظهر وقت رجعت رافع من الشغل
رافع. _ دخلت وضليت واكف بالطرمه اسمع ايمان صوتها عالي وكلمه تردها بعشره على امي
_ تعجبت هاي هيج ويه امي وياسمين …!!!
دفعت الباب وفتت كبل جريتها من شعرها
ولج تصيحين على امي امشي
بساع على بيت امج ماريدج بعد
ايمان _ تفاجات بي جلبت بايده عوفني اختك وامك يصيحن عليه
رافع _ولج مو سمعت باذاني
تجذبيني
ماريدج جزت نفسي منج مليت ياعالم مليت
ابتسام _ عوفها يمه شنو اني ما اعرفه متعوده على اللسانها لا تكبر الموضوع
رافع _ لا يمه معليج انتي خليني اني وياها
ايمان _ اذا اطلع ما اردلك بعد
رافع _ شنو تهدديني عساج لا رديتي
إيمان _ لبست عباتي واجيت اخذ حسن
رافع _ عوفي ما تاخذي
ابتسام _ عوفها تاخذه الطفل يرضع….
ايمان _ ما اطلع اذا ما أخذ ابني
رافع _ واني كلت ما تاخذي
سحبها من ايدها وطلعه بره وسد الباب
ابتسام _ انته ليش كبرتها
رافع _ اشتحجين يمه هاي هيج وياج وويه ياسمين من اني بالشغل ….؟؟؟
ليش متحجيلي
ليش اضميلها
ابتسام _ يمه هيه المره اشعده غير اللسانه
وامونه من عدنه وبينه واذا حجت اني خالتها وتمون عليه
_ اني خلص ما اتحملها مليت متحمله الخاطر خالتي تعبت
اعلم وانطي وما يفيد ما الها رده الهذا البيت بعد
ابتسام _ ارتاح يمه تعبان وصارت بوجهك وحترك دمك
الله يهديها
ايمان _
سحبني من ايدي وطلعني بالشارع وسد الباب
اني الك يارافع والله الا اخليك تتوسل بيه
تمشيت الامي دفعت الباب ودخلت ظهريه كاعده هيه ومحمد يتغدون…
راجحه _ خير شعجب وحدج جايه
ايمان _ طردني رافع واخذ ابني وبجيت
_ شمسويه يمعزايه….!!! ما يسويها رافع لو ما مسويه مصيبه
_ باوعتلها
بنفسي بيوم توكفين ويايه ليش كل ما اجيج ترديني
وطلعيني غلطانه
_ لان اعرف رافع شنو… رجال
ينشد بي الظهر عاقل وراكز وخايف الله ومداريج
_ بعد ماكلتي امه واخته اعز مني ومن ابني
_ ولج يثوله هو الرجال المابي خير لأمه واخته هم بي خير المرته
ولج شو امه خالتج وياسمين نسمه ما بيه أذيه على النمله
بس انتي ما تستاهلي وحده مثلج تشيله بعيونها
_ واني شمسويه النهار كله شايله بيته على راسي
_ غصبا ما عليج لعد شتردين خالتج تخدمج لو ياسمين
ثاني يوم اجت ابتسام ترجعها
_ كومي ارجعي وليدج يبجي عليج
ايمان _ ابنج مو طردني ما ارد بعد
_ من اللسانج نسيتي اسويتي بيه وبياسمين
حسن كضاها يبجي وهيه معانده ما ترجع
اخذته الها
بلكت ترضعه ويسكت ما رضت وكالت عناد برافع
ما ريده ولا اريدكم
_ لعد ظلي وشوفي منو يجيج بعد..
راجحه _ شوفي بنت عباس يو ما نعدلتي اوديج لابوج
انتي وحده متعافيه وانه مو حملج
_ لا تخافين من يسمع حامل راح يجيني ركض
_ وانتي ليش ما گلتيله من الاول
_ اريده يجي يتوسل مثل ما طردني
_ ياخوفي منج لا تخسرين
تاليتج
ظليت اسبوع اشتاقيت الابني
والصدك اني ضجت محمد يجي يتآمر عليه وامي على كد حالها ظليت احوس وكل اشويه اسأل محمد رافع ما سأل عليه
يگولي لا
راجحه _ امشي وياي ارجعج
لا تگوين راسج الرجال ما ينعاف وحده
_ ما ارجع الا يجيني هو واني اعرف اشلون اجيبه
وديت خبر بيد محمد اني مريضه لان حامل
يومين ودخلو علينه خالتي ورافع….
رافع _ هاي المره الوحيده القررت اخلص بيها من امونه من البدايه ماترهملي ولا تستاهل احطها ابيتي مره
وهم ما كدرت الوه ذراعي بابني الثاني رضى
سيد علي _٠٠
المعروف بعشيرتنه ماناخذ ولا ننطي الا الساده مثلنه ابا عن جد محد خالف هاي القاعده غير بس ابوي من اخذ امي البغداديه ولو هيه من عائله معروفه بس مو علويه وهذا الخله عمامي يجبرون ابويه يزوجني منهم حتى لا اخذ وحده من العوام ويرجعون ابويه العرفهم العلوي والا ما ياخذون خواتي الولدهم
خواتي المن ابويه تزوجن ولد عمامهن هناك
وعمي باقر
خطب ثنين من خواتي. الولده ونطاني بنته زينب
سيد حسين _ بويه علاوي راح يجون عمامك ويصير عقدكم بيوم واحد انته وخواتك
سيد علي _ يابه اني ما رايد ازوج واذا اريد اني اختار وين عايشين احنه بيا وكت بلكت بنتهم مغصوبه عليه
سيد حسين _ راح تجي وياهم
زينب بنت اخوي باقر وراح اشوفها وتحجي وياها انه متأكد راح تعجبك بعدين لو رفضتها تكسر بيه وانت وحيدي ترضاها لابوك كسرتي كدام عشيرتي
سيد علي _ لا يابه ما ارضاها الك
حصرني ابويه بزاويه لا أكدر اعانده وهو مريض
واني ادري بي ما يريدني اشذ عن عمامي وابتعد
ولهذا فرض عليه بنت عمي
نزلت راسي افكر بياسمين حتى إذا احجي بعدها زغيره
اجو عمامي خطبو خواتي
نسرين المهيمن وطيبه المؤمن واجت وياهم زينب شفتها عمرها بالعشرين متوسطة الجمال ومثقفه رغم ما مكمله جامعه
فتح ابويه موضوعها ولو همه من الأصل متفقين يعني هاي كلها شكليات وبسرعه اخذوها السوك الكاظم اشتروله الذهب وصارت خطبتي ويه خواتي عقدولنه
ولبسنه الحلقات بوسط لمة الاقارب
رافع _ صدك خطبت سيد
السيد _ والله شغله صارت بسرعه لا اني مقررها ولا رايدها انفرضت عليه
_ صدك تحجي شلون بلله…!!
_ حجيتله من البدايه واني كل فكري بياسمين
_ الخيره بما اختارها الله
اسألني اني مرات تنجبر على نصيبك لان الله اختاره الك
سيد علي _ تزوجن خواتي واني كل ما يحددون موعد اطلع فد شغله واجل إلى أن خلصت الأعذار ولابد ان يتم الزواج
المفروض بعد شهر حدد عمي وابويه الزواج
نجحت ياسمين وداومت متوسطه واني كل هاي الفتره احاول أعود روحي على الابتعاد….
اليوم كلبي اخذني الها اشتاقيت اشوفها رحت للمدرسه ركنت السياره اشويه عنها وكعدت انتظر يحلون
بدت الطالبات تطلع واني عيوني على الباب صار اشهر ما شايفها بس لو شما تكبر وتتغير اعرفه
ودك كلبي من شفتها طلعت
حاضنه نفسها باديه مكتفتهن
شنو من طول صايره
نفس الوجه الملائكي محاط بحجاب ابيض والخدود المورده
شافت السياره من بعيد عرفته
بس ما اقتربت وظلت عينها تباوع بشك اخاف مو اني شمس ما اشوفني داخلها
نزلت بسرعه…
من شافتني ابتسمت وتمشت بتجاهي
حتى مشيته انوثه وخجل
ياسمين _ عمو السيييييد
_ هله بياسمينتي شلونج
_ هههه صار اشكد اتانيك يوميه عيني على الطريق من اطلع بلكت تجي
_ مشتاقتلي …
_ خجلت اكولها
يعني تمنيت تجيني…
_ ليش….
دارت وجها صفح وتوقفت ابتسامتها كأنه تذكرت شي…
_ عموانت راح تزوج صح….؟؟؟
_ فاجأتني بسؤالها وحسيت
عدها شي بداخلها اليه تخجل تعبر عنه
عيوني عليها وهيه تحاول تبعد نظراتها بعيد متريد تصد بعيني
_ ياسمين باعي عليه….؟؟؟
_ ما كدرت اباوعله والعبره بصدري
_ ياسمين ليش مدنكه
مديت اصبعي الوجها ورفعت
راسها
اول ما التقت عيونه سويه
نزلت دموعها
شفت صورتي بعيونها
_ مكدرت ابقى اباوع بعينه وصار الجنت اخاف منه
نزلت دموعي وفضحتني
بسرعه تركته ورحت اركض بعيد عنه خجلانه منه ومن نفسي
رجعت للبيت بدلت هدومي
وتغطيت ونمت ردت اكون وحدي اني ودموعي ما فاهمه شنو هذا الشعور حب لو تعلق
اني احب رافع اكثر شي
بس شعوري اتجاه السيد غير شكل
هسه اكتشفته لمن حسيت كلبي يدك سريع وايديه ترجف ودموعي هملت حسيت
روحي تريده…
سيد علي _ ياربي اني اسويت بيها طفله بريئه واني اذيتها
رجعت للبيت ما مرتاح
حتى ما نمت كل يوم اطلع بالخمسه صبح اليوم تاخرت
ورحت الها للمدرسه وكفت بدربه قبل ما تروح للدوام
السيد _ ياسميننننن
_ شفته …. وكفت بمكاني
_ تعالي اصعدي اوصلج
_ صعدت ساكته
_ احجيلي ليش بجيتي البارحه
_ ….!!
_ راح اظلين ساكته احد مأذيج
_ لا كلته ونزلت راسي…..
_ اني مأذيج….كلته وباوعتلها
_ نزلت دموعي سكته
_ هاي كله لان راح ازوج….؟؟؟ جر حسره وسكت شويه
اني ادري شكو بداخلج انتي بعدج زغيره من تكبرين راح تفهمين مرات الضروف تجبرنه انسوي شي احنه ما راضين بي
شي واحد خلي ابالج اني ما اعوفج راح تشوفيني هوايه
واي شي تحتاجي اني موجود
وكيفج شنو تعتبريني اني قابل
يله اشو اضحكي
_ باوعتله ابتسمت….
_ ابتسمت والدموع محاوطه
عيونها ومطبكه رموشها ونظرتها البريئه وخدودها المورده ماشفته كدامي طفله شفتها امرأه
طاغية الانوثه والجمال….
استغفر الله ربي واتوب اليه
حركت السياره واني روحي انعصرت وصلته للمدرسه
وطلعت للشورجه
كاعد بمكتبي ودك التليفون
السيد _ الو
اميمه _ الحك يمه ابوك اتخربط وهسه اني بالمستشفى
السيد _ شبي ابويه…..!!!
اميمه _ بجيت ما ادري
تعال بسرعه يمه علاوي اخاف ماتلحك عليه
السيد _ وصيت العامل يعزل واني اركض واحس رجليه تراوح بمكانها
صعدت السياره وما اذكر حتى اشلون سقتها
وصلت المستشفى دخلت
ادور على امي
لاكاني جيرانه… صاحلي
اباوع ابويه الاجهزه كلها على صدره وايده وامي تباوعله وتبجي
_ خيرك يابه….!!!!
كان واعي بس امبين تعبان
لزم ايدي وركز بعيوني
يحجي كوه
_ تزوج زينب ولا تظلم خواتك
اعدل بينهن
ودير بالك على امك وحلالك
وتلعثم بالكلام ما گدر يكمل….
غمض عيونه…
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية انكسار الياسمين)
