رواية حب من طرف قهوة الفصل الأول 1 بقلم شهد محمد جادالله
رواية حب من طرف قهوة البارت الأول
رواية حب من طرف قهوة الجزء الأول
رواية حب من طرف قهوة الحلقة الأولى
_خطوبته إنهارده
بتقولها زميلتي في الشغل برفع عيني ليها وبقول بثقة مزيفه:
_مانا عرفت ربنا يسعده في حياته بعيد عني
_معقوله مش زعلانه عليه أو حتى انه بقى مع واحده تانيه؟
_لأ يا اماني عشان بعد فراق اي اتنين اللي متوقع ان الطرفين يشوفه حياتهم وزي ما هو بقى مع واحده غيري بكرا انا اكون مع راجل غيروا
_بجد طريقة تفكيرك بتعجبني اوي برافو عليكي
ببتسم ليها وبكمل بقيت شغلي لحد ما بخلص الشيفت بتاعي وبمشي
باخد تاكسي للبيت وبلبس الهاند فري وبسرح في الطريق
كان حبي القديم معرفش مين ظلم التاني ولا مين اللي كان ضحية بس أهلى مكانوش موافقين بيه لأسباب محدش يعرفها غيرهم
حاول عشاني كتير منكرش بس مكنش بإيدي حاجه اصل اكيد مكنش ينفع نتجوز من ورا أهلي زي ما قال !
حبنا لبعض غريب اصلآ يعني نفضل مع بعض فتره ونسيب بعض ونرجع بعد سنه نكمل عادي بس في السنه دي مكنش حد بيعرف حد على التاني
لحد ما في آخر مره سيبنا فيها بعض كانت المره التالته ومن بعدها بشهرين عرفت خبر خطوبته !
مش هنكر إني زعلت حسيت إحساس وحش لمجرد انه عرف يتخطى حبي ليه لمجرد إن هيكون في واحده غيري في حياته بس ده المتوقع واحد اهلي مش موافقين بيه وسيبنا بعض كان هيفضل مستني إيه ؟
بعدين عادي مش اول اتنين يحبه بعض وميتجوزوش
انا بس كان نفسي اعيش حياة سعيده هاديه مع شخص بحبه اعيش مثلآ كلمات اغنية ورده وهي بتقول ناسيه هنا ناسيه ايام كانت قاسيه ناسيها معاك يا عيوني وفاكرني اخاف يلوموني !
وانا في الطريق بلمح عربية قهوة كنت بشوفها كل يوم وبيلفت نظري الديكور بتاع العربيه ووعدت نفسي قبل كدا إني هعزمني فيها وأعتقد جيه الوقت
بحاسب التاكسي وبروح للعربية كان شاب بسيط باين عليه الشقى عامل ديكور لطيف للعربية مشغل راديو على اغاني قديمة وبلمح جملة لطيفه على عربية القهوة “حب من طرف قهوة”
_قهوتك إيه يا استاذه؟
بيقولها الشاب ببتسم ليه وبقول:
_فرنساوي سكر زياده
_خمس دقايق وتكون جاهزه
ببتسم ليه وبقعد على الكرسي اللي قدام العربية استنى وبرجع اسرح تاني بس المره دي بسرح مع كلمات حماقي في الراديو وهو بيقول:
|..الحقيقه إن الحياة ضحكت علينا
لا الفراق ولا اللقا كانوا بإيدينا
لما يومها حضنتني بعدين مشينا
ليه مقولتش إن ده الحضن الأخير
كنت سيبني لحد اخر لحظه جنبك
سيبني اقولك قد إيه وإزاي بحبك..|
عارفين لما الحياة تعاند معاكم انتوا بالذات اللي هو قصة حب عاديه آخرها جواز وتيجي لحد عندي انا وتقلب قصة حب مستحيلة ويحصل حدث من حوادث الروايات واهلي ميوافقوش لأسباب مجهوله
العادي عندي انا بيقلب مستحيل !
_القهوة يا استاذه
بيقولها الشاب بنتبه ليه وباخد منه الكوباية كانت كوباية ورق خفيفه زي قلبي تمامآ ببتسم لما بشوف عليها صورة ام كلثوم ومكتوب تحتها اهل الحب صحيح مساكين
يمكن هو مش نصيبي معرفش نصيبي فين بس على كل حال ربنا يسعده هو شاف كتير في حياته جيه الوقت اللي ياخد فيه بريك ، عقبال البريك بتاعي بقى
بيلفت نظري شاب بحس إني شفته قبل كدا بس مش عارفه شفته فين
_قهوة بالتوت يا اسامة
بيقولها للشاب صاحب العربية وبيقعد على كرسي موجود وبيطلع لابتوب بيفتحه قدامه
بستغرب من حكاية القهوة بالتوت دي
هو مش القهوة تركي او فرنساوي او ساده بس !!
بركز في ملامحه وبفتكر إني بشوفه كتير عندنا في الشارع غالبآ وقت رجوعي من الشغل هو نفس معاد الجيم او التدريب بتاعه
دايمآ بشوفه بلبس رياضي وشنطة ضهر
والمره دي كمان كان لابس تيشيرت اسود وشورت اسود معاه نفس الشنطة بس مركز في اللاب
عينه بتيجي في عيني وببعدها فورآ
بتكسف وبكمل قهوتي في صمت وانا عيني في موبايلي لحد ما بخلص وبقوم عشان احاسب
_خلي يا استاذه بما إن دي اول مره تنورينا
_وانت عرفت منين إن دي اول مره؟
_انا عارف زبايني كلهم زبون زبون
_طيب يا اسامه ضيفني عليهم بقى عشان مش هتكون اخر مره
_تنوري اي وقت
_ربنا يخليك
بقولها وبصمم إنه ياخد حق القهوة وبرجع اوقف تاكسي وبرجع للبيت
بتعامل عادي ولا كأني مدمره نفسيآ
وبيخلص اليوم وبيجي اسوء وقت في اليوم كله
وقت ما دماغي بتختلي بيا
نفسي حد يلحقني من دماغي عشان يا هي هتموتني يا انا اللي هموتها
عارفين الوقت اللي بنكون مريحين فيه على السرير بنبص للسقف وبنسأل نفسنا كل ده كان ليه هو ده الوقت اللي دماغي كانت مسيطره عليا فيه
عملت فلاش باك لكل اللي حصل زمان عيطت سمعت اغاني حزينه وبعدها استوعبت إني لازم الحق نفسي من دماغي
بقوم من على سريري وبدخل للمطبخ بعمل مج نسكافية وبخرج أقف في البلكونة كان فيه نسمات هوا خفيفه بتلمسني وبطبطب عليا
بشغل اغاني على الهاند فري وبندمج شويتين تلاته بغني مع الاغنيه وبمسك طرف الستاره برقص معاها
وبتفجاء لما بفتح عيني من الشاب اللي كان موجود عند عربية القهوة واقف في الشارع قدام البلكونة شايفني
إحنا في الدور الأرضي ويعتبر البلكونة منها للشارع يظهر إني اندمجت جامد ..
كان واقف بيبصلي نظرات معرفتش افهمها اكيد بيقول عليا عبيطه
واحده لابسه بيجامة عليها ميكي ماوس شعرها منكوش بترقص مع الستاره اكيد عبيطه !
_القلم ده نستيه عند أسامه خدته وقولت لما اقابلك هديهولك
_متشكره اوي
_العفو
بيقولها وبيمشي وبرجع انا اقعد مع الهاند فري ومج النسكافيه مره تانيه
اكتشفت إن مفيش ليلة صعبه قد الليلة اللي بيتم استبدالك فيها
اليوم كان طويل مش عايز يخلص ولا دماغي عايزه تسكت ومش عارفه الحقني مني
رجعت لـ اوضتي اترميت على سريري ضميت نفسي وعيطت كتير كنت سامعه صوت الشحتفه ونفسي اللي مش قادره اخده من العياط
اختي الصغيره سمعت صوت عياطي وراحت قالت لـ ماما وثواني وماما كانت عندي في الأوضة
_مالك يا لقاء بتعيطي ليه؟
_مفيش حاجه يا ماما
_إزاي مفيش احكيلي مالك
_مفيش حاجه صدقيني
_يابنتي متوجعيش قلبي قولي مالك
_عرفت إن احمد هيخطب يا ماما
قولتها بعياط شدتني ليها طبطبت عليا
_يا حبيبي مش نصيبك وخليكي فاكره إن إحنا مش ظالمين يا لقاء إحنا عايزين الخير ليكي هو مش شبهك وعيلته مش شبه عيلتك صدقيني إحنا بنختار الصح ليكي
_في الحالتين الموضوع اتقفل خالص يا ماما وعادي شوية زعل وهيروحه لـ حالهم
_بكرا انتي كمان يجيلك ابن الحلال شوفي حياتك وعيشي الدنيا مبتقفش على حد وبكرا تعرفي إن إحنا كنا على حق وتشكري ربتا إنه نجدك قومي يلا اغسلي وشك ومتفكريش في الموضوع ده تاني
_حاضر
بقولها وبقوم فعلآ باخد شاور وبتوضى وبصلي وبدعي ربنا إنه يلحقني من نفسي ومن دماغي
انا مقتنعه بكلام ماما ومقتنعه إنه نصيب بس غصب عني حاسه قلبي متعور ..
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية حب من طرف قهوة)
