رواية امبراطورية بابا الفصل التاسع 9 بقلم هنا محمد
رواية امبراطورية بابا الجزء التاسع
رواية امبراطورية بابا البارت التاسع
رواية امبراطورية بابا الحلقة التاسعة
اسلام وروان دخلوا للبيت لقوا عبدالله في وشهم بيبصلهم بجمود
روان اتوترت ومسكت ايد اسلام جامد واسلام ساب ايدها وبعد عنها سابها تواجه ابوها لوحدها، عبدالله قرب منها وحست بايده اللي بتترفع اللي في ثانية كانت على وشها
جميلة شهقت بفزع اسلام اتصدم فباباه كان دايما ضد ضـ رب بنت حتى معملش كده مع مراته وكإن كل مبادئه ضربت في الحيط ومبقاش ليها وجود لكن على الناحية التانية روان بصتله بحزن بدل صدمة لأن بحق الله هيعمل ايه غير كده وبصتله بدموع كإنها بتحاول تستعطفه ويسامحها
سليم اخيرا دخل البيت وبصلهم باستغراب وسمع عبدالله بيقول بغضب:
انتِ لا بنتي ولا انا ابوكي
سليم بصدمة: هو في ايه انت بتقول ايه يابابا؟
روان قعدت عند رجله ورفعت راسها وبصتله وقالت ببكاء: لا يابابا انا بنتك روان ارجوك متعملش كده انا غلطت عارفة واقسم بالله ندمانة ومش هكرره ومش هعمل حاجة من وراك تاني بس متقولش كده يابابا
عبدالله سابها وقعد على الكرسي وقال ببرود لسليم: عملت ايه في شغلك الجديد يا سليم؟
سليم استغرب جامد من هيئة روان و سكت ومردش وروان راحت ليه بسرعة وقالت: يابابا عشان خاطري سامحني والله انا اسفة اوي متعملش كده
سليم: ما حد يقول ايه اللي حصل؟
جميلة واللى برضو مكنش عندها علم: قولي في ايه ياروان!
عبدالله قال بسخرية: قوليلهم
روان بصتله بدموع: يابابا عشان خاطري انا اسفة
عبدالله سكت ومردش عليها ومكنش بيبص ليها وجميلة راحت لروان بسرعة وحضنتها وقالت بهمس ليها: تعالي نطلع الاوضة ياروان دلوقتي بابا متعصب
عبدالله سمعها وقال: ياريت عشان مش عايز اشوف الزبالة دي قدامي تاني
روان عيطت اكتر بعد جملته وسليم دموعه نزلت عليها رغم انه مش فاهم في ايه وجميلة طلعتها للاوضة واسلام قال: هتعاقبها بالتجاهل؟
سليم: هي عملت ايه عشان يعاقبها؟!!
اسلام: كان في واحد بتقابله من ورانا في السنتر ولما بابا اكتشف الحوار ده حذرها والواد ده خدها لمكان مقطوع بحجة ان بابا مش هيعرف حاجة والهبلة صدقت وراحت وانا في الوقت ده كنت حاطط جهاز تتبع في جراب فونها وشكيت لما راحت حتة غريبة روحت لقيت القذر بيتهجم على روان
سليم: عملها حاجة؟
اسلام بنفي: لا ملحقش
سليم جري على الاوضة بغضب واسلام افتكر انه هيأذيها وجري وراه واتفاجىء لما دخل ولقى سليم بيحضن روان وبيهمس لها كلمات تطمنها وانه معاها
سليم: اياكي تعيطي على الكلب ده مفهوم
روان ببكاء: انا بعيط على غبائي
سليم مسك وشها وقال بحنان: احنا بشر وطبيعي بنغلط المهم نتعلم من الغلط ده ومنكررهوش وانتِ طبيعي تنجذبي لشخص بس الغلط انك دخلتي معاه في الحرام ونهاية اي حاجة حرام وحشة.. هتستغفري ربنا وان شاءلله هيغفرلك تمام؟
روان بدموع: تمام
سليم حضنها تاني وقال: انا اسف ان احنا انشغلنا عنك في الفترة الاخيرة الغلط كان غلطنا كلنا
روان عيطت في حضنه اكتر ليه بيعتذر ليها هي الغلطانة كانت شايفة نفسها متستحقش حبهم ليها فهي واحدة خانت ثقتهم فيها..
سليم: خلاص متعيطيش يا جزرة
روان ضحكت وسط دموعها وحضنته اكتر وهو كان بيمسح على شعرها بلطافة
جميلة كانت مبتسمة بحنان ليهم ولاحظت اسلام بيبص لسليم باستغراب رفعت ايدها عشان تجذب انتباهه وهو بالفعل انتبه ليها وابتسم ابتسامة بسيطة وخرج برا الاوضة
___________هنامحمد_____________
زين دخل الشقة لقى هدير قاعدة على الكنبة وبتعيط جامد جري عليها بسرعة وقال بقلق:
في ايه يا هدير؟
هدير ببكاء: مــــــــــات
زين اتخض جامد وقال: مين؟!
هدير: مـــات وسابهم
زين: اهدي يا هدير وقولي مين ياحبيبتي
هدير بصتله بدموع وقالت: دوروك مات يا زين
زين بصلها بعدم استيعاب: دوروك مين؟
هدير شاورت على التلفزيون: حتى كروته موته مخلونيش اعيط جامد وبعدين عيطت اكتر وقالت: ساب اسيا حبيبته لوحدها في العالم المظلم
زين بعدم تصديق وهو بيبص للمناديل اللي جنبه اللي كانت مالية المكان وعينها الحمرا: انتِ عاملة كل ده!! عشان حتة بطل في مسلسل يا مفترية
هدير عيطت اكتر: مش مجرد بطل في مسلسل يا دكتور
زين: منك لله يا شيخة وانا اللي قلبي كان هيقف
هدير: وصحابه معيطوش عليه للدرجة هان عليهم
زين: لا ازاي كان لازم يقلبوها مناحة زيك
هدير: قوم هاتلي المانجا اللي جوا
زين قام وقال: ان الله مع الصابرين
هدير: بتقول حاجة
زين: بقول ربنا يرحمه
هدير عيطت تاني وزين راحلها بسرعة وقال: ممكن تبطلي عياط عشان ابننا ميطلعش نكدي
هدير: هو ممكن يطلع نكدي؟
زين: ايوا من عياطك
هدير وهي مصدقاه: لا خلاص بطلت لحسن ينكد عليا عيشتي مش كفاية اني مستحملاك
زين بصدمة: كفاية فعلا! هقوم اجيبلك المانجا قبل ما اتشل
هدير: وهات معاها الرز والملوخية اللي جوا احلي بيهم
زين بقرف: ده اللي هو ازاي ويعني ايه تحلي بيهم
هدير: ملكش دعوة هات وانت ساكت
زين: يا صبر يا ايوب
هدير: سمعتك.. انا قرفاك في عيشتك يعني والله لانكد عليك يا زين
_______________هنامحمد_____________
طارق كان قاعد على اللاب عشان شغله وفجأة جه عليه عمر وقاله بفضول: بابا بتعمل ايه؟
طارق فهمه وقال: مش هديك اللاب يا عمر مش دلوقتي
عمر ببراءة مصطنعة: على فكرة عندك ظن سوء مكنتش عايزوا
طارق ضحك جامد وقاله: اسمها سوء ظن ياحبيبي ومش عليا وش القطط اللي بتمثله ده
عمر: عايز اسألك سؤال
طارق: اسأل
عمر: عادي اتجوز دنيا؟
طارق ساب اللاب بسرعة وقاله: دنيا مين؟ دنيا بنت ملك وشادي
عمر هز راسه بمعنى ” ايوا ” وكان باين عليه الجدية وطارق قاله بعدم تصديق: تتجوزها؟
عمر: اه انا عندي العاب كتير وهي عندها العاب طبخ
طارق: هتتجوزها بألعاب!
عمر بتفكير: عندي عربية كبيرة تكفي شخص اه بس مش مشكلة ممكن تقعد على كتفي.. وكمان عندي
طارق: هتقعدها على كتفك!
عمر: ايوا هي خفيفة
طارق: كمل
عمر: وكمان بحب الكورن فليكس وهي كمان يعني اكلنا المفضل نفسه فدي اشارة ان احنا نتجوز
طارق بتفكير: طب انا بحب السبانخ وبيري الملوخية يمكن دي مكنتش اشارة واضحك عليا في الجوازة دي؟
عمر: يمكن
طارق: انا عايزك بقا تسترجل وتقول الكلام ده لشادي اتفقنا
عمر بحماس: اتفقنا
طارق: يلا روح
بيري من وراهم فجأة: انت كده هتلقيه للهلاك عارف ده
طارق اتخض جامد وقال: انتِ جيتِ منين يا ست انتِ
بيري: من البلكونة يا ظريف وقالت لعمر بحدة: اياك تقول الكلام ده لشادي عارف لو قولتله ده هيحصل ايه؟
عمر: ايه؟
بيري: مش هيخليك تشوف دنيا لاخر العمر
عمر بزعل: لا انا بحبها
طارق بص ليه بصدمة وقال لبيري: ده بيقولك بيحبها؟
بيري باست راسه بحنان وقالتله: لما تكبر شوية هقولك على التكات اللي الست بتنجذب ليها رغم اني هزعل لو غيبت عني يابني
طارق: ست؟ دنيا اللي عندها 3سنين بقت ست
عمر بتصحيح: 4 لسة تماهم من شهرين
بيري: يا خلاثو عليك بتهتم بتفاصيلها يا عين امك يا قلبي ليه ابوك مطلعلكش؟
طارق: اطلعله ازاي يعني؟!
بيري: صح المفروض ينزلك يتعلم منك
طارق: ممكن اشتغل وبعدين نناقش حب عمر ودنيا المستحيل بعدين
بيري ضحكت وقالت: حب مستحيل فعلا بوجود شادي
وبعدين سمعوا صوت بكاء طفلة وبيري اتنهدت بغضب وقالت: يــــلــهـوي جاية اهو اصبري بقا.. وانتوا لما تتكلموا يا كلاب تاني وطوا صوتكوا مش ناقصة فــــــــاهميـــــــن؟
طارق وعمر بخوف: فاهمين يا ست الكل
_____________________
تاني يوم الصبح يونس نزل عشان يروح مدرسته اللي هي قريبة منه الى حد ما فبيروحها مشي ولقى الراجل العجوز بيبصله بطريقة غريبة وعلى وشه ابتسامة اغرب من نظرته ويونس اتدايق من ده وراحله وقال بغضب: انت واقف هنا ليه كده كل يوم بشوفك وبتبص كده ليه كإنك هتعمل جريمة؟!
الراجل: لا جريء حد غيرك كان خاف مني وجري
يونس: وانا هخاف منك ليه يا راجل يا خرفان انت؟
الراجل: مش يمكن اخطفك؟
يونس ابتسم بسخرية وقال: لا تكون فاكرني طفل تقدر عليه؟ بس عايز اقولك جرب فكر فيها ومش هتلاقي دراعك ده تاني
الراجل: ثقتك في نفسك عجيبة اكيد طالع لجدك وليد.. عندي سؤال قمر ومروج زيك كده برضو؟
يونس ادايق وقال: اياك تجيب سيرة اخواتي على لسانك ولو اذيتهم بوقفتك دي انا هجيب ليك البوليس يعمل معاك الواجب
الراجل باستفزاز: وهتقولهم ايه انا واقف في ارض الحكومة
يونس: سهلة هقول ان انت كنت هتخطف اخواتي ودايقتني وحبت تزوير هيلبسك سنين يإما تخرج بكفالة وبعدين بص لبسه المقطع: واعتقد انك مش معاك فلوس عشان تخرج بكفالة
الراجل: بتهددني يعني؟
يونس: تؤ بنفذ
الراجل: كانت غلطة ان اسلام اتجوز واحدة بنت لواء اكيد ابنه هيطلعله
يونس باستغراب: انت عرفت كل ده منين؟ انت مين انطق!
الراجل بابتسامة: انا جدك شاكر يا يونس ابو اسلام اللي هو ابوك
يونس بصدمة: يا سلام كنت فاكره ابن عمي! وبعدين كمل بسخرية: مش بقول عليك خرفان
شاكر: صدق او لا تصدق ف انا جدك غصب عنك
يونس قرب منه وهمس: نصيحة روح لدار المسننين وتابع بسخرية: يا جدو
شاكر بابتسامة: واخد مني الاستفزاز
يونس: هو انا مادة بتحللها؟
شاكر: تحب احكيلك الحكاية؟ ولا روح لعبدالله يحكيهالك
يونس: حكاية ايه والله لاطلع لبابا واخليه يوديك في داهية
شاكر وهو بيسمعه اللي مش لازم يونس يسمعه: ابوك ابني عن طريق الحرام وعبدالله دارى الفضيحة دي وكتب ابوك باسمه.. بس ابوك ميعرفش الحقيقة دي وفاكر ان عبدالله ابوه لكن للاسف الحقيقة ان ابوه الحقيقي مجرم وعمل كل حاجة وحشة تتخيلها ومتتخيلهاش اللي هو انا يعني
يونس بعدم تصديق: انت بتقول ايه!
شاكر قاله ببرود: لو مش مصدقني اسأل جدك المزيف وقرب منه ويونس بعد بخوف وشاكر قال بهمس زي ما كان يونس بيعمل: يا حفيدي
شاكر في نفسه: ده تمن انك متدنيش الارنبين يا عبدالله
وساب يونس في عز صدمته وكان محتار يصدقه ولا لا بس الاجابة حاليا كانت ” لا ” لان مستحيل بس الراجل كان بيتكلم بجدية غريبة.. نفض يونس افكاره دي وكمل طريقه للمدرسة بس مقدرش يروح وقعد في المكان اللي ” سليمان ” بيقعد فيه وكان بيبص للسماء وبيفكر في اللي قاله اللي ما يتسمى اللي بيقول على نفسه انه جده!!
_______________________
كانت روان قاعدة جنب الشباك بتبص في الفراغ ولقت ملك داخلة عليها
ملك: الجزرة بتاعتنا قاعدة كده ليه؟
روان بضيق: انتوا عارفين بجد انا كل سنة بدفع فيه كام وفي الاخر تتريقوا على لونه
ملك ضحكت: حلو بس بيفكرنا بالجزر
روان: يادي الجزر اللي كرهتوني فيه ده
ملك: الاميرة روان اللي مستنية الامير ريان بتعمل ايه دلوقتي؟
روان بسخرية: بتندب في حظها ياملوكة والله
ملك بجدية: استعجلتي على الموضوع ده ليه وانتِ عارفة ان لسة بدري عليكي في جو الارتباط وكده
روان بدموع: عرفتي تتحكمي في قلبك لما حبيتي شادي
ملك: معرفتش
روان: خلاص يبقى متلومنيش
ملك: بس عرفت اتحكم في تصرفاتي يا روان في فرق كبير وانتِ عارفة ده
روان: لو جاية تقولي كده انا سمعت كتير امبارح وعارفة اني غلطانة
ملك: اقولك سر ومتقوليش لحد
روان بصتلها بتساؤل وملك كملت بابتسامة: انا حبيت حد برضو بس كان سني اصغر منك
روان: وايه اللي حصل؟
ملك: قالي انه بيعتبرني صديقة مش اكتر واني اخت ليه لما اعترفتله كنت مقهورة بس مع الوقت اكتشفت اني حبيت اهتمامه بيا وبس وده اللي جذبني فيه لأن طبعا بابا كان بعيد.. فاستغربت ليه عملتي كده طلما بابا معاكي مجرد سؤال جه على بالي بس اكيد في اسباب كتيـــرة
روان بصت للشباك وملك قالت بهدوء: روان كلنا بنغلط وعشان متكرريهوش لازم تعرفي ليه عملتي الغلط ده اصلا
روان: عشان حبيته
ملك: يعني مكنش حب مراهقة بيعدي؟ ومكنتيش وخداه تسلية لمجرد انك بتزوغي من الدروس مش اكتر وواخدة الموضوع متعة
روان: ايه اللي مأكد كلامك ده؟
ملك باختصار شديد: كنت زيك
روان بدموع: بابا بيفرق بيني وبينكو معرفش ليه بحسه كارهني من الاصل حتى ضـ ربني بالقلم تحت ورافض يكلمني مع ان انا متاكدة لو كنتوا عملتوا الغلطة دي كان عاقبكوا ايوا بس مش للدرجة كان هيقعد يتكلم معاكوا على اقل وبعدين كملت بعياط: لكن انا؟ انا اللي بعمله مصايب وكوارث لكن انتوا الحبايب ويا مرحب بيكوا مش قصدي غيرة والله بس بجد هو مش بيهتم بيا
ملك بسخرية: مش بقولك كنت زيك.. كإني شايفة ملك الصغيرة قدامي
روان: وكلكوا سيبتوني بعد ما اتعودت عليكوا عارفة ان مش من حقي ده وانكوا لازم تكملوا حياتكوا بس انا مش عايزة اصحى من النوم ملاقيش ولا سليم ولا جميلة وممكن ملاقيش بابا.. هتتلهوا في حياتكوا وتسيبوني
ملك: عشان كده خدتي الاهتمام من برا وافتكرتي ان هو ده الشخص اللي هيقعد معاكي لاخر العمر
روان سكتت ومردتش وملك كملت: بس انتِ غلطانة يا جزرة نصيبك هييجي وهيبقى جدع وشهم ومز كمان بس هييجي في وقته شوفتي حصل ايه لما روحتي للغريب؟
روان: متفكرنيش بيه كل لما بفتكره بشمئز اني حبيته
ملك: محبتيهوش يا روان كان مجرد انجذاب
كملت بحزن: وكمان لو عايزة تعيشي معايا تعالي يا روان انا بزن عليكوا تعيشوا معانا اصلا
روان برفض: لا مش هينفع اقعد وبيت بابا موجود
ملك بابتسامة: عارفة بابا سابنا ليه؟ عشانك.. بابا عقد ال7 نفسيا عشانك يا جزرة عيب تقولي انه مش بيهتم
روان: كان مجرد كلام قولته من غير وعي ياملك
ملك: مش مجرد كلام ده اللي جواكي اقولك نصيحة؟ روحي قولي على كل اللي جواكي وهتلاقي ساعتها حنان منه عدى الحدود
روان بابتسامة حزينة: انا بالنسباله غلطة يا ملك كلامي معاه مش هيفيد.. مش كفاية حبيبة القلب ماتت بسببي
ملك: بيحبنا اكتر من مرات ابويا متقلقيش.. انا اول مرة اشوف فيكي الجانب الحزين ده انتِ دايما مرحة و..
روان: متوقعتيش اني بني ادمة وبحس يعني
ملك: ممكن كانت غلطة مني
روان جه فجأة على ذهنها المشهد اللي بيعتبر كابوس بالنسبالها: كانت.. كانت لمساته وحشة اوي انا هتخطى ازاي؟ الموضوع مرعب
ملك حضنتها وهي فضلت تعيط اكتر
___________هنامحمد _______________
جميلة كانت بتلف حوالين عبدالله بطريقة مضحكة
جميلة: ياحج بالله سامحها عيلة وغلطت
عبدالله: ما تبعدي بقا ده انتِ لزقة
جميلة: ياحج دي روان حبيبتك هتسيبها كده بدل ما ترشدها للطريق الصحيح افرض لو كملت في اللي بتعمله وبقت رقاصة في ملهى ليلي
عبدالله: انتِ عارفة لو كنت جاهل كنت هصدق واكسر عضمها بسبب كلامك ده
جميلة: وه وانا عملت ايه؟ يا حج دي مقطعة نفسها عياط وكانت هتنـ تحر
عبدالله: ده بجد ولا بتهلفطي بالكلام
جميلة بثقة: عيب عليك بهلفط طبعا
عبدالله: نجوم السما اقربلها مفيش غفران للي عملته
جميلة: اذا كان ربنا غفور رحيم انت مش مسامح كريم ليه بقا؟
عبدالله: ما تحلي عني يإما مش هعملك الكريم كراميل
جميلة: بقيت بعرف اعمله
عبدالله: صح نسيت
جميلة: المهم كان ايه موضوعنا؟ اه البت روان.. يابابا احنا عصاية واحدة خصلة واحدة متجريش
عبدالله: هتشل من امثالك اللي بتخترعيها
جميلة بغمزة: بتعجبك؟
عبدالله بصلها بقرف وقال: بتبهرني!!
ولقوا سليم بينزل من السلم ومسلمش على ابوه كالعادة وكان هيخرج لولا صوت عبدالله الحاد: رايح فين؟
سليم: الشغل
جميلة: مالك انت كمان؟
سليم: مفيش يا جميلة المهم خلي بالك من روان اللي المفروض نبقى جنبها عشان نفسيتها بس نقول ايه بقا
عبدالله بهدوء: بتلمح لايه؟
سليم: ولا حاجة
عبدالله: تعالى عايزك
سليم قرب منه بضيق وعبدالله قال: بتعملوا كده عشان اول مرة تشوفوني بعاقبها صح؟ ودي كانت غلطة البت دي اتدلعت جامد لدرجة انها عملت اللي عملته
سليم: تفهمها بالراحة مش تضـ ربها وتتخلى عن مبادئك
عبدالله: كانت لحظة شيطان
سليم اتنهد وقال: اللي تشوفه اعمله يابابا معاها انا مش بلومك بس بلاش تبقى قاسي معاها
عبدالله: القسوة لازم تبقى موجودة في بعض الأحيان عشان تعلم يا سليم اللي عملته مش هيِّن ابدا.. انا غلطان اني سيبتها كان لازم اعمل معاها كده من ساعة ما بدأت تهمل في مذاكرتها
جميلة: معاك حق يابابا بس بلاش تطول في الخصام
عبدالله: ملكوش دعوة بالحوار ده
سليم: هو ايه اصله ده؟ انا اخوها!!
عبدالله بعناد: وانا ابوها
سليم بعند اكتر: انا اقرب حد ليها
عبدالله: وانا اللي غيرتلها البامبرز
سليم: انا اللي بتشكيله همها
عبدالله: انا اللي بعملها الاكل اللي بتحبه
سليم: انا اللي بتتخانق معاه لما تزهق وبرحب بيها
عبدالله: وانا اللي بحوش بينكو قبل ما تموتوا بعض
جميلة: وانا اللي بحرق الاكل
بصولها الاتنين وضحكوا بهدوء وعبدالله قال: سيبني اتعامل معاها وهي هترجع من الدلع ده صدقني يا سولي
_______________هنامحمد______________
كان مريم وحسام واقفين قدام ملجأ للايتام
مريم بتفكير: هنجيب ولد ولا بنت
حسام: ولد احسن
مريم: عندك حق عشان لما البنت تكبر
حسام: لو لقينا اخوات نجيبهم
مريم بابتسامة: ايوا ولد وبنت
حسام: ياترى هيبقى اسمائهم ايه
مريم: عندي فضول برضو.. حسام ما نربي قطة احسن انا خايفة من الخطوة دي
حسام ضحك جامد: ما انا قولتلك لما تخلصي فنون جميلة اللي مش عايزة تخلص دي بس انتِ اصريتي تيجي
مريم: ايوا نشوفهم بفكر يبقوا 8
حسام بصدمة: لا مصاريفي يدوبك تكفيني انا وانتِ واللي هنجيبه بجد
مريم ضحكت: ده انت صاحب اكبر معرض في مصر وبيجيلوا اجانب خلينا ساكتين
حسام خمس في وشها: الله اكبر
مريم بابتسامة: القطط احسن؟
حسام بابتسامة ظهرت غمازاته: حاليا احسن اهو تتدربي
مريم: يا سلام!
حسام: شكرا يا مرمر
مريم: بطل هبل انت اصلا اهبل وعبيط ومتخلف فاكرني هعرف اعيش من غيرك ياللي كنت احلى واحد في السنتر
حسام بمكر: يعني مش اسوء
مريم: مين قال كده؟
حسام: العصفورة قالتلي
مريم: العصفورة كدابة
حسام: امم ماشي
مريم: ده انت حتى اسمك لايق على اسمي
حسام: امم بأمارة ياسين ويوسف
مريم: ايه الاسامي دي؟ دي اسامي توكسيك
حسام: كان العكس
مريم: ده انت حبيبي يا زوجي قرة عيني
حسام بتنهيدة: تعرفي ان كان حلمي في حياتي كلها انتِ
مريم بابتسامة: بحبك يا حسومتي
حسام حط ايده على كتفها وضمها ليه وقال: وانا اكتر يا قلب حسومتك
____________هنامحمد ____________
فاق من سرحانه على صوت الراجل اللي استغرب وجوده وقال: انت هنا دلوقتي ازاي يابني الساعة10 لتكون زوغت
يونس: لا مروحتش اصلا
سليمان: ليه؟
يونس: انا محتار في حاجة وخايف تطلع حقيقة
سليمان: ايه اللي محتار فيه وانا اساعدك
يونس بصله شوية وقال: تخيل ان في راجل فجأة يجي يقولك انك عايش في كدبة وحقيقتها هتدمرك هتعمل ايه؟
سليمان مفهمش اللي يقصده لكن حاول يتجاوب ومعاه وقال: هتقبل الامر الواقع مهما كان مؤلم بس.. مش هعرف احدد يا يونس عشان مش فاهمك بس اللي هقدر اقولهولك ربنا كبير ومعاك
يونس: فاكر العجوز اللي قولتلك عليه؟
سليمان: اوعى تكون روحتله واتكلمت معاه
يونس: روحت
سليمان غمض عينه بغضب وحمد ربنا ان يونس قدامه صاغ سليم ويونس كمل بسخرية: عارف قالي ايه
سليمان: ايه؟
يونس: اني جدك شاحت
سليمان: اسمه شاحت؟
يونس: لا بس لايق عليه.. بيقول انه جدي وان ابو ابويا وبيقول على جدو ان جد مزيف
سليمان: انا مش فاهم حاجة
يونس بصله وحكاله وكان محتار يصدقه ولا لا
سليمان: الموضوع فعلاً معقد بس متقولش حاجة لابوك وروح لجدك الاول واسأله ممكن واحد عايز يأذيكوا وخلاص
يونس: تفتكر؟ يعني ممكن كلامه كدب؟
سليمان: ممكن جدا
يونس بتفكير: هسأل جدو وهختبر رد فعله
سليمان: بس لو طلع كلام العجوز ده بجد هتعمل ايه
يونس: هقول لبابا لازم يعرف اكيد
____________هنامحمد_____________
سليم راح لأميرة اللي كانت واقفة بتركب المايك بصلها بابتسامة وهي لاحظت وجوده وبصتله باستغراب وقالت: مش كان شغلك الجديد النهاردة؟
سليم: هيبدأ 12 مش دلوقتي
اميرة: طب ايه اللي جابك؟
سليم: مجيش اغني معاكي يعني
اميرة: لا مش قصدي بس افتكرت انك هتتخلى عن هنا عشان لقيت شغل في مكان احسن
سليم: مفيش مكان احسن من غير وجودك يا اميرة
اميرة: ها؟
سليم: ايه؟
اميرة: انت بقيت كده ليه؟
سليم: بقيت ازاي يعني؟
اميرة: بتقول كلام غريب ليا
سليم: تأكدي بقول الحقيقة
اميرة بتوتر: يعني ايه؟
سليم: من غير لف ودوران انا بحبك يا اميرة
اميرة بصدمة: مش هننفع لبعض يا سليم اسفة انت تستاهل احسن مني
وسابته ودخلت جوا للمكان اللي بيُسمى ” بروفا ” وهو بص لأثرها بصدمة وحزن في نفس الوقت
________♡__________
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية امبراطورية بابا)
