رواية للحبيب حبيب تاني الفصل الثامن 8 بقلم شهد محمد جادالله
رواية للحبيب حبيب تاني الجزء الثامن
رواية للحبيب حبيب تاني البارت الثامن
رواية للحبيب حبيب تاني الحلقة الثامنة
في اليوم التاني بصحى على صوت شادي بتكون ياسمين راحت شغلها وشادي عايز يفطر
بقوم بحضر ليه الفطار وبقعد في البلكونه بشرب قهوتي وبولع سيجاره وبستنى ياسمين ترجع من الشغل عشان نخرج وبعد كتير من الوقت بلاقيها بترن عليا
_كل ده في الشغل يا ياسمين؟
_البسي وهاتي شادي وتعالي
_نيجي فين؟
_عادل صاحب حازم خطوبته إنهارده ومعزومين فرصة نحضر خطوبه تركيا
_حلو أوي هجهز وابعتي اللوكيشن
_خلاص تمام
بقفل معاها وبدخل بلبس بلوزه سواريه سوده على جينز اسود وبعمل شعري ويفي وبحط روج نبيتي لايق مع لون بشرتي والقليل من الايلينر والبلاشر
وبلبس شادي شيميز ابيض وبنطلون اسود وشوز ابيض
وباخده وباخد شنطتي وبننزل سوا
وبعد ما توهت كذا مره اخيرآ وصلت
_اهي ام شادي جت
بتقولها ياسمين لـ حازم زميلها وبتيجي ناحيتي تاخد شادي
_انا مش قولتلك بلاش ام شادي دي؟
_يعني هو انتي مش امه فعلآ
_ليا اسم يا حبيبتي
_عايزه نتخانق يا نادين؟
_لما نروح دلوقتي مش قادره
بقولها بضحك وبيجي حازم بيسلم عليا وبنركب معاه العربية وبنروح سوا لمكان الخطوبه
كانت خطوبه في بيت بسيط عارفين بيت ديمه في مسلسل حب للايجار
هو كان كدا بظبط بس طبعآ لهجتهم مش نفس المسلسلات ، العروسة بتكون حلوه بنت جميلة سعيده عشان مع الشخص الصح
كل حاجه كانت لطيفه وبسيطه بيلفت نظري واحد طول الخطوبه عينه عليا
مش بقدر احدد دي نظرات إيه إعجاب ولا استغراب ولا فيا شبه من مامته ولا إيه مش فاهمه
بتجاهله وبندمج مع الأغاني بتاعتهم وطبعآ مننساش إننا مصريين ياسمين شغلت مهرجانات شعبي ورقصت عليها هي وشادي
كانت حاجه قمة العبث لكن الكل كان سعيد ، بتخلص الخطوبه وبنخرج كلنا بره البيت بقف اصور ياسمين وبتفجاء بنفس الشاب اللي كان عينه عليا جاي مع حازم
بيتكلم حازم وبيقول:
_نسيت اعرفكم كريم صاحبي مصري بردوا وجاي هنا في شغل
_اهلآ وسهلا
بتقولها ياسمين وانا بكتفي بـ ابتسامه
وباخد بالي من ياسمين اللي بتمشي مع حازم وبتاخد شادي معاها
بفهم وقتها إن ده تخطيط منها عشان اتعرف على كريم
_مبسوط إني شفتك
_متشكره
_جايه في شغل بردوا؟
_مش بظبط ياسمين هي اللي جايه في شغل انا جايه اغير جو
_وإيه رأيك في إسطنبول؟
_تحفه كل حاجه فيها لذيذه اوي
_زيك كدا بظبط
_متشكره
بقولها وببص في ساعتي وبقول:
_الوقت اتأخر لازم امشي
_طيب ثانيه هوصلك
_لأ متشكره متتعبش نفسك
_ولا تعب ولا حاجه يلا هوصلكم كلكم
_مادام مصمم يبقى تمام
بيبتسم ليا وبنخرج بره الشارع بيركب عربيته وبركب ورا انا وياسمين وشادي وجنبه بيكون حازم
بيشغل اغاني في العربية وطبعآ ياسمين بتندمج خدت بالي إنه بيمشي من طرق بعيده وبيبعد عن الطرق المختصره
يمكن عايز الوقت ميخلصش !
بيقف بالعربية قدام محل شكولاته
وبينزل يجيب ليهم وبيجبلي انا قهوة
_سمعتك وانتي بتقولي لـ ياسمين انك عايزه تشربي قهوة
_وعرفت إني بشربها فرنساوي منين؟
_من ياسمين بردوا
ببتسم ليه وباخدها منه انا فعلآ كنت محتاجها
وبيكمل الطريق لحد ما بنوصل للفندق بنسلم عليهم وبنطلع
بغير هدومي وبمسح الميكب وبستنى شادي ينام وبخرج لـ ياسمين
_تقدري تقوليلي إيه ده؟
_اللي في إيدي؟ كتاب
_بلاش استهبال انتي فاهمه انا بتكلم على إيه كويس
_العوض يا نادين
_عوض إيه هو أنا بنت مراهقه انا ام لـ طفل ست مطلقه يا ياسمين
_وإيه يعني ما تحبي تاني وعيشي حياتك كأنك لسه عندك ١٩ سنه
_اه وازوغ من محاضراتي واروح اقابله ويمسك إيدي ووشي يحمر صح؟
_اه ويجبلك ورد احمر ويحاول يخطف منك بوسه
_ياسمين مبهزرش
_هو معجب بيكي يا نادين إيه يعني اتعرفي عليه ده حتى ظريف شفتي اهتم بيكي إزاي
_هرجع واقولك انا ام وعايشه حياتي عشان ابني وبس ارجوكي بلاش تتصرفي من دماغك
_يعني افهم من كدا إن مفيش راجل هيدخل حياتك؟
_بظبط كدا
_اعتبريه سيف
_مفيش حد زي سيف يا ياسمين وارجوكي لو عايزه علاقتنا ببعض تدوم بلاش تفتحي الموضوع ده
_انا خايفه عليكي مش عايزكي لوحدك
_مش لوحدي انتي معايا وشادي معايا لو هحب حد كان زماني حبيت عزت يا ياسمين لو هعيش قصة حب كنت حبيت ابو إبني
بقولها وبسيبها وبدخل اقعد في البلكونه بولع سيجاره وانا سرحانه في الولا حاجه
وشوية وبتدخل ورايا بتحضني
_حقك عليا
_مش زعلانه منك يا عبيطه
_إيه رأيك في الخطوبه طيب
_كانت جميله اوي عقبالك يارب
_مش ناويه تكمليلي حصل إيه مع سيف؟
_وقفنا لحد فين؟
_لحد ما روحتي عند كاميليا عشان تلاقي حل
_ااه افتكرت
“فــــــلاش بـــاااكـــ”
مكنش قدامي أي حل غير إني اكون مع سيف وقت اكتئابه لحد ما يموف اون من كاميليا
عدت شهور وهو مكتئب مربي دقنه وشعره تحت عيونه أسود مكنش بينزل ولا بيرضى انه يقابل حد من اصحابنا
وفي اليوم اللي عرف فيه إنها اتخطبت كان يوم مطلعتش ليه شمس
أحزن يوم في حياتي مع سيف عمومآ
وبعد أيام رجع لـ سيف القديم كان بيسحل نفسه في الشغل وبيتعرف على بنات
بس مفيش واحده فيهم عرفت تاخد مكان كاميليا والايام جابت شهور والشهور جابت سنتين واتخرجنا
وكان لسه زي ما هو سيف اللي في حياته قصة حب فاشله سيف التوكسيك الصايع الوسيم اللي كل البنات بتحبه
حبي ليه مقلش بالعكس فضل زي ما هو
بس عارفين خوف الأم على ابنها
عايزه افرح بيه واطمن عليه عايزه اشوفه سعيد في حياته
ركنت حبي على جنب واللي كان مسيطر عليا مشاعر خوفي عليه
وقرارت إني هخليه يقرب من دلال صاحبتي يمكن يحبها وينسى كاميليا
بنتفق إننا هنتقابل بليل في الكافيه اللي دايمآ بنقعد فيه وبجيب معايا دلال
مبقولش ليها حاجه ولا بلفت نظرها ليه انا عارفه إنها هتحبه اول ما تشوفه
وشويه وبيجي سيف بيسلم عليا وعلى دلال وبنقعد سوا
وبلاحظ نظراتها ليه وبضحك بيني وبين نفسي عشان بفهم إنها وقعت
_ها هناكل إيه؟
بيقولها وهو بيقلب في المنيو
_مش عارفه بس ممكن بيتزا دلال بتحب البيتزا وانت بتحبها وانا بحبها
_يبقى بيتزا كلنا
وبالفعل بنطلب بيتزا وبلاحظ إن الجو
متوتر شوية فـ بحاول الطف الجو شويه
_انا قولتلك إن دلال عندها محل ورد يا سيف
_إيه ده بجد
_اه والله
_لذيذ اوي انا بحب الورد جدآ
بتبتسم دلال وبترد عليه
_خلاص يبقى تنورنا في اي وقت
_ده اكيد بس تصدقي لايق عليكي اوي تكوني شغاله في محل ورد
_هو الشغل بيليق على الأشخاص كمان
_طبعآ انتي مثلآ الكام دقيقة دول خدت بالي إنك خجوله وفيه رهاب إجتماعي على خفيف مكنش ينفع تشتغلي في حاجه غير الورد
بنبسط لما بلاقيهم بدأو يتكلموا وحاجز الخوف والتوتر راح
دلال بنت جميلة لذيذه دمها خفيف محجبه وطريقة لبسها لطيفه لايقه مع الحجاب
تليق تكون ام لـ عيالو
بيخلص اليوم وبتستأذن دلال وبتمشي وبنكمل انا وهو طريقنا للبيت سوا
_بس غريبه إحنا دايمآ بنقعد في الكافيه ده لوحدنا اشمعنا المره دي جبتي دلال؟
_عادي هي حبت تيجي قولتلها تعالي وجودها ضايقك؟
_بالعكس ظريفه ارتاحتلها
_مؤدبة جدآ وخجوله ورقيقه واسمها دلال وهي فعلآ دلال
_اممم ماشي يا نادين ربنا يخليكم لبعض
_ويخليك ياخويا
بفهم إنه فهم دماغي بس بعمل نفسي مش واخده بالي وبرجع للبيت
بحضر الغدا لبابا وبدخل اشوف شغلي
في السنتين دول حاجات كتير اتغيرت
سيبت المكتبه واشتغلت مع شركة معروفه انا اللي ماسكه البيدج بتاعتها
وبنسبه لقلبي لسه زي ما هو بيحب سيف واتعرفت على زميل في الشغل اسمه هيثم
حبني هيثم إعجابه ونظراته كانت واضحه لكن كنت بستهبل ودايمًا بتكلم عن سيف قدامه عشان يعرف إن قلبي مش ملكي
وفي اليوم التاني كنا رايحين نزور مروان واميره عشان جابو بيبي جديد
مش قولتلكم حاجات كتير اتغيرت ..
المهم بصمم إننا نروح نجيب ورد من عند دلال وهو بيوافقني
وبنروح ليها بيكون وقت أذان المغرب
وكانت واقفه بتصلي في المحل
وباخد بالي من نظرات سيف ليها
كانت إنبهار إعجاب مش عارفه احدد
المحل بتاعها لذيذ الديكورات فيه لونها بينك وعندها اغلبية انواع الزهور
بتخلص صلاه وبتنبه لينا
_إيه المفاجأة الذيذه دي
_انبسطي يا ستي جايين ننفعك بدال مانتي محدش بيعبرك
_انا زبايني كتير يا حبيبتي
_طبعآ طبعآ انتي هتقوليلي
_والله بجد الفتره دي الشباب فهمت اهمية الورد عند البنت ومبقاش يعدي يوم إلا ما يجيلي شاب يشتري من عندي ورد لحبيبته
_يارب بقى انت عارف
بنضحك انا وهي وهو كان واقف متابع الحديث بتكمل هي وبتقول:
_ها عايزين من انهي ورد؟
بيرد هو وبيقول:
_البنفسجي
مكنش فيه ورد في المحل بنفسجي بس هي كانت لابسه دريس بالون ده
بتتكسف وشها بيحمر وانا بحاول انقذ الموقف وبتدخل
_إيه بنفسجي دي اسمه لافندر يا فلاح
_معلش ياستي انا لسه جاي من غيط العنب حالآ
كلنا بنضحك وبتقف دلال تعملنا بوكيه ورد لذيذ زيها ومش بترضى تاخد مننا الفلوس وبنمشي
بنزور مروان واميره وبنقعد معاهم شويه وبنرجع للبيت انا وهو سوا
_إيه بقى حكاية الورد البنفسجي بتعاكس صاحبتي وانا واقفه؟
_انا مخدتش بالي ان مفيش ورد بالون ده عندها
_على ماما ؟
_ماشي البنت لذيذه فعلآ
_ادب وجمال ودلال
_هي فعلآ زي القمر
_امم طب إيه؟
_لأ دماغك متروحيش لبعيد ده رأيي فيها عادي
_براحتك ياخويا صاحبتي زي القمر والف غيرك يتمناها
_انا كمان اتمناها بس انتي عارفه البير وغطاه
_إيه البير وغطاه ده؟
_انتي عارفه إني لسه بحب كاميليا دلال دي تنفع تكون ام لعيالي لكن مش هتبقى الإنسانه اللي حبيتها
_وإيه يمنعك تحبها؟
_انتي عارفه قلبي مع مين
_بجد نفسي تفوق بقى اللي خلقها مخلقش غيرها
_مش بإيدي
_الحق فوق عشانك وعشان امك الغلبانه اللي نفسها تفرح بيك
بقولها ليه وبطلع البيت وبسيبه
يمكن الحب فعلآ مش بإيدينا بس اغلب الوقت بنحتاج نختار المناسب لينا مش اللي نفسنا فيه
يمكن دلال هو مش نفسه فيها لكنها مناسبه ليه ..
بيقطع تفكيري صوت رن موبايلي
بتكون دلال وبرد عليها
_إيه يا جميل
_الورد عجبك اصحابك؟
_تحفه تسلم إيديكي
_عنينا لـ نادين وصحاب نادين
_حبيبتي ، إيه مصحيكي لحد دلوقتي؟
_أبدآ مش جايلي نوم قولت اكلمك
_ومش جايلك نوم ليه بتفكري في إيه؟
_ولا حاجه عادي يعني
_امم عادي يعني
_نادين احكيلي عن سيف
_ماله سيف؟
_عايزه اعرف عنه اكتر يعني
_لأ سيف ده حكايته حكايه بكرا نتقابل واحكيلك
_نشرب قهوة سوا؟
_ماشي ياستي انا عزماكي عندي
_قبلت العزومة بكرا نتقابل
_اتفقنا يا عيوني
بقولها وبقفل معاها وبكون تايها في تفكيري هل انا صح والاتنين هينفعه لبعض
ولا غلط وسيف ممكن يجرح مشاعر دلال الي بدأت تتعلق بيه ..
“بـــــــاكـــ”
_النهار طلع يلا ننام
_بتيجي عند اهم حته وتفصليني يا نادين كملي حصل إيه
_مش قادره اكملك بكرا بقى
_هدفعلك تحويشة عمري واحكي
_ياستي وتدفعي ليه بكرا احكيلك ببلاش سبيتي بقى عايزه اخد ابني في حضني والحق انام ساعتين
_نامي ياختي نامي يالي فاكره نفسك بتحكي قصة قبل النوم شهرزاد حضرتك
_ولما اقولك خلاص مش هحكي خالص؟
_ههه بهزر معاكي
_طب روحي نامي انتي كمان يلا
_تصبحي على خير
_وانتي من اهل حازم يا جميل
_حازم مين !! قولتلك مفيش بيني وبينه حاجه ومش هيبقى فيه يا نادين
بسيبها تكمل كلامها مع نفسها وبقفل باب الاوضه وبنام جنب شادي
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية للحبيب حبيب تاني)
