رواية للحبيب حبيب تاني الفصل الثاني 2 بقلم شهد محمد جادالله
رواية للحبيب حبيب تاني الجزء الثاني
رواية للحبيب حبيب تاني البارت الثاني
رواية للحبيب حبيب تاني الحلقة الثانية
_وراكي إيه انهارده
_ولا حاجه هروح اجيب شادي من المدرسة وارجع اعمل الغدا
_نفسي اوي في المكرونة بالبشاميل بتاعتك
_تصدقي شادي طلبها من يومين خلاص هعملها انهارده وتيجي تتغدي معانا
_انا كدا كدا جايه عشان تكمليلي الحكاية
_اتفقنا هستانكي
بقولها وبقفل معاها وباخد شنطة اللابتوب وشنطتي وبنزل باخد عربيتي بروح اجيب شادي ابني من المدرسه
وبروح للسوبر ماركت بجيب شوية طلبات للبيت وبنرجع سوا
_وعملت إيه كمان إنهارده؟
_كان عندنا حصة رسم ورسمتي معجبتش الميس بس عجبت يارا
_مين يارا؟
_زميلتي يا مامي قالت عليها حلوه أوي وطلبت مني ارسم واحده زيها ليها ممكن تبقي تعلقي ليا الرسمه في اوضتي؟
بيقولها وهو بيفتح التلاجه بيطلع إزازة مياه بيشرب وانا مراقبه تصرفاته وبرأته وبقول:
_وريني الرسمه دي كدا
بيجري بيفتح شنطته وبيجيب الاسكيتش بتاعته وبيفتحها يوريني
كانت رسمه لولد وبنت والبنت ماسكه بلونه في إيديها على شكل قلب
_معجبتش الميس ليه ما هي حلوه اهي
_مش عارف بس مش مهم
_يعني إيه مش مهم مزعلتش انها معجبتهاش؟
_كلام الميس عادي مش بيأثر فيا بس ممكن كنت زعلت لو يارا اللي قالت إنها مش حلوه انا بفرح من كلام يارا الحلو وبزعل من كلام يارا لو وحش
_اهلآ وسهلا ، شكلها عامل إزاي يارا دي
_زيك حلوه
ببتسم إجابته البريئه وببوس راسه وبقول:
_هعملك إنهارده مكرونة بشاميل
_هييييه ، مامي هو بابي هيرجع امتى؟
بسكت عشان مكنتش عارفه ارد اقول إيه ومش بفهم إيه علاقة كلامي ب باباه بس بتنهد وبقول:
_هيخلص الشغل في السفر ويرجع يا حبيبي المهم خالتو ياسمين جايه تتغدا معانا وهتجبلك معاها حاجه حلوه
_هيييييه
بيقولها وبيجري على بره ببتسم وبقف اعمل الأكل يمكن اللي مصبرني على كل حاجه هو شادي
معنديش حاجة غاليه في حياتي غيرو
أتجوزت عزت ابو شادي من أربع سنين
راجل شاطر مهذب وناجح ونبيل ووسيم
بس كان فيه حاجه ناقصه في علاقتنا
كان ناقصها الحب ..
هو اختارني عشان شافني مناسبة ابقى ام ل عيالو مش اختارني عشان بيحبني
وانا اختارته عشان كان مناسب توقعت إني هحبه مع العشره والايام
واه حبيته بس حب عِشرة مش زي حبي لسيف أبدآ أبدآ
وخدنا قرار من خمس شهور إننا ننفصل
وبالفعل ده حصل اطلقنا
وساب ليا شادي رغم إن روحه فيه
الشقه اللي انا فيها دي بتاعته وبعد الطلاق كتبها بأسمي واترجاني إني مسيبهاش
بيعرف اخباري انا وشادي كل فترة
بس لسه مش عارفين هنجيبها لشادي إزاي
فهمته إنه مسافر في شغل وهيرجع قريب ، شادي ذكي ولماح لو شاف ابوه وشاف معاملتنا لبعض هيفهم إن فيه حاجه غلط فيه حاجه اتغيرت
بحط صينية البشاميل في الفرن وبقف بتبل البانيه وبخلص وبعمل سلطة فواكه
وعقبال ما بخلص بتكون ياسمين جت
_الأكل لسه خالص
_طب حضري بقى عقبال ما اشوف شادي وارجعلك
_هتلاقيه في اوضته
بقولها وهي بتروح تشوفه وانا بخرج ليها بعد ما بحضر الأكل
وبنقعد نتغدا سوا وبعد ما بنخلص بحط لشادي سلطة الفاكهه وبنقعد انا وياسمين في البلكونه
_سألني على عزت انهارده
_وقولتي إيه؟
_زي كل مره مسافر في شغل
_متحاولي تدي فرصة تانيه لعلاقتك مع عزت يا نادين
_مش هينفع جوازي منه عباره عن عقد شراكة هو يشتغل ويصرف عليا انا وابني وانا اخد بالي من بيته والأكل والغسيل الجواز فيه حاجات تانيه اهم من كدا يا ياسمين هو محبنيش هو شافني مناسبة وانا نفس الكلام
_طب ما تجربي تحبيه
_ياريت بالسهولة دي ياريت اقول لقلبي حب ده يحبه ومتحبش ده ميحبهوش
_خلاص طيب روقي هروح اعمل قهوة وارجع تحكيلي بقيت الحكاية
بتقولها وبتقوم وانا بولع سيجاره وانا بدندن مع غروب الشمس
|..ان كان الحبيب .. حبيب تاني
انشغل قلبه .. حبيب غيري
نسى كلامه الاولاني
كان اهون عليا لو كان قالي
الدنيا فى عينيا
ما تحلى يوم وانت بعيد
والدنيا حلاوتها
كلمه حلوه تطمني..|
_قهوتك يا ام كلثوم
بضحك ليها وباخد منها فنجان القهوة
_كملي بقى بعدين حصل إيه؟
_وقفنا إمبارح عند إيه؟
_لما مريم وسيف ارتبطوا
_ااه
“فــــــلاش بـــــااكـ”
وفي اليوم التاني بصحى على خبر غريب
سيف ومريم ارتبطوا !!
سمعت الخبر من مروان صاحبنا
كانت حاجه غريبه بنسبالي سيف مجابش اي سيره
سيف لو كح بيرن يقولي انا كحيت
الموضوع كان غريب بنسبالي بس استنيت اسمع منه هو الأول
بنحضر المحاضره الأولى والتانيه ومبيظهرش برن عليه مقفول
بخلص الجامعة وبروح المكتبة وبردوا مبيجيش بروح ليه بيته
عايش مع مامته ومامته دي لذيذه بشكل
انا وهي صحاب جدآ
بروح ليها برن جرز الباب وبتفتحلي
_إزيك يا سوسو
_اهلآ بالجميل عامله شوية كشري إنما إيه هتاكلي صوابعك وارهم
_يظهر إن حماتي هتحبني بقى
_تبقى عبيطه لو محبتكيش
_طيب قوليلي ابنك اللي هيجيب اجلي فين؟
_نايم جوه بحاول اصحيه من الصبح مش راضي ادخلي قوميه انتي
باخد إزازة مياه من على السفره وبدخل ليه بفتح نور الاوضه والشبابيك
_قوم يا سيف باشا
_اقفلي النور
_هعد من واحد ل خمسه لو مقومتش هغرقك بالمياه انت حر
مبيردش عليا وبعد وولا بيتحرك من مكانه وبكون مضطره إني اغرقه بالمياه فعلآ
بيقوم وهو مخضوض بيجري ورايا وبستخبى في مامته
_يعني حد يصحي حد كدا
_انا حذرتك
_والله هوريكي يا نادين
_ده انا اللي هوريك
بتزعق مامته وهي بتقول:
_ولا كلمه إنتي وهو المسلسل التركي جاي لو سمعت نفس هعملكم على الغدا فاهمين؟
بنبص لبعض وبنهز راسنا بمعنى ماشي
وبتسيبنا وبتقعد في الصالون
وبنقعد انا وهو في البلكونة
كان شكله لذيذ وهو لسه صاحي شعره المنعكش ونبرة صوته اللي كلها نوم
بيفتح علبة سجايره بيطلع سيجاره ليه وسيجاره ليا
_حصل إيه بقى ؟
_انا اللي المفروض اسأل انت عملت إيه؟
_عملت إيه في إيه؟
_إمبارح بعد ما سيبنا بعض حصل إيه؟
_مفيش نزلنا خرجنا انا ومروان واميره ومريم
_حلو وبعدين
_بعدين إيه يا نادين ماتقولي في إيه؟
_انت ومريم ارتبطوا ؟
_إيه ده امتى ده؟
_انت بتهزر الشلة كلها بتقول كدا مريم طايره من الفرحه ومنزله خمسين استوري الجامعة كلها عارفه
_إيه العبث ده !!
_سيف مريم دي الشلة اختنا يعني ، يعني مينفعش تتسلى بيها
_انتي بتقولي إيه هو أنا اتسليت بغيرها عشان اتسلى بيها هي
_امال حصل إيه اتكلمتوا إمبارح؟
_اه رقصنا سوا وكنت واقف لوحدي بره وجت وقفت معايا وقالتلي انا بحبك قولتلها وانا كمان
_وانت كمان إيه؟
_انا كمان بحبها زي ما بتحبني ده الرد الطبيعي للكلمة هي اكيد فهمت غلط مريم اما مش شايفها اكتر من اخت
_انا مش عارفه اخد صفك ولا صفها
بيفتح موبايله وبيقول:
_ده فيه مسدجات كتير منها انا صحيت يا حبيبي ، انا نازله يا حبيبي ، انا هروح مع ماما مشوار ومش هتأخر ، اصحى بقى وحشتني
بضحك وانا بنفخ دخان السيجاره وبقول:
_البس يا حبيبها
_نادين متهزريش
_حد قالك تقولها وانا كمان
_يعني كنت اقول إيه أنا كمان بحبك بس انتي زي اختي
_موقفك صعب خصوصآ إن الدنيا كلها عارفه
_نادين قوليلي اعمل إيه أنا محتاس عايز اخرج نفسي من غير ما اجرحها
_انتوا الاتنين اغبيه اصلآ انت واحد ميعتمدش عليه وهي عبيطه عشان ده ارتباط وهمي مش مبني على اي اساس ولا اتفقت هتتقدم امتى ولا اعترضت على انك فلاتي
_ولما انتي مش هتحلي معايا الموضوع جايه تصحيني ليه دلوقتي؟
_ده كل اللي همك؟
_هقولها إني بحبها بس مش الحب اللي في دماغها وإنها فهمت غلط
_خايفه على مشاعرها هو انت ليه كدا؟
_كدا إزاي مش فاهم؟
_ليه مش بتحب اللي بيحبك
_قلوبنا دي في إيد ربنا مش في إيدينا إحنا وإلا كنا كلنا مرتاحين
_عندك حق ، حل مشكلتك مع نفسك بقى يا فالح وسلامات أنا عندي شغل
بقولها وباخد شنطتي وبسلم على مامته وبمشي برجع للمكتبة بقف فيها وبيرجعلي على اخر النهار
_جبتلك معايا كبده وسجق
_اوعا تكون فاكر إن الرشوه دي مش هتخليني اقول لعم حسني إنك بتيجي متأخر
_هو ده العشم ياختي اقعدي بقى خليني احكيلك
بشد كرسي وبقعد وبقول:
_مصيبة جديده وفيها بنت جديده
_المره دي الموضوع بعيد عن المصايب صدقيني
_احكي
_معرض انتيكات قديم بتاع عمي هفتحه واجدده وارجع اشغله تاني كان شغال حلو اوي خصوصآ إنه في شرم الشيخ منطقة سياحية والحاجات دي شغاله هناك
_حلو اوي ده يا سيف هتبدا امتى
_لأ دي مجرد فكره انا لسه مش جاهز الموضوع محتاج فلوس كتير اوي
_كام انا ممكن اسلفك
_اه وبتاخدي كمبيالات ولا وصل أمانه؟
_ولا ده ولا ده بس ال٢٠٠ بترجعلي ٤٠٠ وهكذا بقى
_هو ده العشم بردوا
بنضحك سوا وبيقطع كلامنا دخول بنت
كانت في أول العشرينات
حلوه بيضه وعيونها واسعه استايل لبسها لايق عليها شعرها بني وطويل
_لو سمحتي النوت دي الاقيها عندك؟
بتقولها وبتوريني صوره في الموبايل
_لأ دي ممكن تلاقيها في أول مكتبة في شارع التحرير
_تمام متشكره اوي
بتقولها وبتمشي وباخد بالي من نظرات سيف ليها بس المره دي مش بقدر احدد نظراته
كنت بعرف افهمها إذا كانت إعجاب او إنبهار او لفت نظر المره دي كانت نظرات غريبه مقدرتش افسرها ..
_قولي بقى عملت إيه مع مريم ؟
_قولتلها زي ما قولتلك الصبح
_اكيد انهارت
_جدآ عيطت بس اقنعتها إني مش مناسب ليها قولتلها بتحبي مين وعشان إيه وفضلت معاها لحد ما بقت كويسه
_جدع يا حنين
_كريم بقى كان مقتنع إني بحبها بس مخبي قالي طبيعي اي علاقة صحاب بين بنت وولد حد فيهم يغلط ويحب التاني وانت غلطت وحبيتها ومش عارف إيه
_التحفيل كان عليك يعني
_بظبط بس عارفه على قد ما كلام كريم صح على قد مانا مش مقتنع بيه يعني انا وانتي صحاب وقريبين من بعض بس انا مستحيل احبك عشان انتي في خانة معينه عندي زي الأخت الكبيره او الأم مثلآ محدش بيفهمني غيرك انتي وامي وانتي مستحيل تحبيني عشان انتي عارفه الجانب السيء فيا والنسخه الوحشه المتداريه عن الجميع
بهرب من كلامه باخد كتب وبقوم أقف بعيد بحطهم في المكتبه وبقول:
_فعلآ عندك حق
كان نفسي اقولو إن برغم من إني عارفه الجانب المظلم اللي فيه بردوا حبيته
برغم إن ولا عقل ولا منطق بيقول إن ينفع احبه بس حبيته واللي كان كان
وبتعدي الأيام بدون تفاصيل مهمه وبنخلص امتحانات وهو بيسافر شرم الشيخ عشان يفتح المعرض
بتفق معاه إن اسبوع وهاجي وراه عشان اساعده وإنهارده باخد كل حاجاتي وبلغي اي خروجات وبسافر ليه في شرم
“بــــــاااكــ”
_مامي هو مينفعش نروح حمام السباحة مع يارا
_وانت عرفت منين إن يارا رايحه حمام السباحة؟
_ماهي معانا في روم الواتساب هي ومامتها وقالت إنهم رايحين بكرا هي وأخواتها ومامتها عشان خاطري يا مامي نروح
ببص لياسمين وبتتكلم هي وبتقول:
_خلاص هنروح عشان بالمره نتعرف على مامت يارا
_هيييييه
بيقولها وبيجري وبتبص ليا ياسمين وبتقول:
_مين يارا دي؟
_معرفش بس شكل حكايتها حكاية الاستاذ مالوش سيره غيرها
_ابننا بيحب
_لسه بدري على الكلام ده يا ياسمين بس ربنا يجعل نصيبه احسن مني ولا تبقى يارا دي انا ولا يبقى هو سيف
_طب روقي اهو نروح نغير جو ونشوف مرات ابننا
_والله انتي مجنونه قومي ننام
_كمليلي بقيت الحكاية
_بكرا
_هو كل يوم حته هي حدوتة قبل النوم
_هكمل بكرا يا ياسمين قومي ننام
_طيب
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية للحبيب حبيب تاني)
