رواية الخاطف المجهول الفصل الأول 1 بقلم خلود بكري
رواية الخاطف المجهول الجزء الأول
رواية الخاطف المجهول البارت الأول
رواية الخاطف المجهول الحلقة الأولى
الساعة ٢ بليل لقيت رسالة على التليفون مسكته وأنا عنيا مغمضه من أثر النوم لقيت رساله هزتني وخلتني قومت وقفت على السرير من الصدمة والخوف :
صاحبتك عملالك عمل !
بصيت علي الرساله تاني أشوف مين اللي بعتها لقيت رقم مجهول مش باين زي ما يكون مشفر أو ممسوح ..!
خرجت من الأوضة جرى على ماما وانا بتنفس بالعافيه لقتها إتخضت وسألتني بخوف :
ـ في إيه ؟ بتجري كده ليه ؟
مسكت في هدومها أوي وأنا بعيط من كتر الخوف وقلت لها :
ـ في رسالة جاتلي مكتوب فيها صاحبتي عمله ليا عمل ..
لقيتها هديت خالص وأخدتني قعدتني وقعدت جنبي وقالت ليا:
ـ خلود إنتِ مؤمنة بالله ولا لأه ؟
هزيت راسى براحه وقولتلها :
ـ ونعمه بالله
ابتسمت وقالت :
ـ الحاجات دي خرافات محدش يقدر يأذيكي إلا بأمر الله .
وسكتت شوية وقالتلي:
ـ كل مستودع عند الله محفوظ وأنا يا بنتي بستودعكم عند ربنا دايمًا .
حسيت إني هديت وكلامها ريحني فقومت دخلت كملت نوم بس التفكير مش راضي يسبني .
مين بعت الرسالة ؟ ومين صاحبتي اللي تعمل فيا كده ؟
عدى يوم والتاني وأنا بحاول مفكرش في الموضوع وفي يوم كنت قاعدة في أوضتي بذاكر لقيت الستاره بتتحرك …
حسيت بنغزة الخوف في قلبي حاولت أخرج من الأوضة لقيت الباب أتقفل مرة واحدة و معرفتش اخرج .
ولقيت كل حاجة في الأوضة بدأت تتغير أماكنها والرسالة اللي اتبعتتلي لقيتها على الحيطه وعلى المرايا وفي كل مكان.
صرخت بأعلى صوت وناديت على ماما بس مفيش حد رد عليا …
وفجأة لقيت بنت شكلي بالضبط واقفة قدامي وصوت غريب بيقول :
ـ إنتي لازم تكوني معاها
بصيت ليها بصدمة لقيتها بتقرب مني وصوتها عالي ومخيف:
انتي لازم تموتي عشان أنا أعيش …
رجعت خطوتين لورا وفضلت اصرخ لحد ما ماما لقيتها بتصحينى وبتقولى :
ـ فوقي يا حبيبتي في إيه عماله تصرخي ليه ؟
بصيت حواليا لقيت ماما نايمة جانبي وبتحاول تهديني وبتقولي :-
بقالك ساعة بتصرخي كنتِ بتحلمي بإيه ؟
لقتني مره واحدة حضنتها وأنا جسمى كله بيرتعش :
كابوس يا ماما كابوس بس كان وحش أوي
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية الخاطف المجهول)
