رواية ما لا يحبه القراء الفصل الثاني 2 بقلم إسراء درويش
رواية ما لا يحبه القراء الجزء الثاني
رواية ما لا يحبه القراء البارت الثاني
رواية ما لا يحبه القراء الحلقة الثانية
حور ببرود: انا لاقيت شغل وهرجع اشتغل تاني
اسر: ليه؟!
حور: هرجع لكاريري اللى نسيته واتخليت عنه يا اسر واللى انت مطلبتش مني اني اسيبه
اسر: يا حور انا…
حور: اسر لو سمحت انا مش حابة اتكلم
اسر: ماشي يا حور اشتغلي
اسفة يا اسر بس خطتي لازم هنفذها لازم اجيب حقي منك………………
بعد اسبوع……….
اسر: حور
حور: نعم
اسر: فين الفطار
حور: عندك على السفرة
اسر: وفين هدومي
حور: في الدولاب
اسر: اصلك كنتي بتحضريهم يعني وبتحطي الاكل الشنطة
حور: معلش مش فاضية انا نازلة الشغل عن اذنك
يلا يا حبايبي ننزل
________
يمكن دي اول مرة معملش واجبي تجاه اسر بس انا مبقتش قادرة
____
اسر: حور انا جعان تعالي ناكل
حور: احنا اكلنا يا اسر الاكل عندك على البتوجاز كُل
اسر: ده اكل امبارح صح؟!
حور: اه
اسر: ليه؟!
حور: رجعت من الشغل تعبانة ومقدرتش اطبخ اكل جديد
اسر: حور انا……..
حور: اسر الاولاد محتاجين مدرسين لاني مبقتش بفضى اقعد معاهم
اسر: بس يا حور الميزانية….
حور: ميخصنيش يا اسر انا مبقاش عندي وقت من بكرة تجيب مدرسات للاولاد
اسر: حور بس ممكن….
حور: معلش يا اسر انا تعبانة وعاوزة انام
متعودتش اتجاهل اسر لما يكلمني بالعكس كنت بحاول افتح دايما معاه كلام بس لازم يفهم انا عانيت اي الفترة اللى فاتت
______________
حور: صباح الخير
اسر: صباح النور
حور: الاكل عندك على السفرة والاولاد انا هوديهم المدرسة بس مش هرجع اخدهم عشان راحة الكوافير
اسر: كوافير!!!
حور: ااه
اسر: طب والباص بتاعهم فين؟!
حور: مش انت لغيته عشان الميزانية؟!
اسر: ااااه نسيت
حور: فعلاً نسيت لاني كنت باخدهم اوديهم واجيبهم بس من النهاردا مبقتش مسؤوليتي لوحدي
اسر: حاضر يا حور
________________
ليان وزين: مامي
حور: حبايب مامي
زين: بابا اتأخر علينا النهاردا
اسر: اتاخرت واتخصملي كمان ساعتين
حور: مش ذنبي! الحِمل ده كنت انا شيلاه كل يوم بس دلوقتي مبقتش اقدر اشيله لوحدي
اسر: ماشي يا حور اللى تشوفيه
فين الاكل انا جعان جدا؟!
حور: ملحقتش انا يدوب رجعت من الشغل وروحت الكوافير
اسر: والاكل؟!
حور ببرود: اطلب دليفري
اسر: منين يا حور!!
حور: مش مشكلتي بقا يا اسر المهم اني على سنجة عشرة مش مهم حاجة تانية
اسر: والولاد؟!
حور: عادي هم اولادك زي ما هم اولادي اتصرف
اسر: كفاية كدا يا حور انتي بتضغطي عليا بما فيه الكفايه
حور: لاء يا اسر انا بنفذلك احلامك اللى خونتني عشان تحققها مش انت عاوز ست تهتم بنفسها وتكون ناجحة في شغلها اديني اهو بحقق احلامك؛!
اسر: حور والله العظيم انا مخنتكيش دي مجرد صديقة عمل وفعلا اتقابلنا كام مرة بحكم الشغل
حور: ااااه شغل طب وكلامك عن حياتنا معاها وهزارك وتباسطك معاها في الكلام؟!
اسر: غصب عني والله مكنتش اقصد واحلفلك انها متتكررش
حور: خلاص انا كمان هكلم زميلي في الشغل وهرجع اقولك كدا
اسر: حووووووور
حور: اي يا اسر متنرفز ليه؟! مقبلتهاش على رجولتك يشمعنى انا اقبلها عادي
غريب المجتمع ده ربنا لما حرّم الخيانة حرمها على الراجل والست ولما وضع العقوبة وضعها على الراجل والست واحنا اللي بقينا نحلل للراجل قلة دينه وعصيانه لله وفعله الحرام ومجاهرته لله بالمعاصي ونسميها نزوة وتعدي
بس الست لاء لما تغلط يتنصب ليها المشانق
مع ان الدين حدد كل شئ اللى يغلط يتعاقب ويتحمل غلطه ويتأدب ويتوب لله اي كان ست او راجل لا هنحط على غلط الراجل سكر ولا هنطالب بغفران للست غلطتها ونساويها مع الراجل في الغلط
شرع الله لازم يطبق على اللي يغلط سواء راجل او ست
يعني انا عمري ما هسمح لنفسي اغلط عشان اتساوى معاك وتبقى غلطة بغلطة الحرام مفيهوش ومساوة الحرام اخرته جهنم
اسر: اانا………
حور: انت غلطت يا اسر في حق ربنا قبل حقي، توب لربنا هو اولى بطلب السماح
سبته ودخلت غرفتي وقفلت الباب
وانا في كامل عصبيتي وانهياري، كان نفسي وقتها اعيط يمكن اخرج من اللى انا فيه
بس مش كل اللى بنتمناه بنلاقيه حتى الدموع رفضت تساعدني وتهدي من ثورة قلبي شوية
قومت اتوضى واصلي وفضلت على السجادة لحد اما غلبني النوم
____________________
تاني يوم
اسر: حور
حور: نعم
اسر: القميص الازرق فين؟!
حور: في الدولاب بس متكواش
اسر: طب فين قميصي الابيض؟!
حور: مش نضيف
اسر: ليه يا حور؟!
حور: مش فاضية اغسل غير يوم في الاسبوع ولسة مغسلتش
اسر: الوضع ده مبقاش ينفع
حور: وضع اي
اسر: وضع البيت
حور بلامبالاة: ماله
اسر: ماله انتي شايفة انه طبيعي
اسر: جدا مش ده اللى الوضع اللي انت حابه؟!
والله يا اسر ده اللى اقدر عليه مش عاجبك هات شغالة
اسر: منين يا حور انا بقيت اشتغل شغلتين
عشان اكفي مصاريف الاكل والمدرسات والخروجات ومصاريف لبس الاولاد و لبسك اللى المفروض انتي بتشتغلي عشان توفريها اساسا
حور: فلوسي يا دوب بتكفي مصاريف الميكب والكوافير والجيم والمفروض ان اقل حقوقي اللبس ولا اي
اسر: انا تعبت يا حور
حور: وانا مش فاضية للكلام ده اتصرف ماليش دعوة
“مش لازم ياخدك الشهامة في التضحية لان غيرك هيفكر انها فرض انت فرضته على نفسك وطوقت نفسك بيه ويوم ما هتفوق وتتطلب حق واحد من حقوقك هيتقال عنك بياع ومالكش آمان ومتطلع”
______________________
بعد مُدة……
هدى: كفاية كدا يا حور انتي كدا ربتيه بما فيه الكفاية انا شوفته النهاردة معرفتهوش ذقنه طولت وجسمه خس وبقى شكله عنده 100 سنة
حور: انا كنت اتمنى اطلق منه بس انا خوفت على اولادي يتبهدلوا
هدى: اسر اتربى يا حور ومتنسيش انه مخانكيش الموضوع انه انجرف في الفتنة ومفيش حد كبير عليها يا حور وبعدين انتي بهدلتيه وعلمتيه ان الله حق وحتى النوم مبقاش ينامه عشان يلاحق على طلباتك وبرده اتحمل كل ده عشان بيحبك ومدرك غلطه كفاية كدا يا حور هو اتعلم الادب
حور: انا عارفة انه تعب وهو صعب عليا بس كان لازم يفهم انا كنت بتعب قد اي يا هدى
هدى: واديه اتعلم
حور: اتمنى يكون فهم الدرس
_____________________
زين وليان: مامي
حور: حبايب مامي
بصيت عليه وعيني جت في عينه لاول مرة من مُدة
…
اسر بقا شخص تاني مبهدل هدومه مش مكوية وشعره منعكش وذقنه طويله وتحت عينه اسود من التعب وقلة النوم وجسمه بقا نحيل
هو وصل لكدا امتى؟! معقولة انا مكنتش حتى ببص في وشه لدرجة اني نسيت شكله
للدرجة دي قلبي إسى على آسره!!
“الخيانة والاهمال وعدم التقدير بيقتل كل حاجة ممكن تكون حلوة في قلب الست وبتحولها لالة بيقودها الانتقام”
فوقت من شرودي على صوت ليان:
ليان: مامي انا جعانة
حور: بجد يلا ناكل سوا
اسر هدومك على السرير خد شاور وتعالى ناكل سوا
____________
اسر: انتي اللى طابخة صح؟!
حور: ايوة
اسر: اومال فين الشغالة
حور: مشيتها
اسر: ليه؟!
حور: عادي
اكلنا وخلصنا:
اسر: يلا يا حبايب بابا ادخلوا الاوضة عشان عاوز اتكلم مع ماما شوية
حور ممكن اتكلم معاكي شوية انا نفسي اسمعك زي زمان
حور: زمان؟! انا كنت وحشة زمان وباهتة وست عندها 100 سنة
اسر: ياريتك ترجعي زي زمان، وحشتني حور واكلها ووقفتها جنبي
حور: طب ومدام حور صاحبة الكرير اللى بتروح الكوافير الجيم وبتهتم بنفسها
اسر: انا حبيتك زي ما انتي يا حور ارجوكي ارجعي حور اللي حبيتها
هرجع يا اسر هرجع كأم لأولادي بس معتقدش كا حبيبة ولا حتى زوجة لان اللى بينا انت كسرته يا اسر وصعب يتداوى بسهولة
اسر: انا غلطان والله غلطان حقك عليا
حور: بس يارب تكون فهمت انا كنت بتعب قد اي وكنت باجي على نفسي ازي عشان اوفر أجرة المدرسات والشغالة وباص المدرسة والكوافير ولبسي
ياريت تفهم اني لما كنت بضحي كنت بضحي عشان بيتي مش عشان انت طلبت مني لاء عشان انا بديت بيتي واسرتي على نفسي
واني كان ممكن اختار نفسي واسيبك انت تعاني
عمتا يا اسر انا نقلت شغلي كله اني اكتب مقلاتي اونلاين والشغالة مبقتش موجودة ولا المدرسات ولا الدليفري ولا الخروجات الاوفر وتقدر تسيب الشغل التاني
بس خليك فاهم اني بضحي وتضحية كبيرة عشان المركب تمشي تاني
وهترجع تاني تلاقي فطارك في الشنطة وهدومك مغسولة ومكوية وشرباتك مترتبة واكلك مطبوخ وبيتك متنضف واولادك بيذاكروا وبينجحوا وحتى حمامك هتلاقيه متحضر
لان ده واجبي وواجب كل ست عندها بيت وأسرة بتتحمل عشانهم كل التعب وبتيجي على نفسها وتنسى انها ست وليها حقوق
وكل اللى محتاجاه كلمة حلوة اخر اليوم تتطبطب عليها وتشيل عنها التعب بس مبتسمعهاش
وكل اللى تسمعه انتي بتعملي اي طول اليوم!
وكانها روبوت مبتتعبش ولا بتمل
وبعد كل ده تتخان تحت مسمى انتي مبقتيش مهتمة بنفسك
وهي لا عندها وقت ولا فلوس ولا حتى حد يحفزها ويحسسها انها حلوة في كل حالتها
ولا حد يقدر انها بتستخسر في نفسها عشان اولادها وكل اللى بتكون محتجاه حد يسمعها ويهون عليها ويبقى عنده شوية تقدير ناحيتها
هتلاقيني يا اسر بس المرة كا أم مش زوجة ومش مش هسكت عن حقوقي في كوني انسان محتاج تقدير محتاج حد يطبطب عليه ويسمعه ويقدر وجوده
مش هسكت لاني اتعلمت
اسر: انا اسف
حور: وانا هقبل اسفك يا اسر بس مش هسمح باي غلط في حقي تاني
اسر: والله بحبك ولا عمري حبيت غيرك واللي حصل غلطة وذنب انا توبت منه والله مش هيتكرر ابدا اوعدك
وانا والله مقدر تضحياتك واتعلمت وعرفت انتي شايلة ايه عني
بس ارجوكي ارجعيلي حبيبتي تاني
حور: مش هقدر يا اسر اللى اتكسر جوايا ميتصلحش بسهولة سيبها للزمن ممكن يصلحها
___________________
بعد مُدة مش قليلة:
اسر: حوووور
حور: نعم
اسر: احط الشوربة امتى؟!
حور: استنى يا اسر شوية هخلص الكنس واجيلك
انا اللى جبته لنفسي اديه دخل المطبخ هفضل الم فيه سنة
اسر: بتقولي حاجة يا حبيبتي
حور: بقولك حط الشوربة يا اسر
اسر: حريقاااااااااه
حور: عااااااا طفي يا اسر يخربيت اللى يطلب منك مساعدة
_______
ليان: ماما شوفي دي؟!
حور: دي غلط يا ليلي
ليان: بابا هو اللى حلها
حور: بابا امممم..
اسر انت اللي حليت دي ل ليلي؟!
اسر: اه ايه رأيك
حور: متحلش حاجة تانية بقا
________
اسر: حور الاولاد نامو
حور: اه
اسر: طب يلا نشرب النسكافيه واساعدك في المقالة الجديدة اللى هتكسر الدنيا زي المقالات اللى قبلها
حور بابتسامة: يلا
اسر: شكراً يا حور انك موجودة معانا ومتحملانا وشيلانا
شكراً على نظافة البيت والغسيل شكراً هلى تربية الاولاد والاكل الحلو اللى من ايدك شكرا انك بتساعدي ومن قلبك
حور: اللى بيحب حد مش بيتعب منه ولا بيحس انه تقيل عليه يا اسر بس كلامك ده بيمحي اثر التعب وعرضك لتقديم المساعدة بيحسسني انك مقدر مجهودي حتى لو بتبهدل الدنيا برده وجودك جنبي بيهون كل حاجة
اسر: بحبك يا حور
حور: وانا كمان
تمت بحمد الله..
لقراءة الرواية كاملة اضغط على : (رواية ما لا يحبه القراء)
