رواية ضروب العشق الفصل الثاني عشر 12 بقلم ندى محمود توفيق
رواية ضروب العشق الجزء الثاني عشر
رواية ضروب العشق البارت الثاني عشر
رواية ضروب العشق الحلقة الثانية عشر
في صباح اليوم التالي داخل منزل محمد العمايري ……
كانوا على طاولة الطعام يتناولون فطورهم بهدوء ولا أحد يتحدث ، كان الكل يأكل معادا هو يعبث بصحن الطعام الذي أمامه دون أن يضع لقمة في فمه وينتظر اتصال معين بفارغ الصبر ولا يزال الغضب يهيمن عليه منذ أمس ، سمع أمه تهتف باهتمام :
_ مالك ياكرم مش بتاكل ليه .. إنت متعصب من حاجة ؟!
رد عليها باختصار شديد :
_ مليش نفس !
نظرت له شفق بتدقيق وتحدثت لنفسها بخوف ” هل يعقل أن يكون شك بشيء عندما وجدني أمسك بصورة ذلك الرجل بالأمس ” اهتز هاتفه على الطاولة بجانبه وأخيرًا جاء الاتصال المنتظر فوقف فورًا وأجاب وهو يسير باتجاه الباب ليغادر :
_ ألو يامسعد عملت إيه ؟
أجابه الآخر باستياء شديد :
_ هو ياكرم بيه شوفت الكاميرات وطلع هو
تحول لجمرة نيران ملتهبة وأطلق من بين شفتيه الفاظ بذيئة من بينها كلمات وعيد بالانتقام ، ليكمل مسعد بجدية وحزم :
_ سبلي أنا الموضوع ده ياكرم بيه وهجبهولك خلال كام يوم
_ عايزه سليم يامسعد ومحدش يلمس منه شعرة واحدة
_ حاضر
***
كان حسن بمكتبه داخل الشركة يدور بمقعده بحركة دائرية حول نفسه وبيده مفاتيح سيارته يعبث بها ويحركه يمينًا ويسارًا أمام عيناه ، شارد الذهن يتذكر كلامها ” عشان هي أصلًا عمرها ماحبتك ، وإنت كنت دايب فيها ويمكن مازالت ، هي باعتك في أول محطة ” .. ” اللي لسا بتحبها دي تخلت عنك رغم كل اللي عملته عشانها ” ، لا يزال يحبها للأسف ولم يتمكن من نزعها من قلبه بأي شكل من الأشكال ، لم يعد حبًا كما كان سابقًا ولكنه لا يستطيع القول أنه يكرهها ، رغم أنها لا تستحق سوى الكره وكل ما قالته له يسر كان حقيقة .. هي تخلت عنه وخدعته وهو كالأحمق مازال يحمل لها القليل من الحب !! .
قطع شروده دخول يسر المفاجئ وهي تحمل بيدها ملفات صغيرة فاغلقت الباب خلفها وهتفت بإيجاز :
_ حسن اتصل بزين شوفه فين لغاية دلوقتي مجاش !!
عقد حاجبه وهدر باستغراب :
_ وإنتي عايزة زين ليه ؟!
هتفت بامتعاض وابتسامة صفراء :
_ يمكن عشان الشغل مثلًا ، وعشان في ملفات عايزة اورهاله ضروري
قال في حزم ونظرة قوية :
_ طاب ما أنا موجود أهو ولا هو لازم زين !! ، تعالي وريني إيه اللي عايزة تورهوله
أشاحت بوجهها للناحية الأخرى متأففة بخنق فهي قررت منذ ما حدث بالأمس أنها ستحاول تجنبه وعدم التحدث معه بقدر الإمكان حتى تهدأ نفسها الثائرة منه .
اقتربت منه ووقفت بجواره وانحت للأمام بجزعة وفتحت الملفات ثم بدأت تتحدث وتشرح له الأمر بالتفصيل وكان هو بكامل انتباهه معها ولما تقوله ولكن انحرفت عيناه عن غير قصد واستقرت على حجابها المزحزح من الأمام فأظهر عن منطقة صدرها البيضاء العلوية ونظرًا لأن الرداء الذي ترتديه لديه فتحة صدر واسعة قليلًا فعندما انحت كشف عن داخلها !! ، استغرق الأمر ثلاث ثواني بالضبط حتى مد يده وسحب حجابها لأسفل جيدًا ليخفي لحمها وهتف بغلظة صوته الرجولي :
_ لما تلبسي الفستان ده تاني البسي حاجة تحته يإما تلبسي طرحة طويلة وتثبتيها عشان مترجعش لورا
اعتدلت بسرعة وانتصبت واقفة ثم عدلت من حجابها وقالت في انفعال بسيط :
_ وإنت تبص ليه أصلًا !!!
ازاح نظره عنها وقال بوقاحة مبتسمًا :
_ فرجة ببلاش .. متفرجش ليه !!
صرت على أسنانها بغيظ ولملمت الملفات فورًا قائلة بقرف وهي تتجه نحو الباب :
_ وقح !
وقبل أن تقبض على مقبض الباب وتفتحه تذكرت شيء فتوقفت والتفتت بجسدها ناحيته ثم اقتربت مجددًا وجلست على المقعد المقابل له مغمغمة بمضض واختناق :
_ عايزة اطلب منك طلب
اتسعت ابتسامته وأجابها بوقاحة وخبث أشد :
_ إيه متفرجش تاني ؟!!!
قالت بنظرة منذرة وهي تضبط غضبها :
_ احترم نفسك ياحسن
تخلي عن وقاحته واخفي ابتسامته ليجيبها بجدية وخشونة :
_ طاب قولي عايزة إيه ؟
_ رفيف كلمتني وبتقولي إنها نفسها تاجي تشتغل هنا وطلبت مني احاول اقنعك وأخليك تقنع زين وكرم ، هي بتقولي إنكم رافضين فكرة الشغل بس أظن معندكمش حجة طالما هتشتغل معانا وقدام عينا ، وأنا هدربها وهعرفها كل حاجة
أصدر تنهيدة حارة وصمت لبرهة من الوقت ثم تشدق بصوت أجشَّ :
_ طيب هشوف
استقامت وارسلت له ابتسامة وهي تهمس :
_ شكرًا
نظر لها بجمود ووجه خالي من التعابير فاستدارت هي وانصرفت وبعد أن اغلقت الباب وقفت خلفه تبتسم بسعادة داخلية حين استعادت توجيهاته الحازمة لها حول ردائها ، وقوي الأمل بداخلها أنها قد تكون أوشكت على تحقيق هدفها ! .
***
في تمام الساعة الثانية ظهرًا ……
كانت بمنزل والدها وتجلس بجانبه على الفراش وبين ذراعيه في صمت حتى همست بعتاب :
_ بس كان المفروض تقعد في المستشفى يابابا عشان تبقى تحت رعاية الدكاترة علطول
أجابها بصوت هادئ :
_ ما إنتي عارفاني ياحبيبة بابا مبحبش أقعد في المستشفيات وأنا الحمدلله كويس دلوقتي وأمك ربنا يخليها لينا مش بتخليني اتحرك من مكاني من وقت ما جينا من المستشفى
ابتسمت له بحب وامسكت بيده تقبلها هاتفة :
_ ربنا يخليكم لينا
_ عاملة إيه مع جوزك .. وهو عاملة إيه زين ؟
سألها بابتسامة عذبة لتختفي ابتسامتها تدريجيًا ويحل محلها العبوس ولكن سرعان ما رسمتها باحترافية وقالت بتصنع السعادة :
_ الحمدلله يابابا كويسين وزي الفل .. وهو كويس اتصل بيا من شوية وقالي إنه جاي في الطريق
أماء لها بالإيجاب ثم دخلت أمها وهتفت ضاحكة بمداعبة :
_ مش هتكبري على الحركات دي يابت
همت بأن تجيب عليها ضاحكة ولكن رنين الباب أوقفها وأشارت لأمها التي همت بالذهاب لتفتح بأنها هي التي ستذهب وتفتح وقالت :
_ خليكي أنا هروح افتح ده تلاقيه زين
قادت خطواتها الطبيعية نحو الباب وفتحته وكما توقعت كان هو فابتسمت له برقة وافسحت له الطريق للعبور ، ليهمس هو بتساءل قبل أن ينزع حذائه بجانب الباب :
_ في حد عندكم ؟
فهمت مقصده حول هل يوجد نساء من اقاربهم أو معارفهم أتو لزيارة والدها وتمني الشفاء له أم لا ، فهزت رأسها بالنفي وتمتمت بصوتها الناعم :
_ لا مفيش حد غير ماما
بدأ في نزع حذائه عنه وهو يغمغم بخفوت :
_ طيب قوليلها إني جيت
خرجت أمها من الغرفة وهي ترحب به ترحبيًا حارًا ومدت يده تصافحه ففعل وهي يرد عليها ترحبيها به باحترام شديد ثم اصطحبته معها إلى غرفة زوجها وجلس معه بعدما عانقه وتمنى له الشفاء العاجل أما ملاذ فذهبت للمطبخ وبدأت في تحضير كوب شاي له فقد عرفت خلال الأيام القليلة منذ زواجهم أنه يفضل الشاي كثيرًا وأكثر من أي شيء آخر ، وبعد دقائق قصيرة عادت لهم وهي تحمل الكوب على صينية صغيرة ثم وضعته أمامه على منضدة صغيرة الحجم وجلست على مقربة منه تتابع حديثة مع والدها الذي استمر لربع ساعة بالضبط ثم استأذن منهم بالرحيل ليوقفه أبيها هاتفًا :
_ خليك اتغدى معانا يابني !
أجابه بامتنان ونبرة مهذبة :
_ ربنا يخليك ياعمي مرة تاني إن شاء الله .. معايا شغل في الشركة لسا مخلصتهوش والله
_ ماشي يابني مش هعطلك عن شغلك ، ربنا يعينك ويقويك
ودعه ثم انصرف ووقف بجانب الباب يرتدي حذائه ، لتلحق هي به وتقف خلفه تنتظره حتى ينتهي ويلتفت لها لتهمس بنبرتها الأنوثية الخافتة :
_ هتاجي تاخدني إمتى ؟
أجابها بجفاء بسيط وإيجاز دون أن يكون في وجهه أي شيء من البشاشة أو جزء من انحراف شفتيه للجانب كابتسامة لطيفة :
_ على الساعة 8 إن شاء الله
ثم فتح الباب ورحل فأغلقته خلفه ببطء وهي تأخذ نفسًا عميقًا بأسى وشجن ، فهو لن يجعلها تحصل على المسامحة منه بسهولة وكأنها لم تخطأ في شيء يستحق الخصام والعقاب !! ….
***
مر أسبوعًا كاملًا وطرأت معه بعض التغيرات الطفيفة ، يسر لا تزال تحاول تجنب حسن قدر الإمكان حتى تفكر ماذا ستفعل وماذا ستكون خطتها القادمة ولكن تجد أن الشجار قد أدي بنتيجة إيجابية معه على عكس توقعها ، وملاذ لم تجد أي نتيجة لمحلاتها البائسة في إثبات أنها نادمة على كل شيء .. ولكنها لا تنكر أنه بدأ يكون أقل حزمًا معها ، وشفق باتت لا ترى كرم سوى دقائق قليلة إما على الطعام أو حين يكون في الحديقة يشرب قهوته .. لم تكن مدركة أنه يتجنب محادثتها عمدًا !! .
كانت تجلس في الحديقة على نفس المقعد الهزاز التي تجلس عليه دومًا ، تتأمل النجوم الساهرة وتسترجع ذكرياتها من أخيها وأمها ، وتحزن على الحال الذي هي فيه ثم تعود وتحمد ربها رغم كل شيء ، وتفكر إلي متى ستقطن في منزل الغرباء لابد من وضع الحدود لكل هذا ، وجال بذهنها فكرة أن تتصل بعمها ولكنها تعرف جيدًا شر زوجته وابنائه وبالأخص ابنه الأكبر الذي تهاتف عليها لسنوات ورفضته وكان هذا بداية المشاكل بينهم عندما وقف أخيها ضد عمه الجبار وطلب منه أن يبتعد عنهم تمامًا ويبعد ابنه عن شقيقته وإلا ستكون نهاية هذا الأمر سيئة .. أخيها !! ، أصبحت عارية لا تجد الستار الذي كانت تستتر خلفه ، لم يعد هناك السند أو القصر المنيع الذي تلوذ إليه وتحمي نفسه داخله وهي متيقنة أنها ما دامت داخله فهي في آمان من شرور الناس .
اعتدلت في جلستها فورًا حين رأته يقترب منها وهو يحمل في كل يد كوب قهوة دافئة ثم اقترب وجلس على المقعد المجاور لها ومد يده لها بكوب القهوة الثاني فأخذته من يده وهي تبتسم بحياء واضطراب من ملامح وجهه الصارمة على عكس طبيعته مع الجميع وليس معها فقط ، فساد الصمت بينهم للحظات وكلاهما يحتسي من كوبه في صمت حتى أتاها صوته القوي وهو يقول :
_ عدى اسبوع واستنيت تاجي وتقوليلي بنفسك مجيتيش .. ليه مقولتيش إنك عارفاه لما شوفتي صورته في اوضتي ؟!!
قُيَّد لسانها وأصابها الارتباك والقليل من الدهشة حين تأكدت أنه عرف بكل شيء ، فابتلعت ريقها وتمتمت بخفوت وهي تتحاشى النظر إليه :
_ خوفت أقولك لتصمم على اللي في دماغك أكتر لإني كنت عارفة من سيف الله يرحمه إنك مش سايب مكان وبتحاول تلاقيه وعايز تنتقم منه ، محبتش أكون سبب لو بسيط في حاجة ممكن تأذيك
هتف في صوت غليظ وغضب مكتوم :
_ إنتي عرضتي نفسك للخطر .. لو كنتي قولتيلي من وقت ما كنتي شاكة فيه مكنش اللي حصل معاكي في بيتكم ده هيحصل لإني مكنتش هسمحلك تقعدي وحدك أبدًا ، وأنا كدا كدا كنت هلاقيه وهوصله سواء عرفت إنه هو اللي بيبتزك أو لا بس زي ما قولتي اللي عمله ده خلاني اصمم أكتر على اللي ناوي أعمله فيه
فهمت في لمح البصر ما ينوي الفعل به ، وهو الثأر لروح زوجته التي خرجت وهي تتعذب ، فهتفت في ذهول وشيء من الرجاء :
_ ولما تدخل السجن بسببه هتستفاد إيه ، هتبقى خسرت مراتك وخسرت حياتك .. الأفضل إنك تسلمه للشرطة وتسيب القانون يعاقبه
نظر لها مبتسمًا بإزدراء وهو يتمتم :
_ وهي الشرطة هتقدر تطفي النار اللي جوايا !! .. خلاصة الكلام ياشفق أنا جيت عشان أقولك مش هينفع تمشي من هنا غير لما امسكه لإن ماما قالتلي إنك عايزة تمشي
ثم هب واقفًا واتجه نحو الداخل مجددًا وتركها معلقة نظرها عليه وهو يبتعد عنها بأعين دامعة !! ……..
***
عاد من عمله مبكرًا اليوم على غير عادته وكان متعبًا ودخل فورًا لغرفته حتى ينام والآن الساعة قاربت على العاشرة مساءًا ومازال لم يتسيقظ !! .
القت هي نظرة على ساعة الحائط بنظرات قلقة ثم استقامت وقررت أن تدخل له وتطمئن عليه وتعرف سبب نومه لكل هذه الساعات فهو منتظم في ساعات نومه ولا ينام لساعات طويلة هكذا ، قادت خطواتها نحو غرفته وفتحت الباب ببطء وادخلت رأسها تنظر له فوجدته في فراشه متدثر بالغطاء حتى كتفه ووجهه يعطي أحمرارًا ليس طبيعيًا فدخلت دون تردد واقتربت منه تتلمس بباطن يدها جبهته ووجنته لتجد حرارته مرتفعة جدًا فتخرج فورًا لتجلب دواء للانفلونزا وملأت كوب ماء ثم عادت له وهمست في رفق وهي تهزه بلطف حتى يستيقظ :
_ زين .. زين قوم خد البرشام ده
فتح عيناه بصعوبة واعتدل نصف اعتدالة في نومته حتى يتمكن من شرب الماء وأخذ الدواء ثم عاد وتدثر مجددًا بالغطاء مغمغضًا عيناه التي لا يقوي على فتحهما من ارتفاع حرارة جسده ، بينما هي فخرجت مجددًا وعادت بعد لحظات وهي تحمل بيدها منشف صغير أكبر من حجم اليد قليلًا وغمسته في الماء ثم أخرجته وعصرته وطوته ثلاث مرات ثم وضعته على جبهته فرفع هو يده وازاحه هامسًا بصوت ضعيف يكاد لا يسمع :
_ اطلعي ياملاذ وسبيني أنا هنام وهصحى الصبح كويس إن شاء الله
هتفت برفض قاطع وشيء من الغضب :
_ لا مش هسيبك إنت مش قادر تفتح عينك من التعب
ارتفعت نبرة صوته قليلًا وهو يقول بخشونة :
_ قولتلك اطلعي ملكيش دعوة بيا
امسكت بالمنشفة الصغيرة وعادت تضعها على جبهته مجددًا هاتفة في إصرار وحدة :
_ متعاندش معايا لما حرارتك تنزل إن شاء الله هبقى اطلع وأسيبك ، وممكن تسكت بقى وتسيبني أعملك الكمادات
ليس لديه القدرة لمقاومتها أو الجدال معها فاستسلم لأمره وأغمض عيناه من جديد تاركًا إياها تفعل به ما تريد ، واستمرت لدقائق تضع الكمادات على جبهته حتى هدأت حرارته المرتفعة قليلًا ، فتنهدت هي بارتياح وجعلت تتفرس ملامحه بابتسامة جميلة ومحبة ثم مدت يدها تمررها برقة على شعره الأسود الغزير .
لم يمر أسبوعين على زواجهم ولكنه نجح بسهولة أن يتولى منصبه في قلبها وأصبحت شبه متأكدة من أنها الآن يمكنها إعلانه سلطانها الجديد وتدق الطبول احتفالًا ببداية عهده .
سمعته يهمس في صوت خافت :
_ اطفي المروحة ياملاذ .. أنا بردان
_ مش هينفع اطفيها لازم اشغلها عشان تجدد الهوا في الأوضة أنا مشغلاها على أقل درجة
ثم رفعت جزء من الغطاء وتدثرت بجانبه دون أن تضع رأسها على الوسادة ليقترب هو برأسه من جسدها يستمد منها الدفء فتبتسم بحب ودفء وتضمه لصدرها بعد أن تمددت كليًا بجواره وأخذت تغلغل أصابعها بين خصلات شعره وتعبث به برقة حتى غلبه تعبه ونام بين ذراعيها ولحقت هي به بعد دقائق .
فتح عيناه في صباح اليوم التالي بتكاسل وخمول ونظر لها بصمت للحظات وهي نائمة بسكون بجانبه فاعتدل في نومته وانحني طابعًا قبلة رقيقة على جبهتها ثم نهض من الفراش وغادر الغرفة متجهًا للحمام لكي يأخذ حمامًا دافيء ويزيح آثار الحمى عن جسده ، وبعد دقائق خرج وهو يرتدي بيجامة منزلية من اللون الأسود والرصاصي ، ثم ذهب للمطبخ وبدأ في تحضير كوب الشاي الصباحي الخاص به .
فتحت عيناها وتمطعت بذراعيها للأمام ثم اعتدلت جالسة ونظرت بجوارها فلم تجده لتقطب حاجبيها باستغراب ونهضت لتغادر الغرفة فسمعت صوت قادم من المطبخ .. علمت أنه فيه فتوجهت صوبه ووقفت بجوار الباب متمتمة في رقة :
_ صباح الخير
رد عليها باقتضاب دون أن ينظر لها :
_ صباح النور
اقتربت منه ووقفت بجواره ثم مدت يدها لتتحسس جبهته هاتفة بنعومة :
_ بقيت كو……
امسك بيدها قبل أن تلمسه وابعدها هاتفًا في صلابة :
_ كويس .. كويس الحمدلله
طالعته بنظرات رجاء أن ينهي عقابه لها ، فقد بدأت نفسها تتألم من جفائه معها ، ليخرج صوتها عابسًا :
_ هتفضل لغاية إمتي كدا يازين ؟
وضع السكر في كوب الشاي ثم بدأ يقلب بالمعلقة وهو يردف بصوت رجولي أجشَّ :
_ هيفضل حبك لخطيبك حاجز بينا ، وهيفضل خداعك ليا نقطة سودا في علاقتنا
هتفت بنبرة صوت مرتفعة قليلًا وصدق ينبع من صميم فؤادها :
_ مبقتش أحبه ، والله العظيم مبقتش بحبه ليه مش عايز تفهم !! .. أنا مفيش حياتي حد غيرك ومبقتش بفكر غير فيك ، وعايزاك تديني فرصة اثبتلك ده واثبتلك إني مش بفكر فيه نهائي وإني ندمانة على اللي عملته ، اديني فرصة استعيد ثقتك فيا من جديد
نفسًا قويًا أخذه وأخرجه زفيرًا حارًا قبل أن يهتف في غلظة صوت ونظرة ثاقبة كالصقر :
_ طيب هديكي فرصة ولو معرفتيش تستعيدي الثقة دي هيحصل إيه
_ مفيش لو .. أنا هصلح كل حاجة عملتها صدقني
امسك بكوب الشاي والقي عليها نظرة قوية قبل أن ينصرف ويتركها تتراقص فرحًا من داخلها وتفكر ماذا ستفعل لتتمكن من إعادة المياه لمجاريها ، فارتفعت لشفتيها ابتسامة مختلطة بمزيج من المشاعر الرومانسية حين تذكرت نومها ليلة أمس وهو بين ذراعيها ، إحساس داهمها لا تجد الكلمات لوصفه سوى أنها شعرت بالسلام والراحة النفسية بجواره !! .
***
فتحت الباب ببطء ودخلت حتى توقظه فتجده مازال نائمًا ، تنهدت بعمق ثم اقتربت من الفراش وجلست على الحافة بجواره تبتسم بحب ، لا تعرف سبب تغيره معها منذ آخر شجار بينهم والذي كان من أسبوع كامل .. لم يكن تغيرًا جذريًا ولكنه لم يعد يعاملها باحتقار وتقرف بل أصبح عاديًا تمامًا يتحدث بطبيعية مما جعلها تشك بأمره وتتساءل بفضول وحيرة ، هل خطتها تسير في الطريق الصحيح أم أنه أشفق عليها ؟ أم ماذا ؟ ، كانت تسأل نفسها هذا السؤال منذ ثلاث أيام وتخشى أن تسأله فتسمع منه ردًا يدخل اليأس لقلبها أو تسمع ما لا تريد سماعه وينفعل فيشب شجار جديد .. وكانت تفضل عدم معرفتها سبب هذه المعاملة يكفي أنها تسعدها وتعطيها المزيد من الأمل .
انحنت نحوه وطبعت قبلة طويلة على وجنته تبث بها كل شوقها وحبها له ، ففتح هو عيناه دفعة واحدة بشيء من الفزع حين شعر بها وخرج صوته تلقائيًا :
_ بتعملي إيه !
ارتدت للخلف فورًا في زعر وهتفت بتوتر مع قليل من الخجل :
_ ولا حاجة كنت جاية اصحيك عشان منتأخرش على الشغل
اعتدل وفرك عيناه متمتمًا بابتسامة مزدردة :
_ وإنتي كدا بتصحيني ولا بتتحرشي بيا وأنا نايم
أشارت إلي نفسها بسبابتها هادرة بدهشة وترفع :
_ أنا !! .. بيك إنت !! ، ده على أساس إن إنت ملاك طاهر نازل من السما عشان اتحرش بيك مثلًا
أبعدها عن طريقه وهو يقول بضحكة خفيفة :
_ طيب ابعدي
نزل من الفراش وتوجه للحمام لكي يأخذ حمامًا صباحي قبل الذهاب للعمل أما هي فقد همست لنفسها في فضول قاتل :
_ لا ما أنا هتحصلي حاجة لو مفهمتش هو بيتعامل معايا كدا ليه !
خرجت وبدأت في وضع طعام الإفطار في الصحون ومن ثم ترتيبها على الطاولة الأمر الذي استغرق منها ما يقارب العشر دقايق ، وبعدما انتهت اندفعت نحو غرفتها مجددًا حتى تستعجله وفتحت الباب لتجده يلف منشفة على نصفه السفلي وكان سيهم بفكها لولا دخولها الذي اوقفه ، فاستدارت فورًا بجسدها كاملًا توليه ظهرها هاتفة بإيجاز :
_ أنا حطيت الفطار يلا عشان ميبردش
ثم خرجت وأغلقت الباب بسرعة وهمت بالرحيل من أمام الباب ولكنها توقفت حين عزمت على أن تحصل منه على إجابة للسؤال الذي تطرحه منذ أيام ، فانتظرت لدقيقة وطرقت على الباب هاتفة :
_ حسن
_ اممممم
قالت بترقب لإجابته :
_ خلصت ؟ .. عايزة اقولك حاجة
_ ادخلي خلصت
فتحت الباب من جديد فوجدته ارتدي بنطاله فقط ، هل سألته انتهيت أم لا لتقصد البنطال فقط ، ولكنها لم تركز كثيرًا عليه وحاولت أن تثبت نظرها على وجهه فقط ثم اقتربت منه ووقفت بجانبه وتابعته وهو يفتح الخزانة ويلتقط قميصًا من اللون الازرق الداكن ويدخل ذراعيه في أذرعته وكان على وشك أن يغلق أزراره ولكن سؤالها جعله ينتبه لها أكثر وينظر لها ، حيث قالت بوضوح دون أي مقدمات :
_ إيه سبب تغيرك معايا من ساعة ما اتخانقنا على موضوع الطلاق
اتاها صوته القوي وهو يبتسم ببساطة :
_ أنا متغيرتش ، بس تقدري تقولي إني لقيت إن شغل القط والفار ده مش هيفيد بحاجة بالعكس هيوجع دماغي أنا والأفضل إني اتعامل معاكي بسلاسة وعادي جدًا لغاية ما نتطلق
هذا ما كانت تخشى سماعه ولهذا كانت مترددة في سؤاله ، وعلى عكس المتوقع منها غمغمت في شيء من السخرية :
_ يعني إنت خلاص قررت إنك هتطلقني
بدأ يزرزر قميصه وهو يقول بمبالاة :
_ إنتي شايفة إننا ينفع نكمل مع بعض !!
قالت بهدوء تام :
_ ومينفعش ليه !؟
نظر لها وقال ببرود قاسيًا وكلمات دخلت في قلبها كالسقم الذي يفتت الأعضاء :
_ عشان احنا مننفعش لبعض وعشان أنا مش قادر أحبك
رفضت الكلمات الخروج ورفض صوتها أن ينطلق من حنجرتها وفقط شعرت بأن دموعها على وشك التجمع في عيناها ، وما زاد الأمر سوءًا استرساله في الحديث ولكن هذه الأمر ببعض اللين :
_ إنتي مش هتقدري تغصبي حد عشان يحبك يا يسر .. أنا مش بحبك فعلًا بس كمان مش بكرهك أنا بكره تصرفاتك وأفعالك ومش عايز أكرهك فعشان كدا هننصبر لغاية ما تعدي فترة على جوازنا وبعدين هنطلق .. صدقيني ده أفضل حل لينا احنا الاتنين
لديه الحق في جملة واحدة فقط ، هي لن تستطيع إجباره على حبها .. فكل شيء يمكن أن يكون بالإجبار إلا القلب فلا تتمكني من فرض سيطرتك عليه وجعله يخضع لقوانينك ويذعن لك ، لن تتمكني من جعل القلب يستلطف شخصًا أو يكرهه أو يحبه بالإجبار .
الآن فقط يمكنها أن تبارك له على الفوز وتتقبل خسارتها النكراء .
امتلأت عيناها بالدموع وقالت في انكسار وعجز :
_ موافقة ياحسن
أحاط بكتفيها وتمتم في لطف وحنو مع زرانة وتعقل :
_ من غير زعل يايسر أنا مدرك حبك ليا بس احنا مش لبعض ، وإنتي أكيد هتنسيني بعدها بفترة وهتلاقي الشخص اللي ينسابك ويحبك إنتي تستاهلي واحد يقدرك ويحبك لكن أنا مش هقدر أكون الشخص ده .. إنتي محتاجة واحد زيك !
قال جملته الأخير بابتسامة مداعبة لتجيبه بتعجب :
_ زيّ إزاي يعني ؟!
أكمل بمزيد من المشاكسة حتى يجعلها تبتسم :
_ واحد خبيث زيك عشان تتأقلموا مع بعض لكن أنا طيب وغلبان جمبك وبخاف على نفسي منك أحيانًا
ابتسمت بالفعل وأظهرت عن أسنانها البيضاء الناصعة ثم قالت بنبرة عادية تتصنع من خلالها الثبات :
_ طيب خلص لبس وتعالى أنا هستناك برا عشان الأكل
أماء لها بالموافقة لتستدير هي وتنصرف وبمجرد ما خلت بنفسها في الخارج تركت العنان لدموعها تسقطهم في صمت وهي تشعر بتمزق قلبها من الألم والحرقة …….
***
يبحث في مكتبه الصغير عن بعض الأوراق الخاصة بالعمل لكي يأخذها معه ، وبينما هو منشغل بالبحث عنها دخلت عليه هدى وأغلقت الباب خلفها وهاتفة :
_ رايح الشركة من دلوقتي ياكرم ؟
_ أهاا إنتي عايزة حاجة ولا إيه ؟!
استغرقت لحظات وهي تجهز الكلمات بذكاء في عقلها حتى تصل لمبتغاها ، ثم اقتربت منه وهمست في صوت منخفض قليلًا :
_ هتعمل إيه مع شفق وأخرة ما تقعد هنا يعني أهو عدي أسبوع وهي ذات نفسها عايزة تمشي
قال يإيجاز وعدم اهتمام وهو لا يزال يبحث في الأدراج عن ما يريد :
_ أنا اتكلمت معاها إمبارح ياماما وفهمتها الموضوع
استفزها عدم اكتراثه للأمر فهتفت في حدة ملحوظة في نبرتها :
_ مينفعش تقعد هنا كتير ياكرم وهي مهما كان فهي غريبة عننا ومش من عيلتنا وملاذ ويسر لما بياجوا هما وإخواتك بحسهم بيضايقوا وبذات يسر ، ده غير إن جدتك كمان أسبوع ولا حاجة وهتاجي وهتعوز تخلي حسن وزين ياجوا ياخدوا يومين معانا هنا ، وعيب تقعد وسطيكم وهي غريبة عنكم كلكم
عثر على الأوراق أخيرًا ثم القاها على سطح المكتب وهو يجيبها بفتور وشيء من الانفعال البسيط :
_ وأنا أعمل إيه بس أسيبها في بيتهم وحدها ويحصل معاها زي ما حصل لما جبتها ، أنا تعبت والله كل حاجة بتضغط عليا !! ، لو عندك حل وهيخليها في آمان قوليه وريحيني
ابتسمت بمكر وقالت مباشرة دون أي مقدمات :
_ اتجوزها
الجمته الكلمة في أرضه وجعلته يحدق بأمه في دهشة ولا يستوعب ما اخترق سمعه للتو ، وسرعان ما ضحك ساخرًا دون أن يتحدث ويسمع استرسالها في الحديث وهي تقول بحكمة :
_ ده الحل الأمثل ، إنت هتفضل تحميها كدا لغاية امتي لكن لما تتجوزها هتبقى تحت عينك وهتكون برضوا نفذت وصيت سيف الله يرحمه وهتخلي اخته في كنفك وجمبك علطول وفي حمايتك
استمر في ضحكه المندهش وهمهم في ازدراء :
_ أنا مش مصدقك والله ، ولا مستوعب اللي بتقوليه
رسمت محل ابتسامتها قسمات الحزم والاستياء البسيط وقالت في شيء من الجفاء :
_ مش مستوعب ليه !! ، إنت عايز تفضل عازب كدا علطول.. هي اروى هترجعلك تاني مثلًا ولا إنت بقى هتوقف حياتك عليها وهتتقمص دور المخلص ليها لآخر عمرك
اطال النظر في وجهها للحظات فلقد كانت كلماتها قاسية عليه ولم يتوقعها منها قط ! .
خرج صوته الغليظ وهو يهم بالانصراف :
_ بظبط هو ده اللي هعمله يا أمي
وصل عند الباب وتوقف عندما سمعها تهتف في قسوة ونبرة لا تحمل المزاح أو الرحمة :
_ لو موافقتش تتجوزها اعتبرني مت وهغضب عليك لغاية ما أموت ولساني مش هيخاطب لسانك أبدًا .. شوف بقى هتختار إيه
التفت لها برأسه ومال بها قليلًا للجانب وكأنه يتوسلها بنظراته قائلًا ” لا تفعلي هذا بي أرجوكِ ، لا تجبريني على الاختيار بينكم ! ” ، بينما هي فوضعت الصخر على قلبها حتى لا تلين له ولنظراته التي تذيب الثلج واشاحت بوجهها بعيدًا عنه ترفض النظر إليه موضحة له عدم رغبتها في رؤيته إلا حين يخبرها بقراره النهائي ، فيصدر هو تنهيدة مسموعة في حيرة وألم ثم قام بفتح الباب ورحل وتركها تتخبط في مشاعرها مابين شفقتها عليه وما بين رغبتها في أن تراه سعيدًا حتى لو لن يكون في البداية سعيدًا ولكنها متأكدة بأن هذه الفتاة هي التي ستعالج الآمه وفي النهاية هو بنفسه سيشكرها !! ….
***
أوقف سيارته في المكان المخصص داخل الحديقة ثم نزل منها وقاد خطواته الطبيعية نحو الباب وطرق عدة طرقات خفيفة لتفتح أمه الباب وتهتف بدهشة امتزجت بالسعادة :
_ إيه ده زين .. مقولتش ليه إنك جاي
انحنى والتقط كفها يقبله برقة ثم يعانقها وهو يردف :
_ عاملة إيه يا أمي ؟
_ الحمدلله ياحبيبي بخير وإنت عامل إيه .. مراتك مجاتش معاك ولا إيه ؟!
أجابها بالنفي وشيء من العجلة :
_ لا مجاتش أنا جيت اتكلم مع رفيف في حاجة وماشي تاني عشان معايا اجتماع
قطبت حاجبيها باستغراب وتشدقت بريبة والقليل من القلق :
_ خير هو في حاجة ولا إيه ؟
ملس على وجنتها بحنو هامسًا :
_ خير إن شاء الله .. أنا هروح اشوفها
ثم تركها وتوجه للأعلى مسرعًا وبينما هو في طريقه لغرفة شقيقته قابل شفق التي كانت في طريقها للأسفل حتى تشرب فأجفل نظره عنها فورًا أرضًا وتوقف لثانية واحدة القى عليها تحية السلام وقاد آخر خطواته لغرفة شقيقته دون أن ينتظر منها الرد حتى لترد هي في نفسها تحية السلام عليه وتكمل طريقها للأسفل وهي تبتسم بتعجب من هؤلاء الإخوة ، فكرم كان يرفع نظره إليها بصعوبة في البداية بسبب حياءه وأخيه الأكبر لا يختلف عنه كثيرًا سوى أنه ملتزم ولا يرفع نظره في امرأة أيضًا ولكن ليس من حياءه بل من فرط تدينه وأخلاقه الحميدة ، وخلال المرتين التي رأت فيهم حسن اتضح لها من مجرد نظرة أنه لا يشبه إخوته بتاتًا في شيء ! .
طرق الباب وانتظر أن يأتيه صوتها تسمح للطارق بالدخول حتى فتح الباب ودخل وبعفوية شديدة وثبت من فراشها واقفة وعانقته مرحبة به بحرارة فغالبًا يكون الأخ الأكبر للفتاة الوحيدة بمثابة أب وليس أخ .
بادلها هو ترحبيها به بحنوه المعتاد عليها وهو يهمس في صوت ينسدل كالحرير ناعمًا :
_ عاملة إيه يارفوفتي ؟
دلعه المميز لها هو ما قاله ” رفوفتي ” ولكن من أشقائها يدلعها على طريقته ، فمثلًا حسن يقول لها أحيانًا ” فيفي ” وكرم ” رورو ” ولكن الأقرب لقلبها هو ما يناديها به أخيها الأكبر .
غمغمت في رقة :
_ الحمدلله كويسة وإنت ؟
_ بخير الحمدلله ، أنا حسن كلمني من كام يوم في موضوع الشغل وقالي إنك قولتي ليسر وكدا وكنت عايز آجي اتكلم معاكي في الموضوع ده بس مكنتش فاضي
تهللت اساريرها وقالت بحماس :
_ يعني موافق بجد !؟
جذبها من يدها بلطف واجلسها على الفراش وبدأ يتحدث بنبرة صوت جادة ونظرة ثاقبة تعرفها جيدًا منه مما جعلها تتوتر :
_ موافق وكمان جهزي نفسك وتعالي مع كرم بكرا عشان تبدأي ويسر تعلمك زي ما قالت ، بس مش هو ده الموضوع اللي جاي عشان .. قوليلي بقى إنتي كلمتي يسر فعلًا ؟!
ارتبكت بشدة وتلعثمت فطالما سأل هذا السؤال حتمًا عرف بأنها تحدثت مع ” علاء ” وكان يسألها بوضوح وبنظرته هذه لأنه متيقن أنها لم تتمكن من الكذب أمامه وإلا ستكون عواقب كذبها أشد ، فأخذت شهيقًا قوي واخرجته زفيرًا متمهلًا ثم تمتمت في توتر :
_ الصراحة لا .. بص هو مفيش حاجة أصلًا والله كل كل ما في الموضوع إني كنت راجعة من الكلية وعلاء شافني بالصدفة وقالي تعالي هوصلك البيت في طريقي وأنا ركبت وهو سألني عن الكلية والكلام جاب بعضه واتكلمت عن الشغل وكدا يعني وقولتله إنكم مش موافقين فقالي إنه هيكلم عمي ويخليه يحاول يقنعكم وعشان عمي مسافر فشكله قال ليسر وهي قالت لحسن ، بس هو ده اللي حصل والله
لو كانت كذبت كان سيغضب بشدة منها ولكن صراحتها هدأت من روعه كثيرًا وتمتم في رزانة ونبرة دافئة :
_ طيب وهو هل يصح إنك تركبي معاه في العربية وحدك
هزت رأسها بالنفي وهي تطرق رأسها أرضًا بإحراج وهمست في صدق وضيق من نفسها :
_ أنا مكنتش اقصد أعمل حاجة غلط والله ، هو لما قالي اركبي محبتش اكسفه وإنت عارف إن علاء كويس جدًا ولو كان غير كدا أنا مكنتش هتكلم معاه كدا نهائي أو هركب معاه أصلًا
أكمل بنفس نبرته السابقة :
_ أنا مقولتش حاجة على علاء أنا عارف علاء كويس وإلا كان زمانك هتشوفي ردة فعل مني مختلفة ، أنا بتكلم عليكي إنتي ، ده غلط واسمه خلوة وإنتي فاهمة يعني إيه خلوة .. فأنا مش هقول حاجة المرة دي وهعديها بس هتكون آخر مرة ولو حصلت تاني الصدفة دي ابقى اعتذري منه بأي طريقة ودايمًا تخلي في حدود في تعاملك مع أي راجل مش مع علاء بس وتبقى الحدود دي كمان لما تكوني مضطرة يعني في عمل أو شيء تاني إنتي مضطرة تتعاملي فيه مع راجل فتحطى حدود ومتسمحلهوش ولا تسمحي حتى لنفسك إنتي تتخطيها
ثم توقف عن الكلام للحظات واسترسل حديثه بابتسامة ساحرة ولين :
_ في مقولة بتقول زينة الغني الكرم وزينة الفقير القناعة وزينة المرأة العفة
هزت رأسها بالإيجاب وهي ترسم ابتسامة ناعمة على شفتيها :
_ حاضر صدقني آخر مرة ومش هتتكرر تاني
قرب رأسها من شفتيه ليقبل جبهتها متمتمًا قبل أن يستقيم واقفًا :
_ يحضرلك الخير ياحبيبتي أنا همشي بقى عشان متأخرش
ودعته بعناق سريع ثم انصرف وتركها تفكر في كلامه وتلوم نفسها بشدة على ما فعلته فهو لديه الحق في كل كلمة قالها ، وهي أخطأت حين سمحت لنفسها بأن تتخطى الحدود سواء مع شقيق ملاذ ” إسلام ” أو مع ابن عمها !! …
***
تجولت إلى مايقارب الساعة والنصف بين محلات الملابس النسائية وخاصة محلات الملابس الفضفاضة كالرداءات والعباءات والتنانير .. ألخ ، وبينما هي في آخر محل تحاسب على آخر شيء ستشتريه لفتت نظرها ساعة الحائط التي تجاوزت الثالثة عصرًا ، فخفق قلبها ببعض التوتر واسرعت للخارج بعد أن حملت أكياس ملابسها عازمة على الوصول للمنزل مسرعة داعية ربها ألا يكون وصل قبلها فهي لا تدري كيف ستكون ردة فعله .
نزلت من السيارة الأجرة أمام البناية الضخمة التي تقع شقتها في الطابق العاشر منها ، وتلفتت حولها فوجدت سيارته لتغمض عيناها بيأس وهو تزفر معنفة نفسها بشدة ، ثم أخرجت هاتفها ونظرت للشاشة وكان عدد الاتصالات الواردة منه تجاوزت الخامسة عشر مما أثبت لها أنها ستتلقى توبيخًا وسخطًا عنيفًا منه ، فقادت خطواتها المتعثرة لداخل البناية ثم استقلت بالمصعد الكهربائي وبعد لحظات وقفت أمام طابق شقتها فخرجت وتحركت صوب الباب ببطء وتردد تحاول إيجاد الحجج والأعذار التي ستبرر بها خروجها دون إذنه ، تفكر كيف ستهدأ من ثورته ! .
وضعت المفاتيح في قفل الباب وأدارته للشمال ثم فتحته بحذر وأدخلت جسدها تدريجيًا .. أولًا رأسها التي تلفتت يمينًا ويسارًا باحثة عنه ثم خطت بقدمها اليمني للداخل وأخيرًا جسدها كله ثم أغلقت الباب بحرص شديد وبطء ، وإذا بها تنتفض واقفة كأن عقرب لدغتها حين سمعت صياحه مناديًا عليها :
_ مـــــلاذ
ازدردت ريقها بارتباك والتفتت بجسدها بعد أن القت بالأكياس على أقرب مقعد منها ثم ذهبت له وهي تقدم رجل وتأخر الأخرى حتى وقفت أمامه وخطفت نظرة سريعة له لتجد وجهه مشتعلًا يعطي أحمرارًا مريبًا وخرج صوته الذي وقع في نفسها وقع مهيب ومخيف :
_كنتي فين ؟!
انزوت نظرها عنه في ربكة ملحوظة وهمهمت بأسف صادق :
_ أنا آسفة
ارتفعت نبرة صوته قليلًا وصارت أشد قسوة :
_ أنا مش بقولك اعتذري ، أنا بسألك كــنـــتي فــــيــــن ؟! ، وطلعتي من غير ما تقوليلي ومش بتردي على تلفونك كمان
كان صوتها منخفضًا وفيه شيء من للإحراج منه وهي تتمتم :
_ روحت اشتري كام حاجة ليا ومكنتش متوقعة إنك هتتعصب كدا أوي والله ولو كنت أعرف كنت قولتلك وأنا أساسًا كنت ناوية أرجع قبل ما ترجع بس تأخرت غصب عني
سرت رعشة في جسدها أثر صرخته العنيفة والثائرة بها وهو يخرج شحنة غضبه المكتظة داخله :
_ مفيش حاجة اسمها مكنتش متوقعة .. في حاجة اسمها إنك متجوزة ولما تطلعي من البيت تشاوريني وتاخدي إذني الأول مش تطلعي وتدخلي على مزاجك
هي لم تكن تقصد أن تخالف قواعد المرأة المتزوجة عند خروجها من المنزل ولكنها كانت تريد أن تفاجئه بما عزمت عليه ولا تريد أن يعرفه حاليًا إلا تحين اللحظة ، فرفعت نظرها له وقالت باعتذار ينبع من صميمها وصوت رقيقًا به خضوع كامل لأوامره :
_ حاضر .. أنا آسفة ، أول وآخر مرة صدقني مش هتتكرر تاني
لانت نظراته قليلًا لها وسكنت ثورته في الأعماق بعض الشيء ثم اقترب منها وهو يتفحص يديها الفارغتان مغمغمًا بغلظة صوته الرجولي :
_ وفين الحجات اللي جبتيها دي وإيه هي ؟!!
ابتسمت بلطف وتحدثت بنبرة انوثية ناعمة :
_ عملاها مفاجأة ليك لما ياجي وقتها هتعرفها
ران الصمت عليه لثوانٍ يحاول تخمين هذه المفاجأة التي تتحدث عنها ولكن لم يعطيها إهتمامًا زائدًا عن حده حيث نفضها عن ذهنه ، وثبت تركيزه على نفسه المتأججة بنيران الغيرة فكما أخبرها هو لا يستطيع الوثوق بها حتى الآن ولم تتمكن من إستعادة هذه الثقة ، وما يدور في عقله الآن هو سبب كل هذا الغضب ويجعله يحترق ويأكله أكلًا حيث همس في نظرة تركت أثرًا سلبيًا في نفسها ونبرة صوت خافتة تحمل لهيب الغيرة والازدراء معًا :
_ وياترى روحتي تشتري الحجات اللي عملاها مفاجأة ليا دي بس ، أصل إنتي متعودة بتقولي للناس رايحة مكان وبتكوني روحتي مكان تاني خالص
وقعت كلماته الجافة التي لا تحمل الرحمة كصخور ضخمة وتركت أثارها من جروح على جسدها وبالأخص قلبها ، أيشك بها ؟! ، يذكرها بليلة زفافهم حين أخبرتهم بأنها ذاهبة للحمام وخرجت لتقابل خطيبها السابق ، هل حقًا يظنها الآن خرجت لتقابله مجددًا ؟!!! ، ولكنها وعدته بأنها ستكف عن حبه وهي بالفعل فعلت ووعدته بأنها ستوهب حياتها لأجله وستكون ملكًا له ، واقسمت بأنها لا تريد سواه وأنها نادمة أشد الندم على الخطأ التي اقترفته وستبذل كل الجهد لتصحيحه ، هل يظن أن خنث الوعود من شيمها ؟! .. ربما خدعته واستغلته وخانته ولكنها لم تخنث وعدها أبدًا ولن تفعل .
غامت عيناها بالعبارات الحارقة والمعاتبة على ما قاله :
_ إنت شاكك فيا يازين !! ، أنا وعدتك إني مستحيل أقرر الغلط مرة تاني ومش معقول هكون بعمل كل اللي أقدر عليه عشان أصلح الوضع بينا واستعيد ثقتك واروح أعيد الغلط تاني ده يبقى اسمه غباء ووقتها ابقى استاهل إنك متدنيش فرص فعلًا .. أنا حلفت بالله أن القذر ده مبقيش في بالي أصلًا وإن إنت الراجل الوحيد في حياتي دلوقتي بس واضح إن حتى القسم بالله مخلكش تصدق ولسا بتشك فيا ومبقتش مجرد عدم ثقة لا كمان بقى شك إني بخونك وبقابله وبكمل علاقة حبي معاه
ثم استدارت وذهبت لغرفتها بعد أخذت أكياس ملابسها معها واجهشت ببكاء قوي وصل لأذنيه ، ليزفر متسغفرًا ربه فمهما حدث بينهم فإن آخر شيء يريد سماعه أو رؤيته هو بكائها ، اتجه نحو غرفتها وحاول فتح الباب ولكنه أبى ولم يفتح ففهم أنها أغلقته بالمفتاح من الداخل ، ثم أطرق على الباب بلطف هاتفًا :
_ افتحي ياملاذ
جاءه صوتها الباكي وهي تهتف بتضجر :
_ مش هفتح يازين وممكن تسبني وحدي لو سمحت
قال بلهجة آمرة بها شيء من الرفق :
_ قولت افتحي الباب ياملاذ .. افتحي يلا !!
وقفت مغلوبة على أمرها وفتحت له بوجه غارق في الدموع ليخرج منديلًا من جيبه ويمد يده به إليها وبنظرة دافئة ثم يهمس في هدوء ساحر :
_ فهمتي أنا ليه بقول الطلاق أفضل حل ولازم يحصل لإن أنا لا قادر اسامحك ولا قادر اشوفك بالوضع ده ، فده هيكون فيه خير ليكي أكتر مني
جففت دموعها بالمنديل الورقي الذي أعطاه إياه وهتفت بإصرار وحزم :
_ وإنت ادتيني فرصة ، لما استنزفها وقتها ابقى طلقني
_ ياريتك تمسكتي بالفرصة الأولى زي كدا وحافظتي عليها على الأقل مكنش ده هيبقى وضعنها
_ تمسكت بيها والدليل إني رفضت أسيبك وخدت عهد على نفس إني هشيل خطيبي من تفكيري ونجحت وزي ما نجحت هنجح دلوقتي كمان ، لإني مش عايزة اتطلق منك .. عايزة أفضل مراتك ، أنا بفتخر إني مراتك يازين وبقيت بحب ارتباط اسمي بإسمك
كانت تتحدث بثقة مفرطة وهي تخبره بأنها كما نجحت في تطهير قلبها من هذا الحب الخبيث المدنس ، ستنجح في استعادة ثقته بها وستتمكن من إزالة العوائق التي تحجب ضوء الشمس عنهم ، أما هو فقد دوت كلماتها الأخيرة في أذنيه التي ارسلت كلامها لعقله والذي بدوره قام بإفراز هرمون السعادة المسئول عن تحسين الحالة المزاجية ، فكان هو على وشك أن تنطلق منه ابتسامة عاشقة لهذا الكلام الذي بإمكانه أن يترك أثر إيجابي في نفس ورجولة أي رجل ولكنه كبح تلك الابتسامة بصعوبة وتكلف الجمود ولف ذراعه حول كتفيها طالبًا منها السير معه حتى الحمام ثم فتح الباب لها وقال بنبرة عادية :
_ اغسلي وشك واتوضي يلا عشان العصر أذن من نص ساعة
اماءت رأسها بالإيجاب ثم دخلت وأغلقت الباب عليها بهدوء ، وشرعت في غسل وجهها والوضوء لأداء فرضها وهي تجاهد في كبت دموعها من الانهمار مرة أخرى ! …
***
مع صباح يوم جديد كانت ملاذ تقف أمام مرآة غرفتها تستعد للذهاب لزيارة أهلها بعد أن طلبت منه الأذن ووافق وقال أنه سينتظرها ليأخذها معه في طريقه ثم يتجه هو لعمله بعد ذلك .
كانت ترتدي عباءة عصرية من اللون البينك مطرزة بفصوص بيضاء من الخرز وفوقها ترتدي حجابًا طويلًا اشبه بـ ( الخمار ) ثم قامت بإنزال النقاب على وجهها ، لم تكن تود أن تكشف عنه الآن وكانت تخطط لشيء آخر لتكشف له المفاجأة ولكن بعد ما قاله لها البارحة وشكوكه بها أنها لم تذهب لشراء بعض الأشياء الخاصة بها كما قالت وأنها ذهبت لمقابلة خطيبها السابق ، أثارت في نفسها الآم عنيفة وجعلتها تتخذ قرار حتمي بأن ترتديه اليوم وتثبت له صحة كلامها لعلها تستعيد ولو جزء صغير من ثقته بها .
القت نظرة أخيرة على مظهرها الخارجي فشعرت ولأول مرة أنها راضية عن نفسها وعن مظهرها ، رأت نفسها في هذه الملابس المحتشمة وهذا النقاب الذي يخفي وجهها أجمل من أي شيء ارتدته سابقًا ، فأخذت نفسًا عنيقًا واخرجته زفيرًا حارًا تستعد لمواجهته وترتب الكلمات التي ستقولها له ، فاستجمعت شجاعتها وثقتها بنفسها ثم خرجت من الغرفة واتجهت نحوه فوجدته جالس على أريكة متوسطة الحجم أمام التلفاز المغلق ويويلها ظهره وفي سبابة يده اليمنى مسبحة رقمية من اللون الأسود كلما يذكر الله يضغط على زرها فتقوم هي بالتسجيل والعد ، ازدردت ريقها بتوتر وهمست في صوت رقيق :
_ أنا خلصت !
التفت لها برأسه فلجمت الدهشة لسانه وتفحص مظهرها وملابسها بتدقيق ثم ثبت نظره على وجهه يحدجها بشيء من الذهول الممتزج بالإعجاب ، واستغرق الأمر ثلاث ثوانٍ بضبط حتى هب واقفًا وقال باستغراب متفهمًا عن سبب ارتدائها له فجأة هكذا :
_ إيه ده !!!
رفعته لأعلى لتظهر عن وجهها ثم تقترب منه بثقة تامة لا تعرف من أين جاءت بها وتهمس بصوت انوثي جذاب :
_ أنا اتفقت معاك من قبل الجواز إني هلبسه بإذن الله لما أكون واثقة من قراري ، ودلوقتي ده انسب وقت عشان اثبتلك إني مش عايزة أي راجل غيرك يشوفني !!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية ضروب العشق)
