رواية موضوع عائلي 2 (الجميله والشعر الأبيض) الفصل السادس والعشرون 26 بقلم رحاب القاضي
رواية موضوع عائلي 2 (الجميله والشعر الأبيض) الجزء السادس والعشرون
رواية موضوع عائلي 2 (الجميله والشعر الأبيض) البارت السادس والعشرون
رواية موضوع عائلي 2 (الجميله والشعر الأبيض) السادسة والعشرون
#موضوع_عائلي
“الجميله والشعر الابيض”
_الحلقه الـ 26
ـــــــــــــــــــــــــــــــــــ
وَكُنتُ إِذا سَأَلتُ القَلبَ يَومًا
تَوَلّى الدَمعُ عَن قَلبي الجَوابا
_أحمد شوقي
♡•♡•♡•♡•♡•♡
جميله
انت بتقول ايه يا عمار ازاي يعني اتجوزك دلوقتي؟..
عمار بجديه
زي الناس مستعده نتجوز دلوقتي وبعد كده اللي يحصل يحصل ولا لا؟..
جميله بضيق
وليه نعمل كده واحنا ممكن نتجوز عادي قدام الناس كلها ونعمل خطوبه والجو ده كله، ايه اللي يجبرنا علي الجواز بسرعه كده..
عمار بهدوء
ده شرطي انتي لو مستعده تكوني معايا باقي عمرك يبقي دلوقتي حالاً نتجوز…
جميله بقلق
انت ليه بتعمل فيا كده، علي فكره انا اللي من حقي ازعل مش انت…
عمار بسخريه
والله وانا زعلتك في ايه بقي؟..
جميله بعصبيه
البنت اللي كانت معاك في المستشفي وقبل كده كلمتها قدامي وخليتها تروحلك البيت هو ده عادي يعني….
عمار ببرود
ما وقفتنيش ليه، لما شوفتيها حضتني في المستشفي وقفتي ليه ساكته وما اتكلمتيش؟..
جميله
عشان كرامتي انا مش هقلل من نفسي عشان غيرانه عليك يعني…
عمار
بالظبط كده وانا كمان عندي كرامه يا جميله..
جميله بدموع
ومدام الموضوع كده جيت ليه عشان تخطبني ولا انت بتلعب بيا وخلاص…
عمار بجمود
ابويا هو اللي خطبك من غير ما يقولي اصلاً..
جميله بحزن
يعني مش انت اللي طلبت منه يخطبني ليك..
عمار بهدوء
انتي شايفه ايه؟….
وقرب منها وقال بجديه
بس احنا فيها اهو انا بطلب اتجوزك، وافقي لو عايزاني بجد ومستعده تقفي قدام الكل وتقولي انك عايزاني..
جميله بدموع
وطبعاً لو قولت لا هتقول عليا ضعيفه ومش بحبك والكلام بتاعك ده..
سكت وما ردش عليها وهي قالت بجديه
عايز تتجوزني يا عمار تعالي واخطبني من ماما وكل حاجه تاخد وقتها وتبقي بشكل طبيعي، انما اتجوزك دلوقتي بالطريقه اللي انت عايزها دي مش هقدر اوافق وانت نفسك مش مقتنع بكلامك ده عشان انت عايز تعاقبني وبس ونسيت ان في حاجه اسمها اصول يا عمار بيه..
_ قالت كلامها وسابته ومشيت وطلعت عايده من المطبخ وقالتله بنبره غاضبه..
عايده
بطل غبااء انت من امتي بتتصرف كده، بجد حرام عليك يا عمار اللي انت بتعمله فيها ده..
عمار بضيق
هو انا رخمت عليها اووي..
عايده
ايوه واجري يلا روح صالحها قبل ما تمشي، ازاي بتحبها وازاي هاين عليك تسيبها زعلانه كده..
_سمع عمار كلامها ونزل بسرعه وكانت جميله لسه هتمشي بعربيتها فوقف جنبيها وقال بجديه…
عمار
انزلي يا جميله..
جميله ببكاء
مالكش دعوه بيا…
فتح عمار الباب وقال بهدوء
انزلي يا جميله مش هسيبك تمشي لوحدك..
جميله بحزن
هو هيفرق معاك يعني…
رد عليها بهدوء وقال
ايوه طبعاً هيفرق معايا وديماً بخاف عليكي وشايل همك ديما زي ما مروان ابني بالظبط..
جميله بدموع
طيب ليه بتعمل فيا كده، ليه بتبعدني عنك؟..
عمار
مين اللي بعد الاول يا جميله، انا عمري ما خوفت من حاجه قد ما خايف ارجعلك تاني وفي لحظه تضعفي وتسبيني..
جميله بسخريه
هو انت بعد اللي عملته فيا ده انا ممكن افكر اسيبك تاني ده لو رجعنا يعني..
_ابتسم بهدوء ومسك ايدها وخلاها تنزل من العربيه وحضنها جااااامد وقال بتنهيده طويله.
عمار
كنتي وحشااااني اووي يا جزمه انتي.
جميله ابتسمت بتوتر وقالت
عمار احنا في الشارع عيب كده..
بعد عنها شويه وقال بهدوء
انسي اللي قولته فوق بس اللي هعمله قدام اهلك واهلي مش هتعترضي عليه؟..
جميله بقلق
طيب انت هتعمل ايه؟..
عمار بنفاذ صبر
ما فيش فايده فيكي خالص، خليكي واثقه فيا عشان المره دي لا انتي ولا امك ولا عيلتك كلها ولا اي حد خلقه ربنا هيبعدك عني..
جميله بهدوء
ماشي اعمل اللي عايزه بس كارما…
عمار ابتسم بخبث وقالها
كانت موضوع قديم واللي حصل في المستشفي كانت لعبه بيني وبينها عشان اخليكي تشوفي جزء صغير من اللي كنت بحس بيه وانتي متجوزه الزفت ابن عمك..
جميله بغيظ
لعبه بقي تحرق دمي وتخليني اتنكد وكنت هكتئب ودماغي لحد النهارده تودي وتجيب وتقولي لعبه..
ضحك عمار بهدوء وقال
يعني اديقتي وغيرتي عليا؟..
جميله بكسوف
طبعا مش بحبك لازم اغير عليك..
عمار باس ايدها ورد عليها
وانا بعشقك يا جميله وعمري ما هقدر اعيش من غيرك…
جميله ضحكت بهدوء وقالت
والله العظيم انا مش مصدقه اننا خلاص رجعنا تاني زي الاول..
عمار غمزلها وقال
واكتر كمان تعالي يلا عشان اروحك…
وبص لفستانها بضيق وقال
الحاجات دي ما تتلبس تاني وما تسمعيش كلام زكريا مفهوم…
جميله
لا لا ده ما فيش حاجه رجعتك ليا غير نصايحه..
عمار بحده
جميله الا النقطه دي عندي انا حبيتك زي ما انتي من غير لبس قصير ولا ميكآب ولا الحاجات دي، عايزه تعملي كده تمام بس لما نتجوز ويبقي ليا لوحدي انما تطلعي بالمنظر ده تاني بره البيت هنفخك فاهمه..
جميله بضيق
حاضر بس انا لازم اغير شكل لبسي عشان الشركه وانا مديره وو وايتن وزكريا قالولي كده..
عمار بجديه
لا ما تغيريش حاجه وما تلبسيش حاجه مش مريحاكي عشان ترضي الناس، والموظفين بتوعك هيحبوكي ويحترموكي بتعاملك الكويس معاهم وبشغلك لما تكوني ناجحه مش بشكلك ولا لبسك ..
ابتسمت جميله ومسكت ايده جامد وقالت
ما فيش حد في الدنيا هيفهمني ويريحني زيك، ليه الناس كلها ما تبقاش عمار المنشاوي..
ضحك عمار بهدوء وقالها
كفايه عليكي انا مش مهم الناس كلها، ويلا عشان مش فاضي هروحك وهروح الشركه..
جميله
دلوقتي ليه ان شاء الله..
_عمار بجديه وهو ماسك ايدها وماشين ناحية عربيته.، رد عليها وقال…
عمار
عشان يا ستي قريب اووي هيبقي في فرع جديد للشركه الكبيره بتاعتي ولازم اهتم بالموضوع عشان يطلع بالطريقه اللي انا عايزها..
جميله
ربنا يوفقك طيب عربيتي صح هتفضل هنا..
عمار
هاتي المفتاح والصبح هتلاقيها تحت بيتك..
جميله
ماشي..
_فتحلها باب العربيه وقبل ما تركب مسك ايدها وقالها…
عمار
مش هتبعدي عني تاني؟..
جميله بهدوء
والله عمري ما هسيبك تاني ولا هزعلك تاني ابداً…
_ابتسم برضا وسابها تركب العربيه وهو ركب جنبيها واخدها وصلها لبيتها وقالتله قبل ما تنزل من العربيه…
جميله
ممكن تقولي انت هتعمل ايه مع ماما؟..
تجاهل سؤالها وقالها
انتي هتخلصي شغلك امتي بكره؟..
جميله
مش عارفه زكريا هو اللي هيحدد..
عمار
تمام هتيجي تلاقيني خلصت كل حاجه..
جميله بعدم فهم
خلصت كل حاجه ازاي، انت ناوي تقتل ماما ولا ايه؟..
ضحك غصب عنه وقال
هههه يا بت الهبله قصدي انك بكره هيكون اسمك جميله المنشاوي مش جميله العدوي وما تسأليش ازاي؟..
جميله بصدمه
لا لا انا لازم اعرف ازاي؟..
فتحلها الباب وقال
انزلي يا جميله عشان انا جيبت اخري منك،و بدل ما هيبقي بكره هخليه دلوقتي..
جميله
لا لا خلاص نازله، بس هو انت رجعتلي بجد؟!..
ابتسم بهدوء ورد عليها
لا بضحك عليكي…
_ضحكت جميله بهدوء ونزلت من العربيه وهو مشي، وبعدين دخلت الباب ولقيت ايتم ومامتها قاعدين بيتكلمو راحت قعدت جنبيهم وقالت..
جميله
ماما عمار بكره هيجي يخطبني منك بصي اي حاجه يقولك عليها انا موافقه بيها..
ايتن بحماس
هو صالحك؟؟…
جميله بثقه
تؤتؤ انا اللي صالحته وخلاص بعد معاناه وتعب رجعلي تاني..
فريده بضيق
وانتي تعملي كده ليه ما كنتي تستني لحد ما تيجي منه هو..
جميله بجديه
لا بس انا اللي دايقته مني يا ماما وانا اللي سيبته وانا اللي وجعته كتير الاول، بصي انا مرتاحه كده وعمار يستاهل اني اعتذرله واعمل المستحيل عشان اكون معاه لان هو كمان مستعد يعمل اي حاجه عشاني..
ايتن
والله انتي المفروض تشكري عمو عمار يا ماما كفايه انه خلاها عاقله….
ضربتها جميله بالشنطه بتاعتها وقالت
انا طالعه اناااام بقي مش عايزه افكر في اي حاجه غير عموري الكوكيز بتاعي.
ضحكت فريده وقالت
هههههه هي دي اللي عقلت برضو..
ــــــــــ #بقلم_الكاتبه_رحاب_القاضي ــــــــ
_في بيت فيروز…
كان قاعد هناك عزالدين معاها هي واهلها، وباباها كان متعصب جداً وقاله…
جمال
هو احنا مش كنا فضيناها سيره يا ابن الناس، لازمتها ايه الفضايح اللي عملتها تحت دي؟..
رد عليه عز وقال
لا يا عمي ما فيش حاجه اتفضت دي مشكله بسيطه بيني انا وخطيبتي وانا اهو صالحتها،وربنا ما يجيب فضايح ده انت المفروض تشكرني عشان صحيتلكم الشارع الميت بتاعكم ده ..
وبص لفيروز وقال
هاا مش اتصالحتي ولا ايه؟..
فيروز بخبث
اللي يشوفو بابا..
مها
بقولك ايه يا جمال خلاص بقي قلبك ابيض، وهو اكيد. اللي شافته فيروز دع كان موضوع قديم..
عز
حصل والله انا من لما شوفت فيروز يا عمي وانا اتغيرت والله وما بقاش في حياتي غيرها، واسألها انا بقيت منتظم في شغلي وبروح الصبح بدري وبالليل بكون بكلمها هي..
جمال بضيق
انا مش مرتالحلك يا عز بصراحه يعني…
مال عز علي فيروز وقال بغيظ
اعمله ايه ده اقلبله مخده عشان يرتاح ولا اعمل ايه؟..
مها
خلاص بقي يا جمال ما عز اهو جه واعتذر، بقولك ايه تعالي عايزاك في كلمتين جوه، وانت يا فادي انزل هاتلنا عشا ونتعشي كلنا سوا…
فادي
من عينيا يا ماما.. منورنا يا ابو نسب…
_ ونزل فادي وجمال قااام دخل اوضته وهو مدايق، وعز بص لفيروز اللي كانت قاعده مدايقه وقالها…
عز
هاتي ايدك..
فيروز
لا طبعا انت مستحيل تمسك ايدي…
عزالدين
هاتي ايدك عشان البسك الدبله اللي رمتيها في وشي..
فيروز
ما هو من عمايلك، وبعدين انا عايزه افهم منين كنت حزين علي اللي حصل زمان لمراتك وبناتك وقاعد في المقابر ومنين عارف كل البنات دي..
عز الدين
ما انا بصراحه كنت قااعد في المقابر عشان عايز اتلم وابقي بعيد. عن الحاجات دي، بس منه لله يونس الصاوي جه وطلعني ولما طلعت غصب عني رجعت للسكه القديمه..
فيروز
اممم والمفروض انا اثق فيك ازاي بعد كلامك ده..
عزالدين
يا ستي انا معاكي اهو وفي فترة خطوبه لو شوفتي عليا غلطه من بعد ما اتخطبنا اعملي فيا اللي انتي عايزااه..
فيروز بجديه
ما تخلنيش اندم اني وافقت بيك ده كل اللي عايزااه..
عزالدين
ربنا ما يجيب ندم، وفكيها بقي مش هتبقي انتي وابوكي عليا..
_ابتسمت بهدوء واخدت منه الدبله ولبستها هي لوحدها وبعد شويه جه اخوها واتعشو سوا في جو عائلي جميل..
ــــــــــ #بقلم_الكاتبه_رحاب_القاضي ــــــــ
_وتاني يوم الصبح في بيت المنشاوي..
وقف زكريا قدام المرايا بتاعت اوضته وهو بيعدل هيئة بدلته الرسميه وبص بطرف عينه لجهاد اللي كانت لسه نايمه بهيئته البريئه وملامحها اللي ديماً بتخطف قلبه..
_وابتسم بهدوء لما لقاها رفعت الغطا علي وشها واتخبت منه خالص، راح وقعد. جنبيها علي السرير وقال وهو بيلبس الساعه بتاعته…
زكريا
مدام عملتي الحركه دي تبقي صاحيه، بتتخبي ليه بقي؟..
شالت الغطا من علي وشها وقالت
لا مش بتخبي بس عايزه اناام..
زكريا
قومي افطري الاول وخدي العلاج بتاعك ولو عايزه تنامي براحتك..
جهاد
هنزل اقعد تحت مع بابا…
زكريا بقلق
هو انتي زعلانه عشان اللي حصل بينا امبارح، مع ان ما فيش حاجه غلط حصلت ولو زعلتي يبقي مش من حقك.
جهاد بضيق
لا عادي بس يعني خلاص ممكن تبعد عشان اقوم..
زكريا
انتي ليه وافقتي تكملي معايا؟..
جهاد بتوتر
هو ده وقته يا زكريا، انت هتتأخر علي شغلك..
زكريا بجديه
ما ترضيش بحاجه انتي مش عايزاها عشان بس مفروضه عليكي، لو مش عايزاني قولي وانا مش هقرب منك تاني..
_ قال كلامها وسابها ومشي ورزع الباب ورله جامد، وهي قالت لنفسها بغيظ…
جهاد
ده ايه المتخلف ده ياااربي..
_ وقامت اخدت شاور وبعدين دخلت المطبخ وبدأت تجهز في الفطار، بس جه المنشاوي وقالها..
المنشاوي
استني يا جهاد هننزل نفطر تحت في المطعم..
جهاد
حاضر انا عملت بس كوباية لبن وهعملك معايا..
المنشاوي
ماله زكريا كان طالع وهو متعصب كده ليه؟..
ابتسمت جهاد وقالت
مش عارفه قولي يا بابا هي ايه اكتر اكله بيحبها زكريا؟..
المنشاوي
مالوش اكله معينه هو بياكل اي حاجه تتحط قدامه وخلاص..
جهاد
يعني انا دلوقتي لو عايزه اعمله اكله حلوه اعمله ايه؟..
المنشاوي بتفكير
امممم اعمليلو محشي وفراخ بيحبهم…
جهاد بحماس
انا مش هنزل المطعم وهعمله الاكل هنا..
المنشاوي بخبث
قولي بقي انك انتي اللي مزعلاه وعايزه تصالحيه…
ضحكت جهاد بهدوء وقالت
هههه والله ابداً هو اللي فهم غلط، علي العموم هصالحه برضو..
ابتسم المنشاوي وقال
ربنا يسعدكم يا بنتي، انا هنزل وهخلي حد من الولاد تحت يجيبلك الطلباات ولو وقفت معاكي حاجه قوليلي وانا هاجي اساعدك..
جهاد
بعرف اطبخ علي فكره بابا الله يرحمه كان معلمني..
المنشاوي
خلاص انا غلطاان وتعالي افطري تحت معايا الاول وبعدين اطلعي يلااا..
_ابتسمت جهاد وراحت لبست حجابها ونزلت معاه تحت في المطعم..
ــــــــــ #بقلم_الكاتبه_رحاب_القاضي ــــــــ
_وفي شركة عمار…
دخل مروان عنده المكتب وكان شكله مدايق جدا وقال لعمار…
مروان
بابااا..
عمار
مش فاضيلك يا مروان عايز اخلص اللي في ايدي عشان الحق معاد مدام فريده..
مروان
ايوه صح انت هتقابلها تقولها ايه بالظبط؟..
عمار
هتجوز جميله..
مروان
طيب ما تستني شويه لبعد الحفله بتاعتي انا وايتن..
عمار بجديه
لا عشان جميله هتحضر الحفله دي وهي مراتي..
مروان بصدمه
بتهزر صح ده الحفله فاضلها يومين بالظبط؟!..
عمار بجديه
قوم شوف شغلك انا مش نااقص عطله..
مروان بقلق
طيب انت كده ممكن تعمل مشكله..
عمار بحده
لا ما فيش مشاكل وقوم شوف شغلك،جو الدلع ده ما ينفعنيش وسيبك من عز الدين يا مروان ده راجل معاه فلوس كتير نصها ما تعبش فيها دي ورث مراته اللي ماتت انما انت عندك ليله كبيره فرح وشقه وشبكه ومسؤليه انت اللي شيلتها بأرادتك وابن عمار المنشاوي مش هيطلع عيل،عشان لو ما نفذتش الاتفاق اللي بينك وبين حماتك انا هعتبرك عيل وهربيك من جديد..
مروان بقلق
ولازمته ايه بس الكلام ده يا بابا والله انا بشتغل واقل من شهر هكون خلصت التدريب ومسكت الشغل اللي حضرتك عايزني امسكه..
عمار
اما نشوف، كنت جاي عايز ايه بسرعه؟…
مروان بضيق
ايتن وطنط فريده عايزين يشوفو ماما وكمان ايتن مصممه اننا نعزمها النهارده انا وهي علي الحفله قال ايه ما ينفعش ما اتعرفش عليها او ما اعزمهاااش..
عمار
دماغها كبيره ايتن ديماً بتخليني ابقي مبهور بيها، اسمع كلامها وروح معاها..
مروان بحزن
مش عايز اشوفها انا لما بشوفها بتخنق وبكون عايز اهرب من كل حاجه واولهم حقيقة انها امي..
قام عمار وقعد قدامه وقال
الهروب مش الحل زمان كنت صغير وانا اللي كنت ببعدك عنها عشان ما تتطبعش بأي حاجه منها ، انما انت دلوقتي راجل وكبير وعارف انها ماشيه في سكه غلط فتخليك جنبها وتعمل اللي يريح ضميرك حتي لو كانت هي غلط فاهم..
مروان
يعني اخد ايتن واروحلها؟..
عمار
ايوه وانا متأكد انك هتعرف تمشي الامور كويس هناك بينها وبين ايتن..
ابتسم مروان وقال
انا بحبك اوووي يا بابا، انا من غيرك حرفيا ولا حاجه انت صاحبي واخويا وابويا وكل جاجه ليا في الدنيا..
قام عمار وحضنه بحنان وقاله
وانت اغلي حاجه عندي في الدنيا وعمري كله ليك انت، ومؤخراً ليك انت وجميله عشان اكون صريح معاك..
ابتسم مروان وقاله
هي جميله تعرف بموضوع الجواز ده؟..
عمار
لا بس اتفق مع امها ومن لليل ربنا يعدلها، يلا روح شوف هتروح لايتن ولا هتكمل شغلك..
مروان
لا خلاص خليها بكره بقي اما نشوف موضوعك يا عريس النهارده..
ضحك عمار بهدوء وقاله
روح علي مكتبك يا حيوان…
_ طلع مروان وهو بيضحك، وعمار خلص شغله وطلع من المكتب وبعت لجميله رساله صوتيه وقالها…
عمار
عامله ايه يا حبيبتي… اول ما تسمعي رسالتي تيجي علي بيتكم علي طول انا رايح لمامتك اهو كلمتها الصبح واخدت منها معاد ورايح دلوقتي، هستناكي..
_قفل الريكورد وقبل ما يحط موبيله في جيبه لقي عز الدين في وشه وقاله بحده..
عزالدين
بقولك ايه انت عمار المنشاوي علي نفسك مش عليا، انت سايب الشغل ورايح فين؟..
عمار
وانا اللي فكرتك هتقول حاجه مهمه، رايح مشوار مهم يا عز عايز ايه؟..
عزالدين
فيروز راسها والف سيف اقعد سنه خاطبها قال ايه عشان تتأكد اني هكمل معاها ومش هسيبها…
عمار
وعايزني اعملك ايه؟..
عز
هي شيفاااك المثل الاعلي وبتقتنع بكلامك فانت زي الشاطر تقولها اني كويس وبحبها وتخليها تقلل ام المده دي..
عمار بهدوء
لا عارف ليه عشان انا نفسي مش واثق فيك يا عز وفيروز غاليه عندي اووي ولو عليا ترفضك اصلا وما كانتش وافقت بيك، فيروز لما جات اشتغلت هنا كانت لسه متخرجه اتعلمت كل حاجه مني وبنت محترمه ومتربيه ولو عندي موظف واحد في الشركه ممكن اعرفه كل حاجه عندي هتكون فيروز، فمش هأذيها بصراحه واخليها توافق بيك..
عزالدين بغيظ
اممم وانا صاحبك علي فكره ولما طلبت مني اشتغل معاك وافقت ولما طلبت اجيبلك يونس الصاوي عشان يساعدك توقع اخوك وتعمل عليه الفيلم زمان وافقت وخليته يجيلك وعملت نفسي ولا اعرفك..
عمار
ويونس استفاااد مني وطلع راجل بجد انت ما عملتش حاجه هو كده كده كان عايز يوصلي وانت ساعدته هو مش صاحبك وده واجبك…
عزالدين
طيب عشان خاطري..
عمار
لا ونصحيه ليك ما تخلنيش اتكلم معاها عشان لو كلمتها هخليها تسيبك وتشوف مستقبلها بعيد عنك، وامشي من قدامي بقي عشان مش فاضي..
عزالدين بغيظ
روح يا شيخ ياارب تتوكس في المشوار اللي انت رايحه..
عمار بقلق
لا لا ورحمة ابوك انا مش نااقص ده انا بزق في الموضوع عشان يتم اسحب الدعوه..
عزالدين
طيب وغلاوتي عندك يا شيخ تكلمها وانا والله العظيم بحبها بجد وخلاص هتلم وهيبقالي بيتي ومراتي ومستحيل اكرر الغلط بتاع زمان خالص..
اتنهد عمار بضيق وقاله
مااشي هبقي اكلمها بس لو طلع كلام عيال هه..
قاطعه عز وقال
والله العظيم بتكلم جد…
عمار
طيب هبقي اكلمها..
عزالدين
روح يا شيخ ربنا يريح بالك ويجعل اللي انت رايحلها دلوقتي تكون من نصيبك..
عمار
شوفت عشان دماغك الشمال دي دعيت الدعوه غلط انا عايز بنتها مش عايزها هي..
عزالدين
يارب يا عم يكونو بناتها كلهم من نصيبك..
ضربه عمار علي كتفه وقاله
يا عم غور من وشي ما تدعليش بحاجه امشي…
_ وطلع عمار بره الشركه وفتحله السواق باب العربيه وركب عمار وكمان السواق وراح عمار لبيت جميله، اللي كانت قاعده في مكتبها مع زكريا اول ما شافت الرساله بتاعت عمار وقامت بسرعه وقالت..
جميله
يا نهار اسود..
زكريا بقلق
في ايه؟..
جميله
عمار راح لماما عشان يخطبني..
ابتسم زكريا وقال
طيب وليه اسود انتي تطولي تتجوزي عمار المنشاوي..
جميله بغيظ
بس يالااا هو انا قليله انا كمان، بس انت ما تعرفش ماما وعمار علاقتهم عامله ازاي والخلافات اللي بينهم اد ايه..
زكريا بهدوء
اهدي وعمار عاقل وهيعرف يتصرف، المهم خلينا في الشغل..
جميله
هو انا ممكن امشي..
زكريا بحده
لا وخلينا نخلص ام المشكله دي اللي احنا فيها…
جميله بضيق
ما هي مالهاش حل الشركه ما فيهاش فلوس تكفي اننا نجيب البضاعه اللي جايه دي ونركنها..
زكريا
ما احنا يا اذكي اخواتك لو ما جيبنهااش هنخسر الشرط الجزائي ووقتها هندخل في ازمه ماليه كبيره ومش هنعرف نجيب بضاعه تاني من اي مصنع..
جميله بحزن
انا مش فاهمه هما ليه العملا سحبو تعاقداتهم من الشركه بعد ما عمي اتسجن، ما الشركه كويسه اهي.
زكريا بجمود
عشان الناس بتقلق ولما بتلاقي مشاكل في الشركات وخصوصا بتاعت الديكور والمظاهر بيقلقو..
جميله
طيب والحل..
زكريا
الحل اننا نجذب العملا لينا تاني ونخلي اسم الشركه يبقي معروف بشغل جديد غير بتاع عمك..
جميله
وده هنعمله ازاي؟..
سكت زكريا وهو بيفكر وجميله قالت
هااا هنعمل ايه؟.
زكريا
بفكر يا جميله اصبري.
جميله مسكت موبيلها وكلمت عمار اللي رد عليها وقال..
عمار
ايوه يا جميله؟..
جميله
عموري انت ناوي تقول ايه لماما انا بجد خايفه..
مسك. منها زكريا الموبيل وقال
هو انا يطلع عيني وبفكر في حل في مشاكلك وانتي فاضيه اووي للمحن ده..
عمار بحده
مالكش دعوه بيها يا حيوان اديها الموبيل..
قفل زكريا في وشه وقال
اقسم بالله لو كلمتيه قدامي لانفخك انا مش ناقص شلل، وما تتكلميش معايا في حاجه غير الشغل..
جميله بغيظ
طيب مش شغاله بس فكر لوحدك..
زكريا بحده
انتي عبيطه يا بت وانا مالي هو انا بفكر عشان مين مش دي شركتك..
جميله بحده
انت ما تزعقليش يالااا..
ضربها بالورق في وشها وقال
وانتي تبطلي تقوليلي يالاا دي هو انا بلعب معاكي ايه القرف ده..
جميله بغيظ
طيب اتنيل هاتلي حل يلاا..
زكريا بغيظ
يا شيخه ده انا كرهت الشركه باللي فيها بسببك، وايه جراب الموبيل ده بقي في مديرة شركه محترمه تمسك موبيل بشخاليل..
اخدت منه الموبيل وقالت
مالكش دعوه بشخاليلي انا بحب الحاجات دي، وشوفلي حل في المشكله دي يلااا…
زكريا
بصي انا لقيت الحل عمار كل سنه بيغير ديكور بيته كله وكمان الشركه الرئيسيه، بس اللي بيعملو كده شركات اجنبيه فاحنا لو خلينا عمار يتعاقد معاكي هنبقي مش محتاجين دعايه، وعشان انا كمان جدع معاكي انا ناوي اغير ديكور المطعم بتاع ابويا وكمان الشقه بتاعتنا هوسعها وهفتح عليها الشقه اللي جنبيها وهيبقي كله من هنا عندك ونعنل الدعايا علي الشغل ده وفي اسرع وقت…
جميله بسخريه
بص انت ومطعم باباك تمام انما عمار لا هو متعود علي الناس اللي معاه فبلاش احرجه واخليه يوافق علي حاجه مش عايزها عشاني…
زكريا
سيبي عليا انا الموضوع ده وعلي فكره مجرد ذكر اسم عمار في شغل شركاتك هينفعك جداً، المهم دلوقتي انا وانتي عايزين نشوف شغل المهندسين القديم عشان نقسمهم بقي…
جميله
وانا عندي فكره احنا نقسم المهندسين لمجموعات علي حسب موهبة كل واحد وشطارته، وبحيث ان تبقي في منافسه مستمره بينهم وكل واحد يطور من نفسه…
زكريا
حلو ما انتي دماغك شغاله اهووو اومال في ايه؟..
جميله
هي شغاله علي طول بس انا بخااف عليها من الحسد فبنيمها..
زكريا بسخريه
بلا نيله، المهم خلينا الاول نتفق مع عمار..
جميله بتوتر
طيب اقولك علي حاجه يا زيكو وما تتعصبش..
زكريا بحده
لا…
جميله بغيظ
ايه الرخامه دي انا لسه ما قولتش علي فكره..
زكريا
عارف عايزه تقولي ايه فلا من غير ما تقولي..
جميله
طيب كنت هقول ايه؟..
زكريا
عايزه تروحي عشان تعرفي عمار هيتفق علي ايه مع امك..
جميله
برافو عليك صح يلا بقي انا هروح عشان الحق الخناقه من اولها..
زكريا بحده
اترزعي يا بت انتي هنا وهخرج انا اظبط كام حاجه بره وهبعتاك شغل المهندسين علي اخر سنه هنا في الشركه وهبعتلك رئيس القسم بتاعهم عشان تعملي الفكره اللي قولتيها…
جميله بغيظ
ياريتني ما قولتها يا دم يااخدك..
رد عليها وهو طالع وقال
وياخدك يا بنت المجانين…
ــــــــــ #بقلم_الكاتبه_رحاب_القاضي ــــــــ
_ وفي بيت جميله كانت فريده قااعده هي وعمار، ومدايقه جداً وقالتله…
فريده
هو انت يعني بتلوي دراعي بمساعدتك لينا عشان اوافق..
عمار بهدوء
لا طبعا انا ما جيبتش سيرة الموضوع ده ومش هحط حاجه قدام حاجه ابدا ، انا بطلب منك اتجوز جميله لاني بحبها وهي كمان بتحبني واظن انتي عارفه حاجه زي دي كويس اوي..
فريده
بس انك تطلب مني تكتبو كتابكم النهارده وبعد اسبوع تتجوزو هو ده معقول..
عمار بجديه
ايوه معقول جدا انا مش عايز اعمل فترة خطوبه طويله انا وجميله نعرف بعض كويس ومش محتاجين وقت زياده نعرف فيه بعض اكتر من كده، وبعدين انا راجل داخل علي الاربعين سنه وفاهم وعارف الاصول كويس وما فيش مشكله اني اتجوزها بسرعه..
فريده بضيق
جميله مش هتوافق..
عمار بثقه
جميله موافقه تكون معايا في اي وقت انا احدده بس هي مش عايزه تزعلك..
فريده
جميله بتسمع كلامي وبتخاف علي زعلي انت ليه بتحاول تخليها تخرج عن طوعي..
عمار
وهي ليه تفضل ديما تحت طوعك ماشي تسمع كلامك وتخاف علي زعلك بس مش تلغي شخصيتها وتختاريلها انتي كل حاجه، حضرتك اذيتي جميله كتير من غير ما تحسي..
فريده بحده
اهو كلامك ده هو اللي ابنك بيقولو لايتن وخلاها تعمل اللي في دماغها من غير ما ترجعلي..
اتنهد عمار بضيق وقالها
يا مدام فريده بناتك مش وحشين بالعكس متربين ومحترمين جداً ودي حاجه تحتسبلك بس ليه بتخربيها بتفكير حضرتك ده، ايتن ليها شخصيه وحضور لوحدها لا انا ولا مروان لينا دخل فيه، وجميله طيبه وعفويه بزياااده ولما بتحب حد مستعده تعمله اي حاجه المهم ما يزعلش منها، واكتر حد بتحبه في حياتها انتي والدليل ان برغم حبها ليا هي اختارت تبعد عني عشان انتي ما تزعليش، اختارت رضاكي علي حساب وجعها، بس حضرتك بقي عملتي ايه كنتي بتشوفيها مدايقه ومغصوبه علي واحد مش بتحبه وساكته واكبر غلط عملتيه في حقها انها اول ما اتخرجت من الجامعه خلتيها تحط في بالها انها لازم تتجوز وتقابل عرسان مش كويسه وانك ديما تجيبي اللوم عليها هي مع ان الجواز ده نصيب، حتي في شغلها حضرتك غلطتي من البدايه لما سمحتي لعمها يجبرها تدخل كليه وتدرس حاجه مش حباها فطبيعي هي مش هتكون ناجحه في الشغل ولا حبااه لانه ما كانش هدفها..
_مسحت فريده دموعها اللي نزلت بحزن وهي بتواجه كلام عمار اللي كله صح وادركت مؤخراً مدي الخطأ اللي عملته في حق بنتها، ابتسم عمار بهدوء وتابع كلامه ليها.
عمار
انا مش بقول لحضرتك كده عشان تدايقي ولا تلومي نفسك، بس والله العظيم انا بحب جميله وعمري ما هبخل عليها بحاجه تسعدها ومستعد ااخسر كل حاجه في حياتي الا هي ومروان ابني عشان ما عنديش اغلي منهم..
اتملت عيونه دموع وشاور علي قلبه وقالها بهدوء
عمري كله وانا قلبي ده قافل عليه وخايف ادخل اي وحده حياتي عشان ما اتعبش وخايف كنت احب واحده تحط نفسها في مقارنه مع مروان، وعمري ما كنت اتخيل ان بنت بنفس شخصبة جميله كده تعمل فيا كده وتخلي قلبي ما يتحركش غير ليها ومهما اوصفلك اللي عملته فيا جميله من اول ما ظهرت في حياتي مش هقدر الاقي كلام يوصفه، بس اللي اقدر اقولهولك ان جميله هتكون اسعد واحده معايا وعمري ما هزعلها ولا هعمل حاجه تدايقها…
ابتسمت فريده بهدوء وردت عليه وقالت
انا موافقه بس انت متأكد ان جميله موافقه…
عمار بنبره سعيده
اكيد موافقه، المهم لما ترجع تبلغيها ان كتب الكتاب النهارده بالليل ومش هعزم حد كتير يعني المقربين وبس عشان الناس يبقي عندهم خبر بجوازنا..
فريده
ربنا يقدم اللي فيه الخير يا عمار…
ــــــــــ #بقلم_الكاتبه_رحاب_القاضي ــــــــ
_وقدام مركز رياضي”جيم”..
كانت واقفه ايتن وبتقلب في موبيلها وهي مستنيه مروان اللي اتأخر عليها، وفجأه قرب منها ايهاب وقال…
ايهاب
واقفه كده ليه يا ايتن تعالي انا هوصلك في طريقي.
ايتن بضيق
لا شكراً مروان جاي دلوقتي…
ايهاب بسخريه
امم مروان اللي هيتجوزك بفلوس ابوه، سمعت خبر جوازكم انتي ازاي يا بنتي تتجوزي واحد ابوه بيصرف عليه…
ردت عليه بحده وقالت
وانت مالك اصلا وبعدين مروان ارجل من ان واحد زيك يجيب سيرته، وعلي فكره هو شغال مع باباه شوف مين اللي داير يتصرمح بفلوس ابوه وامه..
ضحك ايهاب بسخريه وقالها
وانتي صدقتي يا بنتي تلاقيه هيتسلي شويه ويسيبك، سندي صحبتك قالتلي علي الشروط بتاعت مامتك اللي هو وافق عليها بالعقل كده واحد لسه بيبدأ حياته هيورط نفسه بالالتزامات دي ليه..
ايتن ببرود
واحد زيك مش هيفهم مروان بيعمل كده عشان هو راجل وانت ما تعرفش حاجه عن الرجوله..
مسكها من دراعها جامد وقال
وحياة حبي ليكي يا ايتن اللي مش شيفاه ولا عايزه تشوفيه ما هخليكي تتهني بيه المريض ده..
ذقته وقالت بدموع
ما حدش مريض غيرك وايااك تفكر تلمسني تاني..
_ في الوقت ده وقف مروان بعربيته قدامهم ونزل بسرعه من العربيه ووقف قدام ايتن ومسك ايهاب من هدومه وقاله بعصبيه..
مروان
مالك بيها يا يالااا عملتلها ايه؟..
_ماردش عليه ايهاب وكان بيبصله بسخريه وشماته، وبسرعه ايتن مسكت ايد مروان وقالتله بدموع وخوف…
ايتن
عشان خاطري يا مروان سيبه هو ما يستاهلش اننا نقف ونتكلم معاه اصلا..
تجاهل مروان كلامها وقاله بنبره غاضبه
والله لو شوفتك قريب منها تاني حتي لو صدفه انا هخليك تعمل اقامه في المستشفي اللي انت متعود تروحها لما بقل منك فاكر خليتك تروحها كام مره ولا تحب افكرك…
_ قال كده وذقه جامد ومسك ايد ايتن اللي كانت واقفه خايفه واخدها ومشي، وكانت قااعده في العربيه بتعيط ومروان قالها بحده..
مروان
ما تتكلمي يا ايتن في ايه قالك ايه يخليكي تعيطي كده، والله ارجع اديله بالجزمه..
ايتن مسحت دموعها وردت عليه وقالت
ما فيش حاجه بس الموقف ما كانش لطيف فأدايقت..
مروان
مش هيتعرضلك تاني ولو حصل انا هعرف اوقفه عند حده..
ايتن
لا لا انا اصلا هشوف جيم تاني اروحه عشان ما اشوفوش خالص..
مروان
لا مش هتغيري حاجه هو احنا هنخاف منه، طيب خليه يوجهلك اي كلام تاني..
ايتن بضيق
ايوه عشان تروح تتخانق معاه وتبقي فضايح، لو سمحت يا مروان انا مش عايزه اروح هناك تاني مش عايزه اروح اي جيم تاني اصلا…
مسك ايدها وهو سايق العربيه بأيده التانيه وقال
ممكن تهدي طيب واللي عايزاااه اعمليه، المهم لازم تروحي لجميله زمانها هتتجنن دلوقتي…
ايتن بقلق
ليه مالها جميله حصل ايه؟..
مروان
كتب كتابها هي وبابا النهارده..
ايتن
بطل هزار بقي..
مروان
والله العظيم بكلمك بجد..
ايتن ببنبره سعيده
طيب بسرعه روحني انت كل ده عمال ترغي وما قولتليش..
_ ابتسم مروان بهدوء لساعدتها ، واخدها وراحو بيتها، واول ما وصلو نزلت ايتن بسرعه ودخلت البيت وقالت لفريده بعدم تصديق..
ايتن
ماما الكلام اللي قالو مروان حقيقي جميله هتتجوز عمو عمار النهارده؟..
قامت فريده وحضنتها بهدوء وقالت
ايوه يا حبيبتي عقبال ما افرح بيكي انتي كمان..
ايتن بفرحه كبيره
طيب هي فين اوعي تقولي لسه في الشغل؟ ..
فريده
لا يا حبيبتي هي فوق بتحاول تستوعب اللي حصل..
_ طلعت ايتن بسرعه فوق، وفي الوقت ده كانت جميله في اوضتها وبتكلم عمار وبتقوله..
جميله
يعني برضو ما فهمتش قولتلها ايه عشان توافق..
عمار بهدوء
قولتلها عايز اتجوز جميله قالتلي موافقه بس كده..
جميله
ما تهزر يا عمار بقي دي موافقه ومبسوطه الاتنين انت متخيل ان ده حصل اصلا..
عمار
بصي والله انا مشغول دلوقتي فاقفلي عشان اخلص اللي ورايا وافضالك يا عروسه..
جميله
ايوه صح انا عروسه النهارده ومش اي عروسه ده انا عروسة عمار المنشاوي يعني لاوم ابقي حلوه، عمار انا حتي ما جيبتش الفستان..
عمار بنفاذ صبر
الفستان بكل حاجه ممكن تحتاجيه جيالك في الطريق وانتي اصلا حلوه وزي القمر من غير اي حاجه وتشرفي اي حد اقفلي بقي..
جميله بحده
في ايه هو انت مش طايقني ليه، بس انا فهمت انت هتتجوزني عشان تنتقم مني وبس انا اصلا مش مصدقه انك سامحتني..
عمار بعصبيه
بت انتي كلتي دماغ امي من اولها، بصي اقفلي وكلمي صحابك بجولك وطلعي عليهم هرموناتك دي بعيد عني دلوقتي..
جميله بضيق
طيب براحتك مش عايز تشاركني اللحظه ماشي اقفل.
ابتسم عمار غصب عنه وقالها
طيب بحبك..
ابتسمت بخجل وردت عليه
وانا كمان بحبك..
دخلت ايتن في الوقت ده وحضنتها وقالت بدموع
واخيراً يا جوجو انا بجد مش مصدقه واخيرا حاجه في حياتك جات زي ما انتي عايزه…
بعدت عنها جميله وقالت
ما تعيطيش بقي انا ماسكه نفسي بالعافيه، وبصي انا عايزه ابقي حلوه اووي النهارده، لا علي طول انتي متخيله انا فرحي بعد اسبوع..
ضحكت ايتن بسعاده وقالتلها
انا مبسوطه اووي يعني انتي دلوقتي مش اختي وبس ده انتي كمان في مقام حماتي..
جميله
طبعا ده انا هوريكي ايااام سودا، المهم انا هدخل اخد شاور وانتي كلمي فيروز وشهد ويسيبو اي حاجه في ايدهم ويجو بسرعه..
ايتن
حاضر من عينيا..
ــــــــــ #بقلم_الكاتبه_رحاب_القاضي ــــــــ
_في بيت يونس الصاوي..
كانت هنااء قاعده مع يزن ويوسف وقت ما دخلت شهد فقامو ولادها وجريو عليها وحضنوها بشوق ولهفه كبيره..
يزن
انتي وحشتيني اووي يا ماما ليه مشيتي وسبتينا..
شهد بدموع
حقك عليا يا حبيبي انا رجعت اهو ومش همشي تاني، ايه يا يوسف مش سامعه صوتك..
يوسف بضيق
عشان زعلان منك اصلا ما كنتش عايز احضنك…
شهد بحزن
طيب وليه حضتني، وبعدين ما كنتش عايز ماما ترجع..
يوسف بنبره غاضبه
براحتك بابا قالي انك مش فاضيه تقعدي معانا واحنا كمان مش فاضيين، يلا يا يزن..
يزن حضن شهد وقال بدموع
لا انا هروح مع مامي..
شهد بغيظ
شايفه يا طنط هناء قايل للولاد ايه بيكرهم فيا..
هناء
معلش يعني انتي ما تعرفيش جوزك، وانت يا يوسف اعتذر لماما وعيب تقول كده تاني..
يوسف بغرور
بقي انتي يا تيته عايزه يوسف الصاوي يعتذر..
هناء بصدمه
لا هتبقي نسخه تانيه منه لا كتير علينا كفايه ابوك علينا..
حضنته شهد جامد وقالتله
وانا مش زعلانه منه عشان يعتذرلي، وهروح اصالح ابوك وانزلك يا ابو لسان طويل..
هناء ابتسمت وقالت
والله انا قولت شهد عاقله وهترجع تصلح اللي حصل..
شهد
ما انا ماليش غيرهم يا طنط، المهم يونس فوق مش كده؟..
هناء
ايوه ما راحش الشغل النهارده ومن الصبح نااايم ما قامش..
شهد
طيب انا هطلعله بعد اذنك..
يوسف
ماما انتي هتصالحيه ازاي؟..
شهد بغيظ
يا واد بطل رخامه بقي وخليك هنا اوعي تيجي ورايا..
هناء
ما تقلقيش انا همسكهم بس بلاش عصبيه هو هيستفزك عشان تطلعي اسوأ ما فيكي بس انتي اوعي تناوليهاله…
شهد بقلق
ربنا يستر…
_ طلعت شهد فوق ودخلت اوضتها هي ويونس وكان النور مقفول، فتحته وراحت قعدت جنبيه علي السرير وهو نايم وحاطط ايده ورا راسه زي عادته وابتسمت بهدوء، ومدت ايدها وفضلت تلعب في شعره فهو قال بدون وعي..
يونس
بس يا شهد عايز انام…
ردت عليه بصوت هامس
وحشتني علي فكره..
_فتح عينه وبصلها بغضب ونفض ايدها بعيد عنه وقال بحده…
يونس
ايه اللي جابك؟..
شهد بهدوء
انا اسفه ما تزعلش مني حقك عليا في كل كلمه دايقتك بيها..
ضحك بسخريه وقام من جنبيها وقال بغضب
ايه اللي جابك برضو..
شهد بهدوء
عادي جيت بيتي ورجعت لولادي ولجوزي..
يونس بحده
جوزك اللي هو اكبر غلطه في حياتك، ولادك اللي شغلك اهم. منهم..
قامت ووقفت قدامه وقالت
لو هنمسك لبعض في الكلام اللي بنقوله واحنا متعصبين مش هنخلص، واديني جيت واتأسفتلك خلاص بقي ما يبقاش قلبك اسود…
يونس بجمود
يعني هتسيبي شغلك..
شهد
مين جاب سيرة اني هسيب شغلي دلوقتي؟..
يونس بحده
يبقي امشي ما تلزمنيش..
_اتنهدت بحزن وبعدين طلعت موبيلها ووقفت جنبيه وفضلت توريه في شغلها وقالت..
شهد
بص طيب ده شغلي انت عمىك ما اهتميت تشوفه ولا تشوف انا بعمل ايه، شايف انا بعمل حاجات حلوه ازاي وكمان انا مش بعمل لبس فاضح ولا حاجات مش كويسه، بالعكس انا تصميماتي محتشمه جداً وهنجح والناس هتسقفلي ونفسي تكون موجود. معايا يوم المسابقه واقول قدام الكل اول ما انجح انك اكتر حد وقف جنبي..
يونس بسخريه
حلصتي؟؟…
تابع بنبره غاضبه
عايزاني اقف اسقفلك واقلهم اتفرجو الحلوه اللي واقفه هناك دي تبقي مراتي، وطبعا هتقفي وهتتصوري مع ابن ال… الواد الطري اللي بقي عندك اهم من اي حاجه حتي انا…
شهد بدموع
لا الله انا المهم عندي شغلي هو مجرد مديري وبس..
يونس بحده
خلاصة الكلام يا شهد عايزه ترجعي البيت ده تنسي الشغل خالص وتهتمي بيا وبولادي وبس، مش عاجبك يبقي اطلعي بره وانا هعرف ارجعك غصب عنك بمزاجي وبطريقتي..
نزلت دموعها وقالت بحزن
هو انا ما بصعبش عليك، ليه صعب عليك تشوفني مبسوطه يا يونس انا مش بطلب منك المستحيل انا عايزاك تقف جنبي وتستعدني انجح، ليه عايز تخليني ديما مش موجوده وعايزني ابقي في البيت وبس، مش قادر تتنازل شويه وتتحمل اني ابقي ناجحه زيك، طيب ما انا اتنازلت كتير زمان لما كنت بتسيبني مرميه هنا وبتبقي انت في حضن واحده غيري ويتخرج مع دي شويه وتصاحب دي شويه واتحملت ودوست علي كرامتي ورجعتلك، ليه مش عايز بقي تعوضني عن كل ده..
يونس بحده
ومدام انا وحش اووي كده رجعالي ليه، جابه تعيشيور الضحيه قدامي ليه، ما تمشي خلي المره دي عندك كرامه وامشي مدام مش هتسيبي شغلك…
مسحت دموعها وردت عليه وقالت
لا انا مش هعيش دور الضحيه قدامك عشان انا اصلا ضحية انانيتك وغرورك، بس المره دي انا هيبقي عندي كرامه وهاخد ولادي وهمشي واللي رجعني يا يونس هو اني بحبك وانك اول واخر حب في حياتي عمري ما هحب حد. قدك، بس مش هرجعلك تاني غير لما تعرف غلطك وتيجي تصالحني عشان انا لسه باقيه عليك يا رخمم…
وقبل ما تخرج قال هو بخبث
ما تزعليش بقي يا ام كرامه لما تعرفي اني خبطت وهتجوز قريب..
رجعت وقفت قدامه وقالت بغضب
ورحمة ابويا وامي يا يونس لو عملتها لا المىه دي مش هبقي مطلقه يا حبيبي انا هبقي ارمله ومش بهددك انا بتكلم جد…
_ وسابته ومشيت ورزعت الباب وراها واهو ابتسم بهدوء، ومسك موبيله وكلم ماجي اللي ردت عليه وقالت…
ماجي
ايوه يا يونس بيه احب ابشرك اني وصلت لنااس من اللي شغالين في ااعرض بتاع شهد و..
قاطعها يونس وقال
لا لا ما تعمليش حاجه سيبيها تعمل العرض بتاعها زي ما هي عايزه واوعي حد يعملها حاجه..
ماجي بضيق
بس ده ما كانش اتفقنا.
يونس بحده
وانتي مال امك انتي اخدتي فلوس فتنفذي اللي انا قولته وبس واوعي عقلك يوزك تقربي من شهد او تفكري تأذيها ده لو خايفه علي نفسك فاهمه يا سكر..
ماجي بغيظ
فاهمه يا يونس بيه..
ــــــــــ #بقلم_الكاتبه_رحاب_القاضي ــــــــ
_في بيت المنشاوي..
وصل زكريا البيت واول ما دخل لقي المنشاوي قاعد علي السفره بياكل ولما شافه قاله..
المنشاوي
جهاد قالت انك علي وصول وجهزت الغدا تعالي اقعد..
. قعد. زكريا جنبيه وقاله
ايه القمر ده عاملي محشي يا منشاوي..
المنشاوي
مش انا اللي عملت دي مراتك..
ومال عليه وقال بصوت واطي
من لما صحيت واقفه في المطبخ بتجهزلك في الاكل ده فبلاش تبقي رخم وتدايقها بأي حاجه..
ابتسم زكريا وهو بياكل وقاله
لا ما تقلقش انا بس بتقل عليها، المهم عمار كلمك..
قام المنشاوي وقال
ايوه كلمني وهروح انا وانت جهاد بتقول تعبانه ومش راضيه تروح، لو قدرت تقنعها ياريت..
زكريا
خلاص انا هخلي حد من الرجاله يوصلك وانا هقعظ مع جهاد..
المنشاوي
عيب يبقي اخوك بيتجوز وانت مش معاه ولا انت بتضحك عليا وتقول سامحته..
زكريا بهدوء
حاضر هروح انت رايح فين دلوقتي؟.
المنشاوي
داخل انام شويه مدام هنسهر بالليل، وما تزعلش جهاد يا زكريا…
_دخل المنشاوي اوضته وزكريا فضل ياكل لوحده وكان مستنيها تخرج من المطبخ بس ما طلعتش فقال بصوت عالي..
زكريا
عايز مايه لو سمحتي من عندك..
_ طلعت بعد شويه وحطت المايه قدامه وقعدت قدامه وهي بتشرب عصير…
زكريا
ما بتاكليش ليه؟..
جهاد
سبقتك مع بابا…
زكريا
تسلم ايدك الاكل حلو اووي..
جهاد بجمود
شكراً..
زكريا بقلق
في ايه مالك زعلانه ليه؟..
جهاد بهدوء
لا انت اللي زعلان مش انا..
ضحك بهدوء وقال
طيب انا اللي زعلان ريأكشن النكد بيعمل ايه علي وشك انتي؟..
جهاد بحده
عشان ما فيش حاجه تزعلك حصلت..
رد. عليها وهو بياكل وقال
لا حصل..
جهاد
لا ما حصلش انا ما عملتش حاجه تزعلك..
زكريا بصوت واطي ونبره غاضبه
لما احس ان قربي منك بيدايقك يبقي حقي ازعل.
جهاد بتوتر
لا والله انت فاهم غلط بس انا مش متعوده وو وانت فجأتني باللي حصل امبارح وبس..
زكريا بخبث
امم طيب وبعدين..
جهاد بتوتر
وبعدين ايه؟..
قام وقعد جنبيها وقال بهدوء
يعني لمحت وما فهمتيش فاتكلمت ولما حسيتك مكسوفه عملت حاجات كتير وبرضو ساكته ايه بقي؟..
جهاد بتوتر ونبره خاجله
انا مش فاهمه انت عايز ايه يعني…
زكريا ابتسم بتسليه وقال
بحبك وعايز اسمع ردك دلوقتي وبكل وضوح من غير لف ودوران والغاز..
جهاد بكسوف شديد
علي فكره بقي مش لازم اقولها..
زكريا بعِند
لا لازم تقوليها ودلوقتي حالاً..
جهاد بتوتر
طيب انت يعني حبيت فيا ايه؟..
زكريا بهدوء
كل حاجه شخصيتك وهدوءك وبراءتك وعيني واااه من عينيكي دول بذات اللي جابوني علي ملي وشي، وبحب شعرك جداً وخصوصا لما بيبقي مفرود..
ابتسمت بكسوف وردت عليه
انا بقي حبيتك وشغلت تفكيري من اول مره شوفتك فيها وبعدها حلمت بيك وبعدين حصل اللي حصل بينا وكده..
زكريا بعدم فهم
لا مش فاهم هو انتي شوفتيني قبل ما نشوف بعض في الشقه..
جهاد ابتسمت وقالت
ايوه يوم ما بابا مات تقريباً انت جيت مع عماد وانا كنت رايحه اجيب الشيخ اللي هيغسل بابا وكنت داخله البيت بسرعه وخبطت فيك وانت قولتلي اهدي علي مهلك….
ابتسم بأتساع وقال
ايوه حصل فعلا بس انا ما كنتش فاكر حاجه زي دي خالص..
جهاد بهدوء
اليوم ده بعد ما كلهم مشيو فضلت قااعده لوحدي وكنت خايفه انام وخايفه من المكان وكل حاجه وطلبت من شيماء تبات معايا بس طبعاً رفضت، المهم اول ما نمت حلمت بيك معايا في الشقه ما اعرفش وقتها ايه اللي خلاني احلم بيك بس في الحلم ما كنتش خايفه خالص علي عكس الحقيقه..
_ابتسم زكريا ومد ايده علي شعرها وفضل يحرك ايده عليه بهدوء وكأنها طفله قدامه وقال..
زكريا
عارفه لو فاضل في عمري لحظه واحده هتمني تكون معاكي انتي، كلمة بحبك دي اللي انا مستني اسمعها منك قليله اووي علي اللي بحس بيه وانا معاكي…
حضنته جهاد وقالت بدموع
وانا كمان بحبك اووي بس اوعي تسيبني او تتخلي عني، اصل كل اللي بحبهم يا بيخزلوني يا بيسبوني فبلاش تبقي زيهم..
_وقبل ما يرد عليها طلع المنشاوي من اوضته زقال من غير ما يا باله منهم..
المنشاوي
يا جهاد ما شوفتيش دوا الضغط بتاع…
بعدت جهاد عنه بسرعه وهو بص لابوه بغيظ وقال
والله ما حد هيجيله الضغط غيري، في ايه يا منشاوي عايز ايه وقتك ده…
المنشاوي
وانا مالي انا وبعدين مش فالصاله يا حبيبي الحاجات دي عندك اوضتك..
زكريا بصلها بغيظ وقال
عجبك كده هنا تحضني وجوه بتقلبي بطه بلدي..
وشها قلب احمر وضربته علي كتفه جامد وقالت
اا انا هدورلك علي الدوا يا بابا حاضر..
زكريا
طيب بسرعه هنروح نختار الفستان اللي هتحضري بيه كتب كتاب عمار وفرصه كويسه عشان اعرفك علي جميله..
جهاد
بس انا مش عايزه اروح وبعدين ما فيش حاجه هلبسها هتبقي لايقه عليا وانا بطني كبيره كده..
زكريا غمزلها وقال
الحمل مخلي شكلك قمر اصلا فبلاش تلاكيك..
المنشاوي
معاه حق شكلك حلو يا جهاد وبعدين انا هناك هيسبوني قااعد لوحدي يرضيكي..
زكريا بغيظ
اممم هو انت متجوزها معايا وانا ما اعرفش مشاركني في كل كلمه ليه، وبعدين هي هتيجي معايا انا وهتفضل معايا انا وانت نبقي نقعدك جنب العواجيز اللي هناك..
ضحكت جهاد بهدوء والمنشاوي قاله بخبث
طيب ايه رئيك بقي ان انا وجهاد اللي هنروح وانت هتفضل قااعد هنا..
ــــــــــ #بقلم_الكاتبه_رحاب_القاضي ــــــــ
_وبالليل في كتب كتاب جميله وعمار..
كان في مسجد جميل جداً وقاعده جميله جنب خالها اللي ايده في ايد عمار وبينهم وبينهم المأذون، ونظرات فريده لبنتها وسعادتها اللي باينه عليها كانت ملفته جداً وخصوصا بدموعها اللي كانت بتنزل كل شويه وتمسحهم بسرعه، وجنبيها عايده اللي سعادتها كانت كبيره جداً بجواز صديقها المقرب واكتر كمان فهي طول عمرها بتعتبر عمار في مقام اخوها الصغير، وفيروز وجميله قاعدين جنب ايتن ووجنبيهم عزالدين ويونس اللي كان متجاهل شهد تماماً،ولكن اللي كان خاطف الانظار اكتر هو وجود زكريا المنشاوي وجهاد اللي صدم الكل وان خلاص الخلاف اللي بينه وبين عمار انتهي..
المأذون
باااارك الله لكم وبارك عليكم وجمع بينكم في خير.
_بدأ الكل يسقفلهم بسعاده وقاام هو وسلم علي خالها وبعدين قرب منها وابتسم بهدوء وقال بتنهيده طويله…
عمار
واخيراً يا جميله❤..
_وباسها علي راسها وحضنها جامد المره دي علي عكس كل مره وهي كمان “ولما لا وهي اصبحت زوجته وملكه وحلاله الان”..
جميله بأحراج
يا ابني خنقتني اوعي كده الناس ايدها وجعتها من التسقيف..
بعد عندها وهو لسه قربها ليه وقال
لا انا بعد كده كلمة ابعد دي ما اسمعهااش، بقيتي مراتي وبراحتي..
جميله بتوتر
لا انت هتخوفني منك احنا فيها اهو هسيبك واخلع.
عمار بهدوء
بس اسكتي بقي ما تبوظيش اللحظه..
جميله بدموع
انا من كام يوم كنت بقول مستحيل يرجع يعاملني زي الاول حتي، بس انا دلوقتي اتجوزتك خلاص..
عمار
انا اصلا ما كنتش هسيبك يا غبيه، ده انا ما صدقت لقيتك بس كان عقاب صغير عشان تحرمي تعملي اللي عملتيه وتسبيني تاني..
قرب منه عزالدين وقال
ايه يا عريس تعالي نتصورلنا صورتين وخلينا نعرف نباركلك العروسه مش هتطير..
جميله
هو ده عز خطيب فيروز النسوانجي صح…
ضحك عمار بصوت عالي وعز بص لفيروز اللي قاعده تتكلم مع شهد وقال بغيظ..
عزالدين
بوظت سمعتي الجزمه..
_وراح اخد فيروز ووقفو جنب جميله وعمار، وشهد كانت متوقعه ان يونس هيقوم ياخدها ويتصورو معاهم هما كمان، بس اتصدمت لما لقيته قام باركلهم لوحده وبعدين سااب المكان كله ومشي..
قعدت جنبيها فيروز وقالت
الحيوانه قالت قدام عز ان انا بقول عليه نسوانجي..
شهد بضيق
معلش امسحيها فيا عروسه بقي ولازم نستحملها..
فيروز بهدوء
كبري دماغك يا شهد هو هيرجع وهيصالحك والله بس دلوقتي ركزي في شغلك وبس..
_ابتسمت ليها شهد، وجنبيهم كانت قاعده ايتن جنب مروان اللي كان ماسك ايدها من اول ما وصلو وما خلهااش تبعد عنه لحظه واحده وقالها بسخريه..
مروان
عيشت وشوفت ابويا عريس، ايه الاحساس ده..
ايتن
مبسوط صح؟..
مروان
مبسوط طبعا بس مش حاسسني ابنه بصراحه..
ايتن
حصل والله اصلا باباك شكله صغير يمشي اخوك الكبير..
_ ضحك مروان بهدوء، ولكن اختفت ابتسامته واتحولت ملامحه للغضب اول ما شاف مامته داخله عندهم وماسكه في ايد ايهاب زميله ووقفت قدام الكل وقالت..
سميره
مبروك يا عمار انا لما عرفت انك هتتجوز قولت لازم اجي اباركلك بنفسي انا وايهاب جوزي..
_ وفي خلال لحظه تحولت سعادة الجميع للصدمه والزهول والغضب، وكلن النصيب الاكبر لمروان اللي ساب ايد ايتن وراح مسك ايهاب من هدومه ولكمه في وشه قدام الكل وحصل؟….
ــــــــــ #بقلم_الكاتبه_رحاب_القاضي ــــــــ
_وفي اوتيل راقي جداً…
دخلت دارين الجناح الخاص بيها هي ويوسف بعد ما خلص فرحهم، وراحت قعدت علي الكنبه وقلعت الجزمه وقالت بتعب..
دارين
انا ما كنتش متوقعه اني هفرح كده النهارده، والله ولا كنت متوقعه اني يوم ما اتجوز هتجوزك انت،بس مامتك لطيفه جداً زكانت مبسوطه اووي…
قله يوسف جاكيت بدلته ورمااه قدامها علب الترابيزه وقال بعصبيه..
يوسف
هو انا مش قولت مش عايز اي حاجه بخصوص اليوم الزفت ده تنزل علي السوشيل ميديا تقومي حضرتك تعزميلي تيك توكر وناس كلهم بتوع سوشيال ميديا..
دارين بضيق
وفيها ايه انا وعدتك مش هنزل حاجه عندي وده حصل، وبعدين فيها ايه يا يوسف احنا اتجوزنا ومراتك عارفه بالموضوع ده..
يوسف بضيق
ما كنتش عايزها تشوف اي حاجه من اللي بتحصل بينا..
دارين بضيق
طيب بعد كده هبقي اخد بالي..
قعد يوسف جنبيها وقال
طيب ايه…
بعدت عنه بسرعه وقالت بتوتر
اا ايه في ايه..
يوسف بهدوء
اهدي يا دارين ما احنا متفقين علي كل حاجه..
قامت من جنبيه وقالت
ايوه بس يعني مش كده علي طول..
رد عليها بهدوء وقال
براحتك انا مش هغصبك علي حاجه..
دارين بإحراج وتوتر
اا انا هدخل اغير هدومي..
يوسف
اتفضلي..
_ دخلت الاوضه بسرعه وقفلت الباب تحت نظراته ليها، ولاول مره يشوفها بطريقه تانيه فهي دلوقتي مراته، وبدأ يقول لنفسه انها جميله وحلوه جداً حتي انها احلي من بطه، بطه بنت جميله وصغيره وهاديه في كل حاجه، انما فيروز تختلف عنها في الشكل فيروز اجمل منها ومثقفه وناجحه جداً في شغلها وراقيه جداً في كلامها وتعاملها اللطيف..
_ ابتسم بخبث ونسي كل حاجه حتي بطه وقام دخل عند مراته التانيه…
_ تفتكرو هيحصل ايه في الايام اللي جايه؟…
ــــــــــــــــــــــــــــــــــــــــــــــــــــــ
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية موضوع عائلي 2 (الجميله والشعر الأبيض))
