رواية سيفي الحامي الفصل الثاني 2 بقلم منيرة سيف
رواية سيفي الحامي الجزء الثاني
رواية سيفي الحامي البارت الثاني
رواية سيفي الحامي الحلقة الثانية
ليل – مريم!
ثائر – لا ده أنا روحي انتي يمريوم
*سمع سيف صوته قام جري للباب لكن قرر يستنى شويه ويشوف جاي ليه*
ليل بخضه – ثائر
ثائر – ايوه مالك اتخضيتي ليه
ليل – مفيش انت جاي ليه ومن امتى بتيجي كده
ثائر – شوفت مامتك واختك وهما نازلين قولت فرصه اجي اصالحك
ليل بإستغراب – تصالحني
ثائر – اه هفضل واقف ولا ايه مش هتدخليني
*وهنا قام سيف جري بعد ما اتأكد من شكوكه*
سيف – لا يحبيب اخوك مش هينفع تدخل ولا اصلا ينفع تبقا واقف هنا
*بص لليل وكمل*
سيف – ادخلي يا ليل خمسه وجايلك
*مسك سيف ثائر من دراعه واخده بعيد عن الشقه وطبعا فرق الطول والجسم كان واضح ف مكنش مقنع ان ثائر يحاول حتى يدافع عن نفسه ف استسلم وعشان كمان جبان*
سيف – بص انا مش هعمل دماغي بدماغ عيل زيك بس انا فاهم حركات الصيع اللي زيك دي كلها ليل تخصني واوي كمان ف لو دماغك دي حاولت تسوحك وتخليك تضرها ولا حتى تحاول صدقني راسك كلها هتتق.طع ولو مش مصدق انا ممكن اوي اديك قرصة ودن اخليك تقتنع ع طول
*كل ده كان ثائر مستسلم لانه جبان بطبعه بس غلاوي شويه*
سيف – ها ناوي ع ايه يمعلم انا معاك ف اي عاركه عموما سداد يعني متقلقش
ثائر بخوف – تمام
سيف وهو بيعدله هدومه – حلو اوي ادخل بيتكوا بقا واستعيذ بالله كده من دماغك عشان لو سوحتك صدقني هعيط الوالده ع عمرك
*سابه سيف وراح لليل اما ثائر كان خايف ومتغاظ ف نفس الوقت لكن كان لازم يلم الدور دلوقتي*
ليل – عملت ايه
سيف – خايفه ع ايه
ليل – مش خايفه ع حاجه بس عشان المشاكل والله
سيف – لا متقلقيش مفيش مشاكل إن شاء الله انا اتكلمت معاه وحذرته مش اكتر
ليل – ربنا يستر
سيف – اوعي تكوني مصدقاه
ليل – لا طبعا هو انا عبيطه ده بني ادم قذر اصلا وانا كل يوم بيزيد قرفي منه ربنا مايريحه لا دنيا ولا آخره عشان ع طول كان بيتمنى انه يرتاح
سيف بهزار – انت قلبك قاسي
ليل – اوييييه اويييه
*ضحكوا كتير وكانت دي محاوله من سيف عشان يطمنها لكن هو كان قلقان عليها*
ليل – ف حتة كامب ف سيوه ع البحر تحفه هموت واروح بجد هتغيرلي مودي بس ماما مش هترضى
سيف – شوفتيها فين دي
ليل – تبع الجامعه
سيف – اممم عايزه تروحي يعني
ليل – اوووييي
سيف – طب واللي يخلي ماما توافق
ليل – هجبله حاجه من سيوه وانا جايه
سيف – لا تاخديه معاكي
ليل – اي ده افرض مينفعش
سيف – لا هينفع هنروح انا وانتي بالعربيه
ليل – تؤ بس انا عايزه اروح مع اصحابي
سيف – يستي هو انا اعترضت هتبقي مع اصحابك بس هتروحي معايا وترجعي معايا واحنا ف الكامب انتي مع اصحابك براحتك بس ابقا متطمن عليكي
ليل – طب ولو قولت لا
سيف – انسي الرحله اصلا ولو امك اقتنعت هخليها ترفض عادي
ليل – يووووه ماشي موافقه بس اقنعها
سيف – اشطا
ليل – والنهارده
سيف – ماشي هي كام يوم
ليل – 3 ايام
سيف – طايب سيبي الموضوع عليا بس قومي اعمليلنا كوبايتين شاي كده
ليل – يادي الشاي انت هات علبه ومنها ع بوقك ع طول
سيف – قومي يبت
*بعد شويه كانت فريده ونهى ( مامت ليل) جم*
*صوت خبط الباب*
سيف – هفتح المرادي
ليل – ماشي
فريده ونهى مع بعض بإستغراب – سيييف!
سيف – اي ده ف ايه مالكوا
*بعد مادخلوا وشافوا ليل*
نهى بإستغراب – انتوا قاعدين سوا .. اللحقي يفريده
فريده – سيبي فريده بصدمتها يختي مش عارفه افرح ولا استغرب
ليل بكسوف – خلاص يجماعه ايه المشلكه يعني
نهى – سبحاااانه مغير الاحوال
سيف بإنبساط – خلاص يجدعان الله كان ف سوء تفاهم وحليناه وبقينا حبايب من تاني احنا منقدرش نبعد عن بعض اصلا
فريده – يعم ربنا يهني سعيد بسعيده
ليل ف محاوله منها تداري كسوفها – اولا يخالتو هو سيف وانا ليل ثانياً محسسني اننا كنا مخطوبين وفشكلنا ورجعنا سوا من تاني ايه يجماعه
نهى – طب يلا يختي يلا حطي الاكل ده ع السفره هنتغدى سوا
*قامت ليل تحط الاكل وقعدوا يتغدوا وبعد دقايق جت نور والفرحه ماليه ملامحها*
فريده – حماتك بتحبك يبت ينور تعالي اتغدي
نور وهي بتدي لخالتها بوسه بهيام – لا يخالتو انا شبعاااانه جداااا وهدخل اوضتي
*وفجأه عم الصمت والاندهاش المكان*
ليل – معقوله الحب بيعمل كده
سيف بتنهيده – واكتر وحياتك
نهى لفريده – مالهم دول هما كمان
فريده – معرفش يختي ايه المجانين دول كملي اكلك سيبك منهم
سيف – طب ايه يماما مش هتفصصيلي السمك ده يجدعان لازم تجيبوا سمك يعني
فريده – ماتخلي عندك دم يالا انا راجعه تعبانه ماتعمل لنفسك انت صغير وبعدين ماله السمك
ليل – ايه يخالتو المعامله دي انا هفصصلك يا سيف سيبك من امك
نهى – اتربي يبت بدل ما ابلعك الشوك وبعدين يختي اعملي لنفسك
سيف – خالتو ليه بتهدمي الملزات بجد ماتسيبيها تفصصلي
فريده – اتربى يالا
*بصوا لبعض ليل وسيف*
سيف – اخوات فعلا
ليل بضحك – طب كل كل
سيف – تسلم ايدك يا ليلتي
فريده بإشمئزاز – والفيلم التركي ده هينتهي ع ايه
نهى – رجعنا للمحن يختي ربنا يصبرني
سيف لليل بصوت واطي – خدي بالك الناس دي مش سالكه
نهى – بتقول ايه يالا
سيف – بقول يانهانيهو يحبيبتي كنت عايزك ف حاجه كده
نهى – بعد نهانيهو دي انا اتوغوشت
سيف – لا ياما تتوغوشيش كان ف رحله كده لسيوه 3 ايام كامب كده تبع جامعة ليل
نهى – اهلا وسهلا مش بقول اتوغوشت
سيف – ماعلينا الرحله دي يستي هتبدأ بعد بكره وليل كان بتستسمح حضرتك يعني انها تروح
نهى – لا
سيف – من غير تفكير
نهى – نو
سيف – ليه طيب
نهى – هتقعد 3 ايام لوحدها بره البيت شايف الدنيا امان اوي
سيف – ولو حليتهالك
نهى – ارغي
سيف – هروح معاها وهحميها بصي هحطها بين لحمي وجلدي كده
ليل – ايه القرف ده
سيف – اخرسي انتي
نهى – لا بردو
سيف – عشان خاطري يخالتو البت نفسيتها تعبانه لازم تخرج شويه بدل ماتكتئب
فريده – سيبيهم يا نهى بقالهم كتير مراحوش ف حته
نهى – عشان خاطرك انتي بس يفيرو
*غمز سيف لليل وبصلها بإنتصار انه قدر يقنع مامتها*
*تاني يوم*
ليل – الو يا سيف انت فين
سيف – رجعنا للزن بقا فوني كله عباره عن رناتك
ليل – يعم أنجز فينك
سيف – ف الشركه يعني هكون فين
ليل – طب مش هتيجي معايا
سيف – فين ياترا
ليل – ف شوية حاجات عايزه اجيبها عشان الرحله لزوم الشبرقه والشياكه وكده ومش عايزه انزل لوحدي
سيف – طب انا مش هعرف اسيب الشغل دلوقتي مينفعش يتأجل كام ساعه كده
ليل – لأمتى يعنيي
سيف – 8 مثلا
ليل – ماشي مستنيه سعادتك. لما تيجي متطلعش عشان مش هيبقا ف وقت استناني تحت وانا هنزلك
سيف – انتي معندكيش دم ياليلو يحبيبتي
ليل – يخليك ليا يسيفو
*جت 8 وسيف كان مستنيها تحت*
ليل – انا نازله يماما سيف تحت
الماما – يبت حرام عليكي الواد مش هياكل لقمه طيب
ليل – هنبقا ناكل بره
الماما – طب استني خدي دول اديهومله
ليل – اي ده
الماما – سندوتشات بانيه يسندوه كده لحد ماتروحوا تتغدوا
ليل – يسلام مشطشط زي مابحبه صح
الماما – انتي يبغله ده للواد مش ليكي
ليل – ماشي ماشي يلا سلاااو
*نزلت لقيته مستنيها بس كان معاه مكالمه ركبت بهدوء لحد مايخلص*
سيف وهو بيبصلها – لا متقلقيش مش هخليها تضحك عليا
ليل بصوت واطي واستغراب – مين دي
سيف – ماشي يخالتو يلا سلام
ليل بصدمه – خالتوووو .. بتقولك ع السندوتشات صح
سيف بضحك – اه
ليل – شوف الست مش مأمناني ع سندوتشااات
سيف – عندها حق بردو .. بس ايه الشياكه دي دانتي لو نازله ديت مش هتبقي قمر كده
ليل – يبني دي اقل حاجه عندي .. خد يخويا سندوتشاتك
سيف – لا يحب كده هتسمم
ليل – ايه قلة القيمه دي مش للدرجادي
سيف – كلي معايا طب
ليل – لا يعم الروج هيبوظ
سيف – براحتك ده حراق زي مابتحبي
ليل – قول والله
سيف – والله
*اتشاركوا الأكل لحد ماوصلوا المكان ودخلت ليل تجيب فستانين صيفي للرحله*
ليل – ها ايه رأيك
سيف للبنوته اللي ف المحل – مفيش حاجه مقفوله شويه عن كده
ليل – يا سيف ما ده حلو وبعدين مش مفتوح اوي يعني
سيف بهدوء – ريحي انتي
البنوته – اتفضلي ده نفس الاستايل تقريبا بس الكتف مقفول شويه
سيف – ايوه انا موافق ع ده
ليل بضيقه – لما اقيسه الاوول
*دخلت لبسته وطبعا كان تحفه عشان مفيش حاجه مبتليقش ع البنات🫶🏻*
سيف بإنبهار – تحفن مش كل العريان شيك يختي شوفتي ده محترم وجميل اهو
ليل – ماشي امري لله .. كده جبت الفستانين خليك انت هنا بقا هروح للبنت اجيب كام توب كده وجايه
سيف بهزار – طب ليه مااجي معاكي
ليل – اتلم يالا
*بعد ما خلصوا واتخانقت ليل مع سيف عشان دفع الحساب*
ليل – اه اتضايقت عشان انا مقولتلكش تيجي عشان تحاسبلي انا قولتلك عشان مش عايزه اروح لوحدي وبحب تبقا معايا اخد رأيك
سيف وهو بيحاول يهديها – يحبيبتي هو انا غريب عشان تقوليلي كده دانا بابا يبت عادي يعني متكبريش بس الموضوع
ليل – طب ودينا بقا مكان عشان هجبلك انت كمان كام حاجه كده بس والله يا سيف لو دفعت انت هرجع لوحدي
سيف – استني بس بس انا مش محتاج حاجه
ليل – اه ومالو ابقا روحلي بلبس كلاسيك وفورمال الرحله يلا يا سيف الله يسترك
سيف – اقنعتيني
*وصلوا للمكان وجابت لسيف لبس كاجوال والمرادي سابها تحاسب*
سيف بعد مافرهد – هااا فاضل ايه تاني
ليل بضحك – ياعيني يبني لا انا بقول نروح نتغدى بقا انا عموماً خلصت
سيف – يبقا نروح نتغدى
*وصلوا المطعم وطلبوا الاكل وقبل مايجهز*
سيف – بقولك
ليل – قولي
سيف – عاملك مفاجأه
ليل بفرحه – بجد ايه هي
سيف وهو بيطلع حاجه من جيبه – وانا جاي ف الطريق كده شوفت حاجه حلوه عجبتني تخيلتها عليكي وكالعاده كانت تحفه ف قولت مينفعش حد يلبسها غيرك .. افتحي ايدي هتشوفيها
ليل وهي بتحاول تفتح ايده – لا مانت متجمدش كدههه مش هعرف
سيف – طب خلاص غمضي عينك
ليل – اهووو
*فرد سيف مفاجئته اللي كانت تخطف العين والقلب كانت سلسله جميله وكانت عباره عن نجوم بتلمع ( دي بالظبط✨)*
سيف – فتحي بقا
ليل بإنبهار – الله يا سيف بتهزر دي تحفهههه
سيف – عارف انك بتحبي الفضه والخواتم بالأخص بس دي شوفتها اتأكدت انك هتحبيها لأنها مميزه زيك يا ليلو
ليل وعيونها مدمعه م الفرح – طب بس بقا عشان هعيط
سيف – استني البسهالك
*قام سيف يلبسها السلسله ف وسط نظرات الناس اللي افتكروا انهم حبيبين اما ليل خدت بالها واتكسفت*
ليل – سيف خلص بقا الناس عماله تبص علينا
سيف – مايبصوا يستي الله .. جميله اوي زي ماتخيلتها ويمكن احسن
ليل – تسلم ايدك وعيونك ياسيفو مش هقلعها ابدا
*بعد صمت دقيقتين*
ليل – خالتو لسه بتجبلك عروسه
سيف – يييه متفكرنيش كل يومين
ليل – ليه يا سيف مش عايز تدي فرصه لواحده يمكن تحبها
سيف – والله يبنتي مش عارف بس انا مش قابل حد فاهمه يعني نفسي مش قابله ان ادي فرصه واسيب حد يقرب مني او اني حتى ابادر واهتم وكل ده تحسيني معنديش طاقه
ليل – طب وبعدين ماهو مينفعش تفضل كده
سيف – سيبيها لوقتها بقا .. الاكل جه يلا ناكل
*كلوا ف صمت غير عادتهم لكن عقل سيف كان مشغول بكلام ليل وبيسأل نفسه ليه فعلا مش بيدي فرصه اما ليل ف بردو بتفكر ف كلامه اللي مأقنعهاش بس سكتت عشان لو كان عايز يقول السبب الحقيقي كان قال م الاول بس هي متعرفش ان هو نفسه مش عارف ايه السبب الحقيقي*
سيف – نروّح ولا تحبي نروح ف حته
ليل بحماس – ممكن نروح ناكل ايس كريم ودره وتين
سيف بصدمه – التلاته
ليل – التلاته
*لفوا بالعربيه وجابلها اللي طلبته بس جاب حاجه تانيه مطلبتهاش*
ليل بحماس – جبت كل حاجه
سيف وهو بيمدلها ايده – وجبت حاجه زياده
ليل بحب – الله ياسيف ورده لا انت مدلعني النهارده
سيف – يلا جبر الخواطر ع الله
ليل – بوظت كل حاجه
سيف – يست بهزر معاكي الله عارف انك بتحبي الورد الأحمر ف وانا بجبلك الحاجه شوفت حد بيبيعه جبتلك وردايه يا وردايتي
ليل بفرحه – مش عارفه اقولك ايه بقالي كتير اوي والله مفرحتش كده ولا حد دلعني كده اصلا
سيف – اي خدمه يستي موجود لإسعاد حضرتك دايما .. يلا نروح بقا عشان امك هتقتلني الساعه 12
ليل – انت خدت اجازه م الشغل ولا نسيت
سيف – لا منستش خدت 4 ايام كمان
ليل – جدوع
*روحوا الاتنين وناموا ف امان لحد الفجر قامت ليل ع صوت المنبه كانت مجهزه شنطتها م بليل وقامت لبست وجهزت ورنت ع سيف لكن مبيردش خرجت وراحت تخبط عليهم*
سيف – مين
ليل بصوت واطي – افتح يزفت مين ايه
سيف بإستغراب – ليل ف حاجه ولا ايه
ليل – ف محشي انت لسه ملبستش يخربيتك
سيف – البس ليه
ليل – انت جالك زهايمر يبني الرحلههه
سيف – هنمشي من دلوقتي
ليل – اصلا هما ماشيين بالاتوبيس من الساعه 2 الساعه دلوقتي 5 قولت احنا هنروح اسرع بالعربيه ف صحيتك متأخر يلا بقا والنبي مش عايزه افوت حاجه
سيف – حاضر حاضر خلاص روحي وانا هخلص وارنلك
ليل – لا يحبيبي هسيبك من هنا وهتنام من هنا .. وبعدين وسع كده اطلعلك لبسك عشان عرفاك معندكش ذوق
سيف – اظن واضح مين قليل الذوق .. انجزي لحد مااطلع م الحمام
*جهزتله ليل اوتفيت كاجوال*
سيف – خلصتي
ليل – اه وجهزتلك شنطتك
سيف – طب يلا بره خليني البس
ليل – ماتسيبني شويه اوضتك مريحه
سيف وهو ماسك تيشيرته – براحتك خليكي
ليل بخضه – هتعمل ايه
سيف – هغير
ليل – قدامي
سيف – مانتي اللي مش راضيه تطلعي
ليل – ايوووه عليك انا بهزر يجدع سلامو عليكو لما تخلص رنلي
سيف بضحك – قلبتي اسكندرانيه فجأه
*خلص سيف ورن ع ليل تخرج وخرجت ليل بعد ماقالت لمامتها وسمعت التعليمات كالعاده*
ليل – شوف وشك منور ازاي بالكاجوال
سيف – هاتي الشنطه
ليل – اما جنتل مان بصحيح
سيف – يكش يطمر
*نزلوا وركبوا العربيه*
ليل – طيب بما انك منمتش كويس ف انا هنام بقا و لما نوصل صحيني
سيف – حوله حتى ف كلامك
*بعد فتره سيف ابتدى ينام*
سيف – بت ياليل اصحي لاغيني احسن هنام
ليل -…….
سيف – انتي يحيوانه بنام والله
ليل -…………
سيف – انا عارف هصحيكي ازاي
ليل – لا خلاص قومت
سيف – ماكان م الاول
ليل – مانت هتبوظلي الاوتفيت بالمايه ف كان لازم اصحى
سيف – طب اعملي اي حاجه عشان هنام
ليل – يلا نفطر طيب
سيف – جايبه اكل
ليل – هي نهانيهو هتنزلني من غيره
سيف – حبيبتي دي
ليل – خد دي رومي وقشطه اللي بتحبه عملته مخصوص عشانك
سيف – يمزاجك ينهانيهو .. اتعلمي منها بقا
ليل – هتعلم لقرة عيني يخويا ابقا هات مراتك تقعد مع امي شويه تعرفها الكتالوج بتاعك
سيف – بس الاقيها يختي
ليل – شغلنا حاجه يعمووو
سيف – شغلي انتي يحماره يعني سايق بإيد وباكل بإيد هشغل ازاي
ليل – وليه الشتيمه طه .. اشغل ايه
سيف – عامر منيب
ليل – اما ذوقك راقي بصحيح
*بعد شويه وقفوا ف الاستراحه*
سيف – انزلي نشرب حاجه وبعدين نكمل
سيف – هتشربي ايه
ليل – شفشق قهوه افوق كده
سيف – عندك حق
*خلصوا ورجعوا يكملوا طريقهم وبعد فتره وصلوا بالسلامه وكان الاتوبيس كمان وصل*
سيف – المفروض نعمل ايه بقا دلوقتي
ليل – مش عارفه بس تقريباً هنعمل الخيم بقا ونجهز حاجاتنا ولو عايز تنام او عايز تخرج براحتك بس هما هيتجمعوا بليل كده ويقعدوا بقا سوا نلعب وناكل وكده
سيف – طيب يلا
*بعد ماعملوا الخيم وكانت خيمهم قريبه من بعض عشان يعرف يخلي باله منها وقعدوا يرتاحوا شويه*
ليل بخضه – سيف
سيف وهو بيبصلها – ايه
ليل – ثائر
سيف بإستغراب – ماله كلمك
ليل – ثائر هنا ياسيف
*بص سيف ع المكان اللي بصاله ليل ولقاه واقف وسط شويه من صحابه اللي كان شكلهم زيه صيع بمعنى اصح*
سيف – وايه المشكله مانا كنت متوقع عادي .. هو انتي خايفه م حاجه
ليل – مش خايفه يعني بس قلقت شويه
سيف بهزار – والله عيب ف حقي يعني قاعد جنبك وقلقانه
*هو ده السبب الحقيقي ورا تمسك سيف بأنه ييجي معاها الكامب كان متأكد انه ثائر مش هيفوت الفرصه اما ليل مازالت قلقانه*
سيف – الجو حلو اوي ف الغروب تيجي نتمشى كده ونسمع اغنيتين
ليل – ماشي جدا
*اتمشوا شويه واتصوروا كتير وقدر سيف يغير مودها وينسيها*
*عند ثائر*
أحمد – جبت الحاجه
ثائر – اه يعم هي دي تتنسي دي اللي هتروق ع الكلام
احمد – طب ايه امتى طيب عشان مش قادر اصبر
ماجد – لا اهدي ع نفسك كده مش دلوقتي هتفضحنا بليل كده والجو رايق ناخدلنا جنب ونعيش
ثائر – لا يعم مش النهارده بردو نطمن وناخد ع المكان الاول عشان لو اتقفشنا هتبقا مشكله
ماجد – خلصانه
*هل الليل وابتدت المتعه واتجمعوا كلهم حوالين النار يغنوا ويلعبوا وكالعاده كان سيف ملازم ليل من خوفه عليها وبعد ساعات م المرح*
سيف – بقولك ايه انا تعبت متعبتيش
ليل – بصراحه تعبت جدا بس القعده حلوه مش هاين عليا اقوم
سيف – طب ايه تيجي ننام شويه طيب
ليل – ماشي يلا
سيف – طيب انا جنبك هنا متقلقيش م حاجه نامي براحتك
ليل – اكيد مش هقلق وانت موجود يعني
سيف بهزار – بس بقا بتكسف .. يلا ادخلي ولو صحيتي صحيني اقفلي كويسه
ليل – اشطا
*مناموش بسهوله بس ف الاخر ناموا وطلع الصبح وسيف صحي ع صوت صراخ من ليل مفزوع وجري عليها*
_______________________________
ياترا ف ايه 🥹
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية سيفي الحامي)
