رواية مهمة حب (رحم للإيجار 2) الفصل الخامس والثلاثون 35 بقلم ريحانة الجنة
رواية مهمة حب (رحم للإيجار 2) الجزء الخامس والثلاثون
رواية مهمة حب (رحم للإيجار 2) البارت الخامس والثلاثون
رواية مهمة حب (رحم للإيجار 2) الحلقة الخامسة والثلاثون
اولا قبل الحلقة بس هعيد تاني والمرة دي هرد هنا مش في بوست لان في ناس ممكن . بوستات ردودي علي الكومنتات مش بتظهرلهم. وكمان الناس اللي في الجروبات او البيدچات اللي انا مش متواجدة معاهم .
انا وضحت وقت حلقة صدمة شهاب وتمارا.ان الڤيديو كان معمول بحرفية شديدة.كمان شهاب انصدم من اللي سمعه. كمان انتم بتقولوا كان لازم يشك في مايا انها بتوقع بينهم يشك فيها ازاي!هو عارفها من زمان ومتربي معاهاوهي عمرها ماكنت بالسوء والحقد ده.كانت انسانة هادية وكل اللي بيوصله منها انها بتحبه . عمره ما هيتخيل انها تكون بالمكر ده ولا انها تحاول تفرق بينه وبين تمارا بالشكل ده. لانها بالنسبة ليه زي اخواته چوري وكارما وكمان حلا. الكل اتربي بنفس الطريقة ومش ممكن يظن انها توصل بيها لكدة.ثم هو من غضبه والاهانة اللي حس بيها في اللحظة دي خالته يرمي الفون وماهتمش ازاي كان اتكسر او لا.
ولانه ظابط شاطر زي ما انتم بتقوله انه كان لازم يتأكد من كلام مايا. طيب ماهو لو انتم ركزتم. هو فعلا بذكاء عمل كدة لما قالها حكايته مع ملك ومهاب. وهي رداااا لكرامتها سبقت وردتله الضربة انها كانت متفقة مع مايا. فهو خلاص سمع منها اعترافها يحقق في ايه ويدور ورا مين مش فاهمة؟! وفين غباؤه ده اللي البعض بيقول عليه! مش عارفة هو الموقف ماكنش واضح ولا انتم اللي منفعلين اوي من اللي حصل
!كمان ليه مايا كدة وابوها وامها اخلاقهم مختلفة. هو مش شرط ان كل واحد اهله كويسين واخلاقهم عالية يكون زيهم والعكس. فطبيعي ان كل انسان مختلف بطبعه واخلاقه عن غيره .
كمان تمارا ليه ماقلتش لمهاب . ما انا قولت في الحلقة علي لسان تمارا. هي مش عايزة تحسس مهاب بالضعف او الهزيمة ان شهاب استغل بنته علشان يردله اللي عمله فيه. ففضلت تتحمل هي مواجهة شهاب بس يفضل مهاب في نفس قوته وماينهزمش.
ليه النكد كدة وكل الحكايات متأزمة. تمام انتم عارفين اني مش بحط حدث ولا حوار منغير هدف. وبجد لو كلكم ركزتم هتلاقوا ان كل حوار بين اي ابطال سواء كبار او صغيرن ليه هدف وبيوضح احساس او كلمة او موقف. والرواية لازم يكون ليها هدف من كل حكاية اتحكت بأحداثها ومواقفها.وتأكدوا ان في النهاية وفي ختام الرواية هتعرفوا ايه هدف كل حكاية منهم وانا كان غرضي ايه منها.
الرواية كام حلقة والناس بتتطمن انها هتخلص قبل الدراسة. ماتقلقوش هتخلص قبل الدراسة طبعاااا. لاني زي ماقولت في بداية النشر. انا مش هنشر في الدراسة لانشغالي . فالنشر هيكون في الاجازة بس.
انا كدة تقريبا رديت علي معظم الكومنتات والاسئلة ولو حد عنده سؤال تاني يسئل في كومنت وانا هرد.
اسيبكم مع الحلقة بقي .
في ڤيلا عدي
مايا كانت نازلة من فوق وسمعت هنا بتتكلم همس ومعاهم چوري وكارما وحلا .
هنا بتحاول تداري حزنها علي بنتها لانها بتحب همس وجواها جانب فرحان لصديقة عمرها.
هنا:مبروك يا همس. ربنا يتمملهم بخير .
همس بفرحة مكسورة هي عارفة ان ابنها مش زي اي عريس فرحان وسعيد. ده بينتقم من نفسه قبل ما بينتقم من تمارا.
همس :الله يبارك فيكي يا هنون. ربنا يسمع منك ويتمم بخير.
كارما بحماس: انا بجد فرحانة اوي تيمو دي عسسل انا حبيتها اوي وهي شهاب كانوا زي العصافير في الخطوبة . هاه قولولي بقي هنختار الفساتين منين.
همس بثقة: كالعادة مع نفسكم. انتم عارفين فستاني بكل متعلقاته بيوصلني لحد جناحي ومن غير ما اتعب ولا اختار.
چوري :ايوة يا هموسة انتي مين قدك. ده الملك رعد الحديدي بنفسه بيختارلك كل حاجة. مابيخلكيش حتي تشغلي بالك يا بختك بيه حبيبي بابي ده مافيش منه .
حلا : يا شيخة عينك وحشة ماتقريش عليهم . ثم مالك كدة بتتحصري هو فيه زي كوكي . ده كريم ده العشق كله.
كارما غمزتها: مابلاش انتي انتي اصلا خلاص عديتي وماحدش عارف يحصلك. فادي قلب علي رعد الحنين ومدلعك علي الاخر ولا ايه .
حلا : ماما همس تعالي نروح العيال دي عنيهم وحشة انا خايفة اروح الاقي فادي اتحول.
كلهم ضحكوا وفضلوا يتكلموا عن الفرح وشهاب وتمارا . مايا انصدمت ومش مستوعبة ان بعد كل ده شهاب بردوا هيتجوزها . يعني كل اللي هي عملته ضاع من غير فايدة . ماقدرتش تسيطر علي
نفسها . وصرخت بجنون.
مايا بغل وصريخ: فرح مين ؟! انتم بتقولوا ايه! شهاب هيتجوز تمارا بجد ازاي! ردوا عليا ازاي.
هنا بحزن قربت منها :مالك بس حبيبتي ماهم اتخطبوا . وانتي كنتي متقبلة الموضوع ايه اللي حصل بس! ماقولنا انسيه بقي وشوفي مصلحتك.
مايا ببكاء ووجع: انساه ! انساه ازاي! وبمين ! شهاب ده مش زي اي حد . انا مش ممكن اسيبه يضيع مني مش ممكن .
عدي وامير وكريم كانوا داخلين وسمعوا صوت مايا وعياطها وصريخها.
عدي بلهفة: مالك بس حبيبتي في ايه!
هنا بدموع: ارجوك يا عدي خدها وهديها دي منهارة.
مايا بصريخ: ابعدوا عني انا لازم اروحله لازم اعرف منه عمل فيا كدة ليه ! ليه سابني بعد ده كله ليه!.
عدي قرب منها بحنان:طيب تعالي معايا فوق.
مايا زقته بعنف وجريت برا الڤيلا: مش هروح في حته انا لازم اروح لشهاب لازم.
هنا بكت بحرقة:عدي الحقها ارجوك بسرعة .
عدي خرج وراها بسرعة ووراه امير وكريم .
وهنا قعدت بتعب وحزن علي بنتها.
همس قربت منها وهي مش عارفة تعمل ايه ! تقولها ايه بعد حالة بنتها دي!
همس بدموع: انا اسفة يا هنا . اكيد شهاب عمره ما كان يقصد يجرح مايا بالشكل ده. هو غصب عنه شايفها اخته .
هنا بسخرية: ويفيد بإيه الاسف. انا مش عارفة ليه القدر حاطط ولادي مع ولادك في صراح. يمكن اللي نجيوا منه بناتك لان انا ولادي قلبهم حنين مش زي ولادك. ولادك قاسين وانانين. واحد استغل حب حلا وعذبها سنين
ويادوب اول ما رمالها كلمة حلوة جريت وراه ونسيت اللي عمله فيها سنين. والتاني عمال يتفنن في جرح مايا ورايح يخطب ويتجوز. ويكسر قلبها
حلا دمعت وماقدرتش ترد علي امها في الموقف ده . لانها متدمرة بسبب مايا. بصت لهمس.
وهمس شاورتلها براسها هي وچوري وكارما يسبوها مع هنا لوحدهم.وفعلا حلا رجعت البيت وچوري وكارما طلعوا اوضهم وهما كمان
هما طول عمرهم قريبين من بعض ومايا وحلا بالنسبة ليهم فعلا اخوات.
همس قعدت جنب هنا بحزن وعتاب: انا ولادي انانين يا هنا! والله مافيه احن منهم في الدنيا. وفادي إن كان طبعه صعب او قاسي شوية فهو خلاص فاق وعايش هو وحلا في سعادة ربنا يديمها عليهم. ليه انتي مش مصدقاه ومصممة تلوميه علي اللي فات. وبعدين شهاب طول عمره بيعتبر مايا اخته وبس . وعمره ما وعدها ولا عشمها بحاجة. هو انتي يا هنا ليه اتجوزتي عدي مش حد غيره . علشان حبتيه وماحبتيش غيره مع ان اللي حبوكي كتيير بس انتي اختارتي عدي برغم علاقتكم اللي كان فيها مشاكل في البداية وبرغم كدة ماقدرتيش تحبي ولا تتجوزي غيره. ليه بتلومي شهاب دلوقتي! شهاب حب تمارا وماقدرش يحب مايا. فين جرمه! فين ذنبه! فين غلطه ! قوليلي انتي هو غلط في ايه ؟ولادي عملولك ايه علشان تكرهيهم كدة؟هنا انتي اختي وصديقة عمري. بس من زمان وانتي بتكرهي فادي ودلوقتي بقي كمان شهاب. ليه بس وانا عمري ما زعلت حتي من حد من ولادك ولا كرهته. حتي مايا برغم اللي عملته بتصعب عليا.
هنا بدموع: وهي عملت ايه! بنتي مجروحة وتعبانة. بنتي كانت بتموت في المستشفي وهما شهاب وكانت هتتجنن عليه وهو مسافر كانت كل يوم تسألك عنه . بنتي حبته حب عمره ما هيلاقيه ولا يعوضه. ولعلمك هو الخسران. انا بنتي تستاهل اللي احسن منه.
همس اتنهدت بيأس هنا زي كتيير من الامهات . مش شايفة غير بنتها وبس : انتي واضح انك تعبانة وانا هسيبك ترتاحي وبلاش نتكلم في الموضوع ده. عن اذنك.
قامت همس تمشي وهنا وندهت عليها.
هنا بحزن:همس.
همس بصتلها بعتاب: نعم.
هنا حضنتها وبكت: اسفة مش قصدي ازعلك بس قلبي بيتقطع علي بنتي . انتي ام وحاسة بيا . انا نفسي تفرح نفسي.
همس ضمتها بحنان: ولا يهمك احنا اخوات وانا مقدرة اللي انتي فيه ومش ممكن ازعل منك. وانا والله بدعيلها ربنا يبعتلها اللي بحبها وتحبه وينسيها شهاب وتعيش حياتها في سعادة.
هنا اتمسكت بيها :خاليكي جنبي محتجالك.
همس: حاضر انا جنبك مش هسيبك . بس انتي اهدي شوية.
عدي حصل مايا هو وامير وكريم ووقفها. ومسك ايديها
عدي : استني يا بنتي تعبتيني . ارجوكي اهدي شوية.
مايا بهستيرية وضياع: لا انا لازم افهم هو عمل فيا كدة ليه ! ليه بعد كل اللي عملته علشان يسبها لسة هيتجوزها .
عدي بصلها بشك حاسس انها مخبية حاجة: كريم خد امير وارجعوا البيت.
كريم بقلق علي مايا: ايوة يا بابا بس دي منهارة لازم نفضل معاك.
عدي بعصبية وامر:قولت ارجع انت واخوك وطمن والدتك.
كريم ماحبش يعصب عدي اكتر من كدة. اخد امير ورجع البيت .
عدي بص لمايا بقوة: ممكن تفهميني معني كلامك تقصدي ايه باللي عملتيه علشان يسبها . انتي عملتي ايه؟!
مايا بصتله بغضب : انا مش عايزة اتكلم في اي حاجة من فضلك ابعد عني عايزة اروحله.وحاولت تمشي.
عدي بغضب شدها من ايديها وضربها بالقلم: لما اكون بكلمك واسألك تردي عليا وماتمشيش وتسيبيني . فاهمة ولا انتي خلاص دلعي ليكي جرأك عليا.
مايا بصدمة : انت بتضربني . انت عمرك ما مديت ايدك عليا!
عدي اخدها وركبها عربيته بقوة وركب هو كمان وطلع بالعربية. من غير ما يكلمها. واخدها علي مكان هادي وقعد معاها
عدي بحزن: انتي لازم تفهميني انتي ايه اللي جرالك. ليه بقيتي شرسة كدة !
ليه دايما بتهاجمي اي حد يقف قصادك حتي انا وأمك !
انتي زي ما تكوني واحدة تانية غير مايا بنتي . ايه اللي حصل؟
مايا بدموع : انا عمري ماكنت وحشة . انا حبيت بس. حبيت شهاب واتمنيت يبقي ليا ويحبني. غلطت في ايه!
ذنبي ايه اعيش بوجعي وجرحي منه!
ليه ماحبنيش يا بابي ليه !
بابي هو انا وحشة اوي كدة!
فيا ايه غلط !
قولي انت ليه حب تمارا وانا لا! ليه بس نفسي اعرف.
عدي بهدوء و حزن عليها اتنهد: السبب بسيط يا حبيبتي. هو هو نفس السبب اللي مخليكي في حالتك دي.
واللي ماخلكيش تحبي غيره .
زي ما انتي حبتيه هو وبس ومافيش اي راجل غيره عارف يخليكي تحبيه. هو كمان مش بإيده حب تمارا وهي حبته. وانتي لازم تنسحبي لازم تداوي جرحك. وتشوفي انسان يحبك وتحبيه بجد. ليه قافلة باب قلبك في وش أنس. أنس انسان جميل دكتور محترم وليه مستقبل . بيحبك وانا واثق من كدة. ليه مصممة تعيشي في وهم اسمه شهاب. جربي وافتحي قلبك لأنس.
مايا بتأنيب لنفسها: حتي ده خلاص مابقاش ينفع. انا ضيعته هو كمان . جرحته زي ما انجرحت من شهاب. انا وحشة وحشة اوي .
عدي بدهشة :انتي مخبية عني ايه! اتكلمي يا بنتي فهميني ايه اللي حصل!
مايا غمضت عنيها بدموع وبدأت تحكي لعدي كل اللي حصل من يوم رهانها مع تمارا. لحد. ماجرحت أنس.
عدي كان بيسمعها وهو مصدوم مش مصدق كل اللي بنته بتحكيه. مش قادر يستوعب ان دي مايا بنته الرقيقة البريئة. عمره ما تخيل انها ممكن تكون بالشر والحقد ده.
معقول دي بنته اللي رباها مش فاهم ولا مسوعب. خلصت كلامها وهو كان في قمة صدمته. وماسك رأسه بإيده وحاسس انه في كابوس.
مايا خلصت وهي بتبكي بحرقة : انا مش عارفة عملت كل ده ازاي. انا كل اللي كنت بفكر فيه هو شهاب وبس. كنت عايزاه يسبها ويبقي ليا بأي طريقة وبأي شكل.
عدي رفع راسه وبصلها بزهول وعتاب: انتي تعملي كدة! انتي مايا بنتي اللي ربتها بإيديا دي تعمل كدة!
ده انا كنت رافض اشتريلك كلية واحد محتاج علشان ما استغلش حاجة انسان واخد منه حته منه. وفضلت ادعي ربنا ينجيكي ويبعتلك اللي يخفف آلمك وربنا بعتلنا أنس وبفضل ربنا ثم هو انتي بقيتي عايشة لحد دلوقتي.
تقومي يوم ماربنا ينجيكي تأذي الناس بالشكل ده. ذنبهم ايه شهاب وتمارا تعملي فيهم كدة! وأنس هان عليكي الانسان اللي ربنا بعتهولك يمحي آلامك ووجعك ووقف جنبك وقت مرضك وماسبكيش. وحبك بكل صدق واحساس. تجرحيه بالشكل ده! تستغليه علشان تنتقمي من اخته !
ولا مهاب كنتي عايزة تشاغلي راجل قد ابوكي !
طب افرضي كان ليه في السكة دي.وكمل معاكي كنتي هتعملي ايه! كنتي متخيلة ان راجل زي مهاب بدهائه ده . هيسيبك تعملي فيه زي أنس. غلطانة ده كان هيبهدلك وانتي كنتي هتضيعي نفسك. وتضيعينا معاكي.
ليه يا بنتي كدة بس ليييه ! ؟
مايا تعبت من العياط: انا تعبت نفسي اموت وارتاح . يارتني موت في العمليه . وماعشتش كل ده.
عدي بحزن : شهاب لازم يعرف كل حاجة. لازم يعرف ان تمارا مظلومة. لازم تكفري عن غلطتك. وتحاولي ترجعي أنس لانك مش هتعوضيه .
مايا بجنون : لا لا لا . مستحيل شهاب يعرف حاجة مستحيل. وبدموع ورجاء. ارجوك يا بابي بلاش تخليه يشوفني وحشة بالشكل ده. ارجوك .. حتي لو كان خلاص ضاع من ايدي بلاش تخليه يكرهني. وهي كفاية هتتجوزه برغم كل ده. كفاية عليها وجودها معاه . وهو مادام صمم يتجوزها يبقي سامحها واللي عملته كله ما أثرش فيه. يبقي بلاش تعمل فيا كدة ارجوك يا بابي ارجوك. انا بنتك بلاش اهون عليك بالشكل ده.
عدي دمع علي حالها . للدرجة دي الحب يعمل فيها كدة. ضمها لحضنه بحزن وحيرة
. حيرة قلب أب مش هاين عليه اهانة بنته قصاد اي حد وكفاية عليها وجعها وحزنها . وجرح كبيير جواها. هتعيش بيه.
ومابين عقله وضميره. اللي عارف ان فيه قلبين مجروحين بسبب بنته. وهو عارف الحقيقة وساكت.
عدي : يارب اعمل ايه بس. اخدر مين فيهم قلبي ولا ضميري.
مايا بدموع في حضنه: ارجوك لو بتحبني بلاش تكسرني قصادهم وحياتي يا بابي بلاش.
عدي بحيرة :ماتحكيش لحد اي حاجة فاهمة. حتي امك.
مايا : حاضر يا بابي . انا عايزة اروح . عايزة انااام. تعيااانة اوي يا بابي اوي.
………………………………..
مرت الايام بشكل بطئ علي قلوب وسريع علي قلوب تانية. بطئ علي قلوب عاشقة ومستنية لحظة تجمعهم للابد . مهاب وچودي . ومؤمن وشيري بيعدوا الايام والساعات والثواني لحد معاد فرحهم.
وشهاب وتمارا .حاسين ان الوقت بيجري بسرعة لانهم مش متخيلين ازاي اليوم اللي اتمنوه سوا هيجي وهما بدل ما كانوا عشاق بقوا اعداء.
مايا فضلت حبسة نفسها في اوضتها لا بتكلم حد ولا بتشوف حد. وعدي ماقدرش يخلي ضميره وعقله يغلبه قلبه وأبوته. واختار الصمت. وتخيل ان جواز شهاب من تمارا برغم اللي عرفه
انه سامحها ومالوش لزوم يكسر بنته اكتر من كدة.
چنا ومروان اتفقوا علي كتب كتابهم في ڤيلا أكمل في هدوء. لان اكمل رفض اي فرح . لانه ماعندوش استعداد يواجه نظرات اي حد ولا سؤال اي حد. ليه چنا اتجوزت مروان وهو متجوز واكبر منها .
في يوم كتب كتاب چنا ومروان في ڤيلا أكمل التهامي . كان الكل موجود رعد وهمس وريما وشهاب لانه صاحب مروان. وبرغم حزنه علي عمته الا انه عزر مروان وحاسس بيه. وبحبه لچنا ومش قادر يلوم عليه. وكمان أكمل وتسنيم. و حمزة وفتون . واتكتب كتاب چنا ومروان. چنا كانت جواها فرحة بس مش قادرة تخرج من الحزن اللي في المكان . دمعت بحسرة علي اليوم اللي اتمنت تفرح فيه بأقصي ما عندها. بس لاسف هي اختارت الوضع ده. واختارت يكون هو ده شكل يوم فرحها .
أكمل كان بيبص لمروان بغضب وعتاب ولوم. وماكنش طايق ولا مستحمل انه يفضل ماسك ايده بالشكل ده. وكام غضبه لحد ما المأذون خلص العقد . بعد كتب الكتاب أكنل شد ايده من ايد مروان بعنف . وقام وخرج برا الجنينة. تسنيم زعلانة علشانه بس مش عايزة تكسر فرحة بنتها اكتر ماهي مكسورة. وقفت جنبها وابتسمت.
تسنيم: مبروك يا حبيبتي .
چنا بدموع: الله يبارك فيكي يا مامي.
مروان باس ايد چنا وابتسم وبهمس: مبروك حبيبتي.
چنا ابتسمت : الله يبارك فيك حبيبي. بس سيب ايدي علشان ريما.
مروان بص لريما ولقي عيونها عليه . بتبصله بقهر وانكسار. وعنيها علي ايده اللي ماسكة ايد چنا ودموعها نزلت غصب عنها. اتنهد بتعب من الوضع اللي كل يوم بيصعب اكتر من الاول.
شهاب قرب من مروان وخبط علي كتفه بأسف: مبروك يا صاحبي.
مروان قام وحضن شهاب: الله يبارك فيك يا بوب عقبالك هانت خلاص.
شهاب اتنهد بسخرية: عندك حق هانت.
مروان : مالك يا شهاب انت بقالك فترة متغير. ايه اللي حصل! ؟
چنا قامت : عن اذنكم هخرج لبابي.
مروان: اتفضلي حبيبتي. وبص لشهاب . ماتقول مالك يا ابني قلقتني.
شهاب ابتسم بحزن: خاليك في عروستك بس ولما تخلص شهر العسل هنبقي نقعد واحكيلك كل حاجة.
مروان بص لريما ورعد: وهو ابوك هيخلي فيها عسل!
شهاب بص لريما :معلش. هو غصب عنه. انت عارف هو بيحب ريما ازاي. كمان هي حالتها صعبة. مش شايف شكلها عامل ازاي!
مروان بصلها بحزن: عارف وشايف. بس صدقني ده اهون كتيير من انعا تعرف الحقيقة. مش هقدر اوجعها اكتر من كدة.
شهاب : اللي حصل حصل. ياللا خد عروستك وامشي. وكل حاجة بتتنسي مع الوقت.
رعد قرب منهم وبنظرات باردة وفاترة : مبروك .
مروان بعتاب: الله يبارك فيك. تعبت نفسك وجيت انا عارف انك مشغول يا صاحبي.
رعد ابتسم بإستخفاف: كان لازم احضر الاتفاق للنهاية. ولا ايه يا صاحبي.
شهاب شايف نظرات السخرية والتحدي بينهم: احممم. بقول ايه ياللا بينا يا رعد باشا. ريما مش هتقدر تفضل اكتر من كدة.
رعد : عندك حق. انا هاخد همس وريما واروح. عن اذنكم.
ريما قربت من مروان بتحاول تداري دموعها والكلام تقيل علي لسانها مش قادرة تباركله انه هينام في حضن غيرها وهي عارفة وبتبارك كمان : مممبروك .
مروان بحنان مسح دموعها : ليه الدموع دلوقتي بس. مش ده كان برضاكي .
ريما رمت نفسها في حضنه وبكت: غصب عني . مش متخيلة انك هتكون في حضنها . زي ماكنت معايا مش قادرة ……. والله انا لو حجر هينطق. انا بموووت . بموووت.
مروان مش عارف يفرح لجوازه من چنا ولا يحزن علي ريما وحالها . قلبه مش متحمل يشوفها كدة. ضمها بقوة: انا الليلة هروح معاكي . مش هسيبك.
ريما رفعت راسها من حضنه وبصتله بفرحة: بجد هتنام في حضني انا!
مروان ابتسم: اه حبيبتي. الدنيا مش هتطير. وچنا خلاص بقت مراتي. النهاردة بكرة مش هتفرق.
ريما بقلق: طططيب وهي هتوافق!
مروان: چنا طيبة وبتحبك وفاهمة الوضع. ومش هتزعل.
رعد قرب منهم: انت متأكد انك تقدر تعمل كدة!
مروان بصله بغيظ: ايوة اقدر . هروح چنا شقتها وارجع لريما لاني اظن ماينفعش اقول لأبوها
خالي بنتك عندك لبكرة.
رعد بسخرية: لا اصيل طول عمرك. وبص لريما وبحنان. حبيبتي لو احتاجتي اي حاجة كلميني فاهمة.
ريما ابتسمت: ماتقلقش. انا هبقي كويسة.
في الجنينة . أكمل واقف بيبكي مش عايز حد يشوف دموعه. چنا قربت منه وحطت ايديها علي كتفه وهي حزينة وبتبكي. لفلها وغصب عنه ماقدرش يمنع نفسه يضمها بوجع.
أكمل : مش قادر افرح ولا قادر احزن. مش عارف اعمل ايه في الموقف ده. كان نفسي يوم فرحك اسلمك لعريسك بإيدي وانا سعيد وقلبي بيرقص. وانا شايفك بالفستان الابيض. مش قادر افرح وانا شايفك بتتجوزي زي اللي عاملة غلطة. ولا اللي مطلقة. مش ده اليوم اللي اتمنيته مش هو ابداااا .
چنا اتعلقت بيه بقوة وبكت:ارجوك كفاية علشان خاطري بقي مش متحملة اكتر من كدة . انا بتقطع والله وانا شايفاك كدة.
أكمل خرجها من حضنه وضم وشها بحنان: مبروك يا حبيبتي. اتمني يقدر يسعدك. وتكوني اخدتي القرار الصح.
چنا مسحت دموعه بإيده برقة وابتسمت: كنت عارفة اني مش ههون عليك . ماتباركليش. وحياتي سامحني . انا حبيته وهو كمان حبني ومتأكدة انه هيسعدني اكتر ما انت بتتخيل.
أكمل باسها من جبينها: اوعي تفتكري اني علشان مش راضي عن جوازك منه. اني بعتك ومايهمنيش امرك. لو في يوم زعلك هو ولا مراته ولا حتي رعد. تجيني . تيجي لابوكي سندك الحقيقي. وانا اقف في وشك الكبير فيهم علشانك. اوعي تتخيلي اني هسيبهم يبهدلوكي ولا يكسروكي. انتي هتفضلي چنا التهامي. استقوي بأبوكي فاهمة.
چنا باست ايده بدموع وابتسمت بحب : وانا متأكدة من ده. ربنا يخليك ليا وتفضل سندي وحمايتي طول العمر .
مروان قرب منهم بهدوء: احممم. چنا حبيبتي ياللا علشان نروح.
أكمل بصله بغل وقرب منه وهو بيشاور علي صدره : لو فكرت تجرحها ولا تقول اهي نزوة ولما تزهق ترميها بعد ما مراتك تاخد حته منها. قسما بربي اقتلك وارمي جتتك للكلاب السعرانة ولا اخد فيك يوم حتي علشان وقتها اللي زيك مايستهلش غير الموت.
مروان اتنهد بنفاذ صبر: يوم نا اعمل كدة ابقي اقتلني ارتاحت. انا عمري ما هسيبها دي خلاص بقت مراتي ومستحيل اتخلي عنها.
چنا حضنت أكمل: هتوحشني اوي .
أكمل ضمها بخوف: وانتي هتوحشيني اوي اوي. خدي بالك من نفسك.
چنا ابتسمت: حاضر .
تسنيم وحمزة وفتون قربوا من چنا .
تسنيم بدموع: خدي بالك علي نفسك يا حبيبة ماما هتوحشيني.
چنا حضنتها : وانتي كمان يا مامي هتوحشيني اوي . خدي بالك من كيمو وحياتي.
حمزة حضن چنا : مبروك حبيبتي الف مبروك.
چنا ابتسمت: الله يبارك فيك حبيبي. اسفة خالتكم تأجلوا سفركم.
حمزة ابتسم: ولا يهمك اصلا الحفلة لسة بكرة. واحنا معانا وقت . بس عمري ماكنت هضيع فرحك ابدااا.
فتون ابتسمت وحضنت چنا:مبروك يا چنا. البيت هيبقي وحش من غيرك.
چنا : البيت جميل بيكي حبيبتي. ارجوكي خدي بالك منهم.
فتون: حاضر ماتقلقيش.
حمزة قرب من مروان وبقوة: چنا مش هينة ولا مالهاش اهل. انا مادهلتش لان بابا موجود . لكن لو في يوم اذتها مش هرحمك. فاهم.
مروان: ماتخفش چنا في عنيا. ياللا يا چنا . عن اذنكم.
مشي مروان وچنا واكمل وتسنيم وفتون وحمزة فضلوا نظرهم متعلق بيها لحد ماركبت عربية مروان.
مروان طبعا لقي ريما قاعدة جنبه . وچنا ركبت وراه. وصل ريما بيتها واخد چنا لشقتها ودخلها واول ما دخل حضنها بقوة
مروان:اخيراااا بقيتي مراتي يا حبيبتي.
چنا بسعادة: ده يوم اتمنيته كتيير اوي اوي.
مروان بصلها بحب: انا مش مصدق.
چنا : لا صدق بعد كل اللي حصلنا صدق.
مروان بتردد: احممم. هو انا ممكن اطلب منك طلب!
چنا :اؤمر حبيبي.
مروان : ااانا وعدت ريما ابات معاها الليلة . هي حالتها صعبة اوي .
چنا ابتسمت وهي بتحاول تداري حزنها: ططبعا. مافيش مشكلة عندك حق. هي اكيد محاجالك اكتر مني الليلة.
مروان ابتسم: كنت متأكد انك مش هتخيبي ظني. واوعدك من بكرة هخدك ونسافر ونقضي اجمل شهر عسل. لوحدنا بعيد عن اي حد.
چنا : وانا متأكدة اننا هنكون اسعد اتنين. والايام كتيير. ياللا. روحلها بقي وانا هنام. صدعت من العياط.
مروان قرب منها وباسها بشغف كبيير اتمناه من يوم ماشافها :علي عيني اسيبك في اللحظة اللي بقيتي فيها ملكي. بس اوعدك اوليلة لينا مش هتنسيها ابداااا.
چنا اتنهدت: انا متأكدة
مروان : بحبك.
چنا : بحبك.
مشي مروان وراح لريما . ولما وصل لقاها لابسة روب دهبي رقيق وشكلها اكنها هي اللي عروسة . ومحضرة عشاء وشموع. ومشغلة ميوزك هادي ورومانتك. بصلها بدهشة.
مروان:عارفة اخر مرة عملتي فيها كدة كانت امتي!
ريما ابتسمت وقربت منه وحضنته واخدته يرقص معاها: ارجوك بلاش كلام في اللي فات. انا الليلة عايزاك ليا ومعايا وبس. عايزة احس انك في حضني.
مروان غمض عنيه واتنهد: ليه فوقتي متأخر كدة!
ريما بصتله بأسف: لسة فيه وقت . چنا مش هتفضل مراتك العمر كله. هي لما تحمل هتطلقها مش كدة. انتي هترجعلي مش هتبعد.
مروان اتنهد بتعب: مش قولتي بلاش نتكلم في حاجة. يبقي استمتعي بليتك وبلاش اسئلة.
ريما غمضت عنيها ورقصت في حضنه . وهي بتتمني النهار مايظهرش ولا يروح لچنا ويسبها.
………………………………..
طلع النهار ومروان راح لچنا واخدها وسافر تايلاند يقضي معها اول ايامهم سوا. وحمزة وفتون سافروا مراسي علشان حفلتهم.
وجه يوم فرح شهاب &تمارا. مهاب&چوري. شيري&مؤمن.
في قاعة اوتيل شيك جداااا
كان العرسان الثلاثة واقفين وسط الزفة ومستنين عرايسهم وهما نازلين من فوق وكل واحدة ايديها في ايد باباها. بس مهاب كان في ايده بناته الاتنين .
والد شيري سلمها لمؤمن بسعادة ودموع :خالي بالك منها يا مؤمن ماليش غيرها.
مؤمن اخدها منه وضم ايديها وباسها بحب ورقة وابتسم وهو بيبص في عنيها: اوعدك احبها واسعدها العمر كله. دي سمارتي روح قلبي.
شيري بسعادة: مبروك حبيبي .
مؤمن بفرحة: مبروك عليا انتي يا سمارة. اجمل واحلي عروسة شافتها عنيا.
مهاب سلم چودي لمهاب الصغير وابتسم بحزن مهما كان فرحان مش سهل عليهةيسلم بناته الاتنين في يوم واحد ويبعدوا عنه.
اللواء مهاب:خد بالك منها يا واد انت . واوعي تاكلها . انا عارف انت محروم والبت مش هتتحملك .
مهاب حضن جودي بقوة وسعادة : انت بتقول فيها دي مش هيفضل منها حاجة هفصصها للصبح.
چودي ابتسمت وحضنته: اخيرا حبيبي اتجوزنا .
مهاب : اااااه. دانا هكسر الدنيا الليلة مبروح يا احلي چودي في الدنيا. بس بقولك ايه. عايزك الليلة اسم علي مسمي. عايزك جبل علشان انا الليلة هعوض حرمان سنين .
اللواءمهاب: ولا براحة علي البت مش قدك . اهدي كدة بدل نا اخدها في ايدي.
مهاب مسك ايد چودي بقوة: تاخد مين ده انا ماصدقت تقولي اخدها. انسي يا باشا.
اللواء مهاب ابتسم لفرحتهم واخد تمارا وراح لشهاب. وبصله بقوة : عارف انا بديك ايه الليلة . دي روحي ونور عيني. حافظ عليها سواء برضاك او غصب عنك. علشان مافيش قصادك حل تاني.
شهاب كان في قمة حزنه . اليوم اللي اتمني انه يجي من اول ماقلبه دقلها . جه بس لما جه كان قاسي اوي ومؤلم. بص في عنين تمارا بحزن وبلع ريقه بمرار.
شهاب: ماتقلقش . دي في عنيا .
مهاب سلمه ايد تمارا وشهاب مسك ايديها وغصب عنه ضمها بقوة. كأنه ماصدق بقت مراته وامتلكها . لاحظة داب جواه شعور الانتقام وقلبه دق بفرحة انه شايفها بالفستان الابيض. ياااااه قد ايه جميلة وعيونها تسكر. بس شاف في عنيها حزن كبيير. مش دي نظرة التحدي والعناد اللي كان متخيل يلاقيها بتستقبله بيها.
شهاب بصلها بحب غلب علي نظرته:مبروك .
تمارا كانت بتبص في عنيه وهي جواها اعجاب لا ارادي بوسامته في بدلة فرحهم . قد ايه وسيم وملامحة جميلة. وشافت في عيون كتيير اعجابهم بيه وبرجولته اللي طاغية علي وسامته. واقف اكنه اسد منتظرها علشان تكون الملكة بتاعته.. اتمنت انها تتعلق في حضنه وتضمه بكل حبها ليه . وهي سعيدة بإنها بقت مراته. قد ايه استنت اليوم ده. قد ايه اتمنته. في وعيها وفي احلامها. لاحظة هي كمان نسيت جرحها منه واتمنت انه مايسبش ايديها ابداااا. لا كمان ياريته يضمها لحضنه حتي لو غصب عنها.
الكل كان شايف نظراتهم لبعض اللي كلها احاسيس ماحدش فاهمهة ولا حاسس بيها. هما مبتسمين لشكلهم الرومانسي. اللي يوحي ان دول اتنين دايبين في بعض. واكنهم مش مصدقين اللحظة دي.
تمارا وهي باصة في عنيه ومش شايفة جبروته المعهد ولا انتقامه منها . شايفة حنين وحزن دمعت غصب عنها بس قدرت ماتنزلش دموعها: مبروك عليك انت.
همس قربت من شهاب ووشوشته: احضنها. علشان الناس.
شهاب اكنه لقي اللي يشجعه علي الخطوة دي . ضمها لحضنه بقوة وهو بيتمني يرجع الوقت ومايعرفش حاجة ولا يحصل اللي حصل. تمارا بصت لمهاب اللي بيصلهم بإهتمام ومش عايزة تلفت نظره لحاجة. ضمت شهاب بقوة وهي كمان بتتحجج بننفس حجته ابوها والناس..
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية مهمة حب (رحم للإيجار 2))
