رواية كسرة قلوب الفصل الثاني عشر 12 بقلم حبيبة مصطفى
رواية كسرة قلوب الجزء الثاني عشر
رواية كسرة قلوب البارت الثاني عشر
رواية كسرة قلوب الحلقة الثانية عشر
♡ البـارت الثـاني عـشر ♡
نيرة : لا إنت بتعمل كده عشان تضايقني
زين : لا والله أنا مش طفل أوي كده…أنا بعمل كده عشان معجب بورد و اساسًا قبل ما تيجي أنا و ورد قررنا ندي علاقتنا فرصه يعني الموضوع مش ليه علاقه بيكي
نيرة حضنته : انا لسه بحبك
ورد من الخلف : نيييرة
زين وقف وقال : انا معملتش حـ
ورد بمقاطعه : عارفه يا زين…انا واثقه فيك لكن مش واثقه في اللي حواليك
نيرة : عادي يعني محصلش حاجه
ورد : والله !…هو انتي شايفه انك تحضني جوز اختك دي مش فيها حاجه…..بصي يا نيرة احسنلك تبعدي عن جوزي انتي فاهمه عشان ساعتها انا اللي هقف قصادك والله..يلا يا زين
« مـسكـت ايـد زيـن و ذهـبت »
زين بسعاده : جدعه
ورد : وانت فرحان ليه..كان عاجبك الحضن
زين بإبتسامه : لا والله
ورد بضيق : و حضرتك كنت قاعد معاها ليه بقي
زين : يعني لاقيتها قاعده لوحدها فقولت اعرف مالها
ورد : وانت مالك انت قاعده لوحدها ولا قاعده مع عفريت ولا انت بقي حنين و اي حد بيكون لواحده بتروح تواسيه
زين بإبتسامه : لا طبعًا
ورد : هو انا بقول نكت
زين بإبتسامه و استفزاز : لا
ورد بتريقه : ينفع حضرتك تشرفنا و تقولنا ايه سر الإبتسامه و السعاده اللي علي وشك طيب
زين بضحك : فرحان عشان اضايقتي وكده
ورد : لا مضايقتش….انا بس كنت بقول ان كده مينفعش
زين : بلاش شغل الكدابين ده….قوليلي اه يا زين مضايقه عشان شوفتك معاها فأنا هقولك خلاص يا ورد ماشي وبعدين فيها ايه مش همسكها عليكي يعني
ورد بعند : لا يا زين مضايقتش
زين بعند اكبر : طب خلاص هروح اشوفها هيا مضايقه ليه
«ذهـب خـطوتـين فـمسكت يـده وقـالت بعـصبيه خفيفة»
ورد بتسرع : اااه يا زين اضايقت و اقولك علي حاجه كمان غيرت و هفضل اتضايق و اغير لو شوفتك واقف معاها او مع واحده تانيه عمومًا
زين بسعاده : كان من الأول…بس مكنتش متوقع انك تكوني غيوره كده هاااه
ورد : انا ايه اللي خلاني اتكلم
زين : بس يا غيوره بقي عرفنا خلاص انك بتغيري عليا و مهتمه بيا
ورد ذهبت خـطوتين : يااارب الصبر
ذهب زين خلفها : تعالي يا غيوره هنا متتقمصيش
« نتـرك زيـن و ورد و مشـاكسـتهم كالأطـفال و نـذهب إلي شـخص أخـر قـرر الإعتـراف »
أسـر خـبط علي الباب وقال : ازيك يا عمي
سليم والد زين : اسر تعالي يا حبيبي عامل ايه
اسر جلس بجانبه وقال : انا الحمد لله….كنت عايز اتكلم معاك في موضوع
سليم : قول يا حبيبي معاك
اسر : ااا….حضرتك عارف اني كذا مره وضحت اني معجب بأسيا بنت عمي بس النهارده جاي اطلبها منك
سليم ابتسم وقال : بص يا اسر هو انا مهما ألف و أدور مش هلاقي احسن منك لأسيا فمن ناحيتي متقلقش خالص عشان انا موافق بس الكلمه الأخيره هتبقي لأسيا فهقولها و هرد عليك ماشي
أسر : ماشي يا عمي
« عـلي السـفرة »
ورد : اوعي تنسي الدوا يا سعدو بعد الغدا
الجد سعد : حاضر يابنتي
الأب سليم : أسيا
أسيا و هي تأكل : نعم يا بابا
سليم امام الجميع : اسر طلب ايدك وانا موافق رأيك ايه
وقـف الطـعام في حـلقها : ككححح كككحح
سندس والدتها : اشربي مااايه….في ايه يا سليم حد يقول خبر زي كده في وقت زي كده
سليم : قولت أقولها قدامكوا عشان نسمع الرد كلنا
أسيا قالت بخجل : احمم…من ناحيتي انا موافقه
اسر بسعاده : بجد
ورد : اخيراً يا ولاد هنحضر فرح بقي و فساتين يييسس
الأب سليم : بس إيه رأيك يا توفيق
توفيق : والله يا سليم انا فرحان و موافق طبعًا
الجد سعد : كده الكل موافق
زين بعند : بس انا بقي مش موافق
ورد : متبقاش محطم السعاده بالله عليك فكرني لما كلنا نبقي متفقين علي خروجه و تيجي صاحبتي البارده تقول لاااا مش موافقه
زين : يعني قصدك ان انا بارد
ورد : هو انا قولت انك بارد
زين : ما انتي بتقولي فكرني بصحبتي البارده يبقي ايه
ورد : بقول صحبتي مش زين
زين : بس بتقولي فكرني يعني انا بارد زي صاحبتك
ورد : هو انت بتخليني اقول كلام انا مقولتهوش
زين : والله ! يعني قصدك اني كداب
ورد : وانا مقولتش انك كداب
الجد بهدوء للعيله : ششش اتسحبوا براحه و سيبوهم زي قط وفار كده يعاندوا في بعض
رويه : دول كده هيولعوا في بعض
الجد : قوموا براحه
« و بالفعل صعد الجميع الي غرفته حتي نيرة »
زين : معني كلامك ان انا كداب
ورد : انت اللي مش فاهم طريقه كلامي
زين : اااه يعني قصدك ان انا غبي و مبفهمش
ورد : ثانيه بس وانا قولت امتي انك غبي بقي انت بتقولني كلام مقولتوش
زين : ااااه معني ايه كلامك ده بقي
ورد : بص انت عايز تتخانق وانا مبحبش جو الخناق ده
زين : ايوه يعني قصدك اني انسان نكدي و بحب الخناق
ورد : واناااا قولت امتي انك نكدي
زين : ما ده معني كلامك
ورد : جدي هو انا…..ايه ده ! … هما راحوا فين
زين : طفشوا منك
ورد : والله ! … يعني انت قصدك اني انسانه ممله عشان كده قاموا
زين : وانا مقولتش كده
ورد : معني كلامك كده
زين : شوفتي بقي انها بضايق
ورد بإبتسامه : خلاص حصل خير
زين : يلا نطلع احنا كمان
« عـلي السـلم »
ورد : بس انت محطم السعاده بجد
زين بإبتسامه : يعني انا نكدي
ورد بضحك : يوووه بقي هنعيد الأسطوانه تاني
زين بإبتسامه : خلاص خلاص
« بـعد يـوم لطـيف ممـزوج بالـسعاده ذهـب الجـميع في ثبـات عـميق »
♡ فـي الصـباح و خـصوصًا عـلي الـسفرة ♡
نيرة : اا…مخنوقه شويه فقولت اخرج اتمشي
سمر : براحتك يا نيرة
ورد و زين : صباح الورد
« جلـسوا عـلي السـفره »
نيرة : تمام انا ماشيه انا
« ونظـرت لزيـن»
زين : ورد معلش هاتي الجبنه دي كده
ورد و هي تمضـغ الطعام : اتفضل
نيرة : احممم و ممكن اتأخر
زين : هاتي الطبق ده كده كمان
ورد : يا صبر…اتفضل…تحب أأكلك
زين نظر لها و ابتسم : معنديش مانع
علي : ايه يا نيرة مش هتمشي
نيرة : اه اه ماشيه اهو
« وخـرجت »
ورد : اوعي تنسي يا جدو العلاج و انت كمان يا بابا
الاب سليم : حاضر يابنتي
زين : الحمد لله…..يلا يا ورد
ورد : طب انت شبعت انا لسه
زين : ناقص تاكليني
سندس : في ايه يابني ما تسيبها اما تكمل أكلها
ورد وقفت وقالت : لا يا أمي شبعت….اساسًا ده خايف انه يصبر شويه يبقي شجره
زين بإبتسامه : متشكرين بس انا بتكلم عشان جامعتك….الساعه ٩ ونص يا ابله و المفروض تبقي ١٠ هناك
ورد بتذكر : ااااه صح….معلش ظلمتك
زين بتمثيل : لا لا بعد ايه
« ذهـب إلي الخارج »
ورد ذهبت خلفه : اوعي تقولي انك زعلت…زييين….زينووو
زين وقف فجأه أمام العربيه : ايييه
ورد : زينووو….حلوو صح
زين بإبتسامه : اه حلو « فـتح باب العربيه » يلا اركبي
ورد : شكراً
« عـند نيـرة »
نيرة : مش لازم معاد عشان ادخل…قولتلك قوليله نيرة برا
السكرتيره : مش هينفع والله
نيرة بزعيق : هو ايه اللي مش هينفع…ما انا كده كده مش همشي غيررر امااااا اشوووفه
خرج وقال : في ايييه…..نيرة؟!
نيرة : اااه نيرة
« زقـته ودخـلت إلي مكتـبه…دخـل خلفـها و أغلق بـاب مكـتبه »
نيرة : هااه سمعاك
لؤي : نعم؟
نيرة : ايه اللي نعم…بقولك سمعاك يعني برر اللي انت عملته
لؤي : وانتي مين عشان ابررلك ان شاء الله
نيرة : والله؟…طب بص بقي التصاميم تكون قدامي انت فاهم و إلا
لؤي : وإلا إيه…لا ما أنتي لو عيزاني أخاف بقي و الشغل ده يبقي انتي غبيه و عقلك لسه مستوعبش ايه اللي حصل
نيرة : ما هو للأسف عقلي أستوعب و كنت غبيه عشان ساعدتك من الأول و سيبتك تضحك عليا فأنت بقي اللي لو فاكرني راجعه أقولك تعالي نرجع لبعض تبقي انت اللي غبي
لؤي : والله…ومين قالك اني بفكر اني ارجعلك…انا اساسًا كنت معاكي من الأول عشان التصاميم مش عشان جمالك يعني…انتي اللي مغفله و اتضحك عليكي بسهوله
نيرة بدموع : ماااشي يا لؤي…هتندم..والله هتندم
لؤي : وريني هندم ازاي
نيرة بزعيق : مااا أنت حيوان و زباله
لؤي : إسرااااء
إسراء السكرتيره : نعم يا أستاذ لؤي
لؤي : نادي علي الأمن
إسراء : حاضر
نيرة : والله العظيم يا لؤي هتندم
« الأمن مسـك ايـد نيـرة »
لؤي : ارموها برا
« عـند زين و ورد…أمام الكـليه »
زين : خلاص هستناكي
ورد : تمام….يلا سلام
زين : خلي بالك علي نفسك
ورد : حاضر و أنت كمان
« تركـته و ذهـبت ، صعد إلي العـربيه و ذهـب إلي الشركـه »
« فـي الشـركه »
أسيا : والله
اسر : اه والله….فرحان انك هتبقي شريكة حياتي يا أسيا
رويه : يارب الصبر…أنا مبقدرش أستحمل قدام الرومانسيه دي ببقي عايزه اقتلهم
أسيا : والله يا أسر و أنا كمان…عشان بجد انت انسان كويس و اساسًا متربين سوا و أبن عمي فواثقه فيك
أسر : عارفه مش هزعلك ابداً
اسيا : و إيه كمان
أسر : كل اللي هتطلبيه هتلاقيه عندك
اسيا : بجد…حتي لو نجمه من السما
اسر بتأكيد : حتي لو نجمـ
رويه : بسسسس ببسسس….ايه شغل المسلسلات ده….حتي لو نجمه من السما…فووقي انتي و هو ورانا شغل…مش وقت الرومانسيه العكره دي
اسيا : بت هقوم اضربك
اسر : لا يا حبيبتي انا هولع فيها عشانك
رويه تلملم الملفات : لا لا لا لا….كده كتير…كده كتير بجد
اسيا : ما انتي حماره مبتفهميش في الرومانسيه
رويه : دي رومانسيه دي….وبعدين لو دي الرومانسيه مش عايزه افهم
« خـرجت برا المكـتب »
زين : ايه ده دي راحه فين دي
اسيا : أنا اعرف
« فـي الكلـيه »
سعيد : انت متوتر ليه
محمود : مش عارف…خايف ترفضني
سعيد : هترفضك ليه ياعم روح بس اعترفلها و شوف ردها
محمود بتوتر : طب اكتبلها رساله
سعيد : بلاش شغل السبعينات ده
محمود : بتكلم بجد والله….كده احسن
« و بالفـعل أخـذ ورقـه وقـلم وكـتب الرسـاله»
« فـي المـدرج »
روفيده : إتأخرتي ليه
ورد : معلش والله
روفيده : النهارده في دكتور جديد مكان مازن الله يرحمه هيدخل
ورد بحزن : عارفه عشان كده جايه بالعافيه
روفيده : انتي لسه معجبه بيه
ورد : مش زي الأول يعني دلوقتي بصراحه معجبه بزين لكن كل ما افتكر مازن بحزن و بدعيله كتير بجد اتمني لو كان موجود
روفيده : الموضوع صعب عليكي
ورد بحزن ودموع : لما بفتكر المواقف اللي حصلت معاه بصراحه بقول ياريته كان هنا
روفيده : طب روحي أغسلي وشك قبل ما الدكتور يدخل
ورد : حاضر
« و بالفـعل ذهـبت ورد إلـي الحـمام »
سما : روفيده
روفيده : نعم
سما : تعالي ثانيه عيزاكي
روفيده : حاضر
« تـركت روفيـده الشـنط و ذهـبت إلـي سـما »
سعيد : اهو روح بقي حط الرساله في شنطتها
محمود : ماشي
« ذهـب محمود و وضـع الرسـاله فـي شنطـه ورد دون أن يـلاحظ أحـد »
« فـي منـزل محـمد والـد ورد »
جميله : ايوه انا عارفه الأسطوانه دي
يزيد : يا ماما بالله عليكي قولت ساعه و هذاكر فخلاص
جميله : ايه اللي خلاص…ما انت من امبارح كل شويه ساعه و هذاكر ساعه و هذاكر و مشوفتش منك ولا ساعه و لا نص ساعه حتي
يزيد : انا عارف انا بعمل ايه
جميله : بلا عارف بلا نيله بقي…دي مش مذاكره واحد في تالته ثانوي و علمي علوم كمان يعني ابن خالتك هينجح عشان ادبي كنت ادخل ادبي انت كمان علي الاقل نضمن انك هتنجح
يزيد : علمي علوم علمي علوم ايييه…يعني بتوع ادبي بيرسموا فراشات علي الكشاكيل…قولتلك مفيش فرق بينا..هما عندهم حاجات صعبه زي ما انا عندي حاجات صعبه…هما عندهم تواريخ و أحداث لازم يكونوا عارفينها و انا عندي قوانين و مسائل لازم اعرف جت منين و مخي يحفظ اكتر من قانون و اكتر من تعريف فمفيش فرق بين طالب علمي علوم من رياضه من ادبي…انتوا الأهالي بس عشان متعرفوش في الدراسه فمعتقدين ان في فرق
جميله : والله…يعني انت هتجيب دكتور لمدرس
يزيد بعصبيه : ما المدرس هو اللي عمل الدكتور و هو اللي عمل المهندس…انتي ليه مش فاهمه ان كل الوظايف مهمه حتي عامل النضافه مهم…كل واحد ليه وظيفته و اكيد بيواجه صعوبات في الوظيفه بتاعته…انتوا بس اللي عايزين تتفشخروا و تضايقوا في بعض انا ابني دكتور انا ابني مهندس…مفيش حاجه اسمها كليات قمه…كل الكليات زي بعض…المدرس مهم زي ما الدكتور مهم زي ما المحامي مهم زي ما الموظف مهم زي ما الحلاق مهم زي ما سواق الميكروباص مهم…الحاجه الوحيده اللي غلط اني اكون قاعد علي القهوه اربعه و عشرين ساعه من غير شغل او اني اكون حرامي و ادخل فلوس حرام البيت…بلاش تقللوا من وظيفه كل واحد
« تـركهـا وخـرج »
« فـي الكلـيه »
الدكتور : الحيوانه اللي بتتكلم ورا دي
ورد لروفيده : ايوه قولتلها كده قالتلي
شريف بمقاطعه : كلمي الدكتور
ورد : انا ؟
شريف : ايوه
الدكتور : اقفي
ورد وقفت وقالت : نعم يا دكتور حازم
حازم : دكتور ايه و زفت ايه عماله ترغي من ساعة ما دخلت و قلة ذوق بصراحه مشوفتش زيها
ورد : بعتذر
حازم ببرود : هو ايه اللي بعتذر انتي غبيه ولا شبه الحيوانات مش عندك مخ
ورد : اه يعني اقول ايه مش فاهمه
حازم بعصبيه : هو انتي تغلطي و بعدها تعتذري و عيزاني اقبل اعتذارك…شوفي بسببك وقفنا المحاضره و كل زمايلك مش هيعرفوا يركزوا تاني بسببك
ورد : اعمل ايه يعني اقوم اشرحلهم وبعدين حضرتك اللي عايز تتخانق بقول لحضرتك بعتذر يا تقولي اقعدي يا تطلعي برا انت اللي عايز تتكلم كتير
حازم : تصدقي انك مش محترمه
ورد امام الجميع : تصدق انك عديم الذوق و الأخلاق
حازم بصدمه و تحذير : انا؟! قولي كده تاني قولتي ايه
ورد بنفس العند : قولت انك عديم الذوق و الأخلاق…عشان تشتم طالبه وسط زمايلها و تقلل منها رغم انها اعتذرتلك يبقي دي قلة ذوق و أخلاق منك…و بتقول انا اللي غبيه لا حضرتك اللي غبي و ناقص عقل كمان عشان قولت عليا حيوانه و ناقص معلومات في الدين عشان متعرفش ان اللي بيشبه حد بحيوان بياخد ذنب
حازم بصوت عالي و زعيق : انتي ازاي تتكلمي معايا كده اطلعـ
ورد : بسسس انا طالعه اساسًا ميشرفنيش اخد معاك ده القاعده في الكافيه ليها فايده اكتر من محاضرتك
« تركته يستشيط غضباً وخرجت »
« فـي الشـركة »
اسر : طب الحمد لله قربنا نخلص
زين بضيق : بس مهما كان هتفضل التصميمات القديمه هيا الأفضل
أسر : كل ما بفتكرهم بحزن والله
زين : يلا ربنا يسامحها علي اللي عملته
أسر : عارف انا مستغرب من هدوءك ده اوي
زين : يعني عايزني اعمل ايه
أسر : قولت ده هيسألها كذا سؤال و مش هيسيبها في حالها
زين : تؤ تؤ وليه وجع الدماغ ده كله….وبعدين انا ساكت عشان وردتي مش اكتر
اسر : وردتي….ياعم الحنين
زين : شوف مين اللي بيتكلم…انا نفسي اعرف اختي بتحبك ازاي بجد
اسر : ملكش دعوه
اسيا : ده عسل
زين : ده انتوا هتجيبوا قرود
اسر : و انت هتجيب ايه
زين : ده انا هجيب الجمال كله يكفي ان وردتي هتكون امهم
اسر : ده انت متكفي علي وشك مش واقع بس
زين بسعاده : طبعًا وبعدين مين الغبي اللي يقابل ورد و ميحبهاش
« فـي الكـليه »
حازم بصوت عالي : روفيده مع هشام
روفيده : حاضر يا دكتور
هشام : حاضر
حازم : ورد مع محمود
محمود بسعاده : حاضر يا دكتور
حازم : طب فين ورد
روفيده : ما اللي خرجت برا المحاضره دي ورد
حازم : تمام… محمود ابقي قولها انها هتكون شريكتك في المشروع
محمود : حاضر
حازم : روفيده خودي ارقامهم و اعملي جروب و قوليلهم ان لازم كل اتنين يعملوا المشروع سوا ومش عايز تقصير في حاجه و خصوصًا اللي اسمها ورد دي
روفيده : حاضر يا دكتور
« وبالفـعل أخـذت روفيـده الأرقـام و بـدأت بتـسجيلـها ثـم عـملت المجـموعه و أرسـلت الرسـاله »
~ فـي كـافتيريا الـكليه ~
ورد : ايه يا روفيده إتأخرتي كده ليه
روفيده جلست وقالت : يابت الدكتور كان بيوزع علي كل اتنين فينا مشروع
ورد : اه ما انا شوفت الرساله وطلعت انا مع محمود
روفيده : هقوم اجيب عصير اجيبلك
ورد : لا ياختي انا راحه الشركه عند زين عشان هنروح البيت سوا
روفيده بإبتسامه و غمزه : يابختك ياعم….معرفش هفضل سنجوله كده لغاية امتي
وقفت ورد و بدأت تلملم أشيائها : متخافيش هتقعي علي بوزك قريب…..يلا سلام
« ذهـبت ورد ولـكن لـم تبـتعد كثـيراً فسـمعت صـوت يُناديـها »
محمود : ورررد
إلتفـتت وقـالت : محمود….خير
محمود : اااا….شوفتي الرساله
ورد : اه شوفتها
محمود : طب موافقه
ورد : اه يا محمود ارفض ليه يعني
محمود بسعاده : بجد
ورد بإستغراب : اه بجد
محمود : ااا….طب علي امتي كده
ورد : بكرة ان شاء الله عشان منتأخرش
محمود بسعاده : خلاص ماشي انا اساسًا جاهز
ورد بإبتسامه : ماشي….سلام
محمود : سلام
« ذهـبت ورد و جاء سعـيد »
سعـيد : هاه قالتلك ايه
محمود بسعـاده : وافقـت
سعـيد : قول والله
محمـود : والله…. بس ثانيه…انا معرفش بيتها فين
سعـيد : استني نسأل سـما كده كده هيا صاحبة روفيده و روفيدة صاحبة ورد
محمـود : لا ذكي يابني
سعيـد : عـيب عليـك
« ذهـبت ورد إلـي الشـركة و سـألت عـلي مكـتب زيـن و دخـلت فـ وجـدت الشـباب مـا عـدا زيـن »
عمر : مرات زين باشا ايه اللي جابك هنا
ورد : وووه انت بتعمل ايه هنا…وبعدين مش قولت انك هتبدأ تلتزم في موضوع الجامعه
عمر : والله مش قادر
ورد : ازيكوا يا بنات
رويه : الحمد لله يا حبيبتي
ورد : اومال زين فين؟
رويه : راح يطبع الملفات في الاوضه اللي جنبنا دي
ورد : تمام هروح اشوفه
« خـرجـت ورد مـن المـكتب و ذهـبت إلي الغـرفه…وجـدت زيـن يـقف بجـانب……. »
هـدي بضـحك : ههههههه معاك حق يا زين
زين بإبتسامه : اه والله أصل الإنسان لو يركز شويه مش هيوقع نفسه في مشاكل
ورد بغـيظ : ايوووه الإنسان لو ركز شويه مش هيوقع نفسه في مشاكل مش كده ولا ايه يا زين
زين بإعتدال : ااا…احمم…ورد جيتي امتي ؟
ورد : جايه من بدري يا حبيبي و سألت عليك قالولي بيطبع ورق
هدي بضيق : حبيبي ؟….ايه يا زين قولتلك معجبه بيك قولتلي مبرتبطش اشمعني دي يعني
ورد : لا يا حبيبتي…دي اللي انتي بتتكلمي عليها مراااته عارفه يعني ايه مراته
هدي : والله اومال زين مش لابس دبله ليه
ورد : شيلي بس تركيزك من علي زين و ملكيش دعوه لابس ايه و مش لابس ايه
زين : ااا…يلا يا ورد
ورد : عمال تقولي ورد ورد…ما انت بتقولي علي طول يا حبيبتي اشمعني دلوقتي…ولا تكون مكسوف من دي
زين بإبتسامه : لا يا حبيبتي انا اسف
« ورد ذهـبت خـطوتيـن ثـم التـفتـت و قـالت »
ورد : اه صـح هتقابليني كتير هنا عشان هكون سكرتيرة زين…فركزي بقي عشان هتابعك
هدي : والله !
ورد بإبتسامه : اه والله…أصل بنحب بعض اوي يعني لما بيروح الشركه كده بيوحشني فقولت اجي كمان هنا
هدي : اه اما نشوف
ورد : يلا عقبالك بقي
«زين بـيحاول يـمسك نفسـه من الضـحك »
زين : يلا يا حبيبتي
« مسـك يـد ورد وخـرجوا »
« أمـام غـرفه الطـباعه »
ورد بتقليد : والله اومال زين مش لابس دبله ليه….هيا مالها انت لابس ايه ولا مش لابس وتركز معاك ليه أصلاً
زين : خلاص بقي حصل خير
ورد : ثانيه بس لو مفكر اني غيرانه امسح الفكره دي من دماغك… انا مش بغير انا بس شايفه ان ده غلط
زيـن يـكتم ضـحكته : طبعًا….باين عليكي….و اساسًا انا برضوا من النوع اللي مش بيغير فعادي يعني
ورد : مش بيغير ! اه اه انت هتقولي بأمارة محمود هاااه
زين بضيق : اااه محمود….لا لا مش حاطه في دماغي و بعدين مش هغير من واحد قد عيالي
ورد : والله…..يعني انا بنتك
زين : ايه اللي جاب السيرة دي….اااه ما هو قدك في السن…لا خلاص مش قد عيالي ياستي
ورد : زين كذا مرة قولتلك انا مش صغيرة….يا بابا الفرق بينا ٦ سنين…..و اه صح قولت مش بتغير خلاص لو كده مش هحكيلك ايه اللي حصل معايا النهارده مع محمود و حازم
« تـركته و ذهـبت ولكـن زيـن مسـك يـدها »
زين : خودي هنا
ورد : نعم
زين بضيق : ايه اللي حصل مع استاذ محمود…لا و مين حازم ده كمان هو انتي كل يومين يطلع واحد معجب بيكي ولا ايه
ورد : اقولك ليه
زين : عشان عايز اعرف
ورد : طب لما نروح البيت ماشي
« ذهبت خـطوتين ولكـن زيـن مسـك يـدها مـرة أُخـري »
زين : هو مش انا قولتلك عايز اعرف دلوقتي
ورد : ااا….شديت مع الدكتور حازم اللي جاي مكان مازن الله يرحمه عشان حصل……………..
زين بضيق : اه و حكاية محمود بقي
ورد : وانا جايه هنا محمود وقفني في الكليه عشـ
زين بمقاطعه : وقفك ! …. وانتي وقفتي معاه في الكليه لوحدكوا كمان لا ما شاء الله
ورد : طب مش هكمل حاجه
زين : هو ايه اللي مش هكمل….احكي ايه اللي حصل
ورد : هقول بس احلف انك هتكون متفهم و مش هتتعصب عليا دلوقتي
زين : يبقي في حاجه هتقوليها هتعصبني صح….قولي يا ورد
ورد : هو يعني….دكتور حازم قال ان انا ومحمود لازم نشترك مع بعض في مشروع واحد
زين بغيظ : والله ! يا عسل…يعني من المدرج كله فيه اكتر من ١٠٠ شخص إختارك مع محمود….اه وبعدين
ورد : و….لازم…..إن
زين : انتي هتقوليلي كلمة كلمة وأنا أجمعها…..ولازم ايه قولي
ورد : لازم أنا و هو نتقابل بكره برا الجامعه عشان نعمل المشروع عشان مينفعش نتأخر فيه
زين بعصبيه خفيفه : ده في المشمش
ورد : نعم ! … هو ايه اللي في المشمش….بقولك مشروع مهم يعني لازم اعمله عشان انجح و
زين بمقاطعه : شيلي الماده….اه والله شيليها و عادي عوضيها بعدين
ورد : انت بتتكلم بجد
زين : اه والله
ورد : هو كيس خيار هشيله….ده مستقبل يا بابا
زين : مش بيقولوا البنت ملهاش غير بيت جوزها….اهو جوزك اهو معاكي وكمان بيقولك شيلي الماده
ورد : يعني انت عايز العيله تقولك يلا ياللي مراتك ساقطه
زين : ياستي انا موافق
ورد : يا زين…والله ما ينفع
زين : انتي هبله ولا عيزاني اتعصب عليكي ولا عايزه ايه مني بالظبط
ورد : انت بتكلمني كده ليه
زين : مراتي جايه تقولي هخرج مع زميلي في الكليه عشان اعمل معاه مشروع….لا ومين زميلها اللي معجب بيها….عيزاني اقولك ايه
ورد : عيزاك تقولي ماشي
زين : طب امشي من قدامي
ورد : يااااربي
زين : طب همشي انا من قدامك عشان متعصبش عليكي
« وبالفعـل تـركها ودخـل مكتـبه عـند الشـباب »
ورد ذهبت خلفه : يا زين بقي
زين : يارب علي اللي عايزه يومها ميعديش النهارده دي
ورد : طب اسمعني طيب
زين : سمعتك ومش موافق
ورد : مبحبش حد يتحكم فيا علي فكره وبعدين شكل الموضوع عجبك ان خلاص بقي عندك حد تمشي عليه كلمه
زين : والله افهميها زي ما تفهميها كده كده انا رافض
رويه : ايه ده في ايه
زين : في إن الأستاذه عايزه…………….
عمر : طب وفيها ايه يا زين دي حاجه طبيعيه وبعدين ده مشروع
ورد : ايوه مشروع والله…. وبعدين هو حد قاله اني راحه اتفسح معاه
زين : ما يُعتبر ياختي….يُعتبر بتتفسحوا…قاعدين في كافيه فأكيد هتطلبوا حاجه تشربوها
ورد بإبتسامه : والله كنت ناويه اطلب كيكه بالفراوله بس خلاص مش هطلب
اسر بضحك : يخربيت استفزازك
زين : انتي عارفه لو سمعت صوتك….هخليكي تحولي منزلي وتدرسي في البيت
ورد : طب المشروع مينفـ
زين بمقاطعة : ياستي اعمليه لوحدك و اكتبي اسمه عليه و سلميه كأنه عمله معاكي….فكرة حلوه اهو
ورد : بس الموضوع هيبقي صعب عليا
زين : هسهر معاكي النهارده و أعمله أنا و أنتي…..هاه أي حجه تانيه
ورد : بس محمود هيزعل
زين : ما يزعل ولا يتفلق انا مالي….انا قولت اهو…يا أخليكي منزلي يا أعمل أنا المشروع معاكي….عداني العيب ولا لا يا جماعه
رغد بضحك : لا بصراحه معاك حق
ورد بضيق : خلاااص يا زين…هعمله انا وانت….بس لازم أقول لمحمود عشان انا كنت قايله ان هنعمله سوا بكره
زين : والله…..وحضرتك بتديله معاد كده من ورايا
ورد : ما انا مكنتش اعرف انك هترفض
زين : امممم…. هتعرفيه ازاي بقي
ورد : روفيده عامله جروب فهجيب رقمه من عليه
زين : متكلميش حد عشان مره علي مره هيتعود انه يتكلم معاكي…. مش لازم تعرفيه و كده كده هو ميعرفش بيتك فين
ورد : حاضر
زين : ان بعتلك رساله مترديش….ولا أقولك هبقي ارد انا عليه
ورد : حاضر كده حلو
زين : والله هجيبلك كيكه بالفراوله النهارده
ورد بإبتسامه : خلاص اتفقنا
اسر : وانا كمان
زين : بس يا حبيبي بلاش تبقي طفل وتشبط في اي حاجه كفايه اللي عندي « نـظر لورد »
ورد طلعت لسانها لأسر : هاكل كيكه وانت لا…. احسن
زين : مش بقولك كفايه اللي عندي
« فـي المـساء ذهـب الجـميع إلي المـنزل و تناولـوا الغـداء »
« فـي غـرفة ورد و زيـن »
ورد علي الهاتف : حاضر يا حبيبتي هنجيلك بكره ان شاء الله
جميله : تمام و اعملوا حسابكوا هتتغدوا معانا
ورد : حاضر يا ماما
جميلة : ماشي يا حبيبتي سلميلي علي زين
ورد : عيوني يوصل
جميله : يلا سلام
ورد : سلام
« أغـلقت ورد الهـاتف ثـم نظـرت لزيـن الذي يجـلس عـلي الأريكـه»
ورد : ماما بتسلم عليك
زين : الله يسلمها….هما عاملين ايه
ورد : الحمد لله كلهم بخير
زين : الحمد لله
ورد : ماما عزمانا بكره علي الغدا
لو مشغول قولي و اروح لوحدي عادي
زين : لا طبعًا مينفعش…وبعدين حتي لو مشغول اكيد هفضي نفسي دي هتبقي اول زيارة لينا هناك بعد الجواز
ورد بإبتسامه : خلاص ماشي
زين : تعالي يلا و هاتي حاجتك نعمل المشروع
ورد : طب قولي الأول جبت كيكه بالفراوله
زين : والله جبت
ورد : خلاص يلا نبدأ شغل
« بالفـعل جـلس معـها و سـاعدها فـي المـشروع…فـي الصـباح »
ورد : صباح الخير
زين : صباح الورد
ورد : يلا نصلي الأول
« وبالفـعل صـلوا فـرضهم »
• فـي الصـالون •
اسر : يعني موافقه
اسيا : ايوه
الجد سعد : خلاص يبقي كده الخطوبه بكره
ورد : صباح الخير
الكل : صباح النور
زين جلس وقال : خطوبة مين اللي بكرة
اسيا : انا و اسر
ورد بسعاده : مبارك يا عيوني
« وحضنت أسيـا »
اسيا : الله يبارك فيكي يا حبيبتي
« تـمني الجـميع لهـم التـهاني »
♡ عـلي السـفرة ♡
رويه : عايزين نروح نشتري الفساتين النهارده
رغد : اه ياريت
ورد : للأسف مش هعرف اجي معاكوا
رغد : ليه كده
ورد : ماما عزماني انا و زين علي الغدا النهارده
رغد : عادي هنستناكي ولما تيجي نروح كلنا سوا
ورد : لا روحوا انتوا عادي عشان متتأخروش بسببي
اسيا : لا يابنتي نتأخر ايه بس وبعدين عادي
ورد بإبتسامه : خلاص ماشي
نيرة : عن اذنكوا شبعت
« و صـعدت إلي غـرفـتها »
زين : يلا يا أستاذ منك ليه عشان الشغل
أسيا : يلا يلا
« وقـف زين و عمر و اسر و بجانبـهـم رغد و رويه و اسيا »
زين : والله !…. انتي يا ابله
ورد وهيا تمضغ الطعام : اناااا
زين : ايوه انتي
ورد : نعم
زين امام الجميع : انتي قاعده ليه….يلا قومي
ورد بإستغراب : هاااه….أقوم ليه هو أنا راحه فين
زين : الشركه يا ورد….إيه انتي نسيتي إنك هتبقي السكرتيرة بتاعتي
ورد : لا ثانيه إنت مقولتليش إن أنا هبدأ من النهارده
زين : انتي قولتيلي اديني فرصه لغاية ما انزل الجامعه و اشوف ايه الأخبار و اهو نزلتي الجامعه من كام يوم….يلا عشان منتأخرش وبعدين انا عايزك هناك
ورد وقـفت وقـالت : حاضر
الجد بأبتسامه وصـوت خـافت : ربنا يسعدكوا
« و بالـفعل أخـذ كـل واحـد عـربيته وجـلست ورد بجـانب زيـن وذهـبوا إلي الـشركـه »
♡ فـي منـزل محـمد ♡
أمير : والله كده حلو
جميلة : ولا أعمل حاجه تاني
أمير : حاجه تاني إيه يا أمي بس….الأكل كده هيكون كتير اوي
يزيد وهو يمسك الهاتف : ياغبي انت مش فاهم….امك عايزه تعمل اكل كتير عشان يبات لتاني يوم و ناكله تاني عشان ترتاح ومتعملش أكل
جميلة : ولا انا هضربك
أمير : متكتريش يا أمي
جميلة : طب أعمل إيه حلويات
أمير : متعمليش أنا هجيب حلويات من برا
يزيد : قصدك ان امك مبتعملش حلويات حلوه
جميله نظرت لأمير : قصدك كده يا أمير
أمير : لا والله…..انتي مخلفه حقنه هنا والله نفسي اعرف كنتي بتتوحمي فيه علي ايه
جميلة : هقوم اعمل الأكل عشان يادوب الحق
« فـي الشـركة »
زين : اه بصي مكتبك جنب مكتبي اهو….لو بصيت من الإزاز هشوفك
ورد : خلاص ماشي…..اه صح يا زين
زين : هممم
ورد : عايزين نجيب هديه لأسر و أسيا
زين : نجيب ايه طيب
ورد : المشكله مش عارفه
زين : خلاص هنبقي نفكر في الموضوع ده
ورد : حاضر
« عـلي العـصر….فـي مكتب زين »
ورد : انا صممت دول
زين : وريني كده
• أخـذ الأوراق من ورد •
زين : دي أستايلات محجبات
ورد : بص….لو عملت حتي لو تصميم او اتنين محجبات في المسابقه هتتشهر أكتر لأنك كده هتكون صممت حاجه مختلفه عن الباقي و ده هيميزك
زين بتفكير : تصدقي انتي صح….خلاص ماشي نبقي نقعد النهارده بالليل سوا نشوف هنختار الوانهم ايه
وىد : أتفقنا…..طب ايه مش هنمشي
زين : انا خلصت اهو خلاص….هجيب الفون و هنمشي علي طول
« و بالفـعل أخـذ الهـاتف و ذهـب مـع ورد إلي مـنزل والدتـها »
جميله : افتح الباب يا يزيد
يزيد : حاضر
« فتح الـباب وقـال »
يزيد : زين عامل إيه
زين سلم عليه : الحمد لله يا بطل انت عامل ايه
يزيد : الحمد لله
ورد : طب ايه هتفضل موقفنا علي الباب كده
يزيد : انتي ايه اللي جابك
ورده : مش جايه عندك يا بارد جايه بيتي
يزيد : بيتك عند جوزك مش عندنا…..اتفضل يا زين نورت
« أبتـسم زيـن و دخـل فـأغلق يـزيد البـاب في وجـه ورد قـبل أن تـدخل »
ورد خبـطت علي البـاب وقالت : إنت يا غبي إفتح الباب
يزيد : امشي مش عايزينك
ورد : والله لأولع فيك….يااااا مااااامااااا
زين بضحك : هو انتوا علي طول كده
يزيد ابتسم وقال : ايوه
« جـاء أمير من الخـلف و رحـب بـ زيـن ثـم فـتح البـاب لورد و قـال »
أمير : عارف يا يزيد الكلب لو رخمت علي ورد النهارده هولع فيك
ورد حضنت أمير وقالت : أحسن
« دخلـوا الصـالون و خـرجت الأم رحـبت بيـهم ثـم خرج الأب »
ورد بدموع : ازيك يا بابا
محمد حضنها : بابا من غير حضن يا جزمه
ورد حضنته وقالت : اسفه
محمد : انا اللي اسف عشان مصدقتكيش…و زعلتك اليوم ده و جيبت سيرة ورده اختك و ضربتك
زين قال بهمس لورد : مين ورده دي
ورد بهمس : هقولك لما نروح البيت
« ثـم نظـرت لوالدهـا وقـالت »
ورد : مفيش زعل بينا انت ابويا يعني حتي لو ضربتني بالجزمه…أجيبها و أدهالك تاني
محمد حضنها : ربنا يسعدك يابنتي
زين : ازيك يا والدي عامل ايه
محمد : الحمد لله ياحبيبي انت اخبارك ايه
زين : الحمد لله بخير
محمد : ورد متعباك صح
زين : طبعًا جايبه أجلي
« ورد نـكزته أمـام الجـميع »
زين : لا بهزر دي نِسمة
« ابتسم الجميع »
ورد ليزيد : بقي انت يا رخم تقفل الباب في وشي
يزيد : بهزر والله وحشتيني
ورد : وانت والله « حـضنتـه »
« جـلسوا يتحـدثون ثـم تنـاولوا الغـداء تحـت هـزار و المـشاكسـه بين ورد و يـزيد……ثـم يشربـون القهوه »
محمد وهو يأخذ رشفه : تسلم ايدك
ورد : تسلم من كل شر يا حبيبي
جميلة : افتح الباب يا يزيد
يزيد : بقيت البواب انا
جميلة : بتقول حاجه
يزيد : بقول حاضر
« فـتح الباب وقال »
يزيد : نعم
محمود : ده بيت ورد
يزيد : اه عايزها ليه
محمود : اسمي محمود و جاي اتقدم لورد….هيا عارفه
يزيد : نعممم؟…..طب ثانيه متدخلش
« دخـل الصـالون وقـال »
يزيد : ورد الحقي….في واحد لابس بدله ومعاه ورد وشوكولاته
ورد : ايوه اعمل ايه
يزيد امام الجميع : بيقول ان اسمه محمود و جاي يتقدملك
• نـظر الجـميع بصـدمه خصـوصًا زيـن •
يتبع..
لقراءة الفصل التالي : اضغط هنا
لقراءة الرواية كاملة اضغط على : (رواية كسرة قلوب)
