رواية مهمة حب (رحم للإيجار 2) الفصل الأول 1 بقلم ريحانة الجنة
رواية مهمة حب (رحم للإيجار 2) الجزء الأول
رواية مهمة حب (رحم للإيجار 2) البارت الأول
رواية مهمة حب (رحم للإيجار 2) الحلقة الأولى
اول مشهد في الرواية واللي هيجمع بين شهاب وتمارا في كومبود شهير شهاب بيجري الصبح بدري كعادته كل يوم اول لما يصحي. وهو بيجري لفت نظره بنت بتريننج رياضي وشكلها جميل جدااا بتجري في الممر التاني عكس اتجاهه هو. وقف بص عليها شوية مش عارف ليه لفتت نظره. بس فجأة لقي في اتنين شبان بعربية سبور رايحين في نفس اتجاهها ووقفه قصادها يقطعوا عليها الطريق. استغرب وقرب علشان يشوف فيه ايه. لقي واحد منهم نزل ووقف قصادها بيكلمها.
الشاب الاول وقف قصدها وبسماجة ابتسم : هاي انتي جديدة في الكوموند هنا مش كدة
تمارا وقفت وهي بتاخد نفسها من الجري . واستغربت منه رفعت حاجبها وببرود. نعم؟! وانت مالك انت جديدة قديمة خاليك في حالك.
الشاب بغرور: انت واضح انك فعلا جديدة علشان كدة لسة ماتعرفنيش انا مودي سليم. تقريبا احنا من اوائل الملاك هنا واعرف كل اللي ساكنين هنا انتي اسمك ايه ومن عيلة مين.
تمارا بخنقة مش عارفة تداريها ابتسمت بسخرية: اهاه. انت بقي عامل فيها Boss بقي وكدة امممم. طيب بص يا بن الحلال انت تبعد عن سكتي خالص انا بالاخص. تشوفني اكنك ماشوفتنيش. امين واياك تفكر تكلمني تاني. انا يا امور مش من النوع بتاعك. فاهمني.
ولفت علشان تمشي لقت مودي مسك ايديها.
مودي:استني بس انا لسة بتكلم
وقبل ما يكمل كلامه كان دراعه في ايد تمارا ولوتله دراعه وضغطت بقوة وهي بتجز علي سنانها من الغضب وبتحزير وغضب.
تمارا: ايدك دي لو فكرت بس تلمسني بيها تاني المرة الجاية اقسم بالله هقطعهالك سامع. انا غير اي واحدة تعرفهاولما تعرف انا مين وقتها هتخاف حتي تسلم عليا .
مودي كان بيتألم وبيحاول يخلص ايده من قبضة تمارا. بس مش عارف صاحبه عمرو نزل وبيحاول يفك الاشتباك ده
عمرو: يا انسة مش كدة هو في ايه انتي بتقولي شكل للبيع وهو قالك ايه يعني سيبي ايده بقي هتكسري دراعه.
تمارا لسة متملكة من مودي ورافضة تسيبه بصت لعمرو بغضب وهي بتحزره: كلمه كمان ودراعك هيكون مكان دراعه انت سامع.
شهاب استغرب من البنت دي ازاي قادرة تعمل كدة ولقي فعلا مودي بيتألم ودراعه ممكن يتكسر فقرر يدخل. وقرب منهم بحضوره القوي كاعادته وبهدوء.
شهاب: اظن الموقف مايستدعيش كل ده كان كفاية تمشي وبس اتفضلي سيبي دراعه كدة ممكن تكسريه.
تمارا رفعت حاجبها بتحدي وبصتله بسخرية: وانت تبقي مين بقي ان شاء الله . بقولك ايه خاليك في حالك واتكل انت. مايخصكش اصلا.
شهاب اتغاظ من اسلوبها وغرورها كور قبضة ايده وقرب منها اكتر وبقوة. قولت سيبي ايده ولمي لسانك اللي عايز قطعه ده احسنلك انتي مش عارفة بتكلمي مين
تمارا بعناد : لا مش هسيبه واللي عندك اعمله انتوا واضح كدة انكم شوية عيال فافي عايزة تتربي وانا بقي هعرفكم حدودكم وان مش اي حد يتشقت.
شهاب جاب اخره منها مد ايده ومسك ايديها اللي ماسكه بيها دراع مودي وبقوة فكك ايده منها مودي مسك دراعه وهو بيتالم وبعد عنهم. تمارا اتغلت وغضبت لما شهاب مسك ايديها ولتدخل وكمان من وقفته الثابته ونظرة عنيه اللي كلها تحدي انها تقدر ترد عليه. وبكل قوة قورة قبضة ايدها وضرت شهاب بوكس في وشه .. مودي وعمرو ركبه عربيتهم ومشيوا. اما شهاب فكان لسة بيستوعب انها جاتلها الجراة تعمل كدة وتضربه . لف وشه ليها وهو بيطحن سنانه من الغيظ قرب منها علشان يرد الضربة بس اتراجع لانها في النهاية بنت.
شهاب بغضب: اقسم بالله لو كنتي راجل لكنت كومتك هنا قاطعة النفس. بس وحياة ابوكي لربيكي وادفعك تمن البوكس ده غالي بس انا مابضربش حريم بس هتشوفي هعمل فيكي ايه
تمارا بتحدي قربت منه : وانا قصادك اللي تقدر تعمله فرجني جمالك وتقدر. علي ايه وما تشغلش بالك بحكاية بنت دي علشان انا مش بنت. انا اعتبرني زي زيك ويكمن ارجل منك كمان.
شهاب بيحاول يلجم غضبه علشان فعلا ممكن ياذيها.
شهاب: لا من الناحية دي فواضح انك مش بنت ولا ينفع تكوني بنت هو ده شكل بنت لكن لاسف بنت بالاسم بس. وهيقال ضرب بنت وانتي ماتسويش في سوق الحريم جنيه. بس فعلا الكومبوند لم شوية ناس ماتستهلش انها تسكن فيه بس وحيات اهلك ماهتقعدي فيه يوم كمان مهما كنتي بنت مين يا زبالة
تمارا بترفع ايدها تضربه بالقلم : انا هعرفك مين اللي زبالة.
شهاب مسك ايدها قبل ما تضربه ولواها بقوة وهنا مقدرش يمنع نفسه وغضبه منها.
شهاب: لا بقي ده انتي عايزة تتربي وتتعلمي الادب وازي تتعاملي مع اسيادك يا بيئة واطية انتي يابت انتي مالقتيش حد يربيكي ولا ايه تلاقي ابوكي كان بيسافر يلم فلوس ونسي يربيكي لا ده انا افرمك تحت رجلي يا حليتها واكسرلك دماغك . وزقها بقوة . يالا يابت امشي من هنا واوعدك مش هتباتي فيه ليلة واحدة.
تمارا اول ما زقها لفت ولوت دراعه هو كمان. لكن هو قدر يتخلص منها بسرعة. وفضلوا كل واحد بيحاول يضرب التاني والتاني يتفادي الضربة بسرعة ومهارة لحد ما عدي من جنبهم باص مدرسة فوقفه ضرب تمارا وهي بتاخد نفسها وتمشي .
تمارا: وحياة ابوك انت لوريك واعرفك مين هو ابويا اللي معرفش يربيني ده. وابقي وريني شطارتك ازاي هتمشيني من هنا ويا انا يا انت يا زفت انت في ام الكومبوند ده.
شهاب بياخد نفسه وبسخرية: يالا يا بت انت امشي انا اللي هعرفك انا مين انتي وعيلتك كلها. وهجيبك وهتشوفي.
مشيوا الاتنين وهنا بيتوعدوا لبعض وكل واحد اقسم انه ينتقم من التاني.
…………………………………………
في ڤيلا مهاب عز الدين
تمارا دخلت وهي متعصبة وبتنفخ لقتهم كلهم متجمعين علي السفرة بيفطروا.
مهاب استغرب من شكلها الغضبان.
مهاب: سيادة الرائد ماله زعلان ليه مين اللي عكر مزاج الجميل علي الصبح كدة.
تمارا عقدت حاجبها بغيظ: ماعاش ولا كان يا بوس. ده انا تمارا عز الدين وحياتك يا انت يا برنس لخاليه يقول انا سوسن وهتشوف.
مهاب رفع حاجبه بإستغراب: هو مين ده . انا مش فاهم حاجة؟!
نغم بقلة حيلة : هتلاقيها جرت شكل حد كالعادة. ماهي كدة عادتها ولا هتشتريها. روحها في مناخيرها زي ابوها.
مهاب : يادي ابوها وسنين ابوها. وانا مالي دلوقتي لازم ادخل في النص ليه بس.
نغم بلوم: مالك اومال مال مين. مش انت اللي ربيتها من صغرها علي انها ولد مش بنت وفضلت تشجعها كل ما تتخانق في المدرسة ولا تضرب حد مش تعاقبها . ساقت فيها والانيل بقي دهلتها شرطة وبقت ظابط حسبي الله ونعم الوكيل.
تمارا خبطت راسها بإيديها بزهق: استغفر الله علي الصبح. جري ايه يا دكتورة هو كل يوم نفس الموال . هو بقي زي الفيتامين كل يوم علي الريق كدة. ماقولنا سيادة اللواء مالوش فيه ده قراري ودي رغبتي انا وانا اللي حابة دراستي وشغلي. زي ما انس كدة دخل طب وبقي دكتور هو حر. والهانم المسنتحة اللي جانبك دي دخلت فنون جميلة تمام قشطة كدة. انا بقي ليه مش مقتنعة بموهبتي زيهم افهم بس.
نغم: موهبة ايه يا غبية انتي فيه في الدنيا بنت انثي رقيقة تبقي ظابط شرطة وطول الوقت بيچينز وتيشيرت وكاب وبتطجن في الكلام كدة وكلامها كله عن البلطجية والحرامية وتجار السلاح ايه في انوثتك فطرتك.
جودي برقة: ايوة صح فين انوثك يا هانم ده انتي بقيتي ارجل من أنس.
تمارا عضت علي شفايفها بغيظ من جودي علشان بتقوم عليها امها زيادة
تمارا: ماتتلمي يا منحنحة انتي وخاليكي في حالك هي والعة لوحدها مش ناقصة اسافين اتلمي .
مهاب بيكتم ضحته علشان عارف انها طالعة ليه فعلا.
نغم بعصبية : مين دي اللي والعة يا بنت انتي انا !! شايف يا سيادة اللواء بنتك تربيتك بتقول عليا علي امها والعة عجبك كدة.
مهاب بجدية مصتنعة : عيب كدة يا تيمو ينفع تقولي لمامي كدة.
نغم بغيظ : لا والله هو ده اللي ربنا قدرك عليه هقول ايه بس فوضت امري لله فيكم.
تمارا بمزاح: جري ايه يا ناني فوكي كدة وروقي صباحك عنب
نغم خبطت راسها بقلة حيلة : اااه ياني يامرارتي. اقولها انوثتك تقولي عنب . اقولها اي دي بس ياربي.
مهاب مال علي تمارا وغمزها: كفاية كدة امك كدة ضغطها علي وهتولع فينا خفي عليها ونبقي نكمل كلامنا بعدين.
نغم: بتتوشوشوا تقولوا ايه.
تمارا: ولا حاجة يا كبيرة ده بس البوب بيقولي حاجة خاصة بالشغل.
نغم بقرف: كبيرة وبوب. صبرني يارب.
انس خرج من اوضته وقعد معاهم.
انس: صباح الخير. مالكم علي الصبح هو انتي يابنتي كل يوم حارقة دم ماما كدة حرام عليكي ارحمي علشان ربنا يرحمك.
تمارا: بقولك ايه حياة عيالك يا شيخ فوكك مني انا روحي في مناخيري وماناقصة كلمة
مهاب: ماهو المفروض كنت انت اللي تكون مكانها دلوقتي. بس انت اللي قلبك رهيف
نغم : علي فكرة الدكتور قلبه مش رهيف . ده بيفح جسم انسان وبيشوف جروح ودم . بس الفرق انه بيعمل ده علشان ينقذ حياة انسان مش يقتله وبعدين دي اسمي مهنة في التاريخ.
تمارا: طب مااحنا كمان بننقذ حياة الناس
واللي بنقتله ده بيكون يستاهل القتل لان لو احنا ماقتلنهوش هو هيقتلنا. ومن غيرنا كانت الناس كلت في بعض. ولا ايه يا بوب كلامي غلط.
مهاب: عيب يا تيمو كلامك كله صح ده انتي بنت مهاب
تمارا ضربت كف مهاب بإنتصار: ايوة يا بوب والله ماحد فاهمني في الدنيا دي غيرك انت يا كبير تسلملي.
مهاب:هههههههههههه. اه يا بنت الايه سكر بموت فيكي يا تيمو
نغم : يا بنتي ..
تمارا قاطعتها وقامت وهي رايحة اوضتها: عنك يا دكتور انا عارفة هتقولي ايه يابنتي انوثتك وبتنجانك انا قايمة البس علشان معادي هتأخر عن اذنك. ودخلت اوضتها.
مهاب : وبعدين يا نغم خفي علي البنت شوية انتي كل ماتشوفيها تقعدي تقطمي فيها كدة .
نغم : وهو بمزاجي ماانا اعمل ايه بس خايفة عليها هتفضل لحد امتي عايشة دور الراجل ده. وناسية انها بنت والمفروض تحب وتتجوز وتخلف. هتعمل كدة ازي وهي ارجل من الرجالة اللي بتقابلهم بس .
مهاب: يا ستي كل شئ نصيب لما ربنا يأذن هتحب وتتجوز.
وبعدين انا اوعدك يوم ماتحب هتتغير لوحدها من غير ماحد يطلب منها الحب بيغير اسأليني انا ولا نسيتي مهاب عز الدين كان ايه قبل مايقابلك.وغمزها.
نغم ابتسمت وبحب بصت في عنيه: حبيبي انت طول عمرك تجنن حتي قبل مااقبلك ولحد النهاردة لسة بموووت فيك.
مهاب ابتسم : انا اللي لسة بحبك وبموت فيكي يا احلي نغم في حياتي.
أنس وجودي بصوا لبعض وضحكوا. وعزفوا كمانجا. تررااررااارا ترررا.
انس : هههههههه. ايه يا سيادة اللواء ينفع كدة راعي شعور السناجل.
جودي : ههههههه ايوة صح يا بابي اصل بصراحة انتم حبكم ده مافيش منه في زمانا ده.
نغم : مين قال كدة الحب الحقيقي موجود في كل وقت وكل زمن. بس المهم اننا نفتح قلبنا.
مهاب :ماما عندها حق. انا نفسي زمان كان من المستحيل اني اصدق اني احب واتجوز لا واخلف كمان. دي كانت معجزة. لحد ماقبلت مامتكم في حفلة دكتور ادم. خطفت قلبي من نظرة. وهو الحب مش محتاج غير كدة نظرة واحدة . كفيلة تخليك تحلم بحبيبتك كل لحظة لحد ماتقابلها تاني.
نغم قربت من مهاب :هو حبيبي بقي شاعر امتي .
مهاب غمزها ووشوشها:تعالي جوا معايا وانا اقولك من امتي .
نغم ضحكت بصوت عالي: خرجت تمارا علي صوت ضحكها بعد ما لبست غمزتها.
تمارا: العب يلا ايه يا دكتور الضحك الخليع ده. ااااه منك انت يا بوب خاربها لحد النهاردة مش مكن خلبوص كبير انت.
نغم: يابنتي بطلي اسلوبك ده. اتكلمي كويس.
تمارا بزهق : انا نازلة.
مهاب: استني لسة بدري تعالي معايا علي المكتب نشرب القهوة ونتكلم بخصوص معاد النهاردة. نغم ابعتلنا القهوة علي المكتب.
في مكتب مهاب في البيت.
تمارا: اؤمرني يا بوص.
مهاب: تمارا انا عارف انك مش محتاجة اني اقولك الكلام ده وانك بتنفذيه من نفسك. بس لازم اقولك برضوا. انتي من يوم ما اختارتي تدخلي شرطة وانا واقف جنبك وبساعدك. بس بشكل غير مباشر. وكنت دايما حريص ان ماحدش يعرف انك بنتي. حتي بعد التخرج وتعينك. انتي تفوقتي وقدرتي تعملي لنفسك اسم ومكانة في فترة قليلة غيرك ممكن يقعد سنين علشان يوصلها. بس انتي سابقة نفسك. وده عاجبني فيكي لانك طالعالي طموحك مالوش حدود. بس كل اللي فات ده كوم وحياتك من النهاردة كوم تاني. انتي رايحة مكان مش اي ظابط بيروحوا لا دول الظباط اللي من الاخر. انتي رايحة المخابرات العامة مش اي جهاز اهم جهاز في الدولة ولازم تكوني قد المسؤلية. والاهم تنسي اني ابوكي نهائي. انا كنت اتمني انك تفضلي بعيد عني وعن شغلي بس انتي اتطلبتي بالاسم علشان تنضمي للجهاز. بس انا متأكد انك زي ماكنتي جديرة بثقتي فيكي قبل كدة هتفضلي كدة للنهاية عايز الكل يحلف انك ارجل من كل شنبات الجهاز. هاه جاهز ياوحش.
تمارا بثقة وتحدي : جاهزة يا فندم واوعدك هرفع راسك كالعادة.
…………………………………………
في قصر رعد الحديدي.
شهاب رجع وهو مش شايف قصاده من الغيظ من تمارا. وطلع اوضته ودخل ياخد حمام واول مابص في المرايا وشاف اثر البوكس بتاع تمارا جز علي سنانه من الغضب وخبط المرايا بإيده وكسرها من الغيظ.
شهاب بغل: قسما بالله يا حتة حشرة لو مافحصتك بجزمتي ماابقاش انا شهاب الحديدي. وهخليكي تتمني الموت يا بنت ال……
في اوضة رعد وهمس
همس صحيت ولفت لقت رعد نايم ولما بصت علي ظهره شافت اثار جروح الرصاص القديمة مررت اديها عليها وافتكرت وقت ماكان في غيبوبته والرعب اللي كان جواها من انها ممكن تفقده اتنهدت بألم وغمضت عنيها وحمدت ربنا انه لسة معاها وقصاد عنيها. رعد حس بيها وبلمستها ابتسم ومن غير مايلف.
رعد: لسة فاكرة مش هتنسي.
همس ابتسمت : وعمري ماهنسي انك كان ممكن تموت بسببي واروح مني. اثار الجروح دي مش في ظهرك وبس لا دي في قلبي كمان.
رعد اتنهد ولف ليها وملس علي شعرها. قلبك وهو فيه زي قلبك. ده بالنسبة ليا اوسع من الكون ده كله. بس حبيبتي انا هقولهالك كام مرة. ملكنش بسببك. الله ينتقم منهظ بقي الاتنين كانوا هما السبب. وبعدين انا كنت مستعد ادفع عمرين علي عمري وترجعي لحضني واضمك ولو لمرة واحدة وكنت اموت مش مهم.
همس حطت ايديها علي شفايفه: اياك تقول كدة تاني. ربنا مايحرمني منك ابدااااا. اااااه يارعد لو فيه منك قي الدنيا دي. كان نفسي اخلف رجالة نسخة منك . بس لاسف خلفتهم رجالة اه واخدوا منك كتيير بس مش كل حاجة. اخدوا قسوتك وغرورك. بس مااخدوش حنيتك ما اخدوش قلبك .
رعد ابتسم :ليه بس يا همستي ماهم رجالة زي الفل اهم.
همس بحزن: فل ايه بس. واحد مش راضي يتجوز اصلا وبيكره الستات عما. والتاني اللي حب من صغره واتجوز اللي اختارها. بيعاملها اكنها جارية مش حبيبته ومراته. ومش سعيد في حياته ولا مخليها سعيدة. انا بجد حزينة عليهم كان نفسي اتطمن عليهم زي البنات الحمد لله جوري وكارما كريم وامير بجد بيحبوهم وبيعملوهم اكنهم ملكات لكن ولادك بقي ممرمتين ولاد هنا. فادي مطلع عين حلا وشهاب اصلا مش شايف مايا اكنها هوا ولا حتي بيفكر فيها. والبنات بيحبوهم اعمل ايه بس انا تعبت.
رعد قربها لحضنه وبغيرة: وبعدين معاكي بقي هو ده صباحي ولا صباح ولادك . علي الريق كدة اقعد اسمع مشاكل العيال. لا ماليش فيه. انا عايزك تصبحي عليا.
همس ضحكت من دماغه هي في وادي وهو في وادي تاني خالص: هههههههههههههههه مش مممكن انت مش هتكبر بقي ده انت بقيت جد عيب كدة.
رعد غمزها: جد جد . هما اينعم ولاد الكلب دول خلفوا بسرعة وخالوني جد. بس مايهمنيش انا هفضل رعد الحديدي. انا شباب اكتر من ولادك تنكري.
همس: هههههههههههههه. هو انا اقدر بردوا طبعا انت هتفضل انت ولا يمكن تتغير ابداااا .
رعد بحنية: علي فكرة انتي كمان اصبي من بناتك. ومرات ابنك انتي لسة احلي واجمل منهم.
همس: صحيح يا رودي انا لسة حلوة زي زمان.
رعد: احلي كمان من زمان ياقلب رودي. تعالي بقي نصبح علي بعض.
فجأة سمعوا صوت زعيق وصوت فادي وحلا عالي وكمان خبط علي باب اوضتهم.
همس بقلة حيلة: عجبك كدة سامع مش ممكن الولد ده فظيع اعمل ايه بس. وبصوت عالي ايوة مين ؟
ياسو ومليكة اولاد فادي وحلا : احنا يا ناناه.
همس : تعالوا ياولاد.
دخل ياسو ومليكة وباين عليهم الحزن وخصوصا مليكة.
رعد: مالكم يا ولاد فيه ايه؟!
مليكة عيطت . وهمس اخدتها في حضنها
همس بقلق: مالك يا حبيبتي في ايه بس بتعيطي ليه
مليكة بدموع :علشان بابي ومامي بيتخانقوا. كل يوم يتخانقوا انا مش بحب اشوفهم كدة ياناناه.
ياسو : علي فكرة ده بقي عادي كل يوم هما اصلا هيتطلقوا.
رعد وهمس انصدموا من كلام ياسو
رعد بحدة: ولد انت جبت الكلام ده منين هما قالوا كدة؟
ياسو:لا بس عمر صاحبي قالي ان مامته وباباه كانوا زي مامي وبابي كدة كل يوم خناق وزعيق زبعد كدة اتطلقوا. فأكيد بابي ومامي هيعملوا زيهم.
همس عنيها دمعت رعد بصلها بحزن وكلم ياسو.
رعد: وعمر دلوقتي عايش مع مين مامته ولا باباه.
ياسو: تؤتؤ. مامته اتجوزت وجوزها مش بيحب عمر . وباباه سافر. وهو عايش مع جده وجدته. احنا كمان عايزين نعيش معاكم. علشان بنحبكم وانتم كمان بتحبونا . كمان انت يا جدوا عمرك مازعقت لناناه ولا ضايقتها. ودايما بنكون مبسوطين معاكم. تعرف ياجدو. انا عايز لما اكبر ابقي زيك لما اتجوز مش هزعل مراتي وهخليها تضحك زي ناناه. مش هخليها تعيط دايما زي مامي بابي دايما بيزعلها. وعنيه دمعت.
همس ماتحملتش كلام ياسو وعيطت ورعد كمان اتأثر بكلام ياسو مدله ايده وياسو راحله واخده في حضنه.
رعد ضامم ياسوا بقوة: تعرف ياولد انت فعلا راجل وانا متأكد انك ان شاء الله هتكون كمان احسن مني. بس انا عايز افهمك حاجة الكبار اوقات بيكون فيه في حياتهم مشاكل وهموم الاطفال صعب تفهمها . انت ماتعرفش ايه اللي بين باباك ومامتك. وبعلمك ابوك بيحب مامتك جدااا من وهو قدك كدة وطول عمره بيخاف عليها. وهو كمان لما كان قدك كدة كان زيك راجل . ماتقلقش طول ما انا عايش عمر ابوك ماهيطلق مامتك زي ابو عمر ومامته ولا انت هتكون زي عمر. انتم احفاد رعد الحديدي لازم تكونوا شجعان وقلبكم جامد. واياك اسمعك تقول الكلام ده تاني. فاهم. كمان انا مش عايزك تعمل زي عمر وتطلع اسرار بيتك برا ابدا. اللي بيحصل في البيت ده مايخرجش لالأصحاب ولا لأي مخلوق. الراجل الصح يخافظ علي بيته واسراره. وكمان نبه عمر مايحكيش اللي بيحصل في بيته. اتقفني يابطل.
ياسو: حاضر ياجدو اتفقنا.
مليكة : ناناه انتي كمان هتخلي بابي مايزعقش لمامي تاني ويحبها.
همس ابتسمت بدموعها وملست علي شعر مليكة: اه ياقلب ناناه ماتخافيش انا وجده هنتصرف . يالا يا حبايبي روحوا اجهزوا علشان المدرسة . وخالوا دادا سميرة تساعدكم في اللبس.
خرج الولاد وهمس رمت نفسها في حضن رعد.
همس بدموع: شايف يارعد احفادك بيقولوا ايه شايف اطفال في سنهم وصلوا لايه. انت لازم تتصرف مع فادي. انا مش هستني لحد مااحفادنا يضيعوا. وبيت ابننا يتخرب.
رعد طبطب عليها بيهديها واتنهد:وحاضر يا حبيبتي ما تقلقيش انا النهاردة هتصرف معاه. المهم انتي اهدي بس يالا حبيتي تعالي نجهز علشان نفطر مع الولاد.
*كلمة بس طبعا اللي قاله ياسو ده واحساسه هو واخته شئ بسيط من اللي بيحس بيه اولاد في سنهم. لما طول الوقت يسمعوا ويشوفوا خناقات بين ابوهم وامهم. وزعيق وصوت عالي واوقات كمان بيكون فيه سب والفاظ مايصحش تتقال. علشان كدة ياريت من البداية نختار صح نختار اللي يحبنا ويحترمنا . نختار اللي يقدر وقفتنا معاه. نختار اللي يتحملنا وقت تعبنا وضعفنا . مش اللي يرمينا في اول ازمة. ولو اختارنا صح والدنيا غيرتنا زي مابتغير حاجات كتيير. ياريت نفوق ونرجع لنفسنا نشوف احنا اتغيرنا ليه ونرجع زي زمان. نرجع نحب بعض نفهم بعض. هو يشوف مقصر معاها في ايه وجعها في ايه. وهي كمان تشوف قصرت في ايه وليه هو وهي بقوا في صدام دائم. الكلام ده انا بقوله لنفسي قبلكم انا مش ملاك ولا عايشة في دنيا وردي. لا . بس لازم لما الدنيا تتقفل ونوصل لطريق مسدود. نعمل وقفة ونعرف هنكمل ازاي. علشان احنا مابقناش لوحدنا . احنا ربطنا معانا جيل تاني اطفال . مستقبلهم وحياتهم مرتبطة بينا. احنا اللي هنخرج رجالة وبنات تتعرف وتتجوز ويانربي راجل بحترم مراته ويقدرها. وست تحب زوجها وتسعده. او راجل بالاسم بس ذكر مش اكتر . مش عارف اصلا يسعد نفسه علشان يسعد غيره وست غير مسؤلة انانية مش عارفة تحب بيتها وتسعد زوجها واولادها. ارجوكم راعوا ربنا في نفسكم واولادكم. #ريحانه الجنه.
في اوضة فادي&حلا
فادي بيلبس وهو متعصب وحلا بتلف حاوليه وهي بتزعق وتعيط.
حلا بصوت عالي: ممكن ترد عليا بقي كنت فين امبارح.
فادي بعصبية: قولتلك كنت مع ناس في شغل اقولهالك كام مرة انا تعبت انتي ايه فهمك تقيل.
حلا: لا يا سي فادي فهمي مش تقيل بس انت اللي كداب.
فادي جز علي سنانه من الغضب من اتهامها ليه بالكدب. وقرب منها وهو بيحزرها.
فادي: انتي بتقوليلي انا كداب. قسما بالله لو كررتيها تاني ياحلا ولسانك ده طول عليا لوريكي اللي عمرك ماشوفتيه. انتي سامعة.
حلا حاولت تتماسك وماتبنش خوفها منه.
حلا بثبات: ايوة نسيب الموضوع الاساسي ونتكلم في تفاهات. انت كنت فين وماتقوليش شغل. اصلك انت مش بتشتغل في مكان مااعرفهوش.شغلك مع اونكل رعد وبابي واخواتي. اشمعنا هما بقي ببرجعوا بدري وانت كل يوم والتاني سهر للصبح ايه بتشتغل من وراهم.
فادي ببرود وهو بيحاول مايتعصبش: اظن يا غبية هانم فهمتك قبل كدة اني ليا شركة خاصة بيا ضمن المجموعة دي بتاعتي انا وشغلها خاص بيا انا. وماحدش فيهم حتي ابويا ليه دخل بيها. ولا بإتفاقاتها. انتي بقي بتتوهمي اني بخونك ده شئ يخصك انتي حرة في دماغك. لكن ما تقرفنيش معاكي كل شوية انا تعبت منك ومن البيت ده. انا مابقتش طايق ادخل البيت من النكد اللي فيه زهقت.
حلا : زهقت وقرفت ؟! لا بجد وانا ايه بقي ! انا فين! انا اللي مرمية في البيت 24 ساعة زيي زي اي حاجة في البيت . اخروج بإذنك. اصحابي ازرهم مستحيل هما يزوروني وبٱذنك. امي اللي بيني وبينها كام متر. ازورها بإذنك. فوني ولابي مترقبين من سيادتك. حياتي محاصرة كإني جارية عندك. مالهاش رأي . مالهاش كلمة. كل اللي مطلوب منها انها دايما تكون مستعدة لاستقبال البرنس فادي. وبتضحك وسعيدة . وماتتكلمش. وقت مايحن عليها يرجع ويقعد معاها وبعد كدة يسيبها زي الكلبة وحيدة.
وبدموع عمرك جيت قولتلي مالك بتعيطي ليه . اختني في حضنك طمنتني. يوم ماتلقيني ببكي . تتعصب وتزعق وابقي انا الزوجة النكدية اللي مابتفهمش. بقالي سنين بطلب منك نسافر لوحدنا نخرج . نسهر. والرد دايما مشغول. مع ان.ابوك وابويا واخواتي بيشتغلوا معاك.واخواتي بيسعدوا اخواتك.شوف النور والسعادة اللي محاوطة جوري وكارما. شوف كريم وامير. بيعاملوهم ازاي . كل يوم والتاني خروج وسهر وسفر. الضحكة مش بتفارقهم. بلاش ابوك وابويا بيعاملوا امي وامك ازاي. بيقولوا انك تشبه اونكل رعد.لا مستحيل لو كنت تشبه كنت خلتني سعيدة زي ماما همس. لكن انت اناني قاسي مابتفكرش غير في نفسك. انا بجد زهقت وتعبت. وقعدت علي الكرسي وهي بتبكي بحرقة وقهر.
فادي كان بيسمعها وللحظة حاس ان كلامها صح ووجعه في نفس الوقت. لكن غروره وعنده . خالوه يكابر.
فادي بعناد: انتي اللي بتعملي كدة ومكبرة الموضوع. انا زيي زي اي راجل انتي اللي متدلعة زيادة عن اللزوم. ابوكي دلعك وامك هنا هانم . اللي مقوياكي وبتملي دماغك بأفكار تخرب بيها بيتنا وحياتنا. انتي اللي بتسمعي كلامها ومصدقاه. انا مش مطلوب مني اسيب شغلي وفلوسي واقعد جنب الهانم ادلعها واسفرها. انسي انا مش كدة . واحسنلك ماتديش ودنك لامك.
حلا بإستغراب: امي؟ امي اللي بتسهر للفجر! امي مثلا بتدبل عليك ! بتظلمك !
بس تعرف امي لو عندها حق في حاجة فهي اننا ماننفعش لبعض. واصلا جوازنا كان غلط انت ماحبتنيش . انت حبيت وجودي جنبك من صغرنا. حبيت اوامرك ليا. تحكماتك فيا وقبولي وخضوعي ليك قواك ذيادة. بس خلاص انا مش هتحمل تاني. احنا لازم نسيب بعض.
فادي كان بيلبس الكراڤات في المرايا. وانصدم من طلبها ولف ليها بتساؤل.
فادي: نسيب بعض؟! اللي هو ازاي!
حلا بحزن وخوف منه :ننننننطلق.
فادي وهو بيعصر قبضة ايده بقوة وغيظ وبيجز علي سنانه من الغضب من الكلمة اللي عمره ما فكر فيها من يوم جوازهم.
فادي بغضب قرب منها ومسكها من دراعها وضغط عليه: الكلمة دي تشليها من قاموس حياتنا نهائي. انتي مراتي لحد ماتموتي. واياك اسمعها تاني. انتي من يوم جوازنا بقيتي ملكي . ملك فادي الحديدي واللي عمره مابيسيب حاجة تخصه ابدا . ويوم مابيسيبها بيكسرها وينهيها . علشان مستحيل حد ياخد حاجة كانت ليه ابدااا. فاهمة ابدااا.
وزقها بقوة ووقعها علي السرير وهو خارج لف ليها وبعناد. وعلي فكرة مش انتي عايزة تعرفي انا كنت فين وبسهر مع مين. ااه انا كنت مع واحدة ومش واحدة بدل الواحدة 10 وكل يوم هعمل كدة وانا كدة واذا كان عاجبك. ووريني بقي الكونتيسة هنا امك هتعمل ايه معايا.
وخرج ورزع باب الاوضة وراه . وهو خارج لقي رعد واقف وباين عليه الغضب وواضح انه سمع كلامهم وخصوصا كلامه الاخير. فادي ابن رعد ومش الشخصية اللي تخاف ولا تتهز حتي لو من ابوه. بس هو بيحبه وبيحترمه. فإتوتر من شكل ابوه ونظراته ليه.
فادي : صباح الخير يا بابا.
رعد بيبصله من غير مايرد.
فادي بعصبيه : بابا حضرتك لو سمعت حاجة ياريت تفهمها صح . لان انت ماتعرفش ايه اللي حصل.
رعد قرب منه وبهدوء يرعب كاعادته: كلامنا مش دلوقتي ولا هنا . لما نوصل المجموعة لينا كلام تاني.اتفضل اسبقني علي تحت واياك تمشي كلنا هنفطر مع بعض.
وبصله بغضب وتحزير. نزل فادي بعصبية ورعد اتنهد بحيرة وخبط علي حلا.
حلا بدموع : اتفضلي يا ماما همس.
دخل رعد وابتسم بهدوء. انا بابا رعد مش ماما همس انفع ولا الف وارجع تاني.
حلا استغربت انه هو بنفسه عندها هو قليل جدااا مابيدخل اوضة حد منهم . وقفت وهي بتمسح دموعها.
حلا: يا خبر يا اونكل ازاي بس حضرتك شرفتني بجد.
رعد بصلها بحنية وهي صعبانة عليه: ممكن اعرف القمر ده بيعيط ليه ومين الغبي ده اللي يزعل الجمال ده كله.
حلا بإنكسار وضعف بكت ذيادة ورمت نفسها في حضنه . رعد ضمها بحنية وطبطب عليها.
رعد: ششششش. بس ماتبكيش ابدااا طول ما انا عايش. زي ما همس دايما تقولك احنا كمان ابوكي وامك . وطول ما انا جنبك اتطمني. وانا هتصرف مع فادي بنفسي بس المهم مااشوفكيش حزينة كدة تاني. اتفقنا.
هزت راسها في حضنه .
حلا: اتفقنا.
رعد خرجها من حضنه بهدوء وهو بيمسح دموعها. مش عايز اشوف دموعك تاني. حبيبتي لازم تكوني
فاهمة انك عندي تمام زي جوري وكارما. وموضعك انتي وفادي هتصرف فيه اكن واحدة منهم هي اللي في الموقف ده. بس في حاجة مهمة لازم تفهميها. ان لو كلام فادي مافهوش حاجة واحدة صح ولازم تنفذيها فهي ان كلمة طلاق دي تنسيها خالص وتشليها من قاموس حياتك. سامعة.
حلا بدموع: بس يا اونكل فادي بيوجعني اوي وبيجرحني اوي. انا تعت بجد تعبت.
رعد اتنهد بحزن: معلش يا بنتي ان شاء الله انا هعرف ازاي اخليه يرجع لحضنك من تاني.
حلا بسخرية: حضني! وهو فادي من امتي كان في حضني. فادي عمره ماطبطب عليا. عمره ما اخدني في حضنه بحنيه زي حضرتك دلوقتي. هما بيقولوا فادي يشبهك . لا مايشبهكش. انا بشوف منك حنية علي ماما همس ماشوفتعاش في حياتي. فادي قاسي اوي يا اونكل اوي. وبكت اكتر.
رعد بتأنيب لنفسه لان هو اللي قوي شخصية فادي واخوه من صغرهم. بالشكل ده. بس ماكنش ابدااا يقصد يكونوا قاسين علي اقرب الناس ليهم.
رعد حضنها بيهديها: خلاص يا حلا يا بنتي كفاية . انا اللي غلطان في طريقة تربيتي ليه. بس اوعدك زي ماكنت السبب في انه بقي كدة. لازم هخليه يتغير.
حلا: فادي عمره ماهيتغير.
رعد ابتسم : عيب انا مهما كان رعد الحديدي. وانا اللي مربي فادي. واللي مربي قرد عارف ايه؟
حلا ضحكت غصب عنها :ههههههههنهه. لعبه يا اونكل.
رعد :هههههههه. عجبتك انتي قرد دي صح.
حلا: ههههههه بصراحة اه يستاهلها.
رعد قرصها من خدها: صحيح اولكم . اخركم ستات وتموتوا في المصايب. يالا تعالي بقي ننزلهم احسن فادي تلاقيه بيطلع دخان من ودانه علشان انا قولتله مايمشيش ويستني نفطر كلنا. بس انا بقي عايزك تتصرفي عادي جداااا. اكن ماحصلش حاجة اوك.
حلا ابتسمت : اوك . تعرف يا اونكل. انا مش هقولك لو كنت اصغر كام سنة لا. لو بس ماكنتش حمايا وبابا فادي. كنت اتجوزتك هوا. انت اصلك ماتتسابش ابداا لقطة يا اونكل.
رعد :هههههههههه. انا بتعاكس بقي. احمدي ربنا ان همس ماسمعتكيش. هي حنينة اه بس لحد عندي وبتتحول بتغير بجنون. انتي ماتعرفيش. كانت دبحتك.
حلا: هههههه. لا لا انا عارفة هي بتحبك وتغير عليك قد ايه وبصراحة عندها حق.
رعد: طيب يالا بينا .
نزلوا كلهم واتجمعوا علي الفطار. وفادي طبعا قاعد متعصب وعايز يمشي واللي معصبه اكتر انه شايف حلا بتتكلم مع الولاد وتضحك وكمان مع رعد وهمس. اكنهم مش متخانقين. ومستغرب لانه ساسبها بتعيط. وشهاب نزل اخر واحد. وقعد وهو كمان بيتخانق مع نفسه ومش طايق حد.
شهاب بعبوث:صباح الخير
كلهم : صباح النور
همس : مالك يا حبيبي فيك ايه.
شهاب : مافيش انا كويس.
همس: مال خدك انت اتخبطت في حاجة ولا ايه.
شهاب اتعصب وساب الفطار وقام:مافيش حاجة انا ماشي عندي معاد مهم.
رعد: طيب كمل فطارك يا بني .
شهاب: لا معلش انا ماليش نفس. وخرج شهاب بسرعة.
فادي بنرفزة :انا كمان ماشي هستني حضرتك في الشركة عن اذنكم.
رعد : لا استني هنمشي سوا.
فادي : حضرتك اصلا كل واحد بيروح بعربيته. فامافرقتش. كمل حضرتك فطار ونبقي نتكلم في الشركة عن اذنكم.
خرج فادي وهو بيبص لحلا بغضب.
رعد وشوش حلا: شايفة هيتجنن اذاي وهو شايفك بتضحكي ولا همك . لو كنتي قاعدة تعيطي بقي كان زمانه منتصر وبيضحك. علشان تبقي تسمعي كلامي وانتي مغمضة.
حلا ابتسمت: طبعا هسمع كلامك. ربنا يخليك لينا.
همس: بتقولوا ايه.
رعد غمز حلا: بصراحة البنت دي بتعاكسني ابقي اتصرفي معاها انتي بقي.
وقام علشان يمشي. ورجعلها تاني . ااه وعلي فكرة بتحسدك عليا ابقي بخريني بقي .
مشي رعد وهمس مسهمة ومش فاهمة حاجة.
همس: هو فيه ايه؟!
حلا ابتسمت : هههههه. انا هقولك اصل اونكل رعد جالي الاوضة و………….. فهمتي.
همس بحب: ههههههههههه. ايوة عنده حق انا ممكن اكل اي واحدة تبصله بسناني. رعد ده حب عمري كله . حبيبتي ربنا يسعدك مع فادي ويبعد عنكم المشاكل. وماتقلقيش زي مارعد وعدك . ان شاء الله هو هيتصرف. اعتمدي عليه.
حلا اتنهدت بأمل: ان شاء الله.
………………………………..
في ڤيلا مروان &وريما
مروان بيلبس هدومه وريما دخلت الاوضة .
ريما: حبيبي الفطار جاهز يالا علشان ماتتأخرش.
مروان ابتسم وقرب منها وباس ايديها: تسلم ايدك يا حبيبتي . يالا بينا.
نزلوا علشان يفطروا. بس مروان ملاحظ ان ريما مابتكلش وسارحانه. مسك ايديها.
مروان: مالك ياقلبي مابتكليش ليه.
ريما اتنهدت بحزن: ماليش نفس.
مروان اتنهد بيأس منها: وبعدين انتي هتنسي امتي الموضوع ده. وترضي بالامر الواقع. حبيبتي ده نصيب ربنا قدرلنا كدة لازم نرضي ونعيش بقي.
ريما بإنهيار: ارضي بإيه؟ارضي اني ماابقاش ام؟! ارضي اني افضل محرومة من طفل اخده في حضني طول العمر؟! ارضي اني افضل اتحسر كل لما اشوف طفل بيلعب مع امه ؟! ارضي اني اموت من الوجع كل لما اشوف واحدة حامل واتمني ابقي زيها في يوم ؟! ارضي بإيه قولي ارضي بإيه؟!
مروان دمع علشانها من حزنه عليها. وحضنها بقوة.
مروان: اهدي يا ريما اهدي يا قلبي . انا والله عارف انه غصب عنك. بس بإيدينا ايه نعمله جربنا كل حاجة وسافرنا وانتي اتبهدلتي عمليات وبردوا مافيش فايدة. يبقي لازم نرضي بقضاء ربنا بقي وننسي.
ريما خرجت من حضنه وهي بتمسح دموعها. لا لسة في حاجة ماجربنهاش. ومافيش قصادنا غيرها.
مروان: حاجة ايه دي؟!
ريما نأجر رحم زي رعد وهمس زمان.
مروان ملامحه اتغيرت وانصدم: نأجر رحم؟! انتي اتجننتي صح مستحيل طبعااا
ريما : لا ماتجننتش. انا عايزة ابقي ام وانت كمان نفسك تبقي اب. يبقي ليه لا.
مروان بعصبية: علشان حرام وماينفعش اجيب ابني من الحرام . انسي انا مستحيل اعمل كدة واخلف من اي واحدة والسلام لمجرد ابقي اب.
ريما بعصبية:ليه يعني ماهو رعد عملها من سنين.
مروان: اولا رعد كان بيحب همس من قبل العملية. والعينة كانت منه هو وهي مش من مها الله يرحمها. ثانيا لما ده حصل همس كانت مراته. ثالثا بقي لان كل ده من الاول كان لعبة وفي شبههة حرمانية. . اديكي شوفتي حصل ايه. والتوأم الاتنين ماتوا. وبردوا ماخلفوش بالعملية . خلفوا لما ربنا اراد بعدها. انسي ياريما انا مستحيل اعمل كدة مستحيل.
ريما بدموع وانكسار: انت مش حاسس بيا مش حاسس بوجعي وقهرتي والنار اللي جوايا.
مروان بيحاول يهدي هو عارف ان الفكرة دي من يأسها صح غلط هي مش بتفكر غير انها تبقي ام وبس. قرب منها وحضنها.
مروان: حقك عليا انا اسف اني اتعصبت عليكي معلش. بس اصل الكلام اللي قولتيه يفور الدم. انا لو عايز ابقي اب فاعايز ده منك انتي مش من اي واحدة والسلام. حبيبتي علشان خاطري شيلي الفكرة دي من دماغك خالص. وانا هكلم الدكتور تاني يمكن نقدر نعمل اي حاجة جديدة . بس انتي توكلي علي الله وقولي يارب.
ريما بدموع: يارب.. يارب.
………………………………..
في ڤيلا أكمل &تسنيم التهامي
اكمل وتسنيم بيفطروا سوا ونزلت چنا تفطر معاهم.
چنا بإبتسامة : صباح الخير .
اكمل وتسنيم بإبتسامة: صباح النور .
اكمل : هاه القمر جاهز.
چنا اتنهدت بحيرة: والله يا بابي انا مش مرتاحة لشغلي مع حضرتك. انا الحمد لله مرتاحة في مكتبي وشغلي.
اكمل بقلة صبر: هنعيده تاني يا جنا وبعدين بس معاكي. مش خلاص قفلنا الموضوع ده. وبعدين هو انا طلبت منك تقفلي مكتبك شغلك ماشي زي ماهو. لكن مايبقاش ابوكي بيعمل اكبر منتجع سياحي وانتي عندك مكتب ديكور وحد غيرك اللي يعمل التصميمات والديكورات والفرش. انتي اولي من الغريب.
چنا بخنقة: الكلام ده لو حضرتك لوحدك مش معاك شركة.
اكمل : وانا مش مشارك حد غريب . رعد الحديدي وعدي دول اصداقاء عمري من ايام الجامعة مش ناس مااعرفهاش.
چنا بقلق: بس يابابي انا بسمع عن رعد وابنه انهم صعب جدااا. وتعاملهم متعب. وخصوصا ابنه فادي.و انا بصراحة خايفة.
اكمل بغضب: خايفة ؟! من ايه تبقي بنت اكمل التهامي وتخافي. ازي. يابنتي ده شغل وبعدين هما معروف عنهم الجدية والحزم مش حاجة وحشة يعني. وبعدين انا معاكي خطوة بخطوة. ولما عرضت علي رعد وعدي انك انتي اللي تمسكي الديكوات والديزاين ماحدش اعترض بالعكس رحبوا جدااا. ورعد بنفسه. نفسه جدااا يتعرف عليكي. ولو علي فادي. ماتخافيش منه قوي قلبك. وهو عارف انك بنتي واياك بس يفكر يضايقك بكلمة يشوف انا هعمل ايه.
چنا بقلق: ربنا يستر.
تسنيم: ايوة كدة خاليكي قوية زي امك ماتخليش حد يقف قصاد طموحك وشغلك والخوف ده تنسيه فاهمة. انا في سنك كنت قاعدة في دبي وعملت شركة بحالها هناك وكنت بتعامل مع وحوش. بس كنت قدها وقدرت اخليها تقف علي رجليها. واحنا معاكي . ماشي ياقلب مامي .
تسنيم ابتسمت :فاهمة يا مامي. ربنا يخليكم ليا دايما.
نزل حمزة كالعادة مستعجل وبيجري. وبيخطف الاكل.
تسنيم بتعب: يا ابني ماتقعد تاكل زي الناس ينفع كدة. تاكل علي الواقف.
حمزة بإستعجال: معلش يا سمسمة اصلي عندي بروڤة النهاردة ودي اخر بروڤة قبل الحفلة هنسافر النهاردة بالليل.
چنا بسخرية: آل يعني حاجة مهمة . دي حفلة هايفة زيك انت واصحابك.
حمزة: بس يا حقودة. ده احنا بنعمل احلي ميوزك. وقريب اوي اسم الفرقة هيسمع وهتشوفي.
چنا بسخرية: لما نشوف اخرتها معاك. يارب تفلح.
حمزة: خاليكي انتي بس في حالك انتي . عندهم حق العيال في النادي يقولوا عليكي المعقدة.
تسنيم: ولد اياك تقول لاختك كدة تاني انت فاهم .
حمزة: . الله وانا مالي هما اللي بيقولوا . وبعدين بصراحة معاهم حق.
اكمل بتحزير: اتاسف حالا لاختك يا تافه. احسن اوقف الڤيزا حالا.
حمزة بحزن مصتنع: لا لا وعلي ايه حقك عليا يا قمر انتي يا چنا يا عسل. انا اسف.
چنا : وهو في حد بيزعل من المجانين. روح يا بني ربنا يشفيك انت واصحابك.
حمزة : ماشي لما ارجع هبقي اوريكي شغل الجنان علي حق. يالا سلام.
اكمل : طيب. يالا بينا يا چنا علشان مانتاخرش علي الاجتماع.
جنا : يالا يا بابي.
………………………………..
في ڤيلا عدي&هنا
عدي في اوضته بيلبس هدومه وهنا معاه. وشايفها مسهمة وسارحانة
عدي رفع حاجبه : مالك ؟
هنا اتنهدت : مافيش.
عدي بقلق: ربنا يستر اصل انتي مادمتي ساكتة كدة وسرحانة يبقي يا زعلانة يا بتحضري مصيبة. هاه انهي فيهم.
هنا بعصبية: انا؟ انا بعمل مصايب ! ماشي يا عدي انت اصلك شكلك كبرت وخرفت.
عدي : هههههههههه. مين ده اللي كبر ما تخلي بالك من كلامك يا ماما. دانا ديدو. اصغر من ولادك. المهم بس ماتغيريش الموضوع مالك بجد.
هنا بحزن: صعبان عليا حال بناتي. حظهم وحش غير اخواتهم الصبيان دول متهنين. ودول متعوسين.
عدي عقد حاجبه: اعوذوا بالله ماتعوسين ليه بس كدة ماهما كويسين اهو مالهم !
هنا بإستغراب: انت بتسأل ؟! يعني انت مش شايف ان حظ بناتي الاتنين متعوس لما يوقعهم في ولاد رعد الاتنين. والاتنين طالعين لابوهم جبروت قاسين ومابيتفهموش. حلا واتجوزت فادي واهو مطلع عنيها. بيعاملها معاملة العبيد. وهي راضية وساكتة . ومايا دايبة في شهاب وهو ولا حاسس بيها مش شايفها اصلا. ولسة لحد النهاردة عندها امل انه يكون ليها في يوم من الايام. انا تعبت نفسي اشوفهم متهنين زي ما ولادي مهنين بنات رعد.
عدي اتنهد بقلة صبر: علي فكرة انا شايفك مكبرة الموضوع. اولا بقي فادي بيحب حلا وبيحبها جدااا كمان. كون ان هو بقي طبعه صعب وحبه مختلف وبيحبها بطريقته هو ومابيعرفش يعبرلها عن حبه زي ماهي بتتمني. ده شئ يرجعلها هي. لانها عارفة الكلام ده من زمان ومع ذالك وافقت واتجوزته لانها بتحبه وماحبتش غيره ولعلمك انا لو عندي شك واحد في المليون ان فادي مش بيحب حلا كان مستحيل اجوزهاله.ويارت ماتدخليش بينهم الا اذا هما طلبه ده . اما بقي مايا فهي اللي عملت كدة في نفسها. امتي شهاب وعدها بحاجة. بالعكس ده زي ماانتي قولتي مش شايفها اصلا غير اخت ليه وبنت صاحب ابوه. ومش ذنبه علي فكرة . الحب مش بيإيده. هو مش عارف يحبها المفروض بقي هي تشوف حياتها وتحاول تلاقي انسان يحبها ويقدرها. وياريت انتي تفهمي الكلام ده زيها. وتنصحيها لو بتحبيها صحيح.
هنا اتنهدت بحيرة: حاضر ححاول اتكلم معاها تاني . يالا علشان الولاد مستنينا تحت .
نزلوا الاتنين وكان كريم قاعد جنب جوري وماسك ايديها وبيبوس ايدها وبيكلمها وهي بتبتسم. وجنبهم. أمير وكارما بيتوشوشه.
وبيضحكوا . هنا كان جواها غيرة طبيعية غيرة ام شايفة ولادها بيعملوا زوجاتهم معاملة برينسيسات. وبناتها مش سعداء في حياتهم . بصتلهم بحزن وقعدت. اما عدي كان فخور ان ولاده. عارفين ازاي يعاملوا زوجاتهم. ويفهموهم والضحكة مش بتفارق وشهم. ودي حقيقة الست اللي بتضحك ووشها منور وهي جنب جوزها هو السبب في الضحكة دي. هو اللي بيخلي اللي حاوليها يحسدوها ويغيروا منها . مش هي اللي تكون مكسورة وحزينه وهي شايفة غيرها سعيدة. والعكس كمان علي فكرة الست اللي بتقدر تحتوي جوزها بتكون السبب في سعادته. المهم. عدي وهنا قعدوا.
عدي بإبتسامة: صباح الخير ياولاد.
كلهم : صباح النور.
مايا نزلت من فوق :صباح الخير ازيكم.
كلهم : صباح النور.
عدي: مايا عايزيك قبل ماتخرجي.
مايا : حاضر يا بابي.
كريم بيوشوش جوري: بقولك ايه ماتيجي نخطف يومين ونسافر سهل حشيش.
جوري:ياريت بس الولاد والدراسة.
كريم: ياقلبي فكك. ماما وطنط همس ماجودين هياخدوا بالهم منهم. المهم انتي موافقة.
جوري: طبعا يا بيبي موافقة.
كريم غمزها :خلاص يا وردتي. هظبط الشغل معاهم النهاردة ونخلع بالليل اوك.
جروي ابتسمت: هو انا قولتك بحبك النهاردة.
كريم ابتسم: اممم مش فاكر تعالي نطلع فوق ونفتكر سوا.
جوري:هههههههههه. مابتصدق انت.
كريم: ههههههه. اكيد.
أمير بيكلم كارما: كوكي قوليلي تحبي تسهري النهاردة فين علشان اظبط الدنيا.
كارما: حبيبي اي مكان. وبعدين مش لازم احنا لسة كنا ساهرنين من يومين مش مهم.
امير: ازاي بس يا كوكي ده النهاردة بالاخص لازم نسهر.
كارما: اشمعن النهاردة!
أمير قرب منها وبص في عنيها:علشان زي النهاردة انا اخدت اهم قرار في حياتي. اتشجعت وصارحتك بحبي ولقيتك مستنياني اتكلم. كنت هطير من الفرح. يوم مايتنسيش.
كارما ابتسمت بحب: بحبك يا امير بحبك اوي اوي.
امير: باس ايديها. وانا عمري ماههحب غيرك يا حبيبتي.
………………………………..
في مبني المخابرات العامة.
شهاب داخل بحضور يخطف العين كاعادته بس كان موده متعصب وغضبان من اللي حصل مع تمارا. دخل مكتبه وقابله مؤمن صاحبه. مؤمن شاف آثر الضربة بتاعة تمارا استغرب.
مؤمن: صباح الخير يا بوب. مالك ايه الخبطة دي.
شهاب جز علي سنانه وخبط المكتب بغيظ. ورفع سماعة الفون وكلم مسعد بيشتغل معاهم في الجهاز.
شهاب : مسعد تعالي بسرعة.وقفل الفون.
مؤمن: مالك يا بوب في ايه.
شهاب: مؤمن الله يكرمك ابعد عني انا مش طايق نفسي علي الصبح بدل ما غيظي يطلع عليك انت.
مؤمن بإستغراب : ياليلة بنبي شكلك قافش قفشة بنت تيت.
مسعد دخل : تحت امرك يا باشا.
شهاب طلع فونه وطلع صورة تمارا.
شهاب: شايف البنت دي عايز تاريخ اللي جابوا اهلها من يوم ماتولدت. وبسرعة هي ساكنة معايا في نفس الكومبوند.
مسعد: علم يا باشا ابعتلي الصورة علي الواتس. والليلة تكون عندك كل بياناتها.
شهاب : نعم يا خويا ليلة مين. انا عندي اجتماع مع اللواء عدلي اخرج الاقي المعلومات كلها بدل ما اعلقك انت بدلها.
مسعد : حاضر يا باشا تحت امرك عن اذنك.
خرج مسعد ومؤمن الفضول هيقتله .
مؤمن: ماتقولي يابوب مالك البت دي عملت ايه.
شهاب مسح وشه عايز يهدي: هقولك…….
مؤمن سمع شهاب وفطس من الضحك: ههههههههه. اقسم بالله بت رجولة بالبوكس. دي بت عايزة تتكرم ده رجالة بشنبات ماقدروش يعملوها وهي لبستك البوكس كدة علي خوانة. هههههههههه
شهاب بنرفزة: مؤمن اتكتم احسنلك. وربنا اطلع كل غيظي منها فيك.
مؤمن بيكتم ضحكه وفون شهاب رن اللواء عدلي ورد
شهاب : ايوة….. . تحت امرك يا فندم دقيقة واكون عند سيادتك. وقفل.
انا داخل لاللواء عدلي ولما اخرج هروقك يامتخلف.
خرج شهاب ووصل عند مكتب اللواء عدلي وخبط ودخل.
شهاب: تحت امرك يا فندم.
اللواء عدلي: اتفضل يا سيادة المقدم. علشان تتعرف علي الرائد تمارا عز الدين اللي هتكون معاك في المهمة الجديدة .
شهاب بيلف علشان يشوف هي مين انصدم لما لقاها تمارا هي البنت اللي قابلها الصبح. وهي كمان كانت مصدومة وهي شايفاه قصادها.
شهاب بصدمة: انتي؟!
تمارا بصدمة اكبر: انت ؟!
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية مهمة حب (رحم للإيجار 2))
