رواية 24 ساعة حرب الفصل السادس 6 بقلم عادل عبدالله
رواية 24 ساعة حرب الجزء السادس
رواية 24 ساعة حرب البارت السادس
رواية 24 ساعة حرب الحلقة السادسة
مقهي المعلم بدري
سيد الجن يجلس علي المقهي وبجواره المعلم بدري .
المعلم بدري : ياض يا جن انا ورجالتي معاكم .
سيد الجن : يعني هتدينا سلاح يا معلم ؟
المعلم بدري : السلاح اللي في بالك مينفعش علشان ده ممكن بجيبلنا مؤبد ، احنا هنعمل معاهم الصح من غير بنادق ولا خراطيش .
سيد الجن : ازاي يا معلم ؟
المعلم بدري : انت معاك كام راجل ؟
سيد الجن : من اصحابي واهل الحارة مش اقل من ١٠٠ راجل .
المعلم بدري : وانا تحت ايدي مش اقل من ١٥٠ راجل ، كلنا هنهجم عليهم في وقت واحد .
سيد الجن : وهنهجم عليهم امتي وازاي ؟
المعلم بدري : الساعة ٢ قبل الفجر بساعتين .
سيد الجن : مش قادر استني يا معلم ، كل ما افكر انت البت موئه والبت الصغيرة هناك تحت ايديهم نار بتولع في جسمي وبيبقي هاين عليا ارمي نفسي في النار ولا أني افضل مستني كده .
المعلم بدري : هيرجعوا ، الليلة هيرجعوا يا سيد بس انت خليك ورايا في اللي هقولك عليه .
سيد الجن : ماشي يا معلم ، بس لامؤاخذة انت هتقف معانا ليه ؟
المعلم بدري : علشان العيال بتوع العشش شافوا نفسهم زبادة عن اللزوم والظاهر نسيوا هما مين وانا مين ، علشان كده لازم نقرص ودانهم ونعلم عليهم ، وبالمرة ارجع البت الغلبانة لأمها ثواب لوجه الله ولا انت فاكر اني مبعملش حاجة لوجه الله .
سيد الجن : لا يا معلم مش قصدي .
المعلم بدري : انت يا جن واللي معاك هتدخلوا الاول بالشوم والسيوف وبعدكوا بدقيقتين ادخل انا ورجالتي معاكم بالسيوف والمولوتوف واللي ييجي في وشنا هنخلص عليه وهيبقي معانا بره عربية فيها انابيب بوتاجاز لو حكمت الظروف هندخل نولع في العشش واللي فيها .
سيد الجن : معلش يا معلم أنا ليا رأي تاني ، انتوا تبدأوا بالهجوم من اول العشش واحنا نلف ونهجم عليهم من الناحية التانية في نفس الوقت وهما هيكونوا في النص مش هيلاحقوا علي الضرب من الناحيتين .
المعلم بدري : ماشي يا سيد بس عايزين ٢٠ او ٣٠ ست جدعة تدخل معانا علشان يفتشوا البيوت اللي جوه لغاية ما يعرفوا مكان البنتين .
،،،،،،،،،،،،،،،،،،،،
في منزل بلوظة
ام بلوظة : يا قلبي انتي مأكلتيش من الصبح ، كلي يا منة علشان خاطري وبعدين هوديكي لأمك .
الطفلة الصغير ” منة ” : لأ انا عايزة أروح لماما دلوقتي .
أم بلوظة : يا قلبي الدنيا ليلت وانتي مأكلتيش حاجة من صباحية ربنا .
منة : انتي من الضهر يا تيتا بتقولي هتوديني لماما ومش ودتيني .
أم بلوظة : طيب ابوكي زمانه راجع دلوقتي لما يرجع هقوله يرجعك لأمك علطول .
منة : لا يا تيتا بابا مش هيرضي يرجعني لماما ، رجعيني انتي او اتصلي بماما تيجي تاخدني .
أم بلوظة : طيب كلي الاكل اللي قدامك ده كله وانا هتصل بيها لما تخلصي الاكل ده كله .
منة : بجد يا تيتا ؟
أم بلوظة : ايوة يا قلب تيتا ، يلا كلي يا قلبي .
،،،،،،،،،،،،،،،،،،
حارة بلوظة
يأتي صبي يجري ويقول : ألحق يا عم بلوظة .
بلوظة : فيه ايه ياض ؟
الصبي : المعلم بدري وسيد الجن ورجالتهم هيهجموا علي الحتة الساعة ٢ بالليل .
يقف بلوظة وسط ابناء منطقته ويقول بصوت عالي : سمعتوا يا رجالة جايين يهجموا علينا الساعة ٢ بالليل يعني جايين يموتونا واحنا نايمين ، الساعة دلوقتي ١١ يعني باقي ٣ ساعات ، في اقل من ساعة يكون كل ولاد الحتة جاهزين بالسلاح هنروح عزبة بيومي وهنجيب عليها واطيها .
مسعد : احنا كلنا معاك يا بلوظة ، سمعتوا يا رجالة مش عايز راجل ولا ست ولا عيل الا ما يكون معانا بالسلاح .
تقف سيدة عجوز وتقول : يا بني بلاش ، الجاري علي الشر ندمان ، والضارب والمضروب خسران .
بلوظة : انتي ست طيبة يا حجة لكن الناس دي مينفعش معاهم كده ، خليكي انتي يا حجة ولو خايفة علي عيالك خليهم جنبك .
وبعد اقل من ساعة كانت منطقة العشش علي أهبت الاستعداد لخوض المعركة المنتظرة .
العديد من السيارات والتكاتك والدرجات النارية تقف في الحارة وبدأ الكثير من شباب ورجال العشش في تجهيز انفسهم ووضع اسلحتهم في العربات والتكاتك .
،،،،،،،،،،،،،،،،،،،،
مقهي المعلم بدري
يجلس المعلم بدري علي المقهي يشرب الشيشة وفجأة يظهر صبي يجري نحوه ويقول : يا معلم ، يا معلم بدري .
المعلم بدري : فيه ايه ياض ؟
الصبي : الراجل اللي اسمه بلوظة وكل الناس اللي في العشش معاهم سلاح وجايين بعربيات ومتوسيكلات يهجموا علي الحته .
المعلم بدري يرمي الشيشة من يده : طيب روح بسرعة قول لسيد الجن خليه يجيلي بسرعة .
حارة سيد الجن
سيد الجن يقف وسط زملاؤه وجيرانه يتكلمون بصوت غير مسموع وفجأة يظهر الصبي ويجري نحوهم ويقول : يا عم سيد ، يا عم سيد يا جن .
سيد الجن : فيه ايه ياض ؟
الصبي : المعلم بدري بيقولك تروحله بسرعة علشان بلوظة ورجالته جايين يهجموا علي الحته دلوقتي .
سيد الجن : مين اللي قالك كده ياض ؟
الصبي : انا اللي شوفتهم بعينيا يا عم سيد .
مقهي المعلم بدري
يظهر سيد الجن ومعه عدد كبير من الشباب والرجال وبعض الصبية ويسيرون بسرعة تجاه المقهي بينما يقف المعلم بدري وسط عدد كبير من الرجال والشباب وفي ايديهم جميعها الاسلحة البيضاء والشوم وزجاجات المولوتوف .
المعلم بدري : بلوظة نوي يخليها خراب واحنا نلبس طرح لو مش علمناهم الادب .
سيد الجن : أحنا نطلع ونقابلهم بره علي الشارع قبل ما يدخلوا الحارة .
المعلم بدري : تبقي غشيم ، احنا هنفضي السكة علشان يدخلوا الحارة بعربياتهم وموتسيكلاتهم ولما يبقوا في نص الحارة هنقفل الحارة عليهم من الناحيتين وفي نفس اللحظة من فوق اسطح البيوت النسوان والعيال هينزلوا عليهم بالحجارة والازايز وبعدها ندخل نخلص عليهم .
سيد الجن : احنا مش عارفين الاسلحة اللي معاهم .
المعلم بدري : متخافش انا عامل حسابي فيه سلاح الي وخراطيش جوه القهوة علشان الظروف ، مش عايزين نضيع وقت زمانهم جايين ، ادخلوا استخبوا جوه مداخل البيوت ومحدش يخرج الا بأشارة مني .
في قسم الشرطة
تقف سعاد تبكي امام الضابط ،،،،،
سعاد : بنتي اتخطفت يا سعادة البيه .
الضابط : اتخطفت حقيقي ولا بلاغ كيدي ؟
سعاد : والله يا بيه حقيقي ، بنتي منة اتخطفت .
الضابط : اتخطفت امتي وكانت فين ؟ وازاي ؟
سعاد : اتخطفت وهي رايحة المدرسة الصبح وابوها اللي خطفها .
الضابط : انتي متطلقة منه ؟
سعاد : ايوه .
الضابط : انا بحذرك لو بتقولي كده بلاغ كيدي علشان تسجنيه هتتسجني انتي .
سعاد : يا بيه انا عندي شهود شافوا صاحب طليقي وهو بيخطفها الصبح وحصلت خناقة الصبح لما حاولوا يمنعوه .
الضابط : وعرفتي منين ان اللي خطفها صاحب طليقك ما يمكن واحد ميعرفش جوزك من الاساس ؟
سعاد : يا بيه انا اتصلت بطليقي واتأكدت منه ان بنتي عنده ، وكمان انا عارفة ان له واحد صحبه بيخطف العيال الصغيرة ، واكيد هو اللي سلطه يخطفها .
الضابط : بتقولي ايه ؟ صحبه بيخطف العيال !!!
سعاد : ايوه يا بيه .
الضابط : ببخطفهم بيهبب بيهم ايه ؟
سعاد ” بخوف ” : سيادتك الحكومة انتوا اللي تعرفوا لما تقبضوا عليه .
الضابط ” بعصبية وصوت عالي ” : انتي اي حاجة تعرفيها لازم تقوليها حالا .
سعاد : يا بيه انا سمعت من بلوظة طليقي قبل ما نطلق ان مسعد صاحبه ده بيخطف العيال الصغيرين وبيبعهم لدكتور .
الضابط : وبعدين كملي ، ساكن فين طليقك ده وصاحبه مسعد ده فين و مين الدكتور ده ؟
سعاد : انا هقول لسيادتك علي العنوان اهو .
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية 24 ساعة حرب)
