رواية لن اعشق سواك الفصل الخامس والعشرون 25 بقلم منى مرزوق

نور : انا بوولد
عمر بتوتر : ايه! بتولدي طب ايه؟ بنعمل ايه دلوقتي؟
نهله : بنعمل ايه؟ هنروح المستشفى يابني، يلا بسرعه ننزل بيها لعربيتك
عمر : ايوه حاضر يلا
*بينزلوا كلهم و بيروحوا على المستشفى*
عمر للممرضة: عايزين الدكتور بسرعه مراتي بتولد
الممرضة : طب احنا هندخلها غرفة الاستقبال و الدكتور هينزلها دلوقتي
عمر : ينزل حالا لو سمحتي حالا
الممرضة : حاضر يا افندم حضرتك اهدى بس
*بعد خمس دقايق بينزل الدكتور و بيكشف على نور*
عمر : ايه يا دكتور طمني، هي كويسه؟ البيبي كويس؟
الدكتور : متقلقش هي كويسه، بس هو احنا هنضطر نولدها قيصري لان الجنين وضعه غلط و ده فيه خطوره عليه و عليها
عمر : طب.. طب يعني القيصري هيبعد عنهم الخطر؟
الدكتور : بإذن الله، بس احنا لازم ندخلها العمليات حالا
نور بدموع : ماما.. اتصل ب ماما خليها تيجي
عمر : حاضر يا حبيبتي هتصل بيها متخافيش
___________________________________________
عمر : عدى اكتر من ساعه، هي ليه مخرجتش؟ طب محدش خرج يطمنا ليه؟
احمد : اهدى يا عمر بإذن الله خير متقلقش
نهله : سلم يا رب، ان شاء الله تقوم بالسلامه
*بعد نص ساعه بيخرج الدكتور من العمليات*
بيجري عليه عمر : ايه يا دكتور طمني ارجوك
الدكتور بإبتسامه : الحمدلله ربنا بعتلك بنوته زي القمر
عمر بفرحه : الحمدلله يا رب احمدك و اشكر فضلك، طب و نور يا دكتور قصدي مراتي طمني عليها هي كويسه؟
الدكتور : الحمدلله، هي صحيح الولادة كانت متعسره بس هي بخير
عمر : طب هو انا ينفع ادخل اشوفها يا دكتور؟
الدكتور : اه تقدروا تشوفوها و الف مبروك
عمر : الله يبارك فيك يا دكتور
*بيدخل عمر اول واحد و وراه الباقيين*
عمر و هو بيقرب على نور : حمدالله على سلامتك يا نور
نور : الله يسلمك
*بيبص عمر على البيبي و دموع الفرحه بتتجمع في عينيه*
عمر و هو بيلمس البيبي : حمد الله على السلامه يا استاذه، نورتي حياتي و دنيتي
نهله : حمد الله على سلامتك يا حبيبتي
نور : الله يسلمك يا ماما
نهله و هي بتبص على البيبي : اللهم صل على النبي قمر الله اكبر، ربنا يحفظها و يحميها يا رب
ٱيه بدموع : مبروك يا قلبي الف مبروك، تتربى في عزكم يا رب
مالك : يعني انا بقيت عمو يا ولاد خلاص و هجيب شيبسي و حلويات؟
احمد : و هتدفع عيديه في العيد و تجيب فوانيس في رمضان، بص انت هتتشرد
مالك بضحك : وماله ياخويا على قلبي زي العسل
احمد : اه طبعا، دي هتبقى احلى حاجه جت عيلتكم… احم بعد حضرتك طبعا يا طنط
نهله : ههههههه الله يحفظك يا حبيبي
عمر : ايه يا نيره هتفضلي واقفه عندك كده مش هتشوفي البيبي؟
نيره : انا مش قادره اصدق نفسي، يعني ده خلاص بقى حقيقي؟
عمر : تقريبا كده اه
نيره بتوهان : حمد الله على سلامتك يا نور يا حبيبتي و على سلامة *بتبص بإنبهار* السكررر الصغنن ده
نور : الله يسلمك يا رب
احمد : طب ها قررتوا تسموها ايه؟ ولا هتفضل مجهولة الهوية كده؟
عمر بيبص لنور بإبتسامه : مامتها هي اللي تسميها
نور : ا.. انا مفكرتش في اسم ليها
مالك : يعني بقالك 9 شهور حامل فيها و مكلفتيش خاطرك تفكري لها في اسم
نيره : يوه وانت مالك ياعم هو انت شغال مفتش؟
ٱيه : بس يا جماعه خلوها تعرف تفكر *بإبتسامه* اسألي قلبك يا نور
نور وهي بتبص للبيبي وبعد لحظات صمت : مليكه…. اسمها مليكه
___________________________________________
عمر : حمدالله على سلامتك نورتي بيتك
نور بعدم اهتمام : الله يسلمك شكرا ( و بتطلع بالبيبي لاوضتها)
عمر لنفسه : قدامنا المشوار طويل ، بس ولا يهمك يا نور خديه عهد عليا هعوض قلبك عن اي حزن و هخليكي تسامحيني و تحبيني كالعاده من اول و جديد
___________________________________________
*تك تك* صوت خبط عالباب
نور بتنهيده : ادخل
عمر بإبتسامه : صباح الخير
نور وهي بصه لبنتها : صباح النور
عمر : احم انا قولت اطلع اطمن عليكم و اشوف لو محتاجه حاجه
نور : لا شكرا
عمر : طب هو انا ممكن اصبح على مليكه؟
نور بلا مبالاة : بنتك اتفضل
عمر بيقرب من مليكه و بيشيلها : صباح الخير يا ملوكتي، صباح الفل يا قلب بابا *بيبوسها* اكبري يلا عشان نلعب سوا و احكيلك حواديت كتير
نور في سرها : ربنا يشفي، محسسنى ان البت هتنطق و تقوله خلصانه استناني انا جايه
عمر : قولتي ايه؟
نور : بقول هاتها معلش عشان اغير لها
عمر : اه تمام، انا هنزل اجيب شوية حاجات و جاي
نور ببرود : مسألتش انا على فكره
عمر : احم بجد؟ طب ماشي انا بس يعني بقول من باب العلم بالشئ يلا انا نازل سلام
*بعد ما بيخرج عمر بتبتسم نور ابتسامه بسيطه وبعدين بتسرح و بتختفي الابتسامة*
عمر : الو
احمد : ايه يا عم حد يتصل بحد الصبح بدري كده؟ انت مامتك مقالتش ليك قبل كده ان دي قلة ذوق طب؟
عمر : همم خلصت رغي؟
احمد : اه عشان لسه صاحي محضرتش غيره
عمر : طب كويس انزل قابلني في كافيه……
احمد : هتفطرني هناك يعني؟
عمر : لا اركن كرشك على جنب دلوقتي و انزلي بس
احمد : ياعم هاخد كرشي معايا و ننزلك سوا
عمر : طب ياخويا انجز يلا و متتأخرش
___________________________________________
احمد : ايه ياعم المستعجل،هربان من مليكه ولا ايه؟
عمر : لا هربان عشان ام مليكه
احمد : حصل حاجه تانيه ولا ايه؟
عمر : لا لسه على وضعها،بتربيني
احمد : معاها حق، الصراحه ياسطا انت محتاج تربيه
عمر : مش كده بردو ؟
احمد : اوي
عمر و هو بيبص حواليه : هو مفيش حاجه حاده هنا احدفك بيها؟
احمد : لا قولي بجد ناوي تصلح الدنيا مع نور ازاي؟
عمر : ما انا للأسف جايب حضرتك النهارده عشان تفكر معايا ممكن اعملها ايه عشان تسامحني
احمد بغرور مصطنع : جيت للراجل المناسب يابني
عمر : ياعم انت هتعملي فيها اسامه منير، اتنيل وقول هعمل ايه
احمد : بص انت محتاج تعمل حاجه تفاجئها
عمر : ايوه
احمد : حاجه تبهرها
عمر : صح
احمد : حاجه تدهشها
عمر : ما تتهبب تقول هي ايه ام الحاجة
احمد : اسمع يا سيدي
عمر : ابهرني
احمد : امممم بصراحه ياسطا مش عارف اصل انت جرحتها اوي يعني
عمر : احمد انت عديت الترابيزات وانت داخل الكافيه؟
احمد : لا معدتش ياسطا
عمر : طب عدهم وانت خارج دلوقتي
احمد : ياعم طب ادينا فرصه نفكر، بص انا عندي اقتراح جامد بس جرئ شويه
عمر : سترك يا رب، قوول
احمد : ايه رأيك تعمل زي الاستاذ تامر حسني في عمر و سلمى؟ يعني تروح تحت البيت و تجيب لها ورد و………..
بيقاطعه عمر : و انده عليها و اقولها نور تتجوزيني؟
احمد : لا هتقولها نور سامحيني
عمر : يابني مش قولتلك تعد الترابيزات وانت خارج
احمد : تؤ طب هقولك شوفت فيلم 365 يوم سعادة؟
عمر : لا انا شوفت مسلسل ابواب الخوف و لو مقومتش مشيت دلوقتي هدخلك باب منهم
احمد : خلاص ياعم انا ارجع البيت اكمل نوم و اقعد انت اوصل لحل مع نفسك
عمر : طب يلا اتوكل انت على الله
احمد : اشطه يا عمنا، سلام
*بعد ما بيمشي احمد* عمر لنفسه بتنهيده: وبعدين معاكي يا ست نور… يلا خليني اجرب و يا رب نوصل لحل
___________________________________________
نهله : طمنيني بقى عامله ايه مع الست مليكه؟ طبعا بتصحيكي الليل كله صح؟
نور : والله ليل و نهار انا مش بلحق انام ساعتين على بعض، اهي مولوده من شهر مشوفتش انا نوم فيه غير كام ساعه يتعدوا ع الصوابع
نهله : طب و عمر مش بيساعدك و بيقعد بيها شويه عشان ترتاحي؟
نور بتبلع ريقها و بترد : هو بيعرض عليا كتير يقعد بيها وانام انا شويه، لكن انا مش برضى
نهله : وليه يابنتي بس؟
نور بحزن : مش عايزه مساعده منه يا ماما، انا بخلاف مليكه ف انا مش عايزه يكون بينا تعامل اصلا
نهله : اسمعي يا نور، انتي اكتر واحده عارفه انتي ايه عندي و كمان عارفه كويس اوي موقفي من عمر من بعد اللي عمله معاكي، بس انا يابنتي شايفه انه بيحاول بكل جهده انه يراضيكي و يصلح اللي عمله
نور : وانا ترابيزه ولا كرسي كسره و هيرجع يصلحه بسهوله يا ماما؟ انا انسانه و الاهانه اللي شوفتها منه لا تغتفر ابدا
نهله : انتي بتقولي كده من ورا قلبك
نور : لا يا ماما انا……….
بتقاطعها نهله : متحاوليش تنكري يا نور، انتي بتحبي عمر انتي عشقاه و اللي يعشق تفضحه عينيه
نور بإبتسامه سخريه : ده كان زمان قبل اللي شوفته منه
نهله : وبعده و لٱخر حياتكم صدقيني، شوفي انا معاكي في موقفك منه و زعلك طبعا ليكي كل الحق فيه، لكن يابنتي انا ام ليكي زي ما انا ام ل عمر و اخاف على مصلحتك زي نيره بالظبط، انا عايزه اقولك حاجه و تحطيها حلقه في ودنك، الراجل لما بيعشق واحده بيكون في حبها زي الطفل اللي مش بيشوف ولا بيعرف فى الدنيا غير امه و مش بيحس بالامان غير معاها و بيغير عليها حتى من ابوه و اخواته… لكي ان تتخيلي ان في راجل بيشوفك كده و مشاعره ناحيتك بالشكل ده
نور : بس……..
نهله : من غير بس، فكري مع نفسك يا بنتي و ادي روحك فرصه و حاولي تسمعيه .. حافظي على حياتك و حبك و بيتك يا نور ، عشانك و عشان بنتك
نور وهي بتحرك راسها بالموافقة : هحاول يا ماما هحاول
نهله : ربنا يهدي سركم و يسعدكم يا بنتي… يلا انا همشي انا عشان اروح اجهز الغدا للأساتذة اللي في البيت
نور بإبتسامه : ماشي يا ماما و متنسيش تسلميلي عليهم
نهله : الله يسلمك يا حبيبتي يوصل، يلا سلام
نور : سلام
*بتخرج نهله من البيت و بتعمل مكالمة تليفون*
نهله : الو.. ايوه يا سيدي لسه نازله من عندكم اهه
عمر : طب و ايه الاخبار طمنيني
نهله بإبتسامه : وافقت تحاول تديك فرصه
عمر : قولي والله
نهله : جرا ايه يا واد انت هتحلف امك وبعدين ارجع ياخويا عالبيت و شوف بنفسك، بس اسمع اوعى تبين انك عرفت حاجه و حاول معاها زي ما انت متعود
عمر : حاضر متقلقيش والله و بجد انا متشكر اوي يا ماما ربنا ما يحرمني منك يا رب
نهله : ربنا يهديكم لبعض و يفرحكم ببنتكم يا رب
عمر : يا رب يا ست الكل
___________________________________________
نور : الو.. ايوه يا عروستي
ٱيه : هو انا لو غلطت فيكي هيجرى حاجه؟ والنبي ما هيجرى حاجه
نور : ههههههه طب انا عملت ايه طيب؟
ٱيه : لا ولا حاجه انتي اميرة الامراء مبتعمليش حاجه
نور : حبيبتي حبيبتي
ٱيه : حبك برص
نور : يوه في ايه ما كنتي ماشيه كويس
ٱيه : انتي يا حي*وانه انتي مش عارفه ان فرحي بعد 3 ايام؟
نور : عارفه طبعا و بعِد الايام والله يا بيبي
ٱيه : طب ولما انتي عارفه يا بيبي ليه متنيلتيش لحد دلوقتي جيتي تقعدي معايا؟ انا مش قعدت معاكي اسبوع كامل قبل فرحك؟
نور : طب بالعقل كده بس انا هاجي اقعد معاكي ازاي بالضفدعه اللي ف ايدي دي؟
ٱيه : بلاش حجج يا نور، مليكه دلوقتي عندها شهر ماشاء الله يعني عادي جدا تنزلي بيها و تيجي تقعدي معايا
نور : يابنتي والله ما هتستحملي عياطها طول الليل و ابوكي و امك هيطردونا في انصاص الليالي
ٱيه : لا من الناحية دي متشيليش هم انا امي و ابويا بيسهروا ل 6 الصبح و معندهمش اي مشكلة ده انتي بالعكس هتسليهم والله
نور : طب هو في حاجة صغنونه ادد كده احنا نسيناها
ٱيه : خير حاجة ايه؟
نور : عمر مثلا
ٱيه : لا لا لا ده كده استهبال بقى
نور : ايه في ايه؟
ٱيه : هو عمر ممكن في خيالك يفكر يرفض؟ ده انا واحمد كنا قتلناه
نور : يا واد يا شراني
ٱيه : اه يا حبيبتي انتي ملكية خاصة على اسمي
نور : يا جدعان وربنا اخويا مش صاحبي
ٱيه : حبيبي يابا خلاص كده مات الكلام، بكره الصبح افتح عينيا الاقيكي محضرالي الفطار
نور : تحت امر معاليكي يا سمو الزف*ته
ٱيه : حبيبتي طب هسيبك انا بقى في رعاية الله
نور : سلام يا قدري
*بيوصل عمر البيت و بيطلع لنور اوضتها*
عمر : سلام عليكم
نور : وعليكم السلام
عمر : عامله ايه النهارده
نور : كويسه الحمدلله
عمر بإبتسامه وهو بيبص على مليكه : طبعا النومه اللي هي نايماها دلوقتي دي فيها سهره للصبح
نور : اه اكيد.. احم عمر انا كنت عايزه اقولك حاجه
عمر بإهتمام : اتفضلي
نور : هي ٱيه كلمتني دلوقتي و طلبت مني اروح اقعد معاها لحد الفرح
عمر : تقعدي معاها فين؟ في البيت؟
نور : اكيد اومال هقعد معاها فين؟
عمر : ازاي يعني؟ ده شئ طبيعي؟
نور : ايوه يا عمر انا اقرب حد ليها وبعدين هي كمان جت قعدت معايا اسبوع قبل فرحي
عمر : هي مكانتش متجوزه ولا معاها طفله
نور : انا قولتلها كده لكن هي مصممه وقالتلي ان مليكه مش هتعمل ازمه يعني و كمان هي هتضايق جدا ومعاها حق اكيد لان انت عارف انا و ٱيه بالنسبة لبعض ايه و كمان هي كانت معايا ساعة جوازي و مسابتنيش ابدا
عمر بتنهيده : طيب يا نور على راحتك
نور : تمام، انا هقوم احضر حاجتي و حاجة مليكة عشان اروحلها بدري قبل ما الوقت يتأخر
عمر : ماشي انا هدخل ٱخد شاور و اغير هدومي و انزل اوصلكم
نور : ملوش لزوم تتعب نفسك انا هاخد تاكسي على طول
عمر : تمام انا مش هتأخر هجهز على ما تخلصوا و ننزل
نور بتبص ف الارض وهي بتحاول تداري ابتسامتها و بترد : ماشي اوكي
_
*في العربية*
عمر و هو بيبص على مليكه : تؤ طب ينفع اقعد 3 ايام من غير ما اشوف القمر ده ؟
نور : عادي لو جيت تشوفها عند ٱيه
عمر : لا خليني اغيب عنها كام يوم *بيبص لنور بإبتسامه* يمكن اوحشها
نور و هي بتبلع ريقها : على فكره انا سايبه ليك اكل في الفريزر ابقى بس حطه في الميكروويف و هيبقى تمام
عمر بضحكه خفيفه بعد ما حس انها اتوترت : متقلقيش على اكلي انا هعرف اتعامل، انتي بس ابقي خدي بالك من نفسك و من مليكه
نور : بإذن الله
*بعد ما بيوصلوا بيت ٱيه*
نور : بقى بالذمه في عروسه قمر كده
ٱيه : ايوه ياختي كلي بعقلي حلاوة، عارفه يا نور لولا انك جيتي النهارده و نفدتي بعمرك انا كنت هسود عيشتك
نور : هههههههه لا و على ايه انا معاك ل بعد شهر العسل يا حب انت يا قمر
ٱيه : لا شهر العسل ايه مش للدرجه دي ما تبطلوا تسول بقى
نور : اه يا زبا*له
ٱيه : معلش يا اختاه لكل شئ ٱخر
نور : خلصانه انا افورت شويه بردو
ٱيه : طب ما تحكيلي كده عن امورك و مستجداتك مع الافندي بتاعك و قوليلي وصلتي لإيه
نور : يعني اهه عادي
ٱيه : ايوه اللي هو عادي ازاي يعني؟
نور : بصي هحكيلك هو…….
ٱيه : يا شيخه ده انتي جاحده حرام عليكي بقى كل اللي بيعمله ده و مش عايزه تسامحيه
نور : انتي نسيتي يا ٱيه اللي عمله معايا؟ انتي يعني شايفه ان ده شئ يتسامح بسهوله
ٱيه : لا يا نور بس متنسيش ان انتو الاتنين كنتو ضحية الكلام الز*باله اللي وصلوا من الله يجازيها سمر
نور : ايوه بس….
ٱيه : لا من غير بس عشان هو خدلك حقك و رد كرامتك قدام كل الموجودين من غير ما يهتم ب رد فعل خالته ولا مامته ولا اي حد
نور : اووف مش عارفه بقى يا ٱيه انا محتاجة لسه وقت
ٱيه : وقت؟ طب قومي ياختي عشان الغدا قومي يلا انا عصافير بطني بتصوصو
( في محل هدايا فخم)
عمر : حلو اوي، الحاجات طلعت زي ما طلبتها و احسن
– الحمدلله انها عجبت حضرتك
عمر في سره : يا رب تعجبها هي
– افندم، حضرتك بتقول حاجه؟
عمر : احم لا انا متشكر اوي
– عفوا،شرفتنا يا افندم
___________________________________________
نور : يااه اول مره اتغدى من غير ما مليكه تقوم تعيط و تطلع عيني
ٱيه : ايوه يابت احنا شقتنا مهدئة للاعصاب، اصبري بقى اعملنا كوبايتين شاي عشان نظبط الموود
نور : ده ايه الدلع ده يا حب ده انا………
*بيقطع كلامهم رنة تليفون نور*
– الو.. ايوه يا عمر
– عمر : ايوه يا نور بقولك ايه معلش ممكن تنزليلي تحت العماره دقيقه
– ‏نور : ليه في حاجه؟
– ‏عمر : لا بس عاوز اديكي حاجه
– ‏نور بإستغراب : ماشي اوكي.. سلام
ٱيه : خير في ايه؟
نور : معرفش عمر بيقولي انزله تحت العماره عايز يديني حاجه
ٱيه : اوباا لا قوليله مش كده يا عمر ده احنا مكملناش 5 ساعات بعيد عن بعض
نور : ياختي اتوكسي خليني انزل اشوف ايه الموضوع وانتي خلي بالك من مليكه لحد ما اطلع
ٱيه : عيني يا اوختي
*بتنزل نور لعمر اللي بيكون واقف قدام عربيته و معاه شنطه كبيره”
نور : خير في ايه؟
عمر : اتفضلي *بيمد ايده ليها بالشنطه*
نور : ايه ده؟
عمر : جبتلك الهوت شوكليت بتاعك و مكسرات من اللي بتحبيها عشان لو حبيتي تسهري انتي و ٱيه تتسلوا بيهم
نور : هو شكرا جدا بس هي كل الشنطه دي فيها هوت شوكليت و مكسرات ؟
عمر : لا فيها حاجه تانيه
نور : حاجه ايه؟
عمر بإبتسامه : ابقي شوفيها لما تطلعي فوق
نور : تمام
*بيمشي عمر و بتطلع نور لٱيه*
نور : ايه مليكه صحيت؟
ٱيه : خدي نفسك بس هي نايمه ياستي، المهم طمنيني عمر كان عايز ايه؟
نور : جايبلي هوت شوكليت اللي بحب اشربها و مكسرات عشان لو سهرنا نتسلى
ٱيه : في كل الشنطه دي؟ ده جايب غيط مكسرات و خزان هوت شوكليت بقى
نور : لا هو بيقول جايبلي حاجه تانيه بس مش عارفه ايه هي، تعالي نفتح نشوف
*بتفتح نور الشنطه بتلاقي صندوق شكله تحفه و حجمه متوسط و اول ما بتفتحه بيطلع صوت موسيقى هاديه وبتلاقي جوه الصندوق صور ليها بتتعرض بشكل مصغر على سكرينه صغيره و فيه اضواء ملونه جوه الصندوق تشبه لأضواء الفوانيس ف رمضان و مع الصندوق بتلاقي علبه مكتوب عليها (eat and read) ب تفتحها بتلاقي فيها شيكولاته كتير بتفتح اول شيكولاتايه و بتلاقي معاها ورقه بتقرا المكتوب فيها و بيكون “زي اول مره شوفتك وانتي في ثانوي كان الجو كأنه بطعم الشيكولاته”
فتحت تاني شيكولاتايه و كان مكتوب عالورقه فيها “زي يوم ما اعترفت لك بحبي و فجأة لون خدودك قلب على بامبي”
-نور كل ده عماله تقرا و متنحه ومش قادره تصدق ان عمر عمل كده عشانها وانه فاكر بالظبط ادق تفاصيل بينهم
ٱيه و عينيها بتطلع قلوب: هو اللي انا شيفاه ده بجد؟
نور هزت راسها بإبتسامه بمعنى ايوه
ٱيه : طب يا نور يا حبيبتي، شايفه الشباك اللي جنبك ده؟
نور : اه ماله؟
ٱيه : هتتحدفي منه لو مروحتيش كلمتي عمر دلوقتي و قولتيله بحبك يا تاج راسي
نور : هههههههههه بس يابت هو انتي فكرك يعني انا اتثبت بالحركات دي
ٱيه بصتلها بصه بمعنى والنبي؟
نور : احم ماشي الهديه حلوه و حركة شيك يعني بس بردو انا كرامتي غاليه
ٱيه : كرامتك اه، طب يا نور يا حبيبتي انا هخرج اروح على اوضتي عشان لو قعدت معاكي ثانية كمان همسح بكرامتك الغاليه دي اسفلت الشارع كله
نور : طيب ياختي
*بعد ما بتخرج ٱيه بتقعد نور تبص على الحاجات اللي جابها عمر و هي بتكلم نفسها* : وبعدين معاك يا عمر انت عايز توصلني لفين تاني، *بتنهيده* يا رب ساعدني انا تعبت و احترت
*‏بيقطع كلامها مع نفسها صوت رنة تليفونها بتبص بتلاقيه عمر* بترد : الو ..ايوه يا عمر
عمر : عجبتك الهديه؟
نور بتوتر : احم اه ايوه حلوه.. اوي، انا متشكرة جدا يعني
عمر : العفو بس هو انا بالنسبة لي شكرا اللي انا عايزها هي انك تسامحيني و تديني فرصه اصلح اللي عملته
نور : تاني يا عمر؟
عمر : تاني و تالت و مليون، انا مش هستسلم لحد ما تسامحيني و ترجعي زي الاول ليا و لحضني تاني يا نور
نور : انا بس……
عمر بيقاطعها : ارجوكي يا نور بلاش تتكلمي دلوقتي، حاولي تفكري شويه و تدي نفسك و تديني فرصه، و اهه تقدري تعتبري ال3 ايام اللي هتقعديهم عند ٱيه مُهله عشان تقدري تفكري فيهم، وانا متأكد ان قلبك مش هيطاوعك تفضلي بعيده عني اكتر من كده، توعديني يا نور انك هتفكري؟
نور بتبلع ريقها و بترد : هحاول وربنا يقدم اللي فيه الخير
عمر : وانا متفائل… يلا هسيبك انا تشوفي ٱيه و مش هطول عليكي
نور : تمام
عمر : سلام يا كل الخير
نور بإبتسامه صغيره : سلام
*بعد ما بتقفل الخط* نور لنفسها : لا حقيقي انا كرامتي دي لو لاقياها في كيس شيبسي كنت هحترمها اكتر من كده، بس هو على فكره هو السبب، ايوه هو اللي بيخشلي من ثغراتي… بس لا انا لازم اهدى كده وافكر بعقلي و اركن قلبي المهزء ده على جنب شويه *بتصحي مليكه من النوم و بتبدأ تزن* بتبص لها نور و بتقول : خير انتي كمان مش كفايه عليا ابوكي و الصداع اللي عمله في دماغي، بس اقولك سر يابت يا كوكي بصراحة كده يعني هو صداع حلو…..تؤ يا ربي انا ايه اللي بهببه ده بـس، تعالي يابنتي لما اغيرلك قبل ما البرج اللي فاضل في عقلي يطير
___________________________________________
نور : يا صباح الفل، ست العرايس صحيت يا حااره
ٱيه : ههههههههه ست العرايس منامتش من امبارح وحياتك
نور : يوه هو الحب ولع في الدره ولا ايه؟
ٱيه : لا يا عسل بس.. *بتنهيده* انا قلقانه و متوتره حاسه اني خايفه كده مش عارفه ليه
نور : يمكن عشان ده الطبيعي مثلا
ٱيه : بجد؟
نور : اكيد يا ماما هو انتي رايحه رحله انتي رايحه تتجوزي يعني رايحه تبني حياه من اول وجديد مع شخص تاني غير اهلك
ٱيه : ايوه فعلا انا كل تفكيري في اني خايفه نفشل او ان حياتنا تبقى بائسه او اني مقدرش اشيل المسئولية دي
نور بإبتسامه : كل ده تفكير سليم و مظبوط بس مش المفروض يكون مصدر قلقنا بالعكس ده المفروض يكون حافز لينا عشان نقدر نبني حياتنا بالشكل اللي هيسعدنا و يسعد الشخص اللي معانا ده غير انك مش هتكوني شايله المسئولية و هم كل الكلام ده لوحدك، انتي معاكي احمد و انتي عارفه هو بيحبك ادد ايه و هو طيب و جدع ازاي
ٱيه : عارفه والله ويمكن هي دي الحاجة اللي مطمناني
نور : يبقى خلاص نشيل بقى الكلام الفاضي ده من دماغنا ونخلينا في ليلتنا يا عرووسه، بصي انا هدخل اغير ل مليكه و اغير هدومي، عايزه اطلع من الاوضه الاقيكي سبقانا على الباب عشان نطيير على الكوافير
ٱيه : خلصانه بس مش يعني ناكل حاجه كده الاول
نور : اهي طفاستك دي اللي المفروض توترك مش الجواز
ٱيه : يووه بقى يعني انزل من غير اكل؟ يرضيكي اهبط؟
نور : لا ياختي متخافيش عامله حسابي و هنطلب سندوتشات ناكلها في الكوافير، بس ارجوكي حاولي تحافظي على ام شكلنا عشان هيبقى منظرنا هباب وانا بجري وراكي و ماسكه لك الفستان وانتي بتجري على الحمام لو نسيتي نفسك في الاكل
ٱيه : متقلقيش انا عامله حسابي
نور : بجد يعني مش هتدوسي في الاكل؟
ٱيه : لا هدوس عادي بس جايبه معايا ف الشنطه فوار
نور : ف.. فوار؟ لا انا هدخل للبت بنتي احسن بدل ما تشليني او تجيبي اجلي يا جاحده
___________________________________________
احمد : انا ٱسف سامحوني.. انا مش هقدر اتجوز ٱيه
مالك : ……….
احمد بغرور مصطنع : طب بذمتكم ينفع اتجوزها و احرم باقي البنات من القمر ده؟
مالك : لا والله انت مش هتبقى حرمتهم انت هتبقى رحمتهم صدقني، ياعم ده انت لولا انك استحميت مكناش هنعرف نميز شكلك
احمد : بس ياض يا حقود يا منفسن، انت من ساعة ما شوفتني بالبدلة وانت هتولع من اناقتي
عمر : لا هو انا كده اللي هولع بس فيكم انتو الاتنين لو ما انجزتوش عشان الزفه خلاص جهزت و العربيات على وصول
احمد : احم طب مش هتتكلموا معايا و تسمعوني شوية نصايح قبل الجواز يا شباب
مالك : اه انت فعلا محتاج نصايح من ناس ناضجه و عاقله زي حالاتي
احمد : انسوا النصايح خلاص ، بلا نيله ده انتو محتاجين اللي يوجهكم وبعدين صحيح يعني انا الاصل و انتو تلاميذ في الفصل
عمر و هو بيبص له بقرف : تعالى طب اما ارشك شوية برفان عشان الريحه…. قصدي يعني ريحة البرفان حلوه
احمد : ايوه ده ب 1300 جنيه ده برفيوم اصلي ده
مالك : برفيوم ؟! الله يرحم ماء التواليت
احمد : يكش يقع عليك تواليت باللي قاعد عليه
عمر بعد ما انفجر في الضحك : تؤ خلاص بقى رغيكم ده، عموما خلينا نتكلم جد شويه اسمع ياعم الكلمتين دول و حطهم حلقه في ودنك، مبدئيا انت لازم دايما تحسس مراتك انك بقيت بكل عيلتها يعني مبقتش مجرد جوزها وبس لا انت بقيت ابوها و اخوها و ابنها كمان، حاول دايما تكون السند اللي يغنيها عن اي حد، خليك حنين و بالك طويل عشان هما البنات عموما بينرفزوا بس لو اتمالكت اعصابك و حاولت تحتوي غضبها هتلاقيها هديت و بقت زي الطفل الصغير قدامك،(بنظرة حزن) اوعى تخلي التسرع و الاندفاع يخليك تعمل اي حاجه ترجع تندم عليها بعدين
مالك بعد ما خد باله من نظرة عمر : احم وسع يابني انت و هو خلوني اقولكم انا كمان الكلمتين اللي عندي *بغرور مصطنع* ركزوا بقى مع اهل الحكمه اللي بجد، بما انك هتبدأ حياة جديدة ف اجباري لازم تشيل من دماغك اي حاجه هبله او تجربة فاشله شوفتها او اتعاملت مع اصحابها، عشان هما ناس ليهم شخصياتهم و ظروفهم المختلفه عنك، الحاجة الوحيدة اللي ممكن تستفادها من تجاربهم هي انك تحاول تبعد عن اي غلط عملوه او مشكله وقعوا فيها، و ده عشان حياتك تبقى فعلا مريحه و ناجحه و المشاكل تقل، مش بقول انها هتختفي لكنها هتقل و هتعرفوا تتعاملوا معاها بسهوله اكبر
احمد : خلاص خلصتوا كده؟
مالك : تقريبا اه
احمد : طب انا بشكركم جدا والله بس مش دي النصايح اللي كنت مستنيها منكم يعني يا شباب
عمر : اومال كنت مستني ايه ياخويا؟
احمد : ياعم بقولك فرحي النهارده يعني لاغيني كده و افهمها لوحدك
عمر متمثلا البراءة : يعني انت قصدك ايه؟ عايز اقتراحات اغاني للفرح؟ بص الغزالة رايقه دي هتولع الفرح كده، اغنيه جامده الصراحه
احمد : وحيات طنط نهله؟
مالك : تؤ عايز ايه انت طيب احنا عايزين نساعدك بس فهمنا يعني
احمد : تصدقوا انتو الاتنين عيال ناقصه، وبعدين انا بسأل مين كتكم خيبه في خيبتكم ده انا اعلمكم انتو و عشره زيكم ده انا دارس بره و جوه يا جربوع منك ليه
عمر : هههههههههه خلاص يا وحش احنا معتمدين عليك ارفع راسنا بقى يا اسد الشله
*صوت كلاكسات عربيات*
مالك : خلاص يا جدعان الزفه وصلت اهيه يلا بينا عشان منتأخرش على العروسه
___________________________________________
نور بدموع : اللهم بارك ايه القمر ده، احلى عروسه شوفتها في حياتي والله
ٱيه : يا نوور بصي انا بتلكك عشان اعيط وانتي بتعيطي يعني انا هنهار كده والله
نور : ههههههههه لا ابوس ايدك بلاش تبوظي الميك اب اصبري بعد الفرح لما ٱجيلك نبقى نقعد نعيط انا وانتي و بابا و ناهد و كلنا
مامت ٱيه : يلا يا ٱيه احمد وصل و الزفه جت يا حبيبتي
ٱيه و هي بتاخد شهيق و زفير : حاضر انا قايمه اهه
نور بصوت واطي : اهدي كده وزي ما اتفقنا بلاش توتر
ٱيه بإبتسامه : حاضر بس خليكي جنبي يا نور
نور : انا جنبك و معاكي لٱخر عمري يا روحي، يلا بينا نخرج لهم بقى يا ست العرايس
*بتخرج ٱيه من الكوافير و اول ما بيشوفها احمد بيبتسم بفرحه و بيجري عليها*
احمد : سؤال بعد اذنك هو انا بجد اتجوزت القمر ده؟ يعني بعد الفرح هروح مع حضرتك بيت واحد؟
ٱيه بكسوف : تؤ بس بقى عشان انت عارف اني لما بتكسف بعيط
احمد : هههههههههه لا ده على كده ربنا يستر النهارده دي هتبقى مناحه
ٱيه بتخبطه خبطه خفيفه في صدره : طب امشي يلا خلينا نركب العربيات عشان نلحق نروح القاعه
*في الوقت ده كان عمر كل تركيزه على نور اللي كانت خاطفه قلبه قبل عينه*
عمر بإبتسامه بعد ما راح لنور : احم هو يعني ينفع كده؟
نور بإستغراب : هو ايه اللي ينفع؟
عمر : ينفع كل الناس تشوف القمر ده؟
نور و هي بتبص في الارض : ش.. شكرا ربنا يخليك
بيقرب منها عمر و بصوت خافت بيقولها : انتي بتموتيني بكسوفك و خدودك اللي بتحمر دي
نور بعد ما وشها احمر اكتر : هو.. هو احنا مش المفروض نتحرك بردو عشان كده هيسبقونا يعني
عمر و هو بيضحك : طيب ياستي تعالي يلا نركب العربيه و…. ايه ده انا نسيت مليكه، هي فين ؟
نور : مالك متقلقش هي مع ماما
عمر بإبتسامه : نسيتيني بنتي و نفسي، هتعملي فيا ايه تاني بس يا نور ، عموما يلا عشان منتأخرش
*بيركبوا العربيه و بيشغل عمر الكاسيت على الاغاني الرومانسية اللي بتحبها نور*
بتبدأ نور تندمج و تدندن مع الاغاني بصوت واطي و عمر بياخد باله و بإبتسامه بيقولها : طب انا شايف اننا نفكنا من الفرح و الليله دي و نطلع نقعد في اي حته عالنيل و تغنيلي، طب والله ده هيبقى اجمد
بكسوف بترد نور : احم لا معلش مره تانيه لما اقدم في برنامج ذا فويس
عمر : تؤ محدش هيسمع صوتك غيري
*نور كانت بتضغط بسنانها على شفايفها من الكسوف و ابتدت تهوي بإيديها على وشها*
بصلها عمر بحب و ابتسم و رجع ركز في السواقه لحد ما وصلوا عند القاعه و نزل بسرعه من العربيه فتح لها الباب، وفي القاعه كانت العيون مركزه على نور بفستانها الزهري و شعرها البني و بياضها اللي كان بيضوي زي اللؤلؤ
عمر همس ل نور : هو انا شايف غلط ولا الناس دي متنحه ليكي فعلا؟
نور بضحكه : لا بيتهيألك مفيش كده
عمر : اه واخد بالي، دول ناقص يقوموا يلمسوكي عشان يتأكدوا انك بجد
نور : ايه الاوفر ده، لا وسعت منك اوي دي
عمر : والله ابدا، انا حاسس اني ماشي و في ايدي نجمه من السما او انعكاس للقمر يعني حاجه في الرينچ ده
نور بتوتر : ش.. شكرا ربنا يخليك
عمر : تعرفي احلى حاجه بحبها لما وشك بيبقى شبه الطماطم كده
نور : خلاص بقى
عمر بإبتسامه : حاضر
– بيقرب عمر و نور من العرسان و بيباركوا ليهم وبعدين بيروحوا للترابيزة مع مامت نور
عمر : طبعا مليكه زهقتك لحد ما وصلنا يا طنط
مامت نور : لا والله دي نايمه ياعيني وبعدين دي تعمل اللي على كيفها دي قلب ستها دي
عمر : ربنا يياركلنا في صحتك و عمرك يا رب يا ماما
مامت نور : يا رب يا حبيبي و يفرحكم ب مليكه و تجيبوا ليها اخ ولا اخت كده عن قريب
نور كانت بتشرب مايه شرقت : كححح كحح طب طييب انا هقوم اقف جنب ٱيه اتصور معاها
عمر كتم الضحكه عشان كان عارف تأثير كلام مامتها عليها و رد في سره : ان شاء الله هنوصل للمراد و هنخلف لمليكه اخوات كتير اوي
*بعد ما عدا نص الفرح و جت فقرة رمي العروسه ل بوكيه الورد و البنت اللي بتاخد البوكيه بيكون معناه ان الدور عليها بالجواز*
– كانت نور قاعده مبتسمه و بتتفرج على ٱيه و هي بتجهز عشان تحدف البوكيه والبنات واقفين وراها متحمسين، و اذ فجأة بوكيه الورد اول ما ٱيه حدفته نزل على رجل نور اللي فضلت متنحه من اللي حصل، و ضحكت ٱيه و غمزت لنور، و طبعا عمر قرب اكتر من نور في اللحظه دي و قالها : مبروك يا عروسه، حلو اوي حوار انك ممكن تتجوز نفس الشخص اكتر من مره عادي
نور و هي بترفع كتافها ب لامبالاه :ده مين اللي قال كده؟
عمر وهو بيقلدها و بيرفع كتافه ب لامبالاه : ده بوكيه الورد اللي قال مش انا
نور وهي بتحاول تكتم ضحكتها : وماله معلش
عمر : مش لايق عليكي الرخامه على فكره
نور وهي بتقلب عينيها بعيد عنه : طب اتفرج ع العرسان اتفرج
عمر في سره : انا مش عايز اتفرج ولا ابص على حد غيرك والله
نور سمعته و ابتسمت و مردتش
– بعد الفرح رجع نور و عمر للبيت و طلعت نور لاوضتها عشان تغير هدومها و تنيم مليكه
*بعد حوالي نص ساعه* طلع عمر لأوضة نور و خبط و سمحت له بالدخول
عمر اول ما دخل فضل متنح شويه ل نور اللي كانت لابسه قميص نوم ابيض طويل لكن ضيق و مبين تفاصيل جسمها و شعرها البني مفرود على ضهرها
عمر بيبلع ريقه و بيقول : ايه هي نامت؟
نور بصوت خافت وهي مديه له ضهرها : ششش ايوه نامت وطي صوتك عشان متصحاش
*في اللحظه دي عمر حس انه مش قادر يسيطر على مشاعره ولا على رغبته في انه يلمس نور، و بالفعل مد ايده و مسك ايدها
التفتت نور و بصت له وبعدين بصت على ايده اللي ماسكه ايديها من غير ما تتكلم
عمر بصوت كله حب و اشتياق : وحشتيني
نور بعد ما ابتدت تحس ان هي كمان عندها رغبه و اشتياق شديد ل عمر بتبلع ريقها و بترد بصوت خاضع : وانت كمان وحشتني
بيقرب بسرعه منها عمر و بحركه سريعه بيحط ايده على وسطها و بيقربها لحضنه و بكل عشق الدنيا بيقرب بشفايفه من شفايفها و بيقبلها بعمق مره و اتنين وتلاته لحد ما بيحس انها استسلمت و ابتدت تنهار بين ايديه، و بسرعه بيشيلها و بيروح بيها ل سريرها و بيحصل اللي كان بيتمنى انه يعيشه معاها تاني وهي كمان كانت بتتمناه
– و بينتهي اليوم و نور في حضن عمر و بكل حب بيقولها : وحشتي حضني يا نور
نور بإبتسامه : رجعت له تاني و المره دي مش هخرج منه الا بخروج روحي، و بقولك ايه
عمر : قولي يا قمري
نور : تاكل بيض بالبسطرمه؟
عمر : محروق؟
نور : و هتقول عليه قمر جدا
عمر : اشطه انا كده كده بايع قولوني
نور : هههههههههه بحبك
عمر : بعشقك يا ضي عيني
كَيُفً ليُ انُ ارٌىْ غِيُرٌكَ وٌ انُتِ عْيُنُايُ ؟! ~
#تمت