رواية دوار العمدة الفصل العشرون 20 بقلم حبيبة الرحمن
رواية دوار العمدة الجزء العشرون
رواية دوار العمدة البارت العشرون
رواية دوار العمدة الحلقة العشرون
وائل قاعد في العربية يتصل بالتليفون
كامليا / الو
وائل / قابليني في الشقة
كامليا/ الوقت اتأخر مش هينفع
وائل بانفعال/ لو مجتيش هروح عندك واخدك من وسط البنات اللى ساكنين معاكي ووقتها محدش له حاجة عندي
كامليا / وائل انت بتقول ايه طب خليها الصبح علشان خاطري
وائل /لأ دلوقتي. ..نص ساعة والاقيكي هناك
كامليا بخوف/ حاضر
……
كامليا واقفة مش عارفة تتصرف ازاي
كامليا لنفسها /’ياترى يا وائل عاوز مني ايه اول مرة تطلب منى اقابلك بالليل لا مينفعش أنزل طب اعمل ايه
تمسك تليفونها وتتصل بهنادي
هنادي قاعدة بتذاكر في الصالة وطارق نايم في اوضته التليفون يرن
هنادي ببتسامة/’الو ازيك يا كامليا اخبارك ايه
كامليا / الحمد لله. ..بخير
هنادي انا عاوزة اطلب منك طلب بس متستفسريش علي حاجة
هنادي/ طيب ماشى قولي عاوزة ايه
كامليا/ اتصلي ب وائل اخوكي
هنادي/ وائل! !…ليه
كامليا/ قولتلك متستفسريش علي حاجة اتصلي بيه وقوليله إنك تعبانه وعاوزاه ياخدك للدكتور
هنادي /انتي بتقولي فيها انا فعلا تعبانه بس هو هيسال ليه طارق ميودكيش للدكتور ؟
كامليا/ قوليله طارق في البلد
هنادي/ ازاي بس ماهو هيجي هنا وهيشوفة
كامليا / لما يجي قوليله طارق لسه راجع دلوقتي وإنك خفيتي وفهمي جوزك كده وقوليله اخويا وحشني وملقتش طريقة تانية علشان اشوفه غير دي علشان خاطري يا هنادي
هنادي/ هنفذ كل اللي قولتهولي بس الصبح هتفهميني علي كل حاجة
كامليا / حاضر بس علشان خاطري اتصلي بيه دلوقتي وخليه قاعد عندك لوقت متأخر ولو اتصلت بيكي ابقي ردي عليه علي طول
هنادي / حاضر
تقفل هنادي مع كامليا وهي مستغربه ياترى في ايه
وايه علاقة كامليا ب وائل
تتصل هنادي ب وائل اتحجج في الأول وقالها اصبري للصبح ولكن مع إلحاح هنادي وانها تعبانه اوي قالها انه جاي
وبعد نص ساعة كان عندها واندهش طبعا من وجود طارق في البيت لكن هنادي كانت قالت لطارق علي كل حاجة واتصرف طبيعي
وقام وائل واتكلم بعيد عنهم في البلكونة اتصل بكامليا وقالها لو كانت خرجت ترجع تاني لأنه مش جاي وهيتأخر عند هنادي
دخلت هنادي جهزت العشاء واتعشوا مع بعض وخرج وائل من عند هنادي الساعة 12
……………..
في اليوم التالي اتصلت هنادي بكامليا علشان تفهم الموضوع
كامليا قالتلها إن الكلام في التليفون مش هينفع وهتبقي تجيلها بس بعد الإمتحانات
دخلت هنادي المطبخ كانت لسه راجعه من المدرسة ودخل طارق يغير هدومه
هنادي/ نص ساعة والغدا يبقي جاهز انا طابخة كل حاجة مفيش غير الرز بس هعمله واسخن الأكل
طارق/ براحتك انا هقعد قدام التليفزيون لما تخلصي
تفتح نرمين باب الشقة
طارق يتفاجأ /’ايه ده راجعه بدري النهاردة متصلتيش بيه ليه علشان اجيبك من الجامعه
كامليا /’لا مش عايزة اتعبك المشوار بعيد عليك كفاية مشوار هنادي
طارق/ طب غيري هدومك علشان نتغدا مع بعض
نرمين /انا هدخل اعملي فنجان قهوة الأول دماغي مصدعه
هنادي تخرج من المطبخ وتدخل اوضتها
يخبط طارق الباب ويدخل
طارق/ ايه انتي هتنامي يا حبيبتي
هنادي/ لا انا بس هريح جسمي رجلي بتوجعني من الوقفه
طارق يقعد علي السرير بتنهيدة
هنادي /مالك يا طارق
طارق/’امي وحشتني
هنادي/ طب متكلمها في التليفون
طارق/ نفسي اشوفها بس مش عايز اروح البلد
هنادي/ طب ايه رأيك تروج تجيبها وتقعد معانا هنا كام يوم
طارق/امي مش هتوافق تيجي هنا مبتحبش تسيب البيت ولا بستريح في أي مكان غير بيتها
هنادي/’خلاص نروح لها الاسبوع الجاي نقضي الاجازة هناك معلش يومين نستحملهم وخلاص علشان بس متزعلش مننا
طارق /هشوف كده ينفع ولا ايه لإن الامتحانات قربت وهيكون في شغل هيجيبوا معايا البيت
هنادي/ واني كمان الامتحانات قربت وخايفة قوي
طارق /لا شدى حيلك خلينا نخلص بقي
هنادي/’ليه انت مش هتقدملي في الجامعة لو جابت مجموع كويس
طارق/’معرفش بصراحة يا هنادي انا تعبت من موضوع الدراسة بتاعتك دي بالنهار في المدرسة وبالليل بتذاكري نفسننا نقعد براحتنا من غير ملاقيكي قايمه تجري علشان تذاكري ولا تخلصي الواجب
هنادي تقوم تجري وهي بتقول/ الرز اتحرق
تدخل المطبخ تلاقي حلة الرز جمب البوتاجاز مستوتش
طارق/’ايه الرز اتحرق
هنادي بغضب / لأ انا اللي دمي اتحرق
طارق/ في ايه يا هنادي
هنادي/ تعالي شوف اختك عملت ايه
طارق / عملت ايه
هنادي /نزلت حلة الرز من علي النار قبل متستوي علشان تعمل قهوة. ..ينفع يعني كده
طارق/ معلش اعملي غيره
هنادي/ طب كانت نزلت حلة الخضار وكنت هسخنها تاني عادي لكن الرز حد ينزله قبل ميستوي
طارق بانفعال / خلاص يا هنادي قولتلك اعملي غيره
هنادي/ لأ أختك قاصدة تضايقني
طارق/ يوووووه اعملي غيره انا داخل انام لما تخلصي صاحيني
هنادي واقفة قدام البوتاجاز دموعها نازله علي خدها ومخنوقة
تدخل نرمين بفنجان القهوة تضعه علي حوض المطبخ وتوقف خلف هنادي وهي واقفة قدام البوتاجاز
تضحك نرمين بسخرية كانت كفيله إنها تخرج هنادي عن شعورها وتصرخ في وشها
نرمين / انتي الظاهر عليكي اتجننتي خلاص هههههههه
هنادي/ انتي عايزة مني ايه بتتعمدي تضايقني ليه انا عملتلك ايه
نرمين/ خلصي الأكل وانتي ساكته
هنادي/ مش هعمل الأكل
وتطفي البوتاجاز
هنادي/ ابقي كملي انتي واطبخي وانا من هنا ورايح مش هطبخ إلا على قدي انا وجوزي وأبقى شوفيلك خدامة تخدمك يا نرمين هانم
نرمين تمسك يد هنادي وهي خارجة من المطبخ
نرمين / انتي قد كلامك ده
هنادي /ايوه قده اوعى تفتكري انى جايه هنا علشان اخدمك وانتي قاعدة في اوضتك اخدمي نفسك
وتخرج هنادي من المطبخ وتدخل اوضتها
وتخبط الباب جامد
طارق بفزع/ ايه يا هنادي مش تحاسبي مش شايفه حد نايم علي الزفت السرير
هنادي ببكاء / مخدتش بالي
طارق يقوم ويقرب منها / ايه يا حبيبتي مالك
هنادي/ طارق هو ليه الواحد لما يبقي طيب وغلبان وعايش في حاله بردو الناس بضايقه
طارق /ليه يا حبيبتي بتقولي كده
هنادي/ علشان اختك مش سايباني في حالي
طارق/ دا كله علشان الرز هههههه مخك صغير اوي
يمكن مكانتش تقصد ومتعرفش الحله فيها ايه عديها يا حبيبتي
هنادي /على فكرة بقي انا مش طابخه رز تاني النهاردة
طارق/ هههههه طيب خلاص متزعليش انا هعمل الرز ومضايقيش نفسك انا مبحبش اشوفك زعلانه
يمسح دموعها ببتسامة ويقبلها في خدها
هنادي/ اني مبقولش كده علشان انت اللي تطبخ بس يا حبيبي اختك تصرفاتها بضايقني قوي
طارق /طب اعمل ايه اختي ومقدرش اغيرها علشان خاطري استحمليها
هنادي ببتسامة / علشان خاطرك بس
طارق ببتسامة/ أووووك هروح انا بقي اعمل الرز
هنادي/ لا اني اللي هعمله
طارق ببتسامة/ انا قولت انا اللي هعمله يعني انا اللي هعمله
هتاكلي احلي رز النهاردة
ويخرج طارق ويعمل الرز ويتغدي هو وهنادي ونرمين مترضاش تاكل
طارق يدخل المطبخ لهنادي وهي واقفة قدام حوض المطبخ تغسل الأطباق
طارق / هساعدك وسعي شوية
هنادي/ لأ كفاية عليك كده النهاردة
طارق/ ههههه لأ هساعدك علشان نخلص بسرعة
هنادي/ اعمل الشاي انت
طارق/’حاضر يا حبيبتي
………………………….
في شقة وائل
كامليا / دي آخر مرة هنتقابل فيها هنا
وائل / يعني ايه
كامليا / لو عايز تشوفني يبقي في مكان عام قدام الناس
وائل / ههههه انتي ناسيه انك مراتي ولا ايه
كامليا/ وانت ناسي إن جوازنا دا علي ورق بس يعني ملوش لزوم نتقابل هنا
وائل / انتي زعلانه علشان انفعلت عليكي امبارح
كامليا / ليه مكونتش داري بنفسك بتقول ايه
وائل / معلش يا حبيبتي اعمل ايه بس اتخانقت مع بثينه امبارح
كامليا / ليه
وائل /’اتخنقت منها مبتعديش يوم من غير نكد فاكرة نفسها هتخليني جوز الست وانا بقي راجل فلاح والنظام دا ميعجبنيش
كامليا / وافقت ليه من الأول
وائل / قولتلك كنت فاقد الأمل في اني اقدر اتجوزك ومكنش في طريقة قدامى غير دي علشان انساكي
كامليا / وايه اللي اتغير
وائل / خوفت تتجوزي وأعيش ندمان طول العمر
كامليا / وائل انا مبنمش طول الليل خايفة من رد فعل ابويا وأمي
وائل / انا قولتلك متخافيش اول متخلصي دراستك هتقدملك
كامليا / بس ابويا وأمي كل منزل اجازة يكلموني علي عريس وانا مش عارفة اعمل ايه رفضت كتير ومش لاقيه كلام اقولهولهم غير أني مبفكرش دلوقتي غير بعد مخلص دراسة
دا غير عمر
يقاطعها وائل / لسه بيجي عندكو بعد مرفضتيه
كامليا / بصراحة صعبان عليه
وائل / خلاص وافقي واتجوزيه
كامليا / انت بتهزر ولا بتتكلم جد
وائل / اومال عايزاني اعملك ايه وانتي كل متشوفيني تسمعيني نفس الاسطوانه
كامليا / لازم تحس بيه يا وائل
وائل يقرب منها / طب ماانا حاسس بيكي اهوه بس انتي اللي مش عايزة
تنتفض كامليا من مكانها بخجل / انا لازم امشي
وائل / هو انا كل مقرب منك تعملي الشويتين بتوعك دول
كامليا / دا كان شرطي علشان أوافق واتجوزك
وائل / طب انتي خايفة من ايه ماهو انا متجوزك
كامليا / وائل يلا علشان متأخرش
تفتح كامليا الباب وتخرج
وائل / طيب يا كامليا بس لازم تعرفي إن للصبر حدود
………………..
في منزل العمدة
الحاجة أمينه لهدي/ ايه يا بنتي بتعملي ايه عندك
هدي/ بخلص الأكل عايزة مني حاجة ياامه
الحاجة أمينه / مين اللي كان نازل من شوية ده
هدي/ اتخايلت ب مي نازله مش عارفة هي ولا واحده صاحبتها
الحاجة امينه/ مي! !!..نازله بعد المغرب تعمل ايه
هدي/ يمكن رايحه تشتري حاجة من المكتبه ياامه
الحاجة امينه/ ابقي قولي لأمها متنزلهاش في وقت متأخر كده دي بنت خليها تاخد بالها منها
هدي/ اني؟ !!..طب دا اني لو قولتلها يمكن تمسك فيه لا ياامه اني مش عايزة مشاكل معاها ابعديني عنها
الحاجة أمينه /مااني لو بكلمها كنت قولتلها بس اني مش طايقة ابص في وشها هي ولا محسن ابني
هدي/ معلش يا أمه الطيب احسن
الحاجة امينه/’بعد كل اللي عمله مش كفاية أخوه معدش ليه نفس يجي البيت وقافل شقته هي قفلت الشقة دي بالساهل عليه
هدي/ متزعليش نفسك ياامه كفاية اللي حصل قبل كده وقعتي من طولك واني لوحدي كنت تايهه وبلف حوالين نفسي لحد مجه سعيد
الباب يخبط
الحاجة امينه/ قومي شوفي مين
هدي تفتح الباب
الحاجة أمينه / اتفضل يا حاج عيد
الحاج عيد / ازيك يا حاجة اومال الولاد فين محدش منهم هنا ولا ايه
هدي/ سعيد راح لواحد صاحبه وعمي محسن معرفش فين
الحاجة امينه/’بنتك شوق في شقتها
الحاج عيد يدخل / اني كنت جايلك يا حاجة في موضوع
الحاجة امينه/ اعملي شاي يا هدي
تدخل هدي المطبخ
الحاج عيد / ايه يا حاجة هتفضلي كده غضبانه علي محسن وشوق اني اعرف إن قلبك ابيض وعمرك مزعلتي حد منك
الحاجة امينه/ طب سيبك من ابني واللي بيني وبينه حاجة متخصش شوق لكن بنتك زعلانه مني ليه
الحاج عيد/ ماهو بردو جوزها يا حاجة ولازم تزعل
الحاجة امينه/’خلاص خليها زعلانه ولا عايزني اروح ابوس ايدها واقولها حقك عليه يا مرات ابني
الحاج عيد/ لا اني اللي هطلع اجيبها تتاسفلك وتبوس ايدك
الحاجة امينه / لا يا حاج اني مش عايزة حد يبوس ايدى حتي لو ابني
الحاج عيد /’طب علشان خاطر الحاج حامد اخويا ولا انتي مش يهمك يبقي مرتاح
الحاجة امينه / اللي مات استريح الدور والباقي علي اللي عايشين مش مرتاحين ولا مريحين الناس اللي حواليهم
تخرج هدي بالشاي
الحاج عيد/ يعني دا أخر كلام عندك يا حاجة
هدي/اتفضل يا عمي الشاي
الحاجة امينه/ ايوه يا حاج وأبقى قول لبنتك خليكي ورا جوزك واني هخليني في القضية اللي رفعاها علي جوزها علشان مش عايزة حد من ولادي يتظلم
الحاج عيد/ اني مليش صالح بالقضية ولا بقسمة الأرض يا حاجة اني كنت جاي علشان تتصالحوا مع بعض لكن واضح انك مش عايزة فوتك بعافيه اني هطلع أطمن علي بنتي وعيالها وامشي
الحاجة امينه / خد الشاي معاك
الحاج عيد/ لا ملوش لزوم بعد اذنك معلش يا هدي يا بنتي كتر خيرك
هدي/ علي ايه يا عمي
انست ونورت
الحاجة امينه/ اقفلي الباب يا هدي ورا الحاج لاحسن قطه تدخل ولا حاجة زي امبارح
ينظر لها الحاج عيد ويخرج
الحاجة امينه / قال جاي يصالحنا علي بعض قال ليه فاكرني مش عارفة إنه اللي قال لمحسن يعمل اللي عمله ده
هدي/ عايزة مني حاجة ياامه اني هشيل نرمين واطلع فوق
الحاجة امينه /صاحيها يا بنتي تقيله عليكي
هدي/ لو صاحيتها مش هتنام تاني وهتزهقني لما اصاحيها الصبح للمدرسة تصبحي علي خير ياامه
الحاجة امينه/ وانتي من أهل الخير مش هتستني جوزك
هدي/ لأ شكله هيتاخر واني بتعب من السهر كل ليلة علي النظام ده لما زهقت
الحاجة امينه /معرفش الواد ده مبيزهقش من سهر كل ليلة ده
هدي/ اتعود علي كده ولو كلمته بيتخانق معايا واني بصراحة بطلت اتكلم علشان مفيش فايدة
الحاجة أمينه /معلش يا بنتي
ابني واني عارفاه
هدي /يلا هعمل ايه اني مستحمله بس علشان العيال
الحاجة امينه/ ههههه العيال بس
هدي /صدقيني ياامه علشان العيال يلا تصبحي علي خير
………..
في شقة محسن
شوق / براحتها ياابه واني هتحايل عليها ؟!
الحاج عيد / مرات اخويا واني عارفها مش هتسكت وهتفضل ورا القضيه لحد متحكملها
شوق/ خليها تدفع فلوس وتخسر هي حره
الحاج عيد / هو جوزك معهوش صورة من العقد اللي مع مرات عمك
شوق/ معرفش ياابه لما يجي هساله
يفتح محسن الباب
شوق/’أهو جه اهوه
محسن/ عمي البيت نور
الحاج عيد/ منور باصحابه ياابني
محسن / جهزي العشا يا شوق علشان نتعشي مع بعض
الحاج عيد/ لا اني اتعشيت اومال العيال فين يا بنتي عايز أسلم عليهم قبل ممشي
شوق / محمود بيذاكر جوه ومي نزلت تجيب حاجة من تحت وزمانها جايه
محسن/’نزلت فين يا شوق
شوق/ قالت رايحه تجيب حاجة من صاحبتها وجايه علي طول
محسن بانفعال/ وازاي تسبيها تنزل لوحدها أخوها مرحش معاها ليه
شوق/ ايه يا محسن الدنيا أمان وبعدين دي صاحبتها جارنا هنا
محسن/ لما ترجع اني ليه حساب معاها ومعاكي انتي كمان
شوق/ يوووووه انت هتحبس البت في البيت
الحاج عيد/ محسن عنده حق يا بنتي مينفعش تنزلي بنتك في وقت زي ده
محسن/ قولها يا عمي أصلها عايزة تمشي البت على مزاجها
الحاج عيد/ لما ترجع ابقي اتكلم معاها بالراحة ياابني دي بردو صغيرة ومتعرفش حاجة والحق علي أمها
محسن/ شوفتي اني مش جابت كلام من عندي اهوه ابوكي اللي بيقول
شوق/ اني هدخل اجهز العشا
الحاج عيد/ ابعتيلي محمود عايز اشوفه قبل ممشي
شوق / حاضر ياابه
……………..
في اليوم التالي
هنادي خارجة من المدرسة مع اصحابها
دعاء/ استني يا هنادي مالك ماشيه بسرعة كده ليه
هنادي/ انتي مش شايفة العيال اللي عماله تغلس دي
ياسمين / يا بنتي دول هما كده مهما تعملي مفيش فايدة معندهمش دم
أحد الشباب / لا عندنا دم يا عسل تبحبي اعور نفسي واوريكي
دعاء/ آه عور نفسك علشان تموت وتريحنا
شاب اخر/ طب يرضي القمر اللي في النص دي إننا نموت
دعاء لهنادي/ ردي يا قمر
هنادي/ اني مش هرد عليهم خليهم محدش يعبرهم
الشاب الأول / تصدقي إنك احلي واحده فيهم ماتيجو نشرب حاجة ونتعرف علي بعض
الشاب التاني/ انا كريم في تالته ثانوى في المدرسة اللي جمبكو دي
الشاب الثاني/ وأنا معتز في تانيه ثانوي
ياسمين /وكمان طلعت عيل
دعاء/’أبعد يا شاطر انت وهو من هنا
طارق جاي بالعربية يوقف قدام المدرسة يلمح هنادي من بعيد
الشاب الأول / تعالوا بس معانا وانتوا مش هتندموا
الشاب الآخر يمد أيده ناحية البنات /”متبطلوا تقل بقي
طارق ينزل من العربية بسرعة ممسك الشاب التاني وينهال عليه بالضرب
هنادي بخوف/ دا طارق يا دي المصيبة
دعاء ل ياسمين/ يلا بينا احنا
الشاب الأول يضرب طارق
هنادي تخبطه بالشنطة علي دماغه
يقرب مجموعة من الشباب يحاولوا يبعدهوهم عن بعض
واحد منهم / كل المصايب مبتجيش إلا من البنات
طارق /لو سمحت عندك كلمة كويسه قولها معندكش اتفضل بقي ورينا عرض اكتافك
الرجل/ تصدق بقي انت عيل قليل الأدب وتستاهل الضرب فعلا
ويقرب من طارق يضربه
تحتضنه هنادي علشان يبعدوا عنه
الكل واقف بدهشة
رجل آخر / أهي طلعت قريبته يا عم وكان بيدافع عنها
الشاب الأول / لأ مش قريبته
طارق يقرب يضربه
رجل آخر /خلاص احنا نروح القسم واللى غلطان يتروق بقي هناك
هنادي وهي بتعيط/ لأ دا جوزي
الجميع / جوزك!!!!
الرجل/ جوزك ازاي يا بنتي انتي مش في المدرسة
طارق/ اما شيء بارد مش قالتلك جوزها خلاص بقي اتفضلوا من هنا
يجري الشابين أصحاب المشكلة
الرجل/’معلش ياابني اعذرنا بس
احنا منعرفش ايه سبب الخناقة طارق/ شوية عيال بتعاكس تفتكر بقي أقف اتفرج
الرجل / حقك ياابني
طارق بغضب لهنادي/ يلا بينا نروح
…………..
هنادي وطارق في العربية
طارق بانفعال/ سايبه المدرسة وماشية بعيد ليه مهما ليهم حق يعاكسوكو
هنادي/ يعني احنا اللي غلطانيين
طارق / مفيش خروج للمدرسة تاني
هنادي /انت بتقول ايه دا لسه أسبوع والامتحانات تبدأ عايز تضيع عليه السنه كلها
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية دوار العمدة)
