رواية عهدي الفصل الأول 1 بقلم نشوة عادل
رواية عهدي الجزء الأول
رواية عهدي البارت الأول
رواية عهدي الحلقة الأولى
-لو سمحت سوق بسرعة الله يخليك بسرعة
+ع فين طيب؟!
-سوق بس بسرعة وهقولك ف الطريق بس اجرى ارجوك مفيش وقت لو مسكونى مش هيرحمونى
+ طيب حاضر
ساق فعلا وابتعد عن المكان اللى اخدها منه كانت حاطة ايدها ع صدرها وبتتنفس بصعوبة وعمالة تعيط وهى كاتمة شهاقتها لاحظ هو ده ف المراية وجات عينه بعيونها فنزلت وشها بسرعة فقال: انتى كويسة؟!
بمجرد ما قال كده تعالت صوت شهاقتها اكتر وبعد ما هديت قالتله: ممكن فونك لو سمحت اعمل مكالمة
+اكيد طبعا اتفضلى
اعطاها فونه فاستغربت لانه كان ايفون رنت ع رقم اعز صديقاتها والوحيدة اصلا بحياتها وكانت اسمها شروق : الو شروق عاملة ايه؟
شروق بلهفة: عهد انتى فين طمنينى عليكى؟
عهد بدموع: انا هربت يا شروق وسيبت البيت مش ممكن هرجع ليهم تانى بعد اللى عملوه واللى لسه عاوزين يعملوه فيا
شروق بصدمة: هربتى! انتى مجنونة هتروحى ع فين دلوقتى انتى ملكيش حد تروحيله اصلا طب هاتى بعضك وتعالى
عهد: اجى فين اذا كان اول مكان هيدوروا عليا فيه بعد ما يكتشفوا انى هربت هو عندك
شروق: طب هتروحى فين انتى دلوقتى فهمينى؟
عهد بدموع: والله ما انا عارفة ارض الله واسعة واكيد مش هينسانى
شروق: طب ده رقمك ولا رقم مين؟
عهد: لا ده رقم بتاع الاوبر اللى انا راكبة معاه
شروق: طب لما احب اطمن عليكى اعمل ايه ولا اوصلك ازاى انا؟!
عهد: هبقى اجيب خط واكلمك منه
شروق: خلى بالك من نفسك يا قلبى وطمنينى عليكى اول بأول ولو احتاجتى اى حاجة قوليلى وانا اجيبها لحد عندك
عهد بدموع: مش هينفع نتقابل الفترة دى لانهم اكيد هيراقبوكى لانك الخيط الوحيد اللى هيوصلوا ليا عن طريقه عشان كده صعب
شروق بحزن: مش مهم نتقابل المهم اطمن عليكى وخلاص
عهد: سبيها لله انا لازم اقفل باى
قفلت عهد واعطته الفون وقالت: شكرا لحضرتك
+العفو …احم هو انا ممكن اعرف انتى رايحة فين؟
عهد: ودينى اى اوتيل يكون محترم وموثوق منه لو سمحت
+ احم انا اسف فى اللى هقوله بس انتى شكلك بنت ناس ومن عيلة هاى اوى واكيد لو نزلتى بفندق هيكون ببطاقتك وبالتالى لو سألوا عنك هيقدروا يوصلوا ليكى بسهولة
عهد : صح عندك حق ….بدموع: طب اعمل ايه اروح فين؟!
+ ملكيش اهل تانيين او ناس صحابك هما ميعرفوش عنه حاجة
هزت رأسها بلا وقالت: للاسف مليش
+ طب انا عندى حل لو مش يضايقك طبعا ممكن تيجى معايا البيت
عهد بسرعة: انت مجنون ازاى تطلب منى حاجة زى دى انت مفكرنى ايه؟
+ ممكن تهدي وتعطينى فرصة افهمك انا اكيد مش قصدى حاجة وحشة وع فكرة انا ليا اخت بنت واكيد بخاف عليها انا هاخدك عند جدتى هى قاعدة لوحدها بالشقة واختى بتنزل تبات معاها وانا هكون فوق مع ابويا وامى يعنى مش هكون معاكى فى نفس الشقة عشان تقلقى
عهد بتفكير: ايوة بس هتقول لاهلك ايه او انا مين وهل هيوافقوا ع وجودى!
+ جدتى طيبة اوى وهترحب بيكى جدا فمتقلقيش وهتفرح بوجودك كمان
عهد: ايوة بس انت مش مجبور تعمل كده وتحط نفسك فى موقف بايخ بسببى
+ انا فعلا مش مجبور بدليل ان انا اللى عرضت عليكى كده وكمان انا مش هينفع اسيبك لوحدك لا رجولتى ولا اخلاقى تسمحلى بكده
عهد بابتسامة: انا متشكرة جدا يا……
+ اسمى ابراهيم
عهد: شكرا يا استاذ ابراهيم
ابراهيم بابتسامة: العفو
ساق ابراهيم لكن قبل ما يروح استأذن ودخل هايبر ماركت بالطريق جاب منه شوية حاجات وبعدها طلع ع البيت كان بيت كلاسيك لكنه شيك اوى عبارة عن ٧ ادوار وفى منطقة راقية جدا
ابراهيم: اتفضلى يا انسة
نزلت عهد وهى مكسوفة اوى وبترتعش دخلت معاه وهو قفل البوابة بالمفتاح بعدها خبط ع الباب اللى بالدور الاول وفتحت ليه بنوتة فى بداية العشرين : حمدالله ع السلامة يا هيما ها جبتلى الحاجات اللى طلبتها؟
ابراهيم: يا بت استنى طيب اخد نفسى وادخل مش خبط لزق كده
= تؤتؤ لا يوجد وقت للكلام ده اعطينى اشيائى
ابراهيم: خدى يا اختى اهو ع الله يطمر بس
= شقى وروحى يا ناس يخليك ليا يا عم الناس …ثم انتبهت لتلك الواقفة وراءه ومتابعة الحديث وهى مبتسمة فقالت: مين دى يا ابراهيم… ثم شهقت: يا لهوى انت اتجوزت من ورانا؟!
ابراهيم: انتى عبيطة يا بت ولا شكلك كده اوعى وسعى من وشى خلينا ندخل تيتة فين؟!
= نايمة ف اوضتها
وسعت لهم ودخلوا ..ابراهيم: اعرفك دى اختى الصغيرة أية ودى الانسة ….. احم هو حضرتك اسمك ايه؟!
عهد باحراج: عهد
ابراهيم: دى الانسة عهد اتعرفوا انتم ع بعض ع اما انا ادخل اشوف تيتة عن اذنكم
دخل ابراهيم وسابهم وهو خايف من ردود أية الدبش دخل ع جدته وصحاها وحكى ليها الحكاية من البداية
جدته وتدعى صفاء: ايوة يا ابنى بس افرض وراها مصيبة ولا تكون بنت مش كويسة؟!
ابراهيم: معتقدش انتى عارفة انى بفهم اللى ادامى كويس وباين عليها غلبانة وبعدين حطى نفسك مكانى كنت هسيبها ف الشارع ازاى ف وقت زى ده؟
صفاء بتنهيدة: عندك حق روح ربنا يسترها معاك دنيا واخرة يا ابنى زى ما سترت عليها
ابراهيم بابتسامة: ربنا يبارك فى عمرك يا ست الكل وع العموم متقلقيش انا هحاول افهم وراها ايه بكرة لو طلعت كده او كده همشيها متقلقيش
صفاء: ماشى يا ابنى خدنى معاك اما اطلع اتعرف عليها
ابراهيم: يلا
اخد ابراهيم بايد جدته وقبل ما يخرجوا سمعوا صوت صريخ جاى من برة وكانت والدته وتدعى هيام
ابراهيم بخضة: مالك يا امى فى ايه؟
هيام بغضب: بقى كده يا ابن بطنى رايح تتجوز من ورانا يولا احنا قصرنا معاك فى ايه ها انطق وووووووووو …………
استوب يا حلوين حدوتة جديدة هتعجبكم ان شاء الله رأيكم وتوقعاتكم يا سكاكر🤍✨
#عهدى البارت الاول
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية عهدي)
