رواية زواج الفصل الثاني 2 بقلم ندى خالد

_لا منتهيناش ولا هينفع ننتهي، إلي بينا مكنش لعبة! تعالي نرجع وكل واحد بشروطه يا ستي أهم حاجة منبعدش، فكري إنتي بس، متقطعيش الوِد يا هدى!

_كنت قاعدة بسمعه وجوايا حاجة بسطاني إنه لسه متمسك بيا، يمكن غلطنا إننا فعلا مكناش فاهمين بعض صح، لازم كل طرف يراعي التاني بس من جوايا خايفة، خايفة يخوني! بس لا ميعملهاش أنا عارفاه وبعدين هو قال كل واحد بشروطه يعني أقدر أخليه يقطع علاقته بنور دي خالص!

كُنت حاسة إنه هيقولي لا لما اجيب سيرتها، كنت بسيبله الإختيار وانا متأكدة، بس مش عارفة ليه كنت عاوزاه هو الي يختار، كأني كنت عاوزة أتأكدت بيحبني ولا لا!

___

كانت شاردة بتفكر وأنا قاعد مستني ردها، يا ترى كان محتاج كل التفكير دا؟

لحد ما سمعت صوتها بتقول: موافقة نرجع بس بشرط، بلاش نور صحبتك دي وبلاش تحتك بحد من زمايلك ف الشغل، ببساطة ميبقاش فيه ستات في حياتك غيري أنا ووالدتك!، وكمان أكمل ف الشغل، إنت أي شروطك؟

لؤي: أنا بس مبحبش الغيرة الأوڤر بتاعتك ونرڤزتك الزيادة، بحب أنا الي أجي أتكلم معاكي مش تقعدي كل شوية تسأليني، وبالنسبة لشروطك ف أنا برده مش حابب فكره غيرتك الزيادة برده! افهميني!

وحابب أنك متهمليش بيتك برده لما تشتغلي يعني متبعديش عنِّي برده، وأنا موافق على شغلك عادي

_فِضلت باصة عليا بتفكر وأخيرا إتنهِدت بِراحة لما وافقت، قالت موافقة

: بحبك وعُمري ما هحب حد زيك متبعديش عنَّي تاني!

هدى: قول لِنفسك بقى!

لُؤي: تيجي نتمشىٰ على النِيل؟ واحشني النيل أوي بقالي ست شهور مبروحش جمبه لأني كنت كارهه ومكنتش هقرب منه لو لقدر الله سبنا بعض، فاكرة النيل، فاكرة الكورنيش وعم محمد بتاع الحُمص، أنا شفتك أول مرة عنده جمب النيل وبتاكلي يَست، يومها بِدال ما تاكلي حُمص كلتي بعقلي حلاوة

: والله وانا جيت جمبك إنت الي حبيتني!

__________________

أنا هِنا علشان أبقى بخير أنا عاوزة أتعالج يا دكتورة، عاوزة أبقى بخير وأحس إني أتحب حضرتك فاهماني؟

مش متخيلة لحد دلوقتي إني حبيت واحد متجوز!

انا جيت هنا بعد معافرة مع نفسي بعد دوشة كتير جوا دماغي، كنت شايفة إن أنا مش مجنونة يعني علشان أروح لدكتور نفسي بس لما إتأكدت إني مش بخير جيتلك، إنتي واحدة ست وهتفهميني وهتفهمي أنا حاسة بإيه، هو كان دايما موجود في حياتي بشكل أو بِما، في القعدات العائلية، في الرحل المدرسية، في الدروس، حتى ف الفصل وكل دا تطور لما كبرت بقى ف الجامعة وفي نفس الكلية وساعات في نفس المدرج، كان لما يحب يبقى روش مع صحابه يقول عليا إني لازقه فيه رغم إن هو إلي كان دايما لازقلي، هو الي كان بييجي يتكلم وهو الي بيقترح، مكدبش هو كان بيعتبرني أخته، بس عارفه يا دكتورة مفيش حاجه فعلا إسمها صداقة بين ولد وبنت لأن غصب عننا بتتولد مشاعر، يمكن المشاعر دي مكنتش من ناحيته بس المشاعر دي دلوقتي موقفالي حياتي، كانت من ناحيتي أنا!

السؤال الوحيد هو محبنيش ليه هو أنا مكنتش أستحق أنه يحبني؟ ما أنا كنت قدامه دايما ليه مختارنيش، ليه هي؟

ليه أول ما شافها حبها؟ يا دكتور نِهال هو أنا فعلا مش كفاية

: االحب دا مش بأدينا، الحب دا إحساس فريد من نوعه، حتى إنتي مبتحبيش صاحبك دا بس إنتي فاكرة إنك بتحبيه لأنك ببساطة إتعودتي على وجوده، أنا عذراكي لأنك محستيش الحب ال بجد ولما تحسي بيه هتعرفي أنا بقول اي كويس، وبخصوص إنك متتحبيش ف بصي حواليكي كده؟

إنتي امتى اديتي لحد فرصة أصلا، هو كان أعقل منك كان عارف بس إنه إتعود على وجودك لذلك حب غيرك، وبرده هو مش برئ لأنه ببساطة كان أناني معاكي رغم إنه حب مراته مقطعش علاقته بيكي كان عاوز كل حاجة، مش هنجبب سيرته هو خلينا فيكي إنتي يا نور ليه مش بتبصي حواليكي؟ عارفة إحساس إنك بتحبي حد زي أي؟

زي لما تشوفي حد وتبقي مش على بعضك، قلبك بينبض بسرعة بتبقي مش فاهمه في اي دا الحب أما إلي إنتي بتعيشيه دا تعود، أصل عارفة ليه الدين قال منختلطش أصل لو فكرتي فيها ليه تفضلي تبذلي كل قوتك في علاقة إنتي مش عارفه إنتي مُصنفة فيها أي؟

دا غير المشاعر الي بنبذلها ومش بترجع لينا، وعارفة أي حد قالك إن المشاعر كتير ونمشي نوزع فيها دا كداب المشاعر يا تتغير لمشاعر تانية يا تفضل زي ما هي يعني ممكن إنتي لو رجعتي صنفتي العلاقات صح في حياتك هتدركي إن لؤي دا كان مجرد بس حد مالي حياتك ف انتي ادتيله مشاعر ميستحقهاش لمجرد إنه كان عاملك دوشة في حياتك بس

نُور: يعني انا محبيتهوش يا دكتورة!

مش عارفه ليه اتبسطت بكلامك أوي حسيت إنه غمة وإنزاحت، عَدى شهرين من وقت ما كلمت مراته بالطريقة إلي حكتهالك وعرفت إنهم رجعوا، مكنتش حابة أبدا إني أبقى البنت الي هتموت عليه بس كنت بحاول علشان الي بحبه، أصل عارفة هو كان بيجيلي دايما، متخانق معاها، محضرلها مفاجأة، كل حاجه حرفيا ف حياتهم كنت عارفاها، وقتها كنت مضايقة لمراته بس قي نفس الوقت حاسة إنه يمكن بيحبني بس هو مش عارف فاهامني؟

: فاهماكي غالبا انه كان بيحكيلك دايما كل حاجه دا معناه إنه دايما مش لاقي مع مراته طريق وصل، بيحبها بس مفيش بينهم لغة تواصل، أتمنى يكونوا قدروا يفهموا بعض دلوقتي، خلينا معاكي إنتي هتتغيري؟ أنا هساعدك

نُور: عارفة النفس الأول الي بياخده الطفل لما ييجي الحياة أول مرة أنا حاسة إني أخدته!

____________

دخلت الشقة لقيتها مضلمة كالعادة أكيد هي لسه مرجعتش من الشغل، كُنت فاكر إن لما كل واحد فينا يعمل الي على مزاجه ويمشي شروطه هنرتاح أكتر، حتى نُور مبقتش تبعت تكلمني ولا تتصل بيا، مش دا إلي كنت عاوزه زعلان ليه؟

أنا مبقتش عارف أنا عاوز اي، طلعت من شرودي وفتحت باب الشقة وقعدت على الأنتريه، ساعة إتنين مجتش!

متأخرة عن معادها!

رايح جاي عمال برن عليها مفيش رد معقول حصل حاجة!