رواية أحببته من أجل حبه لفلسطين الفصل الرابع 4 بقلم أمل محمد
رواية أحببته من أجل حبه لفلسطين البارت الرابع
رواية أحببته من أجل حبه لفلسطين الجزء الرابع
رواية أحببته من أجل حبه لفلسطين الحلقة الرابعة
عبيده / أنا بحبك أوي يا أمل
أمل بصتله بصدمه وزهول كبير
عبيده / أيوه بحبك مصدومه ليه بحبك من زمان أوي وكنت مداري حبي ده ليكي للوقت المناسب
أمل بفرحه كبيره وسعاده / وهو ده الوقت المناسب ؟!!
بصلها عبيده بابتسامه وبدأت أصوات زعيق تظهر من حواليهم أمل اتلفتت حواليها وبصتله تاني لاقيته لسه مبتسم وفجأه وقعت من عالسرير عالأرض
أمل بتألم / ااااه يا ضهرك يامرعي
حبيبه الأم / مرعي مين يا كوتشي مقطوع مش لاقينله رباط
أمل بصتلها بتوهان / انتي مين ؟
الأم بصتلها بخضه وشهقة / أنا مين ؟
أمل وهي لسه تايهه / فين عبيده ؟
الأم بصويت وهي بتجري في الشقه على أوضة ابنها / يالاهواااااااي إلحقني ياعدي إلحقني يابني أختك فقدت الذاكره
صراخ الأم كان كفيل يفوق أمل من الحلم اللي هي كانت فيه وطلعت تجري ورا أمها / استني يا وليه هقولك
فتحت حبيبه باب أوضة ابنها بعنف وهي بتصرخ وعدي اتخض ووقع على الأرض وبص لأمه وأخته وهو مبرق وساكت من غير ماينطق بحرف
الأم / أختك فقدت الذاكره يابني
أمل / يا ماما ذاكرة ايه الله يهديكي
الأم باختبار / طب أنا اسمي ايه ؟
أمل / ألعب باليه
الأم وهي بتبص لابنها وتعيط / شوفت أهو مطلعش فقدان ذاكره طلع تخلف عقلي أهو
وفجأه قعدت في الأرض وبدأت تعيط بنواح / ياعيني عليكي يابنتي يانضري ياضنايا جالك تخلف عقلي يا حبيبتي وبصت لإبنها / هو أصلاً كان عندها على خفيف بس مكنتش اعرف انه هيزيد والله وانفتحت في عياط هستيري / لو كنت أعرف كنت لحقتها بس يا خساره راحت ياحتة من كبدي
أمل بصدمه / وفشتك يا ماما
الأم / ولا تزعلي نفسك ياضنايا ياحتة من فشتي
عدي وهو لسه مصدوم ومش فاهم حاجه / والكلاوي
الأم بعصبيه / لأ بقى سيبولي حاجه شغاله تمشيني ايه ده عايشه وسط مجانين
وسابتهم وخرجت وهي بتكلم نفسها ( ماخلفتش حد عدل )
أمل بصت لأخوها بصدمه وهي بتخبط كف على كف / المجانين في نعيم وسابته ومشيت
عدي وهو على وضعه متربع على الأرض ومبرق ومش فاهم حاجه فضل باصص على باب الأوضه شويه وبعدين بص حواليه لقى سجادة الصلاه لفها ونام مكانه وحط راسه عليها وغمض عيونه ولسه بيروح في النوم سمع صويت تاني قام من مكانه بسرعه / قسماً بالله طول ما أنا في بيت الأشباح ده هقطع الخلف وقام من مكانه يشوف الصريخ ده جاي منين
لقى أمه بتجري ورا أخته بالنشابه / فيه ايه بس يا ماما تاني
الأم / أختك الموكوسه بنت الموكوسه كسرت طقم الكوبايات الجديد كله والله ماهسيبها إلا لما أربيها
حمحم عدي بخوف ولف وشه وكان داخل أوضته تاني
أمل بسرعه / وربنا ده عدي اللي كسره
وقف مكانه وغمض عيونه وحسبن في أمل
الأم / الكلام ده حقيقي ياعدي
عدي / هفهمك يا ماما
الأم / ياحبيبي فداك لعله كان شر وجه فيهم وحصل خير يا حبيبي عمرهم كان لحد هنا ها تفطر ايه بقى ياقلب أمك
عدي بص لأمل اللي بؤها مفتوح من الصدمه بغرور / عاوز بصطرمه يا ماما
الأم بابتسامه / من عيوني يا عيون أمك انت ودخلت المطبخ
عدي وهو بينفض تراب وهمي من على كتفه وقعد على كرسي الأنتريه وحط رجل على رجل وبص لأمل بغرور / ياااا انتي روحي هاتيلي كوباية مايه
أمل بسخريه / طب ونبي قبل ماتحط رجل على رجل داري الشبشب الصيني اللي انت لابسه والشراب المقطوع
عدي باستهزاء وغرور / يا متخلفه انتي متعرفيه إنه ف’جر دباب’ة ميركا’فا بشبشب صيني وبيچامه أديداس
أمل / ونبي تيجي ايه انت في أبا عبيده مسمعتوش ياض وهو بيقول بكل قوة شخصيه ( أتعدنا بما ننتظر يابن اليهو’ديه ) وتيجي انت يا شبه الرجاله انت تتغر ياض ده انت التلاته منك بنتايه
عدي وهو بيدور على أي حاجه حواليه يضربها بيها وبيجري وراها وأمل جريت على أوضتها بسرعه وقفلت الباب وراها
أمل / ونبي انت لازم يضيفوك في المقاطعه
عدي / ليه يابنت الظريفه
أمل / بتعاملني معاملة يهو’د ياجدع
عدي بغضب / اطلعيلي انتي بس وأنا أعاملك معاملة جاريه من سوق عكاظ
أمل / العبيد مبتشتريش أسيادها ياض
عدي بعصبيه وغضب / مبقاش عدي إن مقصتلكيش اتنين متر من لسانك ده
أمل بشهقة وصدمه مصطنعه / أومال هتبقى ايه مارسيل
عدي / أمسكك بس يا كلب البحر انتي
أمل وهي بتخرج راسها من الباب / عارف ياض ياعدي انت في الهند كانوا عبدوك
عدي بصلها باهتمام / اشمعنى يعني
أمل / أصلهم بيعبدوا الحيوانات اللي زيك أي كلب معدي يعبدوه
لسه هتقفل الباب بسرعه لحقها عدي ومسكها من شعرها وجرها بره / ورحمة أمك حبيبات ما أنا سايب أمك انهارده
أمل / بقى كده طب سيب وأنا أسيب بقى
وفجأه غرزت أسنانها في جنبه
عدي / يابنت العضاضه ويحاول يبعدها عنه مش عارف لحد ما ساب شعرها وهي سابته ومسك جنبه / دي محتاجه ٢١حقنه دي
أمل / قصدك ايه ياض
عدي / قصدي إنها عضت كلب
حبيبة وهي بتطلع من المطبخ جري وفي أيدها شبشبها / وحيات أمك انت وهي يا ولاد الجزمه لو ماغورتوا كل واحد على أوضته لأقطع الشبشب عليكم
جري أمل وعدي على أوضه واحده مع بعض وفجأه عم الهدوء المنزل قعدت الأم على الكنبه وربعت رجليها وربطت راسها بالطرحه وطلعت لب من جيب العبايه / يا سلام على الهدووووء كان مالي ومال الجواز كنت قاعده هنومه متستسته في بيت أبويا أبو الجواز للي عايزينه
عند عدي وأمل قعدوا ورا الباب يلعبوا كوتشينه
عدي / هي أمك مش هتعمل بصطرمه
أمل / أمك هتعملنا احنا بصطرمه لو شافتنا انهارده
عدي وهو بيتحرك / طب استني بقى أنزل السبت لعم عبدوا يحطلنا اندومي وشيبسي وباتيه لزوم حبسة انهارده وكده
وطلع البلكونه ومسك السبت / ياعم عبده ياعم عبده
عم عبده طلع من محله / ايه يا أستاذ عدي
عدي / هنزلك السبت ياعم عبده حط فيه الحاجه بتاعتنا وغمزله
عم عبده بصوت عالي / ايه ده هي الحاجه حبستكوا تاني استنى هجيبلك الحاجه أهو نزل السبت
عدي / الله يفضحك ياعم عبده فضحتنا
أمل من جوه / يجيلك ويحط عليك ياعم عبده
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية أحببته من أجل حبه لفلسطين)
