رواية هلع الفصل السادس والعشرون 26 بقلم آية

رواية هلع الفصل السادس والعشرون 26 بقلم آية

رواية هلع الجزء السادس والعشرون

رواية هلع البارت السادس والعشرون

رواية هلع الحلقة السادسة والعشرون

//
مرن يومين وهدن الاوضاع شوية من بعد التوتر لي صار يوم مشيتنا لماما
عند ميرا اول ما عرفت روحها حامل من ثاني يوم بدن فيها اعراض الحمل سبحان الله😂
ومشت اليوم الدكتورة عشان تبدا معاها وتراجعلها طول فترة الحمل
روحت هي وموسى للحوش قيس المغرب هكي
موسى >> مازلتي تعبانة
ميرا تغيير في دبشها>> لالا كويسه ، خليني نديرلك حاجه تاكلها حرام ما تغديتش
موسى مسك يدها >> شن قالت الدكتورة؟ مش قالت مافيش تعب مانبيش شي ح ناكل اي حاجه بروحي
ميرا >> لالا خليني نديرلك والله مانحس في حاجه بكل
موسى >> كيف صار شكله الوحم جاي بالحب مش بالكره
ميرا ابتسمت>> مشعارفه هو بدا ولا لا 😂 والله ماني فاهمه حاجه بس افطن اه الدكتورة قالت انه هرموناتي ح ينقلبن حنقعد مزاجية
موسى>> نحبك انتي ومزاجيتك
ميرا>> مش ح تخليني نديرلك اكل
موسى >> لالا خشي تريحي
ميرا>> معناها بنخش نرقد و امشي شوف تيح عارفتك مشغول عليه من اول امس طلع من المستشفي ومعش شفته بس ما تبيش تسيبني
موسى>> مانقدرش نسيبك
ميرا>> والله بنخش نغير دبشي ونرقد مش ح نوض الا لما تجي لاني نعسانه بكل
موسى >> متأكده ؟
ميرا>> خلاص را نغير رأيي 😒😂
موسى >> خلي تلفونك مفتوح وخليه جنبك ولما نرن ردي اه
ميرا>> موسى حتقعد ديما تحبني صح
موسى >> شن اسالت العويله الصغار هذينا
ميرا>> والله ح تحبني لو مثلا فالحمل تغير شكلي ؟ ولا مثلا زي ما يقولو انه الوحده فترة الحمل مرات تقعد مش طايقه راجلها وهكي مانعرفش والله شعوري متلخبط ومش مستوعبه مازلت انه في فبطني بيبي بكل
موسى >> حبيتك وانتي مش طايقه تشوفي شكلي مانبيش نحبك ونتحملك توا وانتي فبطنك قطعة مني
ميرا>> معش تقول هكي عمري ما كنت مش طايقتك بس قولي توا مش ح تشوف لبنات اخرى صح عشان لما شكلي يتغير كل شهر
موسى>> تو انا وين نحق فيهن البنات 😂
ميرا>> اهو نحذر فيك بس
موسى مسك وجهها>> في حد يقعد عنده وجه
سمح هكي ويسيبه
ميرا >> مبسوط بالبيبي ؟
موسى >> ممكن مش عارف نعبر علي فرحتي خفت عليكي و اضايقت عشان سيبتك بروحك بس ماعمريش فرحت في حياتي كيف فرحتي توا
ميرا >> ماتحبش اكثر مني باه
موسى >> ميرا بلا تصغير عقل
ميرا ضحكت>> خلاص عدي اطلع معش حنبطل اسأله لو قعدت
موسى >> خلي تلفونك جنبك ، باي
ميرا>> حاضر
//
//
كلمت ضحى أحمد و قالت له انها لقت التلفون بس اصرت عليه انه يجي وياخذه منها بروحه
وفعلا تلاقو فالمستشفي
احمد >> قعدنا نرايفو ولا شنو؟
ضحى ابتسمت >> تعال بنحكيلك حاجه
حس احمد انه في شي مشى وراها وقعمزو علكراسي الاستقبال
احمد >> ضحى في حاجه؟
ضحى >> كان خاطري نقولك خبر كويس بس ام البنات خشت في غيبوبه و نقلوها للمستشفي اليوم فالصبح
احمد >> كيف ؟؟؟ شن صار
ضحى >> نفسيتها تأزمت و تعبت من قلة الاكل خشت في دوامه و جسمها وعقلها معش تحملن خشت في غيبوبه
احمد>> لعند امتى باهي ؟ في اي مستشفى نقلوها ؟ ضحى >> مش معروف لعند امتى الغيبوبه للاسف ماينعرفش وقتها ، نقولها لمستشفى تابعه للمصحه هذي
احمد >> لا حول ولا قوة الا بالله ، كل ما الحياة تمشي معانا ومع هالبنات شويه تصير حاجه تخرب الدنيا
ضحى كانت تبحت فيه كيف مضايق قربتله شويه >> احمد انت اكثر شخص قوي نشوفه في حياتي كلنا معتمدين عليك لما نشوفك نطمن والبنات اكيده نفس الشي ف لما تضيق بيك خلاص نحس انه معش في امل في شي
احمد بحت فيها >> ان شاء الله خير انتي ما تشغليش بالك
ضحى مدتله التلفون>> هضا تلفونها ، وما تخافش انا متابعه حالتها و الزياره عليها ممنوعه وكل شي يصير انا حنعرف اول وحده وصيت عليها واجد اي حاجه ح نكلمك على طول
احمد خذا منها التلفون >> انتي الشي الوحيد اللي مخليني نطمن
ضحى ابتسمت >> معش نبي نشوفك هكي صدقني فترة و ح تمر
احمد >> ان شاء الله
ضحى>> خلاص صبي اللي يخطم يبحت فينا “ووخرت”
احمد>> طالعه انتي ؟
ضحى>> اه جيت عشانك شويه وح يجي محسن ياخذني نكمل شغلي فالمستشفي لخرا
احمد >> ردبالك اه
ضحى>> تمام
طلع احمد من عند ضحى و في كل مرة يتأكد من انه يبي ضحى في حياته بشكل جدي ورسمي ❤️ حياته الملخبطه والقضية و شغله و الفوضى لي عايش فيها مش مخليته يقرب ، بس حس انه هي اللي ح تنظم حياته وهي اللي المفروض تكون معاه
//
//
اما انا كنت يومها لوطا مع سارة نهدرزو
سارة>> خطرها مبروك على ميرا قالت لي ماما مبدري
سما >> الله يبارك فيكي ، شفتي الكلبة كبرت
سارة >> عقبالكم
مش عارفه كيف لااراديا قلت >> ان شاء الله
بحتت فيا سارة وابتسمت
فطنت الروحي>> تشربي قهوة
سارة>> نشربو قهوة على هالاخبار الحلوه😂
خش رسلان وجنبه ربيع ووراهم يزن
سما >> اهي العصابة كلها هنا
ربيع >> سمعنا فيها قهوة جينا
سارة>>باهي لي ماسمعتو اللي قبل القهوة
بحتت في سارة>> سارررررة
سارة ضحكت >> خلاص سكتت😂
رسلان >> شن فيه
سما >> شي سارة تبصر بس ، يزوني تعال هدرزلي وين كنت ” ومشيت شور المطبخ”
يزن>> اسمي يزن مش يزوني
سما برمت على رسلان >> نسخه منك طبق الاصل
رسلان ضحك >> تربيتي هضا
خشينا انا وسارة للمطبخ
ربيع>> شكله الامور لوز
رسلان >> كنك
ربيع>> عيونك قلوب قاعدات
رسلان >> خطرها عالعيون والقلوب كيف حالك انت ؟
ربيع>> بيبرم عليا توا
وخشو جنب امهم
رسلان>> قتلك يا زوبه عندي لكي خبر بمليون جنيه
زينب >> خير ان شاء الله
رسلان>> شكلك قريب ح تفرحي ف سيادة المحقق
زينب بحتت في ربيع >> كيف ؟ منو بنت من ؟ راك اديرلي حتى انت كيف رسلان وتسحن كبدي بيش نتعرفو عالبنت
ربيع>> خوذي نفس ياحاجه ، عليك تحقيق
رسلان>> تحسابه ساهل وكال كبود الناس
زينب>> غير اسكت بس ربيع قولي منو ؟ صح كلام خوك
ربيع>> امي الله يربحك بشويه
رسلان ضحك>> والله كان ماجاك بعد فتره وقالك بنخطب بحق
على خشتنا انا وسارة بسفرة القهوة
سارة>> من بيخطب ؟
ربيع >> هي خرف هنا عندك
خذا فنجانه و جا قعمز جنب امه ، وقعدو يهدرزو
مسكت فنجاني وقعدت نبحت فيهم ، كيف ربي حطني في وسطهم ، كيف ربي نجاني من الحزن والهلع لي كنت فيهن بقدرته العظيمه فجأة بين يوم وليله فقدت عيلتي كامله ! و بين يوم وليله قعدت عندي عيله اخرى
سارة كانت كيف ميرا بزبط نحكيلها في كل شي براحه ، ربيع كيف خويا الكبير ،وصح ما فيش شي يجي مكان الاب والام بس عمو وعميمه زينب كانو حنونين معايا بكل و كل ما نتعارك مع رسلان يوقفو في صفي على طول بدون ما يفهمو حتى منو الغلطان فينا ، ربي جابهم ليا في وقت كنت بننجن فيه كنت ح نخش في عقل مش عقلي
لجأت إلى الله ، ولم اعد أخشى أن أسقط أو أتعثر ، وأني في نعيم الإكتفاء ، في مأمن الغنى ، وفي سلامة الكفاية..”✨
وانا نفكر وسارحه فيهم وفي هدرزتهم كانن عيون رسلان عليا ، كأنه حاس ب انا شنو نفكر وكانه
عارف اني فاللحظة هذي وحشتني عيلتي ، رديت من سرحاني وبحتت فيه لقيت عيونه عليا ابتسمت
غمزلي وشيرلي براسه ، حسيت زي كل مره انه يقولي انا هنا ما تخافيش ❤️
//
//
في الليل كنت في الحوش ، و سارة روحت ورسلان طلع مع اسير
قعدت عالتلفون دزيت للبنات عالقروب كانن مش فاضيات شكلهن ، حطيت التلفون وقعدت نفكر في فرحة موسى لما عرف ميرا حامل ، لو حملت رسلان ح يفرح هكي ؟ باهي هو يفكر فالموضوع اصلا ولا شنو
سمعت صوت المفاتيح وخش رسلان ، ابتسمت … برم عليا ورفع حاجبه>> شن الابتسامات هذينا ؟
سما >> كل ما نفكر فيك تجيني
حط التلفون والمفاتيح عالطاوله وحول جاكته و جا عالكنبه جنبي >> وشن كنتي تفكري المره هذي
طبست راسي وقعدت شابكه يديا
مسك رسلان يديا فكهن من بعضهن >> شن قلنا عالتوتر نحن ؟
بحتت فيه >>لما صارت يعني قصة ميرا وشفت موسى وهكي قعدت نفكر لو انت تبي يعني “وقعدت مش عارفه شن نحكي كأني نحكي مع حد براني “🌚
رسلان ضحك >> قصدك لما حملت ميرا وشفتي موسى فرحان، فكرتي لو مثلا انا نبي عيال ؟
هزيت براسي >> يعني حسيت مرات انت تبي
رسلان >> انتي عارفه انه كل شي صار بينا متأخر ف عادي خليها مع الوقت، ولو قصدك عليا انا ” مسك يدي وصبا ” ف نبي عيال اليوم قبل بكرا
صبيت معاه وهو ماسك يدي وقعد يمشي وماسكني>> رسلان كيف روحت انت غير دبشك بس
رسلان>> بالفتحه واسس
//
عند خوخه فالليل
روح احمد من شغله وقبل ما يخش داره مشى دار خوخه لقاها بروحها
احمد >> وين يا حاجه مسيبينك بروحك
خوخه>> تو كانن كلهن هنا لزيتهن يحكن كلهن مع بعضهن صدعن راسي بذات الفرخة روان صوتها عالي
احمد ضحك >>كيف حال صحتك
خوخه >> شن مالك ومال صحتي احكي اللي خاش عشان تحكيه
احمد >> كيف تفهمي عالطاير
خوخه>>اوليدي كان ما عرفتك و فهمتك من خشتك عليا امالا من بنفهم
احمد ابتسم>> ربي يخليك لنا ، المهم مش لك فتره بتفرحي بيا
خوخه بحتت فيه>> قررت على الممرضه هذكي
احمد>> الي ينقاللها سما ما تعرفش تمسك شي بكل
خوخه>> عشان عارفتك بمليون راي قالت لي
احمد ضحك>> هي اه ، ها تمشي تخطبيلي ؟
خوخه>> كان نلقى نمشي من توا
احمد >> الاسبوع الجاي كويس ؟ عشان انا مازلت ما حكيتش للبنت اليوم كيف حسيت انه خلاص معش فيها
خوخه>> ما تأجلش شوف البنيه و قولي مش تقعد تلغي وتاجل وشغل ما شغل كان ما جيتني نمشي بروحي
احمد >> ساهل ساهل
صبا احمد >> بنمشي نرقد تالف بكل من الشغل
خوخه>> عدي تريح
طلع احمد وعيون خوخه عليه مليانات فرحه ، كيف اي ام قلبها متقسم بين عيالها
ما بين عاشور الي حاصل في روحه و ما يحبش يتحمل مسؤوليه بس يبقى ولدها و كبيرها
وما بين منى اللي ما تفاهمتش مع راجلها و اطلقت وهي صغيره ما فرحتش بيها
و ما بين وجعها على ولدها الي مات مقتول
وما بين اصغر عيالها أحمد اللي تبي تشوفه عريس وتفرح بيه
تفرح مع هضا وتزعل مع هضا وتبكي الهضا و تحل مشاكلهم ، مظطره تعيش كل المشاعر في نفس اللحظه
//
//
عند موسى ، زرق عند تيح في حوش هله
تيح >> ادير فيا خدمة
موسى>> شنو؟
تيح >> تشيلني شور الاستراحه الليله
موسى >> كنك
تيح >> بالله عليك بنطلع حسني انخنقت هنا وامي معش بتخليني نمشي الحوش جدي وراجل امي وقصة انقنك تطلع بيا
موسى >> باهي نطلعو وتروح بس
تيح >> اه روح بيا الحوش جدي مش على هنا
موسى >> باهي صبي البس حاجه دافيه بس صقع برا
تيح صبا بشوية>> نجيب جاكتي ونجيك
نزل موسى وشويه ولحقه تيح
تيح>> ماخلتنيش نطلع الا بعد عرفتني معاك
موسى عزق الدخان>> واسطاات
مشو شور الاستراحة وطول الطريق كان موسى حاس انه تيح مش على بعضه بس ما حبش يحكي خلاه براحته ، اول ما وصلو نزل تيح و خش سبق موسى
تيح >> توا كيف خذيت نفسي اقسم بالله من يوم طلعت من المستشفي وانا قاعد بين امي و الهرجه و سريب
موسى >> خايفين عليك يا راس
تيح >> والله الا صداع هضا مش خوف
موسى قعمز جنبه>> باه ما تبيش تقولي كنك
تيح >> كني ؟
موسى >> انت عارف وانا عارف انك مش على بعضك
تيح >> ما قتلك قعدتي عند امي قلبتلي راسي
موسى >> غير هكي ؟
تيح>> ما فيش شي | قولي انت كيف حالك يا بابا
موسى ابتسم>> في احسن حال
تيح ضحك>> ايامك بعد البهدله ووجع القلب
موسى >> عقبال نفرح بيك ” وغمزله”
تيح ابتسم مجامله وسكت
موسى سكت ، و عشان حافظ تيح كان برضو حاس او متاكد انه الموضوع شور اخته وانه تيح بعد العمليه حس انه ما يقدرش يكمل بس ماكانش قادر يحكي ولا تيح كان قادر يقول شي فالنهاية اللي بيحكو عليها تكون اخته
ف كان مفتاح رغم انه موسى صاحبه الوحيد بس ما يقدرش يحكيله ف التزم الصمت
و كانت قعدته في الاستراحه والهدوء هضا محتاجه من يوم ما طلع من المستشفي وهوا هرجه وزحمه و كل مره حد جاي يزوره ما لحقش حتى يفكر
//
//
حكى احمد مع ضحى عالخطبه وكانو هما الاثنين واضحين في قرارهم بكل ❤️
يوم خطبت احمد كنا نحن البنات فالحوش كلنا التمينا❤️
وكانو خوخه و عميمه منى وفاطمه هنا اللي ماشيات بس عشان يديرو خطبة وهكي ، واتفق احمد مع ضحى انه يديرو كل شي في اسبوع العرس عشان مش ح يطول بالخطبة يدوبك سنة ويطلع العرس لحد ما يكمل الملحق لي برا ويستقرن الاوضاع شويه
سما >> كنهم طولو
سالمة>> هما ما مشو الا متاخر اصلا
رندة >> مش مصدقه واخيرا احمد خطب يا فرحة خوخه
سما >> ماشية ومش مصدقه😂
ميرا >> نحس في راسي صداع
سما>> تو عليش جيتي مش كان تريحتي انتي ووحمك
ميرا >> ونفوت اليوم التاريخي هضا
روان >> انقنه يوم تاريخي
قعدن البنات يتناقرن ويهدرزن بحتت في سالمة لقيتها سرحانه لفيت شورها
سما >> ماصارش معاك جديد؟
سالمة>> ولا ح يسير
سما>> ما رنش عليكي باهي ؟
سالمة>> ولا انا رنيت
سما>> كيف يعني ح تفسخي الخطبه ولا شنو؟
سالمة >> هو الي يبي مش انا ، وهو لي حكى فالمستشفي ف يخليه قد كلمته ويجي يحكي الموسى و يقوله انا معش بنكمل
سما >> سالمة را كان يحكي وهو فالمستشفي وداير عمليه كبيره
سالمة>> سيمو انتي مش فاهمه ، تيح من اول يوم وهو صاعبه عليه نفسه و حاط فعقله اني انا نعامل فيه كويس عشان شفقه مش فاهمه شن يقوله عقله ، بس نبيه يعرف اني نحبه واني راضيه بكل شي فيه مرضه وقلبه و تعبه ومستشفياته وادويته انا مش معترضه هو اللي يبعد فيا عنه
سما >> تيح خايف ، راهو راجل مش طفل صغير ، اكيد يفكر فالمستقبل يفكر لما تعيشو في حوش واحد هل ح يقدر يدير مسؤولياته كلهن هل ح يقدر يكون معاك و ما يقصرش واكيد فاهمه عاد انتي مش غبيه و انتي عارفه كيف الرجاله كلهم يفكرو ف ماتلوميش عليه ، بس في نفس الوقت خوذو فتره انتو الاثنين وفكرو كويس
سالمة >> مش عارفه والله وخايفه من بابا لو المره هذي فسخت خطبتي للمره الثانيه ح يديرلي سريب
سما >> سالمة اهدي ما توصلش الفسخة الخطبه
سالمة >> ميرو قتلك
ميرا كانت تهدرز مع رندة وروان برمت عليها >> نعم
سالمة >> موسى ما قالكش كيف حال تيح
ميرا >> لعند امس كا عنده و قالي انه كويس صحته بدت اتحسن بعد العمليه ، و قاعد بين امه وحوش جدته
سالمة >> باهي احسن خليها تحس انها امه مره في حياتها
ونحن نحكو على خشت الخطابين من برا 😂
صبينا كلنا شور الباب
سما >> شنصار؟
سالمة>> شن دارولكم
روان>> كنكم طولتو
ميرا>> احمد وين
خوخه >> وواك مكثر هرجتكن خلونا ناخذو النفس
رندة >> مبدري نراجو فيكم
فاطمة >> ميرا كنه وجك اصفر
ميرا>> لا والله غير راسي صداع بس
فاطمة>> ردي بالك وكولي كويس قلت الموسى بكرا تو ندزلكم غدا
ميرا>> لا ياعميمه ما تعبيش روحك
فاطمه>> لا ما فيهش تعب
بحتت خوخه في منى وضحكن وخشن ولحقنهن البنات عشان يعرفن الاخبار
سما>> شن الغلا لي نازل هضا
روان >> شكله تراجي في ولي العهد 😂
ميرا>> اهم شي معش في عزق كلام من تحت التحت بس عشان نفسيتي مش حتحمل 😂
خشينا قعدنا نهدرزو وقعدو يحكولنا شن صار عند العرب وخوخه كانت اكثر وحده فرحانه عشان مشت و خطبت الاحمد
وعلى سيرة احمد خش علينا وكانت الفرحة في عيونه
روان >> مبروك يا خالو
احمد >> شن خالو هذي خلخل عظامك
روان>> ما عشان خطبت قلنا نديرولك جو 😂
احمد >> لا بلا جو قولي احمد 😂😂
رندة >> خلاص يعني رسمي خطيبه وحركات
احمد >> ان شاء الله خوخه متريحه بس 😂
سالمة >> هضا يوم المنى 😂
كانو كلهم يحكو ويباركو الاحمد ، كنت واقفه نبحت فيهم و عيوني عليه ، احمد مش بس عمي
احمد خويا وصاحبي و رفيقي والسند لي جابه ليا ربي ، احمد اللي قواني والي شال همي انا واختي واللي زفني وسلمني الرسلان بيده واللي وقف معايا ضدهم كلهم واللي لما يقول كلمه مستحيل يرد فيها ، احمد اللي شالني احمد اللي ما نقصش عليا شي واللي كان يجري بينا انا وميرا بين المستشفيات واللي كان يسهر علي راحتنا
قعدت نبحت فيه وانا حاسه اني على قد ما انا فرحانتله على قد ما اني نبيه يقعد معايا مانبيش يجوز ويتغير ، بس رغم هكي كنت نشوف في الفرحه في عيونه وكيف هو مبسوط بعد كل التعب لي تعبه وبعد السهر و الشغل و البهدله في الاقسام والجري بين المستشفيات لقى العوض ، كنت نبحت فيه وعيون ميرا عليه اللي كنت متأكده انها تحس بنفس الاحساس
احمد>> في وحده هنا رغم انها هي لي كانت سبب كل شي ما تبيش تقول حتي مبروك
مشيت عنده واضبطته وحاولت نمسك دموعي >> مبروك يا احسن عم فالدينا
احمد >> تي شن قصة عمي وخالي االيوم خطبت راه ما قعدتش جد😂
سما >> تحس انه المواقف هذينا جديه 😂
احمد>> على سيرة الجدية خلوني نطلع عندي شغل خلاص عاد
طلع احمد وركبت فاطمة فوق و قعدن نهدرزو لحد ما روحنا
//
//
في الليل عند رندة اللي كان يحكي معاها سيادة المحقق😂
ربيع>> شن صار في خطبة احمد اليوم
رندة >> الحمدلله واخيرا فرحنا بيه
ربيع >> جاي للقسم مبدري مبسوط 😂
رندة ضحكت>> اه طلع قال عندي شغل ، انت فالقسم ؟
ربيع >> لالا طلعت اليوم كملت شغلي بدري| اسمعي
رندة >> نسمع
ربيع>> انتي مازلتي صغيره و فالجامعة بس راه انا كبير
رندة >> اللي يسمعك يقول تمشي بعكوز 😂 المهم وكان كبير يعني 🙊
ربيع ابتسم >> انقنه تكليم بالتلفونات نحس فروحي كبرت عليه انا متاع جي من الباب و حتى العرس يطلع بسرعه
رندة توترت>> ربيع تحكي جد
ربيع >> لما حكينا قتلك عطيني شهر وخلاص مش فاضل فيهن غير اسبوع😂 اعتبريه كمل
رندة >> بس انا مازلت عندي جامعة مازالي ٣ سمسترات ، اساسا انا متأخره عشان السمستر لي وقفته
ربيع >> ومن قالك ح نمنعك من انك تقري
رندة >> مش هكي بس نحس فالموضوع كبير😂
ربيع >> ولا ما تبينيش ؟
رندة >> ربيييع عاد مش هكي قصدي بس القصة كلها انه خايفه نجوز و نتعطل
ربيع >> وشن بيعطلك وانا قتلك انه قرايتك مش ح نمنعك عليها اساسا من هنا لعند ما نطلع الفرح تكوني السمستر هضا كملتيه والسمستر لاخر باديه فيه يقعدلك واحد بس وانتي معايا وفضت
رندة >> ماه ميرا جت عند السمستر لي قبل الاخير وحملت وتوا قعدت ما تمشيش الا للمحاضرات المهمه بس ومش عارفه يعني 🙊
ربيع ضحك بصوت عالي >> قوليلي هكي قصدك
رندة تحشمت >> ربيع خلاص عاد غير الموضوع
ربيع >> غير تعالي بس 😂 والله ما تسير ، بس فعلا انقني نبي عيال دغري حل الغايه من اول شهر
رندة >> ربيع والله انصكر عليك خلاص بطل
ربيع مازال يضحك >> سكتت 😂 بس راه تطويل وتكليم لا خليني نحكي مع احمد في اقرب وقت
رندة >> ان شاء الله خير بس توا خليني نرقد عشان بنموت نعس وبكرا عندي جامعة
ربيع >> توا بنقولك صوتك ودر ، خلاص ارقدي
رندة >> نواعيك بكرا
ربيع >> لالا شغلي فالليل بكرا
رندة >> تصبح على خير
ربيع >> قدامك الخير
صكرت رندة وهي مبتسمه رغم انها كانت حاسه انه مسؤولية الزواج عليها بس كانت متردده ، على قد ما كانت نعسانه طار النوم من عيونها من كثر التفكير طلعت من الدار لقت سالمه متغطيه فالصاله وتفرج عالتلفزون جت جنبها
رندة >> نهدرز ولا نسكت
سالمة>> كان بتحكيلي فالموضوع هضكي ف اسكتي
رندة >> مش حاكيتلك فيه يانكد 😒
سالمة برمت عليها >> شنو
رندة>> كنت نحكي مع ربيع توا و فتحلي موضوع انه يدير حاجه رسمية قريب وهكي
سالمة>> باهي انتي تحبيه صح؟ ومن زمان مش من توا ف شن نهاية اي اثنين يحبو بعضهم انهم يخطبو ويجوزو
رندة>> فاهمه و نحب ربيع
سالمة>> وطي صوتك باتك فالدار
رندة بصوت واطي>> المهم مش مشكلتي فالحب ولا هكي مشكلتي انه الوقت نحس مازلت بنكمل جامعة و خفت بعد ما حملت ميرا وقعدت نحق فيها يوم تمشي ويوم لا وجاياتنا امتحانات الفتره الجايه
سالمة >> تو اخر وحده تجوز وتقرا ، عارفته الزواج مسؤوليه بس صدقيني انتي اصلا شن مازالك هالكم سمستر وفضت ف عادي يعني ما تديريش عائق قدامك اهم شي انتي بتكملي ، لو كان مثلا شرط انك ما تقريش ف هكي حقك بس الراجل مسكين ما قال شي
رندة>> مش عارفه يعني نقوله يحكي مع احمد؟
سالمة>> اه عادي و باتك عارفتيه اهم حاجه عنده نطلعو من مسؤوليته
رندة>> باهي وانتي؟
سالمة صبت خذت بطانيتها وكرت المخده>> انا نبي نرقد
رندة صبت وراها>> مش ح تحكي يعني
سالمة>> رندة فكري في ربيع وشن بتردي عليه انا خليني فحالي
رندة>> طول عمرك راسك يابس
//
//
طلع احمد من المركز فالليل متأخر وقبل ما يمشي للحوش مشى عند ضحى لي كان عندها توكه فالمستشفي
لقاها عند الريسبشن ماسكه ملف بحتت فيه وميلت راسها بمعني شن جابك هنا
احمد >>اسمعي بتفكيني من الحشم ولا شنو
ضحى >> انت ماتبيش تطلع ؟
احمد >> تو فهميني جايه يوم الخطبه فالليل ماسكه فالمستشفي كنك م خذيتي اجازة
ضحى >> ماه خذيت اليوم لي قبله عشان نوتي وهكي ف ماتجيش نفصل مرتين
احمد مسك يدها وسحبها للممر
ضحى >> احمد را محسن يجي
احمد >> نعرف انه فالحوش
ضحى ضحكت>> ضابط بحق وحقيقي
احمد>> ندير اي حاجه عشان نشوف عيونك هذينا
وخرت ضحى خبطت فالساس حط يديه الاثنين عالساس
ضحى اختفى صوتها>> ا ح م د نحن في مستشفي
نزل راسه بشويه وقرب منها>> مش كان قريت الفاتحه اليوم را الواحد دار يلي بيديره
ضحى ساكته و تحاول تجنب نظرات احمد ، رفع يده مسك وجها وقربه منه بالقوه دفاته
ثواني وضحى دفاته بالقوه ومشت من جنبه وهي تحكي >> احمد نحن مش قاريين فاتحه هنا معش تجيني اطلع
مسح على راسه ووجه وضحك وطلع 😂 بعد ما نرفزها
–
ثاني يوم في قسم الشرطة
ربيع >> المدير يبي تقرير عن القضية اليوم، اشتغلت علي عندك
احمد >> اه تقريري كتبته
ربيع >> وانا تقريري كتبته
احمد >> تعال نلموهن على بعضهن عشان نسلموهن له
خشو لمكتب ربيع وقعدو ساعه هما الاثنين يلمو في كل الادله و يناقشو في التقارير
رسالة التهديد يلي جت السما ، رسالة التهديد يلي جت الامهن ، الكاميرا ، يوم مشيتهم لحوش الجريمة ، التحقيقات مع الجيران لما صارت الجريمة وكيف انه ماحد سمع شي التحقيقات مع هله كل شييييي لموه على بعضه
احمد >>تمام مافيش شي ناقص
ربيع>> احمد ما نبيش نحبطك بس تخليش الامل كبير
احمد تنهد و مسح على لحيته >> عارف عارف
مسكو الاوراق وخشو لعند النائب
//
//
ثاني يوم فالصبح
نضت قبل رسلان 🙊 كنت بنوض معاه قبل ما يمشي للشغل ونديرله قهوة وهكي ، وتيتله قهوة لبس وجاني للمطبخ
رسلان>> صباح الورد
سما>> صباح النور بتطلع توا
رسلان قرب مني ومسكني>> شن السماحه لي تزيد كل يوم هذي
سما >> انت تنابش بعدين تقولي اسير يعلق علي مالية الرقبه و يا سما خليتيني نطول عالشغل
ضحك وقرب مني
شوية ووخر>> لو مافيش شغل بس
سما >> رسلان خوذ قهوتك الي صقعت و اطلع
قاطع كلامنه رنت تلفوني استغربت لانه صبح بدري ، خشيت جبته ولقيت احمد يرن
سما >> احميدا صباح الخير
احمد>> صباح النور شن اخبارك
سما >> الحمدلله انت كويس
أحمد >> تمام تمام ، قتلك تعالي بعدين للغدا
سما >> ليش ؟ كيف عزومة ولا شن
احمد>> قلنا لنا زمان ما التمينش
سما>> باهي تمام تو نشوف رسلان
احمد>> كان عنده شغل تو نجي نجيبك
سما >> خلاص باهي
سكرت من احمد ورسلان واقف جنب الطاوله ماسك كباية القهوة
رسلان>> شن فيه؟
سما >> احمد يبينا نجو للغدا اليوم
رسلان>> باهي كنك مستغربه
سما>> انا حافظه احميدا صوته مش مريحني
رسلان قرب مني >> شن قلنا عالخوف والتوتر نحن
رفعت راسي وبحتت فيه>> انت معايا صح
رسلان >> ومستحيل نخليك
ابتسمت>> انحبك
رسلان حط كباية القهوة >> لا هكي حنقعد انا
سما >> ههههههه لا خلاص امشي شغلك وماتنسش تجيني راك اطول
رسلان>> لا حنطلع بدري ونكلم اسير يجي للشركة بيش ما نطولش عليك
سما >> اسير ح يذلك 😂😂
رسلان>> ساد ما مخليه يطق في روان😂
طلع رسلان وانا برمت شويه فالحوش و ماجانيش نوم، لقيت ميرا ترن عليا
ميرا>> كلمك احمد
سما >> اه قالي على غدا
ميرا>> شنو فيه ؟ما ريحنيش صوته
سما >> حتى انا ان شاء الله خير | شن الهرجه لي حذاك
ميرا>> فالجامعة مع البنات اليوم حسيت روحي كويسه والفاينل قرب قلت نجي نلم الدنيا
سما >> ردي بالك باهي وكان هضا روحي مع البنات عند خوخه طول
ميرا>> اه ما فيا ما روح تو نكلم موسى نقوله
سما >> تمام باي
//
//
في الشركة
كان رسلان فالمكتب خش عليه اسير
اسير>> ازف خلطتك هذي ما تربحش بكل
رسلان>> وراس امك بنشيل سما هلها عازمينها وموسى طلع حتى هوا بيشيل مراته غادي مافيش حد فالشركه صكر الحسابات واطلع
اسير >> اللهم طولك ياروح ناس تمشي تنعزم عالغدا وانا نقعد بين الاوراق
رسلان >> قتلك تشتغل معايا نشوفلك موسى عالاقل تاخذ مرتب مصكر راسك
اسير >> عارفني مش متاع دوام ومكاتب انا المحل ويوم نحله وعشره نصكره ، غير اخر فتره قعدت فيه بيش نلم روحي ونزوج
رسلان>> اوبااااا قعدنا نفكرو فالزواج
اسير >> بنلبس ماليات رقبه حتى انا ما لبستهن انت الا واجد
رسلان>> ما يقدرش الواحد يغلط قدامك في شي 🙂
اسير ضحك>> خلاص اطلع خليني نشوف شغلي ، وعشايا عليك اه
رسلان >> الذل اللي معش كمل
//
عالغدا كنا ملتمين كلنا واستغربت انه احمد مكلم حتى ربيع، كنت نحوس فالمطبخ مع البنات وعميمه منى وفاطمه ونهدرزو
فاطمة>> ميرا عدي تريحي كنتي فالجامعة ومصبيه فالمطبخ
ميرا>> مانديرش في شي ياعميمه نهدرز بس البنات مش مخلياتني ندير شي
فاطمة>> عدي مع رندة حذا خوخه
ابتسمت ميرا وبحتت فينا ، ومشت عند خوخه
منى>> خلاص وحده منكن تطلع تكلم موسى ولا احمد ياخذو سفرتهم
سالمة>> تو نكلم احمد
فاطمة>> قلت الموسى يكلم تيح حرام هي عزومة عزومة ياكل وكله مسقمه
وقفت سالمة وبحتت فيا
منى>> اه والله باهي لي كلمتوه “وبحتت في سالمة” تي عدي را يصقع
فطنت السالمة جيت جنبها>> تو نطلع نكلمه سالمة جيبي العصير من التلاجه ” ودفيتها عشان تفطن”
طلعت دقيت عالباب كلمت احمد وتغدينا وخشينا بعدها للمطبخ
روان>> رندة طول ما نحن نوتو وانتي جنب خوخه اغسلي المواعين
سما >> بلا عرايك كلنا نغسلو
رندة>> طبعا ميرا لا عاد
ميرا>> عميمة قالت لي تريحي 😌😂
سالمة واقفه عالروشن
بحتت لقيت تيح برا عاطي بالجنب ويشربو في شاهي هما و ربيع ورسلان واحمد وموسى وعاشور
جيت جنبها >> سالمة رني عليه
سالمة>> مفروض هو اللي يرن ياسيمو مش انا
رفع تيح راسه وبحت فالروشن ، سما وخرت على طول و سالمة قعدت واقفه وجت عينها في عينه ماقدرش ينزل عيونه بس اظطر عشان عيب انه حد يفطن له ، مسح على لحيته وتنهد
وخرت سالمة و حطت يدها على قلبها >> يارببب ساعدني يارب قربه مني يارببببب ما تخليش يسيبني
– ‏لا تكسِر قلباً رق لك يوماً ، فلحظات الود لها عليكَ الفُ حَق وحق 💔.
//
//
بعد الغدا خش احمد وكلمني انا وميرا ، بحتنا في بعضنا وتأكد احساسانا انه في حاجه
طلعنا برا كان احمد وربيع بس واقفين معانا
أحمد >> سيمو انتي تعرفي اني انا ندير في شغلي على اكمل وجه فما بالك لو كان شي ليا
بحتت فيه وسكتت
ميرا>> احميدا كبرنا عالمقدمات راه
موسى قربلنا هو ورسلان
ربيع كان مظطر يحكي ويكون اقوى من أحمد لانه الموقف قد ما صعب علينا ف هو صعب عليه
ربيع >> للاسف اسكر ملف القضية و تقيدت القضية ضد مجهول ، امس كان عندنا اجتماع مع النائب قدمنا كل شي وصلنا له للقضية و كل حرف وكل دليل وكل الاقوال بس للاسف كانت القضية هذي مافيهش ولا حتى شعره نقدرو نمسكو بيها المجرم كان كل شي صعب من البداية بس حولنا ما فيش حتى مشتبه بيه واحد ، تواصلنا مع جميع الناس لي يعرفهم في الشركة كانو كلهم يحكو انه محترم ما عندش عداوات ما قدرنش حتى نوصلو لحد يكرهه او حاقد عليه مثلا
كل شي قدمناه كنا متوقعين النائب يقرر انه يقيد ملف القضية ضد مجهول و يتسكر الملف
كنت نشوف في ربيع يحكي بس ما سمعتش منه غير كلمة ” للاسف اسكر ملف القضية”
قرّب رسلان مني و حط يده على كتفي

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية هلع)