رواية أبالسة الإنس الفصل الأول 1 بقلم هنا عادل
رواية أبالسة الإنس الجزء الأول
رواية أبالسة الإنس البارت الأول
رواية أبالسة الإنس الحلقة الأولى
انا من دلوقتي هحكيلكم بالتفصيل، وقت ما حصلت الاحداث اللى هقولكم عليها دي كنا سنة 2013، يعني من 10 سنين كان عندي وقتها 29 او 30 سنة مش صغيرة يعني، بس تقدروا تقولوا كده اني طالعة لأهل ابويا شوية مش اهل امي، صحيح هطلع لأهل امي ليه؟ اذا كانت امي نفسها اخدت طبع ابويا اللى عاشت معاه اكتر من 50 سنة، امي وابويا كبار مش صغيرين وجوازتهم من البداية كانت لهدف معين كده مش جوازة عادية زى اللى متعودين عليها، لكن ابويا طمع في امي لما اتجوزها ولقاها حلوة وشقتها عندها واهلها مرتاحين بعد كده قدر يخليها تتراجع عن فكرة انها جوازة مؤقتة، وبكده استمرت امي مع ابويا واختي الكبيرة اللى هي من امي اضطريت تعيش مع جوز ام…وطبعا انتم عندكم فكرة عن جوز الام خاصة لما يبقى بيغير وبيكره ابو البنت دي اللى هو جوز امي الاولاني…اللى مات، امي من الستات اللى بتنام لحد المغرب ولما تصحى بدري اوى ومن صباحية ربنا يبقى الصحيان ده بعد الضهر مثلا، عمرنا ما اتربينا على ان العيد ده عيدية وهدوم جديدة وزيارات، عمرنا ما اتربينا على ان امي تقوم تطبخلنا وتساعدنا فى مذاكرتنا او…او..اووو اي حاجة ام بتعملها، كل اللى كانت بتعمله يا تبقى مع ابويا فى اوضتهم وكلنا برة عارفين ايه اللى بيحصل وسامعين، يا اما نايمة، يا اما بتتخانق مع الجيران، اما بالنسبة للأكل ف ابويا هو اللى كان بيعمله وهو اللى كان يروح السوق وهو اللى يجيب كل الطلبات…مش علشان هو بيحب يساعد، لالالا…ده علشان هو بخيل بُخل الدنيا وبيحب يصرف على قد القد وحتى الاكل يعمله بكميات حتى متشبعش عيل صغير، طول عمرنا على كده من صغرنا لحد ما كبرنا وهو على نفس الحال، اتبهدلنا كتير بسبب البُخل بتاعه واللامبالاة بتاعت امي فى كل حاجة، حتى ايمان..اختي الكبيرة اللى من امي شافت على ايد ابويا عذاب ما يعلم بيه غير ربنا، وعلى قد ما يقدر خالي ومرات خالي كانوا بياخدوها عندهم معظم الوقت علشان يبعدوها عن ابويا، بس طبعا ابويا مكانش بيحبها تكون برة البيت كتير وهتعرفوا الاسباب مع الاحداث، اخوالي ياسر ويسري كانوا مش بيحبوا ابويا بسبب غبائه لكن كانوا بيتجنبوا يقفوا قصاده بسبب امي اللى كانت بتزعل عليه، لكن معظم الخناقات كانت مع خالي يوسف ابو بسمة لأنه كان بيزعل على ايمان واللى بيحصل معاها، وبما ان طفولتي انا واخواتي قضيناها كلها جوة البيت مش براه وشوفنا جفاء ميتوصفش من الاتنين طلعنا احنا كمان جوانا نفس الجفاء ومفيش عندنا حنية ابدا، تعالوا بقى اقولكم ايه اللى حصل نتيجة العُقد اللى اتعملت فينا، داليا اختي من ابويا وامي اتجوزت واطلقت، وايمان اختي الكبيرة كمان اتجوزت واطلقت وبرغم جمالها وادبها واحترامها الا ان جوزها وبرغم عشقه ليها خانها، خانها كتير وحاولت تتحمل كتير علشان مترجعش بيت امي وابويا تاني لكن هو زاد فيها، ومقدرتش تتحمل اكتر خاصة بعد ما جالها السكر بسبب الزعل والضغط، اخواتي الشباب كل واحد فيهم فى شغلانة لكن لما قامت الثورة اصحاب المصانع سرحوا عمال كتير بسبب وقف الحال وعلشان كده اضطروا يدوروا على اشغال تانية، لكن فلوسهم على نفسهم وبس محدش بيساعد حد، بالنسبة لإيمان..نزلت اشتغلت علشان ابويا مستحيل يأكلها لقمة من جيبه، وفى نفس الوقت هي بتتحرج جدا ومش بتحب تكون تقيلة على حد علشان كده رفضت ان خالي يساعدها، اما داليا بقى فدي كانت قادرة جدا، قادرة لدرجة انها كانت بتروج لبيع المخدرات على النت…وفعلا قدرت تعمل فلوس تصرف بيها على ابويا وتخليه ميفكرش ينطق معاها بنص كلمة على عكس ما بيعمل معايا انا واخواتي، وحبه للفلوس خلاه يقبل منها اي حاجة وهو راضي وساكت، كل ده يخص الناس اللى انا عايشة معاهم، كان لازم اقوله علشان تعرفوا اساس كل حاجة، اما انا بقى….مش عارفة الاقي كلمة اوصف بيها نفسي، اتعلمت وخلصت دراستي لكن منزلتش شغلانة الا لما رسمت على صاحب المكان اللى بشتغل فيه، او حد من زمايلي مثلا، او حتى اصحابي فى الكلية، او اي واحد كنت اتعامل معاه لازم ارسم عليه، نرتبط شوية وقت وانفضله اول ما يظهر قدامي حد جديد، مبحبش حد ولا بيفرق معايا حد، ودايما مقتنعة اني الصح قصاد كل الغلط اللى بواجهه، برغم اني مش صح بالمرة فى ولا حاجة بتحصل معايا ولا بعملها، جوايا غل وسواد وكره ناحية اخواتي رهيب، نفس الغل والحقد اللى جوة ابويا وامي من ناحية كل اللى حواليهم، تقريبا احنا كلنا كده، بسمة بنت خالي كانت تعرف عني كل حاجة، هي الوحيدة اللى كنت بتكلم معاها فى كل حاجة بعملها لانها مش هتعمل زى اختي وتعايرني فى اي خناقة بأي حاجة انا قولتلها عليها، كانت بتنصحني كتير الحقيقة لكن انا مبسمعش لحد، انا فيا عقل وانا الكبيرة وانا اللى تعليمي عالي مينفعش اسمع للي اصغر مني، هتفهم ايه هي اكتر مني اصلا؟ ولا حتى غيرها، وعلشان كده كنت بعمل الغلط اللى ييجي على مزاجي وانا مرتاحة…وعلى النقيض انا بصلي..ومش بسيب فرض، وبحضر دروس فى المسجد، وللعلم…امي مش بتسيب المصحف من ايديها، ومتقدرش يعدي يوم من غير ما تصلي الفجر حاضر، وكل فروضها بتصليها حتى لو فاتها حاجة لازم تصليها، اما ابويا بقى فهو من وقت ما وعيت على الدنيا وهو مش بيفوت ركعة، من اول صلاة الفجر لحد قيام الليل، وبرغم عن كده احنا مفيش ولا حد فينا قلبه سليم، احنا بنمثل…بنمثل اننا عيلة تعرف ربنا، لكن من جوانا مليانين شر وحقد وغل وحرام وغلط…وصلت بينا لدرجة الأسحار والاعمال كمان، الحقيقة انا بحب الحاجات دي جدا، وعندي فضول ناحيتها جدا جدا، ولأكتر من مرة اتعاملت مع الناس اللى بتدعي انهم بيعالجوا بالقرأن، او الناس اللى بتعمل اعمال، بس للأسف ولا حد منهم لقيته مؤذي او بيعرف فعلا فى الشغلانة دي، كان عندي فضول لكن مش عارفة ارضيه، لحد ما جه الرضا للفضول ده لحد عندي، لحد اوضتي، لحد سريري…ولحد روحي، والبداية كانت لما ابويا قرر يحارب اخوالي ويطفشهم من البيت بمساعدة امي، امي اللى كانت متعرفش اللى هيحصل، كانت عارفة ان ابويا بيكره كل الناس تقريبا لكن متخيلتش ان نتيجة كرهه هتوصله للجوء للشر والخبث ده، برغم انه بيورينا ويوري كل خلق الله انه قريب من ربنا الا انه شاف ان هما اللى هيساعدوه فى هدفه، هما اللى هيحققوا رغبته فى ان البيت ده كله يكون ملك امي..ومعنى انه بقى ملك امي، يبقى ملك ابويا، حتى لو هيضطر بعدها يرمي امي فى الشارع، مش مشكلة بالنسباله، ولا حتى بالنسبالنا، احنا شياطين، احنا ابعد ما يكون عن البني ادمين، وبدأ ابويا ياخد الخطوة…لكن لما حاول يعمل ده اللى حضرت اختارتني انا علشان الازمها فى اللى جاي، ماهي لازم هتستخدم حد من الموجودين يكون سهل عليها تحركه فى اللى جاية علشانه، ولأنها واحدة اللى حضرت مكانش ينفع تستخدم ابويا او واحد من اخواتي…ولأن انا اكتر واحدة جوايا غلط برغم ان داليا بتبيع مخدرات، الا ان الغلط اللى بعمله تخطى داليا بكتيرررررر…فوقع اختيار(ناعووودي) عليا انا، ومظهرتش لحد غيري انا بعد اتفاقها مع ابويا على اني هكون انا الجسم اللى هتستخدمه فى تنفيذ طلباته بعد ما وصلوا لأتمام الميثاق بينهم، وكده انا شرحت ليكم البداية كلها، اما الاحداث فهي جاية جاية متستعجلوش، انا عارفة كده كده ارائكم فينا كعيلة ومستعدة ليها، وعلشان كده هخلي الاحداث لبكرة علشان بصراحة انا من النوع اللى بيستمتع بأستفزاز اللي حواليا…وحاسة باللي كتبته ده اني هستفز جزء كبير منكم ومستنية اشوف رد الفعل علشان ازود استفزازي ليكم اكتر واكتر.
يتبع……
لقراءة الفصل التالي : اضغط هنا
لقراءة الرواية كاملة اضغط على : (رواية أبالسة الإنس)
