رواية قلاع الضر الفصل الثامن والعشرون 28 بقلم زينب ماجد
رواية قلاع الضر الجزء الثامن والعشرون
رواية قلاع الضر البارت الثامن والعشرون
رواية قلاع الضر الحلقة الثامنة والعشرون
<< الوجه الاخر>>
وصحت لــ إبعيد
يا نهر التعب لـ عيوني عبر إنعاس
نومني أريد أرتاح
كاظم اسماعيل الكاطع
انا نهلة بنت ناصر آل خشان
عشت عمري بين العشب والبر لا شفت المدرسة ولا تعلمت قراية واكتابة .. الحضيرية يسموني ( امية ) ما جنت اهتم على حسب الشفته عدنا بالعرب المرة مجانها يم زلمتها لا بطلعة ولا بدراسة
كبرت وانا انطر مجاني عد بيت رجلي
بس جانم الخطاطيب يجون على خواتي ولا فد مرة احد رادني لو طلبني .. ادري خواتي احلى مني وانا الله خلكني بلا حلا
بس ام بيت اكعد وي وذان الفجر اصلي واحلب الهوايش واريك اهلي واطلع للكاع .
كبرت والعمر عدا بيه
واخواني وخواتي كلم عرسوا الا انا ظليت على كلب اهلي
ابوي كاعه جبيرة عد ما عرسم اخواني كام كل واحد وبنالو بيت بكاعوا وبعده عن بيته وكلم داير ما دايرنا بس لا تصير مشاكل وجناين وهوسة ظليت انا وامي وجدتي يازي جثير ما تجي من الموصل ترتع عدنا ما تروح لغيرنا لو اجبلت لبغداد
فرد يوم سمعت جديتي تحجي ويا امي اعلى عرسي
امي فرفحت من الفرحة شكثر حسيت بروحي ثكيلة اعلى اعلي
رغم انا شايلتم بناكصتهم وزايدتم وبكلشي انا على كولت ابوي ( زلمة البيت ) بس كسرني فرحة امي حسيت بيها بس تريد تخلص مني وكل شوية وتروح وترد على جديدتي خاطر تتاكد منها وتكلها ( اكيد ابن وسام راضي بيها ؟ هو شايفها يعرفها خاف ليلة العرس ويتصركع ويردها لينا وننصكع )
كالتلها جديتي : لا تخافين اكربسها براسو مالم غير نهلة لا احد يرضى بواحد من ولدها ولا هي تامن لواحد وهي بهالحال منها نمشي نهلة احسن ما ضالة هاي ضلتها جم دوب
محد سعلني ولحد كالي راضية
حتى من وسام ردت خبر .. مشن خذن راي ابوي ومحد منهن خذت رايي .. فد كال لي ( حضري روحج عرسج الاسبوع الجاي)
من كثر الكسرة البروحي .. سكتت لا حجيت ولا رادتت
اذا اهلي رايدين الفكة مني عكب كل سنين الخدمة وكسرت ظهري عليم
اجا يوم عرسي .. ما جان جهازي مثل اجهاز خواتي
جم ثوب وعلى سواكات لا صوغة ولا ذهبات ..
هم ضميتها بكلبي وما بديتها
لجن تاكل وتشرب وياي
وانا احس بروحي شكثر رخيصة عبن ما حلوة
ما بحلاة خواتي ..
كربت مني جديتي كبل لا يجون العريس واهلو
كالتلي : جدة اوصيج وسام ماهي وسام اول السجن غيراها وطحنها وطحن حتى خلكها واخلاكها .. كامت تحس براحة نفسية من تعذب الناس خاطر لا تحس وحدها الانظلمت لهالسبب الظلم عدها تنفيس كل ما ضاكت ..
مالج منها رجلج وبس
ارضي
طيعي
واصبري وياه
لا تشمتين الناس بيج
على ابو ها كشمة عايبة وردها لاهلها .. اصبري
المرة الزينة تصبر جدة .. وصيري سباعية عاونيها لبت عمتج واكفي وياها واسنديها ولو تكدرين رديها عن اطباعها اللحكت بيها من تالي تراها انظلمت جثير مثل الحديد كثر ما مر عليه ضيم زنجر … واهي كلشي بروحها زنجر وخرب عكب الشافته بحياتها كبل .. احمليها جدة
– الله كريم جدة
– يالله كوي روحج وصيري سباعية واتبسمي لا تظلين مكشرة تراهم الرجاجيل ما يودون المرة المكشرة يضيك صدرهم .. تبسمي
هزيت راسي وسكتت
عد ما سمعت كالوا اجم اهل العريس
نزلت البركع على وجهي وجا العريس كعد بصفي دحجت بيه لابس دشداشة لونها ابيض .. وايده سمرة
هلهلن وطشت واهلية
ماهم جثيرين ينعدون على اصابع
اثنين يصفكن وحدة تهلهل والاخرة تصيح : يا شجالجن دصفكن
جابوا الشيخ وابوي وكيل عني عكد لنا الشيخ والشهود ابوي وواحد من كرايب بنت عمتي وسام اسمو ريسان .. تمت الملجة هلهلت جديتي وكامت تصفك وهن يجرجرن بصفكتهن
وزعن خواتي شربت خبط بكلاصات وصينية
والعريس كاعد بصفي ما حجه ولا جلمة ولا انا حجيت
خذونا بالسيارة وزفونا لمجان جولة هيمة ودليلها الله
ضلت الدك بينا السيارة بالجول ليما وصلت لبيت بنص الجول
بالمنكطعة .. كلت ادخيلك ربي وين كاعدين بسجن لا ناس لا بشر هيمة .. شحاليلم بهالجول
وصلونا وزفونا بلا صفكة ولا هلهولة للحجرة ..
الغرفة جانت عبارة عن كنتور صاج طلاقتين وبوفية ام الثلاث طلاقات وعليها دواشك وبطاطين ومخدات ومنظودة ومغطاية بجرجف وميز بيه مراية بيها سواد قديمة مخليلها عليها شيشة عطر ومشط وديرم وحمرة سحرية .
شوي ودخل العريس
كعد بصفي كالي : انزعي عنج البركع بعد لا تستحين عجل انا صرت رجلج
نزعت البركع من وجهي
دحج عليه سكت .. ما حجه وياي بعد ولا كال جلمه
فد اشوف ملامح العجب بوجهو كنو ما يعرف بحالي ولا راضي
هدني وراح لامه ..
ضليت وحدي .. شوية ودخلت علي بنية يطلع عمرها بالثلث طعش (١٣ ) ما عرفها من كبل ولا شايفتها عبن وسام ما جايبتها النا
كالتلي : شلونج
تبسمت بوجهه : هلا ومرحبا
– انت مرت اخوي الجديدة ما
– امبلى انا ، منهي انت ؟
– انا قدس
– شتصيريلم ؟
– بنتم
– بنت منهو ؟
-بنت وسام
– من يمتى وسام عدها بنت انا ما سامعة
– عبن انا ما اطلع امي ما تخليني اطلع حدي للمراح وارد للبيت
– ها هلا بيج حبيبة
– فد انا فرحانة بيج جثير
– عليش ؟
– انا هين وحدي مالي احد احاجي وامي ما تحاجيني ولا تسولف وياي واخواني محد بحالي محد منم يحاجيني يمكن انت تصيري صديكتي واختي
– بعون الله طيبة يقدس
– انا عملت لج العشا بيدي ضركي تا تعرفين شكثر طبخي طيب
-نفسج الطيبة مشكورة حبيبة
ع نحجي سمعت العريس يتصايح ويا امه
رفعت راسي ادحج الباب واتصنت حجت قدس : هم كل وكتم هيج مصايح وهوسة لا تهتمين .. اني نظفت القرفة ماتج ورتبت قراضج من تعتازين شي ندهيلي انا جريبة منج بالقرفة الثانية .
– مشكورة
طلعت مني .. وانا ظليت اتسمع
يكلها .. منين جايبتها من يا زبالة مستنگتها .. هيج انا زايد عليج وتجيبلي وحدة ما يدحج بوجهه
وهي تكلو : انت ما ردت مرة ؟ وهاي المرت جبتها بعد شطالبني
– وهاي تسمينها مرة هاي مرمرة يمها كشمة تلعب النفس
انا ما اكدر احمل اصل يمها شوية شلون احملها عمر
– اكلك لا يكون بظنك نسوان العالم مناطراتك ويتمننك تراك محد تكلبك غير هالعايبة وزايدة عليك يول دحج حالك
كاعدين بجول وامك انا هاذ وضعي ما امن بوحدة غريبة
تروح تبلغ علي وارد للسجن خاطر انت تعاسر حلو
من عسنك لا عاشرت
هو انت شرايد مرة تالي اللي تحويك
اطفي الضوا واشتغل سكتاوي وانجعم لا تسمعني صوتك
هذا الموجود ترضى هلا ما ترضى يا حايط يعجبك طخ راسك
كام يصيح ويهوس بالبيت
واخو اللاخ يكلو : عيب يمعود والله عيب تروح تسمعك وانت هيج تحجي هسه ما عاجبتك خليها عدك جم يوم وردها يا عم تزوج غيرها بس اسكت
وسام : غير لو يفهم جحش كلشي ما يفهم حسباله الحلوة بلاش ما يدري كومة فلوس وما تحصلها .. يعاب حالك
طلع من البيت
وانا ظليت كاعدة بمكاني حسرتي وكفت ابلعومي
لا بجيتها وارتاحيت ولا بلعتها وعديت
اريد ابجيها ما اكدر وخنكتني ..
ضليت كاعدة لليل اتنطر احد يدخل يحاجيني
محد كرب غيره تالي الليل طب سكران طافي
كربلي وكضى ليلتنا واهو ما واعي على روحه ونام
نمت بهضيمتي للفجر متعودة اكعد ..
طلعت اتفكد البيت .. دحجت الغرف .. المطبخ الحمام الهول المخزن .. لكيت مكناسة خذيتها وكشيت البيت وطلعت ليبرا .. ما لكيت غير سطلة ماي طشيتها بالحوش .. وبالمكنسة غسلته
بس لا اندليت وصلت المسح ولا شفت عندم ماسحة
وانا ادور
كعدت قدس : اش عتسوين ؟
– غسلت البيت وصلت مسح ماعدكم ؟
– عليش قسلتي انت ما عروس جان عفتي اني اقسلوا
– لا يولي الشغل يلهي ما يكصر عمر .. اكره الكعدة والصفنة شكو سالفة تكدر الخاطر تمر اعلى بالج خليني الهي روحي
– زين عجل اجيبلج الوصلة واجي فد لازم تعرفين اخوتي ما يرضون نطلع هين .. لو نكف هين وممنوع منعا باتا ننزل للجول
– عليش ممنوع شكو بالجول خاطر ممنوع ننزل
– ما عرف هم ما يرضون وامي هماتينه ما ترضى
– زين عجل جيبلي الوصلة خاطر اخلص والحكج اكضي وياج الريوك
– تمام تمام
ركضت جابتها اليه وراحت تكشر بتيته
كشيت الكاع بالوصلة ونشفتها ورحت وياها اعمل الريوك
وكفت وسام : ها اصباح الخير
– هلا عمة صباح النور
– عشتو شايفة روحج اغو وتندهيلي عمة تراج ازغر من بجم سنة .. لو انت معرسة كبل جان هسه بزرج المعرس ما انت
– اندهلج من باب الاحترام ما باب كبر اعرف بروحي جبيرة
– اي هم زين تعرفين روحج .. الا اكلج امس مروان رد
– اي رد
اشرتلي بعيونها على قدس ومالت براسها وهي تكلي : شو اكربي احاجيج
– هلا
– شغلتكم ذيج تمت لو لا
– اي الحمدلله تمت بس رد سكران
– عجل الا هيج يلا يعاشرج والا يا صاحي يعاشرج يولي
لا يدناج ولا يهواج وانت هاذ حالج
– عليش خذتيني لو ما راضية بيه ؟
– والله شكلج على كولت المثل ( من جلة الخيل شدو ع الچلاب سروج ) صحتلي اخير منج وما نفكتها بس بعد كسمة الله ورضاته
عافتني ومشت ضليت ادحج ورها كربتلي قدس : لا تزعلين امي صدگ جلمتها توجع وتغشعينها بلا شعور فد طيبة ويمكن راح تحبينا
– انت تحبينها ؟
– مدري فد اني ما اكره احد .. اي احبها قير امي
– والله يا قدس انت الطيبة واعلى نيتج ما غيرج
كضينا ريوكنا وكعد مروان تريك وراسه يوجعه من الشرب ليلة امس لا دحج وجهي ولا كالي صباح الخير
وتعود كل يوم يسكر ويجيلي يكضي حاجته وياي من غير شوف .. ووسام مالها حجوة طيبة وياي
كل ما كامت وكال : مو زين مني نفكتج لابني شحلاته لو ما انا ياهو بحالج وياهو اليكربج لا حلاة عندج مثل النسوان لا شكول
مرة من المرات طك كلبي ونا عدت اتحمل رديتها وكتلها : عفت الحلا الج ولربعج
شلون حجيت هيج كامت علي تريد تملشني
من هدت علي ودفعتني ما بكوتي ولا كدرتلي وقدس ذبت روحها بيناتنا .. هدتني وراحت تحش براس مروان علي
جالي مروان شايش كضبني كصبني خلاص
ما خلا شي بالغرفة ما كسره علي شلون اتجاوز على امه
ثاني يوم الصبح تعايرني : يالعايبة زينلج هسه من كصبج وطيح حظج وج انا يولي تردني تعرفين ياهي انا لو يحجولج والله من اسمع حسج يعلى اعلى حسي الا احز راسج وادفنج بالجول يالچلحة
كمت ما احاجيها
بس ما هدتني كامت كل فترة وتشيش بابنها علي
وتوز براسه ما جنها هي الاختارتني ورضت بيه جنها مجبوره عليه كثر ما تكرهني
.. حبلت وشلت جاهل من مروان
وكام يشوفني اشتغل واكرب ليل نهار ويسمع امه تحجي عليه وتغلط وتعاير بيه وانا ساكتة .. كام يتعاطف وياي ويرد امه ويكللها : يمه حبلى وبطنها لخشمها هديها
اجتله فترة الله هداه عليه وتعود على شكلي وحب طبايعي ..
لا ارادده لا فرد يوم ضايكته صابره على زينة وشينه … ليما ادركني وكام يحبني يعاملني بلين
ساعتها كمت احس بوسام كامت تغتاض لو شافته زين وياي تتسودن .. تكوم تشيشه وما يردلها تنجن بالازيد .. تكوم تتكاون وياه .. اغم ما بيك خير اخو مريتك وليها ونهارها كوان وياه وانا اصبر عليه : ميخالف واتحملها وامك وما يصير تنهرها وحرام
كام يملي اكثر مما يميل الها ..
ليما سولفلي سالفتها كلها .. ثاري يعرف امه جانت تخون ابوه ويعرف ابوه ماخذ على امه ويذكر كلشي بس جان زغير ما يعرف يعترض لو يكول شي غير يسكت ..
وسولفلي الصار وياها كله
كلتلو : عجل رضيت ترد وياها عكب ما دريت امك هاذ حالها
– عجل اخليها بالشارع لو بيد هاذ وذاك دامها شردت لازم ارد اكعد وياها .. ومالي غرض باغلاطها العتيكة .. اهي ما شفات من ابوي خير ابوي هو الوازاها على درب الحرام
لا بعمري سمعته يحاجيها بجلمة طيبة ولا سمعاها حجاية حلوة
والمرة سماعة تحب باذنها ما بكلبها .. وهي جانت الزلمة والمرة عايلة البيت وعايلة ابوي وجازاها بغدر وغلطت وسبحانه الما يغلط
– والجال مالها شلون مسامحها على جتل ابوك
-لو ما هي جاتلته جان اهو الجتلاه هي كل السوته سبكته وجتلته
– عليش احسك عادي ولا جن ابوك المجتول ولا جن امك عاملة كل هالمصايب
– انعملت هالمصايب بوكت جنا زغار وشفت الويل عكبها من انسجنت اهل الكلعة ظلام ما راعونا حتى الجناين يكومون يكعدون … يندولنا ولد العايبة
– وقدس عليش جبتوها لهين
– اختنا غير
– ما هي جانت عايشة ومرتاحة غاد عليش جبتوها وحبستوها
– لا ما يصير ذولاك ماهم اهلها وهي اختنا وامي تودها
– اش تودها يول حابسة البنية حبست الحيوان ما دحك الفرك بينها وبين نعجتها غير قدس تحجي النعجة تمعمع
– الحجي هاذ يضل سر ديري بالج احد يدري .. حتى قدس
– لا المن اكوله قابل .. هو انا طالعة ماشية بهالجول
– لا راح اخذج لاهلج هالفترة
– صدك ابختت الله ؟؟؟؟
– اي والله ولادتج كربت لو طلكتي وين انطي وجهي بهالحول كلها غاد اهلج يداروج ياخذوج يضلون يمج من تجيبين عد ما تكفين على حيلج تردين
كمت احبحب بيه واتشكر منه
صدك يومين وكاللها : يمه انا راح اخذ نهلة لاهلها
ما رضت وكامت تتكاون وياها واني ياهو اللي هين وياهو اليعاوني وقدس ما عليها اعتماد واريدها وياي بالبستان
كاللها : من تجيب ترد تعاونج انا لو طلكت هين وين اطي وجهي ؟ خلي توديها غاد يم اهلها تجيب بسلامة وترد تعاونج
ما كفت من كوانها
بس بلا نفع ..اخذني وودني لبيت اهلي ضليت عدهم شهر وطلكت وجبت بنية سميتها ( سمية ) كرابة اهلي وصلوني الحطتلي ذهبة والنطتني فلوس .. لميتم كلم وضميتم يم امي لوكت العوزة عبن اعرف مروان لو درة عندي فلوس ما يخلي ووسام لو عرفت ادك الا تاخذهن .. خليتهم عد اهلي
اهلي جثير ما يسهلوني شنهي علاقة وسام بريسان عليش هو جريب منها
كلتلم : البيت الو كاعدة بيه .. واهو بالحزب يحاميلها وهي بهالوضع
كالو : شنهي المقابل
كلتلم : مدري
من بعدين عرفت البيت اصلا ما لريسان ..
صاحب البيت كاتبين عنو تقرير وشارد كاعد هين وعاثرين عليه الحزب وجاتلينو هو واهله .. وريسان جتالو وعد ما دفنم اخذ البيت مقر للحزب مخفي عن العين .. وخاطر لا ينهجر البيت خلا وسام وولدها تعيش بيه
رديت للجول عكب ما طلعت الاربعين
ومروان واخوته وقدس كلش فرحم بالبنية
الا عمتي تكلي : عايبة وتجيبين بنية
– عجل وشبيها البنية
-البنية عيبة اعلى ابوها بيج خير تخلفيلا ولد
– عجل انت ما بنية يعمة عليش هيج تحجي
– والله لو جايبة ولد ما تكلين هشكل يولي شنغعها البنية بس حمالة هم مالها كل نفع
– والله يا عمة محد بيه نفع لاحد لا ولد ولا بنية هاي عمتي شذرة جابتج وجابت ثاىر نفعتي لو نفعج .. عجل لو جايبتلج اخت ما هاذ حالج جان عاونتج على ضيم الدنيا ووكفت وياج ما ماخذ خيرج وعايش بيه وانت هاذ حالج وتكليلي ولد يعمه لو انا منج ما اطيك اسمه ما اكاون عليه
– تعايرني بخوي يالعايبة يولي لو ما انا نفكتج هاي ضلتج عد اهلج لا تشوفين ولد ولا بنية يطلعلج حس وتعايريني يالغمة بس ما صوجج صوج الاغم رجلج لو بيه خير وزلمة حوك جان لطج على حلكج وعلمج شلون تحجين ويا امه بس شترجا منه خاطر اترجى منج امداكم اثنينكم عساكم لا فرحتوا ولا شفتو الخير ابزيتكم
غمزلي مروان خاطر ما ارد عليها
عد ما طلعت كالي : يولي عليش اترادديها تعرفين امي السانها متبري منها وتحب تسمم المجابلها هديها اسمعي واسكتي صعبة ؟
– ما شفتها تعيب الجاهلة وهي بالكماط لا وادور تدعي عليها وهي بنت نفاس
– وهسه الله هيج استجابلها يولي دسكتي منها وفكي ياختي منها
سكتت
بس ناشبتني نشبة .. فوك ما جنت عايبة وحمت بحالي ونفكتني على كولتها صرت عايبة وجايبة بنية .. تكوم تكعد تعايرني
وانا اساير بعيشتي وياها
عليش ما حبلت مرت اللخ وعلت بطني
وهم رحت عد اهلي اجيب .. وهم جبت بنية
هين مروان من سمع ضاج كالي : هم بنية .. اجت الاولى وكلت خير ونعمة وراها يجي الولد وهم جبتي بنية
– شجالك تخبلت انا شنهو البيدي ؟ انا خلقتها لو انا العملتها بنية حجيك هاذ حرام الله بكيفه يطي الولد وبكيفه يطي البنية
حجه : من الاخير كولي ما اكدر اجيب ولد وفضيها عليش تلوفيها ع الحلال والحرام وتذبيها براس الله
عافني عد اهلي ولا كبلني بعد
حتى لا سمى البنية ولا دحكها عافها ومشى .
انا هم ضاك خلكي وكمت ابجي على حالي خفت لا صدك ما يصيرلي ولد شلون بيه
عاد امي اخذتها مني .. وسمتها عبير
من بعد ولادة بتي عبير بثلث تيام جانا الخبر من الموصل
كالوا ( جدة يازي ماتت )
حيل حزنت عليها
جانت جدتي مرة حكيمة وكوية حيل وكد جلمتها
لوتها الايام جثير وجثير جنت اجابلها واكعد اسمع منها على ايام كبل شلون خذاها جدي خشان من السوك وشلون لاوت زمانها وعلت وشلون غدرتها اختها وخذت الكلعة والدنيا راجت بيها وردت للكلعة وعمي خالد مات ومرجانة ماتت وهي الانتصرت على كل عدوينها والكل جان ياخذ بشورها ويحب ايدها ويطلب رضاها .. ماتت عزيزة بين ولدها وجناينها واحفادها
هالحجي بنهاية ١٩٩٩ …
شهر ١٢ خذيت بتي ورحنا انا ومروانا ووسام واهلي حضرنا العزا .. امي ما رادتني امشي كالتلي ( نفسة يولي تروحين تنجبسين ) بس ما سمعت حجايتها
ردينا عكب العزا .. باسبوع
رديت ويا مروان وعمتي وسام ما رضى ارد لاهلي
كالتله : من تمشي فواتح بيها حيل بس للجول تصبح نفسه ولازم تضل عد اهلها اليسمعك جايبتلنا ذاك الولد الوجهه منور ولا جنها جايبتلنا بنية هرشة
عاد منع علي ارد ويا اهلي ورديت للجول
بناتي لعبت قدس عالبنية عايشة عيشة الحيوانات اكثر واحد فرحان بخلفتي البنات عي تحس جايبتلها لعابات مو بنات هلكثر اداريهن هالكثر الاشيهن وفرحانة بيهن .
مرت الايام بالمر والويل ويا وسام لا يرضيها العجب ولا الصوم برجب شكثر ما اشتغل تذك وتغلط وتسب باهلي وتعايرني بشكلي وببناتي
مرت سنة وسنتين والثالثة …
وانا ما حبلت بعد … ولا شلت ابطني جاهل
ولا محتاطة ولا ماخذة شي … من الله وكفت قسمتي
تغير علي مروان
كام يكوم ويكعد يصيح
انا زلمة انا رايد ولد يشيل اسمي اريد ولد عزوة الي شنهي انا ضال على راس هالبنات .. رايدلي ولد يعاوني لو كبرت
ويومية على هالربابة ووسام تحش بيه
عليش ما صعبت الاوضاع ..
وصدام نطى عفو عام وتبييض سجون
وكل المحكومين طلعوا .. الحكمه مؤبد والجايله اعدام والكل شمله العفو العام وطلع وتبيضت السجون ..
هين وسام تحررت وكامت تطلع من الحوب براحتها وتمشي وتتحرك وتروح زوارات للتعرفهن بالسوك وتتعرف على وحدة تبيع خضرة بالسوك عدها بنية عمرها ١٨ شايفتها ومتخبلة
ردت وهي تحرك بدمي وتكلو لمروان : شلون بنية شفتلك بت اوادم ويا حلاتها تكول شطب ريحان وما جبيرة وبايرة زغيرها عمرها ١٨ ورحمها اخضر ما يابسه وتعكر وما تخلف .. شتكول لو اتخطبها الك
كاللها : يمه بس انا مرة واثنين بنيات بالزور مدبر العيشة شلون نسوان اثنين
كالتله : علي مالك غرض نيشانها وجهازها علي وتاكل اكلنا وتشرب شربتنا قابل تحط بديها ملايين
– والله يا يمه ما ادري
وكتلها وكتلها : عليش ما تخافين ربج
يولي الشيب غزا راسج اتقي الله اعملي لكبرج لو ما عملتي ما عملتي عد ما درتي الزلمة ماخذ عليج ما خليتي درب حرام ما مشيتي بيه ما خليتي جتل ما جتلتي وجاية هسه تزوجين رجلي المفروض انت اول وحدة تحس بيه وبوضعي
ما تختلفين عني بشي
ان جنت عايبة وما حلوة
انت من زين حلاتج ؟ الكل يدري خذاج عايبة وما حلوة
وذبوج براسه خاطر تنسترين وما انسترتي ولا تبتي
عجل يمتى اتوبين من تصلين للكبر ..
هدي الزلمة مفيي عليه وعلى بناتي
لاحكتني برعربانة عليش هدينا بحالنا خافي ربج
تخبلت عد ما كتلها هيج
كامتلي واتكاونت وياي وجتلتني
بس ما سكتتلها كمت الها وتمالخت وياها
كضبني مروان ما خلالي عظم صاحي
لا دفر ما دفرني لا رفس ما رفسني لا ضرب لا راشديات
لا طك بالغراض لا عض لا تمليخ لعب بحالي لعب
وطبك بناتي وياي وجتلهن
وعافني انا وبناتي نتباجى
عاد ما اتحملت لميت هدومي وكتلا : هسه تاخذني لبيت اهلي
ما اضلك بعد ساعة وحدة بهالبيت ولا اتحملك ولا احمل امك
طك جبدي منكم .. عساني لا شفتكم ولا عاشرتكم
من يوم خذيتك وانا بالضيم يا حالي
رد جتلني وتكاون وياي وقدس ذبت روحها علي خاطر تمنعه يجتلني كامت تصيح عليه امه : اخذها اخذها عسى الله لا ردها يول ذبها على اهلها هالبايرة هالعايبة من زينها من حلاتها طلكها وانا من عين باجر اجيبلك اغات اغاتها بنية حديثة ام بيت زغيرة وشابة ورحمها اخضر ما هالعايبة وخلفتها الما منها حظ
خذاني وذبني على اهلي
عشتو اجيت لاهلي اشكي واكلم : توز برجلي علي وتريد تزوجه وهيج تعيرني
شو ذوله اهلي واخوتي كلم صارم ضدي وامي تكلي : شنهي بزر نستلة انت وما تحملين ما هاي نحن جدامج اشكال والوان حملنا يولي لو راد يعرس حكه زلمه ازغر منج وانت ما عدتي تخلفين كبرتي .. ورحمج يبس حرام عليج تمنعينا وتكفين بوجها
ولو انطكيتي لا انت اول وحدة تنطك ولا اخر وحدة
جايبة بناتج وجاية علينا شتردين ؟
وشبالج نحملج لو نحمل بناتج ما عدنا بنية تطلك
نحن عدنا البنية تموت ولا تطلك وتصبح عار اعلى ابوها واهوتها واهلها حتى اخواتج اتعمين على ابو ها اختهن اطلكت لو بيها خير ما اطلكت
الما تحمل الرجال ما بيها خير
والزلمة يطك ويغلط ويعمل ما يعمل المرة الزينة التحمله
ما والله لامه جولاتج وجايتنا .. شناطرة تطلكين لو شنهي ؟
فوك كسرتي اهلي كسروني
وكسرتهم ازود من كسرة الرجال
بحجيهم هاذ عرفت مالي سند وتجاية غير الله اذب حمولي عليه واصبر كالي غير حل.
اخوي رايح على مروان للسوك كايله ؛ شنهي معناتها جاي وذاب مرتك وبناتك علينا ما عدنا شغل وعمل نحل مشاكلكم تمر اليوم تاخذم من البيت ولو ما خذتم وكلت ما عدت اريد نهلة مرة تاخذ بناتك وتولي نحن مو حمل بزرك
للعصر مر مروان ما يحاجيني كايل لامي : جيبي البنات وخلي اروح
كايلتله امي : يا عجل ونهلة ؟
كايللها : وانا طاردها هي اللمت جوالاتها وزعلت
– لا زعلت شنهي اكسر راسها واكصبها مجان المرة عد زلمتها ما عد اهلها هسه غصباً ما على راسها تلبس وتجي وياك ما جانت خادمة الك لبناتك شنهي سوالف الطلاك عاي عوذة يمه الله لا يكولها اخذ مريتك يم ورد ومردها يومين ثلاث اطخ وترضى مالك غرض بيها
ورجعت علي وهي تكلي : ما اسمعلج حس تلمين غراضج وتردين ويا زلمتج
– يمه وانا هكبه السمعته منكم والكلتي لمروان انا الما ضل هين عسى ما انداس دوس غاد وانهان ولا ذلتكم هاي وكا اكول غير حسبي الله ونعم الوكيل حسبالي عد اهل يوكفولي لجني اليوم عرفت انا يتيمة حتى لو جان عدي اهل
عفتها وخذيت بناتي وحطيت عباتي على راسي وطلعت وياه
لا سلمت عليه ولا سلم عليه ..
ركبنا سيارة وصلتنا غاد للجول
عد ما وصلنا ذبنا بالبيت وطلع
شافتني وسام صاحت : غراب البين بان لا هلا وبا مرحبا ولا طارش اللفى
هديتها ورحت لغرفتي بجيت ليما خويت
ما بجيت من ظلم مروان ولا من ظلم امه
بجيت من ظلم اهلي … اذا المني وبيه ما حملني وعايرني بحالي وبعكرتي عجل شترجى من الغريب ؟ عليش الوم بوسام ومروان وانا اهلي الماكليني ؟ فوك حكي دمغة
لحد كاله عليش جتلتها
على كيفك وياها ام بناتك لحد وصاه عليه
كله مهادد ومحالف نجتلت نحرمج من بناتج نموتج
ما عندم غير هالحجي
وانا بحالي هاذ واسمع وسام تصيح : قددددس وينج يولي اتهيري باجر عرس اخوج مروان يلا يمه بالعجل عيب من البنية لزوم اروح اشتري نيشانها تستاهل نيشان وجهاز زغيرة وتدلل ما بايرة وعايبة … يلا بنتي ….
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية قلاع الضر)
