رواية أبي بواب وأمك خادمة الفصل الثالث عشر 13 بقلم رانيا عمارة
رواية أبي بواب وأمك خادمة الجزء الثالث عشر
رواية أبي بواب وأمك خادمة البارت الثالث عشر
رواية أبي بواب وأمك خادمة الحلقة الثالثة عشر
حاتم:أه نتجوز، ماللي انتوا متعرفهوش ان انا ومهره بنحب بعض
{اتحرجت مهرة بعد الكلام اللي حاتم قاله، وحطيت راسها في الأرض، وفي ساعتها بانت النار في عيون نانيس}
رامز(بإستغراب) :متى حدث كل هذا؟
حاتم:الفتره اللي فاتت، واتمنى انكم تحضروا فرحنا، لازم تكونوا أول ناس!
دينا:الف مبروك انتوا طيبين وتستاهلوا كل خير
مهره:الله يبارك فيكي
{قام حاتم ووقف}
حاتم:تشربوا ايه؟
{بص منذر لـ نانيس بصدمة، وكانوا كلهم بيبصوا لبعض ومش بيردوا}
حاتم:شاي حلو، هعملكم شاي
مهره:استنى يا حاتم خدني معاك
{قامت مهره ودخلت جوا مع حاتم}
مهره(بعصبية) :ايه اللي جابهم هنا؟؟؟
حاتم:انا زي زيك معرفش حاجة!!
مهره:وهما لسة ليهم عين يجوا بعد اللي عملوه؟؟
حاتم:بقولك اية يا مهره، شوية وهنزحلقهم، ده كان يوم اسود يوم ما عرفوا المكان!
مهره:يبقى أحسن برضة!
===============================
{عند غادة وجوزها بعد ما رجعوا البيت..دخلت غادة وقعدت وحطيت ايديها على دماغها، قرب نبيل واستغرب}
نبيل:مالك يا غادة؟
غادة:مفيش حاجة يا نبيل
نبيل:انتي من ساعة مااختك جات وانتي متغيره، هى قالتلك حاجة دايقتك؟
غادة:لا مقالتش حاجة، هتقول اية يعني؟
نبيل:انتي تعبانة طيب، احنا لسة فيها، نروح للدكتور!
غادة:لا هبقى تمام لما أنام، يلا تصبح على خير
{ودخلت جوا الأوضة وقفلت الباب..وجوزها واقف بعيد مستغرب، وفي دماغه مليون سؤال!}
==============================
{عـنـد أنيسة وليلى..كانت أنيسة مستنية زهرة ترجع من الشغل، و رايحة جاية في الأوضة}
ليلى:انتي بتلفي هنا و هنا لية؟
أنيسة:مستنية زهرة ترجع…اتأخرت اوي!
ليلى:هى زهرة فين؟
أنيسة:في مشوار وجاية
ليلى:بتعمل اية في المشوار ده؟
أنيسة:بتجيب حاجات
ليلى:خليها تجيبلي حاجات
أنيسة:ماشي
{خبط الباب وفتحت أنيسة، دخلت زهرة وقعدت}
أنيسة:اتأخرتي أوي كدة ليه يا زهرة؟
زهرة:توهت..مكنتش عارفة أرجع، بس الحمدلله لفيت لفيت و لقيتني قصاد البيت في الآخر
أنيسة:طب مجيبتيش حاجة ناكلها؟
زهرة(بحزن) :للأسف محدش اداني فلوس، المرتب آخر الشهر..مع انهم بيقولوا في شغل باليومية في اليونان، بس انا حظي وقع في ده
أنيسة:واحنا هناكل اية طيب؟
زهرة:مش عارفة يا ماما..ربنا يحلها
ليلى(بصويت) :غسااان ابني، غساان
زهرة(بإستغراب) :غسان؟…ماله غسان؟
ليلى(بصويت) :غساان
{وبتشاور على الطريق، ولكن زهرة وأنيسة مكانوش فاهمين حاجة}
أنيسة:سيبك منها يا زهرة مانتي عارفة من ساعة اللي جرا وهى عقلها مش فيها، ده انا بحمد ربنا انك جيتي ولحقتيني كان زماني بقيت زيها!!
زهرة(بخوف) :لا ياماما بعد الشر عليكي، ويسترها علينا جميعاً
أنيسة:ياارب يا زهرة ويبعد عننا ولاد الحرام
{قامت زهرة، وفتحت باب الأوضة}
أنيسة:رايحة فين؟
زهرة:هتصرف يا ماما، مش معقول هسيبكم كده
أنيسة:لا يا زهرة متنزليش، انا خايفة عليكي اوي!
زهرة:متخافيش عليا، انا معايا ربنا، واللي معاه ربنا مبيتوهش.
{خرجت زهرة، ونزلت الشارع تدور على مكان بيبيع أكل، و دخلت المحل تسأل}
زهرة:food
_Τι θέλεις? (ماذا تريدي؟)
{راحت زهرة مشاوره على الأكل بإيديها}
_Έχετε χρήματα; (هل تمتلكي المال؟)
{شاورت زهرة بمعنى(بتقول اية؟)}
_Βγες έξω. (اخرجي برا)
{وابتدا صوته يعلى، خرجت زهرة برا وهى خايفه، وقررت تروح لـ مهره}
================================
{عند حاتم ومهره في المركب..بعد ما عملوا الشاي وخرجوا بيه، قامت نانيس وهى رافعه حاجبها}
نانيس:ممكن نتكلم مع بعض شوية يا حاتم؟
حاتم(بقرف) :مفيش كلام بينا
نانيس:وانا عايزة اتكلم معاك يا حاتم
{وقربت تشده من ايده، راحت مهره زاقه ايديها بعيد، وضربتها بالقلم فصرخت!!..وكلهم قاموا مصدومين! }
نانيس(بصويت) :انتي بتضربيني بالقلم يا زبالة؟…طب و ديني لأندمك ندم ما شوفتيه في حياتك!!
{ومسكت في مهره وقعتها على الأرض ووطت تضربها، وكانوا كلهم بيحاولوا يبعدوهم عن بعض}
مهرة(بصويت) :ااااه
نانيس(بتضربها) :انتي اللي كرهتيه فيا، وخدتيه مني، كان كويس معايا لحد ماارتبط بيكي..وكمان مش عاجبك ياروح أمك، وانتي تعجبي مين؟…ده انتي الـ ١٠٠ منك، بـ نِكله!!!
دينا (بصويت) :بس بقى… بس!!!
{راح حاتم شادد نانيس بقوته، ولَوَا دراعها لـ ورا}
رامز(مصدوم) :ماذا تفعل يا حاتم؟؟َ…ماذا تفعل بـ نانيس؟؟؟
حاتم(بزعيق) :مهره خط أحمر..وايدك اللي اتمدت عليها دي انا هقطعهالك…مهره دي ستك وتاج راسك يا زبالة الشوارع ياحوارتجيه..يوم ماتفكري تقلي منها هكون انا أول واحد قالل منك ومن عيلتك كلهم، متنسيش أصلك وفصلك وتيجي تعمليهم علينا هنا، انا عمري ماشوفتك ولا حبيتك وكل حاجة كنتي بتحاولي تعمليها عشان تغريني ولا جات معايا سكة، لكن مهره بدون أي مجهود خطفت قلبي وعقلي، واختارتها تكون حبيبتي…ومراتي في المستقبل القريب ان شاء الله..أصل الغالي بيدور على الغالي اللي زيه، مبيبصش للرخيص اللي زيك!!!…وانتي الصراحة ربع الجنية له قيمة عنك!!
{و زقها بعيد بكل عنف}
نانيس(بصويت) :انت بتقل مني يا حاتم؟؟؟…بتقل مني قصادهم عشان دي؟؟؟
حاتم(بزعيق) :سيرتها متجيش على لسانك الوسخ ده…ويلا خدها يا رامز وامشوا من هنا بدل مالمشكلة تكبر وهيحصل حاجات متحبوهاش!
نانيس(بصويت) :ورحمة أمي الغالية لأوريكم انتوا الاتنين، انتوا واقفين ساكتين ليه ماتتكلموا!!!!
منذر:كان لا يجب علينا القدوم إلي هنا بعد ما حدث في المرة الأخيرة، نحن كرامتنا تبعثرت في جميع أركان الأرض!!
رامز:عندك حق يا منذر، هيا بنا قبل أن تكبر المشكلة
حاتم(بزعيق) :يلاااا
{قربت دينا وخدت نانيس وهى بتعيط ومشوا ووراهم رامز ومنذر، قرب حاتم من مهره وهى بتعيط وقومها…كانت مهره منهاره ومش مصدقة اللي حصل، وبتعيط بهيستريا، لحد ما حاتم طبطب عليها بكل حنية، وخدها في حضنه!}
مهره(بعياط) :انا واحدة زي دي تقل مني؟…بجحة وكمان مش عاجبها!!…دي مش عاملالي أي احترام، وانت اتكلمت قصادها بكل وضوح، وبرضة مصممة!!..انا تعبت اوي يا حاتم بجد تعبت، أهرب من الناس دي وأروح فين بس ياربي!!
حاتم:وانا رجعتلك حقك ووقفتها عند حدها، وعرفتها مقامها كويس..اللي زي دي كان لازم يحصل معاها كده من بدري..انا مش هسمح لأي حد انه يدايقك ولو بنص كلمة، طول مانا معاكي هفضل حمايتك وسندك يا مهره!
مهره(بعياط) :انت كل حاجة في دنيتي يا حاتم، انا بس مكنتش عايزه ده كله يحصل من الأول، ده احنا سيبنالهم بلدهم واللي فيها وجينا هنا بعيد عنهم!..وبرضه عرفوا مكانا!!
حاتم:واحنا مش هنفضل هنا كتير، قريب أوي هنمشي بس نجمع مبلغ كويس الأول..انا مش هينفع ارجع لنفس عيشة زمان يا مهرة..انا محتاج أغير من نفسي!
مهره(بعياط) :خلاص يا حاتم يبقى نغير المكان ده خالص ونروح في حته بعيد محدش يعرف يوصلنا!!
حاتم:من دلوقتي يا مهره، وانا مستعد، ادخلي لمي حاجتنا من الأوضة
مهره(بتردد) :بس احنا منعرفش حاجة هنا!!…وكمان مش ضامنين الفلوس اللي معانا تكفي ولالا!!
حاتم:أرض الله واسعة، انا هكلم القبطان واقوله..ادخلي انتي بس!
مهره:حاضر
{دخلت مهره تلم حاجتهم، وحاتم طلع الموبايل اللي اشتراه جديد واتصل بـ القبطان}
حاتم:ايه ياقبطان هترجعوا امتى؟
===============================
{في بيت فاتن، في أوضة بيري..كانت بيري قاعدة في الأوضة مع بنتها قصاد اللابتوب على السرير وبيشوفوا فيلم}
فيروز(بتضحك) :هو لية لابس كده يا ماما؟
بيري:مش عارفة…بقولك يا فيروز كفاية كده ويلا ننام، انتي هترجعي مدرستك ودروسك من بكرا!!
فيروز(فرحانه) :بجد يا ماما؟
بيري:ايوه انا هأجر شقة وهاخدك ونروح نعيش هناك
فيروز(فرحانه) :اخيراً يا ماما…انا صحابي وحشوني اوي مشوفتهمش بقالي كتير!
بيري:انتي ملكيش ذنب في اللي بيحصل يا فيروز..كان لازم نعيش حياتنا طبيعي ومنجيش آخر الدنيا هنا عند جدتك..وانا لازم أفوق لنفسي وأقف على رجلي من تاني، يلا ياحبيبتي عشان ننام
فيروز:ينفع أنام جنبك ياماما؟
بيري:ماشي يا فيروز
{وقفلت اللابتوب وحطيته على الكوميدينو، ونامت هى وبنتها واتغطوا، وبعد شوية فاتن فتحت الأوضة عليهم لقيتهم نايمين، فاابتسمت، وقفلت الباب تاني وخرجت برا في الصالة، لبست نضارتها ومسكت كتابها المفضل تقرأ فيه…وفي بيت غادة..كانت غادة طول الليل صاحية مش عارفة تنام!}
=============================
{عند حاتم ومهره بعد ما لموا لبسهم في شنطة، كان القبطان والمساعد بتاعه رجعوا}
القبطان:بس انتوا كنتوا ماليين عليا المركب يا حاتم!
حاتم:معلش يا قبطان احنا مبقاش ينفع نقعد في الميناء تاني، ده بقى في خطر على حياتنا!
القبطان:انا في الأول والآخر بتمنالكم كل خير، ومادام الحاجة دي فيها راحتكم يبقى خلاص انا مقدرش اتكلم!
حاتم:عارف والله، واحنا كمان بنتمنالك كل خير، يلا بينا بقى قبل ما حد تاني يجي، مااحنا خلاص بقينا كتاب مفتوح!
القبطان(بحزن) :ماشي يا حاتم، اللي تشوفه
{خد حاتم الشنطة من مهره وشالها..ومشوا ووراهم القبطان، لحد ما ركبوا تاكسي وخدهم في منطقة بعيده، وهناك نزلوا}
القبطان:Εδώ είναι ο λογαριασμός (اتفضل الحساب)
{وبعد ما القبطان دفع الفلوس للتاكسي، خدهم ومشوا، كانت منطقة كبيره مليانة بيوت..ولكن الشقق كانت صغيره جداً..لحد ما وصلوا قصاد بيت أبيض}
القبطان:اقفوا هنا
حاتم :هو ده البيت؟
القبطان:صاحب البيت ده كان عامل اعلان، الشقق رخيصة هنا مش عايزكم تقلقوا من حاجة، ولكن في مشكلة!
حاتم:مشكلة اية دي؟
القبطان:الشقة أوضة وصالة وحمام ومطبخ صغيرين
حاتم:عادي يا قبطان محلولة، انا فكرت في مصيبة!
القبطان(بإحراج) :اعذرني يعني في سؤالي..انت ومهره يعني..
حاتم:انا عارف هتقول اية…مش عايزك تقلق، انشالله انام في البلاكونة المهم انه بعيد عن الحرب اللي عايشينها، مهره في عينيا الاتنين!
القبطان:ماشي يا حاتم، ربنا يحفظكم…يلا بينا نروح نحجز الشقة
حاتم:يلا بينا
{ودخلوا الأوضة اللي فيها صاحب البيت، وأول ما القبطان دخل حضنه وسلم عليه}
القبطان :Χαίρομαι που σε βρήκα.(سعيد للغاية لأنني وجدتك)
_Είμαι πάντα εδώ, καθησυχάστε με, τι συμβαίνει; (انا هنا دائماً، طمنني ما الأمر؟)
القبطان:Θέλουμε να πάρουμε ένα οικιστικό διαμέρισμα (نريد أن نأخذ شقة سكنية)
_Λοιπόν, έλα μαζί μου. (حسناً، تفضلوا معي)
القبطان:يلا بينا يا حاتم
{وخدهم وطلعوا الشقة..كانت شقة صغيرة جداً، ومفيهاش غير أوضة نوم واحدة، والمطبخ مفتوح على الصالة، كان حاتم ومهره بيلفوا في الشقة وبيتفرجوا عليها}
القبطان:Και ποια είναι η τιμή του ανά μήνα; (وما سعرها شهرياً؟)
_130 ευρώ (١٣٠ يورو)
القبطان:Μεγάλη τιμή και πολύ κατάλληλο (سعر رائع ومناسب جدا)
حاتم:ايه يا قبطان طمني، بتقولوا ايه؟
القبطان:كنت بسأله على الشقة..ايجارها ١٣٠ يورو كل شهر
حاتم(بتفكير) :امممم حلو مش وحش، اهو أي ٤ حيطان تدارينا من نومة الشارع
القبطان:لا بس هتنبسطوا هنا اوي
حاتم:اشمعنا؟
القبطان:البحر قريب منكم يا سيدي، تبص يمين تلاقي بحر، تبص شمال تلاقي الملاهي!
حاتم:غلط!…تلاقي القمر!
{وبص لـ مهرة وضحك، ضحكت مهره ووطيت راسها في الأرض}
القبطان(بيضحك) :ههههه ماشي…عجبتكم الشقة؟
حاتم:اوي، احنا خلاص قررنا ناخدها!
القبطان:آخر كلام؟
حاتم:آخر كلام
القبطان :Θα πάρουμε αυτό το διαμέρισμα.(سنأخذ هذة الشقة)
_Λοιπόν, πληρώστε τα χρήματα, ας γράψουμε τη σύμβαση.(حسناً ادفعوا المال لنكتب العقد)
القبطان:طلع الفلوس يا حاتم
{طلع حاتم الفلوس من جيبه، واداها للقبطان..وبعد ما القبطان خدهم وعدهم، اداهم لصاحب الشقة}
_Ας γράψουμε τη σύμβαση.(هيا بنا نكتب العقد)
{مشى القبطان ووراه حاتم و مهره}
===============================
{عند زهرة بعد ما راحت المركب عند مهره، اتفاجئت ان مفيش حد غير مساعد القبطان}
زهرة:مهره جوا؟
_مهره مشيت هى وحاتم
زهرة(بإستغراب) :مشوا راحوا فين؟؟
_راحوا يجيبوا شقة
زهرة(بحزن) :اما مقالتليش حاجة يعني عن الموضوع ده..ياريتني ما جيت..اديني جيت على الفاضي اهو
_طب اقعدي ارتاحي علي ما القبطان يرجع
زهرة:هقعد اعمل اية بس!..انا كنت جاية لـ مهره، لو كنت اعرف انها هتغير المكان مكنتش جيت…طيب انا همشي، سلام
_سلام
{مشيت زهرة وهي كلها حزن، ومكنتش عارفة هتعمل اية خصوصاً وهى ممعاهاش فلوس!..كانت ماشية في الشارع بتبص للسما بحزن}
زهرة:يارب حلها، انا مليش غيرك يارب!
{وكملت طريقها وهى ما باليد حيلة}
=============================
{تاني يوم عند غسان وكمال بعد ما وصلوا اليونان..كان غسان ماشي قدام ووراه كمال، والشر على وشه، لحد ما وقف في نص الشارع}
غسان:اتصل بيها اعرف هى فين!!
كمال(بتردد) :امممم طيب
{وكان بيطلع الموبايل من جيبه وهو متردد، لحد ما اتصل على زهرة}
كمال:صباح الخير يازهرة
زهرة:صباح النور
كمال:انا وصلت اليونان، قوليلي مكانك فين؟
زهرة:حاضر، خليك معايا ثواني
كمال:مستني
{قرب غسان ووقف قصاد البحر على الكورنيش، وولع سيجاره، واللي كان يشوفه وقتها يقول ان مفيش حاجة فارقه معاه!}
كمال:طيب ماشي يا زهرة، هنر…هركب تاكسي وجاي، مع السلامة
{وبعد ما قفل مع زهرة، قرب من غسان وحط ايده على كتفه..لفله غسان وهو بيطلع دخان السيجاره من بؤه}
كمال:يلا بينا
غسان:يلا
{وشاوروا لـ تاكسي!}
==============================
{عند حاتم ومهرة، كانوا ماشيين في الشارع ورايحين لـ زهرة}
مهره:انا بجد زعلانة من نفسي أوي يا حاتم
حاتم:لية طيب؟
مهره(بحزن) :ان انا مشيت، وزهرة كانت جاية مخصوص عشاني..حتي ممعايش تليفون أكلمها واشرحلها موقفي!
حاتم:انتي مكنتيش تعرفي انها جاية، واكيد لو كنا نعرف مكناش مشينا!
مهره:يارب الاقيها في البيت بس ومتكونش راحت الشغل!
حاتم:مانتي لو خفيتي رجليكي زيي كان زمان وصلنا من بدري!
مهره:مانا ماشية على آخري اهو..اعمل اية تاني؟
حاتم(بيضحك) :زودي سرعتك شوية، وإلا كده انتي عايزه تروحي ومتلاقيهاش!
مهره:لا ملاقيهاش اية…لعلمك انا لو ملقيتهاش في البيت، هروحلها في الشغل!
حاتم:ياسلام؟…ومنروحش احنا شغلنا بقى!
مهره(بتضحك) :مش مهم
حاتم:مش مهم؟…امال هنجيب فلوس منين عشان نتجوز؟
مهره(بتردد) :حاتم هو انت بجد عايز تتجوزني؟
حاتم:لا بلعب بيكي وبسلي وقتي…هو اية السؤال الغريب ده؟…انا مبقولش كلمة غير وانا قدها..حاتم مش هيتجوز غير مهره!…ومش هرتاح يا مهره غير لما تبقي مراتي، واسمك مكتوب على اسمي!
{ضحكت مهره}
مهره:تفتكر أهلنا هيوافقوا لو ربنا كاتبلهم نصيب وطلعوا عايشين؟
حاتم:يوافقوا، ميوافقوش لية؟…طب عارفة انا أمي طول عمرها مستنية يوم جوازي ونفسها تفرح بيا زيها زي أي أم نفسها تفرح بـ ولادها..وانا متأكد يوم ما نرجع مصر، هتكون الفرحة اتنين..فرحة رجوعنا، وفرحة جوازنا!
مهره:نفسي أشوف مامتك أوي يا حاتم..انا عمري ما شوفتها!
حاتم:انا أمي طيبة اوي وهتحبك، هى بس خُلقيه شويتين عشان تبقي عارفة..بس يمكن من اللي شافته!
مهره:ايه اللي هي شافته؟
حاتم(بإبتسامه) :لا هحكيلك بعدين ده حوار طويل ، خلينا بس في صاحبتك زهرة دلوقتي
مهره:ماشي
{وبعد ما وصلوا البيت عند زهرة..وخبطوا}
زهرة(بإبتسامه) :شكل كمال وصل!!
أنيسة:لا حول ولا قوة الا بالله، ما قولتلك بلاش تعرفيه المكان..لكن هقول ايه مبتسمعيش الكلام!
{فتحت زهرة الباب واتفاجئت بـ حاتم ومهره..وأول ما فتحت الباب حضنتها مهره حضن طويل}
مهره:حقك عليا يا زهرة والله ما كنت اعرف انك جاية مانتي مقولتيش، بس انا جيت اهو أوضحلك سوء التفاهم اللي حصل!
زهرة:لا يا مهرة انا مش زعلانة منك، ومدياكي العذر لانك فعلاً مكنتيش تعرفي…تعالي تعالي..تعالى يا حاتم
{ودخلوا جوا، وزهرة شدت مهره بعيد بحماس والفرحة باينة على وشها}
حاتم:ازيك ياطنط؟
أنيسة:الحمدلله بخير
مهره(بإستغراب) :مالك يا زهرة فرحانه كدة لية؟
زهرة(فرحانه) :كمال جاي في الطريق، اخيراً هشوفه بعد فترة الغياب دي كلها!!
مهره:كمال صاحب أخوكي؟
{هزت زهرة راسها بإبتسامة}
مهره(بصوت حاد) :انتي ازاي تعرفيه مكانك؟…مش خايفة يكون ناوي على أذيتك؟؟
زهرة:لالالا…لا يامهره…لا مش كمال اللي يإذيني…انا اللي اكتشفته ان كمال بيحبني اوي اوي، كمال عمره ما يإذيني..انتي أصلك مسمعتيش كلامه ولا صوته وحنيته..ده أحن عليا من أخويا اللي من لحمي و دمي..كمال مش قادر على بعدي يا مهره!!…وجاي يشوفني من ورا غسان!…غسان لو عرف أي حاجة هتحصل مشكلة كبيره، ورغم كل ده مخافش على نفسه من شر غسان و جه برضة!
مهره:بس غلط يا زهرة!..ياحبيبتي انتي مش ضامنة ايه اللي ممكن يكون مستخبي من وراه مجيته دي!
زهرة:هو انا لو قولتلك ان حاتم ممكن يغدر بيكي في أي لحظة ويبيعك لـ عدوك هتقوليلي اية؟
مهره:بس حاتم غير كمال يا زهرة!!…كمال اللي انتي بتقولي عليه ده تحت جناح أخوكي اللي بيؤمره بكل حاجة..وممشيه على العجين ميلغبطوش!
زهرة:وانا واثقة في كمال، اطلعي منها انتي بس وهتشوفي!
{وبعدين قربوا من حاتم وأنيسة وليلى وهما قاعدين على الكنبة}
حاتم:ايه خلاص اتصالحتوا؟
مهره:احنا مزعلناش من بعض اصلاً عشان نتصالح!
{حضنت زهرة..مهره بكل حب}
زهرة:حبيبتي يا مهره،بحبك اوي والله ربنا العالم!
مهره:وانا أكتر بكتير والله يا زهرة!
{ضحك حاتم، وبعدين الجرس رن..راحت زهرة تفتح لقيته كمال، ضحكت وفرحت اوي لما شافته، كانت متوتره ومش عارفه تقول اية!!}
زهرة(فرحانه) :حمدالله على السلامه يا كمال، اخيراً شوفنا بعض بعد كل الفتره دي؟
{مردش كمال، وكان واقف زي الصنم مبينطقش..لحد ما غسان زقه بعيد، وضرب زهرة بالقلم على وشها}
زهرة(بصويت) :اااااه
غسان(بزعيق و شر) :عرفتي انك لو لفيتي الكون كله على رجليكي وروحتي في آخر الدنيا ، مش هتهربي مني؟؟؟
زهرة(بصويت) :انت جيت ازاي؟؟؟
{قام حاتم ومهره وأنيسة، ولما حاتم شاف غسان بيضرب زهرة، راح فاككهم من بعض، ومسك في غسان..ولما غسان بص في وشه تنح واتصدم}
غسان(بزعيق) :هو انت يا كلب؟؟..انت اللي بتساعد أختي على الهروب!!!
{راح حاتم ماسك غسان من دقنه بكل غل}
حاتم(بصوت حاد) :في كام نقطة حابب أوضحهملك..اول نقطة انا مش كلب..انا أنضف من مليون واحد منك واللي يغلط فيا يبقى حكمها على نفسه..انما تاني نقطة، انا ابويا علمني مسكتش عن الغلط ولما أشوف واحد بيمد ايده على واحده يبقى لازم اتدخل، ده حتى لا من الرجولة ولا الأدب خصوصاً بقى لما الواحدة دي تبقى أختك..تالت نقطة مش كلام هتبقى بالفعل
{وضرب غسان بوكس في وشه، وكانت الستات بتصرخ، وزهرة بتعيط بشدة وبتلطم!..لحد ما غسان فلت من حاتم و ردله نفس الضربة، ومسك فيه}
غسان(بـ غل) :انا هخلي مصيرك زي مصير حمزه..هحرق قلب أهلك عليك يا حاتم
مهره(بصويت) :حمزه؟؟؟…حمزه؟؟…حمزه اخويا؟؟؟…حمزه أخويا انااا؟؟؟؟
حاتم(بإستغراب) :انت عرفت اسمي منين؟؟؟
{وضرب غسان بالبوكس في وشه}
حاتم(بزعيق) :عرفت اسمي منين بقولك؟؟؟…ماتنطق!!!
غسان(بزعيق) :ده انتوا حسابكم تقل معايا اوي اوي…أقسم بأم الطبيعة ما هسيبكم إلا وانتوا جثث مرمية على الأرض غرقانة في دمـهـ.ـا
مهره(بصويت) :اخوياااا حمزه ماااات…اخويااااا..اخويااااا يا زهرة
{و رميت نفسها على الأرض، وهى بتصرخ ومنهارة، كانت أنيسة ماسكاها وبتحاول تهديها، وبعيد في زاوية الأوضة كانت زهرة جسمها بيترعش وبتعيط}
حاتم(بزعيق) :انت بتتوعدلي ياروح أمك؟…طب استقبل بقى!
{ونزل ضرب في غسان، وغسان بيضربه…وبعيد كمال واقف مصدوم مش عارف يتصرف..لحد ما غسان طلع مسدس من جيبه و رفعه في وش حاتم..ولما مهره شافت المنظر مقدرتش تستحمل وقامت}
حاتم(بحذر) :نزل البتاع اللي في ايدك ده!!
غسان(بـ شر) :انت حاتم بقى وست مهره اللي انا كنت بطاردهم يوم الحادثة مش كده؟…انا كنت شايل هم هلاقيكم فين، بس كويس ان الحظ حالفني وطلعت زهرة أختي على معرفة بيكم.
حاتم(بسخرية) :لأ وكمان بتعترف انك اللي كنت بتطاردنا؟…طب والله كويس، هيكون دليل كويس في ايد الحكومة!
غسان(بصوت حاد) :ده لو عيشتوا
{وضرب طلقه في السقف، كلهم صرخوا..راح حاتم ناطط عليه وقلبه على الأرض ونزل ضرب فيه، وأثناء ما هو بيضربة جات طلقه في مهره ووقعت على الأرض..في ساعتها حاتم جرى عليها!!..كان غسان دخل يشد أخته وأمه ومرات أبوه}
غسان(بزعيق) :قدااامي…يلااااا
أنيسة(بصويت) :حرام عليك، سيبنا في حالنا، عايز مننا ايه؟؟
زهرة(بصويت) :مش جاية معاك في حته!!!
{راح غسان شاددها بكل عنف بمساعدة كمال وخدوهم ونزلوا…وحاتم على الأرض جنب مهره وهى سايحة في دمـهـ.ـا}
حاتم(بخوف+حزن) :مهره!!
مهره(بتعب) :وديني المستشفى يا حاتم، متسيبنيش أموت…انا مش عايزة أموت وابعد عنك!
{مسك حاتم ايديها وباسها ودموعه نزلت}
حاتم(بدموع) :مش هتموتي..هتعيشي يا مهره، بعد الشر عليكي…انا مقدرش أعيش من غيرك يوم واحد!!
{وشال مهره وهى ماسكة بايديها الاتنين في رقبته، لحد ما خدها وراح المستشفى، وهناك دخلوها العمليات، وكان حاتم واقف قصاد أوضة العمليات ودموعه مش ملاحق عليها من شدة حزنه على مهره!..وبيفتكر كل ذكرياتهم مع بعض…لحد ما القبطان والمساعد جم من بعيد وهما خطواتهم سريعة..وأول ما وصلوا حط القبطان ايده على كتف حاتم}
القبطان(بخوف) :مهره مالها يا حاتم، حصلها اية؟؟
حاتم(بدموع) :اتضربت بالنار يا قبطان، ياريتها كانت جات فيا انا…ياريتني انا اللي كنت جوا مش هي!!
القبطان(بحزن) :مين اللي عمل كده يا حاتم؟
حاتم(بزعيق+عصبية) :مش هسيبه لو فيها موتي برضة مش هسيبه…مادام الموضوع وصل انه يإذي مهره، ده انا هطربق الدنيا عاليها واطيها فوق دماغه..اقسم بالله العظيم ما هسيبه، ولا هسيب حق مهره!!!
القبطان:اهدى بس يا حاتم، انا مقدر اللي انت فيه، ومقدر حبك لـ مهره وخوفك عليها!
حاتم(بحزن) :مهره لو حصلها حاجة انا مش هرحمه…حتى دي كمان الدنيا وقفالي فيها؟…هو انا لية كل مااحب حاجة واتعلق بيها يحصل كل ده؟…ليه الدنيا حالفة ماتوريني يوم حلو ابداً؟؟
القبطان:ياحبيبي كل شئ بيحصل انت شايفه وحش من وجهة نظرك، بيكون جواه خير مستخبي لحكمة محدش يعرفها غير ربنا!
حاتم:خير ايه بس يا قبطان؟؟..ان مهره تضرب بالنار ده خير؟؟…خير من أي اتجاه؟؟…وحياة أمه ما هسيبه
{وخبط ايده في الحيطه من كتر العصبية}
=============================
{في بيت فاتن…كانت بيري عاملة فيك أكونت، ودخلت لـ صاحبتها علا، وبعتتلها الفيديوهات}
بيري: ياترى ايه هيكون رد فعل خطيبك عادل، لما يشوف فضايحك؟…وخصوصاً بقى وانتي مع واحد في السرير..لأ ومش خطيبك وبس…لا أهلك وصحابك وكل حبايبك..اعتقد هتبقى فضيحتك بجلاجل…وياسلام بقى لو صاحبتك عرفت حقيقتك، هتعملي فيكي اللي ما يتعمل..ياريت لو خايفة على شكلك وسمعتك وسط الناس، تسمعي كلامي بالحرف الواحد ده لو عايزه رصيد سترك مينقصش منه جنية..كلميني على الرقم ده يا حلوه ونتفق.
{وبعد ما بيري بعتتها، ابتسمت ابتسامة انتصار، وكانت مجهزة البرنامج اللي هتغير صوتها منه..وبعد ربع ساعة…علا شافت الرسالة، واتصلت عليها..ولما بيري لقيت رقمها بيرن ضحكت ضحكة طويلة بكل برود ولامبالاة وفتحت عليها}
علا(بخوف) :انت مين، ومين اللي باعتك؟؟..وجيبت الفيديوهات دي منين؟
بيري:جيبتها مكان ما جيبتها، حاجة متخصكيش يا حلوة…قوليلي بقى عايزه تتفضحي ولا تتستري؟
علا(بخوف) :وهو في حد بيحب الفضايح؟…انت عايز ايه بالظبط؟
بيري:حلو…هقولك عايز اية…ابعتيلي ٣٠٠ ألف جنية على العنوان اللي هقولهولك
علا:يانهار اسود..٣٠٠ألف مره واحده؟..وانا هجيبهم منين؟؟
بيري:اتصرفي…دي مش مشكلتي
علا:انا هبعتلك ١٠٠ ألف، ده اللي في مقدرتي
بيري:٣٠٠ ألف ومش هعيد كلامي..ومش هقولك لا يزيدوا ولا ينقصوا جنية..لا يزيدوا عادي لكن مينقصوش مليم ساغ!!…ده لو مش عايزة خطيبك وصاحبتك تعرف مصيبتك السوده!
علا:طب اديني فرصة اجمع المبلغ ده..انا مش جاهزه دلوقتي!
بيري:قدامك ٣ أيام تجمعي فيهم الفلوس، وإن موصلتش، هنشر فضايحك على الفضائييات، سلام
علا:الو…اسمعني طيب!
{قفلت بيري، وهي مبتسمة ابتسامة خبيثه، وقامت!}
===============================
{في المستشفى بعد ساعة، خرجت مهره وودوها أوضتها..كان حاتم قاعد على الكرسي جنب سرير مهره وماسك ايديها والحزن مالي قلبه..والقبطان والمساعد كانوا قاعديين على الكنبة}
حاتم(بحزن) :حبيبتي يا مهره…فوقي عشان خاطري، انا قلبي بيتقطع عليكي!
مهره(بتعب+ابتسامة) :حبيبي
حاتم(بـ حب وخوف) :حمدالله على سلامتك يا مهره، انتي اتكتبلك عُمر جديد!
مهره:انا مبسوطه ان ربنا كتبلي عمر جديد عشان يكون وياك..صدقني انا مش خايفه من الموت…انا خايفة اسيبك لواحدك!
حاتم:بعد الشر عليكي يا مهره، مفيش حاجة وحشة هتحصل، اللي جاي هيكون خير وسعادة لينا…حتي القبطان اول ما عرف جه، عشان تعرفي انتي غالية علينا كلنا قد ايه!!
مهره(بإبتسامه) :ربنا يخليكوا ليا يارب
القبطان(بإبتسامه) :كده يا مهره خوفتينا عليكي؟
مهره(بتعب) :مقدرش يا قبطان
القبطان:ربنا يتمم شفاكي على خير يا مهره
مهره(بتعب) :يارب
حاتم(بيبوس ايدها) :قوميلي بالسلامة بقى عشان خاطري!
مهره(بتعب) :ادعيلي يا حاتم
حاتم(بخوف) :ربنا يشفيكي ويخليكي ليا، ده انا من غيرك ولا أي حاجة!
القبطان:ربنا يسترها في طريقكم، ويبعد عنكم الناس المؤذية!
حاتم:ياارب
==============================
{عند غسان وكمال وزهرة في الشارع…كانوا مكتفين زهرة وأنيسة وليلى..كانت زهرة بتعافر عشان تبعد عن غسان ولكنه كان مكتفها بقوته…لحد ما فلتت منه وهربت!!}
غسان(بزعيق) :زهرة!!!!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية أبي بواب وأمك خادمة)
