رواية قلاع الضر الفصل الثالث والعشرون 23 بقلم زينب ماجد
رواية قلاع الضر الجزء الثالث والعشرون
رواية قلاع الضر البارت الثالث والعشرون
رواية قلاع الضر الحلقة الثالثة والعشرون
( اسرار قدس )
ما مرتاح
منٌك
منٌي
من الجاي من الراح
ما مرتاح
عركه وي الزمن ورجعنه مكسورين
وبعيده المسافة وينسي اللي طاح
ما مرتاح
(كاظم أسماعيل گاطع)
كعد صوبي وانا مدنجة
احس كل الاحلام والاماني الجانت براسي عن العرس والزواج .. طارت ..
تكرب مني وكالي : اسمج وسام ماهي
هزيت راسي وانا مدنجة
رد : احسو اسم قريب ( غريب) ما شفت حرمة تتسمى بهالاسام فد انت
– وانا مسمية روحي ؟ غير اهلي
– وينم اهلج ؟
– الله اطاهم والله اخذهم .. بعد ؟
– عليش معصبة ما يصير هشكل
– عجل تحقيق خوما تحقيق
– عنتسامر ما ابالي اضايكج واذا شايكتج اتعذر منج
– عجل تفضها لو تضل ءنتسامر ؟
تبسم : مهيرة يولي
– لا شني بس ما نكضيها حجي
– عجل قير تا اعرفج واحاجيج
– ديلا يول اسعل ندحج اليوم وين تصل سالفتنا
ضل يسولف ويهوبز ويهمبل عن نفسه وانا هيج وانا ذيب امعط وانا الكف الطير الطاير بيدي من السما شوي ويصير النبي اسليمان بقدرته ولا جنه زلمة بالطول .
ضلينا نسولف ونحج .. ليما دخت لفيت راسي ونمت
الفجر كعدت فضيت التريوكة وعملتها وندهتو ياكل ، حجه : توا الفجر طر عليش مكعدتني ؟
– وانا هشكل عيشتي اكعد ويا طرت الفجر وانام ويا نزل الغروب
– وانا ياهو مالتي
– عجل ما تشتغل ما تكوم لامرك
– شقليش هاذ وانا عريس توني
– والعرس يوكل خبز لو الوادم تجيبلك وتحط بزردومك اكول كوم وانهض لشغلك واتوكل على الله انا عدي طلعة للسوك .. كوم غسل ياله
راح غسل واجا كعد يتريك وياي
ما حجينا جثير بس كضا الريوك طلع من الغرفة وراح ليغاد اني خذيت الصحون اغسلهن برا واجفيهن خاطر اضمهن
وانا اغسل بالصحون اسمعه يحجي ويا عمي جدوع يكلو ( اشوفها كشمه وشگرگة واطباعها صعبة )
كعدت لحيلي !
انا الكشمة والمو حلوة ؟ فوكها الزلمة شايف روحه علي وحاسبني كشمة .. وشكركة بعد وانا الدخت منه ونمت !
يزين حظي بس
غسلت الصحون بسع ودخلت جوا
دخل : لا تروحين للسوك اليوم
_ عليش
-ارتاحي يولي انت ما تعرفين ترتاحين هاي ايام عرسنا عجل نحن يوميا معرسين ؟
– ومنين ناكل لو كعدنا
– محد يموت من الجوع .. اتريثي
كعدت وكتله : اذا انا كشمة وشكركة عليش رايد مجابلتي
تبسم : جنتي تتسمعين علينا انا والحجي ؟
– ما اتسمعت اعلى احد جنت اغسل وحسكم واصل لعدي
– عجل هديتيني ونمتي امس
– وانا الكضيت الليل اگرگ لو انت ليما دخت وطفيت ؟
– انت عليش كل وكتج معصبة وتناترين اهدي
– وانت عليش من امس واليوم ماكو سالفة شينة ما طلعتها بيه ؟ شجالك ؟
– لا لا خوش مرة خوش مرة .. اتكشمر وياج
دحجت عليه هزيت ايدي ودرت وجهي
ما حجه ولا رد .. ضلينا متجابلين وساكتين ، اندكت الباب كام الها عطا ، فتحو الا خواتو جايات وجايبات صينية تريوكة .. كمتلهن اهلي بيهم واكلهن : عليش كلفيتن اروحجن تريكنا من يمتى
– يا صدك تريكتو عرسان شعدكم كاعدين من الصباحيات تونسو
عطا: بعد هذا حظنا شنسوي عجل
اتضايكت عليش يجاوب اختو هشكل
رحبت بيها وخذيت منها الفطور وحطينا وردينا ناكل وهي ويانا ونحجي ليما كالت : اهدكم عرسان ليوحدكم تاخذون راحتكم اترخص
– دكعدي يولي وين رايحة اكعدي
– لا نا يصير صدك جذب ارتاحو
رحت وانا سديت الباب وانداريتله : عليش اتذمني جدامها
– ياهو الذامج انا ؟ يمتى ؟
-ديلا هي ضلت عليك بيمن حظي كعد خاطر يكعد بيك
– انت عليش من ساعة الشفتج ولهساه احسج مقصوبة علي ما ترديني كولي عليش تناترين بالحجي وتكاطفين ما يصير
سكتت عنه ما حجيت عبن لو حجيت ازود يبط كلبي واكوم انوم المشعل براسو .. شوي وانا وياه متجابلين وساكتين كمت عنه ورحت اطر بالبستان مالت عمي جدوع.
كمت ادحج بالشجر واعتب اعلى حظي شبيه ما يكعد عليش عادتي ونايمة بالچيحة .. لا باهل فلحت ولا زلمة
وين جان بالي واحلامي بقاسم
يا حلاته وهندامه وحجياته وهيبته
تالي الله جازاني بزلمة بالطول
يتغازل بعيوبي ولا شافلة حسنة بيه ومدحها …
بس شسوي ضل رجال ولا ضل حايط اطلع اروح ما اسمع حجي من اليسوى والما يسوى
جت جدتي وجابتلي صوغة عرسي ذهب واتباركتلي وفرحتلي ووصت عطا بيه وكالتله ( هالله هالله بيها تراها بنيتي وعزيزتي ) حطت بيدي فلوس وكالتللي ( شتعتازين لا يردج الا السانج ) تشكرت منها وراحت .
كعدت من الشغل اسبوع اتجابلنا اول ايام محد راكب اعلى احد ولا ماخذين على طبايع الاخر بس ورا الاسبوع مثل التعودت على اسلوبه .
كبل العرس جان يشتغل بكاع ناس ويطونه اجر كليل كلش
كتله : هد الكاع واخذ العربانة اشتغل بيها احسن ما يطلع بيها ابن جدوع
كمنا انا ويا نمر نشتري المحاصيل من البساتين ونروح للسوك نبيع بيهن .. اول الايام ما راضي بالشغل ويسمع حجي ويزنزن بس بعدين اتعود وكام يشتغل وياي
وحطيت العربانة بيده ..
الصبحية يشتغل بيها بالسوك
والعصر يفتر بيها يوصل الوادم
الا ما يوم نايمين ليلة وما نحس الا الربد ع الباب ..
ونفز اثنينا نتراكض .. خير شحااصل !؟
– الحكو عربانتكم محروكة والحيوان جاتلينو
تراكضنا ولد جدوع وعطا يطفون بالعربانة
وانا مجابلة الحيوان وادك اعلى راسي .. بجيت نحت ثغبت ليما ليما طلع الفجر .. عطا وارلاد جدوع راحو يفتشون اعلى الحارج
وانا ما بيني وبين نفسي اعرف ثائر هو ورا الحريجة بس ما كلت عبن وراي شمات وناس ما ينطلع بكل اسرارنا جدامهم واهل عطا المعاير اعلى اطراف السانم .. لو سمعوا اخوي الحارك عربانته تطلع عربانة عطا واخوي الحاركها وتكثر السوالف علي موش اعلى اخوي ..ويكوم حتى عطا يعايرني بي خلي الضيم مضموم بالكل احسن .. صميت ثمي وسكتت ودموعي تتناثر
شغلنا كله اعلى هالحيوان وهالعربانة
وكمت من جديد اشتريت بالفلوس الدافنتهن اشتريت عربانة وحيوان بس هالمرة اشتريت حصان ما جحش خاطر اسرعلنا بالشغل..
شو عطا من دحج عدي افلوس وعوضت الراح
كام يروح ويرد يسعلني شكثر عدي
كتله ( بس ذن جنت ضامتهن للعوزة )
ورد يشتغل ورديت لشغلي وياه
بس عطا مو زاك الزلمة الكلبه علي وعلى شغلتي
يتنافس وياي منافس ولا جن شغلي وتعبي كله النا .. يكرك هواي حسرة علي ردت اعمل شي اذا ما العليش وشتريدين واكعدي واكعدي اعلى اطراف السانه .. ما حسيته ذاك الزلمة الكفو الاشد ظهري بيه
العربانة والحصان انا المشتريتهن
وانا اطلع وياه وانا ادلي المحاصيل وانا الاشتري المحاصيل هو يكعد ويبيع وياخذ الربح اله وراس المال يطي الي وفوك منه كلشي ناكص زايد نعتازه بالبيت علي ..
وخواته فوك راسه يزنزن ما يخلنا بحاله
مرتك تشتغل مرتك عدها مرتك ضامة .
ويومية اكوان ويومية مغثة من وراهن مطين عيشتي بالگرگة مالتو
خالد خالي نطا عمره ومات ما باريته الذمه ولا اباري
وصارت هوسة وكونه اعلى الكلعة ما بين مرجانة وجدتي يازي ليما رد الحك لاهله والكلعة ردت لخوالي مجبل ورت جدتي وولدها للكلعة واطت لمرجانة واهله بيت وكطعة من حك خالي هالد من ورث اهله .. والباجي كالتلم انا اوافيكم احكوكم
وخلت خالي جابر يوفي خواته من زهرة فلوس الورث مال ابوهن وتصبح الكلعة الها .
مرت الايام واجت الايام ونحن هاذ حالنا
انا اشتغل وهو حاط عينو اعلى رزكتي شفت الشغل وياه متعب يحسب الاحصله فلس فلس ويحاسبني عليه وين وديته وشعملت بيه وعليمن تضمين وعليش ما تشترين هاي وعليش ما تجيبين ذيج .
والله ذاك اليوم وانا كاعدة وضاربة صفنة بزماني وما احس الا زلمة بدشداشة بيضة وكف جدامي .. رفعت عيني خاطر ادحج بيه وما اشوف الا قاسم الواكف جدامي ويكلي : ها مسا الخير
كمت من حيلي : هلا مسا النور .. يا هلا ومرحبا كول
– شلونج يوسام
– بخير الله يطول عمرك الحجية البنات شلونهن
– زينات زينات اطيني تتن
– اي
دنجت اطي ورديت كعدت
لف جكارة التتن وكعد جدامي : اشلونه شغلج يوسام
– خير ونعمة القاسم الله الف الحمدلله والشكر
– واليلكالج اخير من هالشغل
– شنهو
– انا عدي مشروع وفكرت بيج
– وشنهو مشروعك
– انا وابوي نشتغل بالتجارة من ايران والاردن والسعودية ومن بلدان جثيرة .. ونشتغل بسوك المركز .. كلت اذا افتحلج محل جبير اتعرضين بيهن غراض وتشتغلين وانت شاطرة بالشغل تحنصين الواحد يشتري وايدج مبروكة
– واشتغل وياك بسوك المركز .. انا عدي فد هالحصان .. وحدنا للسوك هاذ
– لا هذا السوك ما بيه ربح انا اكول تشتغلين وياي وراح اوفر سيارة حمل تاخذج انت وجم واحد ..
– زين رجلي ما يشتغل وياي
– ماكو مشكلة خل يجي وياج بس انا اطيج اجرج انت مالي غرض برجلج بعدين من يوم الاعرفج وانت كوية ما تخافين عليش خايفة وجايبته وياي
– لا مو سالفة خوف بس هو ما يدبر الشغل وحدة بالسوك واخاف ما يدبر شغل العربانة
– بعد انا مالي غرض انت شوفي وضعج ورديلي خبر
مشى عني وانا ادحج وراه
يگرادة حظي الما حويته .. الله ذبني بزلمة ساعة وكته يزن وگرك ويعيب ما فرد يوم سمعتلي حجاية اتطيب الخاطر منه .. كضاها وياي انت هيج طبعج هيج فلوس وين ما تثقين بيه ما تامنيني على حلالج وانت هيج وانت هيج وانا المعيشتي بلاي بمطي ما يسرح .
يگرادة حظي اي والله
مشيت للبيت وانا افكر بالمشروع مالت قاسم الكالي بيه
شفت ماهي مصلحتي اخلي عطا وياي بالشغل واشركه باجرتي خوبن اطلع وياه الفجر نشتري المحاصيل ويروح هو للسوك يبيع وانا اطلع بسيارة قاسم لسوك المدينة .
فاتحته بالموضوع .. كالي : عليش انت اتطلعين خوبن انا الاطلع
– هو الزلمة رايدني عبن شاغولة واعرف احنص الواحد واخليه يشتري انت شتفهم بهالشغل
– لا هديها وضلي على البسطية
– وشغل البسطية شينفع غاد احسن ورزكتها ازود عليش ادفر رزكة الله برجلي
– اي وانا شنهو الالي بيها
– وشنهو الالك وتريده ؟
– من اتطلعين واتهدين البيت غير الي شي
– اكلك شو دحج هين .. كلي انا الشنهو مستفادته منك انا المسؤله بيك لو انت من يوم الخذيتك ولليوم شنو الحصليته منك ؟
حطيتلي بيت كعدتني بمجان زين شو انت الاجيت عشت وياك عكس الوادم انا شايفة المرة هي اليزفوها لبيت رجلها انت زفوك الي وجيت عشت وياي وطايح بفادي من ذاك اليوم لهذا اليوم انا الاشتريت الحيوان وانا الاشتريت العربانة وغراض البيت مني ولبستي مني واكلتي مني وشربتي مني
فرد اشتريتلي كردانة ؟
فرد يوم اشتريتلي ثوب
فرد يوم شلت عني وكتلي اكعدي وانا اشتغل واكد عليج
من اخذتك ولليوم شنهو الحصليته ؟
تخبل شلون عايرته بهالحجي
كام يصايح ويغالط ويتكاون وهد البيت وراح
كلت وروحتم عسى زعل لا رضى انا شمحصلة منه ؟
اطيت العربانة لابن جدوع شاطر بالشغل
وانا رحت اتفكت ويا قاسم على شغل السوك
ذبيت روحي على الشغل .. اطلع من الفجر ما ارد غير ويا الغروب جنازة بس شغلنا خير من الله ..
انوب عرفت سالفة استثمار .. اطي فلوس بداية الشهر يردهن الي نهاية الشهر وفوكهن زايد ثلث … صار الفلس بيدي يصير فلوس
بس احس ابطني كبرت وانا اعلى زعلتي ويا عطا مو ٦ اشهر وازود .. عد ما كمت احس بحركة ابطني قوية وبطني تروج عرفت هذا جاهل عيتحرك ابطني وانا حبلى لا فحصت ولا مشيت خليتها على الله وكملت شغلي .
بس الناس ما هدتني الحجي علي من كل صوب
عايفة رجلها لخاطر قاسم
عملت ما عملت خاطر تهجج عطا وتعيش اعلى حيل شعرها باا محرم .. المرة دلالة فرارة متعلمة ع التخامة ما تحوي زلمة
لافة ويا الزلم وتشتغل وهاجمة بيتها
يمكن عاشكة
شوف شعدها من هدت رجلها لخاطر تشغل ويا قاسم
شعدها الله يعلم
طعن حتى بشرفي طعنوا وانا ياخذني الفجر يردني الغروب
وجدتي تمرني بالليل تصحي وتستريح وتكلي ( جدة ردي لرجلج وسكتي حلوك الوادم ياهو اليغشعني يعايرني بيج )
– وعليش يعايروج بيه شافوني ويا احد لو طايحة بكلب احد
زلمة ما بيه خير لو تطيني شغلج لو ما اخليج تشتغلين
تعبي وجدي واطي اله عليش
شنهو فايدته والله اسمك رجل يهواي من وحشة الليل
عساه لا سد وحشة الليل
– ميخالف جدة ردي لرجلج
– جده لا ارد ولا امشي اليريدني يندل دربي هي المرة التروح مشية للزلمة لو الزلمة اليودي المشية .. انا وياه عكس الوادم هو الطالع زعلان عده اهله ولزوم انا امش اراضي وارده اليه من عمت عيني كون على هالقسمة الما بيها كل حظ
– جدة بس سكتي حلوك الوادم كلت وجوهنا
ما رديت ولا خضعت كلت يردني هلا بيه ما يردني سبعة حجار لا انا بعازته ولا انا بقيده
بعدت الناس وحجي الناس من راسي
حجي الناس لا وكلني خبر من جعت ولا دفاني من بردت ولا رواني من عطشت ولا لفاني من ضعت .. كل عمري انا اجد واسعى والناس اسهل ما بحلكها الجلمة وطعن اعراض الوادم
تركص اذاناتهم لو سمعوا السالفة بيها شرف
كل واحد منهم يكوم يزيدله جلمة اعلى السالفة ليما يعملوها فضيحة ويطعنون باعراض الوادم ..
وكل واحد تارس ثمة حجي اعلى الناس ويتهم المكابيله ما يخاف الله والما تطاوع رجلها كافرة والتطلع بلا علم رجلها تسبها الملايكة والما تمشي يشور رجلها ماهي مرة
وبس هذا الحصلته من الناس والرجال
حجي وتعبان كلب
هديت حجي الناس عني ورحت ادور على شي احط فلوس بيه خاطر لا يضيعن .. حجيت ويا قاسم وكتله : عدي جم فلس ورايدة اشتغلهن لا يضيعن من عدي وجيت استشيرك يجيبلي كاع
– شكثر عدج
كتله كالي : لمي عليهن بعد شوي وانا لو لكيتلي لكوة اخبرج بيها
امتا بحجايته
وكمت الم الفلس على الفلس ليما لكالي كاع وبيها بيت صغير مساحتها ٤٠٠ وبسعر زين بس اغلى من فلوسي كتله ( بس ما عدي كل هاي الفلوس .
كال : انت شاطرة وادبريهن انا راح اداينج وانت كل ما يصير عدج وافيني
كتله : وصاية الله ووصايتك
رحت وياه وشفت البيت بلوك غرفة وباحة ومطبخ ومرافق وحوش صغير والكاع جدامه سهلة وخضرة ينزرع بيها وتجيب خوش محصول ..
اطيته الفلوس وتكاتبنا .. وانكتب البيت والكاع باسمي
يا وسع فرحتي بهالكاع .. طرت من كاعي لسماي
مصدكة مجذبة انا يصير عدي بيت وكاع
حتى لو مديونه علي
بس بعد ذاك التشرد والنومة ويا الحيوان والعيشة بالشارع
صرت انا المالكة ما المملوكة
كمت اخذ البيت طول بعرض اركص واهوس وفرحانة بالبيت
ورحت لجدتي وخبرتها فرحت وياي وكامت تهوس جابت واهلية وبيض طكت ابيتي .
وخوالي ما كصروا وياي ساعدوني
كل واحد منهم جاب شغيلة للبيت
وسادات فرش .. وانا جبت اغرياضتي البيت جدوع وخليتهم بيه
بعدني انكل بغرياضتي والت طعا يبين ويعرضلي بالباب: شني جاي تنكلين
– شرايد
– تراج حرمتي ما طخيتي راس ما بسج
– وانا الزعلت لو انت
– انا زلمتج ولزوم تاخذين حجايتي
– زلمتي بيش كديت علي اطيتني شعملتلي خاطر تحكمني
وكت الشغل والجد انا الزلمة وانا المرة
ووكت المحاكم انت الزلمة وانا المرة
– ما هشكل انت حرمتي فد الاريدة تحترميني وسمعت انت حبلى وراح يجينا جاهل ما يصير نضل هشكل
– كل لروحك لا تكلي انا .. رايدني هلا بيك ما تريدني الله وياك عجل طاردتك انا لو غاصبتك علي انت التتمزعل
تصالحنا انا وياه ورد كعد وياي واول ايامنا زينين
وما يحجي ولا يغث ويكركر بالحجي اعلى شغلي ..
عكب اسبوع من كعدتي بالبيت .. طلكت وخذاني بالعربانة للجدة .. جبت ولد … سماه عطا ( مروان )
فرحت بيه وعطا عمل عزيمة وعزم كرايبه واهله وخواته كلم اجم وصلنا بالبيت وبالولد ..
ما اود اهله
خواته ينبشن ويحشرن ارواحهن برزكتي
ويسعلن شكثر تحصلين شلون شغلج شتشتغلين
شلون اشتريتي البيت وانا اجذب واجاوب ما جاوبت ولا جواب حك عبن ما يستاهلن ادخلهن باموري واورجهن على رزقي واخلي عيونهن علي .
من طلعن من البيت وعطا كلب وجهه علي متنگ
: شبيك شجالك
– ماكو شي
– وعليش مكشر
– تعبان دايخ من الجهال الا تكرين يعني
سكتت عنه وانا اعرف ذبن حجي يمه وهيضنو
كام واجا عندي : فلوس الفضل وينم
– شتعمل بيهن
– عليج انت اطيني
– وعليش اطيك شنهي مخلف جايب انت غير وصلة ابني
– وابنج نقلتي بيه من الشارع قير مني
تكاون وياي اخذ فلوس الفضل مالت ابني وطلع
ودينا لايام الخوالي نكضي يومنا بالحجي المكاطف والكوان
من كون انا جايبة كاعدة من الشغل ما اطلع للاربعين
كمت الكاع نظفتها وزرعتها .. وصارت ايدي بيها
للاربعين رديت لشغلي بالسوك
كمت اخذ ابني مروان وياي من الفجر واشتغل وهو اعلى ايدي
وارد وكت الغروب اغير هدومي واغير هدوم الجاهل واهد صدري اله وانام .. ولثاني يوم نفس المنوال
وعطا ياخذ العربانة ويمشي يشتري المحصول ويبيعه وكل شغل العربانة والمحصول بجيبتو مالي فلس لا انا ولا ابنه ولا يجيب حاجة للبيت كله انه وردينا ( اسمك رجل يهواي من وحشة الليل ) وكلت فدوة كضيت عمري كله انا شايلة الحمل هسه اجي اريد منه خله بس يفكني شره وافتك من حجي الناس ما طوله موجود اطلع ارد اشتغل محد اله غرض ما طول اكو محرم فوك راسي لا يهش ولا ينش اسمه زلمة جدام الوادم .
ليغاد وهم حبلت وزاد ثكلي الجاهل على ايدي ..
وبطني وشغلي .. لسبعة اشهر عد ما وفيت قاسم كتله ( هذا حدي وياك ما اكدر اشتغل اكثر الشغل تعبني وبطني كبرت والجهال ينرادلهم خلك تربيه خوبن انا سايبة وهم سايبين والابو سايب شيطلعون )
كالي : من البيت اشتغلي
– ششتغل من البيت
– افتحيلج مكان وانا احطلج بضاعة واشتغلي بيهن وانت ابيتج وابنج تحت عينج
والله ما كلت باطل جبتلي جينكو وخذيتلي قطعة من البيت وفتحتها مثل السوك الصغير اشكال وارناك ذبيت بيه الفرش الهدوم الصحون .
خواته غير يخلني بحالي
هيجنو علي صار دوبه ودوبي يومي يصيح احرك المحل
كوان لا يخلص ولا ينفض ..
كتله شتريد مني سودت عيشتي شرايد مني
الا يكلي : اريد البيت
– شنهو البيت شتعمل بيه
– الناس كلت وجهي يكولون كعيدي كاعد اليت مرته سجلي البيت باسمي
– لا ومن اسجل البيت باسمك راح تاخذ الوركة وتدور اعلى بيوت الوادم وتكلم سجلته باسمي يول ما تستحي ما تختشي بيتي وتعبي وحيلي احطه باسمك خاطر لا يعايروك شنهي وعايروك يوم الهديتني ومشيت ما خلوا حجي ما ذبو علي والسبة خواتك وين ما يمشن يذبن بغاريث حجي عني وكاموا الوادم حتى بعرضي يطعنون هم كتلك. هم عاتبتك لو صميت ثمي وسكتت .. هاذ بيتي وهاذ حالي يعجبك يعجبك ما يعجبك يا باب يوسع جمل .
طلع من البيت وهدني
بس جتلا العوز والفكر بلاياي ردلي
كام يعيش وياي لا طيخ السانه الساني ولا يكربلي
من كثر الحش والنش البراسه
وانا خيري وشغلي كله بحلكه وبالبيت
طلكت وهم خذتني جدتي ورحت جبت عد الجدة ولد سميته يوسف .. جبت وطلعت السبعة مالت جيابتي والناس وصلتني وهو جلمة المبارك ما كالها .
وانا ما حطيته ابالي ..
جهالي اثنينم جدامي وانا بمحلي اشتغل وايد للمحل ايد للبيت ايد للجهال .. وهو بطرك العربانة طخيت راس وياه وكمت اتوددله بالكلمة الطيبة والاجلة الطيبة واندهله واصيحله
اصطلح وياي شهر
عكب الشهر حسباله انا من توددتله راح يحصل شي
رد فتح موضوع البيت وياي …
من رفضت .. كاطعني كلش
كام لا يجيني ولا يكربني
واعلى حظي بشهر التوددتله بي شلن منه بجاهل
وكضيت التسعة اشهر ما يحجي وياي ولا يكربني هو بصوب وانا وجهالي بصوب اخر
جبت ابني الثالث عمار .. وهو اعلى حاله ما يطخ السانه الساني وهاجرني لا يردني ولا يودني الا اسجل البيت باسمه
اجته ايام كام حتى البيت ما يفي عده خاطر لا يشوفني
وانا بركبتي ثلث ولد هدوا حيلي مدري اركض ورا العيشة مدري اركض ورا الجهال مدري ورا شغل البيت
راحت ايام واجتي اشهور ومرت سنين والحال بيني وبين عطا ما يسر وانكطعت خلفتي منه عبن هاجرني .. وصار بالشهر يلفي مرة ومرتين
ليما سمعت برغوث حجي وحدة مرتلي للبيت
كالتلي : يولي صدك رجلج ماخذ عليج
– رجلي ماخذ علي .. اسم الله منين سمعتي هالحجي
– والله يكولون ماخذ وحدة وحتى يكولون مخلف
نغزت كلبي من كالتلي هيج
عد ما اجا سالته كتله مرة مرتلي وهيج كالتلي
كالي ؛ جذب والوصلتلج شيطانة رايدة تخرب بينا
– شتخرب بينا هو ضال شي عامر خاطر تخربه ؟
نكر كل الحجي بس ضل الفار يلعب بعبي
كمت اركز بيه وادحجه ما ادري ما ميزته
بس من يوم الوصلتله حجي المرة ولليوم كام يلفي للبيت جثير
ليما اجتي جدتي يازي وكالتلي ( عينج اعلى زلمتج جدة )
– سامعة شي تعرفين شي جدة عليش توصيني بيه
– انا ما رايدة اهدم بيتج بس جدة لا تخلين رجلج يضيع من ايدج وتالي الوادم اتشمت بيج اكسبي وارضي وسايري اخير ما يروح بعيد
الحجي كلى كلبي
كلت لاون اتتبعه واعرف شنهو خبره …
جم مرة طلعت وراه بس يوصل للكهوة ويكعد ويا الزلم وارد ما اكتشف شي
عد ما جا قاسم وحجيتلا
كال اني اخلي واحد من الكهوة يتبعه ويشوف خبره
صدك ويتبعه ويجيبلي عنوان بيت هو يروحلا
كضبت عباتي وطريت الدرب خاطر اعرف شنهو الامر
دكيت الباب ..
الا تطلع زبيدة بت خالي خالد سلمت عليها واتلكتني وبيدها جاهلة .. سويت روحي بيدي غراض ومارة منا ودكيت الباب ابيع : شلونج شخبارج شني يمتى عرستي
– كبل سنة
تحجي بس خايفة وحالها ما يعجب
كتلها : بالخير والعافية بس ماي جيبلي يولي نشف ريكي
فاتت تجيب الماي وانا فتت للبيت وراه .. كلت راح الاكي جوا بس ما لكيت شي
اندارتلي بسع خافت من دخلت كتلها : ها عجل وين الماي
– اي اي فد الجاهلة تبجي
حطيت الغراض من ايدي وكتلها : ناوليني الجاهلة يولي وروحي جيبيلي الماي
اطتني البنية ادحج بيها خاف تشبه عطا وتطلع بته بس البنية بيضة سمينة وهي بالكماط مدورة … كتلها : بتج عينا انت حباية ومفشوكة شسمها يولي
تبسمت وكالتلي : اسمها قدس …
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية قلاع الضر)
