رواية ميراث العشق الفصل الحادي والأربعون 41 بقلم مريم نصار
رواية ميراث العشق الجزء الحادي والأربعون
رواية ميراث العشق البارت الحادي والأربعون
رواية ميراث العشق الحلقة الحادية والأربعون
فيلا المنشاوي.
همس : لابسه ونازله ع السلم..
يسرا : قاعده ع السفره ومنتظره رياض وهمس.. وندهت ع الشغاله..فوقية.يافوقيه..!!!
فوقية : جت نعم ياست هانم..!!
يسرا : اطلعي صحي همس. علشان تنزل تفطر.
همس : من وراها.قالت بحماس..
وهموس حبيبتك هنا يايويو..صباح الخير.. وباست يسرا من خدها..
يسرا : ابتسمت..صباح الخير ياهموسه..ايه الجمال ده انتي خارجه ولا إيه؟
همس : واقفه بتاكل باستعجال.. وقالت.. امم.. رايحه شركة المهندس زياد جمال اجتماع مهم.
يسرا : طيب اقعدي افطري ع مهلك..الدنيا مطارتش يابنتي..
همس : بتاكل بسرعه..وقالت..تؤتؤ انا مستعجله جدا.ومبسوطه جداً. الحمد لله مشروعي اتوافق عليه..وهيتعمل ف اسكندريه..واو بجد متحمسه..
وبابي فين؟ لازم يعرف بالخبر الجنان ده..!!
يسرا : بفرحه. الف مبروك ياروحي..يارب اشوفك اشهر سيدة أعمال ف الشرق الأوسط بحاله..
رياض : نازل ع السلم..وقال بتعجب.. اسكندريه.!!!؟
همس : لفت ليه بابتسامه..صباح الخير ع اجمل بابي ف الدنيا..!!
رياض : قعد ع السفره..وقال صباح الخير.وايه موضوع اسكندريه ده؟ ولسه حضرتك فاكره تقوليلي؟
همس : قعدت ع الكرسي ال جمب رياض.
وقالت بمرح…
وانت تعرف عن هموسه بنتك كدا برضه؟ والله انا لسه عارفه حالا.. السكرتيره اتصلت عليا وقالت إن الباشمهندس زياد. عايزني اروح الشركه.. لأن ف اجتماع طارئ الساعه ١ الضهر.وانا بقى بأسلوبي الحيت عليها.. البنت.فرحتنى بالخبر الجنان ده.وقالتلي إن مشروعي اتوافق عليه. والموقع هيبقى ف اسكندريه..واو بجد انا مبسوطه اوى اوى..
رياض : بعدم اقتناع.. مشروع متقدم ف ااقل من شهر..يتوافق عليه بالسرعه دي؟ لأ وكمان حددو الموقع.؟ مش غريبه دي ياهمس يابنتي؟
همس : كشرت عينيها بعدم فهم..غريبه ف ايه يابابي؟ المشروع اتعرض ع اكتر من جهه..واهم حد شاف مشروعي ودعمني وشجعني.هو الأستاذ آدم العدوي..وطنط ساره..وشافو إن مشروعي فيه افكار جديده.ليه حضرتك مستغرب اوى كدا؟
رياض : لأن أي مشروع بيتقدم بياخد فتره كبيره..دراسة جدوى.. وإدارة.ومهندسين..انتي فهماني طبعاً؟
همس : بزعل..ايوه فاهمه حضرتك..بس يابابي لو تفتكر حضرتك بنفسك كنت مبهور بمشروعي.. ولأن حضرتك مجالك بعيد عن المعمار والشغل الهندسي للمنشئات. حضرتك عرضت عليا..انك تمول مشروعي ع حسابك الشخصي. وده كان سهل جدا ليا..لكن انا حبيت اعتمد ع نفسي.. والمشروع اتوافق عليه لأنه مشروع مربح وجديد..مش لأن مدام ساره الصاوي تعرفني شخصيا..او اني اتعرفت ع شخصية آدم العدوي..ولا حضرتك ليك رأي تاني؟
رياض : بخنقه..انا مقصدش كل ده..انتي اصلا ناسيه نفسك..ومتجهه لمجال الأعمال..وغير كدا تقدري تقوليلي..نظام شغلك هيكون إزاي ف اسكندريه؟
همس : عادي جدا يابابي..انا هسافر مع العمال والمهندسين..عشان اتابع المشروع..اكيد حضرتك فاهم طبيعة الشغل..
رياض : بسخريه..اااه طبيعة الشغل؟ طيب اقدر اعرف بقى بنتي هتسافر ازاي لوحدها؟
همس : بإستغراب..لوحدي إزاي؟ منا قولت لحضرتك هيكون معايا العمال والمهندسين المعماريين..
رياض : بصلها بنرفزه..وانتى فاكره اني هوافق انك تسافري مع شباب لوحدك؟ ده مش هيحصل ابدا..
همس : اخدت نفس عميق واتنهدت..تمام حضرتك زي ما تحب..عمو ربيع هيكون معايا..
رياض : بحده..اسمعى ياهمس.. المبدأ ده مرفوض بالنسبالى..تسافري ازاى مع عمك ربيع.؟ ده راجل كبير ف السن ومش هيقدر يحميكي..اسمعي يابنتى انا خايف عليكي..واي اب قلبه هيكون مشغول ع ولاده..وانتى بقى هتسافري مكان تانى وشغل واغلب الموجودين هيكون شباب..ف انا استحاله أوافق؟
همس : بخيبة أمل..طيب حضرتك انا هعمل ايه؟ اخواتى متجوزين وكل واحد مشغول بحياته..ولو قولت ل حضرتك السواق يكون معايا وحراسه برضه هترفض..وانا كدا حلمي هيدمر..وطموحي وشغفى وكل احلامي هتتبخر..
طيب والحل مثلا انك تسافر معايا؟ اكيد صعب جدا..حضرتك يرضيك إن تعبي يروح عشان حاجه زى دي؟..وانا اقدر احمي نفسي كويس..ارجوك يابابي..
رياض : قام وقف وقال بحزم..وانا مش معقول هسيب شغلي واسافر معاكي..ومش هأمن ع اى حد ولا حتى ربيع…لو عايزه تسافري لازم يكون معاكي محرم..غير كدا انا مش موافق..
همس : بدموع بصت ل يسرا..
يسرا : ل رياض..طيب ممكن تهدا وهنوصل اكيد لحل..
رياض : بجمود..الحل موجود..!!
همس : قامت وقفت بتفائل.ايه هو الحل؟
رياض :رشدي بيه..لسه مصمم ع جوزاك من ابنه علي..وكلمنى امبارح. وطلب ميعاد ل زيارتنا..وهيتقدم ليكي اخر الاسبوع..
همس : فتحت عينيها بدهشه..بابي..حضرتك بتقول ايه؟
رياض : زعق..بقول الصح. انتى لحد امتى هتفضلي منشفه دماغك..اكتر من عريس يتقدملك ومستويات عاليه.وترفضي..لحد امتى هتضيعى فرص زى كدا؟
همس : بدموع وزهول ..فرص؟ بابي من امتى وحضرتك بتفكر بالطريقه دي؟
رياض : بخنقه..من دلوقتي..انا مش شايف اى سبب ل رفضك للعرسان..وبتطلعى فيهم عيوب الدنيا..طيب انا وافقتك قبل كده.. وعمري ما اجبرتك ع اى حاجه..لكن دلوقتي.. علي ده شاب طموح جدا ومحترم مافيهوش حاجه تترفض..وعشان انا اكتر واحد عارف مصلحتك ف انا هوافق عليه. وعشان تسافري برحتك هيكون مكتوب كتابك..
همس : بصدمه..مستحيل..بابي انا استحاله اتجوز بالطريقه دي..
رياض : بصوت عالى..هو ف طريقة جديدة اخترعوها للجواز وانا معرفش؟ الراجل داخل البيت من بابه..ومفيهوش عيوب يبقى فين المشكله؟
همس : مسحت دموعها..المشكله انى مش موافقه..
رياض : انا تعبت معاكي..واخر قرار..عايزه تباشري شغلك..يبقى توافقي ع قراري..مش هتوافقي؟ يبقى ممنوع من دلوقتي رجلك تخطي بره باب الفيلا دي..انتي فاهمه؟
همس : هزت راسها بالنفي وعدم تصديق..وجريت من قدامهم وطلعت ع فوق.
يسرا : بعتاب..عمرك ما كنت قاسي ع ولادك كدا يارياض..
رياض : بتعب..بنتك زودتها كتير يا يسرا.. وانا مش لاقي سبب لرفضها بالطريقه دي..وانتي سألتيها اكتر من مره..ومفيش مبرر مقنع قالته..
علي شاب محترم جدا..وابقى غبي لو رفضته عشان طيش بنتك..
يسرا : بصتله بلوم..ايه هتجوز بنتك بالغصب يارياض؟
رياض : اتنهد بخنقه.. انا ال عندي قولته..ولو هي مش موافقه..مفيش خروج للشغل ده تاني..بعد اذنك..وسابها ومشي..
يسرا : هزت راسها بإحباط..وقالت بحزن. فوقية..تعالى شيلى الفطار.
فوقية : جت..بس محدش فطر ياست هانم..
يسرا : بتنهيده..مبقاش ف نفس خلاص
.واتحركت ع اوضتها فوق.
——————بقلمي مريم نصار.
فيلا العدوي.. ف مكتب آدم..
آدم : قام وقف.وقال خلاص أنت وهو؟ عرفتو كل التفاصيل؟
زين : قام.وقال بإعجاب..ايوه وبصراحه انا كدا استريحت..يسلم تفكيرك ياحج..وده المتوقع من حضرتك..
زياد : بإعجاب.طبعا انا منبهر مع أنه فعلا مش جديد ع حضرتك..
آدم : طيب..يلا تعالوا نفطر.وبعد كدا كل واحد ع شغله.
زين : بص ف الساعه..وقال لأ انا هفطر ف الشركه..يدوب الحق تسليم بضاعة مصنع الشوربجي.
آدم : تمام..بس متنساش تتصل ع ضيوفك.
زين : حاضر ياحج..انا هتصل ع مالك ويوسف ورعد وشباب العيله..والبركه ف حضرتك بقى تتصل ع كبار العيله..
آدم : هز راسه تمام.تعالى انت يازياد عشان تفطر معايا..
زياد : بالهنا ياعمي انا فطرت قبل ماخرج.وبص ف الساعه..وقال اوبس ١١ انا عندي اجتماع مهم الساعه ١
آدم : بتفهم..طيب مع السلامه بقى انت وهو. ومتتأخروش ع الغدا.
بعد شويه..ع الفطار..
قاعد آدم ومريم. ومنتظرين رينو و آرين و آركان..
مريم : بتشرب كوباية اللبن وساكته..
آدم : رفع حاجبه بتعجب..وسألها. مالك..؟
مريم : بعدم اهتمام..مفيش حاجه..
آدم : كشر عينيه بعدم فهم..مفيش حاجه؟ وبتقوليها وواضح جدا انك مضايقه وزعلانه.ومن امبارح بعد ما رجعنا وانتي مش عجباني. ف حد زعل أميرتي.؟ قوليلى بس وانا افرمه.
مريم : كشرت عينيها وبصت ليه.. بتعجب..وقالت امممم..بجد هتفرمه؟
آدم : ربع ايديه وسندها ع السفره..وقال..عندك شك ياروح الروح..!!!
مريم : بحنين ممزوج بتذمر..وبعدين بقى..بص بلاش اسلوبك ده..انا اصلا مضايقه منك..!!
آدم : ابتسم..ع تعبير وشها..وقال..مضايقه من دومي امبراطور قلبك؟..طيب دي عمرها محصلت..وايه ال مضايق سلطانة قلبي..
مريم : كشرت عينيها..وقالت اخ منك أنت ومن اسلوبك.الله يهديك يا آدم..
آدم : مسد ايدو ع خدها..ويبارك فيكي ل آدم ياروح الروح..
مش هتقولي بقى..انا ضايقتك ف ايه؟ ولو أني متأكد..انه غصب عني اكيد.
مريم : بغيره..اه شوف سيادتك عملت ايه؟ وقولت ايه..ل نور بنتك لما سلمت عليها امبارح..بقى كدا يا آدم؟ كدا.؟عايز حد تانى غريب هو ال يسلم عليك؟
آدم : ضحك..وباس ع أيدها وقال..هو فعلا حصل..بس انتي عارفه انه هزار. وخصوصاً نور بنتك دي متخصصه ف انها تخضني..
مريم : سحبت ايدها..وقالت بغيظ..هزار؟ ايوه ايوه. وحضرتك ناسي برضه لما نور اول مره لبست النقاب وجت تسلم عليك انت قولتلها ايه؟ قولتلها نفس الكلام.
آدم : بدقة قلب..يااااه انتي لسه فاكره يامريم؟
مريم : بصت ف عينيه..عمري ما انسى أى حاجة تخصك يابو مراد..
آدم : اخد نفس عميق واتنهد..وحط كف أيدها ع خدو..وابتسم ليها وقال. لو ستات الدنيا كلها حوالين آدم..؟ آدم عمره مايشوف غير سلطانة قلبه وبس. ده انتي عمر بحاله يامريم..ايامي وسنيني. حياه كامله..انتي ال بانيتي الإمبراطورية دي.. آدم عمره ما يفكر ف خيال غيرك.. آدم من المستحيل انه يموت غير ف حضنك..
مريم : شهقت..وحطت أيدها ع بوقه..وقالت بدموع..بس يا آدم بس. ايه ال انت بتقوله ده؟
آدم : بتنهيده..بقول الحقيقه..انا عمرى ماحسيت بنفسي غير ف وجودك يامريم..
مريم : دموعها نازله..وقالت حبآ ف الله متقول كدا تاني يا آدم. ربنا يبارك ف عمرك.. حبا ف الله متقولها تاني انا اموت من غيرك..
آدم : مسح دموعها. وباس جبينها..حقك عليا انا مقصدش..انا ال قصدته من كلامي ليكي..انك بدايتي ونهايتي..
وكمل بمكر. بس انا خطير قدرت اغير الموضوع ف ثانيه واحده..وضحك.
مريم : غصب عنها ضحكت..وقالت الله يجازيك كل خير يا آدم..
آدم : بص ف عينيها وقال. جزاني سلطانة آدم..
——————بقلمي مريم نصار.
فيلا السيوفي.
ف اوضة چود..
قامت عشان تنزل تفطر.وحست بتحسن..
ولبست.بنطلون وبلوزه..وواقفه قدام التسريحه..بتسرح شعرها..وافتكرت جنون مصطفى..وضحكت بصمت. وافتكرت البوكس..
وشهقت. وقالت ينهار ألوان..انا ازاي راح عن بالي اشوف حاجه زي دي؟
وجريت بسرعه وقفلت الباب بالمفتاح. واتحركت وجابت البوكس.وقعدت ع طرف السرير..وابتسمت بحماس. وعندها فضول كبير..تشوف المجنون ده جايب ليها ايه؟
چود : بتفك ورق الهدايا..وقالت بفرحه..ياااه أخيراً الواد ده بقى بيفهم..كنت حاسه إن مخه..مخ عيل صغير..بس لأ انا طلعت ظالماه..وكدا خلصنا الورق..نفتح بقى البوكس. وضحكت بصمت..وفتحت البوكس..!!!
وفتحت عينيها بدهشه.وقالت اييييه داااه.!!!؟
الصباره الراقصه..!!!؟
وكملت بانبهار.. الله انا كنت هموت عليها.
وشالت الصباره من البوكس.وكان ف ظرف ملزوق ع العلبه..وشالت الظرف وفتحته..وكان جواه جواب..
حطت الصباره ع السرير.. وكشرت عينيها بتعجب..وفتحت الورقه.. ومكتوب فيها..
مصطفى : يامساء العناب.ماتيجي نكتب الكتاب.
چود : هههههههه..عيل طاقق..
مصطفى : بت ياچودي. عامله ايه.انا جبتلك الصباره الراقصه يابت عشان تقولي يابوصطفى براحتك ههههه… ع الله يطمر فيكي..
المهم بقى اسمعي الكلام واعملي زي ما هقولك.. ودلوقتي شغلي الصباره..
چود : ضحكت..وقالت..يابن المجانين؟ وشغلت الصباره..
ورجعت للجواب..وكملت قرايه..
مصطفى : شغلتيها صح؟..تمام اوي كدا..
قولى بقى بحبك يامصطفي..
چود : ضحكت بتنهيده..وقالت..بحبك يامصطفي.
الصباره : بتقلدها…بحبك يامصطفي..
چود : ضحكت بسعاده..وكملت الجواب..
مصطفى : ودلوقتي بقى..قولى بحبك يامصطفي اكتر من الباي والتراي. وعضلة القلب اهم من الفورمه..
چود : ههههه..بحبك اوى يامصطفي اكتر من الباي والتراي.
الصباره : هههههه..بحبك اوى يامصطفي اكتر من الباي والتراي.
مصطفى : طيب قولي..قاسي قاسي قاسي وجرح احساسي راح اسيبه يقاسي وهبكي عينيه.
چود : ضحكت بسعاده كبيره..والصباره بتقلدها..
مصطفى : الف سلامه عليكي ياتراب القمر.خلي بالك من نفسك يابت.بحبك.
امضاء مصطفى..
چود : ضمت الجواب لقلبها بابتسامه.. وقالت.. بحب جنونك اوى يامصطفى.
الصباره : بتقلدها..
چود : حطت الجواب ف البوكس..ومسكت الصباره..وقالت..بحبك ياتيفا..
الصباره. بترقص وبتقلدها..
چود : نسيت الوقت. وقعدت تتكلم والصباره تقلدها..وكان قلبها مبسوط جدا..بحب وجنون مصطفى..
«بعد فتره»
ف الجهاز..ف مكتب مراد..Автор: Меріам Насар
مراد : بيتكلم ف الفون مع آدم.بيطمن ع فريحه والعيله.وقال..
تمام ياحج.. إن شاء الله بعد الشغل هاجي ع البيت.. مع السلامه..وقفلو..
فهد : خبط ودخل.وقعد ع طرف المكتب..وقال ايه يانجم.. عامل ايه دلوقتي.؟
مراد : مسح وشه بايديه..وقال..انا تمام يابرنس..وبعد الشغل هنرجع ع البيت..
فهد : تمام..انا هتصل ع رينو..وهعرفها اننا مسافرناش..
مراد : هز راسه باقتناع..فعلا لازم يعرفو عشان مايتخضوش اول ما يشوفونا..لانه مش من المتوقع تاني يوم سفر نبقى قدامهم فاجأه..
فهد : وده الل انا اقصده..
مراد : بتنهيدة اشتياق لفريحته وتالين.. إن شاء الله..!!
«ف ألمانيا. ف المستشفى»
والدة كامليا واسمها ماجده.. دخلت تتطمن ع جوزها عبد الباري..
ماجده : صباح الخير.. ايه ياعباده عامل ايه دلوقتي..!؟
عبد الباري : بتعب شديد وهمس بصوت مرهق..ال… الحمد لله ياماجده..
ماجده : ربنا يشفيك إن شاء الله..
عبد الباري : مش قادر يكح..وقال..هو احنا هنرجع مصر امتى؟
ماجده : لسه بدري..الدكتور قال ٤ شهور فترة نقاهه.يعنى قدامنا حوالي شهرين ونص..وترجع تنور بيتك ومصنعك من تاني..
عبد الباري : بيأس..مش باين ليها رجوع ياماجده.
ماجده : متقولش كدا..ربنا يخليك لينا ولبنتك..
عبد الباري : بلع ريقه بتعب..هي فين؟ كا….كامليا فين؟
ماجده : بنتك ف الاوتيل..واتصلت عليها من شويه ويتنج.ومتصلتش عليا..ارتاح انت ولما تيجي هخليها تدخل تطمن عليك..
عبد الباري : بتعب..هي لسه ف الفندق لوحدها ياماجده؟ كدا غلط عليها..
ماجده : نفخت بخنقه..بقولك ايه..متشغلش بالك أنت..انا بنتي ميتخافش عليها..
وقامت وقفت..وقالت هروح اشوف أخوك محسن جه ولا لسه..وخرجت.
عبد الباري : غمض عينيه من التعب. ونام..
ماجده : بتتصل ع كامليا..مبتردش..
محسن : جه صباح الخير يامرات اخويا..
ماجده : صباح الخير..يامحسن.
محسن : اخويا عامل ايه انهردا؟
ماجده : زي كل يوم..ربنا يعدي الفتره دي بسلام.
محسن : كشر عينيه..مالك يامرات اخويا..شكلك مشغوله بحاجه..
ماجده : نفخت بخنقه..كامليا يامحسن. البنت بتصل عليها امبارح وقافله فونها..وبتصل عليها من ساعتين تقريباً..كانت ويتنج ومتصلتش عليا..ورجعت اتصلت عليها تاني..مردتش عليا..
محسن : بتعجب..لا كدا مش حلو خالص. يبقى ف حاجه..
ماجده : لا طبعا. مفيش حاجه هي بس مبقتش تحب جو المستشفى..
محسن : بتريقه..يامرات اخويا..انتي عارفه بنتك كويس. عصبيه ومتسرعه.ومتدلعه..
ماجده : بحده..انا بنتي مش متدلعه يامحسن.
محسن : متزعليش مني يامرات اخويا..انا اه اصغر منك..بس انا كنت عايش وشايف تربيتك انتي واخويا ليها..كل ال تحتاجه كامليا تاخده حتي لو مش من حقها..انتي تعملي المستحيل عشان محدش ف بنات العيله يبقى احسن من بنتك..لحد ماكبرت ع كدا تاخد من غير ماتدي. ودلوقتي بقت بتعلى صوتها عليكى واهو بتتصلي عليها وهي ولا هنا ..وانتي السبب ف كل ده..
ماجده : بصتله بغيظ..انا رايحه اطمن ع بنتي..
محسن : طيب متزعليش منى. وانا هاجي معاكي نطمن عليها سوا..
ماجده : سابته ومشيت…
ومحسن مشي وراها..وزعلان ع اخوه..
«بعد شوية»
وصلو الفندق..وطلعو غرفة كامليا..يخبطو عليها. ومحدش فتح..
محسن : نزل بسرعه..وجابو نسخه تانيه مع عامل وطلع معاهم فتح ليهم الباب..
ماجده : داخله تبص يمين وشمال..وندهت.. كامليا..!؟ كامليا؟
محسن : دخل اوضه ملقهاش..وقال يمكن خرجت؟
ماجده : ببرود..انا هتصل تاني عليها..وطلعت وفتحت الفون ورنت عليها..والفون كان ع الأرض.قدام باب الحمام..
محسن : قرب بسرعه ع الفون..ونزل جابه..واتعدل وبص ل ماجده بقلق…
ماجده : استغربت..وبصت ع باب الحمام..وجريت بسرعه فتحت باب الحمام..واتصدمت..وشهقت بصوت عالى.. كاملياااااا…!!!!!
كامليا : قاعده ف ركن ف الحمام.وهدومها كلها مايه.بتترعش. ومرعوبه. وبتكلم نفسها بهمهمه وهيستريا..وبتقول.. لأ انا بريئه..انا معملتش حاجه. هو السبب.لا انا بريئه.انا..ا.انا كامليا عبد الباري.مش جاسوسه. مين..!؟ مين الديزل!؟ لأ مش هتاخد من عمري..مش هتقتلني..الراجل.. الراجل..
لأ لأ اغتصبني..محدش يضربني..محدش يحط عليا تلج..وزعقت محدش يقرببببليييي..
الباب اتفتح عليها..خافت وكلبشت ف نفسها بخوف..وشافت ال جاي عليها مش امها.لا شافتها كأنه الشاب ال حاول يتهجم عليها..وصرخت.. لأ لااااااء..ابعد عنننننني..
ماجده : اتصدمت من شكل كامليا.
محسن دخل جري..واتصدم اكتر..وقرب من كامليا..وقال.بخوف..كامليا..كامليا..ايه ال حصلك..
كامليا : راسها بتترجف..وبتبص يمين وشمال وخايفه..وبتقول انا معملتش حاجه. انا معرفش حاجه..معرررررفش حااااااجه..واغمى عليها..
ماجده : صرخت بنتااااي..
محسن : شالها بسرعه..وخرج من الحمام. ونيمها ع السرير..
وقال ل ماجده..غيرى لبنتك هدومها..وانا هنزل اشوف ايه ال حصل بالظبط..
وخرج ونزل بسرعه..
ماجده : بتعيط..وجابت لبس وبتغير ل كامليا..وبتفوق فيها..ومش عايزه تفوق..
مدير الفندق..طلع مع محسن..وشاف حالة كامليا..وقال..
ابنة حضرتك خرجت من هذا الفندق أول أمس ولم تعود حتى اليوم عند الساعه السادسه صباحا وكان من الواضح عليها انها في حاله مذريه من السُكر والتيه وكأنها نائمه وكانت بصحبة صديقتها..
وعندما سألت صديقتها..قالت لي أنهم كانو منذ ليلة أمس ف الديسكو..وعند عودتهم تعرضو لحادث مروري بسيط.. وذهبوا للغرفه. وبعد ساعه تقريبا ذهبت صديقتها..
محسن : بصدمه..ديسكو..!!! وصحبتها؟ وقال للمدير..ولكن هي زائره وليس لها أي أصدقاء هنا..
المدير : حسنا هذا ليس من شأننا..استمحيني عذرا.انا ذاهب لعملي.. وسابهم ونزل..
ماجده : بصت ع ملامح كامليا بصدمه..وهمست حادثه..!!!!
——————بقلمي مريم نصار.
«بعد شويه»
ف شركة زياد جمال.
ف غرفة الاجتماعات..الساعه ٢
زياد قاعد مخنوق..عشان همس محضرتش الاجتماع.
وكمان ياسين مضايق وقلقان عليها..ومش عارف يتصل عليها وسط الموجودين..
المهندسين.بعد فتره من الانتظار..استأذنو وقامو وخارجين..
زياد : بنفاذ صبر. قال ل ياسين..بخنقه..انا ماينفعش معايا النظام ده.
ياسين : بقلق. اكيد يابابا ف سبب إنها متجيش..حضرتك متعرفش هي كانت متحمسه قد ايه؟
زياد : بحده..ياسيادة الملازم.. ده اسمه بيزنس..وهمس لسه بتحط رجليها ع اول الطريق..وده كان اجتماع مصيري بالنسبة ليها.. ولو كان حصل معاها اي مشكله.او سبب قوي لعدم وجودها..كانت ااقل حاجه..تتصل ع السكرتاريه..او سيادتك..واعتذرت..واحنا كنا هنتفهم الموضوع..ونعتذر للمهندسين.. إنما ده مش نظام شغل..
ياسين : بحيره.. عندك حق تماما..بس انا عايز من حضرتك تهدا.وانا هعرف ايه ال حصل بالظبط..وايه المانع ال خلاها متجيش.
زياد :قام بجمود..وخبط ع التربيزه.وقال.. وحضرتك بقى هتسيب شغلك ف الشرطه بعد كده..وتيجي تتابع ظروف الاستاذه همس؟ انت ناسي انك بعد تلات شهور هتستلم شغلك ف الشرطه؟
ياسين : قام وقف. وقال. بابا انا مقدر موقفك واحراجك مع المهندسين..
لكن ال انا متأكد منه.. إن همس مجتش لسبب قوي.. حضرتك متعرفش همس قدي. هي حلمها الوحيد.. إن المشروع ده يتنفذ..
زياد : رفع حاجبه بمكر..وقال..امم معرفش همس قدك؟
ياسين : بلع ريقه بتوتر.اء انا قصدي انها يعني بتحب شغلها..و….
زياد : بخبث..اعرفلي سبب عدم وجودها.
يا…سيادة الملازم مقدماً..وسابه وخرج ع وشه إبتسامه..من لخبطة ابنه.ودفاعه عن همس..واعجابه الواضح عليه..
ياسين : نفخ بخنقه.. وبعدين معاكي ياهمس..انتى ملخبطاني معاكي..وطلع فونه واتصل عليها…
——————بقلمي مريم نصار.
فيلا المنشاوي..
رياض : اتصل ع يسرا..وقال بخنقه..همس عامله ايه دلوقتى يايسرا؟
يسرا : بزعل..همس بنتك من وقت ما انت خرجت.وحابسه نفسها ف اوضتها..
رياض : بزعل من نفسه..طيب خبطي عليها..واتكلمي معاها..
يسرا : بلوم..خبطت عليها..لكن هي رافضه تفتح لأى حد..حتى مرات ابنك..جت وحاولت معاها..لكن هي رافضه.. وأنت اكتر واحد عارف إن همس مبتحبش تزعل حد فينا..انت ليه يارياض عايز تطفي بنتك…!!!
رياض : بعتاب..هو ده ال انتي فهمتيه من تصرفي؟ بنتك بتكبر يايسرا..بنتك جالها عرسان كتير..وع طول رافضه.. وانتي بنفسك جت عليكى فتره كنتى مضايقه من رفضها الغير مبرر.. ودلوقتي بنتك عايزه تسافر لوحدها..ترجع بقى بليل أو الفجر هتقول شغل.. بس الناس مش هتقول شغل يا يسرا.. الناس مبترحمش..الناس مابتسبش حد ف حاله. وغير كدا انا ماينفعش أوافق ع حاجه زي دي.انتي ازاى موافقه؟
يسرا : بتنهيده.. انا مفكرتش ف كل ده.. وعموماً لما تهدا انا هتكلم معاها..بس انا عايزه منك تأجل موضوع العريس ده..
رياض : بجمود..مش هيحصل يايسرا..وفهمي بنتك انها لو موافقتش عليه.مفيش سفر لوحدها أبدا..وهي حره..!!!
«ف اوضة همس»
قاعده ع السرير.. ودموعها نازله لأول مره بحزن كبير..وبصت ع الساعه وكانت ٢ وربع. وحضنت ركبها وغمضت عينيها بيأس وقلة حيله..حلمها بدأ بالانهيار..وهمست ياسين…!!!
فونها رن..ومسحت دموعها..وجابت الفون من ع الكمود.. وشافت رقم ياسين..وحطت أيدها ع بوقها وبتعيط بشهقات..ومردتش..
ياسين : قلبه بيدق بقلق..واتصل عليها تاني..
همس : عاطفتها غلبت حزنها. وردت عليه.. بإحتياج..وهمست بصوت موجوع..ياسين..!!
ياسين : حس بيها انها مش بخير..وقال بقلق بالغ..همس مالك؟ انتي بتعيطي؟
همس : مسحت دموعها..وحضنا ركبها بايدها..وحاولت تبتسم لكن صعب..وقالت لأ.ا.انا مبعيط…..!!!!
ياسين : قاطعها..وقال لأ انتي صوتك معيطه..وواضح جدا كمان..همس قوليلى مالك؟
همس : بحزن حقيقي..انا آسفه اني مجتش الاجتماع..ا.انا…..!!!
ياسين : بنفاذ صبر..يستي يولع الإجتماع..همس قوليلى مالك.؟
همس : بدقة قلب ودموع..انا محتجالك اوي يا ياسين..
ياسين : بتنهيده.مش اكتر من احتياجي ليكي ياهمس..وياسين جمبك ومعاكي..بس قوليلى بقى مالك..انا قلبي مشغول عليكي..
همس : حست بالإحتياج.. وإن ياسين هو الوحيد ال هتحكيله من غير قلق لانه أمنيتها ف الحياه وقالت..
بابي يا ياسين..!!
ياسين : كشر عينيه بعدم فهم.ماله..؟
همس : بدموع رفض اني اكمل المشروع..غير لما….!!!!
ياسين : غير لما ايه ياهمس اتكلمي..!!
همس : أخدت نفس عميق واتنهدت..انا هقولك ع ال حصل الصبح…انا بعد ما قولت ل بابي ع المشروع…………………!!!!!
ياسين : بيسمعها بكل تركيز…لكن قلبه اتقبض. لتاني مره..
.اهم فرصه ممكن تروح وتضيع من قلبه قبل ايديه…!! وخصوصاً المرادي..
.لأنه حب بجد مش انبهار ولا إعجاب.. لأ. دقة قلبه ليها جايه من المنتصف.. إحساس جديد.وحب حقيقي. خوف حقيقي من خسارتها..
همس : مسحت دموعها..وقالت..وده سبب إني مجتش الاجتماع..انا بجد بعتذر عن….!!!
ياسين : بحنين ووجع..انتى هتوافقى ع العريس ده..!!!
همس : بنفي.. لأ مستحيل.
وكملت بلوم..انا مش عايزه اتجوز بالطريقه دي. انا نفسي….!!!
وسكتت لانها اتكسفت…!!!
ياسين : وقف قدام الشباك وحط ايدو ف جيبه..وقال..نفسك ف ايه يا همس.؟
همس : رجعت بضهرها ع السرير..وقالت بنبره بتتمنى حبه ليها..نفسي احب واتحب..نفسي اتجوز عن حب يا ياسين…
ياسين : غمض عينيه واتنهد..وقال طيب ممكن أسألك سؤال..
همس : اكيد اتفضل.
ياسين : انتي….!!! انتي ف حد ف حياتك..!!
همس : ………..سكتت.وقلبها بيدق ليه وبس.
ياسين : بوجع..همس اتكلمي..لاني مش هتحمل خسارتك.!!!
همس : فتحت عينيها بدهشه..وانفاسها اتلخبطت وهمست.بارتباك..تق..تقصد ايه يا ياسين؟
ياسين : سمع صوت ارتباكها..وغمض عينيه.واتاكد إن الشعور متبادل بينهم.. وابتسم..
وقال بمكر .بس تعرفي إن والدك معاه حق..!!
همس : اتغاظت انه غير الموضوع..وقالت بخنقه..والله معاه حق ازاى بقى؟
ياسين : ضحك بصمت ع رد فعلها..وبقى ع يقين انها بتحبه..
وكمل وقال. بجديه..والدك خايف عليكي ياهمس..فعلا ماينفعش تسافري لبلد تانيه لوحدك.. ومع شباب حتى لو شغل..لازم تكوني ف أمان. لازم يكون حد من عيلتك معاكي..
همس : باقتناع.طيب وانا اعمل ايه يعني؟ بابي ف الشركه..واخواتي كل واحد ف شغله وحياته الخاصه.. أعمل ايه انا بقى؟اروح اشتري اخ ؟
ياسين : ضحك بصمت وحب يختبرها.. لأ. تعملي انك توافقي ع قرار والدك..
همس : بغيظ كبير..اوافق…!!! يعنى احطم حلمي ومخرجش من باب البيت؟ هو دا ال انت عايزني اعمله ي ياسين…!!!؟
ياسين : بخبث.. لأ انا قصدي انك توافقي انك تتجوزي…!!!!
همس : صكت ع أسنانها بغيظ كبير..وقالت بنرفزه..
انت البعيد ايييه مابيفهمش.؟ انت شايل قلبك ده وحاطط مكانه حجر.؟
انا مش هتجوز فاهم..وبما انك مش فاهم يبقى انا شكلي هاعنس احسن..وسلام بقى اقفل ومتتصلش تاني..
وقفلت المكالمه ف وشه…!!! وحدفت الفون بغيظ..وقالت بتريقه ممزوجه بغيظ..
.قصدي انك توافقي تتجوزي..اه ما انت مش خسران حاجه.. ما انت لو بتحس كنت حسيت من زمان..وصكت ع أسنانها بغيظ واضح..انا بكرهك يا ياسين.بكررررهك..!!! غبي.!!!
ياسين : من رد فعل همس وأنها قفلت المكالمه..رفع حاجبه بتعجب..وبعدها ضحك من قلبه ع همسته..
——————بقلمي مريم نصار.
ف ألمانيا.
كامليا فاقت..وفضلت ع نفس الحاله..بتهمس بكلام مش مفهوم..وخايفه..
ماجده : بقلق. وبعدين يامحسن..كامليا واضح عليها انها مصدومه من وقت الحادثه..
محسن : بحيره.مش عارف يامرات اخويا..وكمان لو اخويا عرف بحاجه زي كدا ف حالته دي ممكن يجراله حاجه..
ماجده : بصت ل كامليا..وقالت كامليا يابنتى..ردي عليا..قولي حصلك ايه؟
كامليا : بهمس غير مفهوم..قالت. الديزل..هيقتلني..هيقتلني..انا معملتش حاجه..مش جاسوسه..محدش يقرب مني..انا بس ال انتقم منها..انا ال خوفتها..وافتكرت التلج..وشهقت بخوف..وقالت بصوت مسموع.. معملتش حاجه..والله معرف دي فلاااشة اييييه؟
محسن : نفخ بحيره. ومش عارف يعمل ايه..وقال كامليا بقالها كام يوم متغيره..
ماجده : بدموع..ايوه لانها كانت عايزه تنزل مصر ضروري..وانا رفضت عشان متقعدش لوحدها..
محسن : هز راسه تمام..يبقى انتى تاخدي بنتك وتنزلي ع مصر بكره..وتشوفيلها دكتور..
ماجده : طيب وعبد الباري..!؟
محسن : بتنهيده..انا هكون جمب اخويا..بس انتي لازم تعرفي كامليا مالها.
ماجده : مسدت ع شعر كامليا ال بتترجف وكأنها مرعوبه..وقالت حاضر..من بكره هنكون ف مصر.
——————بقلمي مريم نصار.
الساعه ٣ ونص.
ف جنينة فيلا آريان..وعمارة العيله..
آرين : خارجه من العماره.. ومعاها برطمان نوتيلا..وماشيه ف الجنينه.. وقعدت ع طرف البيسين..ونزلت رجليها ف الميا..وبتاكل نوتيلا بنرفزه..وعيونها فيها لمعه..
وهي بتاكل بصت ع غطا النوتيلا..مالقتش إسم آدم..واتخنقنت اكتر..وحاسه بالملل..وحطت النوتيلا جمبها.وبصت للميا.وقالت بإحباط ممزوج بخنقه..
يعني بابي سافر ومعرفش هيرجعلي امتى.؟
و آركان ف الجيم وكلها كام شهر ويسبني ويروح الكليه..
..وتيم شكله نسيني خلاص..وميرو وحشاني اوي..
وليليان وتيما..بجد البيت مش حلو خالص من غيرهم..
حتى آريان وكريم..كلهم وحشوني. هو الشهر ده مش هيخلص بقى..ويرجعو.؟وا….!!!
واتنهدت بحنين..و آدم..!!! آدم سافر دهب ومحاولش يتصل يكلمني..ولا حتى فتح نت..طيب..هو ازاي كدا.؟ ازاي قلبه جامد جدا كدا..
تؤ..انا مش عارفه ايه ال بيحصلي.؟انا حاسه اني عايزه اعيط..
البيت من غير بابي و آدم وحش اوي..طيب انا ليه بفكر كتير ف آدم..مع أنه ع طول بيزعلني.؟
ومسكت النوتيلا..وقالت ليها.. آدم ده مرعب..ومش عايزه افكر فيه..
.هو أصلا لو شايفني ضيه كان طمني عليه..مرعب جدا بجد..انا زعلانه منه ومش هكلمه تاني..ومش هفكر فيه تاني..!!!!
ورفعت معلقة شوكليت تاكلها..لكن مالهاش نفس للأكل..
.وحطت النوتيلا تانى.جمبها..ومسكت السلسله وبصتلها..كانها بتشتكيلها من إن فراق المرعب صعب عليها..وغمضت عينيها..بحنين..وقالت.. أنت فين يا آدم….!!!!!
آدم مراد : قعد جمبها.ونزل رجليه ف الميا. وقال بإشتياق..انا جمبك ياضي آدم..
آرين : كشرت عينيها وهي مغمضه..وقالت بتذمر طفولي..
اهو انا بتخيل صوته اهو..وبعدين بقى.؟ خلاص يا آرين انسي المرعب ده ومتفكريش فيه تاني..
آدم مراد : بشبح ابتسامه..قال..ماينفعش متفكريش فيا ياضيي. او بالأصح.ماينفعش تفكري غير فيا.!!!
آرين : فتحت عينيها بزهول..وبصت جمبها..وتنحت للحظات…
آدم مراد : رفع عينيه ليها وقد ايه كانت وحشاه. وقلبه بيدق ليها.
آرين : بتهمس بزهول.. آدم..!! وبعدها..كشرت بزعل.وقالت ل نفسها..شوفتي بقى يا آرين؟ قلة الاكل والتفكير ف المرعب..بقيتى بتتخيلى انك بتسمعي صوته.. لأ وكمان بتتخيلى شكله قدامك.هتتجنني انتي..
آدم مراد : ابتسم بحب..وقال..انا جمبك يا آري.
آرين : اتكلمت ع أساس أنه خيال..وقالت.بعتاب..انت ازاى تسافر من غير ما اشوفك.؟.انت ليه بتعمل كده معايا.؟
آدم مراد : ل عينيها..مقدرش اشوف عيونك وهي زعلانه ياضيي.. وغصب عنى وده طبعي.
آرين : بغيظ وطفوليه…اه طبعك منا عارفه..طبع زي الزفت..
آدم مراد : غمض عينيه بغيظ…صك ع اسنانه وبيحاول مايتنرفزش عليها..
آرين : شافت ملامحه.ورغم انها متخيله أنه خيال.؟
لكن خافت .وقالت بلخبطه..اء..طيب عاجبك انى أتخيلك دلوقتي انك قاعد جنبي..وكمان رجليك ف الميا.؟ لأ انا مش طبيعيه صح يا آدم..!؟
آدم : مسح وشه بايديه.وبص بعيد.. ومردش.
آرين : بتذمر طفولي..بارد حتى ف الخيال بارد ورخم.
يا ما نفسي اديله بوكس ف وشه اعدل بوزه ده..ع رأي خالو مراد..وحمه سودا..
آدم مراد : بتحذير..انتي بتقولي ايه يا آرين؟
آرين : نفخت بنفاذ صبر.وقالت ل نفسها .يووووه بقى حتى ف الخيال بيزعقلي.. لأ لأ.مش معقول كدا.
آدم مراد : بجمود..بصيلي يا آرين..!!
آرين : بنرفزه وغيظ لفت وشها ليه.. وعينيها اتقابلت ف عينيه. وقالت بعتاب.. أنت هترجعلي امتى يا آدم؟
آدم مراد : بص ف عينيها..انا رجعتلك يا آرين. انا جمبك ومعاكي وحواليكي..
آرين : ببراءه..اقولك ع حاجه؟
آدم مراد : هز راسه ليها..قولي.
آرين : بحرج..سعات بحس إنك ف الهوا ال بتنفسه.
آدم مراد : كشر عينيه..ف الهوا..؟
آرين : هزت راسها بطفوليه.. اممم ف الهوا..يعني لما انا بتنفس وانت معايا بحس اني كويسه. زي دلوقتي..متخيلاك قدامي وبكلمك.
لكن وانت بعيد عني ببقى مش عارفه اتنفس كويس..وببقى مخنوقه ومضايقه..يبقى انت ف الهوا ال بتنفسه.صح يا آدم..؟
آدم مراد : بدقة قلب صح ياعيون آدم.
آرين : وشها بقى احمر جدا..وقالت بكسوف..شوفت بقى انا اتكسفت ازاي وانا بقولك الكلام ده.؟
لانه ماينفعش يتقال..بس انت خيال دلوقتي.وقولتلك بس عشان ده يبقى سر بينا..
ولما المرعب يرجع مش هيعرف اني قولت كدا..صح يا آدم..!!!
آدم مراد : ابتسم بصمت.. وهز راسه بيأس من طفلته الأولى والاخيره..
آرين : مسكت النوتيلا..وبتاكل بحماس. وقالت تعرف انا كنت مش جعانه..بس لما شوفتك دلوقتي انا بقيت كويسه..واخدت معلقه..وغمضت عينيها. وبتتذوق الشوكلاته وقالت امممم جميله..
آدم مراد : اول ما آرين غمضت عينيها..قام ف لمح البصر. ومشي بخفة رجل بسرعه.واستخبى ورا الشجره ال وراها…عشان مايحرجهاش.. وأنها قالت ال ف قلبها. ل خيال آدم.!!
آرين : فتحت عينيها بابتسامه..وبتقول عارف أنت لو مش خيال كنت قولتلك شاركني ف النوتيلا..ولفت ليه..بس ا…..!!! واختفى…واتنهدت بخيبة أمل..وقالت ياريتك كنت موجود بجد يا آدم..!!!
——————بقلمي مريم نصار.
بعد شويه.. فيلا العدوي.. العيله كلها بدأت توصل ع فترات..
«ف اوضة فريحه»
فريحه : بتلبس الحجاب..وفونها رن وكان رقم مراد..واستغربت انه رقمه الخاص..لكن ردت بلهفه..وقالت بإشتياق..الو مراد حبيبي..
مراد : ابتسم بفرحه..لانه سمع صوتها بخير..وقال بمرح. قلب مراد يابت يا فريحه..عامله ايه؟
فريحه : ضحكت بدموع الفرح..انا كويسه جدا دلوقتي ياروح قلبي..ومش ناقصني غيرك..
مراد : بحب..وانا كلها ساعه واكون قدامك يافريحتي.
فريحه : تنحت..وقالت مش فاهمه.؟
مراد : بضحكه..يعني مسافرناش يابت.المأموريه اتأجلت..
فريحه : شهقت بسعاده..وقالت بجد يا مراد.؟ بجد والله؟ ده اجمل يوم ف حياتي.
مراد : بمكر..اممم يابنت كوم الشكاير.. كل يوم وانا معاكي بيكون جميل يابت..
فريحه : هههههه طبعا ده كل ثانيه ف وجودك ياقلب فريحه بيكون عيد بالنسبالي.
مراد : بتنهيده. تالين عامله ايه يا فريحه.؟
فريحه : بفرحه..تالين كويسه جدا الحمد لله..هي دلوقتي ف اوضتها بتلبس.
وكمان عايزه اقولك إن آدم رجع من دهب وبيغير هدومه.
وميرو لسه مكلمينها فيديو..بجد انا مبسوطه اوى اوى يامراد. انت هتيجي امتى.
مراد : بدقة قلب..خلي صوتك ع طول مبسوط كدا يافريحه..
متعرفيش انا ببقى مرتاح قد ايه.لنبرة صوتك وهو مبسوط. فريحه انا بحبك..
فريحه : بدقة قلب وحنين. وانا بعشقك يامراد.
ف غرفة آدم مراد.Автор: Меріам Насар
آدم مراد : خارج من الحمام..ولابس بنطلون فقط..وبينشف شعرو..
الباب خبط خبطتين بهدوء..
آدم مراد : كشر عينيه بتعجب.لانه مش متعود ع حد يخبط كدا..وهمس بابا آدم معقول؟ واتحرك بسرعه.وفتح الباب..
آدم : ابتسم..ممكن ادخل ياحفيدي الغالي.؟
آدم مراد : بترحيب..طبعا طبعا..اتفضل حضرتك..
آدم : دخل ووقف ف نص الاوضه.ولف لحفيدو.
آدم مراد : بسرعه اخد التيشرت عشان يلبسه.
آدم : مسك التيشرت من حفيدو.وبص ع صدرو ودراعه.
وقال بشك..امم واضح إن بشرتك ضد الشمس والبحر..وجسمك متأثرش مع العوامل الطبيعية.. وبص ل عينيه بتحذير..ولا ايه ياحفيدي؟
آدم مراد : غمض عينيه وصك ع اسنانه..ولعن نفسه ع غباءه.. ولأنه كان غضبان معملش حساب للخطوه دي.. وخصوصاً قدام الامبراطور..
آدم : ساب التيشرت ل حفيدو..وقال..ف حجات كتير بتبقى غامضه ف حياتنا..وف حجات كتير انا عن نفسي عملتها وخبيت ع عيلتي..وده عشان المصلحه العامه. ومصلحة عيلتي كانت دايما وابدا هي ف المقام الأول عندي. يعني انتو قبل شغلي وقبل مستقبلي.. لأن مستقبلى هشوفه فيكو انتو يا احفادي.. وخصوصاً أنت يابن الغالي..
آدم مراد :بيلبس التيشرت..وفهم إن جدو شك ف موضوع سفرو المفاجئ.ورجوعه المفاجئ..وبيهرب من عينيه..
آدم : هز راسه لانه كدا أتأكد إن شكه كان ف محله.. وقال بنبرة أمر..كنت فين يا آدم…!!!؟
آدم مراد : قبض ع ايديه..وقال بجمود..كنت باخد جزء من حق اختي يابابا…!!!
آدم : غمض عينيه بتعب واتنهد..وقال بعتاب..وانا قولتلك قبل كدا أبعد نفسك.. جوزها هو ال هيتصرف.. أنت كسرت كلمتي ياسيادة الملازم.
آدم مراد : رفع عينيه ليه بسرعه..وقال بنفي..العفو يا بابا..حضرتك عارف إن كلامك سيف ع رقبتي..بس ال حصل كان أكبر من اني اتحمله..اختي مريم دي مني لحمي وشرفي..ومش هستنى بعد المعلومات ال انا عرفتها.اني أتأخر اكتر من كدا..
واتحرك خطوتين وقال بغضب..كامليا مش هتسكت يابابا..وانا كان ف أيدي اقتلها.بس لولا القسم ال قسمته لحضرتك بطلب منك.
.كامليا تخطت كل الحدود..وكانت عايزه تهرب اختى بره مصر…
آدم : فتح عينيه بزهول… أنت بتقول ايه يا آدم..!!!
آدم مراد : لف ليه..وقال من بين أسنانه بغضب شديد..بقول ال حصل يابابا.. كامليا كانت…………………..!!! وشرح لجدو كل ال كامليا عملته. وإن تيم كان عايز يسافر.. وهو رفض..وحكاله هو عمل فيها ايه بالظبط..ورغم من أنه مخنوق من آخر خطوه عملها ف كامليا..لكن هي بتصرفاتها وصلته أنه يشربها من نفس الكاس.. لأن العين بالعين والسن بالسن والبادي اظلم..!!!
آدم : بيسمع حفيدو..وقعد ع طرف السرير..وجواه خنقه كبيره..
وسرح وقال جواه..اااه يا آدم..ليه كل ده؟ ليه بيحصل كل ده معاك..واحفادك ليه يقابلو كل المطبات دي..وليه ميرو؟اااه يا الله.. وغمض عينيه بتعب واخد نفس عميق جدا واتنهد..
وبص ل آدم مراد..وقال..كان ف اكتر من طريقه يا حفيدي. لكن مش بالطريقه دي..احنا ماينفعش ننزل للمستوى ده..مينفعش نفكر بالطريقه دي..
آدم مراد : بجمود.وانا ماتعدتش حدودي يابابا..ولا نزلت لمستواها..ولا اتصرفت زيها..
وقال من بين أسنانه بغضب..انا بس دوقتها من نفس ال دوقته لأختي..
ولو رجعت بالزمن تاني هعمل نفس ال عملته..وبص ل جدو وقال. حضرتك شوفت مستقبلك فينا..!!!
اما انا بمجد بجدر العيله..وعندي عيلتي والماضي ال اتزرع جوايا هو المقام الأول ف حياة الديزل..
وال يقرب من عيلتي.. يبقى يتحمل ال هيجراله…!!! لانه هيدوق ع أيدي أضعاف أضعاف الضياع والموت بالبطيء…!!!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية ميراث العشق)
لقراءة الجزء الأول من الرواية اضغط على : (رواية جريمة عشق)
لقراءة الجزء الثاني من الرواية اضغط على : (رواية عشقتها منذ نعومة أظافرها)
لقراءة الجزء الثالث من الرواية اضغط على : (رواية عشق الفهد)
