رواية غرام العز الفصل الأول 1 بقلم فرح وائل
 |
| رواية غرام العز الفصل الأول 1 بقلم فرح وائل |
رواية غرام العز الفصل الأول 1 بقلم فرح وائل
= انا اسفه يا استاذ رؤوف والله اني اتأخرت المكروباصات زحمه خالص والطريق زي الزفت دا انا حتي مفطرتش
~ شششش بس ايه مكروباصات ايه وفطار ايه انا مالي انا ومال حياتك الشخصيه دي
= مش بقولك انا اتأخرت ليه يعني ولا اسيبك علي عماك كده لامواخذه
~ لامواخذه!! بس يا كارما بس اسكتي
= طب انا هخش جوه المكتب ولو احتاجتني ابقي نادي عليا
~ استني يا كارما
= خيير..استر يارب انا بخاف من استني دي
~ يبنتي نفسي تسكتي شويه لسانك دا واخد وضع الاستعداد علطول كده ردك جاهز
= طيب ما انت قلقتني يا استاذ رؤوف
~ انا عايز اقولك انك و لاول مره هتمسكي قضيه
= ينهااار اسود همسك اييه..يعني ايه همسك قضيه انت اكيد عامل فيا مقلب صح والاستاذ رامز عبد الجلال هيجي يقولي بخ صح
~ وانا ههزر معاكي ليه..وايه رامز عبد الجلال دا اصلا!!.
= امسك قضيه ازااي بس ما انت اعقل الكلام قبل ما تقوله برضه
~ هو انتي يابنتي مش خريجه حقوق
= حصل
~ وجايه تشتغلي هنا في المكتب محاميه
= برافو عليك فعلا صح
~ والمفروض انك متدربه علي انك تقفي في محكمه وتترافعي
= اه بيقولو فعلا
~ اومال ايه بقا
= ما انا هفهمك بقا انا اصلا مكنتش عايزه اطلع محاميه انا كنت عايزه اطلع كوافيره
~كوافيره!!!
= اه والله اسمع مني بس المهم اني اكتشفت اني بحرق الشعر بالسشوار وبعمل مسكات تزود الحبوب اصلا ف ايه يعني لقيت نفسي مش هنفع..امي بقا كانت عيزاني دكتوره لكن بابا عايزني اطلع مهندسه وانا اصلا كنت عايزه اتجوز واقعد في البيت
~ انا مااالي انا بالكلام دا
= اسمع بس..المهم ان مجموعي جابني هنا حقوق لكن انا؟! انا اصلا بخاف من الظباط وربنا
~ ولما انتي كده..نزلتي تشتغلي ليه
= حبيت اعمل فيها استرونج اند بند ومان بس الموضوع كبر مني كده وانا اصلا عبيطه والله
~اخر كلام يا كارما يا اما تمسكي القضيه دي..يا اما شوفي مكتب تاني تشتغلي فيه..لان انا كل المحامين اللي عندي كفؤ ومش مستعد سمعه المكان تبوظ بسببك
= والله كبرت الموضوع استهدي بالله كده ليطقلك عرق وانت راجل كبير مش هتستحمل
~ كااااارمااااااا
= الله!! دا انا بهزر معاك يا متر مش كده..فين ملف القضيه
~ هتلاقيه هناك ع مكتبك.
= دا انت مظبط كل حاجه بقا
~ كارما..علي مكتبك يلااا
= حااضر
*دخلت مكتبي..والله انا مش فاهمه هو قفوش كده ليه يلا استعانا ع الشقا بالله اما نشوف مين اللي امه داعيه عليه عشان قضيته تقع في سكتي*
*قعدت اشوف القضيه المهم انها قضيه سرقه وحاجه بسيطه يعني المهم اني المفروض اروح القسم واخرجه ب كفاله والحوار يخلص يعني من غير محاكم ولا حاجه..وانا بقا مندمجه في القضيه وبتاع دخلت ريهام وهي صحبتي ومعايا في المكتب*
& صبااح الخير
= صباح الخير يا روري
& اسكتي يا كارما بلا روري بلا زفت
= ليه في ايه
& يبنتي روحت قسم **** عشان اخرج واحد من قضيه وكده.. الظابط اللي هناك حسبي الله ونعم الوكيل فيه مرتحش غير لما حوله ع المحكمه
= يا ساااتر!! دا القسم اللي انا رايحاه دلوقتي
& اتمني حظك ميكونش مع الظابط دا لانه مبيرحمش
= لا ان شالله لا يارب دا انا هبله وغلبانه ومليش في جو مكر التعالب دا
& ههههه طيب يلا روحي عشان استاذ رؤوف مش طايقك خلقه
= الله!! هو اللي عصبي وخلقه ضيق انا مالي
& طب يلا يختي روحي
*المهم لبست الروب الاسود بتاع المحامين دا اللي كنت شرياه من الوكاله ب 100 بس ايه مستورد..معالينا مش بحب ارغي والله..المهم روحت واخدت ملف القضيه معايا وركبت مكروباص وطلعت ع القسم*
*نزلت كده من المكروباص وانا بكامل شياكتي واناقتي وبكبرياء كده اكني نازله من عربيه فراري مثلا..المهم دخلت وسألت ع المتهم اللي المفروض اني ماسكه قضيته وقالولي في المكتب وكيل النيابه عز الدين عبد البارئ*
*اخدت بعضي وروحت للمكتب وانا اصلا بخاف من الظباط..ياربي انا ايه اللي جابني هنا بس..اللهي يجيلك اسهال يا رؤوف انت السبب..بس شكله هيبقي ظبوطه كيوت كده ومش شرير زي الافلام..المهم خبطت ودخلت*
= احم..السلام عليكم!!
_ وعليكم السلام اتفضلي
= احم..حضرتك انا موكله المهتم عبده زعتر
_ اسمه في البطاقه عبده زعتر يعني!!!!
= ااا اا لا اكيد..هو اسمه عبد الله ابراهيم السيد
_ يبقي تقولي اسمه اللي في البطاقه يا انسه وبلاش تجويد
= اا اه حاضر
_ اتفصلي قولي اللي عندك
= اا حضره القاضي المبجل واا…
_ ششش قاضي ايه..وبعدين ايه مبجل دي انتي فكراني قديس..اهدي كده يا ماما واتفضلي اتكلمي براحه واتكلمي عادي مش لازم فصحي وانا هفهمك بس محتاج ادله مقنعه تخليني اخرجه بكفاله
= لا من ناحيه الاقناع ف انا هقنع حضرتك طبعا
_ تمام اتفضلي
= مبدأيا كده بطلب من حضرتك اخلاء سبيل المتهم
_ نعم!! ودا عشان ايه بقا
= عشان خاطري
_ افندم
= اا يعني اقصد ان المتهم برئ حتي تثبت ادانته
_ يا استاااذه بنقولك مسكناه متلبس وهو بيسرق لا وكمان هو معترف بكده يعني مأنكرش يبقي برئ ازاي
= هو اعترف!!
_ اه
= طيب يا فندم ما سهله اهي..مش الاعتراف سيد الادله والانكار مش هيفيدك واثبت مكانك المكان كله محاصر..
_ انتي مريضه يبنتي!!
= اا انا اسفه يا حضره الظابط بس اندمجت شويه
_ لا بصي انا خلقي ضيق وشغل الهبل دا مش بحبه ف انجزي شوفي هتقولي ايه يا اما روحي يلا
= اروح ايه حضرتك.. دا استاذ رؤوف لو عرف هينفخني ومش بعيد ينفيني لجزيره سيشل زي ما اتعمل في الباشا سعد زغلول رحمه الله عليه..الفاتحه ع روحه….
_ فاااتحه ايه..انتي هتشليني يابت انتي..كلمه كمان والله احطك في زنزانه جمبه مش ناقصه
= يا باشا اهدي كده انا مش فاهمه انت متعصب ليه بجد.. طيب هقولك اسباب مقنعه تخليك تمشيه
_ اتمني والله
= حضرتك مش هو سرق!!
_ مظبوط
= تمام والسرقه عقابها النار عند ربنا سبحانه وتعالي
_؟!!!!!!
= خلاص يبقي تسيبه بقا وربنا هيحاسبه وانت مش ربنا عشان تحاسبه
_؟!!!!!!
= انت ساكت ليه!! اقنعتك صح..السكوت علامه الاقناع والله
_ اطلعي بره
= ايه دا!
_ اطلعي بره يا استاذه يلا والا هيبقي ليا تصرف تاني معاكي
= يفندم افهم..والله انا اصلا بتوتر من الظباط وماليش في شغل المحقق كونان دا.. دا انا كنت ناويه ادخل اقولك والنبي يا عمو خرجوا وهو مش هيعمل كده تاني… انت متخيل!!
_ وانا قولت اللي عندي و….
*قطع زعيقه دا حد داخل عليه كده وبيقول*
@ ايه يا عز م….ايه دا كارما
= هوبا..عامل ايه يسطا
@ انا تمام..انتي ايه اللي جابك هنا
= قضيه
_ ايه دا يا مهاب انت تعرفها!!
= طبعا يبني.. دي كرمله بنت خالتي
_ اممم طب بصي قدامك خمس دقايق وتمشيها والا اقسم بالله ما هخليها تشوف الاسفلت اسبوع كامل
@ يبني اهدي كده هي عملت ايه
= والله معملتش حاجه هو اللي عصبي
_ اه طبعا هو انتي بتعملي حاجه انا اللي وحش انا
@ طب بس يجماعه اهدوا…كارما مش انتي جايه عشان تخلي سبيل المتهم!!
= اه
@ طب يلا اتكلمي
= ما هو موترني مش عارفه اتكلم خالص
@ طيب يستي متتكلميش معاه خالص..قوليلي انا
*وراح مهاب جه وقعد ع الكرسي اللي قدامي وقالي يلا اتكلمي وفعلا بدأت اتكلم وقولت كل الكلام اللي كنت محضراه وبطريقه كويسه*
@ هاايل يا كارما براڤو عليكي
_ خلاص بعد كده لما تجيلك قضيه ابقي قوليلهم لا معلش مش بعرف اترافع مع حد غير ابن خالتي..او خديه معاكي في الشنطه اسهل..ابقي روح معاها يا مهاب عشان مش بتعرف تتكلم غير معاك
= تصدق انت بني ادم مستفز بجد..وبعدين دا دليل انك شخص مرعب اصلا و الواحد ميعرفش يتكلم معاك كلمتين علي بعض
_ اممم انا مرعب اه.. دا علي اساس ان ابن خالتك سو سو كيوت مش كده..بصي مش فايقلك يلا روحي
= اه ما انا هروح اكيد مش هبات هنا…بس براءه المتهم!!
_ امم ماشي
*المهم انه ادي فعلا براءه للمتهم وانا كنت فرحانه فرحه الاهبل والله وبعدها خرجت من عنده انا ومهاب*
= وانت بقا بتشتغل في القسم دا انت كمان!!
@ اممم انا وكيل نيابه هنا
= بس انت مش زي الغول اللي جوه دا.. دا عامل شبه البوبع يا مهاب دا انا خوفت منه
@ لا لا دا عشان انا ابن خالتك لكن انتي مش بتشوفيني مع المتهمين ببقا عامل ازاي
= بتبقي عامل ازاي
@ زي السكر في الشاي.. يلا شوفي انتي رايحه فين
= يا ظرييف.. رايحه المكتب
@ طب تعالي اوصلك يلا
= وشغلك!!
@ هخلي عز يغطي عليا في الشغل
= البوبع!!!
@ اه ويلا اخرسي بقا وامشي قدامي
= بس ا….
_ ما بقولك ايه يا مهاب ما تعيش الجو الاسري دا في البيت انت فاكر نفسك عند خالتك يلا
@ انا كده كده كنت ماشي..بس عايزاك تغطي عليا ساعه واحده واصلها وارجع
_ لا يا راجل؟! دا مقابل ايه بقا
@ لما تعوز تزوغ هغطي عليك
_ ليه وانا مزوغاتي زيك ولا ايه..روح روح
@ اشطا هخش اجيب الفون والمفاتيح من مكتبي واجي
*مهاب راح مكتبه يجيب المفاتيح وانا فضلت واقفه مستنياه وفجأه لقيت البوبع ااا قصدي عز دا قرب مني وجه قالي بصوت واطي جمب ودني*
_ بعد كده لما تيجي تتكلمي عن عز الدين عبد البارئ تتكلمي عدل..وانا ع فكره ممكن اوريكي البوبع دا ممكن يعمل فيكي ايه
*قال كده وسابني ومش وهو حاطط ايديه في جيبه ومبتسم ولا اكنه قال حاجه… وانا طبعا كنت مرعوبه وميته في جلدي..وبعدها قعدت اكلم نفسي شبه المجانين*
= يختااااااي..هو سمعني فين بس..انا مني لله انا مبعرفش امسك لساني خمس دقايق دايما سابق تفكيري…هو ممكن يقتلني ولا ايه..والله بوبع ويعملها
@ انتي بتكلمي نفسك يا كارما انتي اتجننتي ولا ايه
= والله يا اخويا طول ما انا في الشغلانه السوده دي احتمال تودوني العباسيه قريب
@ طب يلا اركبي.. دا انتي لحستي خاالص
*ركبنا عربيته ووصلني لحد المكتب وعملتله باي باي المهم يعني عشان مدخلكوش في تفاصيل ملهاش لازمه عزيزي القارئ وانت اصلا هربان من المذاكره وجاي تتمرقع هنا بس معالينا????..دخلت المكتب لقيت استاذ الرؤوف في وشي*
~ ها عملتي ايه
= كل خير طبعا وطلعته بكفاله
~ بجد!! لالا انا مش مصدق
= لا صدق يا متر دا افحمت الظابط دلائل بقا وبراهين وبما ان واذن بص كان فاضل شويه واقلبله مدرسه رياضه
~ انا مش عارف ليه انا مش بفهم كلامك
= عشان انت نرم يا استاذ رؤوف
~ يعني ايه
= دي حاجه حلوه..يعني انت محامي كفؤ
~ اممم شكرا ليكي
= العفو..اخش اروح مكتبي بقا!!
~ اه يلا اتفضلي
*دخلت مكتبي وانا مش طيقاه اصلا جتك نيله وانت شبه استاذ ابو عنكبوت اللي في شركه المرعبين المحدوده دا..المهم دخلت مكتبي وقعدت خلصت شغلي وخرجت من المكتب*
*المهم ركبت نفس المكروباص الفاخر وخلي بالكو المكروباص دا هيفضل معانا فتره طويله لحد ما اشتري عربيه زي الواد مهاب كده..المهم روحت البيت اتغديت ودخلت اوضتي*
*قاعده بقا في الاوضه بسمع عمرو دياب والدنيا حلوه وراح الفون رن برقم غريب..طبعا انا الفضول اكلني عشان اعرف مين ف رديت*
= الو
_ الو
= ايوه مين
_ انتي مش عرفاني ولا ايه
= لا والله محصليش الشرف!!خير
_ انا عز الدين عبد البارئ
= ايه!!
يتبع..
لقراءة الفصل الثاني : اضغط هنا
لقراءة الرواية كاملة اضغط على : (رواية غرام العز)
