رواية غرام العز الفصل الثاني 2 بقلم فرح وائل

_ انا عز الدين عبد البارئ

= ايه!! الظابط

_ اه هو

= اه نعم يعني عايز ايه

_ هعوز ايه من محاميه فاشله زيك!!

= اولا انا مش محاميه فاشله انت اللي مخيف..ثانيا ولما انت مش عايز مني حاجه بترن ليه!!

_ اكيد مش برن عشان اسمع جمال صوتك مثلا

= ايوه مجاوبتش برضه ع السؤال بترن ليه

_ حضرتك نسيتي الكارنيه بتاعك في المكتب عندي ياهانم

= اه طيب بسيطه ابقي اديه لمهاب وانا هبقي اخده منه

_ لا بقولك ايه انا مش فاضيلك انتي وابن خالتك الكارنيه في مكتبي لما تحبي تاخديه ابقي تعالي و خديه

= اه بس ان….

*وهوب طااخ وانا بتكلم لقيتت تيت تيت!! تيت تيت ايه؟! دا قفل السكه في وشي ذكر الشمبانزي دا..حسبي الله ونعم الوكيل فيه نكد عليا وانا كنت مفرفشه*

*طبعا روحت رنيت علي مهاب زفت الطين دا*

@ الو..ايه يا كرمله عامله ايه

= بطل زفت كرمله دا بكرهه الدلع دا

@ هو في حد يكرهه الكرمله برضه

= ملكش دعوه دا اولا ثانيا عيزاك في خدمه

@ خييير

= البوبع

@ البوبع؟! قصدك عز!!

= ايوا

@ ماله!!

= نسيت الكارنيه بتاعي عنده قولتله ابقي اديه لمهاب وانا هبقي اخده منه..قالي لا انا مش فاضيلك انا وابن خالتك الاهبل دا

@ اهبل!!

= يعني انت مسكت في اهبل وسبت باقي اللي قالو عليك

@ ليه هو قال ايه

= عايز الصراحه!!

@ طبعا

= بس انا خايفه اكون فتانه!!

@ لا مش فتانه

= خايفه لوقع بينكم

@ لا متخافيش..ها قال ايه

= قال انك مش بتعرف تشتغل وداخلها بالواسطه وهو اللي شايل الشغل كله وبصراحه بصراحه قال انك ملكش اي تلاتين لازمه وبتيجي تتطفح وتروح لامواخدذه

@ انا!! انا بروح انا؟! دا ساعات ببات في المكتب

= هي دي اللي مسكت فيها يبن العبيطه انا مش عارفه خالتي كانت بتتوحم فيك علي زيت عربيات ولا ايه

@ بطلي هزار بقا واتكلمي جد

= وهو انا هتصل بيك عشان اهزر برضه..بص انا عيزاك تروح تقلب المكتب عليه بكره عيزاك تخليه يقولك يا مهاب باشا يا عمي وعم عيالي ويبوس ايدك وراسك كمان

@ متسخننيش يا كارما

= يسطا كرااامتك فيين.. اللي تضيع منه كرامته اكنه ضاع منه شرفه

@ بطلي اڤوره

= هاااار ازرق اڤوره ايه يلااا بقولك هزأك… جتك خيبه دا انا خالتي لو كانت جابت دكر بط كان نفعها عنك

@ هروح اطربق المكتب علي نفوخه..خلاص ارتاحتي

= ايوه كده هو دا هوبا اللي انا اعرفه اسد يلا في ايه

@ خلاص اسكتي بقا

= بس والنبي خدمه صغننه قد كده.

@ خييير

= قبل ما تطربق المكتب ع نفوخه وتقلب الرجل الاخضر مع اني اشك الصراحه.. هاتلي الكارنيه بتاعي منه وبعدها طلع روح جون سينا اللي جواك

@ طيب سلام بقا

= سلام يا اخويا

*يااا انا كده ارتحت نفسيا والله عشان تبقي تقولي انا عز الدين عبد البارئ ونينينيني وفرحان اووي ب عبد البارئ دا اسم من ايام ما كانت المعاكسه الروشه “انتي رائعه جدا اشكر بابا كتير ع انتاج الحلويات دي*

*وطبعا قعدت اضحك..يخربيت خفه دمك يبت ياكارما والله انتي خساره في البلد دي المفروض احترف بره..اصلا محدش مقدر موهبتي المكنونه جوايا دي دا اشتغل بيها صاحبه السعاده يخواتي..استاذه اسعاد يونس وييت اوعي تمشي انا جايه اهو*

*طبعا خلصت فقره حب الذات دي ودخلت نمت زي الفسيخه بالظبط وصحيت تاني يوم ع صوت ماما..عايزه اقولكم يا جماعه ماما دي ارق ام في العالم والله ساعات بستغرب اني ازاي بنتها*

$ يااااازفته الطين ياااا متخلفه مش لو كنت خلفت بغله كانت نفعتني قومي قامت قيامتك يا بعيده جتك القرف فيكي وفي نومك اللي عامل شبه اللي ضاربين مخدرات دا

*اووف نسيت اقولكم يجماعه انتي كنت بألش مفيش حوار الرقه دا خالص في عليتنا اللي بيطلع رقيق بنقتلوه ونحرقوه زي الهنود ونعبيه في بطرمان كده عشان ميجبليناش العاار..نرجع تاني لموضعنا وبطل تبقي حشري كده عزيزي القارئ وكل شويه تطلعني من الموضوع وانا مش بحب الرغي الله*  »ربنا يسامحني بقا«

= في ايه يا ماما في ايه حد يصحي كائن كيوت بالشكل دا

$ كيوووت!!! قومي قومي يلا روقي اوضتك الزريبه دي وبعدها ابقي اتكلمي يلا

= تصدقي بالله..هتصدقي ان شالله انا لو اتجوزت بعد الشر يعني هيبقي لسبب واحد بس انتي اهرب من شغل البيت اللي بتدبسيني فيه دا كل شويه

$ دا علي اساس انك مش هتعملي حاجه في بيت جوزك!!

= لا طبعا هو فاكرني غساله ولا طباخه ولا ايه انا هجيب خدامه طبعا

$ والنبي اتوكسي في الاخر هترسي ع ابن عم محمد البواب

*ماما عندها حق والله هفضل اقول هجيب خدامه هجيب خدامه وفي الاخر هيخوني مع الخدامه ويخليني انا الخدامه..ما انا عارفه اني هتدبس في شغل البيت كله بس عمري ما اروح اقول طبعا*

*المهم روقت اوضتي وانا مشغله الاغنيه المفضله لقلبي اغنيه.  “والله يا زمن ما بأدينا زرعنا الشوك ” بتاعت الفنانه شاديه وكنت واخده نفس رأكشنيها البائس وهي بتمسح وطبعا كنت بحسبن بصمت..المهم خلصت ولبست ونزلت الشغل دا استاذ رؤوف هينفخني هينفخني*

*طبعا صبحت ع عم محمد البواب عشان لو بقي حمايا في يوم من الايام ولا حاجه تبقي علاقتنا كويسه ببعض..ركبت المكروباص الفاخر واخيرا وصلت المكتب*

= صباح الخير ازيك يا استاذ رؤوف

~ زي الزفت

= يارب دايما

~ ايه!!!

= يختااي ااا قصدي حضرتك مالك شكلك متضايق

~ اه فعلا

= احسن

~ احسن!!

= اا محسن يا متر محسن انت متعرفوش

~ لا معرفوش

= دا دا دا واحد غلبان كده بساعده

~ اممم ربنا يكتر من حسناتك يستي

= ربنا يخليك يارب..المهم ايه اللي مضايقك يمتر

~ قضيه خسرتها

= حضرتك اللي كنت بتترافع!!

~ اه

=*بصوت واطي* ما لازم تخسرها

~ انتي بتتوشوشي بتقولي ايه

= لا متاخدتش في بالك يا متر انا دماغي مسلياني كده

~ طيب يلا استلمي قضيتك جوه ع المكتب

= هي سيره بقا ولا ايه سكتناله دخل بحماره

~ بنتتتت!!! حماره ايه اتأدبي

= اا انا اسفه يا متر والله بس الجلاله خدتني كده ونسيت انك مديري في المكتب وكده

~ انا مش عارف انا صابر عليكي ليه ومطردكيش من المكتب دا من زمان

= عشان انا اللي ممشيه المكتب دا وشايله الشغل كله دا انتو لولايا كان زمنكم غرقتوا في شبر مايه والنبي يا رؤوف خليني ساكته

~ رؤوف اه!! وايه كمان ما تيجي تقعدي وتمشي الشغل بدالي!!

= لا العفو يا فندم مش قصدي

~ غوري يا كارما علي مكتبك يلا وشوفي قضيتك

= يا متر والله انت لو شوفتني دا انا جبت البراءه دي بالبركه كده..وبعدين انت هتستحلاها ولا ايه هي مره واحده وقولت اجااملك فيها وكده

~ تجامليني اه لا شكرا لافضال سعتك والله..كاارما غوري من قدااامي

= اووف حاضر حاااضر

*دخلت المكتب وانا مش طيقاه..هو ليه مصمم يعاملني اكني محاميه بجد..خلاص المحامين خلصوا يعني مش فاضل غيري*

*فتحت القضيه المرادي وكانت قضيه مخدرات…يختااي انا ناقصه يربي دا انا بشرب كوبايه الشاي بعمل دماغ…معالينا انتي قدها يبت يا كارما..بس المشكله انها في نفس القسم اللي فات..بس ان شالله مش هطلع معاه هو وهطلع مع هوبا مثلا..يارب يارب*

*وصلت دخلت وسألت علي المكان اللي فيه المتهم وقالولي للاسف في مكتب عز الدين عبد البارئ..حسبي الله ونعم الوكيل فييك يا رؤوف..اعمل ايه دا ممكن ياكلني المرادي..لالا بس انا هلاقيه متكسر اصلا زمان هوبا روقه..المهم دخلت وكانت المفجاه*

*دخلت ولقيت مهاب قاعد مع عز في المكتب ودراعه مكسور*

= ينهااار اسود يا مهاب ايه اللي عمل فيك كده

@ ااا لا دي اصابه ملاعب متاخديش في بالك

_ لا مش ملاعب ولا حاجه انا اللي ضربته

= ينهااار ازرق هو اللي ضربك يا مهاااااب هو!! وقال ايه هكسر وادغدغ وهولع الدنيا وابقي غمي عينك عشان متشوفيش الدم اللي هيترطش انا قولت هخش الاقي الولا هرقليز بقا جتك وكسه يا مهاب

@انتي تخرسي خالص عشان انتي السبب اصلا الراجل مقالش حاجه..خلتيني اروحله بالليل واضربه وفي الاخر طلع ميعرفش حاجه عن الموضوع اصلا ما استفدتش حاجه غير ان دراعي اتكسر

= انت بتكذبني وبتصدقه..قلبي وركبي غضبانين عليك ليوم الدين يحيوااان

@ امنيه يا رزق كفايه تمثييل..كنتي جايه ليه

= قضيه مخدرات

@ طيب اسيبك انا بقا تشوفي هتحليها ازاي واروح مكتبي..عايز حاجه يا زيزو

= حبيبي تسلم

*ومهاب خرج عادي جدا ومبسوط ولا اكنه متخربش حتي المهم لقيت البيه بيقوم وبيقرب مني وانا برجع وهو بيقرب وانا ارجع وهو بيقرب*

=  *بتوتر*  ا ااا ا ايه يا عم الحج ما تثبت في ايه  هتخبط في الحيطه كده

_  *وقف* بقا انا شتمت ابن خالتك

= ااا ا الواد هوبا دا كان فاهم غلط اصلا

_ اسمه مهاب مش هوبا

= ما انا متعوده اقوله كده و…

_ متعوده دا في بيتكوا هنا اسمه مهاب فاهمه!!

=  *هزيت راسي بمعني اه*

_ ايه بقا اللي خلاكي تقوليله اني شتمتك

= عشان يضربك

_  *ضحك* واديكي شوفتي مين اللي ضرب التاني متخيله انه كان ممكن يعملي ايه مثلا

= اا اا ما انت مفتري بقا وعضلاتك مقويه قلبك

_ برضه مفهمتش كنتي عيزاه يضربني ليه

= عشان انت مستفز ورخم وبتخوف عامل شبه البوبع وانا مكدبتش لما قولت عليك بوبع علي فكره

_*بيقرب* والله!!

= ااا لا اا اه..ابعد كده انت مالك بتقرب ليه هتاكلني

_ طب خلي بالك عشان انتي بتلعبي بالنار!!

= يعم ابعد الله يهديك كده بدل ما انا جايه اخرج واحد من مخدرات نتمسك احنا اداب..ابعد الله يخليك

_ طب ياريت تخلي بالك بعد كده عشان انا حطيتك في دماغي يا كوكو

*قالها بصوت واطي كده وبعدها مشي وقعد ع مكتبه*

_ ها قولي جايه لمين المرادي

= جايه للمتهم احمد علي ابراهيم

_ اممم وبعدين

= هو جاي في قضيه مخدرات و…

_ هتعرفي تتكلمي وتخرجيه ولا هتهبلي زي المره اللي فاتت

= عيب علييك هبهرك

~بعد عشر دقايق~

= يابني الله يهديك يبني افتح ام الزنزانه دي

_ ششش اخرسي

= مينفعش كده انا محاميه محترمه ازاي تحطني في زنزانه وتقفل عليا

_ مينفعش احبسك بس ينفع حضرتك تقوليلي تاخد كام وتخلص الحوار دا من غير شوشره!! بترشيييني

= والله ابداا انا بشوف كده في الافلام

_ طب ابقي خلي المخرج بتاع الافلام بقا يجي يخرجك

= والنبي افتح خلاص مش هرشيك تاني

_ يبنتي انتي معجونه ب مايه صراصير ولا مجنونه ولا ايه نظامك

= خلاص بقا انا اسفه والله مش هتتكرر خالص

_ انا مش عاارف انتي اتحدفتي عليا من انهي داهيه

= اسمع بس والله انا ما ليا في الشغل دا مخدرات ايه اللي اخرجه منها دي..دا انا بتسطل من كوبايه قهوه صدقني انا اتفهه من كده بكتيير

_ ما انتي مش هتخرجي من هنا غير لما تتكلمي عدل شبه البني ادمين وتخرجي الراجل يا كده يا اما هتتسجني انتي وهو

= الله!! دا في انهي شرع دا يعم

_ شرع المخرج

= مخرج ايه

_ مخرج الافلام ما هبل ب هبل بقا

= يعني لو قولتلك اسباب مقنعه هتخرجه

_ وهخرجك

= استعنا ع الشقا بالله

_ يا مسهل

= بص يا حضره الظابط..الب. اي دا انت بتبصلي كده ليه

_ ببصلك عادي كملي

= لا بتخوفني دور وشك

_ افندم!!

= بقولك دور وشك عشان اتكلم فيها ايه

_ معلش ثانيه هي الهانم هتتكلم ولا هتغير هدومها عشان اعرف بس

= لو سمحت متتريقش

_ لا ازاي مش بتريق طبعا..تحبي اجيبلك ابن خالتك يمكن تتفك عقده لسانك وتنطقي

= هو ينفع!!

_ كااارمااااااا انجزي

=  *بتوتر* ااا متزعقليش والنبي والله اعيييط

_ طيب يا كارما اتفضلي اتكلمي

= اا طيب ب بص هو يعني مش الشرطه في خدمه الشعب

_ اه

= طيب وهو عيل وغلط يعني معلش عديها المرادي

_ هتشلييني يا كارماا

= الله!! انت اللي خلقك قد غطا الازازه اعملك ايه

_ كارما انا اخر مره هقولك قولي اللي انتي محضراه وانا هادي جداا اهو ياريت انتي كمان تهدي عشان تعرفي تتكلمي

= طيب بس ا..

_ متخافيش انا معاكي ولو اي حاجه وقعت منك هساعدك متقلقيش

*ابتسمت بثقه كده وبدأت اقول اللي انا كنت محضراه وقولت كلام زي العسل وكنت كل اما اقع في حاجه هو يصلحها ويساعدني فيها واخيرا خلصت وابتسملي كده*

_ اممم مش بطال كويس

= مش بطال!! طيب احسن من مفيش ع الاقل يلا افتحلي وطلعني بقا

_  *بأبتسامه* ماشي

*طلعني من الزنزانه وبالمناسبه مكنش فيه حد موجود فيها غيري..طلعت وخرج المتهم بكفاله*

= اخر مره يا استاذ يا محترم تعمل فيا كده تاني.

_  *بضحك* اللي يشوفك وانتي نافشه ريشك كده ميشوفكيش وانتي كنتي عامله شبه الكتكوت المبلول جوه ????????

= نينيني بقولك ايه انت فاكرني هخاف منك ولا ايه لا لو فاكرني خايفه منك احب اقولك..

_  *قام فجأه* ايه!!

= اا احب اقولك اني خايفه فعلا

*ضحك ورجع قعد مكانه*

= جتك القرف وانت فرحان بعضلاتك اللي عامله شبه الكوتشات دي.

_ بتقولي ايه

= باااشااا سلامتك مبقولش طبعا

_ شاطره ياريت تسمعي الكلام كده

= بص انا ماشيه عشان مرتكبش جريمه فيك

_ استني

= نعم

_ كارنيهك

= اه هاته

_ اا لا ماهو مش معايا دلوقتي تعالي خوديه بكره بقا

= يا الله نسيييته ليه

_ قولت نسيته خلاص حصل خيير

= اوووف ماشي

_ سلام!!

*بصيتله بغضب ومردتش عليه ومشيت ورزعت الباب ورايا.. روحت كملت شغلي وروحت عند خالتو .. ما انا لازم اعرف ابن الموكوسه دا اتضرب ازاي*

= انت يا زفت الطين ياللي اسمك مهااب

& ايه يا حبيبت خالتك داخله بزعبيبك ليه كده ازيك

= تمام يخالتو…فين بقا دكر البط اللي انتي مربياه دا

& جوه في الاوضه

= طب وسعي كده يا خالتو ولو سمعتي صوت استغاثه متقلقيش انا بربي ابنك

& ربنا يهبلكوا اكتر واكتر هبله واتلمت علي عبيط والله

= شكرا يا خالتو ربنا يكرم اصلك

*سيبتها بتعمل عصير ودخلتله البيه لقيته قاعد ع السرير وبيسمع اغاني ولا همه*

= اهلاااااا بمعدوم الكرامه يا اهلا يا سهلا

@ في ايه يا بت مالك

= ياااريتها كانت جابت ارنب يا اخويا

@ ما تتلمي يبت بقا واحترمي فرق السن

= انت هتقرفنا بالاربع سنين اللي بيني وبينك…طظظ يعني عايز ايه مش فاهمه

@ هديكي في سنانك يبت

= يا اخويااا كنت اتشطرت ع اللي كسرلك دراعك

@ يبنتي والله كنا بنهزر والهزار قلب جد راح كسرلي دراعي زي ما انتي شايفه

= داري علي خيبتك داري

@ اداري ع ايه يا حلوفه انتي.. انا بتكلم بجد والله انتي مش شيفاني كنت عنده الصبح وبنتكلم عادي

= ياساااتر هو دا هزار دا مصاحب حلوف يا مهاب انا ربيتك انك تصاحب حلاليف يبني

@ هههههه بس والنبي يا كارما دراعي واجعني خالص والله

= حسبي الله في اللي كان السبب

@ المهم عملتي ايه في القضيه اللي كنتي رايحها

= ابهرررته بص خليته يسقفلي ويصفرلي وكان فاضل شويه ويزرغطلي كمان

@ يتي بطه خرجي مجرمين من السجن

= بطل سخافه يا شحط انت

_ المهم جبتي الكارنيه بتاعك اللي قرفانا بيه دا

= لا مجبتوش هو نسيه في البيت

_ نسيه ازاي كان معاه لما انا كنت معاه في المكتب وكنت هاخده وانا ماشي

= و مأخدتهوش ليه

_ ما انتي جيتي بقا ف قولت هيدهولك

= هو قالي نسيه

_ غريبه يعني

= فعلا غريبه

@معالينا بقولك ايه ما تقومي تشوفي كده امي بتعمل عصير ايه

= لمون!! امك مش مقتنعه انك متصاب هي مصممه ان انت اعصابك تعبانه

@ يبنتي دي الصبح لقيتها بتقولي خد اشرب السحلب دا هتخف وتبقي زي الفل هي فاكره ان انا عندي برد..سحلب ايه في الحر دا والنبي!!

= خالتي دي عايشه تعلف فيك شبه البهايم كده ويااريت بيطمر

@ بقولك ايه فكك من الحوار القذر دا وقوليلي

= ايه

@ ريهام عامله ايه

= ريهام صحبتي؟!

@ اه هي

= تمام

@ بقولك ايه انا هشحت منك الكلام ما تخلصي

= انت عايزني افتن علي اعز صاحبه لقلبي!! لا طبعا

@ طب بصي افتحي الدرج دا هتلاقي فيها شكولاته خوديها

= بجد!!

@ اه يا ماديه يا حقيره بجد

= حيث كده بقا في واحد كان زميلنا في الجامعه وكان بيلمح انه عايز يخطبها وكده بس انا سألتها وهي قالتلي انها مش بتحبه ومش مرتحاله

@ واسمه ايه بروح امه دا كمان

= اسمه عادل

@ تمام سبيلي انا الحوار دا

= والنبي اتوكس لما دراعك يخف الاول

@ غووري يا كارما غووري انتي جايه هنا لييه اصلا

= الحق عليا جايه اسأل عليك بدل ما انت ماشي بأيد واحده كده كسفتنا

@طب روحي روحي شوفي مين بيخبط ع الباب

= اووف شغاله عند ابوك انا

@ اخلصي يابت بطلي برود

= حااضر حاضر

*روحت فتحت الباب*

= هو انت!! انت ورايا في كل حته يا جدع انت ارحمني!!

يتبع..