رواية خطف بالاتفاق الفصل الرابع 4 بقلم إيمان شلبي
رواية خطف بالاتفاق الجزء الرابع
رواية خطف بالاتفاق البارت الرابع
رواية خطف بالاتفاق الحلقة الرابعة
الخبر وقع علي مسامعي زي الصعقه
حسيت وقتها روحي خرجت من مكانها
جسمي اترعش وحسيت بصداع والرؤيه بدأت تتلاشى بالتدريج
نادر بقلق :
-جنا جنا انتي سمعاني
غمضت عيني بتعب وانا بستسلم لفقدان الوعي
اخر حاجه فاكراها هو صوت نادر وهو بيسندني بدراعه قبل ما اقع علي الارض
بعد مرور ساعه
كنت قاعده علي السرير ببص قدامي بشرود بعد ما فوقت
نادر قاعد علي كرسي قدام السرير ،الست الكبيره اللي عايشه معاها قاعده علي طرف السرير ماسكه كوبايه مايه بسكر وهي بتترجاني اشرب منها
-يابنتي خديلك بوق طيب يرد روحك
مردتش عليها ،اكتفيت بالشرود والصمت المميت
نادر وهو بيتنهد وبيبصلي بحزن :
-جنا لو سمحتي اسمعي الكلام
هزيت راسي بدموع وانا بغمض عيني جامد وجسمي كله بيتنفض
ابتسم نادر وهو بياخد منها الكوبايه:
-هاتي يا امي انا هشربها واتفضلي حضرتك ارتاحي
طبطبت علي كتفه بحنان :
-انا قاعده برا يابني لو احتاجت حاجه قولي
-تسلمي ياست الكل كتر خيرك
خرجت من الاوضه ونادر قعد مكانها علي طرف السرير وهو بيبصلي من غير ما ينطق حرف
طال الصمت لدقايق
انا قاعده ببص قدامي وجوايا فوضي وكركبه وذكريات وكم مشاعر مش قادر احدد اي شعور فيهم الأدق
لكن كل اللي اقدر اقوله اني منهاره
مكانش سهل عليا ابداً كل ده يحصل ورا بعض
مكانش سهل عليا اتقبل كل ده بالسهوله ديه
حاولت كتير اصبر نفسي علي البلاء لكن للاسف نفسي ضعفت ومبقتش حمل خبطه كمان
الخبطه المره دي كانت صعبه اوي في الحقيقه !
-ان الله اذا احب عبداً ابتلاه
ضميت رُكبي في بعض وسندت راسي عليهم وانا بعيط بصوت مكتوم وبقول بصوت مبحوح
-مش قادره ..مش قادره استوعب أنه مات يانادر انا ا انا …
-بتحبيه
رفعت عيوني وانا ببصله بوجع وخجل في نفس الوقت اني لسه بحب “امجد ” بالرغم من كل اللي حصل !!
ابتسم بتفهم :
-متقلقيش مش هقول عليكي معندكيش كرامه ولا هقولك متزعليش ولا كل الكلام ده
لان اللي جوا الموضوع غير اللي برا
طبيعي تكوني لسه بتحبيه وخاصه انك متجوزاه عن قصه حب كبيره ،طبيعي عقلك مش قادر ينسي ولا قادر يستوعب أن بين يوم وليلة تكتشفي أن حبيب عمرك زعيم مافيا ،الشخص اللي وثقتي فيه وسلمتيه عمرك كله وقلبك يطلع بالبشاعه ديه
هزيت راسي وانا بحط ايدي علي قلبي وبحاول اخد نفسي
حط أيده علي ايدي وهو بيبصلي وبيقولي بصدق:
-انا عارف ان الموضوع صعب وأن اي كلام دلوقتي مش ممكن يداوي جرحك بس بس كل اللي اقدر اقوله اني معاكي مش هسيبك لوحدك أبداً هفضل معاكي لآخر لحظه لحد ما تبقي كويسه
شفايفي اترعشت وانا بسأله بصوت مهزوز :
-و وانت ذنبك ايه تستحمل اكتئابي يانادر ..ذنبك ايه تضيع وقتك وتيجي علي نفسك عشاني !
اتنهد تنهيده طويله وهو بيبص في عيوني وبيبتسم بحب :
-ذنبي اني حبيتك
-ح حبتني؟!
– وبعدين ده مش ذنب ده قدر ..القدر وقعك في طريقي عشان اكون جنبك في وقت زي ده ،عشان اسندك لو وقعتي ،واصلح المكسور جواكي
هزيت راسي بدموع :
-لا لا يانادر ارجوك لا متضيعش وقتك مع واحده زي،ا انا انا معرفش ممكن اقوم من الوقعه دي او لا ،م معرفش حتي لو قومت هقدر افتح قلبي لحد تاني او لا ،ارجوك متعشمش نفسك ،متتعبش قلبك معايا ،انا صعب اوي ارجع زي الاول ،ص صعب اكون جنا البريئه العفويه المتفائله ،صعب صدقني ،انا انطفيت وصعب ارجع زي الاول بنفس الشغف للحياه
ضغط علي ايدي وهو بيقولي بأصرار:
-مستعد أضحي واضيع عمري كله لو معاكي ياجنا
-صدقني هتزهق و…
-استحاله
-نادر ارجوك أ….
-انا معاكي وجنبك ياجنا
ضغطت علي أيده وانا بغمض عيني وباخد نفس عميق وجوايا خوف من المجهول لكن مجرد وجود نادر وكلامه وإصراره أنه يفضل جنبي حسسني ولو شويه بالأمان
:”من يُحبنا ونحن في اسوا حالاتنا ، هم من يستحقون أن يبقوا في قلوبنا إلي الأبد ” !♥️
ـــــــــــــــــــــــــــــــــــــــــــــــــــــــــــــــــــــــــــــــــــــــــ
بعد مرور تلت شهور
مرت ايام كتير جدا رجعت بيت اهلي بعد ما اتأكدنا اني في أمان
كنت بحاول بكل ما املك اتأقلم واتخطي
كنت بحاول اصبر نفسي
ايام كنت بصحي من النوم حاسه اني تمام وناسيه كل حاجه
اوقات تانيه بفضل طول اليوم عايشه في قوقعه الذكريات
الفون بتاعي رن وكان “نادر ” كالعاده
-الو
-صباح الخير
-ص صباح النور يانادر
-اخبارك ايه
اتنهدت بحزن :
-الحمد لله
-ممكن أطلب منك طلب!
-طبعا
-ممكن تقبلي عزومتي علي الغداء
-ب بس ….
-تمام نص ساعه وهكون عندك تحت البيت
-نادر
-نعم
-ميصحش اللي بتعمله ده
-انا عملت ايه
-مينفعش نفضل بالوضع ده ا انا ست ارمله وانت اعزب و وكلام الناس مش بيرحم حد ده غير أنه حرام ..انا اسفه يا نادر مش هقدر اقبل عزومتك ومش هقدر كمان اتكلم معاك تاني ،و وربنا يوفقك في حياتك
رد بجمود :
-يعني ايه ربنا يوفقك في حياتك ؟
عيوني لمعت بالدموع وانا برد بصوت مبحوح :
-ي يعني احنا بقالنا فتره كبيره اوي علي الحال ده ،كل مره بحاول اتخطي برجع أميال لورا مش قادر اتعافي من اللي شوفته ،مش قادر انسي ،مش قادره ابطل احب امجد حتي بعد اللي حصل ، و وانت مش ذنبك تفضل مع واحده قلبها مع غيرك ،انا مش عايزه اظلمك معايا يانادر
-بس انا قولتلك انا راضي وموافق افضل معاكي لحد ما تتخطي
-ليه يانادر ،ليه بتضيع وقتك مع واحده صعب تبادلك مشاعرك ،ايه اللي يجبرك علي كده وانت الف بنت تتمناك ،والف بنت ممكن تبادلك شعور الحب والاهتمام
اتنهد وهو بيرد بحزن :
-اللي يجبرني اني بحبك انتي ومش عايز غيرك انتي
اللي يجبرني أن صعب الاقي بنت زيك
اللي يجبرني أنك انتي البنت الوحيده اللي خلت قلبي يدق ويحبها
اللي يجبرني أني اتخليت عن مبدأ اني محبش ولا اتجوز ولا اكون اسره قصاد نظره من عيونك
اللي يجبرني أني لو لفيت العالم مش هلاقي حد في جمالك وجمال قلبك وحنيتك
دلوقتي عرفتي ايه اللي يجبرني ياجنا؟؟
حطيت ايدي علي قلبي وانا ببتسم ابتسامه صغيره من بين دموعي وبهمس بحشرجه
-مش هتزهق مني
-انا ممكن ازهق من الدنيا كلها ومزهقش منك
-تفتكر اني ممكن اتخطي واقدر اعيش
-انا معاكي وجنبك وان شاء الله هتقدري
اخدت نفس عميق وانا برفع راسي للسقف :
-يارب
-جنا …انا هاجي بليل انا وماما وبابا نطلب ايدك
-هه
-مش هسمح لحد يقول عنك كلمه وحشه
-ب بس
-بس ايه ياجنا
-انا خايفه يانادر خايفه اوي
-مني؟؟
رديت بلهفه :
-لا طبعا
-اومال من مين ؟
-خ خايفه علي قلبك مني
-بس أنا واثق أنك عمرك ما هتأذي قلبي
-وان اذيتك غصب عني
-هسامحك
-معقوله!!
-اللي بيحب بيسامح وانا هسامحك وهعذرك
-انا عمري ما قابلت حد واتمسك بيا بالشكل ده
-عشان محدش عنده نظر
-شكراً يانادر
-علي ايه
-شكراً انك متخلتش عني ،شكراً انك مسبتنيش لدماغي ،شكراً انك موجود
ـــــــــــــــــــــــــــــــــــــــــــــــــــــــــــــــــــــــــــــــــــــــــ
بعد مرور سنه
كنت قاعده في بلكونه اوضتي بكتب اخر بارت من روايه بكتبها بعنوان “منقذي”
كانت روايه بتحكي قصه حياتي بالحرف ،من بدايه ما عرفت امجد والأحداث اللي كانت بتحصل في النص والاحساس اللي كنت بحس بيه وانا شيفاه جنبي بس مش قادر أوصله حتي ،عن صدمتي لما عرفت حقيقته عن صدمتي في موته وعن الوقت اللي استغرقته عشان اقدر اتخطي كل ده !
كل كلمه ،كل ابتسامه ،كل تفصيله كنت بحكيها عن نادر اللي مسابنيش لحظه لدماغي
كانت الروايه بمثابه مذكره بحكي فيها مشاعر وكلام مش قادر احكي لحد عنهم
وكأن الكتابه هي ملجأي الوحيد للفضفضه
في اخر البارت كتبت نهايه قصتي واللي هي اني اتجوزت نادر وأنه أصبح كل دنيتي
كان نادر فعلا منقذي في كل الأوقات !
حبه فيا وقوفه في ظهري كلامه اللي خارج من قلبه
كلها كانت أشياء كفيله تخلي قلبي يدوب جوا قلبه وينسي ويتخطي
اتنهدت بابتسامه رقيقه وانا بكتب اخر جمله في الروايه
اهداء إلي منقذي
“فجاه بدون اسباب لقيتني بمشيلك
ولقيتني بحكيلك كل اللي ما حكيتهوش
ولقيتني بآمنلك
ولقيتني بقي منك
او حد من ناسك”♥️
ومع اخر سطر كتبته لقيت اللي بيبوس خدي وهو بيهمس بحب
-وحشتيني
سيبت الفون وانا بقوم من مكاني وبحضنه وبسند راسي علي صدره
-وانت كمان اوي ياحبيبي
تمت..
لقراءة الرواية كامة اضغط على : (رواية خطف بالاتفاق)
