رواية صماء لا تعرف الغزل الفصل الخامس والثلاثون 35 بقلم وسام الأشقر

رواية صماء لا تعرف الغزل الفصل الخامس والثلاثون 35 بقلم وسام الأشقر

رواية صماء لا تعرف الغزل الجزء الخامس والثلاثون

رواية صماء لا تعرف الغزل البارت الخامس والثلاثون

رواية صماء لا تعرف الغزل الحلقة الخامسة والثلاثون

عامر وهو يقدم لها كوب القهوة الساخنة ويجلس أمامها بكافيتريا المشفى
قال:
– أنا مش هلف وأدور وهجيلك دوغري زي مابيقولوا.. أنا عرفت كل حاجة من محمد لما استغربت إنك مش عارفاني لما اتقابلنا وفهمت منه اللي حصل.
وعرفت برضه ظروف جوازك وطلاقك من دكتور يامن.
فتحاول غزل توضيح الامر فيقاطع حديثها يقول:
– أنا اللي طالبه تسمعيني للآخر.. يمكن زمان مقدرناش نكمل مع بعض وفِي حاجات أجبرتنا إن اننا مانكملش مع بعض.. فأنا دلوقتي بكرر طلبي من تاني وبقولك إن يسعدني لو وافقتي تكملي معايا وتكوني زوجة ليا.
غزل باصابع مهتزة تحاول لمس حجابها في حركة لاإرادية أظهرت توترها تقول:
– أنا.. أنا مش عارفة اقولك إيه؟ أنت عارف إن ظروفي دلوقتي بقت معقدة أكتر من الاول وكمان وجود بيسان..
عامر برزانة:
– بيسان هتبقي بنتي قبل ماهي بنتك.
يقطع حديثة ظلًا حجب الضوء عنهما ليجدا يوسف يقف بوجهه غاضب ينظر له بغيظ
يقول بحدة:
– يلا ياغزل.. الوقت أتأخر.
فيستقيم عامر قائلا:
– طيب هستأذن انا وهسيبك تفكري وهنتظر اتصالك.. وينصرف بهدوء.
……….
– اركبي احسنلك!
قالها يوسف بغضب في وجهها إلا أنها أصرت على عدم الركوب بعد أن أجبرته على التوقف بجانب الطريق بعد أن فقد أعصابه من برودها ورفضها لإبلاغه عن نوايا عامر..
تقول بهدوء:
– مش هركب.. أنا هستنى أي تاكسي معدي.
ليمسك شعره يكاد أن يقتلعه من رأسه ويحاول أن يهدئ الوضع:
– طيب ممكن بكل هدوء تركبي لان الوقت متأخر والمكان مقطوع.
فتزيد من عندها وترفض الإستماع له
فيضرب إطار السيارة بقدمه المصابة فيتألم بصوت مسموع.. وفِي تلك اللحظة لاحظ اقتراب سيارة من بعيد تضرب إضاءة كشافاتها باعينه وتصدح منها صوت عالي.. فيكتشف أنها سيارة شرطة فيزداد توتره وقلقه ويأمرها بحدة لا تحتمل النقاش أن تصعد إلى السيارة فتلبي طلبه بقلق خوفًا من تعقد الأمور.
ينزل رجل الشرطة من سيارته متسائلًا بغلظة:
– أنت إيه اللي موقفك هنا؟
فيلتفت إليها ويلاحظ انكماشها بكرسيها ثم يجيب رجل الشرطة:
– مافيش.. العربية سخنت قولت أريحها شوية.
الشرطي بسماجة:
– سخنت؟ ياراجل طيب طلع بطاقتك وبطاقة الهانم اللي معاك ورخصة السواقة.
فيجد يوسف أن الأمور بدأت في التعقد ويمد يده بجيب بنطاله يخرج محفظته ويخرج منها إثبات هويته وإظهارها مع رخصة قيادته.. بعد الإطلاع عليها يقوم الشرطي بالطرق على سقف السيارة بعنف موجها حديثه لها:
– انزلي! وهاتي بطاقتك.
تبتلع ريقها بصعوبة لقد جفّ حلقها رعبًا وهي تنظر لوجهه ذو الملامح القاسية فتمرر نظرها ليوسف الذي يظهر علي ملامحه القلق ويشجعها أن تتحرك من السيارة بهزة من رأسه.. خرجت مرتعبة تحاول أن تسيطر على رعبها فتسمع صوت الشرطي الخشن:
– بطاقتك؟
فتبتلع ريقها بتوتر وتنظر ليوسف برجاء لعله يساعدها فتجده يضع كفه الدافئ خلف ظهرها مشجعًا لها يقول:
– هاتي بطاقتك خليه يشوفها.
تبدو وكأنها لم تفهم حديثه الذي يخرج بلغة لوغاريتمية صعبة الفهم في هذه اللحظة فتعض على شفتيها السفلي كادت ان تدميها وتقول بغباء:
– بطاقتي أنا؟
فتنتفض رعبًا عندما سمعت صوت الرجل الجهري يقول بعنف:
– ماتخلصي ياحلوة.. طلعي بطاقتك يابت.
ليصرخ يوسف بوجه متناسيًا رتبته:
– احترم نفسك وماتتكلمش بالطريقة دي معاها.
ثم يلتفت للواقفة بجواره منكمشة آمرًا إياها:
– غزل.. طلعي البطاقة وخلصينا.
يلاحظ تحريك رأسها يمينًا ويسارًا مع وضع طرف سبابتها بفمها كالتلميذ المذنب وكادت أن تبكي ليتأكد من شكوكه فيسألها بهمس شديد كأنه يتوقع كارثة:
– هي البطاقة مش…؟
فتهز رأسها من أعلى لأسفل بحركة متكررة ليقول لها:
– هو يوم باين من أوله.
فيقول بثقة زائفة للشرطي السمج:
– قولتلي البوكس.. اللي هنركبه فين؟
…………
تجلس تبكي بإنهيار تام من الموقف الذي وضعت فيه بغبائها وعنادها عندما طلب الشرطي إثبات هويتها تذكرت عند نقل أشيائها من حقيبة لحقيبة أخرى انها نست محفظتها الموجود بها إثبات هويتها.. كان يجب عليها عدم العناد والركوب معه كما أمرها.. لكنها عاندت بكل كبرياء وها هي تدفع ثمن غبائها بالوقوف مثل هذا الموقف المخجل لقد اشتبه فيهما وتم تحويلها لأقرب قسم شرطة للتأكد من أمرهما ومازاد الطين بلة.. سؤال الشرطي النبطشي لها عن صحيفة أحوالها وهل قبض عليها بقضايا آداب سابقة ام لا.. لتجد اندفاع يوسف ليمسك بتلابيبه في غضب مستعر كإشعال النار وكاد أن يلكمه لولا اندفاعها أمامه فجأة فتستقر اللكمة في وجهها هي لتصيبها بحالة إغماء مؤقته.. فاقت منها لتجدهم قاموا باحتجازه بسبب تعديه على الشرطي.. وها هي تنتظر وصول شادي بعد أن طلبت من الضابط اجراء مكالمة خاصة لإحضار من يكفلها.. لم تجد إلا هو في الوقت الراهن بسبب سفر يامن وانشغال محمد بزوجته وابنائه.
فتسمع صوت طرق الباب ويدخل شادي محييا الاخر الذي يقبع خلف مكتبه يقول:
– السلام عليكم.. ازيك يا حضرة الظابط؟
فتجد الضابط يقف مصافحًا شادي بحرارة:
– عاش من شافك ياجدع.
شادي بثقة:
– أنا موجود انت اللي مختفي.
الضابط هشام متسائلًا:
– ياتري ايه اللي فكرك بيا؟ اكيد مصلحة؟
شادي بمداعبة:
– أكيد!
فتقع عينه على الواقفة بجوار الأريكة بوجه مكدوم ليقول:
– غزل! مين اللي عمل فيكي كدة؟
فيرتفع صوت بكائها وتجري دموعها فوق وجنتيها ويزداد احمرار وجهها.. فيلاحظ عدم تنفسها بطريقة طبيعية..
يقترب منها محاولاً فهم ماحدث فيسمع صوت هشام:
– أنت تعرفها؟!
شادي بضيق:
– اومال ايه اللي رماني عليك في وقت زي ده؟ مين اللي عمل فيها كده! ده أنا هوديه في داهية وفين يوسف.
فيسمعها تقول بأنفاس متقطعة:
– حبسوه في الحجز.. طلعه ياشادي هو ماعملش حاجة.. أرجوك.
………..
وقف بشعر أشعث وملابس غبرة بحاجبين معقدين كان على وشك المسك بهذا السمج مرة اخرى.. لم هذا اليوم لاينتهي ويرتاح؟
فيسمعه يقول بجفاء:
– المرة دي أنا هعديهالك بس عشان شادي.. مع اني كنت حالف ما أخرجك منها.. وبعد كده يا آنسة ماتبقيش تمشي من غير بطاقتك.
فتسمع صوت زمجرة يوسف من لفظ آنسة بيقول باعتراض:
– آنسه!
فتمسك بذراعه وتضغط عليه تمنعه من التهور تقول:
– شكرًا لحضرتك.. مش هتتكرر تاني.. عن إذنك.
ولكن مالم تتوقعه وقوف هشام بابتسامة بشوشة يمد يده يصافحها بعيون براقة قائلًا:
– معلش البوكس جه فيكي.. تسمحيلي إني ابقى أجي اطمن عليكي يا آنسة غزل؟
ليرتفع حاجبا شادي لأعلي بفاه فارغة ويهمس:
– أوبا.. أنت لعبت في عداد عمرك.
تصافحه غزل بخجل تحت أنظار يوسف المراقبة بذهول كأنه يشاهد مسرحية سمجة كسماجة بطلها تقول:
– حضرتك تشرف في أي وقت.
فيفيق يوسف من صدمته وينزع يدها من يده بقوة صارخًا:
– هو مين اللي يشرف في أي وقت؟
فيتوتر شادي بطريقة مسرحية موجهًا حديثه لهشام:
– ههههه أصل يوسف بيغير على غزل.. أنت عارف بقي ولاد عم وكده.
فيزيد كلمات هشام الموقف تعقيدا وهو مثبت عينيه عليها بإعجاب واضح:
– ليه حق الحقيقة؟ انا لو مكانه هعمل اكتر من كدة.. هخبيها عن الناس.
تثبت غزل يوسف الغاضب بإمساك ذراعه وتمنعه من التهور حتى يخرجا من هذا المأذق.. وتسمع شادي يقول بضحكة كوميدية:
– احنا يستحسن نمشي من هنا أصل نولع كلنا في المكان.. أنا شامم ريحة شياط.
هشام بغباء محاولًا اشتمام الرائحة:
– شياط؟ بس أنا مش شامم ريحة شياط.
شادي:
– أنا؟ شامم.. كفاية.. أنا.. شامم.
يهمس لنفسه:
– يخربيت اللي دخلك كلية الشرطة ياجدع.. كتلة من الغباء غير متناهية الأطراف.. هتولع فينا واحنا وقفين.
……….
– اقفي هنا.. بقولك اقفي هنا انا مش قادر أجري وراكي زي العيال! قالها يوسف وهو يلاحقها داخل الفيلا بقدمه المتألمة.
تزفز زفر قوية تحاول تمالك نفسها:
– عايز إيه مني؟ سيبني أنام لان بصراحة تعبت وكفاية البوكس اللي رشق في وشي.
يوسف بغيظ:
– حد عاقل يقف بين اتنين رجالة بيتخانقوا؟
غزل باستهزاء:
– لا أبداً المفروض اسيبك تودي نفسك في داهية ويلبسك قضية.
يوسف بغضب:
– يعني كان عاجبك كلامه وسؤاله.. وكمان تعالي هنا ايه حكاية النحنحة اللي شفتها بعيني دي؟
غزل تشاور على نفسها ببراءة مصطنعة:
– أنا.. أنا معملتش حاجة.
يقترب منها ويجذبها من ذراعها فتقترب منه وتلفح انفاسها وجهه وعنقه بطريقة مثيرة:
– غزل.. ماتلعبيش معايا، انت عارفة اقصد ايه.. انا مش عارف هفضل امشي وراكي احوشهم عنك.. انا هلاقيها من عامر ولا من السمج هشام.
غزل باستفزاز تحاول أن تثير جنونه اكثر وأكثر:
– وتحوشهم ليه؟ أنا مسيري أشوف حياتي.. عاجلا أم آجلا.. زي ما أنت شوفتها قبل كدة.
فتشعر بالم شديد بذراعيها تحت كفيه وتسمعه يهمس أمام وجهها بأنفاسه الساخنة الملتاعة:
– حياتك معايا.. معايا أنا وبس وماتحلميش بغير كده أما حكاية شوفت حياتي دي فبقولك ياغزل انا ماليش حياة قبلك ولا ليا بعدك.. اليوم اللي بيعدي عليا وأنا بعيد عنك مش لمسك ومش واخدك في حضني.. اليوم اللي كل دقيقة فيه بموت من الخوف لا تفكري تبعدي تاني وتختاري شخص تاني غيري.. بتمزع فيه بسكينة تلمة.. أنا مش عارف أنام ياغزل.. نفسي أنام وأنا مطمن مش بحارب شيء مجهول..
نفسي تبطلي تطلعي في كوابيسي.. ارجوكي.
……….
كل يوم يمر عليها تشعر برضا غريب من نوعه كلما نظرت لعينيه واستشفت منهما ألمه وعذابه كلما زاد رضاها.. هل أصبحت مريضة تتمتع بعذاب الآخرين.. وبعذاب من؟ حبيب الروح؟ لامت نفسها على هذا التفكير.. عفوا فهو ليس حبيب الروح بل معذب الروح. هذا مايليق به!
تفيق على اقترابهما المنذر بالخطر وأنفاسه المضطربة تلفحها بدفء فيطول بينهما النظرات المعاتبة لتحرك يديها ببطء لتزيح يديه الممسكة بها قائلة:
– أنت أكبر كداب ومخادع عرفته في حياتي.
صدمه رد فعلها بعد تسوله بعض المشاعر منها.. يبتلع ريقه ويتراجع خطوة عنها يقول:
– كداب؟!
غزل تحرك رأسها من أعلى لأسفل:
– ايوه.. كداب.. أنت فاكر الكلمتين دول هصدقهم؟ وبعدين اترمي في حضنك وأقول خلاص يا يوسف سامحتك؟
لو تفتكر إن نفس الموقف ده حصل قبل كده فاكر يا يوسف؟ فاكر ليلة جوازنا عملت فيا ايه؟ وجيتلي ندمان وطالب السماح.. وأنا الغبية اللي صدقت ندمك.. جاي دلوقت تكرر المسرحية السخيفة والمفروض أبقى غبية للمرة التانية.. مش هستريح إلا أما اشوفك بتموت بالبطئ.. انت خلاص ميت يايوسف بالنسبة لي.. مييييت ميييييييييت.
تقسم أنها كادت أن ترى دموعه.. لولا تماسكه أمامها
لتكمل بقوة:
– غزل بتاعت زمان ماتت وانت دفنتها بإيدك يوم ماطعنتها في شرفها.. معلش اصل مايلقش ليوسف بيه واحدة كانت معاقة.
تنصرف من أمامه تحت نظراته المنكسرة.. لتتوقف فجأة عند سماع سؤاله:
– ماسألتيش ليه عن نانسي؟ مش عايزة تعرفي هي مش معانا ليه؟
فتسمعه يضحك ضحكة خشنة غريبة مخيفة يضحك بهستيريا وينصرف كأن مسه شيطان يردد كلمة واحدة اثناء ضحكة الهيستيري:
– انت ميت يا يوسف! انت ميت.. ميت، انت فعلا ميت.
تشعر بقبضة شديدة ضربة قلبها من تكرار الكلمة على مسامعها رغم أنها من قالتلها ولكنها لم تشعر بهذا الالم عندما نطقتها.
……………..
شادي أنا عايزة اطلق.. قالتها سمية في وسط بكائها.. ليرتفع حاجب شادي من مظهرها فيكمل خلع حذائه يقول:
لو كل واحدة جوزها نزل في نص الليل طلبت الطلاق البلد كلها هتطلق ياسمية.
سمية ببكاء شديد:
– شادي أنا مش بهرج أرجوك!
يستمر في خلع قميصه وهو جالسًا فوق فراشه:
– طيب ممكن أعرف سبب جنانك ده على الصبح عشان أنا مانمتش من امبارح.
يراها تفرك يدها بتوتر وتجلس تحت قدميه وتمسك قدمه اليمنى وتنزع عنه جواربه ببطء، فهذه الحركة تؤثر قلبه رغم بساطتها وعفويتها إلا أنها تمثل لها الكثير.. فيرفعها ليجلسها على رجليه بين أحضانه ويملس على شعرها الأسود يقول:
– ممكن حبيبتي تهدي وتقولي إيه الطلب الغريب ده؟ أنا زعلتك في حاجة؟
فتهز رأسها بالرفض.. ليكمل:
– طيب هو أنت عندك أحم.. يعني.. اختنا الزائرة؟ لتهز رأسها مرة اخري بالرفض بخجل شديد.
شادي بتعب:
– في ايه بقى؟ ليه التقلبات الأنثوية دي بس؟!
سمية وهي تمسح دموعها:
– عشان ماتستاهلش واحدة زيي.. انت لازم تشوف حالك ياشادي.. أنا عمري ماهسعدك.
شادي بضيق:
– لا إله إلا الله.. يا ولي الصابرين.. كام مرة اتكلمنا في الموضوع ده؟ آه أنا فهمت.. كل ده عشان سوزان خلفت.. مش كده؟
يوقفها ويقف أمامها بوجه بارد قائلًا بصلابة:
– شوفي ياسمية.. عشان ده هيبقي اخر كلام عندي.. موضوع الخلفة ده منتهي.. أنا مش عايز خلفة.. لكن لو سمعت منك كلمة طلاق تاني اقسم بالله لاهتشوفي وش تاني انت ماتعرفهوش.. فاهمة!
يعطيها ظهره بغضب قائلًا:
– اتفضلي أخرجي عشان محتاج أريح ساعتين لاني نازل الشركة.
ترتعب من سلوكه الغير معتادة عليها فهو دائمًا يحتويها ويفيض بالحنان لكن الآن؟
تحاول إرضائه فتقترب منه وتحاول وضع كف يدها على ظهره.. فتسمعه يقول:
– سمية! اخرجي حالًا.
لم تتحمل قسوته الجديدة عليها فيزداد نحيبها المكتوب وتضع يدها فوق فمها، وتخرج بأرجل غير قادرة على حملها.
بعد لحظات سمع صوت ارتطام عاليا جدًا فينقبض قلبه بشدة ليخرج مهرولًا من حجرته يجدها ساقطة بأرضية المطبخ.. يجري عليها محاولًا إفاقتها برعب أوقف قلبه يحاول ضربها عدة ضربات فوق وجنتها.
………..
يجلس فوق الأريكة يهز قدمه بحالة عصبية نظره مُثبت على باب حمامه.. فمنذ أن فاقت واختفت داخله وهو ينتظرها بقلق شديد من حالتها.. وجهها باهت اللون وعيونها زائغة فهي ليست على طبيعتها التي اعتادها.. يطول الإنتظار ولم يستطع الصمود أكثر ليقفز متجهًا إلي الباب يطرقة بعنف فيرى الباب يفتح ببطء وتخرج منه دون النظر إليه واضعة كف يدها فوق صدرها كأنها تعاني من شيء ما
وتتحرك لتقف في وسط الحجرة تائهة تلتف يمينا ويسار كأنها تبحث عن شيء.. يضيق شادي عينيه مع وضع يديه بخصره يناديها:
– سمية!
لا تجبه وتظل تدور وتلتف مع ثبات يدها فوق صدرها.. فيظن انها تتجاهله بسبب ماحدث قبل اغمائها.. ليكرر ندائه بخشونة:
– سمية! أنا بكلمك.
فتقول اثناء بحثها:
– هو راح فين؟ كان هنا..
يفيض به ويشعر بأنه سيقتلع شعرها من رأسها فيقترب منه يقول:
– بصيلي وأنا بكلمك.. بتدوري على إيه؟
ليلاحظ مسكها لهاتفها المندس تحت الوسادة تقول:
– اهو لقيته.
فيزداد غضبه من تجاهلها.. فيقول بصوت غاضب:
– أنا رايح أنام في الأوضة التانية لحد ما حضرتك تخلصي اللي بتعمليه.. وتبقي فايقة تردي عليا.
يتحرك لغرض الخروج قبل أن يفقد أعصابه عليها إلا أن كلمتان خرجتا منها تسببت في تصلب جسده بالكامل يكاد أن يقسم أنها تهزي أو أصابها مَس من الجنون.. فهذا الموضوع لايقبل المزاح ابدًا.. يلتف لها نصف إلتفاته ببطء لعله يتأكد مما اخترق سمعه فيشاهدها تقف ممسكة بهاتفها بكفيها وعيونها مثبته على وجهه تملؤها الدموع التي تأبى التحرر مع ابتسامة هادئة لا تستطع السيطرة على اهتزاز شفتيها.. فيبتلع ريقه يسألها:
– انتِ قولتي ايه؟!
تجيبه بصوت مبحوح:
– أنا حامل!
فيسألها بحذر:
– حامل؟ عرفتي إزاي؟
فتخلت عن خجلها للحظات تقول:
– لما دخلت الحمام كنت شايله اختبار في الحمام من وراك عشان انت منعتني ان اشتري قبل كده.. فلقيته إيجابي.
شادي بعقلانية فهو لا يريد أن يحطم أحلامها:
– انت متأكدة ياسمية.. أنا قلبي هيقف.. يمكن يكون التحليل غلط.
فتهز رأسها برفض وسط دموع فرحتها:
– أنا اتأكدت.. أنا بسجل كل شهر معادها في التليفون ولقيت إن معادها عدى من فترة وأنا مش واخدة بالي.
يقترب اكثر ويحتضنها بقوة شديدة يريد منها ان تذوب به ويقول:
– الحمد لله.. الحمد لله يارب.. أنا حاسس إني بحلم.. بس بقولك إيه احنا لازم نتأكد الأول أنا مش هستحمل يطلع كدب.
سمية بسعادة:
– اخيرا ياشادي هشيل حته منك جوايا انا مش مصدقه.. ألف حمد وشكر ليك يارب.

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية صماء لا تعرف الغزل)