رواية غرباوية عاشقه شرقاوي الفصل الأول 1 بقلم روياتي
رواية غرباوية عاشقه شرقاوي الجزء الأول
رواية غرباوية عاشقه شرقاوي البارت الأول
رواية غرباوية عاشقه شرقاوي الحلقة الأولى
قصة واقعيه من مدينة طرابلس وبنغازي 🌹✨
نحكي وكأني انا صاحبة القصة عشان توصل القصه بطريقه حلوه ..
اسمي ايناس من طرابلس بس الكل ينادي فيا نوسه العند اسمي ناسيته 🤭
مواليد 98 مواصفاتي بيضه عيوني كبار لون عيوني عسلي فاتح مائل للجيشي باللغه العاميه يعني😆 شعري طويل لونه قهوي .. نعتبر قصيره بس مش واجد جسمي وسط مش رقيقه ولا سمينه معتدل 🤍✨
عائلتي تتكون من اربع بنات ولد واحد وماما وبابا
خواتي متزوجات كنت مزالت انا بس بحكم اصغر وحده وخويا حتى هوا مش متزوج يعني الحوش فيه انا وخويا وماما بابا
طبعآ انا مخطوبه الاخ صاحبتي المقربه بعد قصة حب اربع سنوات …💔
وكذلك صاحبتي الي هيا اخت خطيبي تحب خويا ودايره معاه علاقة ف حدود سنه تقريبآ بس من دون خطبه ماكانش ف حد من هلي ولا هل خطيبي عارف الي بينهم
ف وقتها كنت نسكن ف طرابلس وخطيبي كذلك يسكن ف طرابلس …
مواصفات خطيبي كاين يعتبر اشقر طوله متوسط عصبي جدآ وعند الغلط مايرحمش بس باقي اطباعه حلوه يخدم ف بحث جنائي …
انا خريجة صيدله بس كاين مانع عليا العمل وحتى طلعه بحسابه🤐
نحكيلكم ع شخصيتي انا هاديه ومش معا اي حد نحكي مش كل شي يعجبني🙂 الوسط امتاعي ناس راقيه وتشبه شخصيتي مانحبش نطلع الا وانا ف كامل اناقتي حتى لو كنت مستعجله نحب يكون الميكب بسيط وهادي مرات نطلع من دونه بكل طبعآ لانه جميله حتى من دونه😌🤣..
كانت الحياه ماشيه طبيعي بينا العند ف يوم من الايام ونعتبره اسود ليله ف حياتي💔
ولي هيا خطيبي مسك اخته تحكي معا خويا مكالمة فيديو تقريبآ ساعه 1 ف ليل طبعآ هوا عارف خويا كويس لانه صارت صحبه بينهم بعد الخطوبه وخذا منها تيليفون وشاف كل شي بينهم وكانن ف محادثات وصور فاضحه وشافهن كلهن🥺
واليوم هذا نحنا كنا ع بحر يوم كامل روحنا تعبانين ورقدت دغري من تعب ف وقت نومي كانت ترن عليا اخت خطيبي من تيليفون امها تبي تقولي انه خطيبي جاي الخويا وانه عرف كل شي بس انا كنت راقده مافطنتش للتيلفونج للاسف !!…
ماوعيتش الا ع صوت عياط ماما وبابا هرجة رجاله وكانت تقريبآ ساعه 2 ف ليل
طلعت نجري ال ماما انقوللها شن في تقولي خطيبك جاي يضرب ف خوك وعلقوا ف بعضهم ويقوله تخون فيا معا اختي من ورايه تطلب منها ف حاجات مش تمام ومعاه الكلام واجد مش حابه نكتبه …🤐
ماما كانت ترعش ومش مصدقه الي صار ومش فاهمه شي
وانا مصدمه ودموع ينزلن من دون صوت جن ف بالي جميع الافكار ماعرفتش نزعل ع خويا ولا صاحبتي ولا خطيبي الي دمر علاقته معا هلي للابد …💔
ماحوتك انحزت المشكله وجيران شهدو ع كل شي ونفضحنا خش خويا يبحت فيا ويقولي والله ماهو واخذك انسيه وبابا يقولي خطيبك ايسب فيا وف امك ويشتم ف هلك كلهم معش في نسب بينا الموضوع هذا انسيه من توا بكرا ردي كل شي جابه وطلعيه من حياتنا ماما تقول ربي اكشفه لنا بدري الحمدالله قبل ماياخذك. ..
وانا مصدمه ف كلامهم شن صار رقدت وعيت حياتي انقلبت فجأ انا شن ذنبي ف قصه هذي وهوا شن ذنبه هذي اخته شرفه وعرضه اكيده تبي تكون رد فعلا هكي بس تمنايت ف وقتها انها مش معا خويا ياريتها كانت معا حد اخرى ليش خويا بالذات ايدمر حياتي هوا واعز صاحبه عندي. ..
حاولت انفهم هلي انه خويا غلطان وانه خطيبي رد فعلا طبعيبه لانه اخته هذي بس مافش فايده هما معترفين انه خويا غلطان بس حتى هوا غلطان لانه شتم انسباته ف مكان امه وباته وهما مالهمش ذنب ومتاكدين انه العلاقه بينهم مستحيل اترد نفس قبل ولا حايقدرو ينسو الي صار بينهم لانه القصه وصلت للضرب وقعدت مشكله بين عائلتين 😐
عديت الداري مش قادره نمشي ع كرعيا من الفجعه قمعزت وحاولت نستوعب الي صار عقلي مش قادر ايتقبل كيف ف يوم وليله يبوني ننسا حب اربع سنوات ع ذنب مالنش علاقه فيه
رنيت ع خطيبي لاني كلمه نضايق انجيه هوا نبيه يهون عليا ايقولي اي شي ايطمني انه ف حل للقصه هذي رد عليا وكأنا شخص اخر صوته مخنوق مليان حقد وعصبيه انفجر فيا ايقولي شن تبي مني ياخاينه اخساره فيك الثقه الي عطيتها لكي قتله خاينه……. ف شنو خنتك انا قالي عارفه كل شي ومخليه خوك يلعب ع اختي وياخذ ف صورها ويتفرج ع عرضي وشرفي انا وانتي ساكته اخساره تكوني زوجتي و ام عيالي وحده ماتسترش ف شرف راجلها انا نبكي من كلامه مصدومه كيف قادر يحكي معايا هكي … قتله والله مايلعب ويبي يخطبها لكن انت عارف وضعه توا مايسمحش انه يخطب يبي يجهز روحه وبعدها يخطبها ماعطانش فرصه نحكي ولا انفهمه كملها ايسب ويلعن فيا انا وهلي 💔
قالي الله يلعن اليوم الي عرفتك فيه وحبيتك فيه وسكر عليا وحطني ف حظر☹️
انا من صدمه طلعت الشمس وانا مقعمزه ع سرير عيوني معبيات دموع مابنش ينشفن بكل خشت عليا ماما تسأل فيا قتلها سيبني من قبل مانسيبه …
عم خطيبي جانا تاني يوم يبي يفهم الي صار يعرف نيت هلي قاله باته مش قادر ايجيك عارفه روحه حايخش ف مشكله معاك قلت انجي انا خير بابا قاله ولدي عارفه انه غالط وهوا جا اضربه وخذا حقه توا خلو كل واحد ف حاله كلا انه ياخذ بنتكم مستحيل لانه بعد الي صار بينا معش فيا احترام قال لا ياخذ بنتكم ولا انتم تاخذو بنتنا ….. جاني بابا قالي عطيني دبله وكل حاجه نعطيه العمه وخلي القصه تفضى توا ….
مديت ال ماما دبله وانا يدي ترعش ومش قادره انصبي ماما قعدت ادور ف باقي الحاجات الهدايه وطاقم ولمتهن كلهن وعطتهن ال بابا وعطاهن العمه وقاله مافش نصيب وعدا وخذا فرحتي معاه 💔
بعد مشيت عم خطيبي بحاجة ساعتين ايفك الحظر خطيبي ويرن عليا وانا رديت طول . .
قالي باتك كيف ايدير هكي مش ساده ولده غلطان داير روحه يبي يمكرني اخرى توا ايشوف شن انديرلا كيف يكون المكر وقعد يسب ويشتم قتله انا بعد كلامك الي سمعته منك مستحيل نقدر انتقبلك ممكن هذا الحل المناسب بينا وسكرت وانا قلبي مكموت كأنا في غصه مش قادره تطلع ..
معش تواصل معايا وجنا خواتي حاولن ايصبرني لكن الصبر ايجي معا الايام ومن ربي اكيده وكل شي عندا حكمه من الله 🤍
مرن يومين وفجأ خويا انحبس بحكم انه خطيبي ف بحث جنائي وعندا وسطات بابا سأل وتأكد انه هوا الي كان السبب وهلي انهارو ماعندهمش الا خويا مايتحملو فيه شي وبابا كبير ف عمر ومريض معتمد ع خويا ف كل شي ….
مرن كم يوم كانن ايام صعبه بجديات علينا بالذات عليا رنيت ع خطيبي مابش ايرد بعدها ف ليل رن ابروحه قالي كنك قتله كيف نهون عليك ادير فيا هكي عشان خاطري طلع خويا والله نطلعو من حياتكم معش تشوفوا منا شي قالي انا نمكر ف باتك الي دار فيا هكي ورد كل شي ودمر حياتي حتى انا ولده هوا الي غلطان قعدت نحاول نقنع فيه انه ايطلع خويا قالي بشرط ….. قتله شنو قالي نبي انشوفك قتله عليش قالي نحكي معاك من قريب اخترت مكان عام وقتله انتلاقو فيه قالي لا نبيك ابروحك انجي انا ناخذك حاجة ساعه نحكو ف سياره مانبش نحكي قدام ناس ونبي مكان ابروحنا قتله انا ماركبتش ف سيارتك وانت خطيبي يابال توا بعد انتهاء بينا كل شي …..
سكر راسه ع موضوع هذا وقعد ايهدد فيا انه يقدر يقتل خويا وانه يقدر يضر بابا ماعدلتش عليه
قعد يهدد فيا انه يخطفني بالغصب لو ماطلعتش معاه وانه ياخذني غصبن عن هلي بصراحه انا خفت ونفسيتي ادمرت ومعش قعدت نطلع من الحوش بكل وكل يوم تهديدات ايزيدن وانا مش امصدقه انه هذا نفس الشخص الي حبيته انا وقعدت نقرف منا بجديات لانه يصدمن الرسايل الي ايدز فيهن ليا مع انه ف حظر قاعد بس يطلعن الي ع شفره معش قدرت نسكت خفت معش نرقد ف ليل انتخيل فيه يزقب علينا لانه عارف الحوش فاضي مافش الا بابا الراجل الوحيد ويعتبر شايب وعارفه مش حايقدر عليه …
قلتها ال ماما وهيا انهارت اشر مني وحاولت تفهم بابا وهوا كلم عمه وحكاله الي صار قاله ماعندنش حل العيل بعد الي صار فيه انقلب فجأ حتى ع هلا الموضوع مش ساهل وبابا حاول ايدخل كم حد ف موضوع واخر شي دارو اجتماع ف حوشنا قالو ال بابا احسن شي اتباعد وتقرب هلك العند ولدك يطلع من الحبس وتنحل المشكله لانه بابا هلا يسكنو ف بنغازي هوا الوحيد الي يسكن ف طرابلس بحكم شغل امتاعه ويسكن من زمان بكل وانا من الاساس مولوده ف طرابلس يعني متعودين عليها وقليل بكل وين نمشو ال بنغازي الاغلبيه بابا يمشي بروحه لانه مربوطين بالقرايه وعمل ماما واغلبيه كان خطيبي مايخلش فيا نمشي معا بابا ال بنغازي كان ايتحكم ف كل شي بس مش قصة غيره لانه ديما انحس انه قلت ثقه …
قعد بابا اقريب شهر يفكر ف موضوع بعدها قرر انه ننتقلوا ال بنغازي عليه ماخويا طلع من الحبس ونحلت المشكله كاين خايف عليا انه ايدير فيا حاجه وبابا يندم طول عمره انه ماقدرش يساعدني وقعدنا نسمعو انه خطيبي قعد يسكر وتعاطه وكلام واجد الناس ماتصدق اتشوف مشاكل بين حد عشان تقعد توصل ف فتنه وقرمه ماكنتش عارفه الكلام صح ولا كذبه بس كنت حاسه انه صح لانه الرسايل مش امتاعت واحد طبيعي ولا من طبعه انه يكتبلي هكي…..
غيرت شفرتي وايميلي وكل شي ايخصني ع مواقع التواصل الاجتماعي مع هذا خايفه….
كان خبر صادم الخواتي انه نبو انتباعدو عليهن ومش عارفت حاتقعد فتره طويله ولا قصيره ..
قعدنا انجهزو ف دبشنا وحاجات الشخصيه فقط وحجز بابا ف طياره وكل شي طبعآ هلا بابا عارفين انه ف مشكله وخويا محبوس واني انا انفصلت ع خطيبي يعني تفصيل المهمه الي عارفينها وبابا عطاهم العلم انه نبو نقعدو عندهم فتره علي ماطلع خويا ….
طبعآ انا جدي متوفي وحني بس الي قاعده ف حوش ومعاها عمتى زوجها متوفي وماعندهش الا عيل واحد طبعآ هيا بعد زوجها توفا باعت شقتها وبنت فوق حنى ولما ولدها كبر زوجاته ف شقه وهيا سكنت لوطه معا حني لانه عماتي متزوجات ماعندش الا عم واحد وساكن برا ابروحه يعني يعتبر الحوش فاضي هيا وحني ولدها يسكن فوقهم
ولدها اسمه محمد مواليد 92 طويل لونه حنطي قريب من الاسمر😆 يعتبر جميل ولحيه جذابه وشخصيته قويه مهندس ويخدم ف شركه معروفه مكانته كويسه ومراته معروفه ديما خايفه وغايره عليه🥲 لانه هوا متزوج له سبع سنوات بس ماعندش عيال ويقولو السبب مراته عندها مشكله صحيه….
جا موعد رحلتنا مشينا للمطر وانا حاسه روحي مش كأني نبي انسيب طرابلس بس كأني نبي انسيب حياتي معاها وذكرياتي وطفولتي ….
سافرنا ونزلنا ف مطار بنغازي جا عمي خوا بابا استقبلنا عدينا الحوش حني. .. لقينا عماتي وعيالهن هرجة عيال اصغار طبعآ انا مستكه مش متعوده ع الاجواء هذينا ولا عليهم لانه مانمشش واجد ولا هما يعرفوني كويس ديما واخذين عليا فكره متكبره مغروره تفكير سطحي هيا حقهم يفكرو هكي لانه شخصيتي للناس الي ماتعرفنش اتبان هكي …
هما ايهدرزو وانا انفكر كيف نبي انعيش معاهم ونستقر ف وضع هذا حاتقعد عندي دار ابروحي كيف حوشنا ولا حانتبهدل ونتعب افكار شينه ف بالي مش وقتهن بس مابنش يطلعن من بالي ..
نزلت مرات ولد عمتي اسمها فاطمه مواليد 94 دبدوبه مش ارقيقه مش بيضه واجد ولا سمره بكل كويس لونه ملامحه كويسات مش شينه ممكن لو رقيقه تقعد اجمل… 😅
سلمت علينا ولما شافتني حسيتها ملامحها تغيرن كأنها تنكدت هيا الها فتره طويله ماشافتني حتى لما جيت ال بنغازي من زمان هيا كانت مسافره معاه راجلها تعالج ع ضنو ماشافتنش من فتره طويله . .
قمعزت جنبي وقعدنا نحكو عادي وفجأ سألتني قالتلي انتم تبو تسكنو هنا ولا تأجرو برا قلتها الحق توا بابا مش امفكر ف ايجار برا بحكم انه حنى مامعهش حد الا عمتي ويعتبر الحوش فاضي … قالت انا راي لو تأجرو برا احسن اتريحو ف حوش ابروحكم خير من حوش العيله ايجوه العرب ديما ماتاخذوش راحتكم انا حسيت كلامها مش وقته الي تقول فيه ولحق من وقتها ماتقبلتهش وحسيها انسانه ماعندهش ذوق ولا تعرف تحكي…..
غيرنا نقاش وفجأ خش محمد ولد عمتي وراجل فاطمه🤐
سلم ع ماما وبابا جا سلم عليا باليد بعدها قالي ماشاءالله طرابلس بسرعه ماتكبر ف بنات متغيره بكل والابتسامه ع وجا😆
بابا قاله الله غالب ماعندنا الا هيا كل شي تاكل فيه وهذا كله مش طالع عليها بطريقه الي تاكل بيها قعدو. يضحكوا كلهم وانا ف حالة احراج معا ابتسامه خفيفه🙉🙈
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية غرباوية عاشقه شرقاوي)
