رواية اتنين في واحد الفصل الأول 1 بقلم إيمان شلبي
رواية اتنين في واحد الجزء الأول
رواية اتنين في واحد البارت الأول
رواية اتنين في واحد الحلقة الأولى
-بقي هو ده العريس اللي ماما منكده عليا عشان اقابله لا حول ولا قوه الا بالله سبحان الله ويخلق ما لا تعلمون ؟؟
قولتها بذهول في نفسي وانا قاعده قدام عريس الهم والندامه اللي كان بيطرقع لبان!
بالله حد يجي يلحقني قبل ما اقوم اطبق في زماره رقبته ياناس
بصلي من فوق لتحت وبعدها حط رجل علي رجل :
-هاي
رفعت حاجبي وانا برد بضيق :
-هاي ورحمه الله وبركاته
طرقع لبان بصوت عالي وعمل بلونه كبيره مفكر نفسه منفاخ بروح مامته،
-انتي اسمك ايه؟
رديت بسخرية :
-وانتي متعرفيش العروسه اللي متقدمالها اسمها ايه يابيضه؟
اتعصب ورد بتذمر:
-انا ولد علي فكره
برقت عيني بذهول :
-وربنا اومال متنكر في صوره بنت ليه ياعسل
-بصي يا انسه انا عندي شويه شروط كده عشان اوافق اتجوزك
ابتسمت ابتسامه صفراء :
-كل اذني صاغيه
-اول حاجه لو بتتعملي هتوقفي تعليم ،تاني حاجه لو بتشتغلي مفيش شغل انا أقدر اصرف عليكي ،تالت حاجه احنا هنعيش في بيت عيله بس كل قعدتنا هتكون عند ماما تحت ،وتسمعي كلام ماما وتحترميها واي حاجه اقولك عليها تعمليها من غير نقاش ،وهتلبسي نقاب لاني راجل شرقي محبش حد يشوف مراتي
ضحكت لا ضحكت اي ده أنا فصلت ضحك من كلامه وهو قاعد مش فاهم انا بضحك ليه و بيبصلي ببلاهه
-طب مش عايز شيكابون لأمك بالمره ياكتكوت؟؟
رفع صباعه في وشي بتحذير :
-احترمي نفسك يا انسه وإلا….
قاطعته بخوف مصطنع :
-ايه هتروح تشتكي لمامتي وتقولها اني اخدت منك كيس الشيبسي بتاعك خلاص متعملش كده انا اسفه هديك تمنه
قام وقف وهو متعصب :
-نووو بجد نووو انتي مش طبيعيه خالص
اتعصبت انا كمان وانا بمسك فازه كبيره وبحركها قدام وشه:
-غور ياض من هنا بدل ما افتحلك دماغك بيها قال مفيش تعلم ولا شغل وعايزني البس نقاب كمان مش عايزDvD بالمره يا محور الكون يا أخر قطعه في الكيمو كونو ؟
وقف علي الكنبه وهو بيشاورلي بأيده :
-لو سمحتي اهدي كل حاجه بتتحل بالعقل
-عقل هو انت خليت فيها عقل ده انا هخلي وشك مكان قفاك
بلع ريقه وهو بينادي علي مامته بصوت عالي :
-مااااامي تعالي الحقيني في متوحشه هنا بتتهجم عليا
برقت بصدمه وانا برد بذهول :
-بتتهجم عليا ينيلك راجل مش مكسوف من نفسك وانت بتقول كده نهار اسود
دخلوا اهلي وأهله علي صوته وهو بيستنجد بيهم شافوني واقفه وماسكه الفازه وببصله بغضب وهو واقف بيترعش فوق الكنبه
بابا بقلق :
-في ايه ياولاد مالك يابني واقف فوق الكنبه كده ليه شبه ألاهبل
رديت عليه بشراسه:
-عشان اهبل زي ما بتقول قال ايييه وقفي تعليم ومفيش شغل وهنعيش في بيت عيله وهتلبسي نقاب جايبينه من انهي داهيه ده يابابا ؟
بابا وهو بيضرب كف فوق التاني بذهول :
-لا حول ولا قوه الا بالله استهدي بالله بس يابنتي وخلينا نتكلم بالراحه.
-بلا راحه بلا بتنجان خليه ياخد بعضه هو والست الوالده ويتكل علي الله من هنا
نزل من فوق الكنبه ورد بغيظ :
-تمام احنا هنمشي بس علي فكره مش هتلاقي حد زي
زغرطت كرد فعل تلقائي مني :
-لولولولولولولي ياخويا بركه هو انا ناقصه بلاوي !
مسك ايد مامته اللي كانت واقفه منطقتش حرف واحد
-يلا يامامي نمشي من هنا
ولف وشه مره تانيه وهو بيبصلي بقرف:
-بس علي فكره انتي الخسرانه وبكره تندمي ندم عمرك انك رفضتيني
وطيت وقلعت الشوذ بتاعي وانا بهوشه بيه :
-امشي غور بدل ما افشفش دماغك بيه
طلع يجري بخوف من قدامي ومامته ماشيه معاه وعيونها بتلمع بالدموع
ــــــــــــــــــــــــــــــــــــــــــــــــــــــــــــــــــــــــــــــــــــــــــ
تاني يوم كنت قاعده مع اصحابي في الكليه بحكيلهم علي اللي حصل مع عريس الغفلة وهما قاعدين بيضحكوا عليا
واحده صاحبتي بضحك:
-مش معقول بجد هو لسه في حد بالعقليه ديه؟
هزيت راسي بيأس:
-متخلف
-احم لو سمحتوا ممكن اعرف فين مدرج احمد فكري
قومت اتنفضت من مكاني وانا مبرقه بصدمه
-انت؟
رفع حاجبه باستغراب :
-حضرتك تعرفيني
ربعت ايدي في بعض وانا ببصله برفعه حاجب :
-والله وعامل نفسك متعرفنيش كمان ياعريس الهم والندامه انت !
اتعصب وجز علي أسنانه :
-انا فعلا معرفكيش يا انسه انتي مين
رديت بعصبيه:
-متعرفنيش ازاي يعني وانت كنت متقدملي امبارح
ضرب كف فوق التاني باستغراب :
-لا حول ولا قوه الا بالله تبقي قاعد في بيتك في امان الله تلاقي نفسك كنت متقدم لواحده شبه النسناس امبارح
برقت بذهول من تشبيه وقربت منه وانا بمسكه من طرف قميصه
-نسناس مين يا عره الرجاله يابو لبانه شبه الستات بقي انا نسناس وانت شبه الغوريلا بودانك دي
عيونه اتحولت للون الأحمر وعروق رقبته برزت وجز علي أسنانه وهو بيقولي من بيه أسنانه :
-شيلي ايدك يا انسه وإلا هتشوفي تصرف مش هيعجبك
بلعت ريقي بصعوبه وقلبي اترعش بخوف من هيئته وكأنه شخص تاني غير بتاع امبارح
زعق فيا جامد لدرجه اتنفضت ورجعت خطوه لورا بذهول
-ابعدي ايدك عني
رفع صباعه في وشي بتحذير :
-قسماً بالله لولا أنك بنت كان زماني شايف شغلي معاكي بس انا متعودتش امد ايدي علي بنات
قال جملته ولف وكان هيمشي بس وقف تاني ولف يبصلي من فوق لتحت
-ونصيحه للزمن قبل ما تعملي تصرف متهور زي ده تاني ابقي فكري ميه مره عشان مش كل الناس محترمه زي
خلص كلامه ومشي وانا واقفه مش فاهمه اي حاجه!
قلبي كان بيدق برعب ،جسمي كان بيتنفض من نظره عيونه المرعبه وكأنه ذئب هينقض علي فريسته
قعدت مكاني علي اقرب كرسي وانا ساكته مبنطقش حرف
-كارلا مالك في ايه انتي كويسه ؟
هزيت راسي بنفي وشرود:
-لا
-هو انتي متأكده أن ده العريس اللي كان متقدملك ما يمكن واحد تاني شبهه ؟
هزيت راسي بنفي وانا برد بجنون :
– لا انا متأكده أنه هو والله هو ده حتي كان لابس نفس القميص ده امبارح
واحده صاحبتي بتفكير:
-طب ما يمكن ليه اخ توأم
-توء جارتنا قالتلي أنه ملهوش اخوات
واحده تانيه :
-بس ده شخصيته شكلها قويه عن الشخص اللي حكيتي عنه امبارح ؟
هبدت علي الطربيزه اللي قدامي بعصبيه:
-ماهو ده اللي هيجنني ده شخص وده شخص تاني خالص
-امممم تفتكري مكانش عايز الجوازه وعمل كده عشان يطفشك
رديت بتفكير وحيره :
-تفتكري
-جايز
اتنهدت بحيره وانا بفكر وفي كم اسئله جه في بالي في الثانيه الواحده وللاسف مفيش اي اجابه!
-يلا يابنات عندنا محاضره في مدرج احمد فكري
بلعت ريقي بتوتر :
-د دلوقتي
-ايوه يلا بينا عشان الدكتور ده صعب اوي
هزيت راسي وحاولت مفكرش في الموضوع لانه كده كده خلص وهو أخد اللي فيه النصيب امبارح
وصلنا المدرج لقينا زحمه شباب وبنات واقفين بيتفرجوا علي حاجه مش عارفه ايه هي
-هو في ايه
واحده من البنات بهيام:
-ده مروان بيضرب واحد
لويت بوقي بسخرية:
-ومالك فرحانه كده وكأنه بيكرمه ؟
مسكت خصله من شعرها ولفتها علي صوابعها وهي بتميل برأسها علي كتفها :
-عشان هو جنتل اوي وقمر اوي وسكر اوي ادعولي اتجوزه يابنات
واحده تانيه بشراسه:
-لا أن شاء الله لا يتجوزني انا يارب
واحده تالته وهي بتبصلهم بقرف:
-ولا انتي ولا هي مروان بيحبني انا ووعدني بالجواز
واحده رابعه :
-اوماااااااي جاد بتهزري وعدك أمتي هو وعدني انا وقالي أنه بيحبني ياكذابه
-نوووووو مروان بيحبني انا
-نوووو بيحبني انا.
-لا انا
-انا
قاطعتهم وانا بصرخ:
-بااااااااااس خلاص انا اللي اكلت الجنبه اخرسي منك ليها
في الآخر تلاقي سي مروان ده عامل شبه القرد
الكل سكت والزحمه بدأت تتلاشى وظهر ” مروان ” وهو بيجر واحد وشه مش باين من قفاه من كتر الضرب
اول ما شوفته وقفت تنحت وانا برمش بعيني اكتر من مره :
-الاه الاه
واحده صاحبتي بذهول :
-انتي متأكده أن ده هو اللي كنتي بتحكي عنه أبو لبانه؟
-زي مانا متأكده اني شيفاكي كده !
غمزتلي بمشاكسه:
-طب مش بتفكري تغيري رأيك
كنت لسه هرد عليها بس لقيته بيبصلي بنظره مُرعبه خلتني اترعش من الرعب
مسكت في دراع صاحبتي وانا بهمس بخوف :
-امانه عليكي لو جرالي حاجه تقولي لامي اني بحبها وقولي للواد اخويا ان انا اللي كنت باكل المانجا بتاعته اللي في التلاجه وأبويا ابويا قوليله اني كنت ساعات بكذب عليه واخد منه فلوس زياده عشان اجيب بيهم اكل لنفسي و….
وقفت كلام وبلعت ريقي بصعوبه اول ما جه وقف قدامي
-انتي ايه اللي جابك هنا ؟
-انا ا انا اصل ا اصل يعني
رد بضيق :
-اصل ايه انجزي معنديش وقت لسه في خناقه تانيه
-احم ط طب ربنا معاك ويقويك حقيقي انت بتتعب بارك الله في امك
برق ورد بعصبيه:
-ايه؟
-اقصد يعني بارك الله في ام حضرتك
رجع رأسه وعدل هدومه بغرور:
-اه إذا كان كده ماشي
همست بقرف:
-الله يعينك علي المهلبيه اللي في نفوخك
ربع ايده في بعض وبصلي من فوق لتحت :
-مقولتليش برضو ايه اللي جابك هنا
ابتسمت ابتسامه صفراء :
-جايه اصيف هنا بيقولوا البحر في المدرج ده حكايه
جز علي أسنانه ورد بغيظ:
-انتي بتستظرفي؟
-والله علي حسب هستظرف انت كمان وتكون فرفوش ولا هتديني بحاجه فى دماغي ؟
ابتسم ابتسامه بارده وكلها خبث وهو بيمشر دراعه:
-لا انا مفيش حد فرفوش زي متقلقيش هراعي انك بنت وهضرب براحه
شهقت شهقه شعبيه وانا بلوي بوقي :
-نعممم ياخويا تضربني ليييييه هو انت مفكر اني هسيبك تضربني واسكت ده انا اكسر دماغك وبعدين هو انت مفكر أن مفيش رجاله ولا ايه ده انت لو قربت مني كل الشباب اللي موجودين دول هيعملوا عليك حفله مش كده ياشباب ولا ايه
قولت كلامي بثقه مع أن من جوايا مرعوبه وعايزه الأرض تنشق وتبلعني
بصيت للشباب محدش فيهم نطق حرف كلهم واقفين يبصولي بتوتر
لطمت علي خدي وانا بهمس بخوف :
-احيه اين الرجاله انا لا اراها !!
وفجأة لقيت نفسي متشاله علي كتفه زي شوال البطاطس
قلبي اتنفض وفضلت اصوت واحرك رجلي واستنجد بكل اللي واقفين لكن للاسف مفيش حد أتدخل حتي صحابي خافوا
-عااااااا الحقوناااااااي حد يلحقني ياعااالم ياختااي
رد ببرود :
-محدش هيجرؤ يتدخل
رديت بخوف :
-انت موديني علي فين ؟
-المأذون
ابتسمت ابتسامه مهزوزه:
-مبروك مين هيتجوز اختك
-توء
-اخوك طيب
-توء
-خالتك ؟
-توء احنا
رديت ببلاهه:
-احنا مين ؟
رد ببساطه:
-احنا انا وانتي مش انتي بتقولي اني كنت متقدملك امبارح بصراحه انا مش فاكر بس انتي عجبتني وهتجوزك واكسب فيكي ثواب
لطمت علي خدي بذهول :
-احيييه حد ينادي حد يكلم حد يلحقني
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية اتنين في واحد)
