رواية ميراث العشق الفصل الحادي عشر 11 بقلم مريم نصار
رواية ميراث العشق الجزء الحادي عشر
رواية ميراث العشق البارت الحادي عشر
رواية ميراث العشق الحلقة الحادية عشر
بسم الله نبدأ
ف فيلا العدوي . بعد الضهر
فريحه : رجعت من العياده بدرى وطلعت تطمن ع ميرو.. ونازله متوتره جدااا ..
مريم : قاعده ف الليفنج بتسبح . ومغمضه عينيها وبتدعي لاحفادها بالنجاح . وتالين قاعده جمبها..
فريحه : بقلق . ماما . ميرو فين ؟ انا طلعت أشوفها مش موجوده .. مراد اتصل وعايز يطمن ع النتيجه ..
مريم : تعالى اقعدى واهدى ياحبيبتى . ميرو راحت ع الجامعه تشوف النتيجه ..
فريحه : بدهشه . ايييه؟ راحت ع الجامعه؟ طيب ليه ؟ ومن غير ما تقولى ؟ وراحت ازاى ومع مين .؟
مريم : ابتسمت . اهدى يافريحه مش كدا يابنتى . ومريم مش صغيره . هي كانت قلقانه جدا وموترانا كلنا ع الفطار . وبعدها مقدرتش تصبر اكتر .استأذنت من آدم اتصلت عليه وهو رايح ع الشركه . وبعت معاها السواق الخاص ال تبع شركة رعد بعته جديد مخصوص للبنات حراسه . اسمه شاهين .. يعنى بنتك ف حفظ الله ومش لوحدها ..
فريحه : قعدت . وقالت ايوه يا ماما ونعم بالله
.بس تيم هو الل بيجبها كل سنه ليه هي تروح؟.
مريم : بتنهيده.. معلش سبيها ع راحتها . ربنا يريح قلبها وترتاح يارب …
فريحه : غمضت عينيها بأمل . يارب ..
——————بقلمي مريم نصار
ف الجامعه.
مريم : نازله من العربيه ..
شاهين : نزل .. اتفضلى ياهانم .
مريم : بحرج . احم ميرسي جدا .. واتحركت كام خطوه .
شاهين : ماشي جنبها مع حفظ المسافه. ماشاء الله طول وعرض . وميرو جمبه مش باينه..
ميرو : وقفت باستغراب . خير حضرتك؟ ماشي جمبى ليه؟
شاهين : باحترام . يافندم انا حراسه . وجاى من طرف رعد باشا . وموصينى جدا ع عيلة آدم باشا ومنبه عليا انى لازم افتح عينى ع كل فرد من أفراد الأسره .. و آدم باشا بنفسه مشدد عليا انى لازم اكون زى ضل حضرتك . اتفضلى ..
ميرو : بصت قدامها . وابتسمت بحب كبير ع جدها الل بتعشقه . واخدت نفس عميق بتفائل . واتحركت . وشاهين جمبها مع حفظ المسافه ..
تيم : راح يجيب نتيجة مريم من غير ما يقولها … وأتصدم اول ما شاف مريم مع واحد غريب . وصك ع اسنانه بغيظ . واتحرك بغضب واضح ..
ميرو : ماشيه وعيونها بتدور ع تيم ف كل مكان . ومشتقاله حد الجنون .. وندمت انها سمعت لكلام چود . وكل يوم عايزه تتصل عليه لكن بتتوتر وتسكت . وهي عارفه انه دلوقتي ف الجامعه بيجيب شهادتها .. ووقفت مره واحده وقلبها هيطلع من مكانه اول ما شافت تيم وجاى عليها .. وكأنها ماشافتوش من سنين .. ووشها كتلة طماطم . وقلبها بيدق بسرعه ..
شاهين : واقف وراها ع يمينها . وعيونه بتلف ف كل مكان . حمايه لل خطفت قلبه ..
تيم : قرب منها بغضب وقال بصوت جهورى . مريم ؟
ميرو : لسه هترد …
شاهين : وقف قدام تيم .. حضرتك تعرفها ؟
تيم : قبض ع ايديه … ومردش ..
ميرو : بخوف كبير .. احم لو سمحت حضرتك ايه الل انت بتعمله ده ؟
شاهين : انا……
تيم : مهتمش بشاهين . وراح وقف قدامها. وقال بصوت جهوري غضبان . ممكن اعرف ايه الل بيحصل ده؟ وانتى ازاى ماشيه وواحد ماشي جمبك . وزعق .. مين ده يادكتوره؟
ميرو : المرادي .. قلبها دق بطريقه تانيه خالص . عشق اكبر وحب أعمق .. احساس جديد . حست انه تيم غيران . ايوه دى غيره يامريم . تيم غيران علي……….وفاقت ع كلمة ..
تيم : بص ل شاهين بغضب. انت مين؟ وازاى ماشي جمب اختى ؟
مريم : غمضت عينيها بإحباط كبير .. ويأس أكبر..
شاهين : انا آسف يافندم .. ده اول يوم شغل ليا . وانا لسه معرفش أفراد العيله كلها . انا اسمي شاهين حراسه خاصه من شركة رعد باشا .. وانا كنت بشوف شغلى ..
تيم : نفخ بأريحيه .. تمام حصل خير . بس ياريت وانت ماشي تكون ف مسافه اكبر من كدا ..
شاهين : كشر عينيه بعدم فهم لانه محافظ ع المسافه . لكن هز راسه تحت امرك يافندم ..
ميرو : بغصه ف قلبها وزعلت … احم بعد اذنكم انا هروح اشوف الشهاده . وحضرتك يااستاذ شاهين ماتجيش ورايا .. وسابتهم ومشيت بسرعه …
تيم : بغيظ مكبت …. لكن بص ل شاهين . روح انت ياشاهين والدكتوره هتروح معايا .
شاهين : عيونه كانت ع الملاك .. وبص ل تيم . احم استاذنك يافندم هبلغ آدم باشا . لانه شدد عليا واى تهاون مع حفيدته قالى فيها رقبتى …
تيم : بعدم إهتمام . بلغه وقوله تيم عزيز هيوصل الدكتوره لحد البيت .. وسابه ومشي .
شاهين : فتح عينيه بدهشه… تيم عزيز؟ وهي مريم العدوي ؟ طيب ازاى؟ واتصل ع آدم بسرعه .. بتوتر . احم الو ايوه ياباشا…
آدم : خير يا شاهين؟
شاهين : احم انا وصلت الهانم الصغيره للجامعه . وحصل بعد كده………………وقالى ابلغ حضرتك إن تيم عزيز هيوصلها بنفسه ..
آدم : مط شفايفه امممم . تمام ياشاهين .. تعالى بقى انت ع الشركه عشان توصل حفيدتى التانيه ع الفيلا …
شاهين : باحترام تحت امرك ياشا … وقفلو ..
شاهين : افتكر اول ما نزل قدام الفيلا . وشاف مريم خارجه . وفرد الأمن بيقولها عليه … وماشيه باحترام كبير . كأنها حوريه مش انس ابدا . ورفعت عينيها بخجل . واول ما سمع صوتها وشاف لون عيونها . وقع رهينة الحب .. وفاق من أفكاره .. احم فوق ياشاهين . دى حفيدة العدوي . وابتسم ع تفكيرو . وركب العربيه واتحرك..
——————بقلمي مريم نصار
ميرو : ماشيه بسرعه …
تيم : اووف . مريم وبعدين معاكي انا ماشي وراكي وبكلمك مبترديش . ف ايه؟
ميرو : وقفت بتعب . ولفت ليه . نعم يا دكتور تيم؟
تيم : بحرج . أولا انا بعتذر عن سوء التفاهم ده .. انا عارفك وحافظك كويس جدا . واول ما شوفت واحد ماشي جمبك استغربت جدا . وبصراحه اضايقت .. مين ده؟ وكمان عاملى فيها فندام . هو فاهم العضلات غلط ع فكره . هههههه ..
ميرو : غصب عنها ابتسمت .. وسكتت..
تيم : ها لسه زعلانه مني ؟
ميرو : بشبح ابتسامه. هزت راسها لأ مش زعلانه ..
تيم : بعدها كشر عينيه بغيظ . انتى ايه الل جابك انهارده ؟ انتى مش عارفه انى كل سنه انا الل بجبلك الشهاده …
ميرو : كانت هتتكلم باندفاع وتقوله ليه؟ ليه اهتمامك ده؟ ليه اضايقت لما شوفت واحد ماشي جمبى ليييييه ياتيم ليه؟ لكن افتكرت الرد المعتاد .. انتى اختى ….
تيم : الووو انتى يابنتى . انا مش عارف انتى بتروحي منى فين؟
ميرو : بتنهيده .. ابدا انا كنت متوتره بسبب النتيجه . وكملت بحرج . انت كل سنه تتصل عليا قبل ما تنزل تجيبها . احم لكن المرادى انت متصلتش ….فا………
تيم : قاطعها… متصلتش عشان زعلان منك يا مريم .. بجد زعلت منك جدا من آخر موقف .
ميرو : عينيها لمعت بدموع . احم تيم ..ا.ا.انا ..
تيم : ابتسم . طيب والله حرام عليكي عيونك دى .. بجد ماشاء الله عليكي يامريم . يعنى عينيكى مش ناقصه جمال عشان تنزلى بيها لعنه ع الغلابه الل هنا ههههه . وطلع منديل ورقي اتفضلى امسحى دموعك دي . ومش عايز اشوفك بتدمعى تانى تمام؟
ميرو : قلبها دق .. وجواها صراع كبير جدا من معاملة تيم ….واخدت المنديل احم ميرسي . ومسحت دموعها ..
تيم : يلا تعالى اقعدى واستريحى هنا ف الكافتيريا . وانا هفرحك بنفسي .
ميرو : هزت راسها حاضر . وراحت قعدت بسرعه لانها حاسه إن رجليها مش شايلاها ..
——————بقلمي مريم نصار
تيم : باهتمام اطلبلك حاجه تشربيها ؟
ميرو : ابتسمت بتكليف لأ ميرسي..
تيم : اوكي ثوانى وجاى .
ميرو : هزت راسها ….
تيم : اتحرك كام خطوه..
ميرو : بسرعه. تيم ..
تيم : لف ليها نعم يا مريم …
ميرو : بلهفه .. انت نجحت مش كدا ؟
تيم : بابتسامه خطفتها . يس .. وامتياز مع مرتبة الشرف .. وغمز بعفويه . انا الدكتور تيم ياميرو …
ميرو : خلاص دقات قلبها مسموعه للجميع . من طريقة احتواء تيم ليها .. وضحكت بسعاده كبيره الف الف مبروك ياتيم ..
تيم : ههههه الله يبارك فيكي ياميرو . ثوانى وراجعلك متتحركيش من هنا اوكي . وسابها ومشي .
ميرو : غمضت عينيها بحب واخدت نفس عميق واتنهدت .. حاضر يا تيم …..
——————بقلمي مريم نصار
ف مكتب آدم …
آدم : قاعد ع كرسي المكتب وباصص قدامه وماسك القلم تحت دقنه وسرحان بعمق .
امم بقى كدا ياهيكل مااشي بتراوغنى ف المناقصه وبتقولى ع اسعار وهميه . وكمان اسماء وهميه ؟ طيب ياهيكل باشا .. انا هسيبك بمزاجي وإن ماخليتك تشيل انت المناقصه دي وبأعلى سعر مابقاش اسمى آدم العدوي .
وبعد شويه ..الباب خبط . وزين دخل مساء الخير ياحج.
آدم : اهلا مساء الخير يازين . تعالى ..
زين : دخل .. عامل ايه ياحج؟
آدم : هز راسه تمام . ها قولى ف جديد..
زين : اتفضل ده ملف المناقصه الل زكي هيكل قال عليه .
آدم : بتنهيده .. اخد الملف . تعالى اقعد يازين ..
زين : باستغراب مالك يابابا . شكلك مضايق . ف حاجه حصلت امى كويسه ؟
آدم : ابتسم بحب . طبعا كويسه وزى الفل . اسمع يازين انا عايز اقولك كلمتين هينفعوك ف المستقبل ..
زين : احم اتفضل يا حج سامعك ..
آدم : قام من مكانه وقفل السِتار وقفل الاضاءه كامله ..
زين : كشر عينيه بعدم فهم ..
آدم : زين احنا دلوقتي ف العتمه بس انت مطمن أنى جمبك مش كدا ؟
زين : طبعا يابابا ..
آدم : طيب مفكرتش انى ممكن اغدر بيك ف وقت زى ده؟
زين : قام وقف كلام ايه ده يا بابا وغدر ايه الل حضرتك بتتكلم عنه ؟
آدم : شغل الاضاءه وفتح السِتار .. ووقف قدام زين .وقال .. وكدا انت مطمن بردو انى جمبك؟
زين : بقلق . بابا انا مش فاهم حاجه ..
آدم : ابتسم وحط ايدو ع كتف زين . الل عايز اقولهولك يابني انك مهما تشتغل وتعدى عليك الايام اوعا تثق ف اى مخلوق ع وجه الارض.
زين : بابا انا بجد مش فاهم حاجه .؟
آدم : انت بتثق ف ذكي هيكل صحبك يازين ؟
زين : بصراحه يابابا انا اتعاملت معاه سنتين ومعاملته كلها كويسه .. لكن سؤال حضرتك اكيد وراه سر مش كدا ؟
آدم : هز راسه امم فعلا وسر لو عرفته ممكن يضايقك ..
زين : كشر عينيه بشك . حج انت عرفت حاجه عن هيكل ده ؟
آدم : الاول قولى ايه مدى صداقتك معاه ؟ ده الل يفرق عندى ..
زين : مط شفايفه امم لأ عادى احنا بينا بيزنس مش اكتر ..
آدم : امم تمام .. وفتح درج المكتب وطلع ملف مع ظرف .اتفضل يازين . شوف الملف ده ..
زين : مسك الملف وفتحه وبيقرأ فيه تقرير مفصل عن ذكي هيكل .. وفتح الظرف واندهش ايه دا يابابا ؟ زكي هيكل ف فيلا رؤوف الجبالى ؟ ده مستحيل .. دول أعداء من زمان طيب ازاى ؟ وبص ع تاريخ الصوره من شهر تقريبا .. وبص ل آدم . بابا معقول إن هيكل والجبالى …!!؟
آدم : ابتسم إن زين بدء يفكر بطريقة آدم .. وهز راسه ايوه يسيدى .. وعندك ملف كامل بالصفقات الل تمت مابين هيكل والجبالى ف ال٧ سنين الل فاتت .. هيكل يازين داخل الشركه هنا عشان يوقعك انت مش انا ..
لانك يعتبر أصغر اكبر رجل اعمال ف مصر .. وداخل بمسرحيه سخيفه وحوار مكشوف .. انه هو والجبالى أعداء .
وعايز يشاركك . ولما انت قولتله انك مبتشاركش حد علشان كل حاجه تحت ايدى انا .. فكر ف طريقه تانيه يسحب منك فلوس وهو مستريح . وحاليا قدملك ملف المناقصه بأسعار وهميه .. يعنى الضعف مرتين .. وانت المسؤول وهتدفع يعنى هتدفع .. وساعتها بقى هو يطلعله التلتين من المبلغ من غير اى مجهود .. وده طبعا بالاتفاق مع الجبالى . الل هو اصلا بيكره ابوك .. عيال غبيه جدا . ومفكرين انها هتدخل ع آدم العدوي ..
زين : قعد . بغيظ مكبت . الحيوان .. وبص ل آدم . طيب وحضرتك عرفت ازاى إن هيكل عدو لينا ؟
آدم : ههههههه .. يبنى انت لازم تفكر ف كل حاجه .. زين انا عايزك تكون حافظ عدد الاوراق الل ع مكتبك عايز تشغل مخك .
يعنى بزمتك .. الجبالى ده بيكرهنى من زمان من وقت خسارة عمك طارق ف اسهم الشركه .. وشايف انى واكل السوق . وقالها لرجال أعمال صريحه آدم العدوي عامل زى المنشار . وحاول يوقعنى من سنتين بالظبط ف صفقه خيبانه وطردته من مكتبى .
.وبعدها مفيش شهر يجي هيكل ويعرض عليك انت خدماته .. ويقولك انه اتشاكل مع الجبالى . تؤ مش غريبه دى؟ .
. طيب جايلك مخصوص انت ليه؟ وكمان وضح شكل العلاقه بينه وبين الجبالى؟ .. يعنى كأنه بيقولنا انا جاى من طرف الجبالى ههههه ..
وانا راقبته ف الاول . وكان كل شغله سليم معاك . وده طبعا علشان يديك الامان .. لكن الغبى مايعرفش انى ليا عيون ف كل مكان . وجبت الملف الاصلى للمناقصه وعملت مقارنه بين اسعار هيكل للمناقصه . والاسعار الاصليه. ده غير ترتيب ربنا سبحانه وتعالى والحفله دى كان موجود فيها اشرف عزيز ههههه . وصورلى الجبالى مع هيكل . وبعتهالى . وكمان سمع هيكل والجبالى بيتكلمو مع بعض عليا وعليك . الجبالى عايزنى انا . وهيكل غيران منك.. يعنى الحوار ده كله عشان يوقعونا ف السوق . وبص قدامه بس ع مين ؟ هما شكلهم نفسهم يجربو قرصة آدم العدوي . وقريبا جدا هنسمع نغمات الاستغاثه بالرحمه .
زين : صك ع اسنانه بغيظ مكبت . لأ ياحج ارتاح انت .. واقعد واتفرج وشوف ابنك زين آدم العدوي هيعمل ايه ؟ وبص قدامه بغل…. صوت استغاثة هيكل هتسمعه وانت قاعد ف مكتبك ياحج آدم ..
——————بقلمي مريم نصار
ف الجامعه ..
ميرو : قاعده متوتره .. وفونها رن .. وفرحت جداا لانه مراد .. وردت بسرعه . الو بابى وحشتنى اوى.
مراد : ابتسم. قلب بابي ياروحي طمنينى عليكى يا قلبى عامله ايه؟
ميرو : بدموع واحتياج .. محتجالك اوى يا بابي ..
مراد : بقلق .. قام وقف . مريم انتى كويسه حصل معاكى حاجه ؟
ميرو : مسحت دموعها بسرعه . وضحكت بتمثيل . ابدا يابابي انا كويسه جدا . بس حضرتك وحشتنا جدا . انت وآدم مش موجودين معانا . ده كفيل انه يحسسنى بالوحده من غيركم ..
مراد : نفخ بأريحيه . وضحك . كفيل سعودي ولا خليجى هههههههه ..
ميرو : ههههه . اى حاجه مش هتفرق المهم أنه هيسافر وخلاص ههههه..
مراد : ههههه حبيبة قلب ابوها الل ماشيه ع العهد . وحشتينى يابت يا مريم ..
ميرو : ههههه وحضرتك جدا ..
مراد : انا اتصلت ع الحج آدم . وقالى إنك معاكي حراسه . ساعتها اطمنت . اوعي ف يوم تخرجي لوحدك ياقلب ابوكي ..
ميرو : ابتسمت بحب . حاضر يا بابي . ومتقلقش عليا . اصلا بابا آدم محاوطنا من جميع الاتجاهات . ربنا يبارك فيه يارب ..
مراد : بتنهيده . يارب . واحنا معندناش اغلا من بناتنا علشان نحافظ عليها . والدنيا مبقاش فيها امان يابنتى . عشان كدا بقولك اوعي تخرجى ف يوم لوحدك ..
ميرو : باااابى ارجوك .. انا حفظت الكلام ده كتير . من بابا آدم وماما مريم وحضرتك وعمو زين وآدم اخويا ومامي وتي…. احم . وانا بروح فين يعنى .. متقلقش والل مكتوب لينا اكيد هنشوفه ..
مراد : ابتسم . عارفه يامريم . انتى وتوتا نسخه مصغره من مريومه .. ودى بقى احسن حاجه حصلتلى بجد .
ميرو : بسعاده . فعلا وانا بجد مبسوطه انى بشبها .. وكملت بمكر . اممم بس ياترى آدم بقى طالع لمين؟
مراد : ههههه ده بقى الل مش فاهم لل خلفوه كتالوج . عيل ملبوس زى خالك فهد ..
ميرو : هههه . آدم اخويا قمر .. وخالو فهد عامل ايه بجد مصر وحشه جدا من غيركم .
مراد : فهد بيغسل المواعين جوه . ههههه ابوكي مسيطر يابت أميرو ..
ميرو : ههههه . اااه لو آرين سمعتك دلوقتي . كانت اتنرفزت جدا ههههه..
مراد : ههههه احنا بالصلاه ع النبى لا يفرق معانا آرين ولا لورين . سيبك انتى بس وقوليلى النتيجه ايه النظام .؟
ميرو : احم لسه شويه . تيم بيجبها ..
مراد : اممم تمام . خلاص ياحبيبتى . نص ساعه كمان وهتصل عليكي تطمنينى . مع انى واثق انك ناجحه إن شاء الله وبتقدير كويس جدا كمان ..
ميرو : بتفائل . إن شاء الله يابابي ..
مراد : ماشي ياروحي خلى بالك من نفسك يا مريم .
ميرو : بدموع .وانت كمان خلى بالك من نفسك . و ارجوك ارجعلنا بقى ..
مراد : يتنهيده. حاضر ياحبيبتي . إن شاء الله ..
——————بقلمي مريم نصار
ف الجيم ..
كريم : بيتمرن بهمه عاليه ..
ياسين : ههههه ايوه بقى. العريس المنتظر لازم يظبط الفورمه ههههه..
كريم : ولاا . بقولك ايه انا مش هخلص من مصطفى تطلعلى انت .. حل عنى وركز ف تمرينك ..
ياسين : ههههه ماشي ياعم .. هحل عنك . وكمل بتوتر . احم ا.انت هتروح انهردا عند آريان ؟
كريم : بينهج بسيط . مش عارف . ممكن العيله كلها تروح بليل. لأن نتيجة الدكتوره مريم انهارده . وكمان تيم …
ياسين : بحيره. احم طيب ماتعرفش تطمن ع الدكتور تيم وتعرف ايه آخر الأخبار ؟
كريم : ع فكره انت معاك فون ورقم تيم . ممكن تعرف وتطمن بنفسك. .
ياسين : بتوتر . احم ايوه منا عارف يبنى . بس انتو قرايب وكدا ههههه .
كريم : وانت ايه شبح ف العيله . ما انت متنيل من العيله انت كمان .. قولى ياض ياياسو .. انت مفيش حد ف حياتك؟ قلبك ماخترش واحده كدا ولا اى حاجه؟
ياسين : اتنهد بزعل .. وافتكر عيون مريم الل اكتشف مؤخرا انها مش حاسه بعشقه ليها . وكان فاكر معاملتها ليه حب ..
. ولكن رغم انه اصغر منها بسنتين قلبه دق ليها هي وبس .. والفتره الاخيره . كلامها معاه بقى رسمي جدا ف حدود القرابه وبس . وغمض عينيه بتعب . وقال لأ مفيش حد ..
كريم : ههههه كل ده عشان تقول لأ . انا فكرتك نمت . اومال لو كنت هتقول ايوه بحب ههههه كنت هترد بكره …
ياسين : ابتسم بتمثيل. ما انا كنت بفكر بشوف اى بنت ملقتش ههههه اعملك ايه بقى . وبعدين يانجم لسه بدرى ع الكلام ده . اركز ف شغلى احسن . احم هو آركان و أسر فين؟
كريم : آركان كلمنى وقالى أنه هيروح العياده للدكتوره لارين وبعدها هيطلع ع الجيم أما أسر بيجري ف التراك ..
ياسين : بيتمرن وهز راسه.. واتنهد . وقال جواه ياتري عملتى ايه يامريم ؟
ف الجامعه ..
تيم : دخل الكافتيريا . وشد الكرسي وقعد قدام مريم..
ميرو : بتوتر . وقلبها بيدق عشان النتيجه . ها ياتيم . وبالله عليك. ماتلعبش باعصابي زي آرين ارجوك ..
تيم : ابتسم .. حاضر يستي. وليه متوتره كدا ؟ ما انتى عارفه انك ناجحه .. ههههه مبروك ياميرو الف مبروك . ناجحه وبتقدير امتياز . بس من غير مرتبه . بهزر طبعاً ههههه .. مريم انتى الاولى ع الجامعه يامريم انا مبسوط جدا ..
ميرو : قامت وقفت بسرعه بفرحه .. وضحكت بدموع بجد ياتيمو بجد ..
تيم : قام وقف قدامها .. اه بجد . وبقالى ٧ سنين ماسمعتش تيمو دي ههههه . الفرحه حلوه مفيش كلام ههههه ..
ميرو : ضغطت ع شفايفها بحرج كبير . احم ا.انا اسفه جدا. ا.انا قولت…….
تيم : بس بس اهدى .. مريم بجد انتى غريبه جدا . ومعاملتك معايا برسميه كبيره . ايه يابنتى ده انتى اختى بتعتذرى ليه ؟ ف ايه بقى ؟
ميرو : ابتسمت بوجع. احم ابدا ولا رسميه ولا حاجه كل الحكايه انى عارفه انك مبتحبش حد يقولك تيمو من زمان جدا . علشان كدا مقولتش ..
تيم : ههههه فعلا عندك حق . بس البت آرين دي عنيده ومابتسمعش الكلام . هي الوحيده الل مسموحلها تقولى تيمو .. بنت لذين ..
ميرو : بإحباط . احم . طيب ياتيم بجد متشكره جدا ع تعبك معايا . احم بابي ومامي اتصلوا ولازم اطمنهم وبابا آدم كمان . ا.انا همشي علشان متاخرش ع السواق اكتر من كدا . بعد اذنك..
تيم : مالك يامريم ؟
ميرو : من سؤال تيم ف اللحظه دي نفسها تترمي ف حضنه وتعيط وتقوله انا محتجالك اوى يا تيم .. وابتسمت بوجع متدراي . ابدا . انا كويسه جدا . ههههه دا انا حتى ناجحه وبتقدير امتياز وكمان الأولى ههههه .
تيم : هز راسه تمام . عموماً يلا تعالى انا هوصلك ..
ميرو : بحرج .. احم لأ سوري ياتيم اصل السواق……..
تيم : السواق مشي من بدرى يامريم . انا قولتله يمشي لانى هوصلك . اتفضلى .
ميرو : بتوتر . هزت راسها . وماشيه جمب تيم . وشايفه قد ايه إن البنات هتتجنن عليه .. وغيرتها عليه كتماها ف قلبها ..
تيم : ماشي جمبها . ثوانى ياميرو . انا هتصل ع نور اطمنها . انتى عارفه اكيد دلوقتي اتمشت ف المستشفى كلها ههههه.
ميرو : وقفت قدامه ورفعت عينيها بالصدفه وجت ف . عيون تيم الخضرا مع ضوء الشمس . كفيله تخلى مريم تعترف بعشقها ليه من غير تردد .. وقلبها بيدق بعشق كبير جدا .
تيم : بيكلم نور ف الفون قدام مريم . وبيضحك . وبيتكلم مع محمد وتمارا ..
وملامحه الجميله كلها مريم بتاخدها اسكرين وخلاص بجد هتتجنن من فرط العشق ..
تيم : خلص المكالمه . ورفع عينيه ليها وشافها واقفه وسرحانه بعمق كبير .. ونده مريم …
مريم : …………
تيم : هاااى ميرررو انتى يابت ..
ميرو : انتبهت . ها…؟ احم . ا.انا …
تيم : مريم بجد انتى مش طبيعيه . بتسرحي منى كتير جدا .
ميرو : لعنت نفسها .. وقالت بلخبطه . ا. ابدا . ا.انا .. ا.انا كونت بفكر…احم بفكر . ايوه بفكر انى المفروض في السنه الجايه والل بعدها الماجستير . وكنت عايزه اتدرب جمب الرساله ف اى مستشفى ..
تيم : بعفويه . ياحبيبتي . مستشفى النور تحت امرك ..
ميرو : بصدمه وحطت ايدها ع قلبها… ايه؟
تيم : اسف بجد . لأنى متعود اقول لزفته آرين دى ديما ياحبيبتى .. جت فيكى المرادى بقى . المهم تعالى اوصلك ونتكلم ف الطريق ع حوار المستشفى ده ..
ميرو : بخيبة أمل .. هزت راسها تمام .
تيم : فتح باب العربيه اتفضلى ..
ميرو : ركبت جمبه ..
تيم : ركب . ومبسوط جدا بالنتيجه بتاعته هو ومريم .. واتحرك بالعربيه . بقولك ياميرو ..
ميرو : نعم …
تيم : افتحى الدرج الل قدامك ده . وخدى العلبه الل موجوده فيه …
ميرو : بعدم فهم . فتحت الدرج . وشافت علبة شوكليت كامله .. وميرو جواها حيره كبيره . وقالت ايه ده يا تيم ؟
تيم : بصراحه . انا زعلت منك جدا من رد فعلك وانا بقدملك الشوكليت بتاعتك زى كل يوم . مكنتش اتوقع انك تحرجينى كدا وتسبيني وتجري..
ميرو : قالت جواها . مريم اعترفى لنفسك انك بتعشقيه . ومكتفيه بوجوده فحياتك . ولو تيم زعل منك عشان حاجه تافهه زى دى . يبقى انتى عقلك صغير .. اعترفى انك من غيرو مش كامله . واخدت نفس عميق .. وضحكت بتمثيل . ههههه . سوري بجد يا تيم . انا بس يومها كنت اكله كتير جدا . ومكنتش قادره اكل اى حاجه تانى . احم بس تعرف بعد ما رجعت البيت حسيت اني جوعت . وقولت ياريتنى اخدتها من تيم اكل ايه انا دلوقتي. سورى بقى متزعلش ..
تيم : مط شفايفه امممم . خايبه حتى وانتى بتكدبى . بس انتى الوحيده الل متعرفيش تكدبى عليا .وبصلها بس بتداري حجات كتير..
ميرو : بصلته .. انتى ازاى عرفت …؟
تيم : ابتسم .. انتى بريئه اوى يامريم . لا بتعرفي تكدبى . ولا تجرحي حد ..
ميرو : ابتسمت . ميرسي جدا ياتيم . احم المهم متزعلش موقف وعدا . وعشان متزعليش مني . انا هاخد علبة الشوكليت دي كلها لوحدي اوكي ههههه.
تيم : اصلا انا جايبها ليكي . تعويضا عن الاسبوع الل عدا من غير ما اشوفك فيه .
ميرو : ها……..
تيم : احم .. المهم بقى . نسيت اقولك إن حفلة التخرج بتاعتك كمان اسبوع. اوكي .
ميرو : هزت راسها اوكي ..
——————بقلمي مريم نصار
ف العياده ..
رينو : خلصت كشف . اتفضلى حضرتك . دى روشته بالعلاج بعد ما شوفت التحاليل.
وكمان هكتبلك ع اشاعه ولازم تعمليها ف أسرع وقت .. لأن انا شاكه يكون عند حضرتك غضروف .
المريضه : بتعب حاضر يادكتوره . وربنا يستر ..
رينو : ابتسمت إن شاء الله خير . ومش عايزاكى تقلقى . لكل داء دواء . اتفضلى ..
المريضه : قامت واخدت الروشته . ربنا يكرمك يارب شكرا لحضرتك .
رينو : الشكر لله . والف سلامه ع حضرتك . بالشفا إن شاء الله ..
المريضه : خرجت .
رينو : قامت بسرعه . وقلعت البالطو . ودخلت تغسل ايديها . وقالت . انا متصلتش ع تيم. وهيبهدلنى . وخرجت من الحمام . وقالت يارب تنجح تيم ومريم يااارب . اعمل ايه غصب عني متصلتش ع حد. العياده زحمه اوى انهردا .. اوووف . مش هخلص من تيم وهيزعل منى وهيطلع عينى ..
آرين : خبطت ودخلت بغيظ . مااامي . انتى منزلتيش ليه ؟ انا و آركان منتظرينك من زمان ف العربيه ..
رينو : بلخبطه . حاضر يا آرين غصب عني اتأخرت . هو يعنى بايدى يابنتى .. ثوانى هلبس النقاب ..
آرين : رايحه جايه بتوتر . ياتري تيمو عمل ايه؟ انا قلقانه اوى اوى يامامي . وكمان نتيجة ميرو . بجد اعصابى باظت خالص ..
رينو : اطمنى ياحبيبتي إن شاء الله ناجحين . قوليلى بس انتى اتصلتى ع تيم . او مريم ؟
آرين : هزت راسها لأ . انا عايزه اشوف تيمو وهو بيقول الخبر قدامى ..
رينو : فونها رن . يوووه اهو آركان بيتصل بيستعجلنى اهو وكنسلت عليه .. يلا بينا يا آرين …
آرين : يلا بسرعه . بجد هتجنن واشوف تيمو وميرو .
رينو : اخدت فونها وشنطتها . وخرجت . وقالت للمرضه . تقفل العياده . ونزلو ..
آركان : بيبص ف الساعه ومتنرفز .وشاف رينو و آرين خارجين من العماره . اخيرررراااا .
رينو : متزعلش يا آركان ياحبيبى انا اتأخرت غصب عني..
آركان : ولا يهمك يا اجمل ام ف الدنيا . المهم خلينى انا الل اسوق اشطا .
رينو : بدهشه .. اشطا؟ ولا مش هتسوق طبعا .. انت لسه صغير ..
آركان : يارينو ياحبيبتى . انا بعرف اسوق والله . ويمكن احسن واحد ف العيله بعرف اسوق ..
آرين : بتريقه . نو نو نو . فوق لنفسك يسي آركان باشا . مفيش حد بيعرف يسوق زي بابي فهد حبيبى . وكمان خالو مراد القمر .. وبجد بقى مفيش زى سواقة آدم مراد . يخراااابى حاجه رهيبه وهو سايق الريس. انا بخاف منه ..
رينو : اتحركت . طيب بلاش غلبه انتى وهو . ويلا اركبو بقى عشان نلحق تطمن ع تيم ..
آركان : بغيظ عشان مش هيسوق . طيب وركب جمب رينو .
آرين : ركبت ف الكرسي الخلفي . وقالت . مامي هنروح عند بابا آدم .؟ ولا عند خالتو نور ؟
رينو : شغلت العربيه . واتحركت . لأ ياروحي هنروح عند بابي . عشان تيم اول حاجه بيعملها بيروح ع هناك يطمن مامي أول واحده ..
——————بقلمي مريم نصار
فيلا العدوي ..
فريحه : قلبها مشغول ع نتيجة بنتها و رايحه جايه ف الليفنج . و مشبكه أيديها ف بعض وبتدعي بقلبها ..
مريم : بصت ف الساعه .. واتنهدت .. لأ انا بدءت اقلق . ميرو خارجه بقالها ٣ سعات ..
ليليان : متقلقيش ياماما مريم . تيم قال للسواق الل اسمه شاهين ده إنه هيوصلها .. واكيد زمانهم ع وصول ..
مريم : استغفرك ربي و اتوب اليك .
ليليان : طيب انا هتصل ع ميرو وهطمنك .. وطلعت الفون ..
فريحه : سمعت صوت عربية تيم . وقالت مريم جت . وجريت ع الباب ..
ميرو : نزلت بسرعه من العربيه . وطلعت ع السلم . وبتضحك ل فريحه . مااامي حبيبتي . انا نجحت يامااامى ..
فريحه : ضمتها لحضنها بسعاده كبيره جدا . ودموعها نازله من الفرحه .
تيم : واقف بيضحك ..
فريحه : مسدت ع ضهرها . الف مبروك ياروحي الف مليون مبروك ياقلب فريحه .
ميرو : بدموع . الله يبارك ف حضرتك . وارجوكي بلاش دموعك دي يامامي .انتى بتيعطى كتير جدا. عشان سفر بابي . وآدم اخويا . ارجوكي مش عايزاكي تعيطى ..
فريحه : ابتسمت بسعاده ومسحت دموعها . حاضر يا حبيبتي. الف مبروك . انا بجد مبسوطه اوى..
تيم : قرب منهم . طيب سيبى شويه لتيم إبن خالك . ولا فرحتك ب ميرو نستك تيم ؟
فريحه : ضحكت. عمرى ما انساك ياحبيبى . ها طمنى ولو انى عارفه طبعا ..
ميرو : بفخر كبير .تيم نجح يامامي . امتياز مع مرتبة الشرف . زي بنتك ميرو بالظبط وكمان الاول ع الجامعه وانا كمان .
فريحه : اللهم بارك ماشاء الله الف مبروك ياتيم ..
تيم : الله يبارك فيكي. ادخل بقى تطمن مريوم .. اوكي .
مريم : شافت تيم داخل . قامت بسرعه . وقربت منه. وابتسمت بحب . نجحت مش كدا ياحبيبى ؟
تيم : قرب منها وباس ع ايديها الاتنين . ودي عايزه كلام يعنى ؟ انا تربيتك .. باركيلي ياست الكل .. ابن إبن قلبك نجح بتقدير امتياز والأول ع الجامعه..
مريم : ضمته بحنان كبير .. ومبسوطه جدااا . واتمنت تيم يكون من نصيب مريم .. الف مبروك ياروحي. الف مبروك..
تيم : طلع من حضنها وباس جبينها . الله يبارك فيكي ياماما ..
مريم : بصت ف عينيه . ومريم … مريم عملت ايه ياتيم؟
تيم : ابتسم . امتياز طبعا وزي كمان..دى مريم العدوي مش اى حد..
مريم : ضحكت بسعاده كبيره . وفتحت ايديها . تعالى ياروحي . الف مليون مبروك..
ميرو : اترمت ف حضنها . الل كله أمان وحنان . وغمضت عينيها .
مريم : زادت من حضنها كأنها بتقولها انا حاسه بيكى . وحضنى ده عشان يطمنك. ويريح قلبك شويه . من عذاب العشق ..
ليليان : بجنون . الللله. ايوه بقى . خلينا نفرح . الف مبروك ياتيم باشا .الف مبروك يامريم هانم .عليا النعمه . الل ما هيجبلى هديه منك ليها . لا يزعل مني زعل انتو حرين وقد أعذر من فنزر .
كلهم ضحكو ..
تيم : يابنتى انتى حوله . ع فكره انا وميرو الل ناجحين . يعنى تفكي الكيس كدا وتظبطينا هدايا ..
ليليان : يتحضن ميرو . وقالت . ياعم روح هو انا لسه قبضت .انا شكل. ابويا زينى بيضحك عليا .
ميرو : ههههه عينيا ليكى يا لي لي . اول ما بابا آدم يحدد خطوبتك ليكى عندى هديه حلوه .
تيم : اوباااا . انا ناسي إن البت دى عروسه . خلاص تمام .هنزل انا وانتى يامريم نختار للبت دى هديه . بدال ما تفضحنا ..
ليليان : بغمزه .ايوه بقي . هو ده الدكتور تيم . تسلم ياكبير .
تالين : بفرحه .. مبروك يا ابله مريم .
ميرو : لفت ليها. وضحكت اهلا روح قلبى الل دعيلتى كتير. تعالى هاتى بوسه. لأختك حبيبتك.
تالين : جريت عليها بسعاده . وحضنتها. وقالت . انا كلمت ربي كتير . وحلمت بيكي وقت الفجر .
ميرو : طلعتها من حضنها بابتسامه . ومسدت ع حجابها . حلمتي بيا انا ؟
تالين : ايوه . بس خوفت ف الأول . لكن نهاية الحلم كانت جميله . انا قولته لتيته مريم .
ميرو : بعدم فهم . حلم ايه ده الل تخافى منه . وبعدين دي اضغاث احلام. متقلقيش من حاجه..
ليليان : بفضول . بتقولك وقت الفجر . اكيد رؤيه . قولي يابت ياتوتا. حلمتي بايه . فضولي هيقتلنى .
تالين : رفعت راسها ل ميرو. اقول يا ابله؟
ميرو : بابتسامه صافيه . قولي ياقلب الأبله.
تالين : انا حلمت . خير إن شاء الله. انك ماشيه ف طريق عادي وكان معاكي كتب الجامعه . وطول الطريق ده يطلع مطبات قدامك .
وبعد كدا فجاءه انتى سمعتى صوت حد بينادي عليكي.
. بس انا معرفش صوت مين لانه مكنش واضح اوي وكان صوت واحده ست .
. وانتى خوفتى من صوتها. وجريتي منها . جريتي بسرعه كبيره اووى.
. وفجاءه ظهر حفره كبيره قدامك و وقعتي ف الحفره دي . وكنتى بتصرخي بصوت عالى ومحدش سامع صوتك .
. بس بعد كده لقيتك مره واحده بعيد عن الحفره دي .
. وجه حد وقالك انتى لو مكنتيش وقعتى ف الحفره دي. كنتى هتقعى ف حفره اكبر منها ومفيش منها خروج ابدا . وف رساله ليكي وقالك قولى ورايا .
“اللهم وإن إستحالَت.. بأمرك تكون.”
وانتى قولتيها كتير. وبعد كده نزلت من السما ورده بيضا جميله اوى . بين ايديكي . وبعد كده بدءت السما تمطر . وانتى ضحكتى وكنتى فرحانه اوي . وقومت ومن النوم ع صوت آذان الفجر .
ميرو : كشرت عينيها . حلم غريب ..
ليليان : اوبا انا عرفت تفسيرو .
تيم : ربع ايديه . وقال قولى يافصحيه يامفسرة الاحلام .
ليليان : رفعت ياقة الفستان بكبرياء . وقالت طبعا يبنى هو انا اي حد؟.
. بصي يستى التفسير .انتى رايحه الجامعه عادي وشايله الكتب. . وصوت الست دي . هو صوت داده زينب ندهت عليكي عشان تشربي شوب اللبن . وانتى جريتى منها . هههههه وظهر قدامك عوض جوزها ف الجنينه ههههه ووقعتي لما شوفتى الكلب ماكس الل مخوفنا بيه سي آركان . وبعدين انا بقلبى الكبير هاجي واساعدك وانقذك واجبلك ورده من الجنينه واقولك احمدي ربنا لو مكنتيش اتخضيتى من عوض كان ماكس هيشلوحك ههههههههه الله عليكي ياليليان وانتى مفسرة احلام و هبله كدا هههههههه .
كلهم ضحكو عليها .
ميرو : ههههههه انتى تتجوزى بسرعه علشان كده خطر ع مخك .
ليليان : هههههه حاسه باختك .. انا بقول كدا بردو .
مريم : ربنا يجعله خير إن شاء الله . المهم خلونا نفرح بنجاح احفادي .
فريحه : اخدت ميرو ف حضنها بفخر كبير .. وهمست ابوكي هيفرح جدا ياميرو .
ميرو : خرجت من حضنها بسرعه . ياخبر . انا مقولتش ل بابا آدم .وطلعت فونها بسرعه . واتصلت ع آدم .. ورد ع طول..
آدم : بابتسامه . روح جدها ناجحه مش كدا؟
ميرو : قعدت ع الكرسي . بابتسامه هاديه . ايوه فعلا نجحت . وانت مش جدو انت بابا وبس ..
آدم : عيونه لمعت بدموع . الف الف مبروك ياروحي .
ميرو : بحب . امتياز مع مرتبة الشرف والأولى ع الجامعه يابابا ..
آدم : بفخر وسعاده . كنت متأكد . إن أول حفيده لعيلة العدوى هترفع راسي .
. وعشان كده . شاوري . ع احسن برج ف القاهره كلها .وقوليلى عايزه العياده بتاعتى هنا ..ولو عايزه مستشفى . من بكره اجهزلك فيها .. انتى بس شاوري يامريم ..
ميرو : بسعاده كبيره لسه بدرى لما احضر الماجستير والدكتوراه قدامى ع الاقل ٣ سنين. كفايه عليا فرحتك دي وبس يابابا .. انا مش عايزه غير انكم تكونو مبسوطين .
آدم : وهو حد يكون عندو مريم وميكونش مبسوط .. دي انتى بنت قلبى وبنت الغالى ..
ميرو : مسحت دموعها. تسلم لقلبى ياحبيبى يارب . ها هتيجى بدرى علشاني انهردا ..
آدم : من عيوني. ساعه بالكتير. واجيب عمك زين واكون عندك ..
ميرو : بابتسامه خلاص هستناك إن شاء الله ..
——————بقلمي مريم نصار
بعد شويه ..
رينو : داخله بلهفه . تيم حبيبى عملت ايه؟
تيم : كشر عينيه. وهز راسه تمام يادكتوره ..
رينو : حبيبى انا اسفه انا عارفه انك زعلان مني . بس والله العظيم . العياده انهردا كانت زحمه جدا ..
تيم : حط ايدو ف جيبه. اتمنى إن الل حصل ده مايتكررش تمام يا رينو ؟
رينو : ضحكت . حاضر اول وآخر مره . المهم طمنى ..
تيم : بيعدل ياقة القميص . امتياز طبعا يارينو. .
رينو : عيطت بسعاده. واخدته ف حضنها الف مبروك ياحبيب قلبي . الف مبروك . انا بجد مبسوطه اوى .
تيم : باس ع راسها . حبيبتى الله يبارك فيكي .
رينو : وانتى ياميرو . طمنينى عليكى ياروح عمتك .
ميرو : بسعاده نجحت الحمد لله ياعمتو.
رينو : باركت ليها. وسلمت ع الكل ..
آرين : سابت آركان يقفل العربيه . ودخلت تجري. تيموووو . تيموووو . ووقفت قدامه بطفوليه و بتنهج..
تيم : بس بس حاولى تهدى . خدي نفسك يامجنونه انتى .
آرين : بتنظم أنفاسها . قولى . قولى نجحت مش كدا ؟
تيم : ياحبيبتى عندك شك ..
آرين ؛ ولا صفر ف الميه . ههههه
تيم : ههههه خلاص يبقى نجحت .
آرين : اتطنتط ع الأرض . وااااو بجد الف مبروك ياتيممووو . وغمضت عينيها وفتحت ببراة الأطفال . هتجبلى هدية نجاحك مش كييدا؟
تيم : ههههههههه كييدا .عيوني ليكى ياحبيبتى .
ميرو : قاعده . والدموع متجمعه ف عينيها . وحاولت تفكر بإيجابيه ..
آرين : اوكي . وجريت ع ميرو بمرح وقالت ميرووو القمر . نجحتى ثح ثح ؟
ميرو : ضحكت بحب. رغم أنها بتغير غصب عنها . لكنها بتحب آرين جدا . وحطت ايدها ع خد آرين . وضحكت ايوه يا حبيبتي نجحت الحمدلله ..
آرين : بسعاده . وااااو بجد بجد احلا يوووم . هاتى حضن كبير بقى . وحضنو بعض بسعاده .
آركان : دخل وسلم ع الكل. وبارك ل تيم وميرو .. وهيقعد شويه وبعدها هيطلع ع الجيم ..
فريحه : قلبها مبسوط . وماسكه الفون ف أيدها . يلا بقى اتصل يامراد .. اتصل عشان افرحك ببنتك ياحبيبى ..
——————بقلمي مريم نصار
محمد : وصل فيلا العدوي . ونور نزلت بسرعه .وكمان تمارا .. ودخلو الفيلا ..
نور : جريت بفرحه وندهت تيم .
تيم : قام بسرعه . وقابلها. ع مهلك يانورى . واخدها ف حضنه ..
نور : بعياط . الف مبروك ياروحي . الف مبروك ياحبيب قلبي .
تيم : اتخنق . وطلعها من حضنه . ومسح دموعها . وبعدين بقى . بتعيطى ليه دلوقتي؟
نور : ضحكت بدموع . ومسكت وشه بايديها . انا بعيط من فرحتى . تعب ابوك مراحش ع الفاضي . سهرك وتعبك مراحش ع الفاضي ياحبيبى..
تيم : باس ع أيدها . وتعبك انتى كمان ياست الكل انتى ناسيه انتى عملتى ايه علشانى؟ . والل انا فيه دلوقتى ده بفضل الله ثم انتى وبابا .. ربنا يباركلى فيكم يارب..
تمارا : مااامي بليزز سيبى تيم بقى اسلم عليه ..
نور : باست جبينه بحب كبير . وابتسمت بحب الف الف مبروك ياروحي..
تيم : الله يبارك فيكي ياست الكل..
تمارا : اتشعلقت ف رقبته . الف مبروك ياقلبى .
تيم : رفعها من ع الأرض . وضحك . الله يبارك فيكي ياروحي ..
تمارا : ف حضنه . هتجيب هديه لأختك حبيبتك مش كدا ؟
تيم : همس ف ودنها . جبتهالك اصلا ياحبيبتى . وانا عندى كام تيما .وطلعها من حضنه . بابتسامه .
تمارا : بفرحه . واااو بجد طيب قولى بالله عليك جبتلى ايه؟
تيم : حرك ايدو ع انفها بمرح وقال . جبتلك السلسله الفضه الل انتى كان نفسك تجيبيها اونلاين .
تمارا : شهقت بسعاده . بجد بجد ياتيم ؟ انت احسن اخ ف العااااالم كله .
تيم : وانتى اجمل تيما يقلبى . يلا روحي باركى لميرو .
تمارا : بسعاده . حالا .
نور : حضنت ميرو . الف مبروك ياحبيبت عمتك .
ميرو : بسعاده . الله يبارك ف حضرتك ياعمتو .
نور : مسدت ع حجابها . كنت اتمنى مراد حبيبى يكون موجود . واشوف الفرحه ف عينيه .
ميرو : عيونها لمعت بدموع . إن شاء الله ربنا يرجعه لينا بالسلامه ..
تمارا : حضنتها . الف مبرووووك ياقلب تيما .
ميرو : بسعاده .. حبيبتى ياتيما ميرسي ياقلبى ..
مريم : تعالى يانور . تعالى اقعدى جمب منى . الف مبروك ياحبايب قلبى..
نور : قعدت جنبها وباست ع ايديها . الله يبارك ف عمرك يامامي .. انا مبسوطه اوى اوى بجد..
رينو : مش اكتر منى يانور . بجد انا فخوره بتيمو اوووى . الف مبروك ياحبيبتى . ويارب تفرحي ب تيما قريب إن شاء الله..
نور : تسلمي يارينو ياحبيبتى . وتفرحي برجوع فهد بالسلامه إن شاء الله.
رينو : اتنهدت باشتياق كبير اللهم امين يارب..
——————بقلمي مريم نصار
محمد : من ع باب الفيلا. احم احم يا اهل الدار ..؟
رينو : نزلت النقاب ..
آرين : بمرح .. اتفضل يادكتور . الدار دارك ..
محمد : دخل وشاف الكل متجمع ومبسوطين..
تيم : قام وقف واستقبل ابوه ..
محمد : بيكابر دموعه . وقرب من ابنه . وحضنو بعض بحب كبير..
محمد : بصوت مبحوح . مبروك يادكتور ..
تيم : ابتسم بصمت . وقلبه مبسوط جدا .. الله يبارك فيك يابابا .
محمد : ربت ع كتفه .. طول عمرك رافع راسي . وراجل يعتمد عليه ياتيم يبنى ..
تيم : ابتسم .. تربيتك ياحج ..
آرين : امممم هذا الشبل من ذاك الاسد ولا ايه ؟..
محمد : ضحك . وقرب من ميرو . وسلم عليها . مبروك ياحبيبتى. وضمها لقلبه بحب كبير . وزعلان عليها . لانه اكتر واحد عارف ازاى بتكون نظرة العشق من طرف واحد.
ميرو : ابتسمت . الله يبارك ف حضرتك يادكتور .
محمد : سلم ع مريم الكبيره . وباس ع أيدها . وقعد جمب نور والكل مبسوط ..
أشرف : اتصل ع تيم . وبارك ليه .وبعدها . رنا اتصلت وباركت ليه و ل ميرو .وطارق وكل العيله عرفت بالخبر الجميل ده . والكل بارك وهنى ..
وكل العيله بتجهز عشان يروحو يباركو بنفسهم ف فيلا العدوي..
وفريحه : قاعده وماسكه ايد ميرو بنتها بسعاده كبيره جدا . وتالين قاعده مبسوطه .
——————بقلمي مريم نصار
بعد نص ساعه تقريباً .
مريم : قامت . انا هروح اقول ل عزيزه . تعمل كيكة النوتيلا . عشان نور .وميرو .. وكمان آرين .. القمر دي وتوتا قلبى ..
آرين : باستها ع الهوا .. والله انتى اجمل ماما مريم ف الدنيا كلها . بحبك اووووووي ..
مريم : ماشيه بتضحك ع آرين .. ورفعت عينيها بالصدفه .. شهقت وفتحت عينيها ع الاخر .. آدم؟ ———-
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية ميراث العشق)
لقراءة الجزء الأول من الرواية اضغط على : (رواية جريمة عشق)
لقراءة الجزء الثاني من الرواية اضغط على : (رواية عشقتها منذ نعومة أظافرها)
لقراءة الجزء الثالث من الرواية اضغط على : (رواية عشق الفهد)
