رواية ليل الفصل الثالث والعشرون 23 بقلم ياسمين خالد
 |
| رواية ليل الفصل الثالث والعشرون 23 بقلم ياسمين خالد |
رواية ليل الفصل الثالث والعشرون 23 بقلم ياسمين خالد
ممدوح فقد وعيهُ
سعد صَرخ بصوت هَز بدنهُ ..أبوياااا ..
بلهفه وبيبص علي العساكر..إلحقوه ده مريض سُكر..إلحقوووه قبل ما تجيلهُ غيبوبه
فؤاد كان واقف مكانه بيتفرج علي سعد وهو ملهوف وخايف علي أبوه وهو واقع جوا القفص والعساكر هي إللي بتفوقوا والحديد مانع مابين أبوه وهو ..أما فؤاد ف مبادرش حتي بالخوف عليه كإن قلبه إتملى قسوه من ناحيته ..مَحنِش ليِه فضل واقف مكانه وباصص عليه وهو مُستسلم ومفيش فِ إيديه حاجه يعملها لنفسهُ يمكن كان زعلان عليه عشان لو مات دلوقتي مفيش حاجه حلوه يقابل ربنا بيها ،بعد فتره ممدوح فاق لكنه كان ساكت ..بص لِ سعد نظره كلها هزيمه ..إستسلم للعساكر وهُما واخدينهُ مشي معاهم وف ايديه الكلبشات وبقي مُقيد بعد ما كان حُر لكنه استخدم الحريه غلط،كان مُغيب مش ف وعيهُ شخص عايش بس تايهه وكإنه ف عالم تاني..
سعد قعد زي الطفل الصغير ب إستسلام دفن وشه بين كفوفه صوت عياطه كان مسموع ..فؤاد قرب عليه وقال بمواساه: إمسح دموعك ياإبني ،ما فِ اليد حيله ..ف راجل بيعيط زي العيال كده!
_” مسح دموعهُ ف الشال وإتكلم بصوت ممزوج بعياط: غصب عني ياعمي ..محدش بيختار أهله
_ بس أهله هما إللي بيختاروا إسلوبهم وتصرفاتهم يابني .
= مش عارف أعمل إيه مش عارف ليه كان كده ،يمكن مدناش ليِه فرصه يتوب طيب! .. عارف ياعمي انا عامل زي إللي مربوط ف رجله حبل ومتقلين رجله بقالب طوب عاجز عن إني أتحرك حتي السَحف زي العيل الصغير مش عارف أبويا هيموت قدام عيني ومش عارف أعملوا إيه .
=مدناش ليِه فرصه يتوب! يابني ده هو اعترف انه مش ندمان أبوك شايف نفسه صح مبيغلطش مع إن مفيش حد معصوم من الغلط
_ أنا أعرف إن ف حد مش مقتنع مثلا بوجهه نظر معينه ف عشان كده شايف إنه مغلطش لكن توصل لقتل وميعترفش انه غلط دي المُصيبه.
= دي بردو المشكله أبوك مقتنع إن هو إتظلم ومخدش نصيبه ف الدنيا وده إعتراض علي قضاء الله ،بص يابني تعالي من المكان ده مالهوش لزوم قعدتنا هنا ..لازم نمشي ونيجي الجلسه الجايه.
_ خلاص ياعمي ..أبويا إتحكم عليه وده قرار نهائي
= أبوك كان شروع ف قتل ..مقتلش عم علي هو إللي قتل يمكن ف الجلسه الجايه الحكم يتخفف شويه .
_ بسُخريه:الحُكم يتخفف! هيتخفف يوصل لكام ! لِ 25 سنه !هيموت جوا بردو .
= يابني لو الحكم اتخفف حتي ل 25 سنه ولا 15 ف أبوك علي الاقل يفهم ان ربنا بيديلوا فرصه يتوب ويرجعلهُ ويفهم إن كل اللي عملوا غلط وعقابه كبير عند ربنا لو متابش .
_ تفتكر ياعمي حتي لو زي ما بتقول أبويا هيرجع عن إللي فِ دماغه ولا هيفضل شخص نمرود مش عاجبه حاجه والحقد يزيد جوا قلبهُ
= الله المُستعان يابني “بيطبطب علي كتفهُ” يلا نمشي .
_ مش عايز أروح البيت دلوقتي .
= طب تعالي أعزمك علي أكله بقي هتاكل صوابعك وراها
_ ماليش نفس ياعمي .
= أنا بقي ليا نفس يلا عشان ناكل .
_ بلغه عتاب “:فرحان ياعمي !
= إللي راحوا إخواتي ..سواء فرغلي أو ممدوح بس زعلي علي فرغلي ف إنه كان طيب وراح ضحيه أخوه اللي قلبه مليان بطمع وجشع وحقد وغِل ..اما لو يعني حاسس بزعل مع إن ربنا يسامحني مش قادر أسامحه ف انا زعلان عشان الشيطان ضاحك عليه بس مش أكتر
_ ربنا يعديها علي خير ياعمي .
= تعالي بقي نعدي علي اي محل كده بيبع لبس أطفال صغيره.
“خرجوا برا وسعد ركب عربيته وعمهُ جمبهُ..إبتدا يسوق ووجهه كلامه ب استغراب ل عمه”: هدوم صغيره لمين ياعمي ! هو إنت إتجوزت!
_” ضحك ” إتجوزت إيه يابني ده أنا بقيت جِد عيب علي شواربي الطويله دي حتي مش هقولك علي سني .
_ سعد إبتسم وكمل كلامهُ”: الشوارب عمرها ما كانت عيبه
= ياغبي ماهي عشان هيبه ف المقصد اقولك عيب علي ان الهيبه دي تروح يعني بالجواز ف السن ده .
_طب خلاص لمين الهدوم!
= رفع حاجبيه وبتريقه قال: تقريبا كده والله أعلم ماجد وأسيل لسه مخلفين عمر تعرف إنت الموضوع ده .
_”سعد ضرب ب إيدو علي جانبيه ضربه خفيفه”: اوف والله نسيت ..ده رايح النهارده يجيبهُ من المستشفي استني استني استني كده.
= بخوف:ايه يابني ف ايه ! الفرامل سابت ولا ايه!
_ده النهارده سبوع عمر !
=”خد تنهيده تُعني الراحه”:يابني م انا عارف وعشان كده هجيبله هدوم هديه
_ خلاص انا كمان هجيبلهُ..هو هيعمل سبوع !
= مش عارف إستني أتصل بيه .
“بيتصل ب ماجد”
= إيه يابني عامل إيه روحت جيبت عمر ولا لسه!
_لسه ياعمي انا خارج من باب الفيلا انا وسمير اهو حتي مكلمتش مؤمن .
_تكلم مؤمن ليه!
= انا قبل م أروح اجيب عمر هروح اشتري طلبات السبوع أصل بصراحه أنا كنت عامل مُفاجاه كده لِ اسيل
= مفاجأه إيه،وانت هتعمل سبوع!!
_اه ما هي دي المُفاجأه، هي سالتني هنعمل سبوع ل عمر وانا قولتلها لأ مُراعاةً لشعور سميه ومامتها علي موت عم علي وكده وكمان عمي ف السجن مش هينفع ف هي إقتنعت ودخلت نامت علي أساس إن فعلًا مفيش سبوع هيتعمل،بس مرات عمي سمعتني وقالتلي .
“فلاش باك”.
___________
_ ليه يابني كسرت بنفسها كده !
= مقصدش والله أكسر بنفسها يامرات عمي بس إنتي شايفه الظروف
_ الظروف! إن ممدوح ف السجن ! بكل قسوه كملت كلامها : طب ماهو كان قاتل أخوه وخرج وإنبسط وإحتفل وعاش حياته عادي خالص! منفرحش ليه !
_ يعني بردو مينفعش الناس هتقول إيه!.
= يابني مش انا اللي هعرفك إحنا هنا ف المدينه مش ف القريه وف منطقه راقيه مش شعبيه ومحدش يعرف اي حاجه عننا ..وده اول إبن ليها ومن حقها تفرح بيه .
_أسيل هقدر افرحها ف أي وقت تاني،بس شعور سمير إيه وسعد وكمان .”وجهه نظروا ل سميه ومامتها ” وكمان شعور سميه ايه ومامتها عشان عم علي مش هينفع .
_ مرات عم علي ب ابتسامه : ياإبني الحُزن فِ القلب إفرح وإنبسط ب إبنك وإن كان عليا أنا وسميه إللي هنعمل الأكل للناس كمان مش هنكسر فرحتك ياإبني عشان حُزننا .
“وجهه نظروا لِ سُميه” ..
_ سميه إبتسمت وحاولت تداري حُزنها علي والدها:انا معنديش إخوات ، إنت أخويا ياماجد مش بس إبن عم جوزي انت أخوه كمان ، وأسيل أختي وأنا ميرضنيش إنِ أكون حاجز عن فرحة أخواتي وكمان عمر ده فرحتنا كلنا ف إنت هات اللحمه او الفراخ وهنبدأ نعمل الأكل ونحضر كل حاجه
_ سمير: خلاص بقي ياإبن عمي عاوزين نفرح
_ عيونهُ لِمعت من الفرحه:مش عارف أقولكم إيه ياجماعه فرحان أوي من رد فعلكم انا هتصل ب مؤمن وهنشتري كل حاجه سوا وهجيبهالكم قبل ماأروح أجيب عمر عشان أنا معرفش مكان هِنا ف هخلي مؤمن يجي معايا بس ف مشكله .
= ” فِ نفس واحد هما الاربعه بنفاذ صبر ” ..إيه تاني !
_”ضحك علي طريقتهم وهما بيتكلموا ” سعد اكيد هيجي من الجلسه زعلان .
= سميه: سعد مهما كان زعلان عمروا ماهيزعل منك عشان إنت عاوز تفرح وتعمل سبوع لإبنك بالعكس هو هيبادر وهيساعدك .
= متأكده!
_ اه والله متأكده .
_ خلاص هتصل ب مؤمن .
_سمير: ماشي وانا هاجي معاك.
= ماشي .
“بيخرجوا برا باب الفيلا ..عمهُ فؤاد بيتصل”.
_____________
“Back”
_بس ياعمي ده كل اللي حصل عشان كده هعملها مفاجأه وهروح أودي الأكل للجماعه وبعدين أجيب عمر
_ طب ياحبيبي عقبال ماتملوا البيت عيال.
= ف حياتك ياحبيبي يارب..هو عمي ممدوح اتحكم عليه ب ايه !.
_ بعدين ،بعدين.
= طب اتحكم عليه بالاعدام رد ب اه او لا .
_ اه ..
“ماجد بص لسمير بنظرات زعل ..”
سمير : اتحكم عليه بالاعدام ياماجد صح !
_ ماجد اومأ راسه “: اه ياسمير.
“سمير بص تاني لطريقهُ وهو زعلان” ..
خلاص انا بفكر ألغي السبوع..
_ سمير هَم مُسرعا بالقول: لأ طبعا مش هنلغي حاجه ،فرحتك زي ما هي مش هنلغي حاجه ..الحزن ف القلب ياماجد
_ بس بردو مينفعش .
= انا اكبر منك واخوك الكبير وبقولك كل حاجه هتبقي زي ماهي.
_شايف كده !
= اه طبعا شايف كده.
_ كمل حديثه مع عمهُ: طب اديني سعد اكلمه ياعمي.
_ خد ياسعد ..ماجد عاوزك .
= الو ياماجد
_ ايه ياسعد عملتوا ايه !
=حاول يداري نبره الزعل علي والده ونجح ف انه يسيطر علي نفسه : كله خير ..هحكيلك كل حاجه بعد سبوع عمر .
_عمي اتحكم عليه بالاعدام صح ياسعد
= مفيش الكلام ده قولتلك هقولك كل حاجه بعد سبوع استاذ عمر حبيبنا .
_ لو حابب الغيه والله ما عندي مشكله.
= ساعتها لا هتبقي إبن عمي ولا اعرفك .
_ طب ياحبيبي خلاص ،متزعلش نفسك انت بس
=انا مش زعلان انا فرحان ان كمان شويه هشوف ابن اخويا يلا خلص انت بس كده وهات الحاجه عشان تجيبلنا الواد نشوفه الله بقي!
_”بيضحك “..
حاضر ..يلا مع السلامه.
=سلام.
______________
علي الجانب الأخر
“ماجد بيقول ل سمير ..احنا نتصل ب مؤمن بقي عشان الوقت ..
_ماشي كلموا .
” بيتصل ب مؤمن ” .
_ الو اذيك يابشمهندس.
= إذيك ياحبيبي عامل إيه!
_ الحمدلله كويس والله إنت أخبار حبايبك ايه
=كلنا بخير الحمدلله ..ها روحت الجلسه النهارده
_لا عمي فؤاد وسعد بس إللي راحوا.
= محدش كلمك منهم يطمنك طيب!
_ كلموني وهقولك بعدين،المهم كنت عاوزك ف خدمه
=طبعا ياحبيبي قول
_سبوع ابني النهارده وكنت محتاج شويه طلبات ف البيت وانت عارف معرفش حاجه هنا غير طريق المستشفي ف كنت عاوزك تيجي معايا بس نجيب الحاجه والجماعه ف البيت يجهزوها
_ بس كده عيني بس انت معاك عربيه!
= اه معايا!
_ طب هبعتلك لوكيشن تيجي عليه وتستناني هناك انا ف الشغل وقدامي ربع ساعه وهخلص
= خلاص ماشي ابعتوا وهجيلك علي طول
_ خلاص ماشي،واعزم كل حبايبك ..مراتك وبنتك والجماعه كلهم عاوز افرَح مراتي وتحس ان حواليها عزوه كده
= عيني حاضر والله
_ ولو يعني اخواتك او مراتك وكده عندهم صحابهم من نفس السن ياريت يجوا برضو عشان اسيل تحس انها مرتاحه ف الكلام معاهم ومتحسش انها لوحدها.
_ مممم خلاص ماشي هخلي ساره دي مرات اخويا تشوف كده صحابها وانا مراتي للاسف معندهاش صحاب والله يعني بتكتفي ب عيليتها ف انا هكلملك مرات اخويا ..
= خلاص حلو جدا هستناك..تعبتك معايا يابشمهندس والله.
_ ياجدع متقولش كده انت اخويا
= حبيبي والله ،هستناك هناك
_ ماشي ،سلام
“مؤمن بيبعتله اللوكيشن “.
_ طب يلا ياسمير مؤمن بعت اللوكشين اهو ..
= هو قالك هيكون هناك!
_ اه عُقبال ما نروح هيكون هناك .
_______
ف نفس الوقت ..علي جهه اخري .
________
_ ايه ياحبيبتي .
= ايه يامؤمن عامل ايه ياحبيبي.
_ وحشتيني أوي .
= وإنت كمان وحشتني أوي ،أتاخرت عليا علي فكره .
_ يابكاشه ده لسه العصر حتي مأذنش
= ماانا صاحيه الضهر كده وحاسه اني مفتقداك.
_ مُفتقداني من الضهر للعصر !
= أه ..بتوحشني وإنت معايا اصلا .
_ ياولا ايه ده ايه ده راضيه عني كده ليه ،هرمونات الحمل دي صح !
= قصدك ايه ها !
_ قصدي إنك طول عمرك رومانسيه بس النهارده رومانسيه حبتين تلاته كده.
=طب هتيجي إمتي .
_ بصي ياستي عاوزك تجهزي النهارده
= هتخرجني!
_ حاجه زي كده!
= يعني إيه !
_ ماجد انا قولتلك إنه خلف صح !
= اه
_ النهارده سبوع إبنه وهو عازمنا وعاوزنا كلنا نروح
= طب ازاي ياحبيبي هيعمل سبوع ف الظروف دي
_ مش عارف بقي ياليل هو عزمني وكمان هروح اشتري معاه طلبات انا خلاص اهو بقفل شغل ،ف عايزك تقولي ل ساره وحور وخلي ساره تجيب صحابها .
_ “ب استغراب”:صحابها!
= انتي عارفه مالهومش حد هنا وياإما أهلهم مسافرين ياإما ف القريه ف هو عاوز يخلي مراته تحس إن حواليها عزوه وصحاب وكده فاهمه.
_ فاهمه ياحبيبي خلاص هقول لِ ساره وحور بس ممكن ميوافقوش يروحوا مكان مش عارفينهُ
=لا قوليلهم بس وخلي ساره تقنعهم وإن شاء الله يجوا ..وانتي اقنعي حور وساره بش كده كده ما هيصدقوا
_بنبره زعل: حاضر ،بس لو كان عندي صحاب كان زماني اقنعتهم انا كمان ويجوا معايا..متبقاليش منهم حد يامؤمن
=أنا صحابك ،ولا أنا مش مالي عينك بقي ولا إيه .
_ لأ طبعا مالي عيني وقايم بكل الادوار علي اكمل وجه بس كنت يعني بتمني الاقي صاحبه تفضل معايا.
= متزعليش نفسك وأنا معاكي مش كده ولا إيه يالوله ياقمر ما تجيبي سكر!
_ مؤمن انت جمبك ناس وبتقول كده!
= لا مش جمبي حد بس استني هطلع وسطهم.
_ مؤمن انت اتجننت .
“خرج وسِمعت صوت باب بيتقفل..سمعت صوت دوشه وناس “.
_ مؤمن انت خرجت بجد .!
= بحبك ..”قالها بصوت عالي وكإنه كان قاصد إن الناس تسمع .”
“عيونها دمعت من الفرحه ..وكانت بتتكلم بنبره مهزوزه من العياط ” مؤمن انت اتجننت صح
_ بتعيطي عشان قولتلك بحبك ياهبله ،ياربي فرحانه بتعيط زعلانه بتعيط اعمل ايه بس!
= مؤمن بجد متكسفتش !
_ اتكسف ! طب استني .
“بيعلي صوته اكتر “..ايوه ياستي بعد 17 سنه جواز بحبك ها إيه تاني ..
“سمعت أصوات ناس بتسقف وأصواتهم إبتدت تقرب من تليفون مؤمن بينكشوا فيه ” ..ايوه يامؤمن ..
ايه ياعم الحلاوه دي .!
عبدالحليم حافظ ياخواتي .
= أصلها مش مصدقه اني بحبها يرضيكوا ياجماعه !
_”ف نفس واحد” والله العظيم بيحبك
_ لا لا ياجماعه وكمان بتقول انها معندهاش صُحاب وإني مش قايم بدور صاحبها يرضيكوا!
_ لا لا مالكيش حق يامدام .
“بيضرب الولد بالقلم بمشاكسه عشان تسمع صوت القلم وتضحك” : مدام ايه وانت مالك بالمدام بتوجهلها كلام ليه .
_”بيضحك” خلاص اسف يابشمهندس والله ماقصدي
_ ليل بتتكلم وهي بتضحك: خلاص خلاص سيبوا مش قصدوا حاجه وبعدين يانصاب أنا قولتلك انك مش قايم بدور صاحبي!
_يابكاشه ماإنتي كنتي هتقلبي علي أمينه رزق وهجيب مناديل وأعيط جمبك
= لا لا متعيطش .
_ سلام يارجاله اشوفكم بكره.
= إن شاء الله يابشمهندس .
_ إيه ياست الكل انا اهو خلصت ،وهروح المكان اللي هقابل ف ماجد وانتي اجهزي وبلغيهم بسرعه عشان هجيب معاه الحاجات وهاجي البيت اخد دش ونمشي
_ طب والعربيه هتكفينا !
= هنروح انا وانتي وتيتا فاطمه ب اوبر حتي ..ويوسف ياخد حور وساره ولو هتجيب حد من صحابها ..
_ طب مش هنقول لخالتي وعمي!
= لا انتي عارفه مش بيقدروا ينزلوا كتير
_ خلاص ماشي هكلمهم يجهزوا..مؤمن!
= بحبك
_ عرفت منين اني كنت هقولهالك.
= قلب الام ياختشي .
_”بتضحك” لا ياشيخ !!،طب بحبك.
= عارف
_ ثقه ولا غرور !
_ ليل بتحبني مش عاوزاني اتغر ف نفسي!
=هي ليل دي حاجه كبيره بالنسبالك!
_ أوي أوي ،انتي مقامك كبير اوي ف قلبي وف عيني .
= لو قعدت أسمع الكلام الحلو ده هحلف لا انا ولا انت هنروح السبوع ونقعد سوا.
_ لا وعلي إيه خلاص انا الراجل مستنيني
= يعني مش عايز تقعد معايا!
_ لأ عايز طبعًا ،بس يعني مينفعش أكسف الراجل.
= عارفه ياحبيبي ،يلا طيب خلي بالك من نفسك .
_ حاضر ياحبيبتي ،سلام .
” مؤمن بعد ربع ساعه بيقابل ماجد وسمير “
__________
_مؤمن: ايه يابطل عامل ايه !
= الحمدلله كويس يابشمهندس،عاوز بقي اشتري حاجات السبوع بقي اللي هي اللعب دي وفراخ ولحمه وخضار .
_ طب تمام هندخل نشتري كل حاجه من الهايبر ده !
=خلاص يلا اتفقنا .
“بيشتروا الحاجه..وماجد بيروحلهم الاكل ..وبيكلم البنت اللي هتعمل ديكور السبوع ..وأكد علي سميه إن أسيل لما تصحي ميعملوش أي حاجه تلفت إنتباها إن فِ حاجه غريبه حصلت ..بيتجهه
هو وسمير للحلاق لإن المستشفي بلغوه يجوا بعد نص ساعه من الوقت عشان الجهاز لسه مش متوفر “..
_____________
علي الجانب الأخر .
يرضيك كده حفيدك يضيع عليا الغدا اللي كنت هتأكلهوني .
_ لا ميرضنيش خلاص تعالي ناكل.
_ لو كلنا مش هعرف اكل تاني وانا لازم اكل من اكل عمر باشا .
= ااه شكل عمر بقي هياخد الجو عن عمر الكبير.
_ ياااه عمر بقالي فتره كبيره مشوفتهوش ياعمي ،معرفش شكله غير من علي الفيس بس.
= عمر ماشاء الله شاطر جدا ف دراسته وبيشتغل جمب الدراسه وجيه قالي بس مقالش لأبوه الله يرحمه لان فرغلي قاله متشتغلش ركز ف تعليمك وبس وهو هيبعتله كل المصاريف اللي محتاجها ..هو مش بيحب يقعد ومع ذلك متفوق ف دراسته .
_ هو بيدرس ايه !
= صيدله
_ ما شاء الله، هما عرفوا بكل التفاصيل الاخيره دي !
= ايات هي اللي عرفت كل حاجه مش عارف بلغته ولا لا .
_ خير ياعمي كله خير ،بص بقي ده شكله محل حلو اوي .
_ اه فعلا ،طب هتعرف تروحنا تاني ولا كده هتوهنا!
= اللي يسال ميتوهش ياعمي .
“بينزلوا وبيختاروا ملابس للبيبي..بيركبوا عربيتهم
بيقعدوا ف مكان بياكلوا ف حلويات مع شاي بنعناع “
_ مين اللي بيتصل بيك ياسعد .
= دي سميه .
_طب رد عليها .
= ماشي،ايه ياسميه عامله ايه
_ الحمدلله كويسه ،ها عملت ايه .
= معملتش .
_ فيك ايه !
_مفيش ياسميه هيكون فيا ايه!
= سعد انت كويس !
_ اه كويس.
= طب انت فين !
_ جاي ف الطريق
= طب يلا عشان انا قاعده انا واسيل زهقانين بنتفرج علي افلام وامي ووالدتك قاعدين ف الجنينه واسيل قلقانه وعاوزه تطمن علي عمر.. وماجد مش بيرد
_ جنينه ايه وهما ايه مقعدهم مش هما بيجهزوا حاجات السبوع..ماجد قال هيجيب طلبات عشان السبوع
= بجد..يعني هو كلمك وجاي طب كويس الحمدلله.
_ سعد ب استغراب: ف ايه ياسميه .!
= خلاص ياحبيبي تيجي بالسلامه ..مش هطول عليك مع السلامه.
_ ايه البت المجنونه دي !
= ف ايه !
_ عماله تتوهه ف الكلام وبتقولي امك وامي ف الجنينه وماجد مش بيرد علي اسيل .
_ ماهو يابني اتلاقي اسيل زنت عليها عشان ماجد عاملها السبوع مفاجاه واتلاقي سميه قاعده معاها ف الاوضه حبساها عشان تتفاجئ فهمت.
_ اه فهمت .
=طب يلا كمل أكلك..
_هاكل أهو
__________
علي الجانب الاخر .
_شوفتي ياستي اهو قرب يجي وهو كلم سعد من شويه طمنوا علي عمر بس هو قالوا مستني جهاز التنفس والممرضه تخلص الشيفت بتاعها متقلقيش
_اسيل ب فرحه: بجد يعني عمر هيجي معاهم النهارده؟
= اه ياحبيبتي والله..يلا بس نكمل الفيلم ده يكونوا هما جُم ..
_ ايه الاصوات اللي برا دي !.
= سميه بتوتر : اصوات ..لا اصوات ايه بيتهيألك ده اتلاقي امي بتروق بس ولا حاجه ..خليكي انتي بس عشان الجرح اوعي تتحركي ماجد يزعل مني إني مخليتش بالي منك عشان هو قبل ما يمشي وانتي كنتي نايمه وصاني عليكي ،انا هجيب فشار عشان نتسلى واجي مش هتاخر عليكي متتحركيش ها
_ حاضر .
=وغلاوه عمر!
_حاضر والله.
“اسيل بتسند راسها علي المخده وبتكمل مشاهدتها علي فيلم كرتوني .
_________
“سميه بتسيبها وتخرج ” ..
___________
_ ايه ده ،انتي مين!
= مش دي فيلا استاذ ماجد!
_ اه!
= طيب انا البنت اللي هعمل ديكوريشن السبوع هو كلمني من حوالي نص ساعه كده .
_ طب ممكن بس براحه عشان احنا عاملين مفاجأه لمامت الولد
= ضحكت بسخريه :ازاي ! يعني متعرفش ان النهارده سبوع ابنها!
_ اكيد تعرف بس حصل حاجات يعني ،حضرتك هو تحقيق بعد اذنك بطلب منك تشتغلي ف هدوء
_ اسفه يامدام
= متزعليش والله بس انتي متعرفيش انا حاولت امنعها من الخروج ازاي وفضولها زاد لما سمعت اصوات برا ..حقك عليا تاني
_ولا يهمك، خلاص حاضر هحاول علي قد مااقدر معملش صوت انا والبنات.
= تسلمي وعقبالك يارب.
_”ب ابتسامه”يارب
“بتدخل المطبخ “..
ها خلصتوا ايه !
_ مامتها بخوف: ايه خرجكك برا بس سيبتيها ليه!
= متقلقوش كنت طالعه انبهه علي البنت بس المهم هاتوا فشار عشان طلعت بحِجه اني هجيب فشار ..وخلصتوا الاكل ولا لسه !
_هنلحق نخلص لسه ماجد ماشي من شويه ، اللحمه اهي والفراخ علي النار ،والست الطيبه دي الله يباركلها بتعمل الرز بلبن اهو ..
_ نورتي ياطنط .
= بنورك يابنتي .
_ بصوت خافت قربت علي مامتها: مين دي !
= واحده مؤمن صاحب ماجد باعِتها ..بيقول انها ست غلبانه موثوق منها متقلقيش
_ماشي ..هستني شويه عشان اكيد هتقولي لحقتي تعملي الفشار!،وممكن تشك ف حاجه.
_ طب طلعي للبنات اللي برا حاجه ساقعه.
= لسه مطلعتوش ..هو ده واجب الضيافه!
_ ياام لسان اطول منك هما لسه جاين
_ ماشي هطلعلهم انا.
“بتحضرلهم حاجه ساقعه وطبق فشار كبير”
_ب ابتسامه : اتفضلوا يابنات
_ تسلم ايدك.
=تسلم إيديكم إنتو ..من اولها باين ان الشغل جميل .
_ تسلمي يارب .
= عن إذنكم .
_ إتفضلي.
_________
بتدخل تاني لأسيل..وف ايديها طبق الفشار دخلت ب ابتسامه ..اهو ياستي الفشار..والدوشه اللي برا بينضفوا البيت عشان باشا عمر هينورنا النهارده.
= مُشتاقه اوي أخدوا ف حضني.
_ هتاخديه لحد م تشبعي مِنهُ كمان ربنا يباركلك فيه يارب.
= يارب ياحبيبتي،وعقبالك.
_ “ابتسمت” ربنا يباركلك ياام عمر ياقمر انتي يلا كلي فشار ونستناهم
_”إبتسمت” حاضر
___________
_ليل:ايه ياساره عامله إيه!
=الحمدلله ياحبيبتي ف حاجه!
_ اه عاوزاكي تيجي معايا سبوع ماجد
= ماجد مين اللي سبوعهُ!
_ يابت ياغبيه افهمي،ماجد اللي مؤمن حكالكم عنه خلف.
= خلف!
= مراته يعني ياساره.
_ اه ماله بقي!
= سبوع إبنه النهارده وعازمنا كلنا !
_ كلنا مين!
=انتي وهاتي صحابك..وهكلم حور اخليها تيجي هي ويوسف
_ليه يابنتي!
= هما عازمينا كلنا ليه اسالتك كتيره ياساره
_ بتزعقيلي!
= لا والله مقصدش بس هما عازمين العيله كلها اصلا عشان مالهومش حد هنا
_ ماشي خلاص يوسف عارف!
= اكيد مؤمن هيكلموا ف انتي بس كلمي صحابك وحاولي تقنعيهم يجوا.
_ حاضر ،وانتي كلمي حور
= خلاص هكلمها .
_ ماشي .
____________
ساره بتتصل ب ندي .
_ الو .
= ايه يابنتي عامله ايه !
_ الحمدلله تمام ..اخبارك ايه وعامله ايه مع حسام!
= كويسين اهو الحمدلله
_ خلصتي شغل!
= فاضلي ساعه ليه !
_ تعرفي تيجي معايا سبوع!
= سبوع مين !
_ واحد زميل مؤمن ويوسف وكانوا عايشين برا ومراته ولدت هنا ومعندهومش قرايب ف عاوزين ناس ولمه وكده..حكيتلك القصه كلها مره واحده اهو
= طيب هرن علي حسام اقوله وارد عليكي وهكلم البيت واقولهم.
_ لا عادي انتي روحي البيت وغيري والبسي وهستناكي .
= خلاص ماشي .
_ وبصي .
= نعم!
_ انا معنديش صحاب غيرك بس لو انتي عندك صحاب يعني هاتيهم معاكي.!
= بجد والله هي بارتي ولا ايه ده سبوع!
_ يابنتي عاوزين لمه يعني ف حاولي اتصرفي.
= طب والله فكره البت مى صاحبتي تعبانه نفسيا شويه اليومين دول ممكن اتصل بيها اخليها تيجي تفك شويه .
= حلو جدا ،ولو عندها اخت ولا حاجه خليها تيجي .
_ معندهاش غير اختها تقي صغيره انا هجيب مى وخلاص .
= خلاص ماشي مش مهم ،وابقي ردي عليا بردو .
_ خلاص إتفقنا ماشي.
_____
_ الو .
= ايه ياندى عامله ايه .
_ الحمدلله ياحسام كويسه ..خلصت شغلك!
= لا والله لسه
_طب انا ساره صاحبتي اللي هي مرات يوسف اللي كان متجوز سهيله اختك.
_ انتي بتعرفيني عليها ولا بتذليني ولا ايه فهميني !.
= لا والله مقصدش ،المهم يعني زميلهم وكده لسه مخلف وهما كانوا مسافرين برا ورجعوا ومراته ولدت ومالهومش حد هنا ف ساره كلمتني وعزمتني .
_ايه القصه الكبيره دي ، خلاص ياستي روحي ومتتأخريش .
= حاضر .
_ واللبس يكون واسع ها..وميكاب مفيش ..ضحك ف الشارع بصوت عالي لا ..ولو ف ولاد هناك اياكي تتكلمي مع حد
_ من غير ما تقول كل ده علي فكره ها.
= شاطوره،خلصتي شغل!
_ فاضل ساعه
= خلاص ماشي ،هكلمك كل شويه اطمن عليكي خلي الموبايل ف ايدك وتشيلي السيلانت عشان بتنسي لما تخلصي شغل تشيليه.
_ خلاص حاضر ،باي ع المدير جاي ف الطرقه.
= ماشي،باي
________
“بتستني المدير يعدي ويدخل اوضه المكتب بتاعهُ”..
__________
كده مهمه حسام خلصت ..نتصل ب مي بقي .
_الو
= ايه ياندى عامله ايه
_ كل ده عشان تردي !
= لسه صاحيه ،ف كنت بعمل الكوفي بتاعي
_ صاحيه بعد العصر اقول ايه بس امال هتتجوزي ازاي!
= مش عايزه ياختي.
_ طب بصي فاضيه !
= اه مواريش حاجه ..اجازه من الشغل النهارده
_طيب عاوزاكي تيجي معايا سبوع.
= سبوع مين!
_ دي لفه طويله ..المهم ساره صاحبتي عزمتني وانا عاوزاكي تيجي معايا.
= ماليش انا ف جو الزيطه والضوضاء والجو ده.
_ معلش عشان خاطري ..تعالي معايا
= انا مش ف المود ومش هكون مبسوطه
_ انتي يامى! حبيبتي انتي لو ف فرح واحنا معديين ف الشارع بتخشي تهيصي كإنك تعرفيهم.
_ للدرجادي انا اجتماعيه
= لا خالص خالص.
_ طب هلبس ايه اصلًا !
= إلبسي الدريس الموف بتاعك .
= خسيت ومش هيكون حلو عليا .
= لا بالعكس والله شوفتك بيه وانتي رفيعه وكنتي قمر
_ طب وألف إنهي لفه علي الفستان .
_ أي لفه طرحه بتليق علي وشك ماشاء الله .
= هروح سبوع معرفهوش يابنتي!
_ يامي بلاش رخامه بقي
= طب الوقت قد ايه !
_ لسه كمان ساعتين يعني لو عاوزه تاخدي دش وتجهزي هتلحقي
= ماشي ،هسيب تقي مع مين بابا بايت ف الشغل وأمي النهارده هتاخد ورديه بليل .
_ هاتيها معاكي
= لا ياستي هتفضل تدقق علي كل كلمه ومش هاخد راحتي
_ طب سيبيها مع ستك
=خلاص هعمل كده ،يلا اقفلي بقي صدعتيني ..
_ تربيه ناقصه،هقفل حاضر متتاخريش سلام..
_________
هكلم بقي ساره اعرفها ان كله تمام .
_ ايه ياساره.
= ايه عملتي ايه!
_ كله تمام ..وهجيب مي صاحبتي معايا
= اتفقنا..انا بلبس مروان أهو ويوسف كلمني وجاي ف الطريق .
_ ماشي ياحبيبتي ،باي
_ باي ..
__________
هكلم ليل اعرفها.
_ ايه ياليل !
=ها عملتي ايه !
_كله تمام ،كلمت ندى وهتيجي وهتجيب مي صاحبتها .
= خلاص حلو جدا ..وانا كلمت حور وقالتلي هتجهز بس لؤي مش هيجي عشان بايت ف الشغل ربنا يعينهُ
_ يارب ،طب بقولك ايه !
= قولي
_ اتصلي ب لميس ومعتز ويجيبوا محمد ابنهم يكون مع انس ورودينا وعائشه.
= والله فكره وهيعملولنا جو كده والله ،اتصل ب ليلي ولا بلاش!
_ لا ليلي هتوترنا وهتفضل تسأل كتير وطول السبوع هتقول اروح عشان العيال ف بلاش ياليل
=طب اكلم آلاء!
_ الاء نسخه من ليلي اختك ،احنا كده حلوين اوي
= خلاص ماشي ،انتي يوسف كلمك ولا حاجه
_ اه جاي ف الطريق ومؤمن كلموا وقالهُ
= خلاص ماشي ،بس انا تيتا فاطمه مش هتيجي
_ ليه!
= قالتلي مش هتقدر وهتتعب من القعده ومش هتعرف تاخد راحتها ف يطلعوا السطوح هي وخالتي واتصل ب امي تيجي تقعد معاهم فوق.
_ خلاص ماشي .
_يلا طيب هقفل ع اتصل ب لميس .
_ماشي ،باي
= باي
___________
_ مامي إيه رأيك!
= إيه ياعائشه ده بس لابسه بنطلون جينس علي فستان فرح علي طاقيه سودا ونضاره شمس علي الهيلز بتاعتي كمان ،ايه جو سمك لبن تمر هندي
_ وحش يامامي !
= ياقلب مامي مينفعش ،انتي لابسه من كل حاجه لايقه مع بعض حاجه مش عاوزه تزعلي لبسك يعني!.
_طب البس ايه
= هتلبسي الفستان القمر ده !
_ وانتي هتلبسي الفستان اللي شبه بتاعي صح يامامي!
= صح ياقلب مامي
_ طب انا هلبس لوحدي
= طب هساعدك بس حتي !
_ لا يامامي هلبس لوحدي وتيتا فاطمه هتسرحلي ..
= خلاص ياحبيبتي ماشي .
________
بتتصل ب لميس
_ الو يالميس .
= معاكي معتز “بيتخن صوته” النمره غلط يافندم تيت تيت تيت
_ مش انت جوز بنت خالتي وعيب اغلط فيك بس انت تافهه وتستاهل اللي لميس بتعملوا فيك.
= الله يكرم اصلك ..عاوزه ايه بقي !
_ عازماكم علي سبوع.
= لحقتي تولدي ..ويجي السبوع سبحان الله الايام مفهاش بركه ..راحت البركه والله
_ هي مراره واحده يامعتز وهتخليني أشيلها.
= وبعد ما تشيليها واجي اعصبك هتقوليلي هشيل ايه !
= هخلي لميس هي اللي تشيلك اوبح ومن الشباك علي طول
_ طب خلصي طيب سبوع مين !
= ماجد صاحب مؤمن .
_ سبحان الله هما بقو يعملولهم السبوع لما يكبروا !
=بنبره تحذير: معتززز
_ هتبلعيني ولا ايه !
= معتز غباوه والله اسم علي مسمي هسميك غباوه بعد كده
_ جرا ايه ياا صباح مالك ف ايه !
=لميس : صباح مين يامعتز ..وبتخوني علي تليفوني ..ليلتك سودا ..هات التليفون ده كده !
_ احسن احسن والله تستاهل عشان تتريق علي إسمي حلو .
= ايه ده هو إنتي ياليل!
_ اه انا وبيتريق عليا.
= خضتيني كنت هقلب علي الراجل ..عامله ايه
_ الحمدلله ،بقولك ايه عشان مستعجله.
= مستعجله ليه !
_ عاوزاكي تجهزي ..عازماكم علي سبوع وبلاش تقولي مين ومش مين.
= انتي هتجُري حمير يابنتي مش عارفين هما رايحين فين!
_ هشرحلك ف العربيه عشان خاطري مؤمن زمانه جاي وانا لسه مجهزتش ،البسوا وهنعدي ناخدكم.
_ طيب ماشي قرايبنا طيب ولا ايه.
= ابن ماجد زميل مؤمن .
_ اااه ..طيب ماشي ..اجيب مستر سلطع ولا بلاش .
= “بتضحك”هاتيه
_ ماشي ..باي .
“ليل بتقفل ..بتلبس الفستان ..وبتطلع برا ل عائشه ..
_ شاطوره ياعائش ..تعبتي تيتا فاطمه كده ينفع !
= انتي تعبتي وإنتي بتسرحيلي ياتيتا!.
_ ياريت كل التعب يبقي بالحلاوه دي ..انا اعمل اي حاجه عشان عائش حبيبتي .
_ حبيبتي ياتيتا ..
“صوت مفتاح مؤمن ..بيفتح الباب ” .
سلام عليكم .
_ وعليكم السلام ورحمه الله وبركاته.
= ملبستيش الخمار ليه ياليل وانتي ياتيتا ملبستيش ليه!.
_ لا ياحبيبي إعفيني أنا من المشوار ده ،هقعد تحت مع والدتك .
_ اللي يريحك ياحبيبتي
= انا هلبس الخمار علي طول عقبال ما تاخد دش وتلبس ..وبخصوص تيتا فاطمه انا هتصل ب ماما تيجي تقعد مع تيتا وخالتي .
= يابنتي خالتي تحت
_ بجد ماما تحت امال مطلعتش ليه!
= قالت بتاخد نَفسها من السلم وهتطلع ..
_ طب انا ماما عقبال ما تستريح هنكون خلصنا ونازلين اصلا ..
= طب هاخد دش ف السريع وهلبس .
_ ماشي ياحبيبي ،احضرلك تاكل !
= لا هناكل هناك عشان ماجد ميزعلش .
_ خلاص ماشي ..
___________
جرس الباب بيرن .
“عائشه بتفتح “..
_أنس : أن ان ان ..ايه رايك ف البدله!
= حلوه ياانس .
_طب انا لابس بدله وانتي فستان ما تيجي نتجوز
= انا لسه صغيره .
_ انتي صغيره! ..ده انتي وليه كبيره متنكره ف طفله .
_ ليل: اتريق علي بنتي ياجزمه مش هجوزهالك.
= هتجوزها كده كده
_ ساره : كل ده مخلصتيش !
_ خلصت ناقصلي الخمار ..حور فين!
= حور: انا اهو خلصت.
_ طب ويوسف !
= يوسف تحت عند خالتي
_ ماما تحت
= بجد ! طب هنزلها وهتصل ب ندى اشوفها فين ،هو صحيح مؤمن فين !
_ ليه !
=عاوزاه يبعتلي اللوكيشن عشان ابعتهولها .
_ طب استني
“بتجيب موبايل مؤمن وبتبعتلها لوكيشن الفيلا ”
_ طب هنستناكي تحت ..هي رودينا فين ياانس !
= نزلت تحت عند تيتا .
_ ماشي ،يلا ننزل نستني تحت.
=انس: تعالي ياعائشه معايا .
_ لا هنزل مع مامي وبابي وتيتا.
= طيب ياام لسانين.
_ انت بارد اصلا.
= زيك.
_ تيتا فاطمه : بس كده عيب ياانس انت وعائشه .
= حاضر ياتيتا .
____________
بعد مرور ربع ساعه بينزلوا تحت.
_ اذيك ياماما وحشتيني
= الحمدلله ياحبيبتي،كويسه انتي الحمل عامل معاكي ايه !
_ اهو الحمدلله
= لابسين ورايحين السبوع ده ! ساره قالتلي
_ اه رايحين ..بصي ياماما معلش مش هنتاخر اقعدوا سوا وتيتا فاطمه لو عازت اي حاجه تعمليها بدالي لحد م ارجع ولو عاوزين تقعدوا سوا فوق السطوح اقعدوا
_ طبعا دي ف عيني اللي هي عايزاه .
= تيتا فاطمه : تسلم عينك ..روحوا انتو متشغلوش بالكم بينا .
_ حاضر سلام عليكم .
=وعليكم السلام
________________
_ليل: صحابك جم ياساره !
= اه كانوا متجمعين سوا ..واول م بعتلهم اللوكيشن ..ركبوا اوبر ع طول .
_ طب كويس جدا .
“بينزلوا تحت ..حور وساره ومازن ومروان ولميس ومعتز ركبوا مع يوسف ف العربيه
وانس ورودينا ومحمد وليل ومؤمن وعائشه ركبوا أوبر
______________
علي الجانب الاخر ف فيلا فرغلي ف نفس توقيت الأحداث إللي دارت ما بين عائله ليل ومؤمن..ماجد راح للولد المستشفي هو وسمير وخدوا الولد وجابوا جهاز التنفس والممرضه إللي هتكون مع عمر ..
كانوا فِ إتجاهُم للبيت ..كان ماجد حاسس إنه ماسك كِنز خايف عليه وباصصلُه بحُب ..
بعد مرور نص ساعه وصلوا البيت .
___________
_ حضرتك استاذ ماجد.
= اه انا
_ الف مبروك ،وربنا يشفيلك ابن حضرتك ..انا كده خلصت الديكور واللعب دي هديه للبيبي ..
_ كتر خيرك وبجد تسلم ايدك كل حاجه حلوه وعملتيها ف وقت بسيط تسلم إيديكم بجد ..
= الحمدلله انه عجب حضرتك.
_ اه عجبني جدًا ،طب الحساب كام !
“بيقاطع صوته سعد وهو بيقرب إتجاهه عُمر جينا ف نفس وقت وصول عمر بيه”
_ بسم الله الرحمن الرحيم الولد زي القمر،هات بوسه لعمو حبيبك .
“بيبوس عمر من عيونه ..وقتها كان نايم ” ..
_ فؤاد بدلال:”بيبص لملامحه البريئه “هات اشيلوا حبيبي ده..ياحبيب جدو الله اكبر عليك ..إسم الله علي روحي إللي نايم ده ..تعبان ياحبيب جدو !! هتخف وهتبقي راجل كبير حلو كده وهتطلع دكتور إن شاء الله بس أوعى تطلع فاشل زي أمك مكنتش بتحب التعليم عارف لو سمعتني هتقعد تعيط زي العيال ..هي عمليا امك عمليا هي طفله زيك والله
“كلهم بيبتسموا علي طريقه كلامه وكإنه بيفضفض مع شخص كبير”
تعرف ياعمر إن أعز الوِلد وِلد الوِلد يعني انت اغلي من أسيل والواد ماجد أبوك ده.
_ ماجد بيضحك: ربنا يديك الصحه ياعمي .
_يارب ياحبيبي
=ماجد:طب انا هَدَخلهُ لأمه لحسن هتموت وتشوفه وإحنا إتأخرنا كده عليها وانا كمان مردتش عليها وزمانها قاعده علي أعصابها..
_فؤاد”بيوجهه كلامه للممرضه” يلا يابنتي اتفضلي جوا ندخل لوالدته زمانها قلقانه
_ماجد:طب ادخل ياعمي هشوف الحساب كام وهاجي وراك .. حساب حضرتك كام.!
= سعد بيقاطع كلامه : استني ياعمي خد ماجد معاك ،ملكش دعوه بالحساب وخش مع عمي وابنك و فَرح مراتك.
_ ابتسم “حاضر ..”بيطبطب علي كتفه” عقبال كده ما اعمل لإبنك
=يارب
“بيدخلوا الاوضه سوا هما التلاته ..
الفرحه كانت علي وجهه أسيل ك فرحه طفل يتيم الأب ..بإيد تشبهه لأبوه ف حنيتها بطبطب علي كتفه بعد بُكاء شديد ويوم عَصيب
_ماجد بلطف قرب علي راسها وباسها : مبروك علينا إبننا ياأم عمر .
= الله يبارك فيك ياحبيبي،ما شاء الله جميل اوي ياحبيبي.
_ عشان شبهك بس.
=فؤاد:قولنا شبهي بقي خلاص مش عاوزين نصب
“بيضحكوا “..
“سعد بيخبط خبطتين علي الباب “.
_ماجد: إتفضل أدخل
=حمدلله ع السلامه يامرات اخويا.
_ الله يسلمك ياسعد عقبالك.
= الله يكرمك يارب ..انا جايبله الحاجه دي حاجه بسيطه .
_ تعبت نفسك والله.
= انا بجيب لإبني ،فين التعب بس!.
_فؤاد بمشاكسه: فين الشنطه اللي جايبهاله ياواد اوعي تكون نصبت عليا .
= لا والله مقدرش انصب عليك ياكَبير..اهي الشنطه.
_خدي ياحبيبتي الحاجه دي .
“بتحضنه”..ربنا يديك الصحه ياحبيبي يارب
_ يارب ياحبيبتي .
_ماجد : ممكن تلبسي وتغمضي عينيكي !.
= ليه!!!
_ هنسيبك تلبسي وهتعرفي كل حاجه !
= قلقتني !
_ متقلقيش ..الممرضه هتساعدك أهي وإحنا هنخرج بس قبل م تطلعي خبطي علي الباب من جوا 3 خبطات .
________
ف نفس توقيت الجُمله ..
“بتخبط 3 خبطات “..
_ طب أنا خَبط بدالها ينفع أدخُل!!.
=”الكُل بِ إندهاش ممزوجه بضحكه وفرحه ماجد جري بلهفه: ايات ..
_ ده أنا وعمر ونور جينا كمان .
= مكنش ينفع منجيش فِ يوم زي ده..
“ماجد بياخدها ف حضنه ” دي احلي مفاجأه ف الدنيا..
“بيتبت ف حضنها بيعبرلها عن مدى فرحته وإشتياقه ليها ” ..الف مبروك ياحبيبي ربنا يجعله سند ليك وعُكازك بعد ما يكبر بعد ربنا .
=يارب ياحبيبتي .
_سيبني بقي احضن البت أسيل عشان وحشتني .
_ وحشتني ياض ياعمر اوي والله.
= ده انت اللي واحشني ،انت عارف معناه ايه انك تسمي اسم ابنك علي اسمي !.
= معناه إيه !.
_”نور وعمر ف نفس واحد” ولا أي حاجه .
=طب هو عيل تافهه يانور إنت تبقي زيو .
_نور بابتسامه:الف الف مبروك ياحبيبي .
=الله يبارك فيك ،والله انكو جيتو من سفر كل ده عشان خاطر استاذ عمر الصغير ف من الواضح إنه مسيطر من صغروا .
_عمر: هما كل عمر كده مسيطرين سيبك انت .
=اهو هيتغر ف نفسهُ
“إبتدوا يسلموا علي بعض ويتبادلوا الاحضان “.
“سعد بيقرب من سميه ويمسك إيديها ،وبصوت خافت ..يلا احنا نخرج.
=يلا .
“بيخرجوا برا “..
_ماجد:عرفتوا عنوان الفيلا ازاي !
=ايات:بابا الله يرحمه كان باعتلي اللوكيشن لإن انا اللي طلبته منهُ لإني كنت عاوزه أعملهالهُ مُفاجأه ..بس للاسف محصلش نصيب وأجي وأشوفه واهو الحمدلله ربنا يديك الصحه انت وعمي فؤاد ..عوضتها ب اني جيت وشوفت عمر الصغنن اتفقت انا وعمر واهي فرصه خد اجازه من الدراسه ونور خد اجازه من شغلهُ وجينا علي طول .
_نورتي ياحبيبتي .
=بنورك ياأخويا .
_ماجد:طب يلا تعالوا إستريحوا شويه وتختاروا الاوضه إللي هتناموا فيها لحد ما أسيل تخلص لبس .
_خلاص ماشي .
“بيخرجوا ..واسيل بتلبس “.
_______
علي الجانب الاخر .
_______
ماجد بيوري عمر اوضته ..
ونور وايات اوضتهم ..بيسيبهم يستريحوا ..
وبينزل تحت يطمن ان الاكل خلص ولا لا ..
_ ثريا:كل حاجه تمام ياابني
=ربنا يباركلك ياست الكُل .
_ ويباركلي فيك ياضنايا .
=اقعدي استريحي لحد مالناس تيجي .
_حاضر .
________
اسيل بتخبط 3 خبطات .
ماجد ب ابتسامه بيفتح الباب وبيغمض عيونها ب ايد والايد التانيه بيسندها بيها ..
_ امشي خطوتين تاني ..لا لا خطوتين كمان ..ايوه بس كده ..فتحي عيونك بقي.
“بتحاول تفتح عيونها وتفرُك عينيها عشان تحاول تركز ..بصت بِ إنبهار وفرحه علي الديكور ..ده ده ديكور سبوع عمر صح !.
=صح ايه رايك ف المفاجاه .
_ انا مش مصدقه بجد دي احلي مفاجاه.
=وكمان ياستي عشان متحسيش انك لوحدك عزمت مؤمن واهله هيجوا معاه ومراته وقرايبه وكده من سنك هتحسي انك مش لوحدك .
=ربنا يديمك ليا ياحبيبي
_ويديمك ليا ياأم عمر ،ويباركلي فيكي .
_يارب ياحبيبي ..وإنت بقي يااستاذ بابا كنت عارف!
= اه طبعًا كُنت عارف .
_ومتقولش لبنتك حبيبتك!
=هتبقي مُفاجأه إزاي طيب!
_بقيت عصابه انت وماجد خد بالك ،ايه ده عمر بيعيط ..
=ماجد:متخافيش ياحبيبتي،هما الاطفال كده يعني هو كويس متقلقيش.
_ماشي ،بس هدخل اطمن عليه .
=ماشي ياحبيبتي .
“بتدخل الاوضه بتلاقي الممرضه بتديله اعشاب
بطريقه معينه عشان عياطه سببه مغص شديد”
الممرضه:متقلقيش عليه كل الاطفال كده بيكونوا شاربين مايه من بطن الام ف معظم الحالات ف بيكون الطفل علي صرخه واحده
_يعني بجد هو كويس!
=اه والله هيكون كويس متقلقيش
_ها اطمنتي ياستي.
=”ابتسمت “أه ياحبيبي إطمنت .
_طب يلا نطلع نقعد شويه برا .
=حاضر.
__________
“بيخرجوا “
_ثريا:هجيبلك طبق رز بلبن بقي انما ايه الست دي نفسها فيه حكايه.
=ماليش نفس والله يامرات عمي.
_لأ ازاي ده مينفعش لازم تاكلي .
=طب خلاص هاتي طبق مش هزعلك.
_جدعه بنتي حبيبتي .
=ماجد :طب وانا وعمي فؤاد ملناش من الحب ده نصيب!.
_بس كده عيني .
=تسلم عينك يارب.
_________
“سعد وسميه بيتمشوا ف الجنينه وماسكه فِ إيدوا كان بيحكيلها اللي حصل “.
_متزعلش ياسعد
=ازاي مزعلش ياسميه هبقي بكدب علي نفسي
_لازم نرضى بقضاء ربنا وكل واحد غلط ياخد عقابه .
=ماشي ياسميه.
_مش بقولك عشان تزعل ياسعد ..
=امال عشان ايه !
_”بتحط إيدو علي بطنها” عشان لما إبننا أو بنتنا يكبروا نعلمهم الصح من الغلط ..وان اللي بيغلط وربنا بيغضب عليه عقابه عسير عند ربنا
_ثواني كده بس انتي حامل!
=احم احم تقريبا يعني .
_”بيضحك وعلامات الدهشه باينه علي ملامحه” :يعني ايه طيب انتي حامل صح!
=يعني مضحكتش غير لما عرفت اني حامل !يعني خدتك مني او خدك مني من قبل ما يجوا اصلا!.
_سميه بالله عليكي طمنيني انتي حامل!
=”ابتسمت وقربت منهُ وهي حاطه إيديها علي وشه ب رِقه وبتتأمل ملامحه” اه ياسعد جوايا حته منك
_اتاكدتي صح!.
=اه ياحبيبي إتأكدت .
“بياخدها ف حضنه وبيلف بيها” ..دوخت ياسعد نزلني
_ طب خلاص خلاص اسف يعني انا بسببك هيتقالي يابابا صح
=بالظبط كده ياباشا اي خدمه.
_الحمدلله ،الف حمد وشُكر ليك يارب،بحبك اوي .
=ايه قول تاني كده!.
_بحبك يادزمه.
=بحبك اكتر
_لا كدابه مش بتحبيني.
=لا بحبك.
_لا
=ايوه فعلا مش بحبك ها ايه تاني
_لسانك ده عايز يتقص.
=شكرا ،انت اب انت!
_اه ..هعلم ابني يكون صايع زي ابوه .
=كنت صايع ،دلوقتي محترم الحمدلله.
_خلتيني اتوب للاسف.
=”بترفع حاجبيها “للاسف ها
_وحشتني ايام الشقاوه اوي
=ياسلام!
_بهزر ايه يارمضان الله ايه مبتهزرش!
=لا يااخويا بهزر ..بس متقولش تاني وحشتك ايام الشقاوه عشان بزعل
_حاضر متزعليش.
=مش زعلانه خلاص .
_طب تعالي ندخل نفرحهم .
__________
“بيدخلوا جوا بيلاقوا عمر ونور وايات وكلهم متجمعين بيعرفوهم ان سميه حامل الكُل فرحان وابتدوا يحتفلوا بيهم ويباركولهم لكن ام سعد كانت مختفيه ..
سعد انسحب من القاعده من غير ما يلفت انتباه حد ودور عليها لقاها جمب شجره واقفه وسرحانه ..
سعد قرب عليها ولمس كتفها بهدوء رغم هدوء لمسه سعد ليها إلا إنها إتنفضت كإن صاعقه لمست جسمها ..إبتلعت ريقها وحاولت تداري حزنها ب إبتسامه :إيه ياحبيبي فِ حاجه ولا إيه!
=لأ مفيش ،انتي ليه قاعده لوحدك!
_كنت بشم شويه هوا بس
=زعلانه عشان ابويا صح!
_العشره متهونش ياابني غير علي الناس مش ولاد الأصول ..زعلانه عليه وعلي نفسي زعلانه علي اللي وصلهُ،زعلانه اني مقدرتش اوقفه عن اللي كان بيعملوا لحد ما تمادى وراح للتهلكه ب إيدوا زعلانه علي نفسي إني قبلت علي كرامتي حاجات كتير أوي تزعلني وعلي خيانه وعلي اهانه وعلي قرف وإستحملت ..قلبي لو كان جبل كان إتهد ..لكن قلبي فضل يسامح ويعدي وبكل صرامه بس مع كل موقف ممدوح كان بيقفد جزء حلو جوايا إتجاههُ بس مكنش بيفرق معاه “ضحكت ضحكه مليئه بالذكريات المؤلمه”..هو مكنش شايفني اصلا انا مجرد واحده علي اسمه صايناه ف غيابه عشان متاكد ان عمري ما هعك زيو..انا حبيتهُ دايمًا القلق مبيحِنش ولا بيحب غير الناس إللي بتوجع فيه كإنه حابب الأذيه وإنه يفضل يضُخ بدل الدم آلام ووجع ..
_يااه ياأمي كل ده شايله جواكي وساكته!
=انا كويسه يابني مفيش حاجه ..قولي بقي كنت بتدور عليا ليه!
_هتبقي كويسه وربنا هيراضي قلبك عشان صبرتي ياست الكل .
=يارب ياحبيبي
_ عايز اقولك خبر حلو بقي
=قول
_سميه حامل .
= ب انبهار وفرحه:بجد يابني الف الف مبروك ياحبيبي .
“بتاخدوا ف حضنها ..بتعبرله عن مدى فرحتها ..”.
_تعالي يلا ندخل نبارك لِ سميه.
=يلا ياحبيبتي .
_________
“بيدخلوا علي صوت ايات وهي بتقول”..
ريحه بابا ف البيت لسه ..صوروا اللي حوالينا محسساني ان روحهُ معانا ..فاكر ياماجد واحنا صغيرين لما كان يرجع من الشغل جايب اللعب وانا كنت بحب اوي لعب الولاد ..كان بيفضل يقولنا العبوا سوا وانت كنت تقوله يابابا هاتلها واحده هي كمان يقولك لا انتو الاتنين هتلعبوا بيها لما كبرنا شويه وسالناه قال عشان تتعلموا الحنيه علي بعض وتطلعوا يكون عندكم قناعه وان الحاجه حتي لو بسيطه هخليها ف عيونكم كبيره انا كنت قادر اجيب بدل اللعبه 10 بس كان ليا حكمه ف ان لو ف ايديكم حاجه صغير تقسموها سوا وتورثوا لعيالكم الرضا إللي زرعتوا جواكم ..
_فاكر ياحبيبتي كل حاجه والله.
=”بتقاطعهم صوت ثريا” ..ربنا يرحمهُ ياولاد ويارب دايما البيت مفتوح بحِسكُم
_ايات:يارب ويديكي طولة العمر ياحبيبتي
=يارب ياحبيبتي ،بتوجهه كلامها ل سميه ..الف الف مبروك ياحبيبتي ربنا يتمملك علي خير يارب
_يارب ياماما ،الله يبارك فيكي
_____________
“بعد مرور ساعه كلهم بيتجمعوا عند الفيلا ..”
مؤمن بيتصل ب ماجد عشان يطلع ياخدهم من برا .
_ ايه ياحبيبي فينك كده.
= انا اهو برا انا والجماعه
_ طب حالا هطلع اجيبكم ..سلام
= سلام.
_ اهو ماجد طالع .
“ندى ومي بصوا لساره بخجل ”
_ندى: بفكر ارجع انا مكسوفه اوي.
= مى:وانا كمان جدًا
_ساره: طب مش تعرفيني بصاحبتك الاول ياعديمه الزوق.
=ندى: نسيت والله حقكم عليا ..مى ..دي ساره صاحبه عمري ..ساره دي مي جارتي واختي .
“ابتدوا يتبادلوا السلامات ” ..
_ تشرفنا يامى.
= ربنا يخليكي تسلمي .
_ساره:متتكسفيش عاوزين كلنا نشجع بعض كده عشان انا ثانيه كمان من الكسوف انا اللي هسيبكم وامشي.
ندى:واطيه وتعمليها
_طب بس بس الراجل طالع.
“إبتدا ماجد يرحب بيهم”.
_ اتفضلوا ياجماعه نورتوني والله ..تسلم خطوتكم الغاليه ربنا يبارك فيكم يارب.
_معتز بصوت خافت:ما خلاص هو هيشحت بينا.
=”ضربته ضربه خفيفه بكتفها” وطي صوتك بدل م تفضحنا أبوس إيدك .
_ هسكت اهو حاضر
“دخلوا الفيلا وإبتدوا يحتفلوا بالسبوع ..”..
“قعدوا علي السفره ياكلوا “
ندى كانت قاعده جمب مي ..قالت بصوت خافت ..
=خدتي بالك من الولد اللي قاعد جمب ايات عينه متشالتش من عليكي .”تقصد عمر”
_”رفعت حاجبيها” ..طب ممكن تاكلي وانتي ساكته!.
=انا بلفت نظرك بس يعني
_هسيبك وامشي!
=خلاص براحه.
_ساره:اتلموا عيب الرسول نهى عن ان اتنين يتكلموا كده مع بعض وف مجموعه من الناس قاعده.
رواية ابن عمر رضي الله عنهما أن الرسول عليه الصلاة والسلام قال: (إذا كانوا ثلاثة فلا يتناجى اثنان دون الثالث).
وسبب تحريم تناجي اثنين دون الثالث في الشرّ: أن التناجي يؤذي الشخص الثالث ويُحزنه ويُوقعه في الحرج ويُشعره بمهانته وذلّه ، وقد ورد في الحديث المتفق عليه عن ابن مسعود رضي الله عنه ، أن رسول الله صلى الله عليه وسلم قال: (إذا كنتم ثلاثة فلا يتناجى اثنان دون الآخر، حتى تختلطوا بالناس ، من أجل أن ذلك يحزنه). وإيذاء المؤمن وإحزانه حرام لقوله تعالى: (وَالَّذِينَ يُؤْذُونَ الْمُؤْمِنِينَ وَالْمُؤْمِنَاتِ بِغَيْرِ مَا اكْتَسَبُوا فَقَدِ احْتَمَلُوا بُهْتَانًا وَإِثْمًا مُّبِينًا) [الأحزاب:58].
حتي لو مش بتتكلموا علي كد ف كل شخص هيفتكر انكو بتتكلموا عليه ف ناكل بقي وانا ساكتين.
_ندى:حاضر ياماما ساره
_لميس: براحه يامعتز انت داخل سباق ف ايه ياحبيبي .
=الاكل طعمه حلو اوي
_”بتجز علي سنانها وبتبتسم عشان محدش يحس ب حاجه” ياكاسفني ف كل مكان اهدي علي نفسك شويه
_حاضر ياستي .
“بياكلوا وكلهم بيتجمعوا بيشربوا الشاي ف الجنينه ..مى بيجيلها مكالمه استأذنت وبعدت شويه عن المكان عشان الدوشه ..
عمر انسحب ب هدوء ..
ندى وساره بصوا لبعض خدوا بالهم ان عمر مشدود ل مي ورايح وراها ..
بيقرب عليها .
__________
علي الجانب الاخر لميس ومحمد ومعتز قاعدين معاهم لكنهم ف عالم موازي ..
_واد يامحمد غيرلي اسم الفيس وخليه لميس دي انا غيرلي صوره الملف حط صوره فيفي عبده واكتب عليها انا كيداهم الجامده هتفضلوا متغاظين مني لحد امتي .
_ بابا ماما عايشه من ايام سعد زغلول ..
= لا يابني امك شكلها تايهه عاوزه تسمي الاكونتت بتاعها لميس دي انا كإن حد اتهمها قالها والله انتي ما لميس ..وبعدين ايه عنوان الشارع اللي عاوزه تكتبيه علي الصوره ده هتكيديهم علي وكسه ايه يالميس ها عاوزه الناس تدخل تتخانق معاكي!
_اتريق انت وابنك اتريق..اشمعني ام زياد صاحبتك مسميه نفسها فوفا دي انا وكل شويه تنزل تلقيحات عليا .
_ليه ياختي واخده ورثها !
=هي حيليتها حاجه ام عبايه واحده دي ..سامحني يارب منك لله خدت مني حسنه وخدت منها سيئه منك لله يامعتز ، بس هي بصورم مني وانا عاوزه اغيظها.
_هي اللي بصورم ده انتي اللي عايزه تسمي الاكونت علي اسمها.
=سيبك من ابوك ياواد يامحمد هتغيرلي الفيس ولا اوديه لسنترال!
_الناس هتاكل وشي ياماما
=ماشي لما اروحلك يامحمد اصبر عليا .
_____________
علي الجانب الاخر.
_ اذيك يامي !
=كويسه ،بس مالك داخل بعشم كإنك تعرفني كده!
_عادي مقصدش حاجه ازعجتك!
= اه ازعجتني ..ممكن تتفضل !
_ هو انتي بتتكلمي كده ليه !
=”بينها وبين نفسها ..كلمي الولد حلو هو مالهوش ذنب انك كارهه الولاد تراجعت عن اسلوبها “اسفه لو طريقتي بايخه بس مش حابه اتكلم .
_كارهه الولاد صح!
=”بصتلهُ بدهشه”: عرفت ازاي !
_بعرف أقرأ عيون اللي قدامي
= دي داخله جديده صح!
_لا مش عارف بصراحه حد استخدم الداخله دي قبلي ولا لا .
= وكمان صريح !
_مش مُضطر اكذب ،بس بجد هي مش داخله ولا حاجه والله انا فعلا بفهم اي شخص قدامي،تحبي افسرلك كارهه الولاد ليه !
=…….
_عشان ياستي حبيتي شخص ووثقتي فيه جدا وخذلك ..عشان شايفه ان كلنا وحشين وشبهه بعض ،عشان شايفه ان كل الوعود والكلام حلو بس ف البدايه لكن ف النهايه بننهيها بكل شئ قسمه ونصيب ..عشان كده بتكرهينا كلنا بس الغريبه لحد الان معرفتيش تكرهيه هو .
_”اصوات انفاسها بتتسارع ..ابتلعت ريقها الدموع اتجمعت ف عيونها..اتصدمت من انه فاهمها كده ..افتكرت الشخص اللي كانت بتحبه وانه بردو كان فاهمها زيو كده ..
_سيبني امشي بعد اذنك.
=مش هتمشي .
_قولتلك همشي
=هو ليه كله بيهرب مني !،ليه مفيش بنت بتقبل تتكلم معايا ولا هو انا حظي دايما بيقع ف الاشخاص اللي قلبهم لسه مجروح .
_ قالت بعصبيه: انت واحد معندكش دم ..مش شايفني بموت قدامك ولا بترجاك علشان تقولي مجروحه انا كويسه ومش ضعيفه.
“سابته ومشيت خطوتين ..مي اكتر حاجه بتإذيها ان شخص يحسسها بضعفها ..وهو عيونه اتجمع فيها الدموع ..ولإنه شخص عصبي وكتم عصبيته ..مقدرش يتحمِل وفقد وعيهُ ..
“قلبها اتقبض بصت عليه بخوف الكل اتجمع من صوت الهبده ..
ايات باإتهام :عملتي ف اخويا ايه!!!!
يتبع..
لقراءة الفصل الرابع والعشرون : اضغط هنا
لقراءة باقي فصول الرواية : اضغط هنا
نرشح لك أيضاً رواية وقعت أسيرة في حبك للكاتبة غفران
