رواية السر القديم الفصل الرابع 4 بقلم علاء جمال
رواية السر القديم البارت الرابع
رواية السر القديم الجزء الرابع
رواية السر القديم الحلقة الرابعة
حاول نبيل يسكتها زي كل مرة لكنها مسكتتش المرادي .وفضلت تقول في كلام غريب بالشكل ده. وأنا واقفة مذهولة ومش فاهمة إيه اللي بيحصل.
وفجاة حماتي مدت إيدها ليا وقالتلي
-تعالي يا ابتهال تعالي يابنتي متخافيش‘ انا مش هأذيكي.
مقدرتش أتحرك من كتر الخوف مش عارفة استوعب إيه اللي بيحصل.
كملت حماتي كلامها وبدأت تبكي بحرقة.
-انا آسفة يا إبتهال ‘ سامحيني يابنتي انا اللي كنت بعملك الأعمال والسحر عشان اجننك واخليكي تسيبي البيت واخلي الناس تقتنع بأنك مجنونة‘ بس دي مكنتش فكرتي لا دي كانت فكرة نبيل هو اللي قالي عليها وهو اللي كان بيحط الأعمال في الشقة بتاعتك.
بصيت نبيل وأنا مصدومة ودموعي بدأت تنزل علي خدي بغزارة.
-ليه نبيل ؟ليه بتعمل فيا كده‘ هو انا عملتلك ايه وحش عشان تعذبني بالشكل ده. مكنتش بصعب عليك وأنت شايفني مرعوبة أقعد لوحدي ومرعوبة أنام ومرعوبة ادخل المطبخ وكل الناس فاكرني اتجننت مصعبتش عليك ولا مرة؟
وهنا ظهرت الحقيقة المرة .
-وتصعبي عليا ليه وانا عايز أخلص منك ومن قرفك زهقت منك ومن العيشة معاكي ‘حياتي معاكي مملة وسخيفة انتي كرهتيني في عيشتي.
“زهقت مني ومن عيشتي وخلاص مش قادر تستحملني ،كنت طلقني وأخلص مني ليه تعذبني بالشكل ده؟
بدأ يضحك بطريقة سخيفة وهو بيقول.
“مينفعش اطلقك لأنك مهمة اوي ياابتهال.
“مهمة ازاي وانت عايز تخلص مني انت بتقول اي كلام وخلاص.
“لا مش اي كلام انتي مهمة بس مش مهمة بالنسبالي انا انتي مهمة للكنز.
بصيته باستغراب.
“كنز ايه ده اللي بتتكلم عنه؟ هو انت هتفضل تقول كلام غريب كده كتير ولا ايه. ما توضح انت بتعمل معايا كده ليه .
“هحكيلك ياستي عشان تفهمي بدل ما انتي حمارة كده ومش فاهمة حاجة.
“زمان أوي البيت ده كان دور واحد وكان عايش فيه جدي الله يرحمه.
وكان بيحصله حاجات غريبة في البيت بيسمع اصوات وبيحلم بتماثيل غريبة بتتحرك قدامه وبتكلمه وفضل علي الوضع ده فترة طويلة.
لحد مافي يوم شاف شيخ والشيخ عرفه إن البيت فيه كنزفرعوني مدفون غيه من زمان اوي والكنز ده بيناديه عشان يفتحه.
ولكن عشان يتفتح كان في شرط صعب شوية وهو إن جدي يقتل جدتي عند باب المقبرة. لأنه كنز مش بيتفتح غير بالدم ولازم يكون دم حد قريب مش اي حد والسلام.
جدي كان راجل طيب وفي حاله طول عمره. وعشان كده رفض وقال مش عايز كنز ولا حاجة انا راضي بعيشتي كده ومش هتقل مراتي ولا هقتل اي حد يقربلي.
مرت السنين وجدي خلف أبويا وبعدها بعشر سنين مات .
وعاش ابويا حياته يتيم وورث الأحلام اللي كان ابوه بيحلم بيها.
كان بيحلم بتماثيل وأوقات يحلم بأشكال حيوانات ولكن الرؤوس بتاعتها كانت بتبقي عبارة عن دهب.
وبدأ يسمع أصوات كتير وحاجات غريبة بتحصل في البيت.
كبر ابويا واتجوز وهو لسه مش فاهم ايه اللي بيحصل معاه ده.
ومن بعد الجواز بدأ الموضوع يزيد معاه اكتر واكتر.
لحد ما راح لشيخ والشيخ فهمه كل حاجه وعرفه قصة الكنز وحتي عرفه قصة ابوه اللي مكنش يعرفها ولا كان سمع عنها خالص طول حياته. ابويا بقي كان بيحب امي وعشان كده مقدرش يقتلها ولا ياذيها في حاجة وعاش عمره كله بيتعذب مع نفسه من غير ما يقول لحد او يشتكي.
وبرضه مات وانا عندي عشر سنين.
امي كانت عارفة القصة كلها لان أبويا مكنش بيخبي عليها اي حاجه.
وسألت كتير ازاي تتخلص من الي بيحصل ده وراحت لشيوخ كتير وجابت شيوخ كتير. لحد ما في شيخ قلها تهد البيت وتبنيه من تاني واللعنة اللي فيه دي هتنتهي خالص.
وبدأت أمي تدبر في فلوس من كل حتة عشان تعرف تهد البيت وباعت دهبها و استلفت فلوس من ناس كتير وفعلاً هدت البيت وبنته من جديد وببنته ادوار كتير وكمان سكنت فيه ناس تانيين علي أمل أن اللعنة تنتهي وفعلاً عشنا فترة كبيرة مرتاحين وكله كان تمام لحد ما كملت عشرين سنة وبدأت حياتي تتلغبط زي ما حياة جدي وابويا اتلخبطت.
بقيت بسمع اصوات كتير بتنادي باسمي طول الليل.
وبقيت بشوف أحلام مرعبة وبقيت اكره حياتي دي.
حكيت لامي اللي بيحصل معايا.
وهي فهمت إن اللي عملته ملوش لازمة ومكنش حل ولا حاجة.
وحكتلي القصة كلها من البداية.
ولما فهمت وعرفت اللي حصل مع ابويا وجدي.
قررت إني مش هطلع خايب زيهم وهعمل اللي هما مقدروش يعملوه.
بس كان فيه مشكلة إزاي تموتي من غير ما حد يتهمني فيكي.
وقلت ادام سحر بسحر بقي يبقي اعملك أعمال واخلكي تكرهي حياتك وتجنني واهم من ده كل أن الناس تعرف إنك اتجننتي .
وعشان كده لما كانت بتحصلك حاجة كنا لازم نجيب الجيران يتفرجوا عليكي وامي كانت دايما تحكيلهم اللي بتعمليه عشان الكل يقتنع إنك اتجننتي. والدنيا اتهيئت زي منا عايز عشان اقتلك واقول للناس إنك انتحرتي واطلع انا منها زي الشعرة من العجين.
والأهم إني افوز بالكنز اللي اهلي مقدروش يفوزا بيه.. إيه رأيك بقي في القصة الغريبة دي..
-لا لا انت مش طبيعي انت أكيد مجنون!
– هو انتي لسه شوفتي جنان ‘ الجنان لسة هيحصل دلوقت.
وفجأة خرج آلة حادة من جيبه وعنيه كانت بتطلع شرار وهو بيبصلى وكأنه هيلتهمني.
صرخت حماتي بصوت عالي اهربي ياإبتهال ‘اهربي بسرعة.
بصلها بغضب وشوفت علي وشه علامات غريبة كانه ممسوس او في حاجة غريبة مسيطرة عليه وفجاة وبحركة سريعة ضربها بالآلة الحادة على رقبتها‘ منظر الدم وهو بيتطاير من رقبتها ونظرة الجنون اللي كانت في عيون نبيل كانت مشهد مرعب فعلاً.
جريت بأقصى سرعة عندي ونبيل ورايا بيحاول يلحقني عشان يقتلني‘ نزلت السلم وهو ورايا
خطواته بدأت تسرع وحسيت أنه هيوصلي
حاولت أسرع من خطواتي انا كمان. وجريت ‘جريت ‘جريت كتير أوي كان هيمسكني في أكثر من مرة لكني كنت براوغة وأبتعد عنه‘ حسيت بـ أنفاسي بتتقطع وقوايا بتخور مبقتش قادرة أكمل خلاص هيمسكني ‘هموت ‘ الحقوني ‘صرخت باعلي صوتي.
وارتميت على الأرض وأنا شايفة نبيل بيقرب مني وفي أيده الآلة الحادة اللي قتل بيها امه..
وفجأة التف حواليه عدد كبير من أهل المنطقة ومسكوه..وبعدوه عني بمعجزة..
***************************
سلمناه للشرطة واتقدم للمحاكمة والحمدلله أتحكم عليه بالإعدام لأنه قتل حماتي.
سبت البيت خالص وحلفت اني عمري ما هدخله أبدا طول منا عايشة. وكمان اتصلت بشرطة الآثار وعرفتهم القصة بتاعت المقبرة اللي موجودة في البيت دي.
وجت الشرطة ودورا كتير اوي لكن ملقيوش حاجة واتضح إن البيت كان مسكون والجن اللي فيه كان بيلعب بيهم كلهم وهو اللي خدعهم وولصلهم موضوع الكنز ده علي أمل إن حد فيهم يقتل مراته وفعلاً حيلته نفعت مع نبيل اللي كان عايز يقتلني..
تمت*
لقراءة الرواية كاملة اضغط على : (رواية السر القديم)
