رواية ميراث نور الفصل الحادي والتسعون 91 بقلم لينا بسيوني
رواية ميراث نور الجزء الحادي والتسعون
رواية ميراث نور البارت الحادي والتسعون
رواية ميراث نور الحلقة الحادية والتسعون
” مذبحة توران ”
” نور ”
توران قالى :
حقيقى انت وفيت بوعدك …لكن أنا للاسف مش هينفع اوفى بوعدى لانكم هتقتلونى يا نور ،يرضيكم اموت على ايديكم بعد كل السنين دى .. لا حقيقى يرضيك ؟!
ملحقتش ارد عليه اتفأجات بحاجة خبطت راسي فأترزعت على الأرض .
فتحت عينى لاقيت نفسي متكتف جنب نصير والنضارة والعصاية مش معايا.
شوفت قدامى توران وقدامه بلورة سحرية بيبص فيها على مارو وحنوش اللى واقفين على حدود المنطقة وبيمدوا رأسهم جوه المنطقة ويخرجوها بسرعة عشان يشوفوا الوهم اتشال ولا لا
توران قال :
شوفت يا زيران … توران قدر يغير قدره .. كده فاضل الاتنين اللى بره اللى هنجرجرهم هنا وندبح الأربعة مع بعض..
عينى كانت مزغللة وعندى صداع قوى كأن حد نازل على رادأسى بمطرقة.
كنت شايف كيانات سوداء حواليا .. تقريبا دخلت فى حالة الوهم من غير النضارة .
شوفت توران وسط الكيانات دى وهو لسه مدقق عينه فى البلورة .
حاولت اركز معاه وافصل عن كل الخيالات اللى شايفها واسمع بيقول ايه .
سمعته بيقول :
مش هجازف يا زيران .. لازم يكون معايا كارت اتفاوض بيه , لو قتلت نور ونصير لوحدهم اكيد حنوش ومارو هيحسوا او هيعرفوا وساعتها هنخرج بره دايرة التفاوض وندخل دايرة الانتقام وانا مش عايز وجع دماغ عايز اخلص الموضوع فى السريع ، هستعملهم طعم واجرجر بيهم الاتنين التانيين ..
توران سكت فجأة كأن حد قطع كلامه , لاقيته بيبصلى وبيضحك , قال :
انت مجنون يا زيران تسمع كلام الاهبل ده .. ده بيحاول يوقع بنا وبعدين انت كبير فى السن يا زيران ، أما هنقل روحى فى جنى صغير عشان اضمن العمر المديد ..
سكت شوية وقال :
ايوه كده يا زيران شغل مخك معايا , السؤال دلوقتى هنجرجر مارو وحنوش لهنا ازاى ؟ هقولك أزاى ! الموضوع بسيط حنوش ومارو مستنيين نور يبطل الألة اللى بتخرج اشارة الوهم عشان بعدها يدخلوا الدايرة .. احنا هنخلي خطته تنجح ….
مد ايده فى جيبه وخرج كرة معدنية عتيقة منقوش عليها تعاويذ بلغة قديمة وفى مركزها ثقب زى مايكون مكان مفتاح .. رمى الكرة فى الهوا والتقطها ببراعة وهو بيقول :
هنبطل الأله وهما هيخشوا المصيدة برجليلهم وقتها نخلص عليهم ونحتشى مع بعض كأس النصر .
فجأة صورة توران اختفت من قدام عينى واتبدلت بهلاوس شديدة شوفت فيها العرافة !!
********************************************************
” مارو ”
فضلت واقف انا وحنوش على اطراف منطقة الوهم ،بالتحديد فوق صخرة كبيرة من اللى رصهم أبويا على حدود المنطقة .
كنا بنتناوب انا وحنوش , أنا أمد رأسي شوية وهو يمد رأسه شوية عشان نشوف سحر الوهم لسه شغال ولا أبويا نجح انه يوقفه …
مديت رأسى فى دايرة الوهم مرتين .
أول مرة شوفت فيها نيللى عدوة أبويا وهى بتقطع رقبتى وبتشوطها من فوق برج عالى زى ما عملت فيها !
والمرة التانية أول ما مديت رأسى شوفت أيسر واللى مد ايده واقتلع قلبى .
كذلك حنوش دخل رأسه مرتين لكن مرضاش يحكيلى شاف إيه
بس كان واضح على شكله ان شاف حاجة صعبة جدا.
كل اللى قالهولى :
السحر ده قوى جدا بيأخد من دماغك ويشتغل عليك انا قلقان اوى على نور .
قولتله :
أنا واثق ان أبويا هينجح ..
قالى :
ها مين هيدخل رأسه عشان نشوف؟
قولتله :
لا مش انا …
قالى :
انت هتستعبط ده دورك !
قولتله :
خلاص نعمل قرعة ..
قالى :
وهنعمل قرعة على ايه ؟!
قولتله :
انا معايا عملة … ثوانى كدا
مديت أيدى فى جيبى وطلعت جنيه فضه , بصيت لحنوش وقولتله :
تختار الصورة ولا الكتابة ؟!
قالى :
الصورة طبعا …
قولتله :
كنت واثق انك هتختار الصورة .
رميت العملة لفوق فوقعت على رمل الصحراء على جهة الصورة !
قولت لحنوش بانتصار :
يلا مد رأسك ياحنش ..
هز رأسه بالموافقة على مضض ..
فألتقطت العملة بسرعة وحطيتها فى جيبى قبل ما حنوش يأخد باله ان الناحيتين صورة ..
حنوش مد رأسه وهو متردد ومغمض عينه .
قولتله :
بطل استعباط يا حنوش و فتح عينك .
فتح عينه واحدة واحدة واتفاجأت بيه بيخطى جوه المنطقة !
لف ضهره وبصلى وهو بيقول :
مارو!! شكل ابوك نجح !
دخلت بسرعة ولاقيت فعلا السحر وقف ، قولتله بحماس وانا بشده :
طب يلا بينا مستنى ايه ؟
حنوش شد ايدى ووقفنى وهو بيقول :
ثوانى بس يا مارو الموضوع حصل بسرعة جدا ، مظنش ان ابوك وصل بالسرعة دى لباعث الاشارة .. ممكن تكون خدعة من توران ، ممكن مثلا يكون قلل الاشارة بحيث نتقدم واحنا مطمئنين فنتفأجأ أننا بندخل فى وهم تانى ..
انا من رأيي واحد بس اللى يدخل والتانى يراقبه بعينه الثاقبة من هنا ..
يعنى انت هتقف هنا وتبص عليا وانا بعدى الصحراء ولو شوفتنى بهلوس هتعرف انما لو عديت بأمان هشورلك تعدى ورايا …انت شايف لحد فين ؟
قولتله :
انا شايف لحد الكهوف !
قالى :
تمام نظرك هيغطى ….خليك انت هنا وانا اللى هتقدم
قولتله :
طيب ماتخليك أنت هنا وأنا هتقدم .
قالى :
يا مارو مفيش وقت للمناهدة انت هتسنى هنا وانا هتقدم وانت ورايا ..خلى معاك سيف ننح .
حنوش مستناش ردى وجرى بسرعته الرهيبة فى الصحراء .
فضل يتقدم لحد ما وصل للكهوف من غير مايحصله حاجة فمستنتش وجريت وراه على طول .
حنوش التفت وراه وقالى :
انا مش قولتلك تبطل تهور ..
قولتله:
ماأنت عديت اهوه من غير ماتتهلوس ..
حنوش قال :
انا قولتلك استنى لحد ما اشاورلك …المهم .. على حسب الرسومات اللى شوفناها تقريبا هيكون الكهف ده
حنوش شاور على كهف من الكهوف فقولته :
:
متأكد أن هو الكهف ده ؟!
قالى :
عيب عليك .. أنا حافظ المنطقة دى صم .. ياما عديت عليها فى رحلاتى وياما نمت فى كهوفها .
قربنا من الكهف اللى شاور عليه حنوش واللى فتحته كان واطية جدا
فوطينا راسنا وحاولنا ندخله بحذر .
فى الأول طليت برأسى جوه مشفتش حاجة , يدوبك خطينا برجلنا جوه الكهف و اتفاجأنا بحاجة بتفرقع فى وشنا بعدها كل حاجة اتحولت لسواد ودخلنا فى غيبوبة
فتحنا عنينا لقينا نفسنا متكتفين بالجنازير جنب أبويا ونصير .
توران كان واقف قدامنا ماسك فى ايده سكينة وعلى وشه ابتسامة عريضة .
******************************************************
” نور ”
العرافة “نورا ” ظهرتلى وقالت :
انا اسفة يا بابا !!
قولتلها :
اسفة على ايه ؟!
قالتلى :
اسفه على اللى هتشوفوه كمان شوية , اللى هتشوفوه صعب خاصة ان توران لخبط كتير فى الورق وغير كتير فى الأحداث , بابا انا محتاجاك تكمل وتتحمل يا باب …..
نورا اختفت والاشباح اللى كانت قدامى تزاحمت جنب بعضها واتحولت لصورة سواد .
شوية والسواد انقشع والهلاوس اختفت فرجعت الصورة الطبيعية الكهف .
محدش موجود غير انا ونصير اللى كان لسه بيفوق .
اول ما فاق لمحنى و قال بفرحة ممتزجة بالألم:
نور !!! ايه اللى جابك هنا …انا كنت عارف انك عنيد ومش هتسيبنى !!
قولتله :
انا اسف يانصير لو خذلتك , حنوش قالى ان الخاتم ورثك من اجدادك متزعلش يا نصير انى معرفتش أحافظ عليه وفرطت فيه لتوران بس والله عشان انقذك .
بصلى بفرحة وقال بلهفة
انت اديت الخاتم لتوران ؟
قولتله بأستغراب :
اها ..
قالى وهو بيوشونى :
ولبسه ؟
قولتله :
معرفش .. مالك فرحان كده ليه ؟ فيه حاجة ؟
قالى :
اها انا معزم على الخاتم تعزيمة خفية , مكنتش عايز حد يستخدمه غيرك انت , خاصه ان كان هدفى الاساسى انك تقرا افكارى فأكيد مكنتش هخلى اى حد يستخدمة فعملت تعزيمة هى للاسف ضعيفة وهتسبب بس ….
نصير قطع كلامه لما اتفاجأنا بتوران جارر وراه مارو وحنوش وهما مغمى عليهم .
سلسلهم جنبنا ووقف فى وسطنا فى أيده خنجر وبيبتسم بنصر .
قال :
قبل ما اقتلكم هحتفل بنصرى قدامكم , راح ناحية سلسلة حديد وأتفاجئنا بيه بيربط نفسه فيها , حط مفتاح قفل السلسلة اللى ربط فيها نفسه فى جيبه .
سمعناه بيقول :
يلاه يا زيران دخل الجنى .
شوية وظهر فجأة قدامنا قفص حديد , شوفت القفص بعينى الطبيعية فاضى لكنى سمعت نصير بيقول :
القفص فيه جنى شاب تقريبا توران هينقل روحه فيه .
توران قال:
زى ما اتفقنا يا زيران انا رابط نفسى اهو , لما ألبس الخاتم هنقل روحى للجنى اللى فى القفص , لما تتأكد أن روحى أتنقلت أفتحلى القفص وخرجنى بعد ما اقولك كلمة السر .
توران لبس الخاتم فى صباعه فظهر اسم بلغة الجن.. تقريبا اسم الجنى اللى فى القفص , الخاتم اضاء اضاءة ساطعة وظهر السهم ,
اندهشت لما لاقيت توران عارف الطريقة , توران لف الخاتم فى اتجاه السهم فخرجت من الخاتم شرارة كهرباء .
توران أتكهرب ووقع على الارض مغمى عليه .
نصير وحنوش ومارو فضلوا متنحين كأن حد بيقولهم حاجة
بعدها هزوا رأسهم بالموافقة فقولتهم :
فى ايه ؟!!
نصير قالى :
الجن اللى مع توران بيقولنا نحاول نحرر نفسنا ونخلع وهو مش هيمنعنا .
تقريبا قلبوا على بعض … بسرعة يا مارو .. بسرعة يا حنوش .
مارو وحنوش قربوا من بعض وكل واحد فيهم شبك الجنزير اللى مقيد ايده فى جنزير التانى وفضلوا يحكوا جنازيرهم فى بعض بقوة .
الجنازير فضلت تسخن واحمرت من شدة الاحتكاك , وقبل ما الجنزير يسيح من حرارة الأحتكاك , توران فاق وعينه كلها غضب , مد أيده فى جيبه بسرعة وحرر نفسه من الجنزير اللى كان رابط نفسه فيه
ألتقط خنجره فى غضب شديد وقال :
أنا مش هضيع وقتى تانى ومش هسمح للكلاب دول يخدعونى .
مر بعينه علينا وقال :
أبدأ بمين فيكم ياكلاب ها …
مرر قدمنا خنجره وهو بيقول :
هادى بادى … شاله وحطه من ده على دى …
الخنجر وقف على حنوش فتوران قرب ناحيته , شده من شعره لورا وفى أقل من ثانية عدى بالخنجر على رقبة حنوش فشوفت الدم بيتنطور من حنوش .
صرخنا فى صدمة لما شوفنا رأس حنوش مفصولة عن جسمه !!
توران رمى رأس حنوش وهو بيصرخ فى حماس , و قرب على مارو و حاول يمسك رأسة زى حنوش , ماور لف رقبته وحاول يقاوم لكن تروان قدر يثبته .
صرخت وأترجيت توران يوقف , لكنه تجاهلنى وبسرعة شديدة عدى بالخنجر الحاد على رقبة مارو وقطعها زى ماقطع رأس حنوش !!
أتصدمت والصدمة أفقدتنى قدرتى على النطق مكنتش مدرك أن اللى بيحصل حقيقة مش خيال , أو بمعنى أصح مخى رفض تصديقه
… صرخت من غير صوت أنهرت فى مكانى لما توران كمل المذبحة وقرب من نصير و شق رقبته بالسكينة , مافضلش غيرى أنا ورؤوس عيلتى المفصولة عن أجسادها .
توران ضحك بهستيرية فى نصر ، قرب عليا وهو بيمسح خنجره وقال :
الدور عليك ياحفيد أيوب .
قرب عليا بالسكينة , حطها على رقبتى , حسيت بالنصل بيحتك فى رقبتى , بعدها حسيت بدمى الدافئ وهو بيسرسرب من رقبتى
بعدها كل حاجة بقت أسود …
ايه ده ؟ احنا موتنا !!
سمعت صوت العرافة نورا بيرن فى ودنى وبيقول :
لا يابابا أنت عايش , بس هتموت لو الأحداث مشيت على نفس النمط .. اللى أنت شوفته ده ملخص للى هيحصل كمان نص ساعة .. حاول تغير المسار يابابا زى ماغيره توران …
فتحت عينى فشوفت نصير لسه بيفوق اول ما شافنى قال :
نور !!! ايه اللى جابك هنا ؟! …انا كنت عارف انك عنيد ومش هتسيبنى !!
قولتله وانا سرحان :
ها !!!
قالى :
ها أيه ؟ مالك يا نور ؟!
قولتله :
توران هيدخل علينا دلوقتى وهو مجرجر حنوش ومارو .
نصير بصلى بأستغراب فقولتله :
أنت معزم على الخاتم محدش يلبسه غيرى , صح ؟
علامات الأندهاش ذادت على وش نصير وقالى :
أيوه أنا معزم الخاتم … انت عرفت منين ؟!
قولتله وانا سرحان :
أنت قولتلى من شوية
نصير بصلى بعدم أستيعاب فقولتله فى محاولة للتوضيح :
أنا شوفت اللى هيحصل كمان شوية , توران هيقبض على مارو وحنوش وهيدبحنا كل….
قطعت كلامى لما شوفت توران مجرجر مارو وحنوش بالضبط زى الرؤية اللى وريتهالى نورا من شوية .
سلسلهم جنبنا ووقف فى وسطنا وهو مبتسم وفى أيده الخنجر .
قال :
قبل ما اقتلكم هحتفل بنصرى قدامكم , راح ناحية سلسلة حديد و ربط نفسه فيها , حط مفتاح قفل السلسلة اللى ربط نفسه فيها فى جيبه .
سمعناه بيقول :
يلاه يازيران دخل الجنى .
ظهر قدامنا قفص الحديد اللى جواه الجنى الشاب
توران قال:
زى ما اتفقنا يا زيران انا رابط نفسى اهو , لما ألبس الخاتم هنقل روحى للجنى اللى فى القفص , لما تتأكد أن روحى أتنقلت أفتحلى القفص وخرجنى بعد ما اقولك كلمة السر .
توران لبس الخاتم فى صباعه فظهر اسم بلغة الجن تقريبا اسم الجنى اللى فى القفص …
صرخت بصوت عالى وقولت لتوران :
أياك تستخدم الخاتم … الخاتم متعزم عليه محدش غيرى يقدر يستخدمه ولو استخدمته هتتلعن .
سمعت نصير بيقول بأندهاش :
الله يخربيتك يا نور ايه اللى بتعمله ده ؟! بتقوله ليه ؟!
قولتله :
بحاول أنقذ حياتكم !!
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية ميراث نور)
