رواية بيان الفصل الثامن 8 بقلم حسناء رمضان
رواية بيان البارت الثامن
رواية بيان الجزء الثامن
رواية بيان الحلقة الثامنة
رولا: يانا يا هي
عمر: رولا، امشي لو سمحتي
رولا: اختار يعمر، وصدقني هطلع من هنا ع المطار ع طول ومش هتشوف وشي تاني
عمر: انتي عايزه ايه دلوقتي، انتي اصلا مش فاهمه حاجه
رولا: مش المفروض كنت جاي النهارده؟، وانا فضلت مستنياك!، مجتش ليه
عمر: حصل ظروف، اضطريت الغي الطياره
رولا: وبيان هانم هي الظروف دي؟
عمر: اخويا بيهددها، والله اعلم عايز يعمل فيها ايه، جبتها هي ووالدتها واختها هنا لحد ماكرم يتقبض عليه
رولا: شقتك!، كان ممكن توديهم مكان تاني، اشمعنى شقتك يعني
عمر: عشان محدش يعرف مكانها، ومعرفش انتي عرفتي مكانها ازاي
رولا: عرفت من مكان ماعرفت، المهم دلوقتي البت دي تمشي من هنا دلوقتي حالا
عمر: هو عِند وخلاص؟، مانا قولتلك اللي حصل
رولا: مش مشكلتي، وانت تشيل همها ليه، تغور في ستين داهيه احنا مالنا
مامتها خرجت
مامتها: غاره تشيلك اما انتي قليلة حياء صحيح، ماتتكلمي عدل ياختي
رولا: ياي، بيئه، ناس بيئه يعمر، بجد مش مصدقاك
مامتها: بت انتي، لمي الدور احسنلك، قسما بالله اجيبك من شعرك
عمر: بس اهدوا، رولا امشي من هنا، نتكلم بعدين
رولا: لو مشيت يعمر اعتبر كل اللي بينا انتهى
عمر: يعني ايه
رولا: يعني مش هعرفك تاني، ها، امشي؟
عمر بعد مابصلها بنظرات طويله: امشي
رولا: عمر؟
عمر: امشي
بصتله بصدمه مش مصدقه انه اختار واحده غريبه على حساب السنين اللي بينهم، وبعدها خرجت ورزعت الباب وراها
مامتها: لا حول ولا قوة الا بالله، يابني خلينا نمشي يابني، احنا مش عايزين نعملك مشكله
عمر: لا ولا مشكله ولا حاجه
بيان: يلا يماما لو سمحتي
عمر: يلا فين
بيان: عملنالك مشكله مع خطيبتك، خلينا نمشي احسن
عمر: لا انتوا معملتوش حاجه، ارتاحوا البيت بيتكوا، انا هستأذن، معاكوا رقمي لو حصل اي حاجه بلغوني وبره في حرس زي ماقولت، اتمنى تسمعوا الكلام ومتتحركوش من هنا
بيان: بس بما انها عرفت المكان يبقى ممكن كرم يعرفه
عمر: لا متقلقيش، انا هنبه عليهم ميدخلوش اي حد، وفي شاشه هنا اهي تقدروا تشوفوا اي حد هيقرب من البيت، لو حسيتوا ب اي حاجه رنوا عليا وانا هاجي فورا
مامتها: مش عارفين نشكرك ازاي يابني
عمر: لا متقوليش كدا، انا اللي مش عارف اقولكوا ايه ع اللي انتوا فيه، بعتذرلكوا جدا ع اللي كرم بيعمله
مامتها: لا وانت ذنبك ايه
عمر: طيب استأذن انا
مامتها: اتفضل يابني
ــــــــــــــــــــــــــــــــــــــــــــــــــ
حرم المنياوي: عملت ايه
المنياوي: مش قولتلك هيرتكب مصيبه؟، لقوا معتصم غرقان في دمه، وعرفت ان معتصم كان بيدور عليه عشان عمر اللي قاله
حرم المنياوي: يالهوي، ومات؟
المنياوي: ااه، مات وشبع موت
حرم المنياوي: طب وكرم فين، اوعوا يكونوا قبضوا عليه
المنياوي: لا هرب، بس معرفش راح فين
حرم المنياوي: طب ومعتصم الشرطه عرفت انه مات؟
المنياوي: اكيد لا، دي تبقى مصيبه، وقتها مهما حاولت مش هعرف اخرجه
حرم المنياوي: امال عملت ايه
المنياوي: دفنت جثته، مش دا المهم دلوقتي، المهم ربنا يستر في اللي جاي
حرم المنياوي: المشكله كانت يادوب حاجه صغيره، ايه اللي دخلنا في القتل وكل القرف دا
المنياوي: كله من ابنك، لما اشوفه بس ع المصايب اللي وقعنا فيها دي، مش كفايه الانتخابات اللي خسرتها
حرم المنياوي: مش عارفه عمر ليه بيعمل فينا كل دا، ماموضوع البت دي اتحل وخرجت وخلاص، ليه لازم يعمل النمره اللي عملها دي
المنياوي: رني عليه، خليه ييجي ب اي طريقه، لو وصل لكرم قبلنا هيسلمه، ومصيبه لو عرف ان معتصم صاحب عمره مات، وقتها مش هنعرف نقف قدامه
ــــــــــــــــــــــــــــــــــــــــــــــــــــــــ
رولا: متقلقش محدش هيعرف انك هنا
كرم: اوعي يارولا، عمر لو عرف هيوديني في داهيه
رولا: متقلقش مش هقوله حاجه
البت خبط
كرم: ايه دا، انتي مستنيه حد؟
رولا: لا، بس
كرم: بس ايه
رولا: دا اكيد عمر
كرم: يعني ايه، ايه اللي هيجيبه دلوقتي
رولا: عشان اتخانقنا، اكيد جاي يصالحني
كرم: وانا هعمل ايه دلوقتي
رولا: ادخل، ادخل المطبخ وانا مش هخليه يدخل خالص
كرم: متأكده؟
رولا: ااه ادخل بسرعه
طلع يجري على جوا وهي ظبطت نفسها عشان متبقاش متوتره قدامه وراحت فتحت
عمر: ايه كل دا
رولا: نعم، ايه اللي جابك
عمر: ايه الوش دا
رولا: انت مش طردتني؟
عمر: لا، قولتلك امشي ونتكلم بعدين
رولا: وانا مش عايزه اتكلم، يلا
عمر: اهمدي بقى، تعالي بس اقعدي
رولا: يعمر لو سمحت امشي، وبعدين تعالى هنا، ايه اللي في وشك دا
عمر: ايه
رولا: اللي في خدك دا ايه، اتخبط ف ايه
عمر: لا وانتي الصادقه دي جزمة ام بيان كانت معلمه على وشي
رولا: نعم!
عمر: سيبك من دا بس قوليلي، امي اللي قالتلك تيجي هنا
رولا: عمر مين دي، وليه شاغل نفسك بيها كدا
عمر: حكيتلك ي رولا، ليه مش عايزه تسمعي الكلام
رولا: بس مامتك ليها رأي تاني، بتقول ان في بينكوا حاجه
عمر: ايه الجنان دا
رولا: طب فهمني، ليه تقعدهم في شقتك اللي اهلك نفسهم عمرهم مادخلوها
عمر: رولا، خلقي ضيق، مش عايز مناهده كتير، لو سمحتي اهدي وسيبيني في حالي عشان انا متلغبط دلوقتي ومش فاهم حاجه، وبعدين ايه ريحة السجاير دي
رولا: هاا
عمر: رجعتي تشربي سجاير؟
رولا: لا اا اه، اه شربت سجاره كدا
عمر: وايه البساطه دي
رولا: مانت بتشرب يعمر
عمر: هو احنا هنقلد بعض في الغلط؟
رولا: طب فيها ايه لما نشرب سوا
عمر: رولا، ايه دا
بص ع الترابيزه لقى كوبايتين
عمر: انتي عندك حد
رولا: ايه، لا، كانت صاحبتي هنا ومشت قبل مانت تيجي
عمر: ااه، صاحبتك مين
رولا: ها
عمر: صاحبتك مين
رولا: شهد صاحبتي، اول ماعرفت اني رجعت قالت تيجي تسلم عليا وتقعد معايا شويه، بما اني قاعده لوحدي
عمر: قاعده لوحدك ايه انتي هتحوري، انتي لسه جايه النهارده
رولا: عمر انت طردتني من بيتك
عمر: صدقيني همشي، دماغي هتتفرتك، وبعدين لسه محاسبتكيش ع اللي قولتيه هناك.
رولا بدلع: طب خلاص خلاص، مش هتخانق معاك يروحي، لما تبقى رايق نبقى نتخانق
قامت قعدت جنبه، وكلمته وهي بتلعب في قميصه
رولا: بقولك ايه
عمر: ايدك
رولا: مالها
عمر: شيليها
رولا: هو انت ليه معقد كدا على رأي مامتك
عمر: لما نتجوز ابقي فكيني
رولا: طب مانتجوز دلوقتي
عمر: ماتتعدلي بقى
رولا: الله، مش نافع معاك لا خناق ولا دلع ولا اي حاجه، اعمل ايه انا
عمر: ولا حاجه، انا ماشي
رولا: طب استنى، ايه رأيك ننزل نعمل شوبينج سوا
عمر: لا مش فاضي
رولا: يعني هضطر اروح لوحدي
عمر: خدي شهد معاكي
رولا: ماهو
عمر: ماهو ايه
رولا: اصل يعني
عمر: عايزه ايه
رولا: نزلت فجأه ومجبتش فلوس كفايه معايا، وبصراحه شوفت حاجات كتير حلوه قوي هنا، بس مش معايا تمنها
عمر: ااه، طيب خدي
رولا: لا لا، انا بس عايزه حاجه بسيطه هعمل ايه بالكريدت كلها
عمر: امسكي ي رولا
رولا بابتسامه: ماشي
عمر: يلا سلام، عايزه حاجه
رولا بدلع: شكرا
خرج ناحية الباب بس حاجة وقعت جوا اتكسرت
ـــــــــــــــــــــــــــــــــــــــــــــــــــــــــــــ
بيان: ماما عايزه ازور ابويا
مامتها: انتي شايفه ان دا وقته
بيان: وحشني يماما، انا اصلا لحد دلوقتي مش مصدقه انه سابني
مامتها: امر الله يابنتي، هنعمل ايه، ربنا يرحمه ويغفرله
بيان بعياط: انا حتى ملحقتش اشوفه
مامتها: وبعدين معاكي يابنتي
بيان: صعب يماما، انتوا كنتوا معاه، انما انا لا، ملحقتش اشوفه ولا احضنه ولا اي حاجه
مامتها: اهم حاجه انك اثبتي براءتك، دا الاهم بالنسباله يابنتي، دلوقتي هو يرتاح
تقى: ماما ماما
مامتها: عايزه ايه
تقى: هو انا لما اكبر، ينفع البس زي رولا دي
مامتها: نعم؟
تقى: ماهي كانت لابسه كدا عادي اهو
مامتها: بت انتي، هقوم اكلك علقه محترمه، دي جسمها كله كان باين، عايزه تمشي تعرضي نفسك للناس؟، مش شايفه اختك بتلبس ايه؟
تقى: بس يماما بصراحه بقى الحجاب بيكبرها، يعني شوفي دلوقتي بشعرها شكلها حلو قوي، ليه بتلبس الحجاب
مامتها: ماهو دا السبب اللي بيخلينا نلبس الحجاب، عشان نداري حلاوتنا
تقى: ونداريها لييييه
مامتها: عشان جوزك بس اللي ينفع يشوفها، وعشان ربنا امرنا ب كدا، واحنا ما الا عباد لله، هو سبحانه وتعالى يؤمر واحنا نقول سمعنا واطعنا
تقى: بس انا مش عايزه اخبي شعري، شعري حلو
مامتها: لما تكبري وتبقي عروسه زي اختك كدا، انتي بنفسك هتقولي عايزه البس لبس محتشم عشان ابقى مرتاحه وراضيه عن نفسي
تقى: وانتي مرتاحه يابيان؟
بيان: بت انتي، قسما بالله هقوم اجيبك من شعرك، متتكلميش معايا انا مش طايقاكي اصلا، وبعدين شعر ايه يام شعر انتي، شعرايتين طلعوا في دماغك هتعملي عليهم فرح؟
تقى: انا عارفه انك متغاظه
بيان: وهتغاظ من ايه ياختي
تقى: عشان عمر حط ايده على شعري وقعد يلعبلي فيه وانتي لا
بيان: شايفه بنتك؟، وحياة ربنا ل اوريكي
ـــــــــــــــــــــــــــــــــــــــــــــــــــــــــــــــ
رولا: قولتلك اكيد قطه
عمر: من امتى وانتي بتقعدي مع القطط في مكان واحد؟
رولا: معرفش بقى يعمر انا لسه راجعه، اكيد كانت محبوسه هنا ولا حاجه
بصلها بصه غريبه وهي قلقت منها بس قطع نظراته دي رنة موبايله
عمر: ايوا
ـ الشرطه هنا يفندم
عمر: نعم، ليه؟
ـ مش عارف بس بيقولوا انهم عايزين حضرتك
عمر: طيب انا جاي
مشي من عندها وطلع على شقته
الظابط: عمر بيه
عمر: في ايه
الظابط: الحاجات دي خاصه بمعتصم، صح
عمر: ااه، هو فين
الظابط: لقينا الحاجات دي في بيت****، وعليها اثار دم، بس لسه بنحقق في الموضوع
عمر بصدمه: ايه؟، انت بتقول ايه
الظابط: وبصراحه عرفنا انه كان بيدور على كرم
عمر: وقبضتوا على كرم؟
الظابط: لا للاسف لسه
عمر: طيب وفين معتصم، والدم دا بسبب ايه
الظابط: محتاج حضرتك تيجي معايا عشان تشوف حاجه مهمه
ـــــــــــــــــــــــــــــــــــــــــــــــــــــــــــــــ
رولا: انت مجنون، كنت هتودينا في داهيه
كرم: لولا اني استخبيت كان نفخني، انا مش خايف من الحكومه قد مانا خايف من العلقه اللي هاخدها منه
رولا: مسيطر عمر صح
كرم: طبعا، مش اخويا الكبير
رولا: طبعا،، هو في زي عمر وحلاوة عمر وطعامة عمر
كرم: وفلوس عمر
رولا: نعم!
كرم: بقولك ايه، بطلي تعملي الحبتين دول عليا، انا عارف اللي فيها
رولا بتوتر: وايه اللي فيها
كرم: عمر غايه، هدف بالنسبالك، فرصه متتعوضش، بنك متحرك يعني
رولا: انت اتجننت، انت عارف انا ابقى مين
كرم: ايه دا في ايه، انتي نسيتي ولا ايه، مين يابتاعه انتي، هو مش دا حوار عملناه انا وانتي عليه عشان توقعيه ولا ايه ياختي
رولا: الكلام دا كان زمان، دلوقتي انا بحبه بجد
كرم: ياروووحي، عشان كدا عماله تصرفي فلوسه، وهو يعيني عشان شايفك زوجته المستقبليه، وكدا كدا هيصرف عليكي فَ مش بيقولك لا
رولا: لا طبعا، انا اصلا مش باخد منه فلوس
كرم: والكريدت اللي في جيبك دي، بتاع بابي برضو؟، بقولك ايه، احنا متفقين اتفاق، وهتكملي فيه غصب عنك، والا هروح اقوله وارسيه على الحوار كله، وبيني وبينك، الواد صعبان عليا، بقاله سنين بيحبك وانتي.. هيهي، مالك اتخطفتي كدا ليه، متقلقيش، مش هقوله حاجه، طول مانتي في صفي انا في صفك ، وبصراحه عندي شرط صغير كدا
رولا: شرط ايه
كرم: بيان، فين
رولا: ليه
كرم: عند عمر صح؟
رولا: ليه ياكرم
كرم: متقلقيش، اكيد عامل حسابه ومأمن المكان، وانا مش هعرف اروح
رولا: طب كويس
كرم: انتي اللي هتروحي
رولا: نعم
كرم: هتروحي وتعملي اللي هقولك عليه بالحرف الواحد، والا، فيديوهاتك وحاجاتك كلها هتبقى عند عمر بكرا الصبح..
ـــــــــــــــــــــــــــــــــــــــــــــــ
الظابط: دي اثار الدم اللي لقيناها هنا، وجنبها لقينا حاجة معتصم
عمر باصص لكمية الدم اللي ع الارض ومصدوم
الظابط: وخط الدم دا يدل على ان الجثه تم نقلها من المكان، ولو في احتمال ان الشخص المصاب يكون عايش وهو اللي حاول يخرج من هنا فَ دا احتمال ضعيف بالنسبه لكمية الدم دي..
تعالى شوف يفندم
عمر راح بص لقاها تسجيلات الكاميرا اللي بره، وواضح فيها معتصم وهو بيحاول يسيطر على كرم عشان يدخله البيت
الظابط: دلوقتي في احتمال من اتنين، يا اما كرم قتل معتصم، او العكس
عمر بصله وهو مش مستوعب، مش قادر يتخيل ان الدم اللي جوا دا دم اخوه او صاحب عمره….
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية بيان)
