رواية نادرة قلبي الفصل الرابع والعشرون 24 بقلم دعاء أحمد
رواية نادرة قلبي الجزء الرابع والعشرون
رواية نادرة قلبي البارت الرابع والعشرون
رواية نادرة قلبي الحلقة الرابعة والعشرون
نادرة رجعت البيت بعد ما تأكدت من الدكتورة أنها حامل، حاولت تسيطر على فرحتها أنها متخليش حد يعرف منهم بموضوع الحمل، دخلت البيت على أذان الضهر كانت جليلة قاعدة في الصالة و بتعمل محشي ورق عنب و بتتفرج على المسلسل بتاعها و ادامها خضار كتير بتجهز للفطار
نزلت القطة على الأرض و راحت لجليلة
نادرة بابتسامة و هي بتميل عليها تبوسها:
=السلام عليكم ورحمة الله وبركاته
جليلة بحب و استغراب:
=و عليكم السلام ورحمة الله وبركاته، الغزالة رايقة و لا ايه النهاردة
نادرة بسعادة:
=جداا جدا الحمد لله
جليلة:
=يارب دايما بس ايه اللي حصل يعني و كنتي فين الصبح بدري جيت اصحيكي ملتقكيش
نادرة بكدب:
=روحت لنغم و قعدنا نتكلم و بعدين عديت على دعاء اخدت منها بسبوسه
جليلة:
=ماشي ياله ادخلي غيري و اتوضي خلينا نصلي و بعدها تيجي نحضر الفطار اما انا بقا هعملهلك فخدة في الفرن و ورق عنب و محشي بتنجان و كوسة باللحمة
و هنعمل كمان صنيه بطاطس و فراخ في الفرن و حمام محشي و رز و حاجات بسيطة كدا لزوم الفطار
و هنعمل أم علي و كنافة و قطايف و ابقى اعمليلك هريسة
نادرة باستغراب :
=كل دا حاجة بسيطة دا انتي و بابا بس يا جليلة انتي ناوية تتبرعي بالأكل دا
جليلة :
=ليه و انتي مش هتفطري و لا ايه
نادرة؛
=لا هرجع البيت و هجهز الفطار ليا أنا و حسن عرفت أنه رجع النهاردة و عايزاه يرجع البيت أكون موجوده هناك
جليلة بابتسامة سعيدة:
=و الله عين العقل يا نادرة بلاش تسيبي بيتك اكتر من كدا المفروض يرجع تكوني هناك بس للأسف دا مش هيحصل
نادرة :
=ليه بقا؟
جليلة :
=علشان ابوكي عزم حسن و والدته على الفطار النهاردة و كلمني من شوية قالي انه أكد عليه و هيكونوا موجودين على المغرب
نادرة ابتسمت بحماس و بسرعة باست جليلة من خدها
=حاضر يا ست الكل هدخل اغير و اجيلك ادامنا شغل كتير
جليلة بخبث:
=ماشي يا بكاشة
نادرة دخلت اوضتها ابتسمت و حطت ايدها على بطنها و هي حاسة بسعادة
رمت شنطة ايدها على السرير، اخدت بجامة غيرت و طلعت لجليلة و هي بتلم شعرها ديل حصان
جليلة بقرف:
=ادخلي اغسلي ايدك يا بت مش ناقصة لو هتعكي يبقى اتفضلي ارجعي اوضتك و انا هعمل انا الأكل
نادرة بسرعة:لا انا هعمل معاكي بس هدخل الحمام اتوضي و ارجعلك….. ايه يا جليلة انتي اتفرجتي على المسلسل دا ميت مرة”موضوع عائلي ”
هاتي اي مسلسل جديد من بتوع رمضان
جليلة بسخرية:
=انتي بتفهمي حاجة، المسلسلات بقيت كلها نكد و غم بس عارفة ايه ميزة المسلسل دا و اللي مخليني مش زهقانة منه
أنه بيحكي عن عيلة بجد و أسرة بتحب بعضها
و غير كدا الكوميدي اللي فيه، الناس فعلا محتاجة جوا الكوميدية دا و انهم يبعدوا عن الكآبة مش هيبقى في الحياة و في المسلسلات كمان
و المسلسلات دي هي اللي بتعلم الناس حاجة حلوة
زي انهم يتجمعوا و يتكلموا و كل واحد يحكي اللي بيحس بيه و اللي نفسه فيه
احنا فعلا محتاجين حاجة تجمعنا و تفرحنا
نادرة دخلت الحمام و جليلة فضلت تبص لها بحب و هي بتدعيلها
و رجعت تبص للتلفزيون……..
بعد مدة
نادرة قلعت الايسدال و حطيته على الكنبة
جليلة :
=ادخلي أملي الاولل و حطيهم في البلكونة و متنسيش تحطي نعناع
نادرة بضيق:حاضر
جليلة :
=يالة و تعالي علشان نكمل المحشي دا بقولك الاكل دا هيكفي و لا نعمل حاجة كمان، أنا بقول نعمل كمان
نادرة بمقاطعه:
=بس بس يا جليلة انتي فتحتي مش عارفه تسكتي الاكل دا كتير اوي كمان فاهدي كدا و صلي على النبي
=عليه افضل الصلاة والسلام
******************
بعد وقت طويل
نادرة حطت صنية الكنافة في الفرن بتعب و زهق، جليلة كانت بتخلص توضيب الأكل، بصت لنادرة اللي قعدت بارهاق و ابتسمت بحب
=نادرة قومي انتي ارتاحي يا حبيبتي متقلقيش انا هخلص أنا الباقي ادخلي نامي شوية و انا هجهز السفرة متقلقيش
نادرة هزت رأسها بالموافقة و قامت دخلت اوضتها، خرجت بعد دقايق و هي واخده هدوم و داخله تاخد دش لأن ريحتها بعد كل دا مش أفضل حاجة.
بعد شوية قعدت على السرير و هي بتسشور شعرها، غمضت عينيها و فتحت المروحة و نامت بتعب من اليوم لأنه كان طويل و فاضل ساعة على أذان المغرب.
*****************
في شقة حسن
دخل البيت بضيق و احساس أنه مخنوق يمكن لأن دي أول مرة يدخل البيت و هي مش موجودة، يمكن لان دي أول يفتح الباب و متجيش من جوا تحضنه و تفضل تتكلم في حاجات كتير تافه
دخل قعد على الانترية و افتكر اخر مرة ليهم قبل ما يتخانقوا و يوديها بيت أبوها، غمض عنيه بضيق و زفر بحرارة
لكن اخد باله من مذكرة محطوطة على التربيزة، اخدها بلامبالة، فتحها و بدا يقرأ الكلام اللي فيها و هو مستغرب أن نادرة كانت بتسجل كل اللحظات اللي انبسطوا فيها سوا و هي بتوصف مشاعرها في كل مرة بتكون قريبة منه و كل مرة يحاول فيها انه يخليها سعيدة و متزعلش
أبتسم بلامبالة و هو بيقفل المذاكرة و دخل ياخد دش و حاسس ببرود من الكلام اللي قراه
على عكس ما كان ممكن يتخيل انه هيبقى سعيد لو سمع كلمة حلوة منها لكن بعد كل اللي حصل هو معندوش استعداد يحس انه مخدوع.
بعد مدة
خرج من الأوضة و قعد أدام التلفزيون يقلب القنوات بملل و منتظر الوقت يعدي علشان يروح لبيت والدها زي ما أصر.
حسن لنفسه :
=ناوي على ايه يا أبو علي ناوي على ايه شكلك مش عايز تريح نفسك و لا قلبك ياريتك ما شوفتها يا جدع
ضحك بسخرية و حزن
=حتى دي بتكذب فيها أنت حتى لو كنت عارف إنك هتتاذي منها اوي كدا كنت برضو هتقرب غصب عنك، قلبك سحبك وراها حتى بعد كل اللي حصل دا، الغريب أنك مش قادر تعديها من حياتك كدا .
قام قفل التلفزيون و اخد المفاتيح و المحفظة و نزل راح لوالدته اخدها و راح بيت حماه….
بعد وقت (الساعة سبعة قل ربع)
قبل أذان المغرب
حسن وصل بيت الحج موسى مع والدته و سلم عليهم لكن لاحظ اختفاءها كان بيدور عليها و هو ملهوف يشوفها و كاره روحه اللي بتخليه يحب قربها زغم عذبه في قربها
دعاء و جليلة كانوا بيجهزوا السفرة بود و حب ما بينهم و الحج موسى طلع يعمل مكالمة، فضل حسن قاعد ببرود في الصالون و هو بيقلب في الموبيل و بيجيب معلومات أكتر عن المراكب المحجوزة في المينا باسم اللواء كمال و موت ابنه
فاق من تفكيره على صوت والدته الخبيث
دعاء :
=بقولك يا حسن ما تدخل تصحى نادرة، المغرب قرب يأذن و هي لسه نايمة ممكن تكون تعبانة.
حسن بصلها بضيق و هو عارف قصدها مرداس يقوم رغم شعوره بالغضب من فكرة انها تكون تعبانة
جليلة ابتسمت بخبث و هي بتبص لدعاء و اتكلمت بنبرة حزينة
=و الله عندك حق دي بقلها يومين مش بتاكل كويس و مش بتنام شكلها كدا تعبانة، انا بفكر اخدها أكشف عليها.
حسن مستحملش و قام ببرود راح لأوضة خبط على الباب لان ممكن تكون مرجانة معها لكن محدش رد ففتح الباب و دخل، قفل الباب وراه و شغل النور
بصلها و ابتسم تلقائياً كانت نايمة بأريحية و هي حضنه المخدة، كانت جميلة جداً
رغم أن ملامحها باين عليها الإرهاق
قرب منها و قعد على طرف السرير، فضل بيبصلها لوقت مش عارف اد ايه، بيشبع قلبه من النظر ليها فاكر أنه هيقدر يتوب عن رؤيتها لكن كل ما بيبصلها يشتاق أكتر و يبقى ملهوف أكتر
فاق و هو بيقوم بضيق و غضب من جنبها و بجدية
=نادرة…. نادرة قومي ياله المغرب هياذن
نادرة كانت حاسة انها بتحلم وهي سامعه صوته مش عايزاه تقوم من حلمها لكن حست بحد بيقومها و صوته بيعلي
حسن بحدة و ضيق:
=انتى يا بت انجزي قومي مش هفضل ساعة جانبك
نادرة قامت بفزع و بصتله لحد ما ابتسامتها اترسمت على شفايفها بخفة و رقة
=وحشتيني يا أبو علي.
حسن رفع حاجبه بشك و نفور
=متشوفيش وحش يا اختي أنجز قومي و لا انتي عجبك دور الاستهبال دا و لا تكوني فعلا كنتي تعبانة.
نادرة بابتسامه خبيثة:
=ليه هو هيفرق معاك اتعب و لا حتى أموت، ما أنت في الاخر بتقدر تبعد و تنسى نادرة، حب ايه دا اللي كنت بتتكلم عنه اللي يخليك تمشي و تسبني من غير حتى ما تخليني ادافع عن نفسي.
حسن مردش بصلها ببرود و خرج من الأوضة و رزع الباب وراه.
نادرة بصتله بغيظ و قامت غيرت هدومها و خرجت
كانوا قاعدين بيفطروا في صمت تام و هو مش مهتم بوجودها و بياكل ببرود.
جليلة :
=ايه رايك في الأكل يا حسن، نادرة لما عرفت انك جاي قالت إنها هتعمل الاكل بنفسها مخصوص
نادرة بغباء و حدة:
=مقولتش كدا على فكرة، أنا عملت معاكي علشان ننجز مش أكتر
جليلة بصتله بغضب و هو بتاكل
بعد مدة
حسن و موسى كانوا قاعدين في الصالون يشربوا الشاي و هما بيتكلموا و التلفزيون شغال
موسى بجدية:
=مش عايز تقولي برضو ايه اللي حصل يا حسن و نادرة عملت ايه
حسن بهدوء :
=مفيش حاجة بس مشكلة و هتتحل
موسي:
=مش باين يا حسن… بص يا حسن انا عارف ان نادرة مشاغبة و بتتصرف من غير ما تفكر بس صدقني طيبة و بنت حلال و اقل كلمة بتزعلها و اقل حاجة بتفرحها و بتبقي عاملة زي الهبلة لما تفرح بس محتاجة احتواء و أنك تفهمها.
حسن بابتسامه :
=متقلقش يا حج موضوع بسيط و هيتحل ان شاء الله بس انت سيد المعلمين و عارف ان في أول الجواز لازم نحط النقط على الحروف و الا الدنيا هتسيب، و دا درس صغير بنتعلمه أنا و هي متقلقش
موسى :
=ماشي يا ابني بس و أنت ماشي خدها معاك و صفوا الأمور ما بينكمبالعقل يا ابني بدل ما تكبر
حسن:
=حاضر يا حج
موسى بجدية :
=طب بص بقا يا حسن علشان في موضوع مهم عايزك فيه
حسن :
=اتفضل يا حج
موسي:
=بص يا حسن انا كبرت في السن و معنديش غير بناتي الاتنين مرجانة و نادرة و الاتنين عندي بالدنيا كفاية ضحكتهم عندي بالدنيا و ما فيها
مرجانة جوزها بيشتغل دكتور و مش فاضي ليا
لكن أنت ابن سوق يا حسن و أنا عايزك تيجي تشتغل معايا و تدير شغلي معايا و…
حسن مقاطعة و حرج:
=حج موسى معليش خرجني انا من موضوع الإدارة دا، أنا عارف انك عايز تحافظ علي فلوسك و فلوس بناتك بس معليش انا راجل دمى حر احب اصرف على بيتي من شغلي انا و انا بحب شغلي و عندي ثقة في الله أن هيجي اليوم اللي اكبره فيه
انا عندي استعداد اجي اساعدك بس باعتبار اني إبنك و جوز بنتك مش اكتر لكن الإدارة لا معليش انا مش هسيب ورشتي
و عندي استعداد افاضيلك نفسي كل يوم بس مش اكتر من كدا
موسي:
=يا ابني هو انت هتشتغل عند حد برا دا انت هتدير شغل مراتك هو دا عيب
حسن:
=لا طبعا مش عيب بس دي مش سكتي يا حج انا بحب شغلي و عايز اكبر فيه انا معاك لو عايزني كل يوم لكن مقدرش اسيب شغلي
موسى بتنهيدة:
=طب افرض انا مت دلوقتي هتعمل ايه
هتقفلوا المعرض؟
حسن:بعيد الشر عنك يا حج، متقولش كدا و بعدين لا قدر الله لو حصل حاجة انت سايب وراك رجالة متقلقش
موسي:
=انا اللي يهمني نادرة يا حسن مش عايزاها تزعل و انا عارف انك راجل يعتمد عليه
حسن:
=ان شاء الله يا حج…
بعد مدة قصيرة
نادرة دخلت البيت وراء حسن، سابت القطة و دخلت اوضتها بدون ما تبصله
حسن قفل الباب بلامبالة و دخل أوضة الأطفال بهدوء
نادرة كانت غيرت هدومها و قعدت على السرير لكن استغربت انه مدخلش الأوضة، قامت خرجت لقيته واقف في اوضة الأطفال
نادرة:حسن؟! انت بتعمل إيه هنا
حسن بحدة :
=هنام عندك مانع
نادرة بضيق:
=و تنام هنا ليه ما تيجي اوضتك
حسن ببرود:
= اخرجي و خدي الباب في ايدك
نادرة بضيق:
=حسن انا مش عايزاه انام لوحدي
حسن :
=ليه!! صغيرة؟!
نادرة حست بالحزن و الضيق منه
=ماشي يا حسن تصبح على خير بس صدقني مش هسامحك انك سبتني انام لوحدي و كمان علشان مش عايزني أقرب منك و لا احضنك….انا مش هتسحر عايز تتسحر اتفضل كلي دلوقتي علشان انا هدخل انام و مش هصحي في السحور
حسن بصلها بهدوء لقاها خارجة من الأوضة و قفلت الباب وراها
بعد كم ساعة
نادرة دخلت الأوضة و هي بتمشي على صوابعها بهدوء بصتله كان نام.
بهدوء نامت جانبه و حضنته و هي بتشد الغطا عليها و بتندس في حضنه بقوة و بهمس و نوم
=هرجع ثقتك فيا بس دلوقتي خليني انام في حضنك.
غمضت عنيها و حضنته بنوم، حسن فتح عنيه و بصلها بهدوء غمض عنيه و نام
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية نادرة قلبي)
