رواية بنات القسوة الفصل الثاني 2 بقلم آلاء محمد

رواية بنات القسوة الفصل الثاني 2 بقلم آلاء محمد

رواية بنات القسوة الجزء الثاني

رواية بنات القسوة البارت الثاني

رواية بنات القسوة الحلقة الثانية

منال/ اشيل ايه انا مصدقت خلصت منها ومش هقدر اخدها عندي تاني ..
هند / يبقي نوديها درار مسنين .. انا اعرف دار كويسه هي صحيح غالية بس مش مشكلة المهم نخلص من القرف ده ..
منال/ انا موافقه يا ستي بس تبعد عننا وواثقه ان نيفين هتوافق …
هند / خلاص انا اكلمهم و نوديها بكرا ..
هند فقلت مع اختها وكلمت دار المسنين واتفقت معاهم علي كل حاجة .. وتاتي يوم راحت لامها و ف ايديها كوبايه شاي ..
هند / خدي اشربي ..
سميرة فرحت اوي واخدتها وشربت / تسلميلي يا بنتي .. دي احلي كوباية شاي شربتها من فترة كبيرة ..
هند ابتسمت ابتسامه صفرا وقعدت قدامها .. شوية ودخل اسر ابنها ..
أسر / ماما انا مش عارف احل المسألة دي ..
هند / طيب روح دلوقتي وانا شوية وجاية ..
سميرة بصتلها وقالت / هو مين ده يا بنتي ..
هند باستغراب / ده اسر ابني الكبير .. انتي مش عرفاه ..
سميرة بتوهان/ لا مش فاكرة والله .. طيب انتي اتجوزتي امتي ..

هند / من سبع سنين .. دا انتي اللي كنتي مختارة تاريخ الجواز …
سميرة / وجوزك شغال ايه طيب ..
هند / احمد ماسك البوتيك بتاعك اللي ف التجمع .. و رحيم و ياسر ماسكين بقيه الفروع ..
سميرة / مين دول يا بت ..
هند / هو فيه ايه .. رحيم جوز منال وياسر جوز نيفين ..
سميره / و هما اخواتك اتجوزوا امتى !!
هند / لا بقى ده انت فعلا خرفتي واضح ان انا كان عندي حق لما فكرت في الحل ده .. اشربي الشاي يلا ..
سميرة شربت الشاي وشوية وراحت ف النوم … هند دخلت عليها هي وجوزها ..
هند / يلا يا احمد هتلاقي التاكسي تحت مستنيك ..
احمد شال سميرة واخدها ف التاكسي .. شوية ووصل قدام دار المسنين .. دخلها ومشي .. فات ٤ ساعات كانت سميرة نايمه فيهم مش دريانه بالدنيا .. لدرجة انها صعبت علي الناس اللي ف الدار ..
ممرضه / هي مين دي يا الهام …
ممرضه ٢ / اسكتي يا نوال دي ست كبيره جوز بنتها جابها الصبح وهي نايمه كده الظاهر محدش قالها ان هما هيجيبوها هنا ….
ممرضه / لا حول ولا قوه الا بالله هي الدنيا جرى فيها ايه يعني بنتها هي اللي رميتها كده .. أما قليلة الأصل صحيح ..
ممرضه ٢ / لا وانتي الصادقه دول ٣ .. واضح كده ان التلاته مش طايقينها معاهم فرموها هنا ..
ممرضه / يا حسره قلبها لما تصحى وتتفاجئ بالوضع اللي هي بقيت فيه وحتى محدش منهم عرفها ..
ممرضه ٢ / ربنا يتولاها ..

شويه وسميره صحيت تاني يوم واتفاجئت بالمكان اللي هي فيه .. اوضه هادية وبسيطه وواحده قاعده علي الكرسي اللي قدامها ..
الممرضه قامت قعدت علي السرير قدامها اول ما صحيت / صباح الخير يا ست سميرة .. ازيك انهارده ..
سميرة / صباح النور يا بنتي .. هو انا فين .. فين بنتي ..
ياسمين قعدت قدامها على السرير ومسكت ايديها / اسمعي يا سميره انتي واضح عليكي ست مؤمنه وعارفه ان ” لن يصيبنا إلا ما كتب الله لنا ” ..
سميرة/ ونعم بالله بس برضه مقولتليش انا فين وانتي مين ..
ياسمين / احنا هنا في دار مسنين يا حجه سميره .. جوز بنت حضرتك جه وسابك هنا امبارح .. وانا ممرضه هنا واسمي ياسمين ..
سميره بصت لها بصدمه ودموعها نزلت .. مكنتش مصدقه ان بناتها يعملوا فيها كده بعد ما تعبت وشقيت عليهم العمر ده كله كانت حاسه ان قلبها بيتخلع من مكانه .. فضلت تعيط كتير من غير صوت وساكته ..
ياسمين / وحدي الله يا حجه .. ومتعمليش ف نفسك كده .. والله ما فيه حد يستاهل انك تزعلي نفسك عشانه ..
سميرة فضلت كذا يوم بتعيط ومش بتنام غير ساعه واحده ف اليوم .. وكل ما تنام تصحي مفزوعه .. ومش عايزة تندمج مع اي حد من الناس اللي ف الدار … ودايما قاعده ف اوضتها ساكته بس ياسمين بتقعد معاها عشان تونسها ..
كانوا قاعدين ف البلكونه بيشربوا شاي ..
ياسمين بحرج / حضرتك مش ملاحظه انك بتنسي كتير جربتي تروحي لدكتور …
سميره دموعها نزلت /عارفه يا بنتي وطلبت من جوز بنتي يشوفلي دكتور قال لي طيب ومردش عليا ..
ياسمين / طب ايه رايك انا عندي دكتور كويس اوي اوي ممكن يشوفك .. هو يبقى ابن خالتي ومش هياخد اي فلوس ..
سميرة ابتسمت بسخرية / مش بالفلوس يا بنتي والله ..
ياسمين / انا حاسه ان انت وراكي حكايه كبيره اوي يا حجه سميره ..
سميره / حكايه العمر يا بنتي .. سنين شبابي كلها .. تعبت وشقيت وربيت وكبرت وجوزت وفي الاخر اديني مرميه هنا لا حول ليا ولا قوه … انتي عارفه يا ياسمين انا عندي فلوس كتيره اوي بس صدقيني مال الدنيا كله مش ممكن يمحي كسره القلب اللي انا حاسه بيها ..

ياسمين / بكره ربنا يعوضك انا واثقه والله ان ربنا عمل ده كله علشان مخبيلك فرحه كبيره ..
سميرة جتلها فكرة و بصت ل ياسمين / بت يا ياسمين انتي معاكي التليفون الصغير ده اللي بتخرجوا بيه ..
ياسمين / قصدك موبايل ..
سميرة/ ايوا ايوا عايزة اعمل منه مكالمة ..
ياسمين / عينا بس والله مش معايل فيه غير خمس دقائق رصيد خديهم كلهم لو عايزة .. وانا هقعد برا خلصي ونادي عليا ..
سميره ابتسمت اوي على طيبه قلبها وقالت / تسلميلي يا حبيبتي ..
سميره اخدت التليفون وطلبت رقم شويه و حد رد عليها …
سميره / الو الحاج حسين معايا …
حسين / ايوه انا حسين مين …
سميره / ايوه يا حسين انا سميره .. سميره بنت الحاج محمود .. جارتك زمان ف الحسين ..
حسين / ياااا عاش من سمع صوتك يا سميره انتي عامله ايه واخبارك ايه ….
سميره / انا واقعه في مش مشكله كبيره يا حسين وعايزاك تساعدني ..
حسين / عيني قوليلي في ايه بالضبط …
حكيت سميره حكيت لك كل اللي حصل من بناتها …
حسين / يا ساتر يا رب على القسوه طب هي كل المحلات بتاعتك … باسمك يعني ..
سميره / ايوه كلهم باسمي انا عندي ٤ فروع .. وكلهم ناجحين اوي ومن اكبر البوتيكات ف البلد .. وكل محل فوقيه العمارة بتاعته ..
حسين/ حلو اوي .. انتي عايزة تعملي ايه بقي ..
سميرة / هقولك ..
شويه وسميره خلصت التليفون ونادت على ياسمين ..
سميره / الا قوليلي يا بت انتي عايشه فين …
ياسمين / انا عايشه في بيت ايجار قديم كده .. امي وابويا الله يرحمهم كانوا ماجرينوا و الناس كتر خيرهم مطردونيش بس بدفعلهم ايجار اعلى شويه من اللي مكتوب في العقد ..

سميره / طب انا عايزه اجي اقعد معاكي في بيتك يومين ومحدش مهما كان يعرف اني عندك ..
ياسمين / يا اهلا وسهلا بس هو بصراحه يعني البيت قديم شويه والحيطان مشققه وكده فده مش مقامك برضه …
سميره / بطلي هبل يا بت ده انتي غلاوتك عندي بقت كبيره اوي بعد كل اللي انتي عملتيه معايا يا بنتي .. ده بناتي ما عملوش معايا كده …
ياسمين ابتسمت / والله ربنا اللي يعلم اني من ساعه ما شوفتك وانتي دخلتي قلبي حسيتك زي امي الله يرحمها .. بس بكره هنروح للدكتور الأول..
تاني يوم ياسمين استأذنت من المديرة واخدت سميرة وراحت لابن خالتها في العياده بتاعته .. وصلوا واول ما راحوا دخلوا علي طول ..
ياسمين / عبد عامل ايه يا اسطى ..
عبد الرحمن / يا اسطى !! سبع سنين في كليه طب و امتياز وتكليف ومرمطة عشان في الاخر تقولي لي يا اسطى ..
ياسمين/ متزعلش يا عم مجدي يعقوب .. وبعدين مش عجبك ولا ايه ..
عبدالرحمن غمزلها / وانا اقدر اعترض .. انتي تقولي اللي انتي عيزاه يا قلبي ..
ياسمين ضحكت بكسوف / احم .. شايف بقي القمر دي تعبانه سيكا وعايزين نطمن عليها ..
عبدالرحمن ابتسم ب بشاشه / خير يا أمي مالك..
سميرة قالتلو علي كل الأعراض اللي عندها .. وياسمين حكتله علي النوبات اللي بتجيلها .. طلب منها اشعه وتحاليل عشان يتطمن عليها .. عملتهم فعلا وراحتلوا تاني مع ياسمين ..
عبد الرحمن / والله من اللي انا شايفه قدامي انتي عضويا سليمه المخ زي الفل مفيهوش اي مشاكل و مركز الذاكره عندك والتفكير تمام .. حتي تحاليل الضغط والسكر الحمد لله مظبوطة .. واضح ان السبب نفسي ..
سميرة/ نفسي! وهو ده ممكن يخليني يجيلي النوبات الغريبه دي ..
عبدالرحمن / طبعا .. لان احنا ك بشر جسمنا عبارة عن مسرح بيعكس الصراعات والمشاكل و الصدمات اللي بتحصلنا وبنكبتها .. حضرتك ممكن تكوني كنتي بيحصل حاجات بتضايقك بس مبتقدريش تتكلمي فجسمك بيستجيب لده عن طريق ان انتي تصحي فجاه من النوم تلاقي نفسك مش فاكره اي حاجه .. دي بتبقى رغبه جواكي ان انك تنسي الناس اللي سببولك الاذى لكن مش قادره تنسيهم .. يعني مثلا حضرتك حصل مرة ونسيتي ياسمين ؟

ياسمين / لا خالص هي دايما بتنسى المكان اللي احنا فيه او احنا في يوم ايه او في شهر كام ..
عبدالرحمن/ لأنها بتحبك وانتي مش بتزعليها او بتاذيها .. حاولي تبعدي عن أي زعل وهتبقي تمام بإذن الله ..
سميرة ابتسمت / شكرا يا ابني .. ربنا يحميك يارب ..
فات كذا يوم و سميرة فعلا خرجت من الدار و راحت قعدت مع ياسمين ف بيتها …
اما منال كانت ف بيتها ومعاها أخواتها .. هيتجننوا بعد ما عرفوا ان انهم قررت تبيع كل حاجه ولغت كل التوكيلات اللي كانت عملاها ليهم ..
منال / انا مش فاهمه هي ازاي تعمل كده .. دي خدت كل المحلات و حتي الشقق .. هنروح فين بس ..
نيفين / انا جوزي أما عرف كان هيتجنن وقالي لو كل حاجة مرجعتش زي ما كانت هيطلقني وهياخد مني العيال …
هند / طيب و العمل ده كده بيوتنا هتتخرب .. انا عيالي عايشين ف مستوي معين مقدرش اعيشهم اقل من اهل ابوهم ..
منال/ لازم نقلب عليها الدنيا و نوصلها ونخليها ترجع عن التخلف بس …
هند / انا كلمت مديرة الدار قالت إنها مشيت ومش عارفة راحت فين .. هندور عليها فين بس ..
منال بعصبيه/ هنتصرف .. لازم نلقيها ..
فات شهر و سميرة كانت مبسوطه مع ياسمين ولاول مرة تحس بالدفا من سنين كتيرة وساعتها بس عرفت ان عيالها عمرهم ما حبوها هما كانوا بيحبوا فلوسها واملاكها لكن هي لا .. وف يوم كانت نايمه ياسمين دخلت صحيتها ..
ياسمين بمرح / يا سمورة .. اصحي بقي يلا عشان نفطر ..
سميرة صحيت/ صباح الخير يا سمسم .. انتي نازلة ولا ايه ..
ياسمين/ ايوا .. رايحه الدار عشان البت مروة تعبت ف هنزل مكانها.. يلا نفطر سوا بقي قبل ما انزل ..
قاموا و فطروا سوا بين ضحك ومرح ياسمين ودعاء سميرة ليها .. شوية وخلصوا اكل وياسمين قامت روقت الدنيا وظبطت البيت و غيرت هدومها ..
ياسمين خرجت من الاوضه/ انا همشي بقي يا سمورة .. عايزة حاجة يا روحي ؟
سميره ابتسمت لا يا حبيبتي عايزه سلامتك ربنا يستر طريقك يارب ويوفقك ..
ياسمين حضنتها اوي / انا مش عارفه انا هعمل ايه لما تسيبيني وترجعي الدار تاني .. انا اتعودت اوي على دعواتك الحلوه دي ليا كل يوم بحس ان والله ربنا بيسترها معايا عشان خاطر دعواتك دي ..
ياسمين نزلت وراحت شغلها قضت اليوم عادي بين التنضيف و القعدة مع الناس اللي قلبهم مكسور ومحاولتها انها تخليهم يبتسموا وينسوا مشاكلهم ب ضحكها وهزارها وشقاوتها .. شوية ولقيت ٢ ستات خارجين من اوضه المديرة وهي معاهم و راحوا نحيتها ..

المديرة / ياسمين .. الهوانم عايزين يسالوكي علي حاجة تخص الحجه سميرة ..
ياسمين بهدوء / طبعا اؤمروا ..
منال بتعالي / ما تعرفيش ماما بعد ما مشيت من الدار راحت فين …
ياسمين / لا معنديش اي خبر راحت فين …
هند / بس المديره وكل الناس اللي هنا بياكدوا ان انتي الوحيده اللي كنتي بتتكلمي وبتقعدي معاها طول الوقت وعارفه حاجات كتير عنها ..
ياسمين / ايوه انا فعلا كنت بقعد معاهع بس بحكم شغلي و الحجه سميره كانت كتومه ومش بتتكلم كتير ولا قالتلي على اي حاجه كل اللي قالته ان هي كان عندها ٣ بنات وهما اللي رموها هنا ..
منال بشك / على العموم فكري يمكن تكون قالتلك حاجه وانتي ناسيه ولو افتكرتس حاجه ليكي عندنا مكافأة كبيرة ..
منال فتحت شنطتها وطلعت منها ظرف مليان فلوس .. خدي المبلغ ده خليه معاكي..
ياسمين / خلي فلوسك معاكي يا هانم انا مش محتاجه حاجه من حد ولو كنت اعرف اي حاجه عن الحجه سميره كنت قلت لكن انا معرفش اي حاجه خالص ..
منال بصتلها بغضب ومشيوا .. ياسمين خلصت شغلها وراحت علي بيتها بسرعه ..
ياسمين فتحت الباب لقيت سميره قاعده على الارض ومشغله التليفزيون …
ياسمين جريت عليها / سمورة الحقي تقريبا كده بناتك جم يسالوا عليكى في الدار .. وقالولهم ان انا اللي كنت بقعد معاكي دايما وتقريبا اتكشف وهتشلوح ..
سميره ضحكت على طريقتها / متقلقيش انا عارفه ان هما هيعملوا كده و عاملة حسابي كويس ..
ياسمين / طيب ما خلاص تسامحيهم وترجعي تعيشي معاهم هما اكيد عرفوا غلطهم ..
سميره / بعد كل اللي عملوه معايا مقدرش … وبعدين انتي زهقتي مني وعايزاني امشي ولا ايه ..
ياسمين دموعها نزلت / انتي بتقولي ايه بس .. انتي متعرفيش الشهر اللي انت قعدتيه معايا ده فرق في حياتي قد ايه حسيت ان انا فعلا ليا اهل عندي حياه بدل الوحده اللي انا عايشه فيها ..
سميرة ابتسمت ومسحت دموع ياسمين / وانا مش هسيبك ابدا يا حبيبتي ومن النهارده تقوليلي يا ماما ..
ياسمين ابتسمت / حاضر يا ماما ..
خلص اليوم وتاني يوم ياسمين وسميرة اتفاجئوا بالباب بيخبط ..

سميرة / شكلهم وصلوا افتحي الباب ..
ياسمين قامت فتحت الباب .. لقيت منال بتزقها و دخلت …
منال / انا ممكن اعرف انتي بتعملي ايه هنا خربتي بيوتنا و قاعده هنا مرتاحه ومبسوطه ..
سميرة بهدوء / خربت بيتكوا ليه .. انا كل اللي عملته خدت فلوسي .. العز اللي كنتوا عايشين فيه من خيري و كل المحلات والعماير بتاعتي ..
هند / ايوا بس احنا ملناش مكان تاني غير البيوت دي واجوازتنا ملهمش شغل تأني ..
سميره / والله مش مشكلتي قولي لحد من اهل جوزك اللي كنتي طول الوقت بتعزميهم يمكن يرضى يساعدك …
نيفين/ انا مش فاهمه انتي مالك.. اتجننتي علي كبر ولا ايه .. نروح احنا فين بعيالنا ومفيش شغل كمان ..
ياسمين اتكلمت وقالت / لسانك يا قطه بدل ما اقطعهولك .. انتي في بيت محترم اتكلمي عدل عشان معملش معاكي الغلط ..
سميرة قعدت وحطت رجل علي رجل / روحوا اقعدوا عند حماتك يا حبيبتي ما هي كانت بتقومك عليا وبتقولك انها بتحبك اكتر مني …
ومن الاخر كده الفلوس فلوسي والعماير بتاعتي وباسمي والمحلات انا اللي اديتها ليكوا عشان اساعدكوا تكبروها وتديروها بدل ما اجوازتكوا يشتغلوا عند الغريب بس الظاهر اني كنت غلطانه وكنت طيبه معاكم زياده عن اللزوم لدرجه انكوا رمتوني ف دار مسنين وكان هيجيلي زهايمر بسببكوا ..
منال / يعني ده اخر كلام عندك ..
سميرة / ايوا اخر كلام .. روحوا لحالكوا و هدعي ربنا يسامحكوا و عيالكوا ميعملوش فيكوا نفس اللي عملتوه فيا ..
بنات سميرة مشيوا وياسمين قفلت الباب وقالت بضحك / شوف وشك نور ازاي أما قولتي كل اللي عيزاه ..
سميرة ضحكت / دلوقتي بقي مفاضلش غير اني افرح ببنتي اللي بجد ..
ياسمين ضحكت / تفرحي فيا ازاي .. بقي بعد العشرة دي كلها هتبعيني ..
سميره ضحكت وقالت / يا بت بطلي بقى هقولك يا اختي هافرح بيكي ازاي ..
سميره قامت دخلت الاوضه وفتحت الدولاب واخذت ورق ورجعت تاني الصاله وقالت ..

سميرة / امسكي ده عقد شقه هتتجوزي فيها انت وعبد الرحمن .. انا اشترتها من اسبوعين وخليت حسين كتبها باسمك ..
ياسمين بحرج / لا طبعا يا ماما انا مقدرش اقبل حاجه زي كده وبعدين انا و عبد الرحمن خلاص تقريبا لقينا شقه ..
سميره / اسمعي الكلام يا بنت انا امك وبقولك الشقه دي بتاعتك خلاص .. ربنا يهنيكوا بيها يا بنتي وتعيشوا مبسوطين ..
ياسمين/ طيب و انتي ..
سميرة / هرجع شقتي القديمه اعيش فيها الباقي من عمري ..
ياسمين/ طيب ما تعيشي معانا .. انا مقدرش اسيبك تقعدي لوحدك ابدا .. وده شرطي عشان اقبل الشقه ..
سميرة/ بس يا بنتي …
ياسمين قطعتها / مبسش يا ماما .. انا مش هقدر اعيش من غيرك ..
سميرة/ ماشي يا حبيبتي انا موافقه عشان خاطرك بس ..
ياسمين ابتسمت و اترمت ف حضنها بحب / ربنا يخليكي ليا يارب ..
تمت ..

لقراءة الرواية كاملة اضغط على : (رواية بنات القسوة)