رواية هن (غرف مغلقة) الفصل السادس والثلاثون 36 بقلم ياسمين النحاس
رواية هن (غرف مغلقة) الجزء السادس والثلاثون
رواية هن (غرف مغلقة) البارت السادس والثلاثون
رواية هن (غرف مغلقة) الحلقة السادسة والثلاثون
عمار لسا هيقرب من ملك ويشيلها الباب اتفتح وبعد بسرعه وبص قدامه بنرفزه : انت بتعمل ايه هنا ؟؟
موظف عنده في الشركه بص بصه سريعه علي المكتب ورد باحراج : قالوا ان في حد تعبان وانا معايا كورس في الاسعافات الاوليه
دخلت سكرتيرة عمار وراه ومعاها عصير : اسفه يافندم بس رامي يقدر يساعد المدام
رامي بصلها باستغراب وبصله : دي مدام حضرتك ؟
ملك سامعه الحوار مابينهم وحاسه انها في عالم تاني ومش قادره تنطق ولا تحرك دماغها حتي
عمار بص لملك وبص قدامه وحس لو رفض دخوله هيبقي حواليه شكوك وسابه يدخل وسكرتيرته دخلت ورفعت راس ملك براحه ورامي اتعامل معاها وبص لزميلته : هاتي جهاز الضغط من تحت
عمار واقف جنبهم ومتابع حركات رامي وللحظه حس بغيره من قربه ليها
الباب اتفتح تاني بعنف وعمار لسا هيزعق لقي بنت قدامه .. وكانت نور قربت لملك بسرعه وبصيت لرامي بخوف : مالها ؟؟ (بصيت لملك ومسكت ايدها) ملك سمعاني ؟
ملك ضغطت علي ايدها بضعف ونور بصيتلها بقلق وقربتلها اكتر : في ايه مالك ؟ ومين دا ؟؟ وسيف !! سيف فين ؟!
السكرتيره جابت جهاز الضغط وقاس ضغطها وبص لعمار : ضغطها واطي جدا .. اطلبلها بييبسي او اي حاجه فيها صودا قويه
عمار نفذ طلبه ونور حاضنه راس ملك وبتطبطب علي جسمها وبتطمنها وهي معندهاش اي خلفيه لأي حاجه
عدي 10 دقايق ونور شرَّبت ملك البيبسي وبعد 5 دقايق فتحت عينيها بدوخه وبصيت لنور انها عايزه تقوم
رامي بص لملك : حاسه ايه دلوقتي ؟
ملك بدوخه : فوقت شويه بس لسا دايخه
رامي : اللي خدتيه هيساعدك تروحي بس , انا مش بشجع علي الصودا وقت الهبوط بس هتقدري تكملي ساعه بالكتير فايقه شويه
ملك قامت ونور ماسكه ايدها وبصيت لعمار : لو سمحت مجيتي هنا مش عايزه حد يعرفها
عمار فاهم ليه بتقول كدا بس خد كلامها بمحمل تاني تماما وابتسم : اكيد وانا زدني شرف بمجيتك
ملك حسيت انه مش بيطمنها وخوفها منه زياده بس معندهاش قدره للخناق او تفهمه اي حاجه وللحظه حسيت انها غلطت لما راحتله وكمان لوحدها
طلعوا من الشركه ونور وقفت ملك وبصتلها : في ايه ؟؟ ايه حصل وليه هنا لوحدك ومين دا ؟
ملك بتعب : نور انا لسا دايخه عايزه اقعد وبعدين هحكيلك
نور : طب تعالي نمشي من هنا العربيه سبتها برا
ركبوا عربية نور
نور بصتلها : هتحكي ولا ازنلك زياده ؟؟
ملك الدموع لمعت في عينها : هحكيلك انا محتجاكي
نور كشرت عينها : طب هروح البيت ونتكلم
ملك بصتلها : مش عايزه اروح بيتي .. اقصد شقة سيف ممكن نتكلم عندك
نور استغربت اكتر وحسيت انهم متخانقين : حاضر بس هو بيتك علي فكره
ملك بصيت للشباك ومردتش ونور حيرتها زادت اكتر .. وصلوا لبيتها وبصيت لملك : تشربي ايه ؟ علي ما الغدا يجهز ؟
ملك رجعت ضهرها لورا ورفعت راسها : ولا حاجه
نور قلعت طرحتها : ازاي يعني .. اقلعي طرحتك بدل ما تكتمك زياده , ولا اقولك انا هقوم اجيبلك هدوم وتغيري احسن
نور قامت وغابت شويه ورجعتلها بساندوتشات وعصير فريش وهدوم
ملك قامت وغيرت وقعدت جنبها .. نور حطيت الساندوتش في ايدها : كلي يلا وفهميني في ايه
ملك دمعت وطلعت الطرد من شنطتها : شوفي دا وقوليلي متفبرك ولا لا
نور اتخضت : بتعيطي ليه ؟؟
ملك خدت منديل ومسحت وشها : مبعيطش .. شوفي وقوليلي
( للتذكره , نور صاحبة ملك في الكليه .. نور خلصت دراستها وخدت كورسات فوتو شوب وبتشتغل في التصميم وبقيت محترفه )
نور فتحت الصور وبرقت بصدمه وقلبت فيها ومع كل صوره بتركز فيها وبتقلب للي بعدها وسابتهم وبصيت لملك بشفقه : مين بعتهملك ؟
ملك : قوليلي متفبركين ولا لا ؟
نور مسكت ايدها بأسف : حقيقين ياملك مفيش لعب فيهم !!
ملك حطيت ايدها علي وشها وعيطت ونور حضنتها وطبطبت عليها : طب اهدي عشان خطري
ملك بنحيب : انا قولت دا املي الوحيد يانور !! يكون حد قاصد احسن ما يبقي يخوني بجد
نور بعدت عنها وحاولت تساعدها : طب انتي شاكه في حد يقصد يخرب عليكم
ملك هزيت راسها بلأ وعينها علي الصور ونور حطتهم بعيد : طب سيبك منهم خالص .. سيف عامل ايه معاكي ؟
ملك بدموع : عادي (صوتها مخنوق من العياط) والمصيبه انه عادي .. عارفه لو وحش معايا هقول المشكله في حد فينا , يا انا مطلعه عينه ياهو اللي عينه زايغه ومش مقدرني
نور بتفكير : اخر فتره ملاحظتيش عليه حاجه ؟
ملك : لاحظت ومتكلمتش
نور كشرت عينها : لاحظتي ايه ؟ اوعي تقوليلي حاجه علي هدومه شبه الافلام
ملك شاورت لا: خالص .. بس كانت بتجيله رسايل وبشوفها ولما بيفتحلي موبايله تاني يوم مبلاقيش حاجه
نور : اممممم .. يعني بيداري
ملك مسحت عينها وبصتلها بخوف : بس انا خايفه من حاجه
نور بقلق : ايه ؟
ملك دمعت تاني : بقالي فتره تعبانه ومجهده وبدوخ بسرعه خايفه اكون حامل
نور برقت بصدمه : طب والحل ايه ؟ .. ملك انتي مينفعش تشوفي الوضع كدا وتسكتي
ملك : المفروض اعمل ايه ؟ انا مش هعمل حاجه
نور بذهول : لا طبعا هتبقي غلطانه , واجهيه خليكي احسن منه
ملك : لا مش هقدر .. خايفه يكون مخبي عليا حاجه تانيه , وخايفه ينزل من نظري اكتر من كدا
نور مسكت ايدها : حبيبتي الجواز مش سهل وطبيعي يحصل مشكله ! .. اديه فرصه واتفاهمي معاه وسيف بيحبك
ملك زعقت : متقوليش بيحبني .. لو بيحبني ميروحش يقابل غيري من ورايا ولا يداري عليا ولا يمسح الرسايل اللي بتجيله , لو مفيش حاجه كان واجهني احسن من اللي حصل دا .. ماما كان معاها حق
نور استغربت : طنط !! , هي طنط عارفه حاجه ؟
ملك : حكيتلها علي اللي بيعمله وقالتلي خلي بالك والرجاله كلها خاينه
نور اتنهدت : طب معلش ياملك ابعدي عن افكار طنط , هي مش عايشه مكانك ولا بتحب سيف زيك واكيد غلاوته عندك تشفعله , ولا ايه ؟!
ملك بزعل : يانور انا بعمل كل حاجه عشان اسعده واهتم بيه ! .. الراجل اللي روحتله دا عشان اصلح سوء تفاهم ومشكله ممكن تزعل سيف لو عرف بيها ,, انا مش مقصره معاه وهو يعمل ايه (صوتها اتخنق ) انا ادور علي زعله وهمه قبل سعادته وهويعمل ايه !! يرضيكي طيب ؟!
نوربزعل علي صاحبتها : لا طبعا ميرضينيش .. طب البنت اللي معاه دي مين ؟ تعرفيها ؟
ملك انتبهت لكلمتها وخدت الصور والاتنين بصوا فيها .. نور : اللي بيصور مش عايز البنت تتعرف خدتي بالك ان ضهرها اللي باين
ملك قلبت في الصور ولقيت صوره خدها باين : لا جنب وشها هنا باين
نور خدت الصوره منها وركزت فيها وفي المكان اللي حواليهم وبصتلها : ملك المكان دا بعيد اوي
ملك ضحكت بزعل : وهو هيشوفها في مكان قريب ليه ؟ طبعا هيشوفها في ابعد مكان عشان ميتكشفش
نور اتنهدت وسابت الصور وبصتلها : حبيبتي مش عايزه الشيطان يلغي تفكيرك ! .. مستحيل تهدي حياتك عشان صور ! وبعدين الصور مفيهاش وضع مخل لسيف !! دا واقف بيتكلم معاها بس .. يعني ممكن اي حاجه غير الخيانه .. وبعدين حطي في بالك ان حد بعتلك الصور وفطرد دا مش خير ابدا وقاصد يضايقك او هيفرح في خراب بيت سيف
ملك فكرت في كلامها : انا فاهمه بس انا وجعي اكبر ! سيف هو حبي وحياتي وزي ما غلاوته كبيره وحبي ليه عظيم زي ما وجعي منه كبير اوي
نور سمعت صوت موبايلها وقامت تجيبه وراحت لملك بتوتر : دا سيف !!
________________________________
أميرخد شاور وحس بتعب في كل جسمه وريح علي الكنبه وهيقوم يلبس ويكلم احمد ويقابله
ومن غير ما يحس نام ونومه طول ..
عليا بتتصل بيه كتير وقلقانه عليه وعارفه انه زعل منها عشان قفلت في وشه وزعقت معاه
روحت البيت وبتتمني تلاقيه هناك .. دورت عليه في البيت ومش لقياه , دخلت اوضته ولقيته نام علي الكنبه وساند راسه علي مسند الكنبه
شافته وقلبها رق ليه وهي حاسه بتعبه وعارفه نام من قلة النوم وسهره طول الليل جنب باباه
طلعت من الاوضه وكلمت نفسها : رقيه ايه يارقيه بس .. اول بختك تبقي مطلقه يابني
انا هعقله هو مش اي حد دا دكتور وليه اسمه
___
عند رقيه كانت قاعده في اوضتها وساكته طول اليوم .. جتلها رساله من عيادة رشا بتأخرها عن الجلسه النهارده واخر معاد 9 بالليل .. شافت الرساله ومردتش ونويت متروحش
مامتها دخلت تتكلم معاها شويه وطلعت ومعرفتش تقعدها معاها برا
احمد رجع ونيره شافته وناديت عليه وراحلها : نعم ياماما
نيره بقلق : اختك مالها ؟ انا بكلم فيها كتير وهي كلمه ترد و10 لا ومش مظبوطه كدا ولا مريحه قلبي
احمد : خير ياماما متقلقيش
نيره اتنرفزت : قولي مالها يا احمد انت اكيد عارف
احمد مش عارف صح يتكلم ولا لا ورفض يتكلم مع مامته عن امير وبصلها : هي ليها خصوصيتها ياماما وانا معرفش حاجه
بصتله بنرفزه وهو باس راسها : هدخل اتكلم معاها يمكن تحكيلي
دخلها احمد وهي شافته وسكتت .. قربلها وقعد جنبها علي سريرها وضحك : والله و وقعت
رقيه ابتسمت علي كلمته وطريقته وبصتله بزعل : كلمك تاني ؟
احمد اتنهد : لا بس انا مش مديله فرصه اصلا ولا رسيته علي اي حاجه , فخليه يستوعب بس وهتلاقيه بيكلمني
رقيه بتوتر : خايفه يا احمد
احمد بحنيه : عارف وفاهم احساسك بس ياروكا لو في خير هيبقي من نصيبك .. مش دايما بنقول لو كان خيرا لبقي ! .. هو لو خير ليكي مش هيسيبك تضيعي من ايده
رقيه اتنفست بهدوء واتمنته من جواها وبصيت لاحمد : عارف يا امير انا
احمد قاطعها وضحك : الله !! دا حنا وقعنا خالص!
رقيه استغربت وابتسمت باحراج : ليه
احمد : انتي مش واخده بالك قولتي ايه ؟
رقيه شاورت لأ واحمد ضحك بصوت عالي ورقيه ضربته في رجله : ايه انطق
احمد بابسامه : قولتيلي عارف يا امير
رقيه وشها لون الوان كتير من الاحراج والكسوف وسكتت واحمد ضحك وقومها معاه
رقيه قامت بكسوف : اتلخبطت
احمد خبطها في كتفها وبصلها بنص عين : عليا بردو
فتح الباب يطلعوا برا وهي طلعت وبصتله انها مخدتش بالها انه طلعها معاه برا
نيره بصتلهم واحمد غمز لمامته وهي ابتسمت ودعيت ربنا يخليهم لبعض رايما
احمد : طب بقولك ايه الناس دي كلت وانا جعان افتحي نفسي وكلي معايا
رقيه بهدوء : مش جعانه ممكن اقعد معاك بس
بعد نص ساعه
احمد بص للاطباق وهي ممسوحه وبص لرقيه وضحك : هو دا اللي مش جعانه !! انتي ناقص تاكليني
رقيه ضحكت : ايه ياحمد بتعدلي اللقمه
احمد بص للاطباق تاني وضحك لدرجة الدموع وقلدها : مش جعانه ممكن اقعد معاك بس
رقيه ضحكت اكتر وصوت ضحكهم واضح , نيره وعبدالله سمعوهم وضحكوا علي ضحكهم
عبدالله بص لنيره : سبحان الله البت قاعده في حالها من امبارح لابتكلم حد ولاسامعين ليها حس ويدوب احمد قعد جنبها شويه صوتهم جايب اخر الشارع
نيره ابتسمت : ربنا يباركلهم في بعض ويجعلهم سند لبعض دايما
عبدالله بابتسامه : يارب انتي السبب فيهم يبقوا كدا
نيره بارتياح : الحمدلله
احمد شال الاكل ورقيه غسلت الاطباق وكل واحد بيعمل حاجه وبيساعد التاني
موبايل رقيه رن واحمد راح يجيبهولها ورقيه سمعت موبايل احمد وطلعت تجيبهوله
احمد بص في موبايلها وقرأ اسم التروكولر : عيادة دكتور رشا للارشاد النفسي ..
احمد تنح وبص بعيد ناحيه اخته ومش متخيل ان رقيه بتتعالج نفسيا ومش قايلاله
رقيه جابت موبايله وقرأت الاسم وكان امير وشعور جواها بيقولها ترد
____________________________
نور بقلق : سيف مبيتصلش بيا خالص ياملك
ملك قامت وقفت وغمضيت عينخها بدوخه ونور قعدتها وقعدت جنبها
نور بتوتر : اعمل ايه ؟
ملك بتفكير : ردي عليه
نور فتحت المكالمه وردت بثبات : الو ازيك يا سيف
سيف بتوتر : ازيك يا نور اسف اني كلمتك فجأه , مشوفتيش ملك ؟ او كلمتك انا بكلمها ومبتردش
ملك افتكرت ان موبايلها ساينلت وشاولتها بلأ
نور : لا ياسيف مشوفتهاش , في حاجه ؟
سيف قلقه زاد اكتر: لا مفيش بس قالتلي هتروح المعرض وبكلمها ومفيش رد وكلمتهم هناك قالوا جت ومشيت علطول ومش عارف هي فين وقلقان عليها
نور : ممكن موبايلها ساينلت او نسيته في حته
سيف بتفكير : مش عارف .. قلقان عليها .. يا نور اسف علي ازعاجك
نور بسرعه : لا مفيش ازعاج هحاول اوصلها او اكلم طنط ممكن تكون راحتلها
سيف : تمام يانور لو وصلتلها بلغيني
نور : اكيد
قفلت معاه وبصيت لملك : هيموت من القلق
ملك بتوتر : خايفه تسنيم تقوله اني روحت لعمار شركته
نور قعدت : لا معتقدش هو قالي بلغوه انك مشيتي بس
ملك مسكت راسها بايدها ونور اشفقت عليها : هتعملي ايه
ملك بصتلها بتعب : مش عارفه .. مش عارفه اي حاجه ولا عارفه اقرر ايه الصح وايه الغلط
(نور تتكلم ملك سبقتها ) متتوقعيش اني اضعف عشان قلقان هو في نظري خاين يانور والخيانه مهما تعددت اشكالها هي خيانه في الاخر
نور اتنهدت : طب هكلم الصيدليه تجيب تيست حمل
ملك وافقتها وربع ساعه والدليفري وصل بالتيست
قامت ملك تعمله ومتوتره ومش عارفه لو حامل تفرح ولا تزعل ..
نور مستنياها برا وشويه وطلعت ملك بالتيست وفي علامتين لونهم احمر
ملك دمعت ونور خدته من ايدها وفرحت وحضنتها : افرحي يا نكد افرحي
بصتلها : طب بالله عليكي .. النونو اللي جاي دا ميشفعش ليه عندك !!
ملك بصتلها ومرفعتش ترد بايه ونور كملت : طبعااا يشفعله( كملت بهدوء) فكري براحه والمشاكل تهون قصاد حته منك ومنه
ملك بدموع : كان نفسي سيف يبقي معايا واقوله .. هو نفسه في اطفال
نور سحبتها من ايدها للأوضه وقعدوا علي السرير : يمكن حملك دلوقتي خير ليكي ياملك ومش يمكن هو اكيد خير .. ابعدي الشيطان عنك بالله عليكي
بعد كلام مابينهم ونور بتهديها علي قد ماتقدر واقنعتها تروح وتوصلها البيت
ملك وصلت تحت بيتها
نور : هتقولي لسيف ايه ؟
ملك بصتلها : مش عارفه بس بفكر اقوله
نور : دا الصح .. ربنا يهدي سرك ويطمن قلبك
ملك ابتسمت : يارب … ربنا مايحرمني منك
نور حضنتها : ولا منك ابدا
ملك نزلت من عربيتها وسيف كان واقف في البلكونه وشافها واستناها تطلع
ملك طلعت وفتحت الباب وشافت سيف واقفلها في الصاله وعلامات الشر والغضب كلها علي وشه
قفلت الباب وسيف قربلها بهدوء غريب : كنتي فين ؟ وموبايلك مبترديش عليه ليه ؟
_______________________________
ابراهيم واقف مع مامته : مفيش ياماما .. هي تعبت شويه وعندها التهاب في العصب السابع
اسماء اتنهدت : متأكد انه تعب بس ؟
ابراهيم استغرب مامته : امال ايه ؟
اسماء بقلق : اتخانقتوا وضربتها
ابراهيم بذهول : اضربها !!
اسماء : ابراهيم ياحبيبي متزعلش بس انا خايفه عليها وشكلها غريب اوي وانت عارف اني مش هسألها فخوفت تكون ضايقتك وضربتها
ابراهيم بضيق : لا طبعا مستحيل اضربها وانتي عارفه اني عمري ما مديتي ايدي علي اختي همد ايدي علي مراتي
اسماء بارتياح : طيب الحمدلله .. ربنا يشفيها وتبقي كويسه بس عالجها عشان جوازكم
ابراهيم : حاضر باذن الله .. شكرا انك مسألتيهاش او احرجتيها
اسماء ابتسمت : يابني انا بزعل لما حد بينتقد بنتي اروح انا انتقدها او اجرحها بكلامي
ابراهيم باس ايدها : وعشان كدا جبتها هنا الاول .. لما تحس ان شكلها مقبول وبالذات منك ثقتها بنفسها هتزيد ومش هتضايق
اسماء : واهلها مالهم ؟ ممكن يضايقوها ؟
ابراهيم بتفكير : مش عارف بس كل شيئ متوقع وانا متأكد منك فقولت اجيبها هنا احسن
اسماء : خير ما عملت ربنا يجبر بخاطرك
ابراهيم ابتسم وامن علي كلامها ودخل اوضته
بعد ساعه
شادن صحيت بالليل وحاسه في حد جنبها .. بصيت وشافت مسك نايمه , ابتسمت وقامت من جنبها .. فتحت الباب وحاسه بعطش ومش عارفه تجيب مايه منين ومحروجه تدخل المطبخ
ابراهيم كان صاحي حس بفتحة باب اوضة مسك .. قام وطلع من اوضة وكان شادن ضهرها ليه
ابراهيم قربلها وحاوطها بايده وباسها في خدها : القمر اللي صحي
شادن اتخضت واطمنت لصوته واديرت وبصتله : صاحي ليه
ابراهيم ابتسم لشكلها وظبط شعرها بايديه : مش عارف انام , صحيتي ليه ؟
شادن بكسوف : عطشانه
ابراهيم دخل المطبخ وجبلها مايه شربت , طلعوا البلكونه وسندوا علي السور
شادن : منمتش ليه لحد دلوقتي
ابراهيم اتنهد : عندي أرق .. لما يومي بيبقي مليان مش بعرف انام
شادن مسكت ايده وطبطبت عليها وهو افتكر حاجه وضحك ,و بصتله واستغربت ضحكه وبعدت ايدها عنه بسرعه وضحكت
ابراهيم شدها عليه وبيضحك : تعالي بس اقولك
شادن بضحك واحراج بصتله : خليني ابقي تلقائيه معاك ومتحرجنيش .. ممكن
ابراهيم ابتسم : طب جاوبي علي سوالي ومش هحرجك
شادن برقت وضحكت : يعني انت عارف انك بتحرجني
ابراهيم : مش اوي .. بس عايز اعرف الاجابه
شادن ابتسمت : عايز تعرف ليه لما بخاف بحب ابوس ايدك
ابراهيم بفضول : جدا
شادن بحب : عشان علطول ايدك بتبقي اول طرق الامان اللي بتوفرها ليا .. خايفه تحضني وتطبطب عليا .. متوتره تمسك ايدي .. في مكان غريب ايدك ماسكه ايدي ومش بتسيبها ابدا
فشعور من جوايا طلع اطمن نفسي بايدك وانا خايفه وابوسها من باب الحب والتقدير او اني اطمني
ابراهيم ابتسم من الاجابه وعرف ان شادن رغم بساطتها بس التفاصيل بتفرق معاها
ابراهيم بحب قربها عليه وباسها في راسها من غير كلام
شادن : ايه رأيك نشرب حاجه
ابراهيم بتفكير : تعالي نشوف التلاجه فيها ايه (بصلها ) بس كدا هتفوقي
شادن : عادي المهم اني معاك
ابراهيم ابتسم وافتكر حاجه وابتسامته اختفت وبصلها وبيقلد حركاتها : طلقني يا ابراهيم
شادن ضحكت وهو مشي قدامها للمطبخ وبيضحك , فتح التلاجه وطلع لمون ولقي نعناع .. دور في الفريزر علي تلج وطلعه
ابراهيم بهزار : ايه يرغمك تفضل مع واحده معرفش ايه
مسك السكيـ ينه وبصلها : انتي مااللك افضل ولا مفضلش هو انا متجوزك غصب
شادن ضحكت تاني وزقته بايدها بهزار : وانت كمان اتعصبت عليا
ابراهيم بيقطع اللمون وحطه في الخلاط مع باقي المكونات : انتي متعرفيش عصبيتي يا شادن وتجنبيها علي قد ما تقدري
شادن استغربت : متوقعش منك عصبيه او هجميه مثلا
ابراهيم شغل الخلاط وقفله وبصلها : همجيه وعنف اكيد لأ بس (بص حواليه وبيدور علي معني يوضح اللي جواه ) زعلي وغضبي لما بيطلع فعلا مبعرفش اوقفه وعشان مأذيش اللي قدامي ببعد شويه وبيبقي جوايا بركان (ابتسم) فالأفضل لينا تجنبيني وقت عصبيه او نرفزه
شادن هزيت راسها بتفهم وابراهيم صفي العصير وحطه في كوبايات وطلعوا البلكونه وكملوا سهرتهم وكلامهم فيها بسعاده
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية هن (غرف مغلقة) )
