رواية سلف ودين الفصل السادس 6 بقلم لولو محمد
رواية سلف ودين الجزء السادس
رواية سلف ودين البارت السادس
رواية سلف ودين الحلقة السادسة
الشيخ بيختم و عمر و على واقفين بياخدوا العزا من الناس و بعدين عمر يقعد على يقعد جنبه و يطبطب عليه
عمر / مات و هو زعلان منى مات و هو غضبان عليا
على / ما تحملش نفسك فوق طاقتها
عمر / اكتر حاجه حازه جوايا انه كان بيحاول يوصلى يمكن كان عاوز يقولى حاجه يمكن كان حاسس انه هيموت و نفسه يقولى حاجه
على / اكيد كان عاوزك تسامحه
عمر / تفتكر
على/ انا متاكد
واحد من بتوع الفراشه يقف فى جنب
على / انا هروحله خليك انت
على يروح يقف مع بتاع الفراشه و عيل صغير يقف جنب عمر
العيل / طنط سمر عاوزاك فوق
عمر يهز راسه و يقوم وراه
……………………………..
فى الفندق
ندى تطلع من الاوضه
ندى / حسام هو انا ممكن اعمل مكالمه من تليفونك
حسام / اكيد الموبايل فى الشاحن هناك
ندى تروح تجيبه تلاقيه بباسورد
ندى / افتحهولى
حسام / افتحيه انتى الباسورد تاريخ ميلادك خمسه و عشرين اتناشر
ندى / شكرا
حسام / هتكلمى مين ابوكى و امك لسه ماشيين
ندى / على
حسام يقوم يقف و يشد منها الموبيل و هى تبصله
حسام / انا كنت فاكر اننا متفقين فى ايه انتى بتحاولى تستفزينى و خلاص
ندى / انا بس قلقانه عليه هسمع صوته و خلاص
حسام / صبرنى يارب ندى افهمى مهما كان صبرى مهما كان انا بشر لحم و دم
ندى / انا اسفه بس
حسام / انا اللى اسف اوى يعنى مين انا عشان تفكرى فى شكلى او فى مشاعرى يعنى حتى لو رضيت بالتمثيليه السخيفه دى فبينى و بينك مش قدام الكل تضمنيلى منين ان الكلب ده مش هيورى الكل فى الشارع رقمى و يقولهم اتفرجوا بنت الاستاذ مصطفى بتكلمنى من موبايل الخرنج جوزها يوم صبحيتها
ندى تبص فى الارض
حسام / انا مقدر مشاعرك مقدر بس انتى ليه ما بتفكريش فيا لو على شكلى اولع لكن شكلك تفتكرى هيفضل يحبك و يحترمك و لا هيقول عليكى بت شمال و خاينه
ندى تبص لحسام
حسام / مش بتخونى جوزك معاه بكره تخونيه مع غيره اصلا اصلا لو قبل يرد عليكى و انتى على زمه راجل تانى يبقى ما بيحبكيش اقولك اتصلى بيه اتصلى بيه عشان تعرفى قد ايه هو واطى و هيقبل عليكى الغلط هيقبل ان الناس تتكلم عليكى و ساعتها لما تطلقى مش هيبصلك لانك هتبقى رخصتى نفسك فى عنيه
ندى / على مش كدا
حسام / انا راجل و افهم الرجاله كويس و تانى الراجل اللى يقبل يكلم واحده متجوزه يبقى واطى و ابن كلب و لو قبلها عليكى ما يبقاش بيحبك يا ندى لو قبل يحب واحده متجوزه و يعلقها بيه ما يبقاش بيحبك يا ندى
ندى / بس انا مش متجوزه يا حسام انا مش متجوزه
حسام / قولى للناس قولى للماذون قولى للفرح قولى للصور و الفيديو قولى لقسيمه الجواز و الحكومه قولى للدنيا كلها انتى متجوزه قدام الدنيا كلها انا و انتى و ابوكى بس اللى نعرف الحقيقه الحقيقه اللى لو اتعرفت هتطير فيها رقاب فوقى
حسام يبعد عن ندى و ينفخ و يرجعلها و هى واقفه بتبص فى الارض و بتعيط ياخدها فى حضنه و يطبطب عليها
حسام / حقك عليا حقك عليا ما كانش المفروض اتعصب عليكى انتى ذنبك ايه انتى تعرفى ايه انتى فى الدنيا تعرفى ايه انتى حقك عليا بس والله اتعصبت لمصلحتك حتى لو انتى مش بتحبينى حتى لو مش قادره تشوفينى زى ما انا شايفك انا بخاف عليكى انا ما يهمنيش حاجه غير مصلحتك يا ندى انا مش هاذيكى انا عمرى ما هاذيكى و لا اخدعك شهرين بس شهرين و اعملى اللى انتى عوزاه
ندى تهز راسها و تمسح دموعها و تدخل اوضتها و تقفل الباب حسام يقعد على الكنبه و يفرد ايده يحط رجل على رجل و يقلب القنوات بالتانيه و هو مبتسم اوى
……………………
فى شقه أية
سمر قاعده على السفره و أية بتلم الحاجات عمر يدخل
عمر / السلام عليكم
سمر / تعال يابنى اقعد
عمر يبص على أية و يروح يقعد على السفره سمر تقوم تدخل الاوضه و تجيب ورق و تيجى
عمر / ايه ده
سمر / اقراه و انت تعرف
عمر يبص فى الورق و يبتسم بسخريه و يحطه تانى
عمر / اه فهمت
سمر / بص ابوك اه بايعلى المحل و الشقه و العربيه بس مش بايع البضاعه اللى جوا المحل شوف انت و اخوك فاضيين امتى و ننزل نجردها و شوفوا نصيبكوا قد ايه انا مليش الا التمن و انتوا الباقي و ربنا يقدرنى و اللملكوا فلوسكوا
عمر / خلصتى ؟
سمر / انا عارفه ان كان المفروض على الاقل استنى كام يوم على الاقل جته ابوك تبرد بس قولت ما نستناش يمكن ده يريحه فى تربته
عمر / خلصتى ؟
سمر تبصله
عمر/ لو فاكره ان انا و لا على مستنين حاجه من ورث ابونا فا انتى غلطانه و لو فاكره ان حقنا عندك شويه البضاعه اللى تحت بس تبقى غلطانه بليها و اشبعى بيها احنا حقنا عندك سنين سرقتيها من عمرنا
سمر / انا ما سرقتش منكوا حاجه مش انا اللى طردتك من البيت ابوك و مش انا اللى طردتك فى كل مره جيت فيها هنا ابوك و ابوك الله يرحمه ما كانش عيل صغير و لا برياله عشان مراته تمشيه
أية / ماما
سمر / اتكتمى يا بت و خشى جوه
على يدخل
على / خلصنا تحت يا عمر جاى و لا قاعد
عمر / جاى
…………………………..
فى الفندق
حسام يفتح باب اوضه ندى يلاقيها قاعده على السرير واخده ركبها فى حضنها يقعد قدامها تبصله
حسام / و جايلك بايه ده ياختى
ندى تبتسم
حسام / فى فيلم حلو اوى فى التليفزيون بره قومى اتفرجى معايا عليه
ندى / حسام هو انا ممكن اتكلم معاك
حسام يتعدل فى قعدته
حسام / ينهار ابيض هو انا اطول اتكلمى
ندى / انا كنت بفكر فى الكلام اللى انت قولتهولى
حسام / بخصوص الكلام ده انا بعتزر تانى يمكن لانى ….
ندى / حسام
حسام / نعم
ندى / انا اسفه
حسام / على ايه
ندى / انك محطوط فى موقف زى ده بسببى انت ما تستاهلش كدا
حسام / و لا انتى يا ندى و لعلمك لو ما كنتيش كدبتى عليا لما قولتلك الواد ده تصرفاته معاكى مش مظبوطه و اتقمصتى كان ممكن قدرنا نحلها
ندى تبص فى الارض
حسام / لو فاكره ان فى حد فى الدنيا دى فاهمك قدى تبقى غلطانه انا مربيكى باديا دول
ندى تبصله و تبتسم
حسام / انا ما يهمنيش غير سعادتك مش عاوز من الدنيا اكتر من انك تبقى مبسوطه و بس
حسام يحط ايده على رقبته و يتالم
ندى / مالك
حسام / مفيش ما تاخديش فى بالك
ندى / لا فى هى رقبتك وجعاك
حسام / يا ستى هتفك لوحدها بقولك ايه ما تقومى تفتحى نفسى و تاكلى معايا لقمه
ندى / مش جعانه والله يا حسام بجد ملا يش نفس خالص
حسام / لا بقولك ايه ما تاكليش و يشفوكى يلاقوكى خاسه يقولوا مجوعها ابدا و لا يمكن طب و الله و الله كمان مره ما هحط لقمه فى بقى الا و انتى قاعده جنبى يا ستى جابرى الزاد افتحى نفسى اقولك اشربى عصير و خلاص
ندى / يا حسام ….
حسام / اقولك انا هجيب الاكل هنا
حسام يجى يقوم يمسك رقبته بتوجعه
ندى / بقولك ايه ما تنام النهرده انت على السرير و انا انام على الكنبه بره اهو ترتاح شويه
حسام / لما يشيلولى ذكر من البطاقه ابقى اسيبك تنامى بره ماشى مش ناقص حرقه دم على المسا
ندى / هههههههههههههههههه
حسام / و ليكى عين تضحكى اضحكى كمان ما انا اللى دلعتك
ندى / طب انا عندى فكره ما اعرفش تنفع و لا لا
حسام / اشجينى يام العريف
ندى / تنام معايا
حسام يبصلها و يرفع حاجبه
ندى / لا لا انا اقصد يعنى السرير كبير و ياخدنا احنا الاتنين
حسام يبصلها تانى
ندى / هنحط فاصل بالمخدات
حسام / مش عاوز اضايقك او اقيد حريتك انا هنام بره احسن
ندى / حسام
حسام / هجيب العشا و اجيلك
ندى / ماشى
حسام يطلع بره تليفونه بيرن يرد
حسام / على مفتكرت …. قولى خبر حلو بدل م…………. دانا هشهيصك ……….. سلام بقى ما تبقاش غتت
حسام يبص على اوضه ندى و يبتسم
حسام / هانت يا نونو هانت
حسام يزق الترولى للاوضه يلاقى ندى قاسمه السرير بالمخدات
حسام / بتعملى ايه
ندى / انت هتاخد ناحيه الباب و انا هاخد الناحيه اللى جوه ايه رايك
حسام / لا انا هنام بره خدى راحتك
ندى / حسام بجد مش هعرف انام و انا عارفه انك موجوع على الاقل لحد ما رقبتك تخف و بعدين اطلع بره براحتك
حسام / بجد مش هضايقك
ندى / بص كانهم سريرين اصلا و محدش فينا هيعدى عند التانى يبقى خلاص
حسام و هو بيعانى انه يدارى فرحته
حسام / امرى لله يلا بقى نتعشى عندى بقى حته خبر هيفتح نفسك على الاخر
ندى / كلمت على ؟؟؟
حسام وشه يقلب
حسام / لا…. مش كنت بقولك ماجر فيلا صغيره هناك نقعد فيها
ندى تهز راسها
حسام / واحد صحبى كلمنى دلوقت و قالى انها بقت جاهزه من كلو
ندى تبتسم
حسام / بس فى مشكله صغيره
ندى / خير
حسام / انا قولتلك انها حته بعيده شويه و لسه بتتبنى فالتليفون لسه ما ركبش يعنى مفيش نت هناك
ندى / مفيش مشكله انا مليش تقل عليه اصلا
حسام / يعنى ما عندكيش مشكله
ندى / ابدا خالص
حسام / ريحتى قلبى ربنا يريح قلبك على العموم تليفونى موجود لو حبيتى تعملى اى مكالمه مع اى حد فاى وقت براحتك طبعا
ندى / هو انا مش هيبقى معايا موبايل
حسام / اممم مهو انتى عشان يطلعلك شريحه لازم تخلصى ورق الاقامه بصى يا ستى انا فى واحد صاحبى اللى خلصلنا الفيلا انا عامله توكيل هناك هو هيخلص كل الاجراءات هناك و هيبعتلى الورق بالفاكس هنروح انا و انتى نخلص باقى الورق هنا عشان نحجز و نسافر و هنكمل باقى الاجراءات هناك
ندى / هو الموضوع مكلكع و لا ايه هو انا ما ينفعش اخلينى هنا و خلاص
حسام / هتخليكى هنا فين احنا شقتنا ما خلصتش
ندى / فى اوضتى
حسام / انا مش لاقى رد حقيقى مش لاقى رد
ندى / خلاص خلاص انا بس
حسام / ما بسش خلينا ننجز عشان نلحق نسافر
ندى / حاضر
حسام / حضرلك الخير يا قمر الامارات بلد جميل روحتى دبى قبل كدا
ندى تهز راسها لا
حسام / اما سؤال غبى ما انا عارف انك ما روحتيش ههههههههههههههههههههههه
ندى تضحك و تشرب عصير و حسام متابعها و مبتسم
حسام / اشربى ربنا يهديكى اشربى
…………………………
فى شقه عمر
على / و ما قولتليش الكلام ده هناك ليه و انا كنت اتصرفت
عمر / كنت هتعمل ايه يعنى ابوك ماضى على عقود مسجله
على / و انت يعنى بتفهم فى القانون اوى ما يمكن مزور و لا مضروب
عمر / ما افتكرش تقدر تعمل كدا
على / ان كان على القدره فهى قادره و طالما سى عمر مش هيدور وراها تخاف من ايه
عمر / قصدك ايه بقى
على / تقدر تقولى ما ندتليش انا ليه
عمر / هى ما تعرفكش
على / والله
عمر / عاوز توصل لايه
على / أية
عمر / يوووووه مالها أية ايه علاقتها بالموضوع
على/ ملهاش خلى بنت سمر تتمتع بورث ابونا
عمر / على بصلى كدا انت كنت مستنى حاجه من ابوك و هو عايش لما هتدور على ورثه و هو ميت مالك يا على ايه جرالك
على / انا عندى يتوزع على اليتامى و لا ان سمر الزفت دى و بنتها يتهنوا بيه
عمر / يتيمه برضه ان كان على أية فهى يتيمه برضه
على/ انت هتنقطنى يا عمر
عمر / انا فيا اللى مكفينى
على / و انا مفييش
عمر يبص لعلى و يسكت
على / انا مش هسيب حقى عاوز انت تسيبه للسنيوره براحتك بكره الصبح هشوف محامى
عمر / و لو طلع الورق مش مزور
على / مزور
عمر / باماره ايه واثق اوى كدا هو مش ده نفس الراجل اللى طردنا من بيته بدل المره عشره مش ده نفس الراجل اللى قال قدامك انه ما خلفش عيال هو و لا لا
على / بس مش هيجى علينا للدرجادى مش هيظلمنا حتى و هو ميت
عمر / سامحه و سيبه يرتاح اديك قلتها مات خلاص سامحه و اسكت
على / يعنى هتسكت
عمر / انا مش محتاج من الفلوس دى حاجه
على / انا محتاج
عمر يبص لعلى على يسكت
عمر / انا حاسس بيك
على يسيب المكان و يمشى
…………………………..
تانى يوم فى الفندق
المنبه يضرب حسام يصحى المخدات على الارض و ندى جنبه يبصلها و يبتسم و يدخل الحمام يغسل وشه و يغسل سنانه و يسرح شعره و يجيب المخدات من على الارض و يرصهم على السرير جنب ندى زى ما كانوا مرصوصين و يبص فى الساعه
حسام / فاضل عشر دقايق
حسام ياخد ندى فى حضنه و ينام و حاجز المخدات جنبه و مكان ندى فاضى فيه مخده زياده و يعمل نفسه نايم لحد ما ندى تبدا تفوق تفتح عنيها تلاقى نفسها نايمه فى حضن حسام تزقه يقع من على السرير يعمل مخضوض
حسام / ايه ايه فى ايه
ندى / هاه؟؟؟ ايه؟؟؟ هو مش المفروض …
ندى تبص الناحيه التانيه جنبها تلاقى المخدات
حسام / ياربى على الفزعه
حسام يفرد ضهره على الارض ندى تحرج و تيجى تقوم رجلها تتكعبل فى الغطا و تقع فوق حسام يبتسم تقوم بسرعه و تجرى على الحمام و تقفل الباب حسام يقوم و هو بيضحك
حسام / دانا لو كنت عاوزها تحصل ما كانتش حصلت ………. هانت فاضل على الحلو تكه
حسام يروح يخبط على باب الحمام
حسام / ندى … ندى
ندى تفتح الباب و تطلع و وشها فى الارض يمسك دقنها و يرفعها لعنيه
حسام / مالك
ندى / ما .. مافيش
حسام / هو انا قولتلك ان شكلك حلو اوى و انتى لسه صاحيه من النوم
ندى تبتسم
حسام / مجنونه بس حلوه
ندى / مجنونه ؟؟؟
حسام / اه مجنونه فى حد يعمل كدا طول الليل ترصى فى مخدات و بعدين … يا شيخه دانا طول الليل نايم على سيفى
ندى تبص الناحيه التانيه
حسام / لا و فى الاخر تزقينى توقعينى فى الارض انتى خطر تنامى جنب حد على فكره
ندى / يا سلام
حسام / لا و كمان بتقاوح كان فاضل ايه ياختى ما عملتيهوش طب والله نكته .. بس للاسف مش هنقدر نحكيها لحد
ندى / انت اوفر اوى على فكره
حسام / يا شيخه
ندى / ايه يعنى اتقلبت و انا نايمه ايه ما بتتقلبش
حسام / انا لا يا ماما انا ما بتقلبش فى السرير انا بتقلب من على السرير
ندى / ههههههههههههههه ما خلاص بقى انت هتمسكهالى ذله اتخضيت يعنى مش متعوده حد ينام جنبى اصلا انا الغلطانه ارجع نام على الكنبه تانى
حسام / ارحم من نوم الارض ياختى هتطردينى من الجنه
ندى / انت تطول و لا تكون صدقت انك جوزى عشان تنام جنبى هههههههههههههههههههههههههه
حسام يبصلها و ما يردش
ندى / ايه انا بهزر معاك على فكره
حسام يسيبها و يدخل الحمام و يقفل الباب
ندى / هو انا عكيت و لا ايه يووووه
………………………
ندى تروح تخبط على باب الحمام
ندى / حسام
حسام جوه واقف ساند على الحوض و بيبص للمرايه و مستمتع و ما بيردش
ندى / انا اسفه ما كانش قصدى اقولك كدا انا كنت بهزر يعنى …. ما تزعلش بقى
حسام يفتح الباب و يطلع يعديها تمسك ايده
ندى / عشان خاطرى ما انت عمال تحرجنى و تقولى انى جيت جنبك و بتاع حقك عليا
حسام / اللبسى يلا عشان نلحق نخلص الورق بتاعنا
ندى تهز راسها بحزن و تفتح الدولاب
………………………
فى الكليه
غاده / انت زعلان منى
عمر / لا يا غاده مش زعلان
غاده / امال ليه مش بتكلمنى من ساعه ما والدك جه
عمر / والدى اتوفى امبارح يا غاده
غاده / لا اله الا الله انا اسفه اوى البقاء لله انا فاشله فى المواضيع دى مش عارفه اقولك ايه
عمر / حصل خير
غاده / عمر تحب تخرج تغير جو بعد الكليه
عمر يبصلها
غاده / سورى ايه قله الزوق بتاعتى انا والله قصدى يعنى تغير مودك انا مش متعوده اشوفك حزين كدا طب قولى ابسطك ازاى
عمر يضحك
غاده / ايه ده بالبساطه دى طب كنت استغل الموقف مش كدا
عمر / وربنا انتى مشكله
غاده / بقولك ايه معاك فلوس
عمر / جيب السبع اؤمرى
غاده / بما انك بتضايق لما بقولك اعزمك فممكن تعزمنى
عمر / بتنقى اوقات فظيعه
غاده / جعانه على فكره
عمر / لا ان كان كدا اعزمك ما انا مش مستغنى عن دراعى
غاده / ها ها ها رزل
……………………..
فى العربيه مع حسام
ندى / انا تعبت و جعت و هعيط منك والله مش كدا
حسام /ههههههههههههههههه خلاص خلاص على ايه احنا اصلا خلصنا هنروح عند ماما عشان عزمانا على الغدى و بعدين نرجع نرتاح فى الفندق
ندى / ماشى
حسام / طبعا لو ما كانوش عارفين اننا خرجنا من الفندق ما كانوش هيشوفوا وشنا بس ما اقولكيش هى اصلا عزمت العيله كلها مروان و نور و عمى و عمتى دى هتبقى وليمه و كمان عاملينلك هناك مفاجاه
ندى/ مفاجاه ايه خير
حسام / ما تحاوليش يا ماما مش هقول اى حاجه
ندى / يا رزل يا رزل ما كنتش قولت ان فى مفاجاه انت بتغيظنى و خلاص
حسام / هههههههههههههههههههههه ما تحاوليش مش هضعف ابدا ابدا
ندى / انت هتذلنى يا سيدى يا خبر بفلوس بعد نص ساعه يبقي ببلاش
حسام / شوف ازاى !!!و ماله
…………………..
عند سمر فى المحل
على / انا نبهتك قبل ما اطلع على المحامى
سمر / اطلع اقولك اطلع على النائب العام شخصيا ابوك ماضى العقود دى بايده و هو بكامل قواه العقليه اقولك خد نمره المحامى بتاع ابوك اساله هو اللى مخلصله الورق ده كلو انا زى ما قولت لاخوك انت ليك عندى تمن تلتربع البضاعه اللى فى المحل و دا كرم منى و اسال المحامى و كرم اخلاق اكتر هديك الفلوس اللى دفعتها لابوك فى المستشفى
على / الفلوس اللى قولتى انك دفعتيها
سمر / انا تقريبا خلصت جرد البضاعه اللى فى المحل بفواتيرها و هطلع على الصاغه ابيع شويه دهب و بكره الصبح تيجى تاخد الفلوس اكتر من كدا عظيم بيمين ما هتشوفوا منى مليم هى ايه سايبه دا الراجل لسه جتته ما بردتش يا ناس
على / انتى هتدينى حقى من دهب امى اللى ضربتى عليه
سمر / امك !!! امك مين يا عين امك امك اللى رمتك انت و اختك و انتوا لسه حته لحمه حمرا و جريت مع عشيقها
على / اقسم بالله لولا انك واحده ست
سمر / بلا ست بلا بتنجان اسمع يا على انا اللى عندى قولته بكره الصبح تيجى تاخد الفلوس و لو شوفت وشك انت او اخوك بعدها و الله لتشوفوا وشى الوحش
على / هو انتى عندك وش اوحش من ده … على العموم افتكرى كلامى ده كويس انا حقى هاخده مش عشان عاوزه او محتاجه … تؤ… عشان انتى ما تاخديهوش شوفتى بقى … من غير سلام
………………………….
فى شقه حسام
ناس كتير اوى ملمومين
مروان / اخر حاجه كنت اتوقعها انى اشوفكوا النهرده ايه يا عروسه لحقتى تزهقى منه
ندى تبتسم
مروان / حقك عادى الحمد لله انك استحملتيه يومين ههههههههههههههه
حسام / ما تخف ياعم الظريف … الا اخبار الامانه ايه
مها / جوه
حسام يقوم يدخل طرقه يلاقى بنت حلوه طالعه من المطبخ شايله سيرفيس محاشى تحطه
البنت / ازيك يا حسام مبروك
حسام / عقبالك يا اروى
حسام يعدى و يسبها و يدخل جوه و هى لسه بتبص عليه تتنهد و تروح تحط السيرفيس على السفره حسام يطلع من جوه شايل كيس كبير
حسام / مفاجاه
مروان / لو مش بتتاكل يبقى ما لهاش لزمه
نور / ههههههههههههههه الاكل جاهز
ندى/ خلاص ناكل الاول و بعدين نبقى نشوف المفاجاه
حسام / يا شيخه
ندى / يا شيخ
ست تطلع من المطبخ شايله صينيه فراخ
الست / الاكل هيبرد
ندى / جايه يا عمتى
الكل يقعد ندى جنب حسام جنبه مروان جنبه نور الناحيه التانيه مها جنبها اروى قدام حسام جنبها الست جنبها امانى و على الطرفين واحد محمد وواحد مصطفى حسام يوطى على ودن ندى
حسام / متاكده انك مش عاوزه تعرفى فى ايه فى الكيسه
ندى / ما بتزلش على فكره
حسام / ما عاش اللى يزلك يا بنت عمى
اروى تقوم تقف و تبدا توزع المنابات و تحط فى طبق حسام يشيل من طبقه و يحط لندى
اروى / كنت هديلها على فكره بس انت اقرب
حسام / اعتبرينى بساعدك ما فيهاش حاجه
اروى تحط حته تانيه لحسام
مروان / المهم يا سى حسام ناويتوا تسافروا امتى
حسام / هانت شويه اجراءات روتينيه و هنسافر علاطول
مروان / اه بس سمعت ان الفندق اللى انتوا قاعدين فيه غالى اوى
الست / حقه يا حسام يابنى ما كانلوش ابدا الصربعه دى مدام شقتكوا ما خلصتش
حسام / ههههههههههههههههههه ايه يا جماعه فى ايه اولا ما يغلاش على نونو ثانيا دى اجازتى بعد سنين طويله غربه من حقى يعنى اعيشلى يومين و لا ايه يا جماعه
امانى / والله يابنى البيت فضى عليا انا و ابوك
حسام / ايه الكلام ده يا حج الناس تقول علينا ايه ما يصحش كدا
حسام يغمز لابوه
محمد / اتلم ياله
حسام / اسف يا حج هههههههههههههههه
مها / ما تاكلى يا ندى
ندى بضيق
ندى / باكل
حسام / فى حاجه ؟
ندى تهز راسها لا
اروى / معلش بقى يا ندى ما جتلكيش اصبح عليكى قولت هشوفك هنا و خلاص
ندى / عادى
اروى / و انتى بقى مش ناويه تكملى كليه
ندى / ربنا يسهل
حسام / ما انتى كملتى يا اروى فرقت معاكى فى حاجه
اروى / ازاى يعنى هتساوى شهاده ليسانس بثانويه عامه
حسام / المهم النتيجه فى الاخر
ندى / حسام مش مانعنى يعنى انا هحول انتساب و انزل على الامتحانات مش كدا يا حسام
حسام / طبعا يا قلبى
حسام يمسك ايد ندى و يبوسها تسحبها و تبص فى الطبق و اروى متابعه
حسام / صحيح مش هنضيع اليوم فى الاكل انجزوا عشان اوريكوا المفاجاه و نروح
الست / لحقت تزهق مننا برده يا حسام اخص عليك
مروان / ماتزعليش يا عمتوا الغربال الجديد له شده
ندى / لا والله يا عمتوا بس احنا بنلف على الورق من الصبح و بجد تعبانين و هموت و انام
امانى / بعد الشر عنك يا قلبى اتغدى و خشى ريحيلك ساعتين
حسام / هو فى ايه يا ماما هو انا دافع الفلوس دى كلها عشان ننام فى اوضتى بقولكوا ايه هناكل و نتفرج على المفاجاه و نروح خلصت
………………………
فى مطعم جنب الكليه
غاده / الواحد ادمن فول السجق بتاع الراجل ده والله مش معقول
عمر / الف هنا
غاده / الواحد يضرب سندوتش من ده و يدخل السيكشن يتنح فى وش العيال فاكر لما اطردنا كلنا عشان نمنا فى السيكشن
عمر / ابوس ايدك ما تفكرنيش يوميها انا كنت ضارب يجى خمس سندوتشات و روحت فى غيبوبه
غاده / و نصحى فيك عشان تطلع بره و المعيد يزعق و انت ميت اصلا
عمر / الواد عماد الجزمه هو السبب قعد يقول مسابقه مسابقه
غاده / بس كسب الجزمه اكل يجى عشر سندوتشات
عمر / و لا يبان عليه اصلا مش عارف بيودى الاكل ده فين
غاده / بحقد عليه جدا ههههههههههههههههههههههههه
عمر يضحك و يبص جنبه يلاقى أية واقفه بره لابسه اسود بتبص عليه من ورا ازاز المحل
عمر / ثوانى
غاده / فى حاجه ….عمر … عمر
عمر يطلع ل أية بره
عمر / خير اؤمرى
أية / ابوك لسه ميت امبارح و انت قاعد بتضحك مع السنيوره مش كدا
عمر / و انتي مالك بقى
أية / صح انا مالى انا الغلطانه اصلا اياكش تولع بيها فى نار جهنم
أية تمشى عمر يجرى وراها
عمر / أية … أية
عمر يمسك ايدها
أية / عاوز ايه
عمر / انتى عرفتى ان انا هنا منين
أية / انت موقفنى عشان تعرف عرفت مكانك ازاى
عمر / امال عشان سواد عنيكى
أية / شوفتكوا و انتوا خارجين من الكليه و مشيت وراكوا
عمر / مشيتى ورا العربيه
أية / الدنيا زحمه انا اسرع من العربيه
عمر / انتى عاوزه منى ايه يا أية مش كفايا اللى عملتيه زمان
أية / انا عاوزه اقولك ان باباك باع لماما الحاجه لما كان زعلان منكوا بس هو كان ناوى يصالحكوا عشان كدا جالك الكليه
عمر / شكرا حاجه تانى
أية / انا قولتله الحقيقه والله يا …
عمر / يا دين امى … أية أية انتى ما وراكيش دروس ما وراكيش مدرسه اى بتنجان روحى يا ماما اطلعى من نفوخى بقى
أية تبصله و عنيها تتملى دموع و تمشى و هو يبص عليها و يتنهد
………………………..
فى الفندق
ندى قاعده ماسكه صور فى ايديها و بتتفرج عليهم
ندى / حلوين اوى
حسام / بصى الصوره دى انتى عامله زى الملايكه كنتى سرحانه فى ايه
ندى / فى نفسي
حسام / فى نفسك !!!!
حسام يفرد ايده على الكنبه على ضهر ندى
ندى / كنت بقول يا ترى الناس اللى عمالين يرقصوا دول هيعملوا ايه لما يعرفوا الحقيقه
حسام / حقيقه ايه
ندى / حقيقه اننا بنمثل كل الصور دى تمثيل الضحك ده مش حقيقى انا ما كنتش مبسوطه
حسام / انا كنت مبسوط حتى لو تمثيل مبسوط
ندى / ليه و ايه اللى جابرك ليه تتحمل حاجه زى دى
حسام / و ليه ما اتحملش … ام بصى لو قالولك بعد الشر يعنى هتموتى كمان شهرين
ندى تبصله
حسام / هتضيعى الشهرين دول فى العياط و الهم و النكد و لا هتعملى كل اللى تقدرى عليه عشان الشهرين دول يبقوا احسن شهرين فى حياتك و تعملى فيهم كل اللى ما كنتيش تقدرى تعمليه لو عمرك لسه فاضل فيه مليون سنه
ندى / مش عارفه بس حتى لو فكرت زيك اكيد من جوايا هكون مضايقه
حسام / لما جالى العقد و سافرت كنت فرحان اوى كنت فاكر ان خلاص الدنيا ضحكتلى و هعمل كل اللى بحلم بيه بس اول ما وصلت هناك و دخلت السكن و لقيتنى لوحدى فوقت عرفت ان الغربه مش حلوه اوى زى ما كنت فاكر حتى زمايل الشغل اللى عاملين صحابك مع اول تضارب مصالح بينهم و بينك هيخزوقوك كلو بيدوس على كله لا عيش و ملح بقى و لا صداقه و لا ابن بلدى و لا بتنجان كلو يلا نفسى لما تعيا مفيش ايد تناولك كبايه ميه و لما تتعب مفيش كتف يسندك همك ما يشيلوش الا صدرك عشان اللى هتحكيله ياما مش هيفيدك ياما هيفرح فيك
ندى / للدرجادى
حسام / و اكتر مرتب ملاليم اه لو حسبتيها بالمصرى مبلغ محترم كل شهر بس ما يساوش انك تبقى قاعد لوحدك طول الوقت ما يساويش اكله حلوه من ايد ماما و لا لحظه غلاسه من نور و لا ضحكه منك خلاص انا ايه اللى يجبرنى ما انزل مصر و اكلها بدقه جنب حبايبى و لا انيش اكون لوحدى
ندى / و ما نزلتش ليه
حسام / عشان اللحظه دى يا ندى اللحظه اللى فى الصور دى التمثيل عشان لما انزل مصر و اتجوزك و تبقى بتاعتى احققلك كل اللى بتحلمى بيه ما يجيش عليكى يوم و تحسى ان فى حاجه نقصاكى عشان اخلى الكل يغير منك و ما تغيريش من حد
ندى تبصله و ساكته حسام يشيل ايده و ينفخ
حسام / ست سنين بحط القرش على القرش بحوش مرتبى كله تقريبا مفيش غير اكلى حتى الهدمه بستخسر اجيبها لنفسى انا مش جاى اتفسح انا جاى اكسر قرش عشان اللحق انزلك بدرى بشتغل زى الحمار ليل نهار بترقى بسرعه مرتبى بيزيد و المسافه بتقصر ما كنتش ناوى انزل غير و انا جاهز لحد ما اتصلت بماما مره و انتى كنتى هناك و قولتليلى انزل بقى وحشتنى نزلت فى اول فرصه
ندى / العبايه و الطرحه و ازازه البرفيوم لسه عندى فى البيت هناك
حسام / لا الحقيقه هما كانوا تلاته تلت عبايات و تلت طرح و تلت ازايز برفيوم بس لما نزلت ماما قالتلى ان نور و اروى هيزعلوا انى ما جبتلهمش حاجه فقسمتهم بينكوا تصدقى انى كنت بضايق لما بشوف حتى اختى لابسه العبايه بتاعتك دى
ندى تبص فى الارض
حسام / ما كنتش اعرف ان وانا بطحن نفسى فى الشغل بره فى واحد تانى بيسرقك منى ما جاش فى بالى يوم ان كل التعب ده هيروح فى الارض
ندى تقوم و تمشى و خطوتين و تقف و ترجعله
ندى / يا حسام انت بتكلمنى كانى المسؤله عن سفرك انت لما سفرت انا كان عندى عشر سنين انا كنت عيله فى ابتدائى حب ايه اللى حبتهونى بس
حسام / و مين قالك انى حبيتك و انتى عندك عشر سنين انا حبيتك من اول لحظه اتولدتى فيها لما لفيتى صوابعك الصغيرين حوالين صباعى و مسكتى جامد و كانك بتقوليلى ما تسبنيش انا ما حبتكيش من ست سنين انا حبيتك من تمنتاشر سنه عمرى ما شوفت بنت غيرك عمرى
ندى تسكت
حسام / اوعى تفتكرى انى بقولك الكلام ده عشان اى حاجه يعنى لا انا بقوله عشان تفهمى انا ليه مستعد استحمل كل ده و اسكت و تعرفى انا مستعد استحمل اكتر انا مستعد اطلقك و اجوزك لغيرى بايدى لو ده هيسعدك مستعد
ندى تدخل الاوضه و تقفل الباب
………………………
فى المحل بتاع الشاورما
انور / سفر ايه يا على اللى انت عاوز تسافره
على / مش قادر اقعد هنا اكتر من كدا مش لاقى نفسى فى البلد دى
انور / عاوز تسبنى يابنى بلاش انا عاوز تسيب اخوك لمين
على / والله على عينى بس كل حاجه هنا خنقانى
انور / يابنى ربنا ما بيعملش حاجه وحشه فى حد و انت يابنى ياما شوفت
على / ما يمكن ده اللى تاعبنى يا حج انى مش ملاحق تعبت و جبت اخرى
انور / و انت فاكر انك فى الغربه هترتاح دانت هتلعن اليوم اللى فكرت فيه فى السفر
على / على الاقل هبقى بعيد عن كل المشاكل و القرف اللى هنا هنسى الذكريات الزباله اللى عشتها
انور / بيتهيالك انت هتبعد عن هنا اه بس الزكريات فى دماغك و دماغك هتروح معاك
على يبص لانور
انور / انا عارف ان جواز ندى و موت ابوك فى نفس اليوم ضربتين فى الراس توجع بس انت اجمد من كدا يا على ياما دقت على الراس طبول يا ابنى … بص يا على انا ربنا صحيح ما اكرمنيش بخلفه بس انت و اخوك بالنسبالى اكتر من ولادى اللى ما خلفتهمش ساعات بحس زيك كدا انى هعيش لمين و ما عدليش لازمه بس انت يا ابنى رجعتلى الامل انى اعيش تانى انا اه يمكن عمرى ما حاولت اعوضك عن حنان الاب بس..
على / ما تقولش كدا يا حج دانت فضلك عليا كبير لولاك كان زمانى واد صايع فى الشارع مدمن و لا مجرم
انور / اسمع يا على يابنى
عمر يعدى من غير ما يسلم و يطلع على فوق
على / ماله ده
انور / اطلع شوفه و شيل موضوع السفر من دماغك و نكمل كلامنا بعدين
على يهز راسه و يمشى
……………………………
فى شقه نور
مروان / والله اخوكى ده هيتحاسب على الفلوس اللى عمال يبعزقها يمين و شمال
نور / يا سيدى هى فلوسنا
مروان / انا قولتله يشاركنى فى مشروع و نفتح صيدليه هنا باسمه هو ما رضيش
نور / يا سيدى هو مش عاوز يعيش فى مصر
مروان / بس انا لسه قلبى مش مستريح لموضوع جوازه السريع اوى ده طب كان خلص الاجراءات و بعدين اتجوز الحكايه فيها ان
نور / يا مروان يا حبيبى خلينا فى حالنا صحيح كنت عوزاك فى موضوع
مروان / خير
نور / عمتى كلمتنى عن دكتور شاطر اوي ما تيجى نروحله يمكن ربنا يجعل فى ايده الشفا
مروان / يابنتى ارحمى نفسك كل شويه تعلقى نفسك بحبال دايبه هو يعنى كل الدكاتره اللى فاتوا اللى قالوا نفس الكلام حمير و ده اللى بيفهم ما خلصنا من الموضوع ده بقى
نور / يا مروان
مروان / بقولك ايه انا زهقت عاوزه تروحى خدى امك معاكى انا داخل انام
مروان يقوم و يسيب نور قاعده
………………………..
فى شقه عمر
عمر قاعد على السرير بهدومه على يدخل
على / ما لك يابنى فى ايه طلعت لا سلام و لا كلام
عمر / مخنوق
على / مش قدى روحت للمحامى بس ما طمنيش قال هيرفع قضيه بس
عمر / لو طلعت مزوراهم هتعمل ايه هتطردهم هترمى مرات ابوك و بنتها فى الشارع
على / و تصعب عليا ليه كنا صعبنا عليها على الاقل هى و بنتها كبار لكن احنا كنا اطفال صغيرين
عمر / يمكن عشان كدا ابوك كتبهملهم
على / انت بتقول ايه يا عمر
عمر / ما بقولش انا مخنوق و عاوز انام
على / لا مفيش نوم فى ايه مش عاوز نرفع قضيه عاوز تسيب حقك براحتك لكن حقى مش هسيبه
عمر/ اعمل اللى يريحك يا على سبنى فى حالى
على يقعد جنب عمر
على / مالك يا عمر فيك ايه
عمر / أية بتقول ان بابا جالى الكليه عشان يراضينى
على / تلاقيها تمثيليه جديده بعد ما روحت عرفتها مقامها فى المحل
عمر / ليه كدا يا على الناس يقولوا ايه ولاد محمود حقى ما صدقوا مات و افتروا على مراته
على / ما يولعوا الناس حد من الناس دى اكلنا و احنا جعانين
عمر / انت ايه اللى جرالك
على / هى البت دى جتلك الكليه تانى
عمر / اه يا سيدى و مش اول مره
على / هى عاوزه منك ايه مش مكفيها اللى عملته عاوزه ايه دى
عمر / عوزانى اسامحها بتحلف انها قالت لبابا الحقيقه
على / والله و ايه كمان
عمر / فى كل مره بتيجى بتحط على قلبى حجر يا على صعبان عليا نفسى منها اوى
على / امال مش عاوز تاخد حقك منهم ليه
عمر / عشان مش فارقين معايا يبعدوا عن حياتى يبعدوا عنى يخرجوا من نفوخى ما تنطليش كل يوم قدام الكليه دا مكان اكل عيشى يعنى
على / لو جتلك تانى ما تسكتلهاش هزقها
عمر / يا سلام
على ينفخ
عمر / سيبك انت انا جعان ما تقوم تشوحلنا حتتين كبده من ايديك الحلوه دى
على / كبده !!!
عمر / مش عارف هفت عليا كدا
على يزغزغ عمر
على / لتكونى بتتوحمى يا بيضه
عمر / هههههههههههههههههههههه بس يا رخم
على / من عنيا هعملك
…………………………..
فى الفندق
حسام نايم على الكنبه ندى تفتح باب الاوضه و تطلع تقعد على الارض جنبه
ندى / حسام … حسام
حسام يفتح عينه و يقوم يقعد
ندى / انا هنام لو عاوز تيجى مكانك فاضى و ان شاء الله مش هزقك تانى
حسام / ما لوش لزمه رقبتى خفت خشى انتى ارتاحى
ندى / انت زعلان منى
حسام / على ايه
ندى / حسام انا عارفه انك طيب و ابن حلال انت ابن عمى يابنى بس مش بايدى
حسام / انتى بتقولى ايه انا ما طلبتش منك تحبينى انا ما طلبتش منك حاجه
ندى / عارفه بس معاملتك الحلوه و كل ده حاسه انك .. حاسه بالذنب
حسام / بطلى هبل و خشى نامى
ندى / انا عماله اصلى و ادعى ربنا يخلينى اشوف الطريق الصح حاسه انى تايهه
حسام / ليه بس يا ندى
ندى / ما اعرفش انا عارفه ان على ما عندوش يعملى كل اللى انت بتعمله و عارفه انك تعبت اوى عشان تبقى كدا بس انت مش قادر تفهم على كمان تعب اوى فى حياته على ما كانش عنده اللى يساعده بنى نفسه بنفسه بيشتغل عشان يصرف على نفسه و على اخوه
حسام / و انا مين ساعدنى
ندى / عمى و طنط ربنا يخليهملك على الاقل علموك و جابولك العقد صحيح انت كملت بس هما ساعدوك على الاقل مهدولك طريقك لكن هو بدا من تحت الصفر
حسام / انتى بتقوليلى الكلام ده ليه … ليه بتقارنينى بيه اصلا
ندى تبص لحسام اللى قام و سابها و دخل الحمام و طلع لابس و نزل و رزع الباب وراه و نزل و ندى تقعد مخنوقه تنفخ
…………………………….
تانى يوم الصبح فى مكتب العميد
العميد / ما تقلقيش حضرتك انا ان شاء الله هحلها
الباب يتفتح و عمر يدخل
عمر / حضرتك طلبتنى
عمر يبص على سمر قاعده سمر تقوم تقف
سمر / استاذن انا اسفه ان كنت ضيعت وقت حضرتك
العميد / لا ازاى اتفضلى
سمر تمشى و عمر بيبص عليها
العميد / اقعد يا عمر
عمر / خير حضرتك
العميد / اسمع يا عمر انا درستلك اربع سنين كاملين و انت الحقيقه من الشخصيات القليله اللى كنت سعيد انها اتعينت فى الكليه
عمر / شكرا راى حضرتك دا شرف ليا
العميد / حاول تحل مشاكلك العائليه يا عمر خصوصا بعيد عن الكليه
عمر / مشاكل عائليه ايه حضرتك
العميد / انت عارف طبعا مين اللى كانت قاعده هنا
عمر / دى مرات والدى الله يرحمه مالها
العميد / الست جتلى و هى بتعيط و تقول انها ملهاش حد تشتكيله و انكوا عاوزين تطردوها هى و بنتها من بيتها بالقوه
عمر / والله العظيم
العميد / اسمع يا عمر انا كل اللى طالبه منك انك تبعد مشاكلك العائليه عن الكليه
عمر / الست دى كدابه اصلا
العميد / انا كلامى واضح حل مشاكلك بعيد عن الكليه يا عمر
عمر / انا اسف حضرتك اوعدك انها مش هتتكرر
………………………..
فى اوضه ندى
حسام يدخل الاوضه يلاقى ندى نايمه على الكنبه يوطى عليها و يشيلها تتفزع و يحاول يلحقها ما يقدرش تنزل على الكنبه مفزوعه
حسام / هههههههههههههههههههههههههه
ندى تبصله و هى مصدومه و مش فاهمه
حسام / دا انتى مصيبه بجد ما شوفتش كدا فى حياتى
ندى / هو انت جيت
حسام / لا لسه زمانى جاى استنينى
ندى / ايه الخفه دى
حسام / انتى ايه اللى منيمك هنا
ندى / كنت مستنياك ايه ده احنا بقينا الصبح
حسام / ما نمتيش جوه ليه
ندى / قولتلك مستنياك
حسام / لو اعرف كنت رجعت
ندى / كنت فين اصلا سايبنى قاعده اضرب اخماس فى اسداس كنت فين
حسام / كنت بلف بالعربيه
ندى / تصدق انا الغلطانه
حسام / فطرتى
ندى / و لا اتعشيت على فكره انا مش هتكلم معاك تانى ما ينفعش ابدا تسبنى و تمشى كدا
حسام / حقك عليا انا هخليهم يبعتولنا فطار
ندى / مش عاوزه انا هدخل انام
ندى تقوم حسام يمسك ايدها
حسام / ما بحبش القمص
ندى / انت اللى بدات
حسام / والله!!! انتى تزعلينى و لما ازعل انتى تزعلى لا حلوه بجد
ندى / انت سايبنى لوحدى يا حسام لوحدى
حسام يقرب منها و يبوس راسها و هى مش عارفه تعمل ايه
حسام / حقك عليا مش هعمل كدا تانى بس انا كنت مخنوق اوى لقيت انى هقول كلام مش هينفع ارجع فيه فمشيت بس اوعدك انى هتحكم فى اعصابى بشكل احسن المره الجايه معلش
ندى تهز راسها
حسام / خشى اغسلى وشك على ما اطلب الفطار
ندى تهز راسها و تدخل الحمام حسام يطلع من ايده علبه دوا يبص عليها ويحطها فى جيبه تانى
………………………….
فى شقه على
على / هههههههههههههههههههههه
عمر / انت بتضحك انا هطق و انا اللى كنت بقول نسيبها فى حالها والله ما هعديهالها بنت الجزمه
على / هتعمل ايه يعنى
عمر / مش عارف بس هسكت يعنى دى ما كفهاش اللى عملته فيا بتاذينى فى شغلى كمان
على / الحمد لله انها جت على قد كدا
عمر / وربنا وربنا
على يروح يفتح درج فى الدولاب و يقلب فى الهدوم و يطلع سلسله اطفال مقطوعه و يحطها فى ايد عمر
عمر / انت بتفتش فى حاجتى
على / انا ؟؟؟ انت اخر مره رتبت دولابك امتى و لا العفريت هو اللى بيطبق هدومك و يرصها مكانها
عمر / مانا اللى بغسل
على / شوفتها مره و انت ما بتغيرش مكان حاجتك و ما اسمهاش بتفتش فى حاجتى و بعدين ما افتش يعنى مش يمكن الاقى حاجه كدا و لا كدا اخوك برضه
عمر / ههههههههههههههههههه
على / اضحك أضحك
عمر / انت بتدينى دى ليه انت عارف كويس انا محتفظ بيها ليه
على / عشان ما تنساش اللى صحبتها عملته فيك زمان و يوميها نصحتك ترميها و تنسى و واضح انك ما سمعتش كلامى
عمر / مش فاهم تقصد ايه
على / لا انت فاهم كويس اوى انا نازل اشوف شغلى سلام
…………………….
فى الفندق
ندى تطلع من الحمام تلاقى الفطار محطوط
حسام / كنت هخونك بتعملى ايه كل ده
ندى / هو انا طولت اوى كدا
حسام / انتى لسه زعلانه
ندى / لا عادى
حسام / بصى ايه رايك ننسى كل اللى حصل احنا هنفطر و ننام شويه عشان انا تعبان و لما نصحى هاخدك فسحه نبدا بيها من الصفر انتى معاكى حق القلوب مش بايدنا و ما حدش يقدر يسال حد انت بتحب حد ليه هو الحب بيجى كدا و اطهر حب هو اللى بيكون من غير مقابل
ندى تبتسم
حسام / بصى براحتك بقى انا واقع بصراحه
حسام يقربع نص كبايه العصير
حسام / العصير ده تحفه بجد انا تقريبا ادمنته مش عارف بيعملوه حلو اوى كدا ازى
ندى تقعد جنب حسام و تبدا تاكل يطبطب على ضهرها تبصله يبتسم
………………………..
فى شقه حسام
محمد / مالك يا امانى من امبارح و انتى مبلمه
امانى / هو مصطفى اخوك مجبور على الجوازه و لا ايه
محمد / ايه الهبل ده لا طبعا
امانى / امال كان ماله امبارح ان كان هو و لا مراته تحسهم مش مظبوطين
محمد / بيتهيالك و بعدين انتى نسيتى كنا عاملين ازاى لما نور اتجوزت و سابت البيت
امانى / حقه والله دانا كان قلبى اتخلع من مكانه بس انا مش بتكلم على كدا يا ابو حسام انا اقصد ان المفروض اول ما ندى كانت تدخل كان اولى تاخد ابوها و امها بالحضن دى تقريبا ما اتكلمتش مع ابوها كلمتين على بعض
محمد / تلاقيها كانت مكسوفه من اللمه هى يعنى نطقت كلمتين على بعض مع غيره
امانى / على رايك بس انا بقولك اهو تكلم حسام يلم ايده فى المصاريف شويه مش كدا
محمد / فلوسه و هو اللى تعب فيها يبعزقها زى مهو عاوز
امانى / الله يابو حسام بكره ربنا يكرمهم بعيل و يبقوا محتاجين الفلوس دى
محمد / يا امانى يا حبيبتى الواد بقاله ست سنين غربه و اجازته اليتيمه اللى نزلها تقريبا يا عندنا يا عند عمه سبيه يفك عن نفسه و ينبسط انتى عارفه الغربه حبسه
امانى / انا بس اقصد
محمد / ما تقصديش بطلى انتى بس تفكير و الدنيا هتمشى زى الفل
…………………………
فى شقه أية
الباب يخبط أية تروح تفتح
عمر / ازيك
أية / فارق معاك
عمر / انا جيت اديكى دى
أية / هى لسه معاك
عمر / معايا كنت محتفظ بيها عشان ما انساكيش
أية تبتسم و بعدين تبصلها و البسمه تروح
عمر / خليها معاكى صلحيها ارميها عنيها براحتك
سمر تطلع
سمر / انت ؟؟؟ بتعمل ايه هنا
عمر / جاى اقولك ان اللى عملتيه النهرده عيب اوى و لو فاكره انك لما تاذينى فى مكان اكل عيشى هيخلى على يرجع عن القضيه بتاعته تبقى غلطانه
سمر / خلصت ؟؟ استنى ثوانى
سمر تدخل الاوضه تجيب شنطه و تروح تديها لعمر
سمر / لاخر مره دا نصيبكوا و ما لكوش عندى قشايه زياده
عمر يمسك الشنطه و يفتحها و يبص فيها مليانه فلوس يقفلها و يبص ل أية
عمر / قبل ما تفترى عليا بيومين كنت وعدتك انى هزفك لعريسك خدى
على يديها الشنطه
على / كدا انا مش ملزم ناحيتك باى حاجه اعتبريهم فلوس جهازك ما تديهمش لامك سلام
عمر يرزع الباب وراه و يمشى
سمر / السكه اللى تودى فى ستين داهيه جته مصيبه تشيله … هاتى الشنطه دى
سمر تحاول تاخد الشنطه من أية أية تبعد ايدها
سمر / ايه انا هعينهالك
أية / الفلوس دى مش بتاعتنا
سمر / ايه هتجرى وراه تديهاله
أية / لا بس هعينهاله يمكن يحتاجها و يرجع يطلبها
سمر / يطلب ايه انتى هتنقطينى الواد ده لو عتب هنا تانى هقطع رجله هروح القسم و اعمله محضر و احبسه هو و اخوه
أية تبص لسمر و تاخد الشنطه و تدخل اوضتها
سمر / صحيح ما تخافش من الهبله خاف من خلفتها صبرنى يارب
………………………..
فى الفندق
ندى نايمه فى السرير سخنه و حسام قاعد جنبها بيعملها كمادات
حسام / هانت يا قلبى استحملى شويه ساعتين بالكتير و مفعول الدوا هيروح
حسام يغير الكمادات
حسام / انا حاولت معاكى بكل الطرق اعملك ايه على الله بس لما تفوقى و تلاقينى متنيل جنبك كدا تفهمى قد ايه بحبك و تعرفى ان دى رساله من ربنا على صلاتك
ندى تكح تكح حسام يسندها يقعدها ترجع عليه يغمض عينه بقرف و يجز على سنانه
حسام / شاطر يا حسام شاطر
حسام يجز على سنانه و يقوم يدخل الحمام
……………………..
فى شقه على
عمر / مالك قاعد كدا ليه
على / صدرى مقفول
عمر / الموضوع ده بقى بيجيلك كتير من اخر مره عيت فيها نروح لدكتور احسن و لا ايه
على / مش عارف هتصدقنى و لا لا لو قولتلك ان جوايا احساس قوى ان ندى …
عمر / على فوق ندى خلاص فى عصمه راجل تانى انسى ماشى انسى
على / اووووووه …. بقولك ايه فكك منى روحت ل أية
عمر / خلاص
على / ما حصلش مشاكل يعنى
عمر / مشاكل ايه عادى يعنى حوار و خلص مش قضيه
على / بطمن بس
عمر / اطمن نام نام عندى كليه الصبح
على / تصبح على خير
عمر / و انت من اهله
………………………..
فى الفندق
حسام خارج من الحمام لابس البرنص و بينشف شعره بالفوطه يسمع ندى بتهلوس يقرب منها و يسمع
ندى / على … على
حسام يحدف الفوطه على اخر دراعه و هو متنرفز و بيزعق
حسام / لا بقى
ندى / انت فين
حسام يقرب منها و يحضنها
حسام / انا هنا يا حبيبتى انا جنبك انا جنبك
حسام يغير الكمادات
…………………………
فى الكليه تانى يوم
غاده / طب الحمد لله انك حليت الموضوع
عمر / هو ما كانش فى موضوع اصلا
غاده / بس حركه وحشه اوى انها تيجى تعملك مشاكل هنا فى الكليه كان المفروض تقولها على اللى بنتها بتعمله و انها كل شويه تنطلك
عمر / حصل خير يا غاده موضوع و خلص انا مروح هتعوزى حاجه
غاده / بقولك ايه مروح ايه انا فى موضوع مهم اوى لازم اتكلم معاك فيه
عمر / خير
غاده / ما ينفعش هنا ممكن نتكلم بره فى اى حته
عمر / طبعا اتفضلى
…………………….
فى الفندق ندى تفوق تلاقى حسام حاضنها و هو لابس البرنص تتفزع و تزقه
ندى / هو فى ايه ايه اللى حصل
حسام / ندى انتى كويسه يا حبيبتى حرارتك نزلت
ندى / انت .. انت … فين هدومك
حسام يبص على نفسه
حسام / انا اسف
حسام يجرى على الدولاب يشد هدوم و يدخل الحمام جرى ندى تبص يمين و شمال تلاقى جنبها طبق فيه ميه و حتت مقطعه و تبص الارض مش نضيفه تبص على هدومها و تتخض و تقوم تجرى على الحمام
ندى / حسام … حسام
حسام يطلع من الحمام و هو بيدخل القميص فى البنطلون
حسام / ايه يا قلبى عامله ايه دلوقت
حسام يحط ايده على راسها تزقها
ندى / مين اللى غيرلى هدومى ايه اللى حصل امبارح
حسام / انا . كانت مبلوله جدا و خفت
ندى / باى حق تقلعنى هدومى باى حق انت ازاى تجرؤ اصلا هى دى القرابه هى دى ثقتى فيك
حسام / الكلام ده ليا انا
ندى / امال لمين و نايم جنبى بالبرنص انهى وقاحه دى انهى قله ادب
حسام بمنتهى العصبيه
حسام / وقاحه و قله ادب تصدقى انا الحق عليا انى فضلت سهران طول الليل جنبك اعملك كمادات انتى كنتى مولعه امبارح يا هانم
ندى / انت بتقول ايه
حسام / و بالنسبه لهدومك انا ما غيرتهاش عشان هموت و اشوف جسم حضرتك لا فوقى انا اضطريت اعمل كدا عشان هدوم حضرتك كانت غرقت ميه من الكمادات و خفت تعييى زياده
ندى تبدا تلين
حسام / و بالنسبه لهدومى ممكن تفهمى ايه اللى جرالها لما تخشى الحمام و تشوفيها و لا على ايه بصى فى الارض و استنتجى خدت ايه انا من سهرى جنبك راحت عليا نومه ايه اجرمت
ندى / حسام
حسام بعصبيه
حسام / نعم
ندى / انا ..
حسام / انتى ايه
ندى / انا اسفه .. بس حط نفسك مكانى انا اتخضيت
حسام / انا ممكن اعدى اى حاجه يا ندى ممكن اسامح فى اى حاجه الا انك تتهمينى انى بستغلك انتى متخيله انى ممكن ائذيكى بالشكل ده انتى ازاى اصلا عقلك يصورلك انى ممكن اعمل حاجه زى دى
ندى / انا اسفه بس ما كانش يصح تغيرلى هدومى برضه
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية سلف ودين)
