رواية مطلقه في قلب صعيدي الفصل الثامن 8 بقلم مروة ماجد
رواية مطلقه في قلب صعيدي الجزء الثامن
رواية مطلقه في قلب صعيدي البارت الثامن
رواية مطلقه في قلب صعيدي الحلقة الثامنة
بسم الله والصلاه والسلام على رسول الله ، صلى الله عليه وسلم
نعمه دخلت بزعابيبها وهى بتدور بعيونها على نغم ، اما حسن بيسلم عليها وهو من جواه متضايق اوى وبيقول
مكنش وقته وصولك يا نعمه
نعمه بعد ما سلمت على حسن بتنادي على الشغاله وتقول
بت يا إصلاح، ،،، انتى يا حزينه ياللى اسمك إصلاح،
إصلاح من بعيد بتجرى وهى شايله طرف جلبيتها وتقول
يا مرحب يا مرحب بست الناس نورتى البلد كلاتها
نعمه بتقاطعها فى الكلام وتشدها من قفاها وتقول
اخرسى يا حزينه ، وانطقى امال فين السنيورة المطلقه ، تكونش قلت حياها واخوى حسن اسم النبى حارسه وصاينه طردها طرده الكلاب
إصلاح بتقف وتلوى بوقها يمينا ويسارا وتقول 😏
اممم قلبك ابيض يا ست الناس يطردها دة ايه ، دى قعدت وربعت وسى الدكتور حسن مش بيفطر ولا يدوق الزاد الا والسنيورة قدامه ، وبينى وبينك يا ست نعمه هانم البت تفتح النفس بتلعلط اكدة بتلعلط 💃
نعمه بتضايق من كلام إصلاح وتضربها على قفاها بالقلم وتقول
بس اقفلى خشمك يا حزينه، هى دى نسوان امال لو شوفتينى لما اكون رايقه ولا ليا مزاج بابقى قمر الله اكبر عليا ، بس خلاص اسكتى وخلينى افكر فى المصيبة دى هنعمل فيها ايه
ولسه نعمه بتدور بعيونها على نغم وكانها ناويه تضربها ، وبيقرب منها حسن ويقول
نعمه انتى نسيتى انك تدخلى تسلمى على امك
نعمه اتكسفت وراحت تسلم على امها ، ولسه نغم فى البلكونه ، اللى دخلها حسن تانى وفاكر ان الحوار الرومانسي اللذيذ اللى كان شغال هيكمل دلوقتى
حسن
نغم ، نعمه اختى جت ، من فضلك مش عاوزك تتعاملى معاها الا فى أضيق الحدود وبرضو مش عاوز حد يعرف انى راسم ليكى صورة فى اوضتى
نغم
خلاص يا دكتور حسن اتفقنا ، وعلى فكرة انا مش زعلانه انك رسمتنى انت اللى زيك مبقاش موجود فى الزمن دة
حسن
طيب ممكن بقى نرفع الالقاب شويه ، يعنى انتى نغم وانا دكتور حسن عادى هههههه
نغم بتضحك على هزار حسن والقعده برضو ماشيه حلوة اوى ، وفجأه بيدخل عليهم الاستاذ هادى ، وياخد حسن بالحضن وهاتك يا بوس ، ويمد ايدة يسلم على نغم ولكن نغم بترد بكل زوق وتقول
اهلا استاذ هادى حمدالله على السلامه، انا اسفه مش باسلم على رجاله ، بس حضرتك نورت الصعيد
هادى اتكسف شويه بس برضو ماحبش يبين كسفته وقال
الله عليكى جمال وعقل ودين ، بصراحه انا مش فاهم مين الحمار اللى طلقك دة
نغم سكتت ثوانى وحسن كمان اتصدم من غباء وكلام هادى ، لكن نغم ردت وقالت
استاذ هادى ، انا متشكرة اوى لمجاملتك ليا ، بس انا مكنتش متجوزة حمار ، انا كنت متجوزه مهندس محترم ويبقا والد ابنى وماسمحش لحد يجيب سيرته باى حاجه وحشه مهمها كان السبب
هادى كسفته زادت اوى واستأذن وسابهم وطلع يدور على عمله الأسود اااا قصدى نعمه هانم
نغم اضايقت اوى من كلام هادى ، لكن مش اكتر من غيظ حسن لانه حس بالغيرة انها بتتكلم عن طليقها بالطريقه المحترمه اوى دى وقال
حسن
على فكرة انا مكنتش اعرف انك لسه بتحبى ابو ادهم كدة ، وعلى فكرة لو حابه انى ادخل وأصلح ما بينكوا معنديش مانع
نغم
لا خالص يا حسن انا مش باحبه ولا حاجه بس باحترامه جدا لانى على الاقل اكلنا سوا عيش وملح وانا ماقدرش اخون العيش والملح ، وبينا ولد ملهوش ذنب ان الناس تشتم ابوة ومن غير سبب
حسن إعجابه بيها بيزيد وعاوز يقعد معاها اكتر ويتكلم وتحكى ليه عن ظروف طلاقها ، ولكن بعد ثوانى الفيلا كلها سمعت صوت نعمه وهى بتشتم فى الخدم وتقول
ايه القرف دة الفيلا مش نضيفه خالص وايه الريحه العفشه دى ، وامى الحاجه كمان تعبانه ولونها اصفر كأنها لا بتاكل ولا بتاخد الدوا فى معاده ، امال فين الست الدكتورة اللى بتاخد فلوس كل شهر من اخوى على قلبها قد اكدة
نغم سمعتها وخرجت وقالت
اها نعمه هانم حمدالله على السلامه، اظن ان الحاجه مكنتش افضل من كدة زمان ، واظن برضو انك تقدرى تسأليها ان كنت قصرت معاها فى حاجه او لا
نعمه مش مركزه فى كلامها وكل اللى مركزة فيه هو ان نغم كانت مع حسن فى البلكونه ومن غير تفكير قالت
اي دة يا سنيورة انتى طالعه من البلكونه ليه ، وليه حسن اخوى كان معاكى جوة ، انطقى بتعملى ايه فى اخوى
حسن اتعصب على نعمه وقال
نعمه ايه اللى انتى بتقوليه دة ،مدام نغم كانت بتشم هوا وانا باخد رأيها فى حاجه
نعمه
يا حلاوة يا ولاد وانت تاخد رايها بتاع ايه عاد ، ولا تكونش الست كانت شغاله فى مجلش الشعب واحنا مندراش ، ومن ميتى اصلا المطلقات رأيهم بيصيب ماهى لو كانت عدله وشاطره كانت نفعت روحها وعمرت بيتها
نغم ردت بكل هدوء وقالت
مدام نعمه للمرة المليون انتى ست لوكل وبيءه وقليله الزوق
وهنا نعمه بتحاول تركب الكلام على بعضه ، هى عارفه من زمان ان لوكل وبيءه دى كلام حلو انما قليله الزوق تركب معاهم ليه فى نفس الجمله
حسن اعتذر لنغم وطلب منها انها تطلع لوالدته فوق
وهادى واقف فى الركن وعمال يضحك على نعمه ، اخيرا لقى حد يهزء نعمه وهى مش فاهمه حاجه
نغم سابتهم وطلعت للحاجه اما نعمه فبرضو مش فاهمه حاجه ، وبدأت تمارس جبروتها على الخدامين وقعدت وقالت
انتى يا وليه يا إصلاح بنتك الموجوزة من كام شهر عامله ايه ولا تكونش هى كمان خابت وأطلقت
إصلاح بتخمس 🖐 من ورا نعمه علشان خايفه على بنتها من الحسد وبتقول
لا يا ست نعمه عقبالك بإذن الله بنتى حامل بقالها اربع شهور 🤰
نعمه اتصدمت والغيرة بانت اوى عليها وقالت بغل
واه ، حامل كيف دى متجوزة مبقالهاش شهرين
إصلاح وهى لسه بتخمس وتقول فى سرها الله اكبر الله اكبر
عقبالك يا ست نعمه ربك أراد من اول شهر
نعمه الغل والغيظ زاد اوى عندها وقالت
باقولك ايه يا إصلاح انا ماعرفش الدلع الماسخ دة بنتك تيجى اهنه زى زمان تكنس وتمسح وتلمع الفيلا كلاتها زى زمان انتى فاهمه ولا لا
إصلاح
طبعا يا ست نعمه بنتى خدامتك لكن يعنى هى تعبانه ولسه اول مرة حمل بلاش هى ، انا هاعمل اللى حضرتك عاوزاه وبلاش بنتى خلى ربنا يكملها على خير
نعمه بغضب
زى ما قولت كلامى يتنفذ يا وليه يا رطاطه انتى ، فاهمه ولا لا
إصلاح سكتت خالص وكانها بتدعى على نعمه فى سرها
وفوق عند الحاجه هادى بيتسحب علشان يبص على نغم ويشوفها وهى بتهزر وتضحك مع الحاجه ولا كأنه حاجه حصلت ، هادى بيحاول يمشى على طراطيف صوابعه وفجأه بيحس بايد نعمه على قفاه تمسكه وتقول
هادى اظن انى جيباك معايا اهنه علشان تنسى دروس الفرنساوي، مش معقول بقى تبقى معايا وأفضل اجرى وراك من جحر لجحر زى الفيران
هادى
ايه الكلام دة يا نعمتى هو انتى مش قادرة على نغم هتجيبى غيظك فيا ، بلاش تركزى معايا وخليكى فى حربك مع نغم اللى شكلها كدة مطوله مع اخوكى ومش بعيد يتجوزها ويربى ابنها
نعمه
اسكت خالص انت بتقول ايه ، حسن لا يمكن يتجوز غير واحده نقاوتى انا وتسمع كلامى وتنفذه كمان
ومر الليل على الفيلا الايوبي وكل واحد بيفكر فى حاله ، وبالليل نغم واقفه فى بلكونه اوضتها بتفتكر كلام حسن وازاى هو حبها من غير حتى ما يشوفها ، بتفكر فى تدابير القدر وازاى ربنا جمعهم بالطريقه دى
وتانى يوم الصبح حسن مقرر انه خلاص هيخرج عن صمته
حسن بيفطر بسرعه ويطلب من نغم انه عاوزها فى موضوع مهم بخصوص والدته ، وطبعا نعمه مش طايقه نفسها
نغم بتوافق وبعد الفطار نغم لفت نظرها بنت إصلاح الحامل والى باين عليها اوى التعب وهى بتنفذ كلام نعمه وتمسح الفيلا نغم بتقولها .
حبيبتى انتى مين انا اول مرة اشوفك
هنيه بنت إصلاح
انا هنيه بنت الست إصلاح
نغم.
اهلا بيكى ، انتى حامل صح واضح اوى وشكلك تعبانه كمان
هنيه
ايوة يا ست تعبانه قوى بس اوامر الست نعمه انى امسح الفيلا كلها
نغم
معقول كدة ، الفيلا نظيفه مش محتاجه مسح إنما انتى محتاجه راحه ، ايه رايك ترتاحي وكمان عندى فستان حلو اوى هيجنن عليكى ممكن تقبليه منى
وهنا بتدخل إصلاح وهى فرحانه اوى وبتدعى لنغم وتشكرها على المعامله الكويسه
وبالفعل نغم بتدى هنيه فستان حلو اوى والبنت بتلبسه وتطلع زى القمر ، ولسه هنيه ونغم واصلاح بيتكلموا وازاى هنيه تاخد بالها من نفسها فى الحمل
بيدخل حسن علشان مستعجل عاوز يطلب منها طلب ويشوف موقف هنيه واعجابه بيها بيزيد ،
نغم سابتهم وراحت مع حسن ، اللى بيحاول يستجمع قوته وبيقول
نغم ، انا صحيح متربى ومتعلم فى امريكا لكن برضو روح الصعيدى مسيطرة عليا ، وبصراحه بقى انا مااعرفش اقول كلام حلو من اللى بيدوب قلوب البنات ، ودوغرى اوى ، وعاوز اقولك انى عاوز اتجوزك
نغم عيونها بتلمع من الفرحه ومش عارفه ترد تقول ايه ، لكن للاسف نعمه بتتصنت عليهم وسمعت كلام حسن وقالت بصوت واطى
يا نهارك مش فايت يا مصراويه بقى كلام هادى طلع صح ، وراس ابويا ليكون اخر يوم ليكى فى الفيلا النهاردة
يا ترى نعمه بتخطط لايه
يا ترى تخطيط نعمه هينحج فى قطع حبال المحبه
ياترى المطلقه هتسكن قلب وبيت الصعيدى ولا لسه شويه
يتبع …
لقراءة الفصل التالي : اضغط هنا
لقراءة الرواية كاملة اضغط على : (رواية مطلقه في قلب صعيدي)
